#

ლევან დავითაშვილი RMG-ის მიერ გარემოსდაცვითი ღონისძიებების შესრულების სამუშაოებს გაეცნო

გარემოს დაცვისა და სოფლის მეურნეობის მინისტრი ლევან დავითაშვილი, პარლამენტის გარემოს დაცვისა და ბუნებრივი რესურსების კომიტეტთან არსებულ ქვემო ქართლის რეგიონში გარემოს დაბინძურების შემსწავლელ სამუშაო ჯგუფის ("საყდრისის კომიტეტი", "მწვანე პოლიტიკის საზოგადოებრივი და სამეცნიერო - კვლევითი პლატფორმა") წევრებთან ერთად კაზრეთში იმყოფებოდა, სადაც კომპანია RMG Cooper-სა და RMG Gold-ის მიერ სამინისტროს წინაშე აღებული ვალდებულებების შესრულების პროცესს გაეცნო. „საყდრისისა და კაზრეთის ტერიტორიაზე სამთომომპოვებელი სამუშაოების გამო, წლების განმავლობაში უამრავი პრობლემა დაგროვდა. სამინისტრომ 2018 წელს გააკეთა მიწერილობა, რომლის მიხედვითაც კომპანიას დაევალა, როგორც ისტორიული მემკვიდრეობითი პრობლემებისა და ზიანის გამოსწორება, ისე მიმდინარე გარემოსდაცვითი საკითხების მოგვარება. ჩვენთვის მნიშვნელოვანია რეგულარულად დავაკვირდეთ თუ როგორ სრულდება სამინისტროს მიერ გაცემული ვალდებულებები. ამ საკითხს, რა თქმა უნდა, გარემოსდაცვითი ზედამხედველობის დეპარტამენტი დეტალურად შეისწავლის“, - განაცხადა ლევან დავითაშვილმა.როგორც საყდრისის კომიტეტის ხელმძღვანელმა ნინო ბურჭულაძემ განაცხადა, მისასალმებელია, რომ კომპანიამ გარკვეული სამუშაოები შეასრულა, ნაწილი კი შესრულების სტადიაშია.„თუმცა საბოლოო შედეგებზე ჯერ საუბარი ნაადრევია. დასკვნების გაკეთების შესაძლებლობა აპრილის ბოლოს გვექნება“, - განაცხადა ნინო ბურჭულაძემ.კომპანიას სამინისტროს მიერ გარემოსდაცვითი ღონისძიებების როგორც გრძელვადიანი, ასევე მოკლევადიანი ვალდებულებები აქვს დაკისრებული, რომელთა შორის უმეტესობა წყალდაცვით ღონისძიებებს უკავშირდება. კომპანიამ სპილენძის კუდსაცავზე, საიდანაც მდინარე კაზრეთულას დაბინძურება ხდებოდა, სამინისტროს მიერ გაცემული ვალდებულების ფარგლებში, წყლის შემკრები რეზერვუარი და სატუმბი სისტემა ააშენა, რითაც მოხდა მდინარე კაზრეთულას დაბინძურების წყაროს აღკვეთა.კომპანიამ ასევე მთავრობის დადგენილების  შესაბამისად ნარჩენების 7 უბანი მოაწყო და საწარმო უბნებში წარმოქმნილი მტვრის გარემოში მოხვედრის თავიდან ასაცილებლად მტვერდამჭერი მოწყობილობები დაამონტაჟა.
#

გარემოს დაცვისა და სოფლის მეურნეობის სამინისტროში ცხოველთა ჯანმრთელობის ეროვნული პროგრამის (NAHP) 33-ე შეხვედრა გაიმართა

