#

ლევან დავითაშვილი მსოფლიო ბანკის ევროპისა და ცენტრალური აზიის წყლის მიმართულების მენეჯერს დევიდ მიშოს შეხვდა

გარემოს დაცვისა და სოფლის მეურნეობის მინისტრი ლევან დავითაშვილი მსოფლიო ბანკის ევროპისა და ცენტრალური აზიის წყლის მიმართულების მენეჯერს დევიდ მიშოს შეხვდა, სადაც მინისტრმა ლევან დავითაშვილმა მსოფლიო ბანკსა და საქართველოს შორის თანამშრომლობის საუკეთესო გამოცდილებაზე ისაუბრა. შეხვედრაზე საირიგაციო სისტემების წყლით უზრუნველყოფის საკითხები განიხილეს და კლიმატის ცვლილებებით გამოწვეული გვერდითი ეფექტების შემცირების გზებზე იმსჯელეს.  შეხვედრის მონაწილეებმა იმ პროექტებზეც ისაუბრეს, რომელიც წყლებზე მუდმივი ხელმისაწვდომობის უზრუნველყოფის კუთხით, მსოფლიო ბანკის მხარდაჭერით,  გარემოს დაცვისა და სოფლის მეურნეობის სამინისტრო შეძლებს განახორციელოს.  ასევე აღინიშნა, რომ 8 მაისს ინტერსექტორული შეხვედრა გაიმართება, სადაც განიხილავენ იმ პრიორიტეტული წყალსაცავების მშენებლობის პროექტებს, რომელიც არამხოლოდ საირიგაციო ფუნქციის შემსრულებელი იქნება, არამედ მოემსახურება ქვეყნის ენერგეტიკულ მიზნებსაც. შეხვედრას გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი, მოადგილე ხატია წილოსანი და სამინისტროში შემავალი შესაბამისი უწყებების ხელმძღვანელები ესწრებოდნენ.
#

ლევან დავითაშვილი: „გარემოსდაცვითი საკითხები აქტუალურია საზოგადოებისთვის და პრიორიტეტულია სახელმწიფოსთვის“

