#

ქართველი აგრონომების ცოდნის ასამაღლებლად USAID პროგრამა

გარემოს დაცვისა და სოფლის მეურნეობის მინისტრის პირველმა მოადგილემ ნოდარ კერესელიძემ და აშშ-ის საერთაშორისო განვითარების სააგენტოს (USAID) ადმინისტრატორის მოადგილემ ევროპისა და ევრაზიის საკითხებში ბროკ ბირმენიმ პრაქტიკოს აგრონომების ტრენინგ პროგრამის დახურვის ღონისძიებაში მიიღეს მონაწილეობა. პროგრამაში ჩართული იყო საქართველოს 10 რეგიონი. 7 ქალაქში 96 თეორიული და 60 პრაქტიკული სესია ჩატარდა და მასში მონაწილეობდნენ მაღალკვალიფიციური ექსპერტები.როგორც მინისტრის მოადგილემ ნოდარ კერესელიძემ აღნიშნა, აშშ სოფლის განვითარების კუთხით საქართველოსთვის უმნიშვნელოვანესი მხარდამჭერი ქვეყანაა.„ექსტენციის სისტემის განვითარება არის ერთ-ერთი უმნიშვნელოვანესი კომპონენტი დარგის განვითარებისთვის, ვინაიდან სწორედ ექსტენციის მეშვეობით ფერმერთან ჩვენ მიგვაქვს ცოდნა და ინფორმაცია სოფლის მეურნეობაში ახალი ტექნოლოგიების შესახებ, რათა ამაღლდეს მათი კონკურენტუნარიანობა. ეს პროექტი ამას ემსახურებოდა, რომ ჩვენი საინფორმაციო-საკონსულტაციო ცენტრების თანამშრომლებმა, რომლებიც უშუალოდ მუშაობენ ფერმერებთან, ამ სასერთიფიკაციო კურსებში აღიჭურვნენ ახალი უნარჩვევებით, როგორც თეორიული ისე პრაქტიკული და სამომავლოდ ამ ცოდნას გადასცემენ ფერმერებს,“ - განაცხადა ნოდარ კერესელიძემ.„განსაკუთრებით მნიშვნელოვანია საქართველოსთვის მსგავსი პროექტების განხორციელება. ჩვენ ვფიქრობთ, რომ ვასწავლოთ ფერმერებს და გავუზიაროთ მათ ის ინფორმაცია, რაც მართლა გამოადგებათ მომავალში, ჩვენ ვაძლევთ იმის საშუალებას, რომ თავიანთი ცოდნა გაუზიარონ სხვებსაც, რათა უფრო მეტად შეუწყონ ხელი სოფლის მეურნეობის განვითარებას,“ - განაცხადა ბროკ ბირმენიმ. პროგრამის ფარგლებში, საინფორმაციო-საკონსულტაციო ცენტრის თანამშრომლებმა პრაქტიკოსი აგრონომების ცოდნის გაღრმავება, ახალი სასოფლო-სამეურნეო ტექნოლოგიების, მცენარეთა დაცვის ინტეგრირებული სისტემის, არატრადიციული კულტურების და ახალი ჯიშების შესახებ ამომწურავი ინფორმაცია მიიღეს, რაც საბოლოო ჯამში ხელს შეუწყობს ექსტენციის სერვისის ეფექტიანობის გაზრდას. რეგიონალურ უნივესრიტეტებში ჩატარდა რამდენიმე სემინარი ისეთ აქტუალურ თემებზე, როგორიც მაგალითად მავნებლებთან ბრძოლის ღონისძიებებია. პროგრამა განხორციელდა საქართველოს აგრარული და სამი რეგიონული უნივერსიტეტის მეშვეობით, და საქართველოს მასშტაბით, მასში მონაწილეობა მიიღო საინფორმაციო-საკონსულტაციო ცენტრების 103-მა თანამშრომელმა.
#

