ახალი ამბები
გარემოს დაცვისა და სოფლის მეურნეობის მინისტრის მოადგილე ხატია წილოსანი გაეროს სურსათისა და სოფლის მეურნეობის ორგანიზაცია (FAO) და გაეროს განვითარების პროგრამა (UNDP) წამომადგენლებს შეხვდა.
შეხვედრაზე მხარეებმა სოფლის მეურნეობისა და სოფლის განვითარების სტრატეგიების გაერთიანების საკითხი განიხილეს.როგორც მინისტრის მოადგილემ აღნიშნა, ევროპის სამეზობლო პროგრამა (ENPARD) IV ფაზის განხორციელებისთვის აუცილებელია სოფლის მეურნეობისა და სოფლის განვითარების სტრატეგიების შეჯერება და მისი ერთიანი დოკუმენტის სახით წარმოდგენა, რადგან (ENPARD) IV ფაზის განხორციელების საფუძველს სტრატეგიის გაერთიანებული დოკუმენტი წარმოადგენს.
ხატია წილოსანის განცხადებით, ახალ სტრატეგიაში სამინისტროს მანდატის ფარგლებში ყურადღება მათ შორის გარემოსდაცვით საკითხებზე გამახვილდება.
შეხვედრაზე მინისტრის მოადგილემ მადლობა გადაუხადა დონორ ორგანიზაციებს მხარდაჭერისთვის და აღნიშნულ დოკუმენტზე მუშაობის ნაწილშიც წარმატებული თანამშრომლობის სურვილი გამოთქვა.
აღსანიშნავია, რომ ევროკავშირი მხარს უჭერს სოფლის მეურნეობასა და სოფლის განვითარებას საქართველოში ENPARD-ის პროგრამის დახმარებით. პროგრამა ხორციელდება 2013 წლიდან და მისი მთლიანი ბიუჯეტი 179.5 მილიონ ევროს (2013-2022) შეადგენს. ENPARD- ის ძირითად მიზანს საქართველოში სოფლის მეურნეობის მდგრადი განვითრების პრინციპების დაცვით, სოფლად სიღარიბის დაძლევა წარმოადგენს.
გარემოს დაცვისა და სოფლის მეურნეობის სამინისტროში გამართულ შეხვედრას სამინისტროს შესაბამისი სამსახურის წარმომადგენლები ესწრებოდნენ.