გარემოს დაცვისა და სოფლის მეურნეობის სამინისტროში ცხოველთა ჯანმრთელობის ეროვნული პროგრამის (NAHP) სამეთვალყურეო ჯგუფის რიგით 33-ე შეხვედრა გაიმართა.შეხვედრას გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი უძღვებოდა.მისასალმებელ სიტყვაში გიორგი ხანიშვილმა მადლობა გადაუხადა სამეთვალყურეო ჯგუფის წევრებს 10 წლიანი მუშაობისთვის. მუშაობის პროცესში დაგროვილი გამოცდილება უმნიშვნელოვანესად შეაფასა და განაცხადა, რომ ამერიკის შეერთებული შტატების სოფლის მეურნეობის დეპარტამენტის პროგრამის დასრულებასთან დაკავშირებით სამეთვალყურეო ჯგუფის მენეჯმენტს  სამინისტროს სურსათის და სოფლის განვითარების დეპარტამენტი გადაიბარებს.  „მადლობა მინდა გადავუხარო დონორ ორგანიზაციებს და ექსპერტებს პროგრამის განხორცილებაში შეტანილი წვლილისთვის.  პროგრამის ფარგლებში ხელშესახები შედეგები გვაქვს, მაგრამ პერსპექტივაში გამოწვევები ბევრია, ამიტომ ვფიქრობ დონორები ჩვენს გვერდით იქნებიან და მომავალშიც ეფექტიან თანამშრომლობას გავაგრძელებთ“ - განაცხადა გიორგი ხანიშვილმა.შეხვედრაზე საუბარი შეეხო ცხოველთა დაავადებების ზედამხედველობისა და კონტროლის კუთხით განხორციელებულ ღონისძიებებს. სურსათის ეროვნული სააგენტოს, სამინისტროს ლაბორატორიის, დაავადებათა კონტროლისა და საზოგადოებრივი ჯანმრთელობის ეროვნული ცენტრის წარმომადგენლებმა მიმდინარე აქტივობების და სამომავლო გეგმების შესახებ ისაუბრეს. სურსათის ეროვნული სააგენტოს უფროსის ზურაბ ჩეკურაშვილის განცხადებით, მიმდინარეობს მუშაობა რაჭა-ლეჩხუმ-ქვემო სვანეთის და მესტიის მუნიციპალიტეტების ცხოველთა დაავადებებისგან თავისუფალ ზონად გამოცხადების შესახებ.გარემოს დაცვისა და სოფლის მეურნეობის სამინისტროში გამართულ შეხვედრას აშშ-ის სოფლის მეურნეობის დეპარტამენტის (USDA), საქართველოს საზოგადოებრივ საქმეთა ინსტიტუტის (GIPA) სოფლის მეურნეობის განვითარების დეპარტამენტის, გაეროს სურსათის და სოფლის მეურნეობის ორგანიზაციის (FAO), საფრთხეების შემცირების სააგენტოს (DTRA), ავსტრიის განვითარების სააგენტოს (ADA), საქართველოში შვეიცარიის თანამშრომლობის ოფისის (SCO) და ევროკავშირის (EU) წარმომადგენლები ესწრებოდნენ.
#

საქართველოში მიწის ეროზიის საწინააღმდეგო ღონისძიებების - ქარსაფარი ზოლების აღდგენისა და გაშენებასთან დაკავშირებული პროექტის შემაჯამებელი შეხვედრა გაიმართა

საქართველოში მიწის ეროზიის საწინააღმდეგო პროექტების შემაჯამებელ შეხვედრაზე გარემოს დაცვისა და სოფლის მეურნეობის მინისტრის პირველმა მოადგილემ გიორგი ხანიშვილმა ქარსაფარი ზოლების მნიშვნელობაზე და ამ მიმართულებით დღეს არსებულ მდგომარეობაზე ისაუბრა. მან საერთაშორისო დონორი ორგანიზაციების კონტრიბუციასა და მაქსიმალურ ჩართულობას გაუსვა ხაზი.  აღსანიშნავია, რომ პროექტის ფარგლებში დასრულდა 25 კმ-იანი ქარსაფარი ზოლების გაშენება ქარელისა და გორის მუნიციპალიტეტებში (მათ შორის, საოკუპაციო ხაზის მიმდებარე სასოფლო-სამეურნეო სავარგულებისთვის). პროექტს ჰყავდა 514 ბენეფიციარი, მათ შორის 120 ქალი-ფერმერი. დაირგო 40 000-ზე მეტი ხე-მცენარე, რომელთაგან 20 000 ნერგი ფოტოდეგრადირებადი  პლასტიკური ტუბით არის დაცული (საერთო ჯამში, 1 327,8 ჰექტარი). ასევე  მოეწყო 2 მცირე ზომის სანერგე მეურნეობა ქალი ფერმერებისთვის, სადაც დაინერგა კონტეინერული წესით ნერგების გამოყვანა.აღნიშნული შეხვედრა გაიმართა   სოფლის მეურნეობის განვითარების საერთაშორისო ფონდის (IFAD) ფინანსური მხარდაჭერით, საქართველოს სოფლის მეურნეობის მოდერნიზაციის, ბაზრის ხელმისაწვდომობისა და მდგრადობის (AMMAR) პროექტის ფარგლებში.   ამავე პროექტით მომზადდა “ქარსაფარი (მინდორდაცვითი) ზოლების შესახებ“ კანონის პროექტის რეგულირების ზეგავლენის შეფასების (Regulatory Impact Assessment - RIA) ანგარიში.შეხვედრაზე ბენეფიციარი ფერმერების მონაწილეობით ასევე განიხილეს და შეაჯამეს ქარელისა და გორის მუნიციპალიტეტებში ქარსაფარი ზოლების გაშენების შედეგები, მიღწეული წარმატებები და არსებული გამოწვევები. პროექტის საბოლოო მიზანია  მწვანე სოფლის მეურნეობის ინიციატივის ხელშეწყობა სოფლის მდგრადი განვითარებისთვის.
#