აზიური ფაროსანას წინააღმდეგ ბრძოლის 2018 წლის პროგრამა

დღეისათვის, აზიური ფაროსანას წინააღმდეგ ბრძოლა, საქართველოს გარემოს დაცვისა და სოფლის მეურნეობის სამინისტროს, სსიპ სურსათის ეროვნული სააგენტოს და სამთავრობო კომისიის წევრი ყველა სახელმწიფო სტრუქტურის ერთ-ერთი მთავარი გამოწვევაა. საქართველოს ხელისუფლებამ, ქართველი და უცხოელი მეცნიერებისა და სპეციალისტების ჩართულობით და მიღებული გამოცდილების საფუძველზე ბრძოლის სტრატეგია და სამოქმედო პროგრამა შეიმუშავა, რომლის დეტალები გარემოს დაცვისა და სოფლის მეურნეობის მინისტრმა ჟურნალისტებსგააცნო. ლევან დავითაშვილმა საქართველოში ამერიკელი მეცნიერების და სპეციალისტების ვიზიტი შეაფასა და აღნიშნა, რომ მსოფლიოში წამყვანმა სპეციალისტებმა, ქართველ მეცნიერებთან ერთად სახელმწიფო პროგრამა საერთაშორისო სიმპოზიუმზე განიხილეს. გარემოს დაცვისა და სოფლის მეურნეობის მინისტრის განცხადებით, სპეციალისტებმა 2017 წელს სახელმწიფოს მიერ ჩატარებული ღონისძიებები და 2018 წლის ფაროსანასთან ბრძოლის სტრატეგია დადებითად შეაფასეს.სახელმწიფო სტრატეგიის მიზანია, მოხდეს აზიური ფაროსანას მართვა, მისი პოპულაციის შემცირება და სასოფლო-სამეურნეო კულტურების დაზიანებისა და მიყენებული ზარალის მინიმუმამდე დაყვანა. „2018 წელს ჩვენი სამოქმედო გეგმა ითვალისწინებს 4 ძირითად მიმართულებას. აზიური ფაროსანას რიცხოვნობის მინიმალურ ზღვრამდე დაყვანა და კონტროლი მიღწევადია მხოლოდ სახელმწიფოს, ფერმერების და მთლიანად საზოგადოების ერთობლივი ძალისხმევით. პირველი ამოცანა ჩვენი სტრატეგიის არის ის, რომ ჩვენ მინიმუმამდე შევამციროთ ეკონომიკური ზარალი, მოვახდინოთ კონტროლი და სასოფლო-სამეურნეო საქმიანობა არ იყოს წამგებიანი. ჩვენ უნდა გავუმკლავდეთ აზიურ ფაროსანას - ეს არის ჩვენი ამოცანა“, - განაცხადა ლევან დავითაშვილმა.გარემოს დაცვისა და სოფლის მეურნეობის მინისტრმა ასევე აღნიშნა, რომ მარტის შუა რიცხვებიდან მონიტორინგის სისტემა მთელ საქართველოს ტერიტორიაზე განთავსდება და მონიტორინგის შედეგები მოსახლეობას ოპერატიულად მიეწოდება.„დათბობასთან ერთად აზიური ფაროსანას აქტივობა გაიზრდება, თუმცა ამ ეტაპზე გვაქვს ცივი პერიოდი. ახლა მავნებელი იმყოფება გამოზამთრების ფაზაში. ის იქნება შენობაში და შესაბამისად, ეს არის პერიოდი, როდესაც ჩვენ ვერ ჩავატარებთ ვერანაირ წამლობას, რადგან სახლში ქიმიური წამლობა დაუშვებელია. ბევრი ცდილობს პანიკის დათესვას, მათ შორის ბევრმა პოლიტიკოსმა, სამწუხაროდ, ეს თავის დღის წესრიგის ნაწილი გახადა. ამ ეტაპზე, მარტის ბოლომდე, მავნებლის წინააღმდეგ ეფექტიანია მხოლოდ მექანიკური ღონისძიებების გატარება. ამიტომ თითოეულმა მოქალაქემ თავის ტერიტორიაზე, საკუთარი პასუხისმგებლობის ფარგლებში, საცხოვრებელ სახლებში თუ დამხმარე ნაგებობებში მექანიკურად უნდა მოახდინოს ამ მავნებლის განადგურება“, - განაცხადა ლევან დავითაშვილმა.
#

