#

აზიურ ფაროსანასთან ბრძოლის საქართველოს წარმატებულ გამოცდილებას საერთაშორისო კონფერენციაზე განიხილავენ

სურსათის ეროვნული სააგენტოს ორგანიზებით, თბილისში საერთაშორისო კონფერენცია  მიმდინარეობს. კონფერენციაში მსოფლიოს  26 ქვეყნიდან - ევროპიდან, ამერიკის შეერთებული შტატებიდან, აზიიდან  და ოკეანეთის ქვეყნებიდან ჩამოსული    მეცნიერები, ასევე, ქართული სამეცნიერო წრეების, დარგობრივი გაერთიანებების წარმომადგენლები და სახელმწიფო რწმუნებულები მონაწილეობენ.  კონფერენციაზე აზიურ ფაროსანასთან  ბრძოლის  საქართველოს წარმატებულ გამოცდილებას და მავნებლის წინააღმდეგ გატარებულ ღონისძიებებსა და მეთოდებს განიხილავენ. კონფერენციის ფარგლებში შემუშავდება სტრატეგიული დოკუმენტი, რომელსაც რომში გაეროს სურსათისა და სოფლის მეურნეობის ორგანიზაციის ფიტოსანიტარიული ზომების  კომისიის სხდომაზე განიხილავენ. საერთაშორისო კონფერენციის მონაწილეებს მისასალმებელი სიტყვით გარემოს დაცვისა და სოფლის მეურნეობის მინისტრმა ლევან დავითაშვილმა მიმართა. მინისტრმა ხაზგასმით აღნიშნა, რომ აზიური ფაროსანა საქართველოს სოფლის მეურნეობის სექტორის მნიშვნელოვანი გამოწვევაა და  მავნებლის საწინააღმდეგო ღონისძიებებში სახელმწიფო აქტიურად არის ჩართული.  „მავნებელთან ბრძოლაში დაგვიგროვდა მნიშვნელოვანი გამოცდილება. დღევანდელ კონფერენციას ესწრებიან სამეცნიერო წრეების წარმომადგენლები 26 ქვეყნიდან, რომლებიც საქართველოში არსებული გამოცდილებით ინტერესდებიან. ჩვენი გამოცდილების გაზიარება  სასარგებლო იქნება მათთვის ფაროსანას წინააღმდეგ ბრძოლის ღონისძიებების დაგეგმვის დროს. იმედი მაქვს, რომ ამ საერთაშორისო თანამშრომლობის შედეგად, ჩვენ შევძლებთ  აზიური ფაროსანას, როგორც გამოწვევის, გლობალურად დაძლევას“, - განაცხადა ლევან დავითაშვილმა. კონფერენციაზე სურსათის ეროვნული სააგენტოს მიერ წარმოდგენილი იყო ინფორმაცია დასავლეთ საქართველოში აზიურის ფაროსანას წინააღმდეგ გატარებული და დაგეგმილი ღონისძიებების შესახებ და, ასევე, ის წარმატებული გამოცდილება, რომელიც საქართველოს მავნებელთან ბრძოლის  პროცესში გააჩნია.2018 წელს, სამეგრელოს, გურიის, იმერეთის რეგიონებსა და აჭარაში, აზიური ფაროსანას საწინააღმდეგოდ, 27 მუნიციპალიტეტის 523 სოფელში დამუშავებულია 790 000 ჰექტრამდე ფართობი. მავნებელთან ბრძოლის 2019 წლის პროგრამა მსოფლიოს და ქართველი წამყვანი მეცნიერების რეკომენდაციებს და 2017-2018 წლებში გატარებული ღონისძიებების შედეგად მიღებულ გამოცდილებას ეფუძნება. პროგრამის მიზანია სასოფლო-სამეურნეო კულტურების დაცვა, მოსავლის დანაკარგებისა და ეკონომიკური ზარალის შემცირება.  
#

„მინისტრის საათი“ - გარემოს დაცვისა და სოფლის მეურნეობის მინისტრს, ლევან დავითაშვილს პარლამენტში უსმენენ

„2019 წლის რთვლის დროს, რაჭის რეგიონიდან „ალექსანდროულისა“ და „მუჯურეთულის“ ჯიშების ყურძნის რეგიონიდან გატანის შეზღუდვაზე საბოლოო გადაწყვეტილება ამ ეტაპზე მიღებული არ არის“, - განაცხადა საქართველოს გარემოს დაცვისა და სოფლის მეურნეობის მინისტრმა, ლევან დავითაშვილმა პარლამენტში „მინისტრის საათის“ ფარგლებში გამოსვლის დროს.„ეს იყო ადგილობრივი მოსახლეობის თხოვნა, რომ ადგილწარმოშობის ღვინის „ხვანჭკარის“ სანედლეულო ყურძნის ჯიშების „ალექსანდროულისა“ და „მუჯურეთულის“ გადამუშავება ადგილზე მომხდარიყო. მომზადდა შესაბამისი დოკუმენტი, რომელიც  გულისხმობდა 2019 წლიდან ნედლეულის რეგიონიდან გატანის შეზღუდვას  და ადგილზე გადამუშავებას“, - აღნიშნა ლევან დავითაშვილმა.მინისტრის ინფორმაციით,  აღნიშნული მიზნის მისაღწევად, რამდენიმე წლის წინ დაიწყო ღვინის საწარმოების საგრანტო დაფინანსების პროგრამა, რათა გაზრდილიყო ადგილზე ტექნიკური შესაძლებლობები.„შედეგად, გაიხსნა რამდენიმე ახალი მარანი, თუმცა ბოლო შეფასებით, ადგილზე არსებულ საწარმოების რესურსი 700 ტონას აღწევს. გასულ წელს რაჭის რეგიონში 1500 ტონამდე „ალექსანდროული“ და „მუჯურეთული“ გადამუშავდა.  ამ ფონზე, აღნიშნული სიმძლავრეების გათვალისწინებით, ადგილობრივ მოსახლეობას ყურძნის ჩაბარების პროცესში სირთულეები შეექმნება. ამიტომ, ამაზე კიდევ უნდა ვიმსჯელოთ, რათა მაქსიმალურად იყოს გათვალისწინებული ადგილობრივი მოსახლეობის ინტერესები. ამ თემაზე მუშაობა და დიალოგი ადგილობრივ მოსახლეობასთან ამ ეტაპზეც გრძელდება“, - აღნიშნა მინისტრმა.   