საქართველოს პრემიერ-მინისტრმა, მამუკა ბახტაძემ გარემოსდაცვითი ომბუდსმენი წარადგინა. პრემიერის ინიციატივით, გარემოსდაცვითი უფლებების და ინტერესების დასაცავად, ახალი ინსტიტუტი შეიქმნა, რომელსაც დევიდ მორისონი უხელმძღვანელებს. ღონისძიებაზე დამსწრე საზოგადოებას პრემიერ-მინისტრმა მამუკა ბახტაძემ მისასალმებელი სიტყვით მიმართა. „ჩვენ გვწამს, რომ მწვანე ეკონომიკას და მდგრად განვითარებას არ აქვს ალტერნატივა. საქართველოსთვის ეს არის გზა, რომელიც საშუალებას მოგვცემს, მოვახერხოთ ჩვენი ეკონომიკური პოტენციალის სრულფასოვანი რეალიზაცია“, - განაცხადა მამუკა ბახტაძემ.„გარემოსდაცვითი საკითხები საზოგადოების მაღალი ინტერესის სფეროს წარმოადგენს. შესაბამისად, ჩვენთვის მოსახლეობასთან კომუნიკაცია განსაკუთრებით პრიორიტეტულია. როდესაც ეკონომიკის განვითარებაზე ვსაუბრობთ, ჩვენ მდგრადი განვითარების პრინციპებს და მწვანე ეკონომიკას ვგულისხმობთ. ეს საკითხები ძალიან აქტუალურია საზოგადოებისთვის და პრიორიტეტულია სახელმწიფოსთვის. სწორედ ამ პრიორიტეტულობის დამადასტურებელია ის ინიციატივა, რომელიც საქართველოს პრემიერ-მინისტრმა გასულ წელს სამთავრობო პროგრამის პრეზენტაციის დროს გააკეთა და დღევანდელი ღონისძიება, სადაც გარემოსდაცვითი ომბუდსმენის ინსტიტუტის შექმნის საკითხებზე ვისაუბრეთ“, - აღნიშნა ლევან დავითაშვილმა.ომბუდსმენი გარემოსდაცვით საკითხებში მაღალი ლეგიტიმაციის მქონე ფიგურა იქნება, რომელსაც ეყოლება საკითხების განმხილველი საბჭო. საბჭოშიმოხდება ცალკეულ აქტუალურ გარემოსდაცვით საკითხებზე მსჯელობა.გარემოს დაცვისა და სოფლის მეურნეობის მინისტრმა, ლევან დავითაშვილმა ომბუდსმენის ინსტიტუტის მნიშვნელობაზე ისაუბრა და აღნიშნა, რომ „მწვანე პოლიტიკის“ ფარგლებში დაგეგმილ აქტივობებში საზოგადოების ჩართულობა მნიშვნელოვანია.ომბუდსმენი რეკომენდაციებს მოამზადებს მნიშვნელოვან საკითხებზე, მათ შორის, კანონმდებლობაში განსახორციელებელ ცვლილებებზე; მიიღებს მონაწილეობას საჯარო განხილვებში, გაუწევს კონსულტაციებს დაინტერესებულ პირებს.გარემოსდაცვითი ომბუდსმენის ინსტიტუტი არაერთ განვითარებულ ქვეყანაში, მათ შორის, უნგრეთში, ირლანდიაში, ავსტრიაში არსებობს. ამ ინსტიტუტის დანერგვაზე აქტიურად მუშაობს ამერიკის შეერთებული შტატები.დევიდ მორისონი მრავალწლიან საქმიანობას სამართლებრივ და ფინანსურ საკითხებზე მსოფლიოს არაერთ ქვეყანაში ეწეოდა, 2008 წლიდან კი, საქართველოში აქტიურად ჩაერთო გარემოსდაცვითი პროექტების განხორციელებაში.2008 -2016 წლებში, დევიდ მორისონი ხელმძღვანელობდა კავკასიის ბუნების დაცვის ფონდს (CNF). სწორედ ამ პერიოდში განხორციელდა მნიშვნელოვანი პროექტები დაცული ტერიტორიების (ვაშლოვანის ეროვნული პარკი, ყაზბეგის ეროვნული პარკი, მტირალას ეროვნული პარკი, ბორჯომ-ხარაგაულის ეროვნული პარკი, ალგეთის ეროვნული პარკი) ინფრასტრუქტურის განვითარებისა და ბიომრავალფეროვნების კონსერვაციის  მიმართულებებით.პროექტის ფარგლებში, მნიშვნელოვნად გაუმჯობესდა დაცულ ტერიტორიაზე მომუშავე ადამიანების შესაძლებლობები. განახორციელა მნიშვნელოვანი ინიციატივა - დაცული ტერიტორიების თანამშრომელთა ჯანმრთელობისა და სიცოცხლის დაზღვევა.
#

