#

ფერმერ ალექსანდრე კოპაძეს 150 ნერგი უსასყიდლოდ გადაეცა

გარემოს დაცვისა და სოფლის მეურნეობის მინისტრის პირველმა მოადგილემ გიორგი ხანიშვილმა და შიდა ქართლის გუბერნატორმა გიორგი ხოჯევანიშვილმა გორის მუნიციპალიტეტის სოფელ არაშენდაში, ადგილობრივ ფერმერს, ალექსანდრე კოპაძეს 150-მდე ძირი ვაშლის ნერგი ჩაუტანეს და მათ დარგვაში დაეხმარნენ. გასული წლის დეკემბერში, ალექსანდრე კოპაძეს ოთხწლიანი მსხმოიარე ვაშლის ბაღი უცნობმა პირებმა გაუჩეხეს. გარემოს დაცვისა და სოფლის მეურნეობის სამინისტროს შიდა ქართლის საინფორმაციო-საკონსულტაციო სამსახურის შუამდგომლობით, კერძო სანერგე მეურნეობამ, შპს „კომპლექს-არგომ“ ალექსანდრე კოპაძეს ბაღის აღსადგენად ვაშლის ნერგები უფასოდ გადასცა.სპეციალური ტექნიკით ფერმერს დახმარებას გარემოს დაცვისა და სოფლის მეურნეობის სამინისტრო უწევს.„მადლობა მინდა გადავუხადო ყველა იმ ადამიანს, რომელიც ბატონ ალექსანდრეს დაეხმარა და გვერდში დაუდგა, განსაკუთრებით სანერგე მეურნეობას „კომპლექს-აგრო“, რომელმაც ფერმერს ნერგები უსასყიდლოდ გადასცა. ასეთი მხარდაჭერით ხელს შევუწყობთ არა მხოლოდ იმას, რომ გაჩანაგებულ ბაღს აღვადგენთ, არამედ ადამიანებს დავუბრუნებთ სიკეთის, გვერდში დგომის, გულშემატკივრობის რწმენას“, - განაცხადა გიორგი ხანიშვილმა.„შიდა ქართლის რეგიონისთვის განსაკუთრებით მნიშვნელოვანია ხეხილის ბაღების განახლება. ამ მიმართულებით გარემოს დაცვისა და სოფლის მეურნეობის სამინისტრო არაერთ ხელშემწყობ პროექტს ახორციელებს. ვანდალურად გაჩეხილი ბაღის ადგილას, საერთო ძალისხმევით, ალექსანდრე კოპაძეს ახალი ბაღი ექნება“, - განაცხადა გიორგი ხოჯევანიშვილმა.დაზარალებულმა ფერმერმა მადლობა გადაუხადა გარემოს დაცვისა და სოფლის მეურნეობის სამინისტროს და ადგილობრივი ხელისუფლების წარმომადგენლებს გვერდში დგომისა და მხარდაჭერისთვის. 
#

22 მარტი, წყლის რესურსების საერთაშორისო დღეა

ამ დღესთან დაკავშირებით სასტუმრო „ბილთმორ თბილისში“ „საქართველოში წყლის რესურსების მართვის პოლიტიკა და მდგრადის განვითარების მიზანი“ კონფერენცია გაიმართა, რომელსაც გარემოს დაცვისა და სოფლის მეურნეობის მინისტრის მოადგილე ნინო თანდილაშვილი ესწრებოდა, მინისტრის მოადგილემ კონფერენცაზე მოწვეულ სტუმრებს სიტყვით მიმართა.მხარეებმა „ წყლის კანონპროექტი“ საქართველოსა და ევროკავშირს შორის ასოცირების შეთანხმებით აღებულ ვალდებულებები და საქართველოში მდგრადი განვითარების მე-6 მიზნის განხორციელების მიმდინარეობა განიხილეს. ასევე წყლის მდგრადი მარტის მიმართულებით გასატარებელი რეფორმების აუცილებლობაზე იმსჯელეს.წყლის რესურსების დაცვის საერთაშორისო დღე, მსოფლიოს მასშტაბით 1993 წლიდან აღინიშნება და მის ფარგლებში მრავალი გარემოსდაცვითი აქტივობები ტარდება. 2019 წლის წყლის რესურსების დაცვის დღე აღინიშნება მოწოდებით: „არავინ დარჩება მიღმა"კონფერენცია საქართველოს მწვანეთა მოძრაობა/დედამიწის მეგობრები-საქართველოს, „წყლის გლობალური პარტნიორობა“ და შვედეთის კურსდამთავრებულთა ქსელის-საქართველოში ორგანიზებით ჩატარდა, რომელსაც შვედეთის სამეფოს საგანგებო და სრულუფლებიანი ელჩი საქართველოსა და სომხეთში  ულრიკ ტიდესტრო, სამათავრობო და არასამთავრობო სექტორის წარმომადგენლები და ექსპერტები ესწრებოდნენ. 
#