#

„მინისტრის საათი“ - გარემოს დაცვისა და სოფლის მეურნეობის მინისტრს, ლევან დავითაშვილს პარლამენტში უსმენენ

ბიოწარმოების მხარდაჭერისა და სტიმულირების მიზნით, საქართველოში ბიოპროდუქტების მწარმოებლების ფინანსური მხარდაჭერა იგეგმება. ამის შესახებ, საქართველოს გარემოს დაცვისა და სოფლის მეურნეობის მინისტრმა, ლევან დავითაშვილმა პარლამენტში „მინისტრის საათის“ ფარგლებში გამოსვლისას აღნიშნა.  „ბიოწარმოების ხელშეწყობა არის მწვანე ეკონომიკის მნიშვნელოვანი ნაწილი. აღნიშნული პროექტის პრეზენტაცია გაიმართება უახლოეს პერიოდში.  ფერმერებს დავეხმარებით, რომ მათ  ბიოწარმოების განვითარება შეძლონ. ჩვენ დავეხმარებით როგორც წარმოებისა და კონსულტაციების ნაწილში, ისე სერტიფიცირების ეტაპზე, რომ მოხდეს ბიოწარმოებაზე გადასვლა. ეს არის ძვირი და რისკიანი მიმართულება და სახელმწიფოს ფინანსური მხარდაჭერის გარეშე მისი განხორციელება რთული იქნება“, - აღნიშნა ლევან დავითაშვილმა. ბიოწარმოების ხელშეწყობის პროგრამის მიზნებია: 5 წლის განმავლობაში ბიოპროდუქციის წარმოების ფართობების ზრდა 5,000 ჰა-მდე, 2000-მდე ბიომეურნეობის მდგრადი განვითარების ხელშეწყობა, არსებული და ახალი ბიომეურნეობების სერტიფიცირების ხელშეწყობა, ბიოპროდუქციის ცნობადობისა და პოპულარიზაციისათვის აუცილებელი ღონისძიებების გატარება, ბიომწარმოებელთა ცოდნისა და უნარ-ჩვევების ამაღლება, კვალიფიციური კადრების მომზადება/გადამზადება ბიო-წარმოების თანამედროვე ტექნოლოგიების დანერგვის საკითხებში.
#

„მინისტრის საათი“ - გარემოს დაცვისა და სოფლის მეურნეობის მინისტრს, ლევან დავითაშვილს პარლამენტში უსმენენ

„ჩვენ მივიღეთ კანონი სასოფლო-სამეურნეო კოოპერატივების შესახებ, შეიქმნა სააგენტო, რომელიც ხელს შეუწყობს ასეთი კოოპერატივების ჩამოყალიბებას. 1000-ზე მეტი ასეთი კოოპერატივია, ეს არის თვისობრივად ახალი ფორმა; ჩვენ უნდა შევძლოთ კოოპერატივების გაძლიერება, არა რაოდენობის გაზრდა, არამედ მათი გამსხვილება, როგორც ეს არის ევროპის ქვეყანებში", - განაცხადა გარემოს დაცვისა და სოფლის მეურნეობის მინისტრმა ლევან დავითაშვილმა. საქართველოს მასშტაბით 1111 სასოფლო - სამეურნეო სტატუსის მქონე კოოპერატივია რეგისტრირებული, რომელთა სწრაფი განვითარებისათვის შემუშავებულია და ხორციელდება არაერთი სახელმწიფო პროგრამა. რძის მწარმოებელი სასოფლო-სამეურნეო კოოპერატივების მხარდაჭერის სახელმწიფო პროგრამაში 10 სასოფლო-სამეურნეო კოოპერატივია ჩართული. სასოფლო-სამეურნეო კოოპერატივებში გაერთიანებულ 210-ზე მეტ მეპაიეს, რომელთა საკუთრებაში არსებული საქონლის რაოდენობა 2000 ფურზე მეტს შეადგენს, შესაძლებლობა ეძლევა სტანდარტების დაცვით აწარმოონ რძის პროდუქტები. მევენახეობის სასოფლო-სამეურნეო კოოპერატივების ხელშეწყობის სახელმწიფო პროგრამაში 10 სასოფლო-სამეურნეო კოოპერატივი ჩაერთო, რომელშიც გაერთიანებულია 204 მეპაიე, მობილიზებული ვენახის რაოდენობა 219 ჰა-ს შეადგენს. ყურძნის გადამმუშავებელი 5 კოოპერაციული საწარმო უკვე ამოქმედდა, 5 საწარმოს მშენებლობა მიმდინარე წელს დასრულდება. მაღალმთიან რეგიონებში სახელმწიფო საკუთრებაში არსებული სათიბ-საძოვრების რაციონალური გამოყენების სახელმწიფო პროგრამაში, 