ლევან დავითაშვილი: „კრწანისის ტყე-პარკი იქნება გამორჩეული ადგილი“

საქართველოს გარემოს დაცვისა და სოფლის მეურნეობის მინისტრმა, ლევან დავითაშვილმა, კრწანისის ტყე-პარკში, ბიომრავალფეროვნების პროგრამის პრეზენტაცია წარმოადგინა.„კრწანისის ტყე-პარკი იქნება გამორჩეული ადგილი ეკოლოგიის თვალსაზრისით, როგორც ადგილობრივი მოსახლეობისთვის, ისე ტურისტებისთვის. ეს იქნება ადგილი, სადაც ჩვენ გვექნება როგორც ფლორის, ისე ფაუნის სახეობების მონახულების საშუალება“, - განაცხადა ლევან დავითაშვილმა.ტყე-პარკში წარმოდგენილი იქნება არა მარტო არსებული უნიკალური ფლორა და ფაუნა, არამედ გაშენდება მცენარეები წითელი ნუსხიდან. ამავე დროს, აღდგება კრწანისის ტყე-პარკის ბუნებრივი ფუნქცია – რეკრეაციული სივრცე, ტყე-პარკი ღია იქნება და გადაადგილება მხოლოდ ფეხით, ველოსიპედით ან ელექტრომობილით იქნება დაშვებული. „ძალიან მოკლედ მინდა წარმოგიდგინოთ პრეზენტაცია და მოგახსენოთ იმ გამოწვევების შესახებ, რომლის წინაშეც ვდგავართ; გაგაცნობთ იმ ხედვას, რომელიც გვაქვს ბიომრავალფეროვნების აღდგენის პროგრამის განსახორციელებლად.მოგეხსენებათ, დღეის მდგომარეობით, სათბობ და მერქნულ მასალაზე მოთხოვნიდან გამომდინარე ტყეზე ზეწოლა დიდია;გარკვეულის საფრთხეების წინაშეა ფაუნის ადგილობრივ სახეობათა პოპულაციები; არაორგანიზებულია სამონადირეო და სათევზაო დარგი ამ საფრთხეების ერთ-ერთი შემადგენელი ნაწილია;დასამალი არ არის, რომ დღეისათვის სამეცნიერო კვლევების და მონიტორინგის მნიშვნელოვანი სიმწირეა; ასევე დასარეგულირებელი საკანონმდებლო ბაზა. ყოველივე ზემოაღნიშნული წარმოადგენს იმ გამოწვევებს, რომლებსაც უნდა გავუმკლავდეთ და სისტემური ქმედებებით მივიღოთ ახალი რეალობა, სადაც ბიომრავალფეროვნება იქნება აღდგენილი და დაცული.სამინისტროს უწყება - „ველური ბუნების ეროვნული სააგენტო“ იქნება ის რგოლი, რომელიც ბიომრავალფეროვნების აღდგენის მიმართულებით გაააქტიურებს მუშაობას და ახალი პროგრამის განხორციელებას დაიწყებს.აღსანიშნავია, რომ 2017 წელს გაეროს სურსათის და სოფლის მეურნეობის ორგანიზაციის (FAO) პროგრამის „ველური ბუნების მდგრადი მართვის გაძლიერება საქართველოში“ ფარგლებში დაიგეგმა ორი ღონისძიება: არსებული სამართლებრივი სივრცის შეფასება და მისი მოწესრიგების  დაგეგმვა;ველური ბუნების მდგრადი მართვის პრაქტიკული მოდელირება. FAO-ს ექსპერტთა  ჯგუფის  2018 წლის ძირითადი რეკომენდაცია იყო, უკვე არსებული ინსტიტუციის ბაზაზე შექმნილიყო  ველური ბუნების  მართვის ორგანო.ჩვენ წინაშე მდგარი გამოწვევებისა და FAO-ს ექსპერტთა  ჯგუფის  რეკომენდაციის გათვალისწინებით, საქართველოს მთავრობის 2019 წლის 15 თებერვლის 86-ე დადგენილებით გადაწყდა  საქართველოს გარემოს დაცვისა და სოფლის მეურნეობის სამინისტროს  სსიპ „ეროვნული საშენი მეურნეობის“ ბაზაზე, მისი რეორგანიზების გზით, ჩამოყალიბებულიყო სსიპ „ველური ბუნების ეროვნული სააგენტო“სააგენტოს მიზნები და ამოცანები უკვე გაწერილია. ესენია:სახეობათა და მათი ჰაბიტატის აღრიცხვა და მონიტორინგი;სახეობათა  აღწარმოებისთვის საჭირო სამუშაო გენოფონდის შექმნა;სახეობათა აღწარმოებისა და ჰაბიტატების აღდგენის დაგეგმვა;კერძო სექტორისთვის სადედე ჯგუფებისა და საკონსულტაციო მომსახურებების მიწოდება;სალიცენზიო ფართობების იდენტიფიცირება და სალიცენზიო პირობების შემუშავება სახეობათა და ჰაბიტატების კუთხით;მონადირეთა და მეთევზეთა სერტიფიცირება;სხვადასხვა სახეობის ეკო-ტურიზმის  განვითარების ხელშეწყობა;მოსახლეობის გარემოსდაცვითი ცნობიერების ამაღლება.
#