ბოლნისში ხრამი-დებედას აუზის მართვის გეგმის საკონსულტაციო შეხვედრა გაიმართა

22 მარტს მსოფლიო წყლის რესურსების დაცვის საერთაშორისო დღეს აღნიშნავს. ამ დღესთან დაკავშირებით ბოლნისში ევროკავშირის პროექტის „ევროკავშირის წყლის ინიციატივა - პლუს (EUWI+) აღმოსავლეთ პარტნიორობის ქვეყნებისთვის (EaP)“  ფარგლებში ხრამი-დებედას მდინარის აუზის მართვის გეგმის საკონსულტაციო შეხვედრა გაიმართა დაინტერესებულ მხარეებსა და ექსპერტებს შორის. შეხვედრაზე გაიმართა დისკუსია, სადაც ყურადღება გამახვილდა იმ გამოწვევებზე, რომელიც ხრამი-დებედას აუზის მართვის გეგმის შემუშავების პროცესში იქნა იდენტიფიცირებული. ექსპერტებმა ასევე იმსჯელეს ზედაპირული და მიწისქვეშა წყლის ხარისხსა და  წყლის რესურსების არამდგრადი მოხმარების შესახებ.ასევე ღონსიძიების ფარგლებში ბოლნისის სკოლის მოსწავლეებს  ევროკავშირის ექსპერტმა პრაქტიკული ინტერაქტიული სემინარი ჩაუტარა მდინარეში ჩაყრილი ნარჩენებისა და ეკოსისტემებზე მათი გავლენის შესახებ. წყლის   საერთაშორისო დღის აღნიშვნა მიზნად ისახავს საზოდაგოების ცნობიერების ამაღლებას წყლის რესურსებისა და ჩვენს ყოველდღიურ ცხოვრებაში წყლის მნიშვნელობის შესახებ,  საზოგადოების ინფორმირებას თუ როგორ შეიძლება წყლის დაზოგვა და სუფთა წყლის დალევა ჯანმრთელი ცხოვრებისთვის. “ევროკავშირის წყლის ინიციატივა პლუს აღმოსავლეთის პარტნიორობის ქვეყნებისთვის" (EUWI+) უერთდება წყლის  საერთაშორისო დღის  აღნიშვნას საქართველოში, სადაც სხვადასხვა აქტივობაა დაგეგმილი, რომელიც მჭიდრო კავშირშია ევროკავშირის წყლის ჩარჩო დირექტივასთან და მდგრადი განვითარების პრინციპებთან.შეხვედრას გარემოს დაცვისა და სოფლის მეურნეობის სამინისტროს გარემოსა და კლიმატის ცვლილების დეპარტამენტის უფროსის მოადგილე მაია ჯავახიშვილი, წყლის რესურსების მართვის სამსახურის, გარემოს ეროვნული სააგენტოს, გარემოსდაცვტი ინფორმაციისა და განათლების ცენტრის  და ადგილობრივი თვითმმართველობის წარმომადგენლები ესწრებოდნენ.
#

კახეთის ბიოსფერული რეგიონის (რეზერვატის) დაფუძნების ხელშეწყობის მიზნით, საკოორდინაციო შეხვედრა გაიმართა