საქართველოს მთავრობა სასოფლო-სამეურნეო მექანიზაციის შესყიდვის ხელშემწყობი სახელმწიფო პროგრამის განხორციელებას იწყებს

გარემოს დაცვისა და სოფლის მეურნეობის სამინისტროს ა(ა)იპ - სოფლის მეურნეობის პროექტების მართვის სააგენტო საქართველოს მთელ ტერიტორიაზე სასოფლო-სამეურნეო ტექნიკის თანადაფინანსების პროგრამას დაიწყებს. როგორც გარემოს დაცვისა და სოფლის მეურნეობის მინისტრმა ლევან დავითაშვილმა აღნიშნა, ეს პროგრამა ფერმერებთან შეხვედრებზე ყველაზე ხშირად განიხილებოდა და გამოიკვეთა, რომ ეს მათთვის მნიშვნელოვან საჭიროებას წარმოადგენდა. „ვფიქრობთ, რომ ტექნიკაზე წვდომის უზრუნველსაყოფად საჭიროა მთელი რიგი მიმართულებები, მათ შორის, საგრანტო და თანადაფინანსება. ჩვენ მივიღეთ გადაწვეტილება, რომ ახალი პროგრამის ფარგლებში 50 % გრანტით თანადაფინანსება ექნება სასოფლო-სამეურნეო ტექნიკას. მაქსიმალური ლიმიტი ამ შემთხვევაში განსაზღვრულია 150 000 ლარით. ეს თანხა იქნება გრანტი, რომელსაც ბენეფიციარი ფერმერი მიიღებს. მნიშვნელოვანია, რომ ფერმერები, რომელთაც სურთ ამ პროგრამაში მონაწილეობა რეგისტრირებულნი იყვნენ.“ - განაცხადა ლევან დავითაშვილმა.პროგრამის მიზანია  სასოფლო-სამეურნეო ტექნიკაზე (განსაკუთრებით მოსავლის ამღები ტექნიკა, როგორც თვითმავალი, ასევე მისაბმელი) ხელმისაწვდომობის გაზრდა.პროგრამის ამოცანას წარმოადგენს სასოფლო-სამეურნეო ტექნიკის შესასყიდად საჭირო ფინანსებზე ხელმისაწვდომობის გაზრდა თანადაფინანსების გზით.პროგრამის ფარგლებში, რომლის ბიუჯეტიც 4,0 მილიონი ლარია, სააგენტოს თანადაფინანსების მოცულობა ერთ ბენეფიციარზე შეადგენს შესასყიდი სასოფლო-სამეურნეო ტექნიკის ღირებულების არაუმეტეს 50%-ს, მაგრამ არაუმეტეს 150,000 ლარისა.პროგრამის ბენეფიციარი შეიძლება იყოს საქართველოს მოქალაქე ფიზიკური პირი ან ინდივიდუალური მეწარმე ან კანონის შესაბამისად რეგისტრირებული კომერციული იურიდიული პირი (მათ შორის სასოფლო სამეურნეო კოოპერატივი) რომელშიც სახელმწიფო არ ფლობს წილს/პაის/აქციას.ბენეფიციარის მიერ შესასყიდი სასოფლო-სამეურნეო ტექნიკა უნდა იყოს ექსპლუატაციაში არ მყოფი და წარმოებული უნდა იყოს შესყიდვამდე არაუმეტეს 2 კალენდარული წლით ადრე;პროგრამა განხორციელდება „ერთიანი აგროპროექტის“ ფარგლებში, რომელიც გათვლილია გრძელვადიან განვითარებაზე და მისი მიზანია ისეთი გარემოს შექმნა, რომელიც ხელს შეუწყობს სოფლის მეურნეობაში კონკურენტუნარიანობის ამაღლებას, მაღალხარისხიანი პროდუქციის წარმოების სტაბილურ ზრდას, სურსათის უვნებლობის საერთაშორისო სტანდარტების დანერგვას.სასოფლო-სამეურნეო მექანიზაციის შესყიდვის ხელშემწყობ სახელმწიფო პროგრამაზე დღეს პრემიერ-მინისტრმა მამუკა ბახტაძემაც ისაუბრა, რომელმაც სოფლის განვითარების დარგში პოზიტიურ დინამიკაზე გაამახვილა ყურადღება და აღნიშნა, რომ სასოფლო-სამეურნეო ტექნიკაზე ხელმისაწვდომობის ნაწილში მხარდამჭერი პროგრამები აუცილებელია.
#