2018 წელს 10 სასოფლო-სამეურნეო კოოპერატივი ჩაერთო, რომელშიც გაერთიანებულია 300-ზე მეტი მეპაიე, მობილიზებული საქონლის რაოდენობა კი 2200 ფურს შეადგენს. მათ 25 წლიანი იჯარის უფლებით გადაეცემათ სახელმწიფო საკუთრებაში არსებული სათიბ-საძოვრები და თანადაფინანსებით საქონლის საკვების წარმოებისათვის საჭირო სასოფლო-სამეურნეო ტექნიკა. დუშეთის მუნიციპალიტეტის უკანაფშავის ადმინისტრაციულ ერთეულში დასრულდა რძის მიმღებ-გადამმუშავებელი საწარმოს მშენებლობა, მიმდინარეობს საწარმოს აღჭურვა, საწარმო დღიურად 1,5 ტონა რძეს გადაამუშავებს. სასოფლო-სამეურნეო კოოპერატივებში საერთაშორისო სტანდარტების დანერგვის და ბრენდირების სახელმწიფო პროგრამაში რეგისტრაცია მიმდინარეობს. აღნიშნული სახელმწიფო პროგრამა სასოფლო-სამეურნეო კოოპერატივებისათვის საფრთხის ანალიზისა და კრიტიკული საკონტროლო წერტილების სისტემის (HACCP) დანერგვაში ფინანსურ მხარდაჭერას და მათთვის მარკეტინგული მასალების მომზადებას, ბრენდირებას გულისხმობს. „თუ ჩვენ არ შევქმნით სამელიორაციო ინფრასტრუქტურას, ვერ შევინარჩუნებთ ნიადაგის ნაყოფიერებას და ვერც წარმოებას გავზრდით. მრავალწლიანი კულტურების გაშენების გეგმები იქნება ფუჭი, იმიტომ, რომ წყლის გარეშე, თანამედროვე რეალობაში ჩვენ ვერ ვაწარმოებთ კონკურენტუნარიან სასოფლო-სამეურნეო პროდუქციას",- აღნიშნა ლევან დავითაშვილმა. სასოფლო-სამეურნეო მიწების ფონდის გაზრდის მიზნით, სამელიორაციო ინფრასტრუქტურის მასშტაბურ სარეაბილიტაციო სამუშაოები მიმდინარეობს. სამელიორაციო სისტემების მოწესრიგება მნიშვნელოვნად ავითარებს სოფლის მეურნეობის სექტორს, უმჯობესდება და იზრდება საშუალო საჰექტარო მოსავლიანობა. 2012-2018 წლებში, საქართველოს მასშტაბით, სამელიორაციო ინფრასტრუქტურის 258 სარეაბილიტაციო პროექტი განხორციელდა. ბოლო 6 წლის განმავლობაში გატარებული ღონისძიებების შედეგად, წყალუზრუნველყოფილია 127 000 ჰექტარი სასოფლო-სამეურნეო მიწის ფართობი, ხოლო დრენირებული მიწის ფართობი 38 000 ჰექტარს შეადგენს. 2019 წელს მშენებლობა-რეაბილიტაციით დაგეგმილია სამელიორაციო ინფრასტრუქტურის 53 გარდამავალი სარეაბილიტაციო პროექტის დაწყება. სამელიორაციო ინფრასტრუქტურის სარემონტო სამუშაოები დაახლოებით 374 ობიექტზე ჩატარდება. პირდაპირი უცხოური ინვესტიციები ერთ-ერთი წყაროა ინვესტიციებისა. ჩვენ გვჭირდება მეტი და მეტი ინვესტიცია სოფლის მეურნეობაში იმისთვის, რომ მოხდეს მოდერნიზება და სტრატეგიული მიზნების შესრულება. სწორი საინვესტიციო გარემოს შექმნა ჩვენთვის ძალიან მნიშვნელოვანია. „ვფიქრობ, რომ სწორად რეგულირდება ახალ ორგანულ კანონში სასოფლო-სამეურნეო მიწის ფლობის შესახებ საკუთრების  საკითხი, რომელიც კიდევ უფრო ხელს შეუწყობს და პროგნოზირებადს გახდის ინვესტიციებს სასოფლო-სამეურნეო სექტორის მიმართულებით. ამ მხრივ, ჩვენი ქვეყნის მოსახლეობის მიმართ აღებული პასუხისმგებლობა, რომ სასოფლო-სამეურნეო მიწების შენარჩუნება მოხდება  ჩვენი ქვეყნის მოქალაქეებისთვის, არის გათვალისწინებული და  ასევე დაშვებულია სივრცე სხვადასხვა ფორმით უცხოელების მონაწილეობისთვის, რომელიც არის სწორი და დაბალანსებული მიდგომა“, - ლევან დავითაშვილი. „დაიწყო მექანიზაციის