ეროვნული სატყეო პროგრამის ფარგლებში, აღმოსავლეთ საქართველოში, კახეთის ბიოსფერული რეგიონის (რეზერვატის) დაფუძნების ხელშეწყობის მიზნით, საკოორდინაციო შეხვედრა გაიმართა.სამინისტროს მიერ ინიცირებული პროექტის ფარგლებში, ახმეტის, თელავისა და დედოფლისწყაროს მუნიციპალიტეტებში სათანადო ზონირებისა და კვლევების ჩატარების შემდეგ, ბიოსფერული რეგიონის სტატუსის მინიჭებისთვის საქართველო იუნესკოში წარსადგენ დოკუმენტაციას მოამზადებს.  პროექტი შერჩეულ მუნიციპალიტეტებში ხელს შეუწყობს ბიომრავალფეროვნების შენარჩუნებას, ტყეების მდგრად მართვას, მდგრადი სოფლის მეურნეობისა და  ეკო ტურიზმის განვითარებას. 2015 წელს, სათანადო კვლევებზე დაყრდნობით, სწორედ კახეთის რეგიონი შეირჩა -  თუშეთისა და ვაშლოვანის დაცული ტერიტორიები და მათი მიმდებარე დასახლებები. პროექტის წარმატებით განხორციელება მწვანე ეკონომიკის, განათლების, ბიოდინამიური სოფლის მეურნეობის, სამეცნიერო კვლევების და სათანადო ცოდნის გაუმჯობესებას და შესაბამისად დასაქმებასაც შეუწყობს ხელს. საკოორდინაციო შეხვედრაზე სახელმწიფო ორგანოების, მუნიციპალიტეტების,  სამოქალაქო და საერთაშორისო ორგანიზაციების წარმომადგენლებმა კახეთის რეგიონის ბიოსფერული რეგიონის დაფუძნების საკითხებზე და ამ პროცესის წარმატებით განხორციელებაზე, ურთიერთთანამშრომლობასა და სამომავლო საქმიანობებზე იმსჯელეს. პროექტი „აღმოსავლეთ საქართველოში, კახეთის ბიოსფერული რეგიონის დაფუძნების ნომინაციის ხელშეწყობა“ გერმანიის მთავრობის ფინანსური მხარდაჭერით,  მიხეილ ზუკოვის ფონდისა (Succow) და მისი პარტნიორი ორგანიზაციის კავკასიის რეგიონული გარემოსდაცვითი ცენტრის (RECC) მიერ ხორციელდება  და მას  კოორდინაციას საქართველოს გარემოს დაცვისა და სოფლის მეურნეობის სამინისტრო უწევს.
#

ლევან დავითაშვილმა ნიკო კეცხოველის პრემიის სასკოლო გარემოსდაცვითი კონკურსის საფინალო ღონისძიება გახსნა