აშშ-ის და საქართველოს სამეცნიერო წრეების შეხვედრა

აშშ-ის და საქართველოს სამეცნიერო წრეები აზიურ ფაროსანასთან ბრძოლის საკითხებს განიხილავენ „აზიური ფაროსანა-გლობალური გამოწვევა, საერთაშორისო გამოცდილება და პრობლემების გადაწყვეტის გზები“ თემაზე, თბილისში მიმდინარეობს სამეცნიერო სამუშაო შეხვედრა რომელშიც აშშ-ის წამყვანი სპეციალისტები და ქართველი მეცნიერები მონაწილეობენ. ღონისძიება საერთაშორისო განვითარების სააგენტოს საქართველოს სასოფლო-სამეურნეო წარმოების ეფექტიანობის აღდგენის პროექტის (USAID /REAP) და კომპანიის TRECE Inc (აშშ) ორგანიზებით იმართება. კონფერენციაზე ხაზგასმით აღინიშნა, რომ ინვაზიური მავნებელი აზიური ფაროსანა (Halyomorpha halys) მნიშვნელოვანი გამოწვევაა არა მარტო საქართველოს, არამედ მსოფლიოს მრავალი ქვეყნის სოფლის მეურნეობისა და ეკონომიკისთვის. მეცნიერებას წამყვანი როლი ენიჭება ამ მავნებლის წინააღმდეგ მიმართული ბრძოლის ეფექტური მეთოდების შემუშავებაში, დანერგვასა და განხორციელებაში. ამერიკის შეერთებულ შტატებს მავნებელთან ბრძოლის მრავალწლიანი გამოცდილება გააჩნია. სამეცნიერო სამუშაო შეხვედრაზე, აშშ-ის წამყვანი მეცნიერები ქართველ კოლეგებს უახლეს მიღწევებს, კვლევების შედეგებსა და პერსპექტიულ თანამედროვე ტექნოლოგიებს გააცნობენ. ქართველი მეცნიერებს კი საშუალება აქვთ წარმოადგინონ მათ მიერ განხორციელებული კვლევების შედეგები, სამომავლო ხედვები, გააღრმაონ სამეცნიერო კავშირები და ამერიკელ მეცნიერებთან ერთობლივი სამეცნიერო პროექტები დაგეგმონ. კონფერენციის ფარგლებში განიხილება მავნებლის ბიოლოგიის, საქართველოს ბიომრავლფეროვნების, მონიტორინგის თანამედროვე სისტემების, ბიოინსექტიციდების და პოპულაციის მართვის საკითხები. სურსათის ეროვნული სააგენტოს მცენარეთა დაცვის სპეციალისტები წარმოადგენენ ინფორმაციას 2016-2017 წლებში გატარებული ღონისძიებების და 2018 წლის სტრატეგიული ხედვის შესახებ. ხოლო სოფლის მეურნეობის სამინისტროს სამეცნიერო კვლევითი ცენტრის მეცნიერები ბიოინსექტიციდების გამოცდის შედეგებზე ისაუბრებენ. გამოცდილების გაზიარების მიზნით, ღონისძიებას ესწრებიან საქართველოს მეზობელი ქვეყნების სპეციალისტები. აშშ-ის საერთაშორისო განვითარების სააგენტოს საქართველოს სასოფლო-სამეურნეო წარმოების ეფექტიანობის აღდგენის პროექტის (USAID /REAP) და კომპანია TRECE Inc (აშშ) ორგანიზებით, საქართველოში იმყოფებიან აშშ-ის უნივერსიტეტების და კვლევითი ცენტრების წამყვანი მეცნიერები, მათ შორის აშშ-ის სოფლის მეურნეობის დეპარტამენტის სასოფლო-სამეურნეო კვლევის სამსახურის (USDA, ARS), ვირჯინიის ტექნიკური უნივერსიტეტის, სასოფლო-სამეურნეო კვლევებისა და ექსტენციის ცენტრის, ოკლაჰომას და პენსილვანიის სახელმწიფო უნივერსიტეტების წარმომადგენლები. ამერიკელ მეცნიერებთან ერთად სამეცნიერო შეხვედრას ესწრებიან საქართველოს სამეცნიერო წრეების წარმომადგენლები, საქართველოს მეცნიერებათა ეროვნული აკადემიის, საქართველოს სოფლის მეურნეობის აკადემიის, საქართველოს პროფილაქტიკური მედიცინის მეცნიერებათა აკადემიის, ივ, ჯავახიშვილის თბილისის სახელმწიფო უნივერსიტეტის, საქართველოს სახელმწიფო უნივერსიტეტის, საქართველოს სახელმწიფო სამედიცინო უნივერსიტეტის წარმომადგენლები.
#