კრწანისის ტყე-პარკში ბიომრავალფეროვნების აღდგენის პროგრამის პრეზენტაცია გაიმართა

ღონისძიებაზე დამსწრე საზოგადოებას სიტყვით საქართველოს პრემიერ-მინიატრმა, მამუკა ბახტაძემ მიმართა. პროგრამის პრეზენტაცია  გარემოს დაცვისა და სოფლის მეურნეობის მინისტრმა, ლევან დავითაშვილმა წარმოადგინა. მამუკა ბახტაძემ, სიტყვით გამოსვლისას, მწვანე ეკონომიკაზე ისაუბრა და ხაზი გაუსვა ბიომრავალფეროვნების დაცვასა და უნიკალური სახეობების აღდგენის მნიშვნელობას. „დღეს ვიწყებთ ძალიან მნიშვნელოვან პროექტს. ეს იქნება პროექტი, რომლითაც, დარწმუნებული ვარ, იამაყებს არა მარტო ჩვენი თაობა, არამედ მომავალი თაობები. ჩვენ ვიწყებთ კრწანისის ტყე-პარკის აღდგენას და მის განვითარებას. ჩვენ აქ შევქმნით ნამდვილ ცოცხალ მუზეუმს“, - განაცხადა ქვეყნის პრემიერ-მინისტრმა. ლევან დავითაშვილმა ბიომრავალფეროვნების დაცვის პროგრამის ფარგლებში შექმნილი ველური ბუნების სააგენტოს ძირითად ფუნქციებზე გაამახვილა ყურადღება. სააგენტოს მთავარი ფუნქცია, ბუნებაში აღწარმოების მიზნით, ადგილობრივი ფლორასა და ფაუნის მონიტორინგის გაწევა იქნება. „ჩვენი მთავრობის მიერ პრიორიტეტად გამოცხადებული „მწვანე ეკონომიკის“ სტრატეგიის ფარგლებში აქ დაფუძნდება  „ველური ბუნების ეროვნული სააგენტო“, რომელიცა ქვეყნის მასშტაბით ბიომრავალფეროვნების აღდგენის მიმართულებით უმნიშვნელოვანეს ღონისძიებებს განახორციელებს“, - განაცხადა გარემოს დაცვისა და სოფლის მეურნეობის მინისტრმა. ღონისძიების ფარგლებში, კრწანისის ტყე-პარკის ტერიტორიაზე ადგილობრივი იშვიათი ფრინველი „კოლხური ხოხობი" გაუშვეს.
#

ლევან დავითაშვილმა სასოფლო-სამეურნეო კოოპერატივის „ნიქოზი” სანერგე მეურნეობა მოინახულა