გარემოს დაცვისა და სოფლის მეურნეობის მინისტრმა ლევან დავითაშვილმა, განათლების, მეცნიერების, კულტურისა და სპორტის მინისტრის მოადგილემ ნათია ზედგინიძემ და გარემოს დაცვისა და ბუნებრივი რესურსების კომიტეტის თავჯდომარემ კახა კუჭავამ ნიკო კეცხოველის პრემიის სასკოლო გარემოსდაცვითი კონკურსის საფინალო ღონისძიება გახსნეს.სასკოლო პრემიის 2018-19 წლის კონკურსის მთავარი თემა მდგრადი განვითარების მიზნები იყო და მასში ქვეყნის მასშტაბით 500–მდე სკოლა მონაწილეობდა.„ბედნიერებაა ამდენ საოცრად მოტივირებულ და განათლებულ ახალგაზრდებთან შეხვედრა; ახალგაზრდებთან, რომლებმაც მთელი წლის მანძილზე ძალიან ბევრი იშრომეს საკუთარ თემში მეტად საჭირო და მნიშვნელოვანი ცვლილებების გატარებისთვის, საზოგადოების ცნობიერების ამაღლებისა და მდგრადი განვითარების მიზნების პოპულარიზაციისათვის. თუ დღეს თქვენს ირგვლივ მყოფმა საზოგადოებამ უფრო მეტი იცის მდგრად განვითარებაზე, უფრო მეტად უფრთხილდება გარემოს, ყურადღებას ამახვილებს სოციალურ საკითხებზე,  სწორედ, ამ ახალგაზრდების დამსახურებაა. დარწმუნებული ვარ, ვერც ერთი ჯილდო და სტატუსი ვერ შეედრება იმის გააზრებით მიღებულ სიამოვნებას, რომ რამდენი სასიკეთო საქმის გაკეთება შესძელით საკუთარი თემისთვის და საკუთარი ქვეყნისთვის, რადგან ქვეყანაზე ზრუნვა სწორედ, საკუთარ სოფელსა და თემზე ზრუნვით იწყება“, - განაცხადა ლევან დავითაშვილმა.ღონისძიებაზე გარემოს დაცვისა და სოფლის მეურნეობის სამინისტროს მიერ გამოვლენილი რჩეული პედაგოგიც დააჯილდოვეს. ლევან დავითაშვილმა ხარაგაულის მუნიციპალიტეტის  სოფელ ბაზალეთის სკოლის პედაგოგს, თეა ტალახაძეს „მწვანე ჯილდო 2019“ გადასცა.საერთაშორისო და სამეცნიერო ორგანიზაციების წარმომადგენლებისგან დაკომპლექტებულმა ჟიურიმ  საქართველოს 32 სკოლის გუნდიდან სამი გამარჯვებული გამოავლინა : I ადგილი - სოფელ როკითის სკოლა (იმერეთი); II ადგილი - წმინდა ალექსი შუშანიას სახელობის მართლმადიდებლური სკოლა–გიმნაზია (სამეგრელო); III ადგილი - "ქართული სასწავლებელი" (თბილისი). ეროვნული სატყეო სააგენტოს ინიციატივით, პრიზიორი სკოლებისთვის ბორჯომის ხეობაში შემეცნებითი ექსკურსია გაიმართება. პირველი ადგილის მფლობელ სოფელ როკითის სკოლას, ეროვნული სატყეო სააგენტოს უფროსის მოადგილემ ნათია იორდანიშვლმა სიმბოლური საჩუქარი - ხუთტომეული „დედამიწა“ გადასცა, ასევე გამოვლინდა სატყეო სააგენტოს რჩეული თელავის N 2 საჯარო სკოლა, რომელსაც საჩუქრად ცხოველთა ენციკლოპედია გადაეცა.   სამი გამარჯვებული სკოლის გუნდის თითოეული წევრი ათდღიან „მწვანე ბანაკში“ მიიღებს მონაწილეობას, რომელიც  საქართველოს დაცულ ტერიტორიებზე ,,ნორჩი რეინჯერის“ ხუთდღიანი შემეცნებითი პროგრამით დასრულდება. ასევე, სოფელ როკითის სკოლის ლიდერი  ნანა ლაბაძე,  ერთ სამუშაო დღეს გარემოს დაცვისა და სოფლის მეურნეობის მინისტრთან ერთად იმუშავებს. გარემოსდაცვითი ინფორმაციისა და განათლების ცენტრის “რჩეული სკოლა” მცხეთა-მთიანეთის მუნიციპალიტეტის სოფელ გალავნის საჯარო სკოლა გახდა.  განათლების  ცენტრი სკოლის ბიბლიოთეკის სივრცეში  მწვანე ბიბლიოთეკას მოაწყობს.მასშტაბური სასკოლო გარემოსდაცვითი კონკურსი „ნიკო კეცხოველის სასკოლო პრემია“ 2015 წლიდან ტარდება CENN-ის მიერ, ავსტრიის თანამშრომლობა განვითარებისათვის ფინანსური მხარდაჭერით. კონკურსის თანაორგანიზატორები არიან გარემოს დაცვისა და სოფლის მეურნეობის სამინისტრო, განათლების, მეცნიერების, კულტურისა და სპორტის სამინისტრო და საქართველოს პარლამენტი.
#

ლევან დავითაშვილი შვედეთის დელეგაციის წარმომადგენლებს შეხვდა

გარემოს დაცვისა და სოფლის მეურნეობის მინისტრი ლევან დავითაშვილი შვედეთის სამეფოს საერთაშორისო განვითარებისა და თანამშრომლობის მინისტრს პიტერ ერიქსონს და დელეგაციის სხვა წარმომადგენლებს საქართველოს მთავრობის ადმინისტრაციაში შეხვდა.შეხვედრაზე მხარეებმა ქვეყნებს შორის გარემოსდაცვითი მიმართულებით, კერძოდ ნარჩენების მართვის კუთხით თანამშრომლობის შესაძლებლობები განიხილეს.ორმხრივ შეხვედრაზე ლევან დავითაშვილმა ვრცლად ისაუბრა ქვეყნისთვის გარემოს დაცვის პრიორიტეტულობის საკითხის შესახებ და ყურადღება პრემიერ-მინისტრის მიერ ინიცირებული მწვანე ეკონომიკის, როგორც ეკონომიკური განვითარების მოდელის მნიშვნელობაზე გაამახვილა.შეხვედრაზე მინისტრმა ნარჩენების მართვის კუთხით განხორციელებულ ცვლილებებზე ისაუბრა და დელეგაციის წევრებს მწარმოებლის გაფართოებული ვალდებულების შესახებ მიაწოდა ინფორმაცია.ლევან დავითაშვილმა პიტერ ერიქსონთან ნარჩენების მართვის კოდექსზე საუბრისას ხაზგასმით აღნიშნა საკანონმდებლო აქტების ევროკავშირთან ასოცირების ხელშეკრულების შესაბამისად ჰარმონიზების საკითხი.როგორც მინისტრმა განაცხადა, შვედეთის გარემოსდაცვითი სააგენტო და საერთაშორისო განვითარების სააგენტო (SIDA) სამინისტროს საქმიანობის აქტიური მხარდამჭერია, რისთვისაც პიტერ ერიქსონს მადლობა გადაუხადა.შვედეთის სამეფოს საერთაშორისო განვითარებისა და თანამშრომლობის მინისტრის განცხადებით, შვედეთის სამეფო საქართველოს მნიშვნელოვან პარტნიორად განიხილავს და სრულ მხარდაჭერას გამოხატავს შემდგომი თანამშრომლობისთვის.ორმხრივი შეხვედრის დასრულების შემდეგ, შვედეთის სამეფოს დელეგაციამ გარემოს დაცვისა და სოფლის მეურნეობის მინისტრის პირველ მოადგილესთან გიორგი ხანიშვილთან და მოადგილესთან ხატია წილოსანთან ერთად, ქალაქ რუსთავში არსებული სეპარაციის ფუნქციის მქონე შპს საქართველოს მყარი ნარჩენების მართვის კომპანიის ნაგავსაყრელი მოინახულა.დელეგაციის წევრებმა ასევე, ბოსტანას ქუჩაზე ორგანიზაციის „საქართველოს მწვანეთა მოძრაობა“ მიერ კამპანიის „დავასუფთაოთ საქართველო“  ფარგლებში დაგეგმილ გამწვანების აქციაში მიიღეს მონაწილეობა.
#