ხელშეწყობის პროექტი, რომლის ფარგლებშიც, 50% თანადაფინანსებით უზრუნველვყოფთ ყველა იმ ფერმერს, რომელიც დაინტერესებული იქნება სასოფლო-სამეურნეო ტექნიკით“,- განაცხადა ლევან დავითაშვილმა. მინისტრის განცხადებით, ერთ-ერთი მნიშვნელოვანია პრობლემაა სოფლად ტექნიკის არარსებობა. პრობლემის მოგვარების მიზნით, სამინისტრომ 2018 წელს დაიწყო აგროკრედიტითა და აგროლიზინგით მექანიზაციის დაფინანსება. „სურსათის უვნებლობის მიმართულებით  მნიშვნელოვნად  გააქტიურდა  სამომხმარებლო ბაზრისა და საზოგადოებრივი კვების ობიექტების კონტროლი. არსებული მონაცემებით, კონტროლის მასშტაბი გაზრდილია,  თუმცა კონტროლის გაზრდის პარალელურად მცირდება სამართალდარღვევები“, - განაცხადა მინისტრმა, ლევან დავითაშვილმა პარლამენტში გამოსვლისას. საზოგადების მაღალი ინტერესიდან გამომდინარე, მინისტრმა ყურადღება გაამახვილა სასმელი წყლის ნიმუშების კვლევის შედეგებზე და აღნიშნა, რომ ყოველწლიურად დიდი რაოდენობით ნიმუშის აღება ხდება. „არსებული დარღვევები უკავშირდება იმ გამოწვევებს, რომლებიც მთავრობას აქვს. ეს არის წყალმომარაგების სისტემის რეაბილიტაცია. ამ კუთხით მჭიდროდ ვმუშაობთ რეგიონული განვითარებისა და ინფრასტრუქტურის სამინისტროსთან“, - აღნიშნა ლევან დავითაშვილმა. „ვეტერინარიის კუთხით, ბოლო წლებში ტენდენცია მნიშვნელოვნად არის გაუმჯობესებული და საქართველო რეგიონში სამაგალითო ქვეყანაა, რასაც აღიარებს ცხოველთა ჯანდაცვის  მსოფლიო ორგანიზაცია. იმისათვის, რომ ცხოველური წარმოშობის სურსათი იყოს   მიკვლევადი, ჩვენი მომხმარებელი იყოს დაცული, უვნებელი და დაშვებული საერთაშორისო ბაზრებზე,  ინერგება კომპლექსური სისტემები. რეგიონულ ჭრილში ვაპირებთ საპილოტე პროექტის განხორციელებას, რომლის ფარგლებშიც რაჭა-ლეჩხუმი-ქვემო სვანეთის და მესტია  დაავადებებისგან თავისუფალ ზონად გამოცხადდეს“, -განაცხადა ლევან დავითაშვილმა. ლევან დავითაშვილი: „აზიური ფაროსანა კვლავ რჩება გამოწვევად და სახელმწიფო მასშტაბურ ღონისძიებებისთვის ემზადება. 2017 წელთან შედარებით, 2018 წელს მნიშვნელოვანი გაუმჯობესება გვქონდა, დაგროვდა გამოცდილება, გავაუმჯობესეთ საველე სამუშაოები“. როგორც მინისტრმა აღნიშნა, 2019 წელს, ახლებური მიდგომებით მეტად შედეგიანები ვიქნებით. მინისტრმა ასევე ყურადღება გაამახვილა თხილის სექტორში არსებულ გამოწვევებზე, რომელიც კომპლექსურია და სხვადასხვა დაავადებას უკავშირდება. ლევან დავითაშვილის განცხადებით,  ამ კუთხით სამინისტრო აქტიურად მუშაობს თხილის მწარმოებელთა ასოციაციასთან, სახელმწიფოს თანადაფინანსებით შექმნილია სპეციალური ჯგუფები, რომლებიც აღჭურვილია შესაბამისია ცოდნით, პრეპარატით და ტექნიკური საშუალებებით, რომლებიც დაეხმარებიან მეთხილე ფერმერებს, რათა მათ  მიიღონ მაღალი ხარისხის მოსავალი. აზიურ ფაროსანასთან ბრძოლის  პარალელურად,  2018 წელს  მნიშვნელოვანი ღონისძიებები განხორციელდა კალიის, ბზის ალურას და ამერიკული თეთრ პეპელას საწინააღმდეგოდ, რამაც ხელი შეუწყო მწვანე საფარის შენარჩუნებას და ეკონომიკური ზარალის თავიდან აცილებას. მინისტრმა ასევე  ხაზი გაუსვა სარეალიზაციო ბაზარზე  პესტიციდებისა და აგროქიმიკატების ხარისხის კონტროლის გააქტიურებას. 