გარემოს დაცვისა და სოფლის მეურნეობის მინისტრი ლევან დავითაშვილი და საქართველოს სახელმწიფო მინისტრი შერიგებისა და სამოქალაქო თანასწორობის საკითხებში ქეთევან ციხელაშვილი, შიდა ქართლის გუბერნატორთან გიორგი ხოჯევანიშვილთან ერთად, სოფელ ნიქოზში იმყოფებოდნენ, სადაც სასოფლო-სამეურნეო კოოპერატივის „ნიქოზის” სანერგე მეურნეობა მოინახულეს. ფერმერმა გიორგი მჭედლიძემ სოფლის მეურნეობის პროექტის „დანერგე მომავალი” ფარგლებში, გამყოფ ხაზთან მდებარე  სოფელში მომგებიანი მეურნეობა  შექმნა, რომელიც გაფართოებასა და ახალი ჯიშების გამრავლებაზეა ორიენტირებული. ფერმერმა ამერიკული ჯიშის კაკლისა და ნუშის ნერგები ჩამოიტანა და რამდენიმე ათას ჰექტარზე გააშენა. „კოოპერატივი ნიქოზი ძალიან კარგ საქმეს აკეთებს, რომელიც სანიმუშო და სამაგალითოა სხვა ფერმერებისთვის. სიმბოლური და მნიშვნელოვანია, რომ ეს ბაღი ზუსტად გამყოფი ხაზის მიღმაა. ერთია ის პროგრამები, რომლებსაც სახელმწიფო ახორციელებს მრავალწლიანი კულტურის გაშენებისა და  თანამედროვე მეურნეობის განვითარების ხელშეწყობისთვის და მეორე და მნიშვნელოვანი, რომ გამყოფ ხაზთან მცხოვრები ფერმერებისთვის დამატებითი შეღავათები არსებობდეს. ჩვენ ასეთი შეღავათები გავაჩინეთ ყველა მიმართულებით, რათა უფრო მეტი მოტივაცია ქონდეს გამყოფი ხაზის  პირას მცხოვრებ ფერმერს“, - განაცხადა ლევან დავითაშვილმა. როგორც გარემოს დაცვისა და სოფლის მეურნეობის მინისტრმა აღნიშნა, გამყოფ ხაზთან მდებარე სოფლებში, ფერმერები განსხვავებული პირობებით ისარგებლებენ. კერძოდ, გამყოფი ხაზის მიმდებარე სოფლებისათვის ცვლილებები შევა პროექტში „დანერგე მომავალი". მრავალწლიანი ბაღების თანადაფინანსების კომპონენტში გასაშენებელი მიწის მინიმალური ფართობი შეადგენს 1 ჰა-ს, ცვლილების თანახმად, გამყოფი ხაზის მიმდებარე სოფლებში მიწის მინიმალური ფართობი შემცირდება და 1 ჰა-ს ნაცვლად მინიმალური ფართობი იქნება 0,5 ჰა. ასევე მრავალწლოვანი ხეხილის ბაღების თანადაფინანსების კომპონენტში ფერმერი იღებდა ნერგებზე 70%, ხოლო სარწყავ სისტემებზე 50% დახმარებას, ცვლილებების თანახმად, მრავალწლოვანი ბაღების გაშენებისთვის ფერმერი მიიღებს ნერგების ღირებულების 80% თანადაფინანსებას, ხოლო სარწყავი სისტემების ღირებულების 60% დაფინანსებას. ცვლილებები შევა სოფლის მეურნეობის გადამამუშავებელი და შემნახველი საწარმოების თანადაფინანსების პროექტშიც. გამყოფ ხაზთან მდებარე სოფლებში, აღნიშნული პროექტის განხორციელების შემთხვევაში, ფერმერი სახელმწიფოსგან ნაცვლად 40%-იანი გრანტისა, მიიღებს 50-%ს - არაუმეტეს 600,000 ლარისა.
#

მწარმოებლის გაფართოებულ ვალდებულებასთან დაკავშირებული კანონქვემდებარე აქტების პრეზენტაცია