გარემოს დაცვისა და სოფლის მეურნეობის მინისტრის მოადგილემ ტრენინგი, „გამოცდილებისა და საუკეთესო პრაქტიკის გაზიარება საქართველოს ქალაქებში ველოსიპედით გადაადგილების გასაუმჯობესებლად“ გახსნა

გარემოს დაცვისა და სოფლის მეურნეობის მინისტრის მოადგილემ, ნინო თანდილაშვილმა ტრენინგი, სახელწოდებით „გამოცდილებისა და საუკეთესო პრაქტიკის გაზიარება საქართველოს ქალაქებში ველოსიპედით გადაადგილების გასაუმჯობესებლად“ გახსნა. ნინო თანდილაშვილმა კლიმატის ცვლილების სფეროში არსებულ გამოწვევებზე ისაუბრა და კლიმატის ცვლილების ეროვნული პოლიტიკის ფორმირებაში მუნიციპალიტეტებისა და თვითმმართველი ქალაქების როლზე გაამახვილა ყურადღება. „ველოინფრასტრუქტურის ქსელის განვითარება არა მხოლოდ დედაქალაქში, არამედ საქართველოს მცირე ზომის ურბანულ ქალაქებშიც მნიშვნელოვანია, რადგან ავტოტრანსპორტის მიერ ჰაერის დაბინძურების თემა რეგიონებშიც მწვავედ დგას. კლიმატის ცვლილების პოლიტიკის განმახორციელებელი ღონისძიების დაგეგმვისას კი, ჩვენი მოსახლეობის საჭიროების გათვალისწინება აუცილებელია. ეკოლოგიურად სუფთა ტრანსპორტის დამკვიდრება გარემოს უფრო უსაფრთხოს გახდის,“ - განაცხადა ნინო თანდილაშვილმა. შეხვედრაზე გერმანელმა ექსპერტებმა საქართველოს ქალაქებში ველოინფრასტრუქტურის განვითარების შესაძლებლობებზე იმსჯელეს. ტრენინგი გაიმართა გერმანიის გარემოს დაცვის, ბუნების კონსერვაციისა და ბირთვული უსაფრთხოების ფედერალური სამინისტროს მხარდაჭერით მიმდინარე პროექტის „ინტეგრირებული კლიმატის ცვლილების პოლიტიკა“ ფარგლებში, გაეროს განვითარების პროგრამის პროექტის „მწვანე ქალაქი: ბათუმი“ თანამონაწილეობით. ტრენინგი სამდღიანია და სასტუმროში „ჰოლიდეი ინნ“  იმართება. ტრენინგს GIZ-ის ოფისის ხელმძღვანელი კარლ ფ. ტესტენსენი, გარემოს დაცვისა და ენერგეტიკის მიმართულების (UNDP-ის წარმომადგენლობა) ხელმძღვანელი ნინო ანთაძე, UNDP-ის საქართველოს წარმომადგენელი ლაშა ნაკაშიძე, ქალაქ თბილისის მერიისა და თვითმმართველი ქალაქების წარმომადგენლები ესწრებიან.