ლევან დავითაშვილმა ქაღალდის სეპარირებული შეგროვების კონკურსში გამარჯვებული სკოლები დააჯილდოვა

გარემოს დაცვისა და სოფლის მეურნეობის მინისტრმა ლევან დავითაშვილმა ქაღალდის სეპარირებული შეგროვების კონკურსში გამარჯვებული სკოლები დააჯილდოვა, მოსწავლეებს შესაბამისი სერტიფიკატები და თემატური პრიზები გადასცა.მინისტრმა ქვეყნაში ნარჩენების მდგარდი მართვის საჭიროებაზე ისაუბრა და ყურადღება ნარჩენების მართვის კოდექსსა და სამინისტროს გრძელვადიანი ნარჩენების მართვის სტრატეგიის მნიშვნელობაზე გაამახვილა.   როგორც ლევან დავითაშვილმა აღნიშნა, ცნობიერების ამაღლება ნარჩენების მართვაში ერთ-ერთი უმნიშვნელოვანესი საკითხია და ამერიკის შეერთებული შტატების საერთაშორისო განვითარების სააგენტოს (USAID) მხარდაჭერისთვის მადლობა გადაუხადა.კონკურსი, კავკასიის გარემოსდაცვითი არასამთავრობო ორგანიზაციების ქსელი (CENN) -ის მიერ, USAID ფინანსური მხარდაჭერით, პროგრამა „ნარჩენების მართვის ტექნოლოგია რეგიონებში- ფაზა II (WMTR II) ფარგლებში გაიმართა.პროგრამა ხორციელდება საქართველოს სამ რეგიონში - კახეთი, აჭარა, შიდა ქართლი და  ხელს უწყობს ქვეყანაში ნარჩენების მართვის სექტორის მოდერნიზებას და ინკლუზიურ ეკონომიკურ ზრდას.აღსანიშნავია, რომ კონკურსში მონაწილე 135 სკოლამ ჯამურად 53 ტონა მაკულატურა შეაგროვა. მათგან კი, შეგროვებული ქაღალდის ნარჩენის რაოდენობის მიხედვით 7 გამარჯვებული სკოლა გამოვლინდა.ღონისძიებაზე ასევე წარმოდგენილი იყო „მწვანე კომპანიების“ ნაწარმი პროდუქცია. მათ შორის, საქართველოში წარმოებული გადამუშავებული ქაღალდისგან დამზადებული ნივთები.ღონისძიებას განათლების, მეცნიერების, კულტურისა და სპორტის მინისტრის მოადგილე ირინა აბულაძე და USAID-ის ეკონომიკური განვითარების ოფისის დირექტორი ვერონიკა ლი ესწრებოდნენ.
#