2019 წლის 25 აპრილს, სასტუმროში “რადისონ ბლუ ივერია“, გაიმართა მწარმოებლის გაფართოებულ ვალდებულებასთან დაკავშირებული კანონქვემდებარე აქტების პროექტების პრეზენტაცია. პრეზენტაციას დაესწრო ცენტრალური და ადგილობრივი ხელისუფლების, საერთაშორისო და დონორი ორგანიზაციების, კერძო სექტორის, სავაჭრო პალატების, ბიზნეს ასოციაციებისა და სხვა დაინტერესებული მხარეების 150-ზე მეტი წარმომადგენელი.პრეზენტაცია გაიმართა საქართველოს გარემოს დაცვისა და სოფლის მეურნეობის სამინისტროს და ევროკავშირის ტექნიკური დამხარების პროექტის ერთობლივი ძალისხმევით და მიზნად ისახავდა დაინტერესებული მხარეებისათვის ინფორმაციის მიწოდებას მწარმოებლის გაფართოებულ ვალდებულებასთან დაკავშირებულ პროცესებზე საქართველოში; ასევე საერთაშორისო პრაქტიკის და საუკეთესო გამოცდილების გაზიარებას.  შეხვედრის მონაწილეებს მისასალმებელი სიტყვით მიმართეს საქართველოს გარემოს დაცვისა და სოფლის მეურნეობის მინისტრის მოადგილემ, ხატია წილოსანმა და ალექსანდრე დარასი, ევროკავშირის წარმომადგენლობა საქართველოში, ატაშე/კავშირის, ენერგიის, გარემოს დაცვისა და კლიმატის ცვლილებების სექტორის კოორდინატორი. საერთაშორისო და ადგილობრივმა ექსპერტებმა წარმოადგინეს ევროკავშირის ტექნიკური დახმარების პროექტის ფარგლებში შემუშავებული კანონქვემდებარე აქტების პროექტები შეფუთვის ნარჩენების, ბატარეების, აკუმულატორების, ხმარებიდან ამოღებული სატრანსპორტო საშუალებების, საბურავებისა და გამოყენებული ზეთების შესახებ. პრეზენტაციაზე წარმოდგენილ იქნა, აგრეთვე ინსტიტუციურ მოწყობასთან დაკავშირებული საკითხები და სამომავლო ნაბიჯები.   ყოველწლიურად, საქართველოში დაახლოებით 900 000 ტონა მუნიციპალური ნარჩენი წარმოიქმნება, რომელიც შეიცავს 1000-მდე სახიფათო და არასახიფათო ნივთიერებას. მწარმოებლის გაფართოებული ვალდებულება ევროპაში დანერგილი ნარჩენების მართვის წარმატებული მოდელია. მწარმოებლის გაფართოებული ვალდებულება გულისხმობს პროდუქციის მწარმოებლის/იმპორტიორის მიერ პასუხისმგებლობის აღებას ადამიანისა და ჯანმრთელობისათვის სახიფათო სპეციფიკური ნარჩენების შეგროვებასა და დამუშავებაზე.საქართველოს „ნარჩენების მართვის კოდექსით“ განსაზღვრულია მწარმოებლის გაფართოებული ვალდებულების დანერგვა სპეციფიკური ნარჩენებისთვის, რომელიც ძალაში 2019 წლის დეკემბრიდან უნდა შევიდეს. სპეციფიკურ ნარჩენებს განეკუთვნება: შეფუთვის ნარჩენები (პლასტმასი, ქაღალდი, მუყაო, ხე, ლითონი, მინა), ნარჩენი ელექტრო და ელექტრონული მოწყობილობები, ხმარებიდან ამოღებული საბურავები, ხმარებიდან ამოღებული სატრანსპორტო საშუალებები, გამოყენებული ზეთები, გამოყენებული ბატარეები და აკუმულატორები.მწარმოებლის გაფართოებული ვალდებულება საქართველოსთვის ახალ კონცეფციას წარმოადგენს და მის დასანერგად აუცილებელია შესაბამისი საკანონმდებლო ჩარჩო და საზოგადოებისა და კერძო სექტორის ცნობიერების სათანადო დონე. საქართველოს გარემოს დაცვისა და სოფლის მეურნეობის სამინისტრო ევროკავშირისა და სხვა დონორების მხარდაჭერით აქტიურად მუშაობს ამ მიმართულებით  2017 წლიდან.მწარმოებლის გაფართოებული ვალდებულება, რომელიც პირველად შვედეთში თომას ლინდკვისტის მიერ შვედეთის გარემოს დაცვის სამინისტროსთვის წარდგენილ 1990 წლის ანგარიშში იქნა წარმოდგენილი, ხელს უწყობს:• ნარჩენების სეპარირებულ შეგროვებასა და რესურსად გამოყენებას• ნარჩენების ხელახალი გამოყენების, რეციკლირებისა და აღდგენის სხვა ფორმების დანერგვას• ნაგავსაყრელებზე განთავსებული ნარჩენების რაოდენობის შემცირებას• სახიფათო ნივთიერებების უსაფრთხო დამუშავებას• რესურსებისა და ღირებული მეორადი ნედლეულის გამოყენებას• სხვადასხვა პროდუქციის სასიცოცხლო ციკლში ჩართული ყველა ოპერატორის (მწარმოებელი, იმპორტიორი, დისტრიბუტორი, მომხმარებელი, შემგროვებელი, დამშლელი, რეციკლირების განმახორციელებელი და ექსპორტიორი) საქმიანობის გარემოსდაცვითი მაჩვენებლების გაუმჯობესებას• პროდუქციის უკეთესი დიზაინის შექმნას• ახალი საწარმოებისა და სამუშაო ადგილების შექმნას, და რაც მთავარია,• ადამიანის ჯანმრთელობასა და გარემოზე უარყოფითი ზემოქმედების შემცირებას
#