საქართველოში ოლიმპიური თამაშების გამართვის პერსპექტივის განხილვა

გარემოს დაცვისა და სოფლის მეურნეობის მინისტრი ლევან დავითაშვილი ოლიმპიური თამაშების მასპინძელი ქვეყნების შემფასებელი კომისიის მთავარ ექსპერტს, ჟილბერ ფელის და საერთაშორისო ოლიმპიური კომიტეტის დელეგაციის წევრებს შეხვდა.შეხვედრაზე მხარეებმა საქართველოში ოლიმპიური თამაშების გამართვის პერსპექტივები განიხილეს.შეხვედრაზე მინისტრმა საერთაშორისო ოლიმპიური კომიტეტის წევრებს, პრეზენტაციის სახით, ინფორმაცია მიაწოდა საქართველოს გეოგრაფიის, ლანდშაფტის, წყლის და სხვა ბუნებრივი რესურსებისა და ბიომრავალფეროვნების შესახებ. მინისტრმა ვრცლად ისაუბრა მეღვინეობის 8000 წლიან უწყვეტ ისტორიაზე და საქართველოზე, როგორც ქვეყანაზე, რომელიც ღვინის აკვანია. ლევან დავითაშვილმა დელეგაციის წევრებს ევროკავშირთან დაახლოების და ჰარმონიზაციის კონტექსტში საქართველოს საკანონდებლო ვალდებულებებიც გააცნო და ოლიმპიური თამაშებისთვის გარემოსდაცვითი საკითხების გათვალისწინებით, ქვეყნის ინფრასტრუქტურული მომზადების მნიშვნელობაზე გაამახვილა ყურადღება. ოლიმპიური თამაშების მასპინძელი ქვეყნების შემფასებელი კომისიის მთავარმა ექსპერტმა მინისტრის მიერ ქვეყნის პოტენციალის შესახებ წარმოდგენილი პრეზენტაცია დადებითად შეაფასა.„საქართველოს ბუნების სილამაზე და ბიომრავალფეროვნება ნამდვილად შთამბეჭდავია. მნიშვნელოვანია, რომ ინფრასტრუქტურის განვითარებამ ხელი არ უნდა შეუშალოს გარემოსდაცვით საკითხებს. ვიზიტის ფარგლებში ჩვენ ვხვდებით, რომ ყველა სამინისტრო როგორც ერთი ორგანიზმი ისე მუშაობს, რაც ნებისმიერი წამოწყების წარმატებისთვის უმნიშვნელოვანესი ფაქტორია“,- განაცხადა ჟილბერ ფელიმ.გარემოს დაცვისა და სოფლის მეურნეობის სამინისტროში გამართულ შეხვედრას მინისტრის პირველი მოადგილე ნოდარ კერესელიძე და მინისტრის მოადგილე ნინო თანდილაშვილი ესწრებოდნენ.საერთაშორისო ოლიმპური კომიტეტის წარმომადგენლების ვიზიტი საქართველოს პრემიერ-მინისტრის ლოზანაში ყოფნის პერიოდში დაიგეგმა, როდესაც გიორგი კვირიკაშვილი შეხვდა ოლიმპიური კომიტეტის თავმჯდომარეს, ტომას ბახს, სადაც განიხილეს სამომავლო თანამშრომლობის შესაძლებლობები და პერსპექტივები. 
#

სოლომონ პავლიაშვილმა BIOFIN-ის კონფერენციაში მონაწილეობა მიიღო

ინდოეთში, ქ. ჩენაიში, ბიომრავალფეროვნების ფინანსური ინიციატივის (BIOFIN) გლობალური კონფერენცია გაიმართა, რომელსაც გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი დაესწრო.კონფერენციაში ბიომრავალფეროვნების ფინანსური ინიციატივის 30 ქვეყნის 200-მდე წარმომადგენელმა მიიღო მონაწილეობა. მხარეებმა ბიომრავალფეროვნების დაფინანსებასთან დაკავშირებით ქვეყნების გამოცდილებაზე, არსებულ საჭიროებებსა და მდგომარეობის გაუმჯობესების კონკრეტულ მაგალითებზე იმსჯელეს.კონფერენციის მიზანია ქვეყნებს შორის გამოცდილების გაზიარება და ტექნიკური შეხვედრების ჩატარება, ბიომრავალფეროვნების ფინანსური ინიციატივის განხორციელებით მიღებული შედეგების განხილვა და ბიომრავალფეროვნებისათვის საჭირო ფინანსური რესურსების მოძიების გზებთან დაკავშირებით ერთობლივი კონსულტაცია.მინისტრის მოადგილემ მაღალი რანგის შეხვედრაზე სიტყვით მიმართა მონაწილეებს, რომლის ფარგლებშიც ხაზი გაუსვა ბიომრავალფეროვნების მნიშვნელობას და შესაბამისად კონსერვაციისათვის ფინანსური რესურსების მობილიზების აუცილებლობას, როგორც დონორული, ისე ადგილობრივი წყაროებიდან დაფინანსების ზრდის მნიშვნელობას.პროექტის გუნდის მიერ შეხვედრაზე წარდგენილი იქნა პროექტის ფარგლებში შემუშავებული დოკუმენტები „ბიომრავალფეროვნების პოლიტიკისა და ინსტიტუციური მოწყობის მიმოხილვა“ და „ბიომრავალფეროვნების ფინანსური გეგმა“. შეხვედრის მონაწილეებს წარედგინათ ინფორმაცია პროექტის ფარგლებში მიღწეული შედეგების, არსებული გამოწვევების და სამომავლოდ დაგეგმილი აქტივობები.ბიომრავალფეროვნების ფინანსური ინიციატივის პროექტი გაეროს განვითარების პროგრამის (UNDP) თაოსნობით და ხელშეწყობით ხორციელდება. 
#