#

„მინისტრის საათი“ - გარემოს დაცვისა და სოფლის მეურნეობის მინისტრს, ლევან დავითაშვილს პარლამენტში უსმენენ

„გარემოს დაცვა ჩვენი ძირითადი მანდატია“, - განაცხადა ლევან დავითაშვილმა გარემოს დაცვის და სოფლის მეურნეობის მინისტრმა ლევან დავითაშვილმა პარლამენტში „მინისტრის საათის“ ფორმატში სამინისტროს საქმიანობის წლიური ანგარიშის წარდგენისას ქვეყნისთვის წყლის რესურსების ეფექტიანი მართვის გამოყენების მნიშვნელობაზე ისაუბრა. როგორც მინისტრმა განაცხადა, სამინისტრომ მოამზადა წყლის რესურსების სააუზო მართვის სისტემის რეფორმა, კანონპროექტი „წყლის რესურსების მართვის შესახებ“ და დარგობრივი კომიტეტის წევრებს მჭიდრო თანამშრომლობისთვის მადლობა გადაუხადა. „სააუზო მართვა წყალმოსარგებლეთა უფლებების მაქსიმალურ გათვალისწინებას გულისხმობს. საპილოტო რეჟიმში ჩვენ გვაქვს USAID -ის დახმარებით მომზადებული, ერთის სააუზო მართვის გეგმის პროექტი და მიმდინარე წელს  ხრამი-დებედას და იორი -ალაზნის სააუზო სისტემებისთვის სააუზო გეგმების მომზადება იგეგმება, რაც ვფიქრობთ, აბსოლუტურად ახალ რეალობას შექმნის წყლის რესურსების მართვის კუთხით“, - განაცხადა ლევან დავითაშვილმა.  სამინისტროს საქმიანობის წლიური ანგარიშის წარდგენისას მინისტრმა ლაბორატორიული შესაძლებლობების განვითარების მნიშვნელობაზე ისაუბრა. „ჩვენ გვჭირდება ზუსტი მონიტორინგის სისტემა, ამიტომ გარემოს ეროვნული სააგენტო დღეს ფლობს უკვე თანამედროვე წყლის ჰაერის და ნიადაგის ანალიზების ლაბორატორიას, რომელიც ძირითად დამაბინძურებლებზე თანამედროვე მეთოდებით, თანამედროვე ტექნიკის პირობებში შეძლებენ  ნიადაგის, წყლის და ჰაერის მდგომარეობის შემოწმებას“,  - განაცხადა ლევან დავითაშვილმა. მინისტრმა ყურადღება ზედაპირული და მიწისქვეშა წყლების კონტროლზე გაამახვილა და აღნიშნა, რომ 2019 წლისთვის დაახლოებით 170- ზე მეტი ობიექტი გაკონტროლდება ზედაპირული წყლების და 60- ზე მეტი ობიექტი  მიწისქვეშა წყლების კონტროლის კუთხით. 
#

„მინისტრის საათი“ - გარემოს დაცვისა და სოფლის მეურნეობის მინისტრს, ლევან დავითაშვილს პარლამენტში უსმენენ

ლევან დავითაშვილმა: „ფერმერებისა და მეწარმეებისთვის მაქსიმალურად ხელმისაწვდომია ფინანსური რესურსი. ახალი საწარმოების შექმნამ განაპირობა აგრარული დარგის განვითარების სტიმულირება, განვითარდა სასოფლო-სამეურნეო ინფრასტრუქტურა, გაიზარდა საექსპორტო პოტენციალის მქონე პროდუქციის წარმოება”.  „სახელმწიფოს მხრიდან ფინანსურმა მხარდაჭერამ მეწარმეებს წარმოების განვითარება-გაფართოებისთვის დამატებითი ბიძგი მისცა“. აღნიშნული განცხადება საქართველოს გარემოს დაცვისა და სოფლის მეურნეობის მინისტრმა, ლევან დავითაშვილმა დღეს პარლამენტში „მინისტრის საათის“ ფარგლებში გამოსვლისას გააკეთა.მინისტრის ინფორმაციით, დღეისათვის სახელმწიფოს მიერ დაფინანსებულია 900-ზე მეტი მოქმედი და 188 ახალი საწარმო, გაშენებულია 6,347 ჰა-ზე მეტი მრავალწლოვანი ბაღი, სადაც სახელმწიფოს მხრიდან თანადაფინანსება 34 მილიონ ლარს აღწევს. რეაბილიტაცია ჩაუტარდა 960 ჰა-მდე ჩაის პლანტაციას; პროექტში ჩართულ ბენეფიციართა უმრავლესობას კოოპერატივები შეადგენენ.     „2013 წლიდან დღემდე, 34 000-ზე მეტი სესხია გაცემული და პორტფელი 1 მილიარდ 800 მილიონ ლარს აჭარბებს. ყოველივე ზემოაღნიშნულმა,  განაპირობა ის, რომ პროექტის იმ ბენეფიციარების მიერ, რომლებიც რეგისტრირებულები არიან გადასახადის გადამხდელად და ასეთი დაახლოებით 13,000 -ია, 2013-2017 წლებში სახელმწიფო ბიუჯეტში გადახდილი აქვთ 620 მილიონ ლარზე მეტი“, - აღნიშნა ლევან დავითაშვილმა. წინასწარი მონაცემებით, 2018 წლის 3 კვარტალში, აგროსასურსათო სექტორში შექმნილი დამატებული ღირებულება მიმდინარე ფასებში 3.6 მლრდ ლარს შეადგენს, რაც 215 მლნ ლარით (6.3%) აღემატება წინა წლის ანალოგიური პერიოდის მაჩვენებელს.  „სოფლის მეურნეობა ეკონომიკის ერთ-ერთი ყველაზე მნიშვნელოვანი დარგია ჩვენი ქვეყნის ეკონომიკის, სადაც ქვეყნის მოსახლეობის დაახლოებით 42%-ია დასაქმებული. ამ დარგშია არის მემკვიდრეობით მიღებული პრობლემები და არის დიდი გამოწვევები. თუმცა, ბოლო წლებში ჩვენს გავქვს მაკროეკონომიკური მაჩვენებლების გაუმჯობესება სხვადასხვა მიმართულებით. 2012 წლიდან აგროსასურსათო პროდუქციის ზრდა 41%-ით არის გაზრდილი“ - აღნიშნა საქართველოს გარემოს დაცვისა და სოფლის მეურნეობის მინისტრმა, ლევან დავითაშვილმა დღეს პარლამენტში „მინისტრის საათის“ ფარგლებში გამოსვლისას.მინისტრის ინფორმაციით, აღნიშნულ პერიოდში, წინასწარი მონაცემებით, 4%-ით გაიზარდა სოფლის მეურნეობის სექტორში შექმნილი დამატებული ღირებულება, რაც განსაკუთრებით მნიშვნელოვანია, 2017 წელს დაფიქსირებული შემცირების შემდეგ. გაზრდილია, როგორც მემცენარეობის, ასევე მეცხოველეობის დარგში შექმნილი დამატებული ღირებულება.რაც შეეხება სასოფლო-სამეურნეო პროდუქტების გადამამუშავებელ სექტორში შექმნილ დამატებულ ღირებულებას, 2018 წლის 3 კვარტალში, წინა წლის ანალოგიურ პერიოდთან შედარებით, 10%-იანი ზრდა დაფიქსირდა. ზრდა ძირითადად განაპირობა ალკოჰოლური სასმელების და მინერალური წყლების და უალკოჰოლო სასმელების წარმოების მაღალმა მაჩვენებელმა, რაც შესაბამისად 33.1 (13.0%) და 69.0 (29.1%) მლნ ლარით აღემატება წინა წლის ანალოგიურ მაჩვენებლებს. 2018 წელს, საქართველოდან ექსპორტირებულია 959.2 მლნ აშშ დოლარის ღირებულების აგროსასურსათო პროდუქცია, რაც 23.2%-ით მეტია 2017 წლის ანალოგიურ მაჩვენებელზე (2017 წელს ექსპორტირებული იყო 778.3 მლნ აშშ დოლარის ღირებულების აგროსასურსათო პროდუქცია) 2018 წლის წინასწარი მონაცემებით, 3 კვარტალში, წინა წლის შესაბამის პერიოდთან შედარებით, აგრობიზნესის მთლიანი გამოშვება 337.2 მლნ ლარით (5.2%) გაიზარდა და 6.8 მლრდ ლარს მიაღწია. წინასწარი მონაცემებით, 2018 წლის 3 კვარტალში, ბიზნეს სექტორში, სოფლის, სატყეო და თევზის მეურნეობის პროდუქციის გამოშვება, წინა წლის ანალოგიურ პერიოდთან შედარებით 10.8%-ით (31 მლნ ლარი) გაიზარდა.2017 წელს, ბიზნეს სექტორის გამოშვების წილმა სოფლის, სატყეო და თევზის მეურნეობის მთლიან გამოშვებაში 11% შეადგინა, რაც 1.2 პროცენტული პუნქტით აღემატება 2016 წლის და 3.5 პროცენტული პუნქტით აღემატება 2012 წლის ანალოგიურ მაჩვენებელს, რაც სოფლის მეურნეობით ბიზნესის მზარდ დაინტერესებაზე მიუთითებს. ღვინო2019 წლის რთველის პერიოდში მევენახეობის ადგილწარმოშობის ორ ზონაში „ქინძმარაულსა“ და „მუკუზანში“ ფერმერებს ყურძნის რეალიზაცია შეეძლებათ მხოლოდ ვენახების კადასტრის პროგრამის საფუძველზე. ამის შესახებ, საქართველოს გარემოს დაცვისა და სოფლის მეურნეობის მინისტრმა, ლევან დავითაშვილმა დღეს პარლამენტში „მინისტრის საათის“ ფარგლებში გამოსვლისას აღნიშნა. „2019 წელს ორ მნიშვნელოვან ადგილწარმოშობის ზონაში - „ქინძმარაულსა“ და „მუკუზანში“ ყურძნის ჩაბარება, აღრიცხვა და გადამუშავება მოხდება ფერმერის კადასტრის ელექტრონული სისტემაში დარეგისტრირების შემდეგ და არსებული ტრადიცია, სოფლის გამგებლების მიერ ცნობების გაცემა  ამ ზონებში აღარ იქნება საჭირო.  ანალოგიური სისტემა მუშაობს ევროპის ქვეყნებში და ეს სიახლე კიდევ უფრო აამაღლებს ქართული ღვინის საიმედოობასა და რეპუტაციას“ - აღნიშნა ლევან დავითაშვილმა. მისი განცხადებით, მეღვინეობის დარგში წარმატებულად მიმდინარეობს მუშაობა ღვინის ხარისხის კონტროლის ახალი სისტემების დანერგვის მიმართულებით, ასევე წარმატებით ხორციელდება ახალი საექსპორტო ბაზრების ათვისების სტრატეგია, რაც ასახულია ექსპორტის მზარდ მაჩვენებლებზე.  2018 წელს, საქართველოდან მსოფლიოს 53 ქვეყანაში  86,2 მლნ ბოთლი (0,75 ლ) ღვინოა ექსპორტირებული, რაც ბოლო თითქმის 30 წლის  რეკორდული მაჩვენებელია.  ზრდამ, 2017 წელთან შედარებით, 13%-ს მიაღწია. ექსპორტირებული ღვინის ღირებულება 203 მლნ აშშ დოლარს აღწევს,  რაც 2017 წლის ანალოგიურ მაჩვენებელთან შედარებით 20%-ითაა გაზრდილი. ექსპორტი გაზრდილია ქართული ღვინის სტრატეგიულ და ტრადიციულ ბაზრებზე, ევროპისა  და აზიის მიმართულებით;