ნინო თანდილაშვილი: საქართველოსა და ევროკავშირს შორის ასოცირების შესახებ შეთანხმებით ნაკისრი ვალდებულებების შესრულება უმნიშვნელოვანესი საკითხია

გარემოს დაცვისა და სოფლის მეურნეობის მინისტრის მოადგილემ ნინო თანდილაშვილმა ევროკავშირის საჯარო სამსახურის დაძმობილების პროექტის „სამრეწველო დაბინძურებისა და საფრთხეების სფეროში ევროკავშირის გარემოსდაცვითი კანონმდებლობასთან დაახლოება და მისი იმპლემენტაცია“ დასკვნით ღონისძიებაზე მოწვეულ სტუმრებს სიტყვით მიმართა. მინისტრის მოადგილემ მადლობა გადაუხადა ევროკავშირს გარემოსდაცვითი მიმართულებით განხორციელებული რეფორმირების პროცესში მხარდაჭერისთვის. „მოგეხსენებათ, საქართველოსა და ევროკავშირს შორის ასოცირების შესახებ შეთანხმებით ნაკისრი ვალდებულებების შესრულება უმნიშვნელოვანესი საკითხია, რაც რთული იქნება საუკეთესო ევროპული პრაქტიკის გაზიარების გარეშე. ჩვენ, აღნიშნული პროექტის ფარგლებში, მნიშვნელოვანი ცოდნა და გამოცდილება შევიძინეთ. შესაბამისად, თვალსაჩინოა პროგრესიც და ვფიქრობ, მომავალშიც გავაგრძელებთ ეფექტიან თანამშრომლობას“, - განაცხადა ნინო თანდილაშვილმა. ღვინის ეროვნული სააგენტოს მუზეუმში გამართულ შეხვედრას საქართველოში ევროკავშირის წარმომადგენლობის კავშირის, ენერგიის, გარემოს დაცვისა და კლიმატის ცვლილებების სექტორის კოორდინატორმა, ალექსანდრე დარასი,  ევროკავშირის წევრ სახელმწიფოთა კონსორციუმის (ესპანეთი - გარემოსა და სივრცითი დაგეგმვის გალიციის რეგიონული სამინისტრო - CMAOT,  ნიდერლანდები - ინფრასტრუქტურისა და გარემოს სამინისტრო, ჰოლანდიური ცოდნის ცენტრი - Infomil, ჩეხეთის რესპუბლიკის გარემოსდაცვითი ინფორმაციის სააგენტო- CENIA)  და შესაბამისი უწყებების  წარმომადგენლები ესწრებოდნენ.