„ტყის მდგრადი მართვის გაძლიერება საქართველოში“ შემაჯამებელი შეხვედრა

გარემოს დაცვისა და სოფლის მეურნეობის სამინისტროში, პროექტის- „ტყის მდგრადი მართვის გაძლიერება საქართველოში“ შემაჯამებელი შეხვედრა გაიმართა. მხარეებმა ევროკავშირის მხარდაჭერით ტყის მდგრადი მართვის სისტემის ჩამოყალიბებასა და სატყეო სექტორში დონორი ორგანიზაციების დახმარების კოორდინაციის გაძლიერებაზე იმსჯელეს. ასევე, არალეგალური ტყითსარგებლობის ფაქტების აღმოფხვრის პრაქტიკისა და სოციალური ჭრების სისტემის უფრო მდგრადი და მოქნილი სისტემით ჩანაცვლების საჭიროება განიხილეს. შეხვედრას საქართველოში ევროკავშირის წარმომადგენლობის გარემოსდაცვითი პროგრამის ხელმძღვანელი ალვარო ორტეგა, ლიტვის გარემოს დაცვის სამინისტროსა და არასამთავრობო ორგანიზაციების  წარმომადგენლები ესწრებოდნენ.
#

სამინისტროსა და USAID-ს შორის მემორანდუმი გაფორმდა

გარემოს დაცვისა და სოფლის მეურნეობის სამინისტროს და ამერიკის შეერთებული შტატების საერთაშორისო განვითარების სააგენტოს (USAID) შორის მემორანდუმი გაფორმდა. მემორანდუმის ფარგლებში, აზიურ ფაროსანასთან ბრძოლის ღონისძიებებისათვის გათვალისწინებულია 3,5 მილიონი დოლარის გამოყოფა. მემორანდუმს ხელი გარემოს დაცვისა და სოფლის მეურნეობის მინისტრმა, ლევან დავითაშვილმა და USAID- ის ადმინისტრატორის მოადგილემ ევროპისა და ევრაზიის ქვეყნებში, ბროკ ბირმანმა მოაწერეს. „ძალიან მნიშვნელოვანია ამერიკის შეერთებული შტატების საერთაშორისო განვითარების სააგენტოს მხარდაჭერა, რომლის ფარგლებშიც, საქართველო, აზიურ ფაროსანასთან ბრძოლის ღონისძიებების მხარდასაჭერად, დამატებით ფინანსურ დახმარებას მიიღებს. აღნიშნული ფინანსური რესურსით დამატებით მოხდება, ერთი მხრივ, ტექნიკის შესყიდვა (ტრაქტორები, შემასხურებლები, ფერომონები), მეორე მხრივ, ცოდნის გაზიარება და სურსათის ეროვნული სააგენტოს თანამშრომლებისთვის ტრენინგების უზრუნველყოფა“, - აღნიშნა ლევან დავითაშვილმა.ბროკ ბირმანის განცხადებით, აღნიშნული მემორანდუმის ფარგლებში, აშშ-ს მხარე საქართველოს აზიურ ფაროსანას წინააღმდეგ ბრძოლაში დაეხმარება. „პირადად მქონდა შესაძლებლობა დასავლეთ საქართველოში დამეთვალიერებინა ფაროსანას მიერ დაზიანებული თხილის პლანტაციები. ჩვენ მზად ვართ, პრობლემის გადასაჭრელად აქტიურად ჩავერთოთ დაგეგმილ ღონისძიებებში“, - განაცხადა ბროკ ბირმანმა.