#

„მინისტრის საათი“ - გარემოს დაცვისა და სოფლის მეურნეობის მინისტრს, ლევან დავითაშვილს პარლამენტში უსმენენ

მომზადდა გარემოსდაცვითი პასუხისმგებლობის შესახებ რეგულაციები, ეს არის ფუნდამენტური დოკუმენტი, ახალი კანონი, რომელიც  ევროპული დირექტივის მიხედვით არის მომზადებული და საქართველოში გარემოზე მიყენებული ზიანის დროს წარმოქმნილ პასუხისმგებლობას განსაზღვრავს. ამ კანონპროექტის შესაბამისად, დამაბინძურებელი კომპანიები გარემოს აღდგენას და ზიანის აღმოფხვრას უზრუნველყოფენ.  „განსაზღვრულია გარკვეული ფინანსური ვალდებულებები გარემოზე ზემოქმედების მსხვილი ობიექტებისთვის,  რათა ჩვენ ავიცილოთ ისეთი შემთხვევები რომლებიც წარსულში გვქონდა, ხშირ შემთხვევაში ფინანსური გადახდისუნარიანობის გამო, ჩვენ გვრჩებოდა გარემოსთვის მიყენებული ზიანი, მაგრამ ამ ზიანის გამოსწორების რესურსები სახელმწიფოს არ გააჩნდა",  - განაცხადა „მინისტრის საათის" ფარგლებში,  გარემოს დაცვის ა და სოფლის მეურნეობის მინისტრმა ლევან დავითაშვილმა. მწარმოებლის გაფართოებული ვალდებულების განხორციელება 2019 წლის 1 დეკემბრიდან დაიწყება მწარმოებლის გაფართოებული ვალდებულება საქართველოსთვის ახალ კონცეფციას წარმოადგენს და გულისხმობს გარკვეული პროდუქციის მწარმოებლებისა და იმპორტიორების მიერ პასუხისმგებლობის აღებას ამ პროდუქციის შედეგად წარმოქმნილი ნარჩენების მართვაზე ისე, რომ შემცირდეს გარემოზე უარყოფითი ზემოქმედება. სპეციფიკურ ნარჩენებს მიეკუთვნება: ნარჩენი შესაფუთი მასალა (პლასტმასი, ქაღალდი/მუყაო, ხე, ლითონი, მინა), ნარჩენი ელექტრო და ელექტრონული მოწყობილობები, ხმარებიდან ამოღებული საბურავები, ხმარებიდან ამოღებული სატრანსპორტო საშუალებები, გამოყენებული ზეთები, ბატარეები და აკუმულატორები. 2018 წელს ხელი მოეწერა  „მწვანე კლიმატის ფონდის“ მიერ დაფინანსებულ პროექტს, რომელიც ითვალისწინებს საქართველოს ტერიტორიაზე სტიქიური ჰიდროლოგიური და გეოლოგიური მოვლენების ადრეული გაფრთხილების სისტემების შექმნას და სტიქიური რისკების შეფასებას, პროექტი 2019 წელს დაიწყება.დაინერგება ადრეული შეტყობინების ეროვნული სისტემა და მოხდება მოდელირების შესაძლებლობების გაძლიერება.ქ. ქუთაისის მიმდებარე ტერიტორიაზე განთავსდება  მეტეოროლოგიური რადარი   რომელიც საშუალებას მოგვცემს, დასავლეთ საქართველოში მოსალოდნელი ამინდის პროგნოზირება და სტიქიური პროცესების შესახებ გაფრთხილებები უფრო მაღალი სიზუსტით მომზადდეს. შეიქმნება დასავლეთ საქართველოს გეოლოგიური ჯგუფი, ბუნებრივი სტიქიური პროცესების  განვითარების შემთხვევაში, სპეციალისტები  დასავლეთ საქართველოს რეგიონში სტიქიური პროცესების გამომწვევი მიზეზების ოპერატიულად შესწავლას სტიქიური პროცესების დადგენას და შესაბამის  რეკომენდაციებს  ადგილზე გასცემენ.  2018  წელს აქტიურად მიმდინარეობდა ქ. თბილისის ტერიტორიის გეოლოგიური საფრთხეების ზონირების რუკის შედგენა, გეოლოგიური ანგარიში საზოგადოებისთვის ხელმისაწვდომი იქნება 2019 წელს. 2017-2018  წლებში,  მაღალმთიან რეგიონებში დამონტაჟდა ხუთი ავტომატური მეტეოროლოგიური სადგური.  2018 წელს ჭუბერში მდინარე ნენსკრას აუზში დამონტაჟდა მდინარის დონეების მზომი და ნალექ მზომი მოწყობილობები. 2018 წელს  განხორციელდა  მეტეოროლოგიური რადარის განთავსების მიმართულებით  მოსამზადებელი  სამუშაოები ქ. ქუთაისის მიმდებარე ტერიტორიაზე, მეტეოროლოგიური რადარის განთავსება საშუალებას მოგვცემს დასავლეთ საქართველოში მოსალოდნელი ამინდის პროგნოზირება და სტიქიური პროცესების შესახებ გაფრთხილებები უფრო მაღალი სიზუსტით გავცეთ;  2018- წელს  მცხეთა-მთიანეთის რეგიონისთვის მომზადდა გეოლოგიური  რუკები."პარლამენტს უკვე წარედგინა ტყის ახალი კოდექსი, რომელიც იძლევა საშუალებას რომ ტყის ეკოლოგიური ფუნქციების გარდა,  მისი ეკონომიკური ფუნქციაც სწორად გამოვიყენოთ და შევინარჩუნოთ მისი სოციალური ფუნქცია. განისაზღვრა ტყის კატეგორიები, დაბრუნდება ტყის მეურნეობები", - განაცხადა ლევან დავითაშვილმა.