ლევან დავითაშვილი რეგიონალური ბიზნესის ფორუმზე „ღია დიალოგი“ სიტყვით გამოვიდა

გარემოს დაცვისა და სოფლის მეურნეობის მინისტრმა ლევან დავითაშვილმა, ეკონომიკური გუნდის მინისტრებსა და ვიცე-პრემიერ მაია ცქიტიშვილთან ერთად ბიზნეს ფორუმში მიიღო მონაწილეობა. ღონისძიების ორგანიზატორი საქართველოს სავაჭრო-სამრეწველო პალატა იყო. ლევან დავითაშვილმა სიტყვით გამოსვლისას ბიზნესსექტორთან კომუნიკაციის მნიშვნელობაზე გაამახვილა ყურადღება და აღნიშნა, რომ ხელისუფლების ეფექტიანი პოლიტიკის განსახორციელებლად ბიზნესთან დიალოგი აუცილებელია.. „ჩვენი სამინისტრო ორი მიმართულებით მუშაობს, როგორც სოფლის მეურნეობის, ასევე გარემოსდაცვით საკითხებზე მარეგულირებელ საქმიანობას ახორციელებს, რაც პირდაპირ დაკავშირებულია ჩვენს ბიზნესსექტორთან. ამიტომ მთავრობის ეფექტიანი პოლიტიკის განსახორციელებლად ბიზნესთან კომუნიკაცია ძალიან მნიშვნელოვანია. ჩვენ მიერ შემოღებული ნებისმიერი მარეგულირებელი დოკუმენტი ემსახურება სამართლიანი კონკურენტუნარიანი გარემოს შექმნას. ასევე მნიშვნელოვანია სოფლის მეურნეობაში, როგორც შიდა ასევე უცხოური ინვესტიციის მოზიდვა და ამ მხრივ, ბიზნესის მხარდაჭერისთვის სოფლის მეურნეობაში არაერთი პროგრამა გვაქვს.“ - განაცხადა ლევან დავითაშვილმა. ფორუმის ფარგლებში, მცირე, საშუალო და მსხვილი საწარმოების, კოოპერატივებისა და დარგობრივი ბიზნეს-ასოციაციების 200-მდე წარმომადგენელი ესწრებოდა. შეხვედრა დიალოგის ფორმატში წარიმართა. ფორუმის ფარგლებში, მონაწილეების წინაშე პრეზენტაციებით წარსდგნენ-საჯარო რეესტრის ეროვნული სააგენტოს, ქონების ეროვნული სააგენტოს, ფინანსთა სამინისტროს შემოსავლების სამსახურის, სააგენტოს ,,აწარმოე საქართველოში“, სურსათის ეროვნული სააგენტოს, სოფლის მეურნეობის სამინისტროს პროექტების მართვის სააგენტოს და ინოვაციებისა და ტექნოლოგიების განვითარების სააგენტოს ხელმძღვანელები.
#

ლევან დავითაშვილი ბიომრავალფეროვნების დაცვის საკითხებით დაინტერესებული ორგანიზაციების წარმომადგენლებს შეხვდა

 გარემოს დაცვისა და სოფლის მეურნეობის მინისტრი ლევან დავითაშვილი, ბიომრავალფეროვნების დაცვის საკითხებით დაინტერესებული ორგანიზაციების წარმომადგენლებს შეხვდა.შეხვედრაზე  მხარეებმა  ერთობლივი პროექტების მიმდინარეობაზე, სამომავლო მიზნებსა და ქმედებებზე იმსჯელეს. სამინისტრო აქტიურად მუშაობს აღნიშნულ ორგანიზაციებთან და ახორციელებს არაერთ პროექტს, რასაც ბიომრავალფეროვნების დაცვის სფეროში არსებული გამოწვევების დაძლევისა და კონსერვაციის მიზნების მისაღწევად უდიდესი მნიშვნელობა აქვს.„ჩვენთვის ბიომრავალფეროვნების შენარჩუნება, დაცვა და ხშირ შემთხვევაში, აღდგენის ღონისძიება უმნიშვნელოვანესია. მეორეს მხრივ, სწრაფი ეკონომიკური ზრდა საკმაოდ პრიორიტეტულია. ადამიანის ზემოქმედება ბუნებაზე დღითიდღე იზრდება, შესაბამისად, დაცვის ღონისძიებების გატარება აუცილებელია. სწორედ ამიტომ, ჩვენს სამინისტროს აქვს შემუშავებული ახალი კანონპროექტი, რომელიც ახლებურად დაარეგულირებს და შექმნის საკანონმდებლო საფუძველს ბიომრავალფეროვნების მართვის კუთხით. გარდა ამისა, მნიშვნელოვანია, რომ დონორი ორგანიზაციების მიერ დაფინანსებული პროექტი და არასამთავრობო ორგანიზაციების საქმიანობა თანხვედრაში იყოს სამინისტროს პოლიტიკასთან. დღევანდელი შეხვედრის მიზანსაც ყველა დაინტერესებულ მხარესთან ერთად, მეტი კოორდინაციით, უფრო ეფექტური პოლიტიკის წარმოება და აღსრულების ღონისძიებების დაგეგმა წარმოადგენდა“ , - განაცხადა ლევან დავითაშვილმა.მხარეები შეთანხმდნენ, რომ პროცესების სწორად წარმართვისთვის აუცილებელია ყველა საერთაშორისო, სამთავრობო და არასამთავრობო ორგანიზაციებსა თუ სამეცნიერო ინსტიტუტებს შორის თანამშრომლობის კიდევ უფრო გაძლიერება და სხვადასხვა ორგანიზაციებს შორის კოორდინაციის გაუმჯობესება.შეხვედრა გერმანიის საერთაშორისო თანამშრომლობის საზოგადოება (GIZ) მხარდაჭერით გაიმართა, რომელსაც გარემოსდაცვითი არასამთავრობო სექტორი, საერთაშორისო  ორგანიზაციები და სფეროს ექსპერტები ესწრებოდნენ.