ეროვნულმა სატყეო სააგენტომ მოახდინა სატყეო-სამეურნეო გზების რეაბილიტაცია მთელი ქვეყნის მასშტაბით 105,54 კმ-ზე. გზების მოწყობა-რეაბილიტაცია ხელს უწყობს ხანძარსაწინააღმდეგო პრევენციული ღონისძიებების ჩატარებას და ტყის მოვლა-აღდგენის სამუშაოებს. აგრეთვე, უადვილებს მოსახლეობას სააგენტოს მიერ გამოყოფილი ტყეკაფებიდან საშეშე მერქნის გამოტანას. ბორჯომის ხეობაში დასრულდა ნახანძრალი ტყის აღდგენის პირველი ეტაპი ტყის აღდგენის სამუშაოები განხორციელდა 163.73 ჰა ფართობზე, მათ შორის დასრულდა ბორჯომის ხეობაში ნახანძრალი ტყის აღდგენის პირველი ეტაპი. დარგული იქნა 270 000-მდე ნერგი. ღონისძიებები გაგრძელდება მიმდინარე წელსაც და ტყის აღდგენა განხორციელდება 329,51 ჰა-ზე.ტყის ეროვნული აღრიცხვა გერმანიის მთავრობის მიერ გამოყოფილი გრანტის ფარგლებში, ქვეყანაში პირველად ინერგება ტყის ეროვნული აღრიცხვა (ინვენტარიზაცია) და საფუძველი ეყრება ტყის შესახებ მუდმივად განახლებადი ინფორმაციისა და მონიტორინგის სისტემას.  ტყის ეროვნული აღრიცხვის პირველი სამუშაოები 2019 წელს განხორციელდება კახეთის, გურიის, მცხეთა-მთიანეთის, შიდა ქართლისა და ქვემო ქართლის რეგიონებში.  ეროვნული სატყეო სააგენტოს მიერ ინიცირებული ახალგაზრდა მეტყევე სპეციალისტთა გადამზადების პროგრამა, რომელიც მოტივირებულ 16 ახალგაზრდას შესაძლებლობას მისცემს ტყის აღრიცხვის მიმართულებით გაიღრმავოს ცოდნა. პროგრამის ფარგლებში მომზადებული სპეციალისტები ჩაერთვებიან ტყის აღრიცხვის სამუშაოებში ლაგოდეხისა და ახმეტის სატყეო უბნების ტერიტორიაზე (სულ 82 186 ჰა). აღნიშნულ ტერიტორიებზე, ეროვნული სატყეო სააგენტო საკუთარი რესურსებითა და ძალებით განახორციელებს ტყის ინვენტარიზაციას და მოამზადებს ტყის 10 წლიანი მართვის გეგმებს.  გარემოს დაცვის და სოფლის მეურნეობის მინისტრმა ლევან დავითაშვილმა პარლამენტში „მინისტრის საათის“ ფორმატში სამინისტროს საქმიანობის წლიური ანგარიშის წარდგენისას გარემოს ეროვნული სააგენტოს  მეთევზეობისა და შავი ზღვის მონიტორინგის დეპარტამენტის შესაბამისი აღჭურვილობებით განახლების მნიშვნელობაზე ისაუბრა.როგორც მინისტრმა აღნიშნა, მიმდინარე წლის ბოლოსთვის გარემოს ეროვნული სააგენტოს მეთევზეობისა და შავი ზღვის მონიტორინგის დეპარტამენტი შესაბამისი მოწყობილობებით აღიჭურვება. სპეციალისტები,  მიღებული გამოცდილების  საფუძველზე,  ახალი, თანამედროვე ხელსაწყოთი -  ეკოსაუნდერის საშუალებით  განახორციელებენ შავ ზღვაში თევზის მარაგების ოდენობის დათვლას. ეს საშუალებას მისცემს ჩვენს სპეციალისტებს მაღალი სიზუსტით ჩაატარონ კვლევები, ხოლო მაღალი სიზუსტით დათვლილი მარაგები, საშუალებას მისცემს ქვეყანას უფრო მეტი შემოსავლები მიიღოს მეთევზეობის დარგიდან. მინისტრის განცხადებით, 2019 წელს დაგეგმილია ქ. ბათუმში მეთევზეობისა და შავი ზღვისა  მონიტორინგის დეპარტამენტის თანამდროვე სტანდარტებით აღჭურვილი ახალი შენობის მშენებლობა,  სადაც  განთავსდება მეთევზეობისა და შავი ზღვისა და ჰიდრომეტეოროლოგიის დეპარტამენტები. სახელმწიფო ბიუჯეტიდან გამოყოფილია 1,5 მილიონი ლარი.საქართველო საზღვაო ქვეყანაა და მდიდარია ჰიდრორესურსებით, რომლის გამოყენება შესაძლებელია აკვაკულტურის მიზნებისთვის.  როგორც ლევან დავითაშვილმა განცხადა, აღნიშნულის პარალელურად, მიმდინარეობს აკვაკულტურის შესახებ კანონპროექტის შემუშავება, რომელიც განსაზღვრავს აკვაკულტურის საქმიანობის განხორციელების სამართლებრივ საფუძვლებს,  ნებართვის გაცემის პროცედურებს,  ზონების დადგენის, აკვაკულტურის საქმიანობის განხორციელებისას ბიომრავალფეროვნების დაცვის, გარემოსდაცვის და აკვაკულტურასთან დაკავშირებულ  საკითხებს. მნიშვნელოვანია, რომ, 2018 წელს პირველად შავი ზღვის სანაპიროს სარეწაო რესურსების აკუსტიკური კვლევა და თევზის რესურსების შეფასება განხორციელდა .