#

საქართველო მეათედ "დედამიწის საათს" აღნიშნავს

 „დაუკავშირდი დედამიწას“ - „დედამიწის საათის“ მეთერთმეტე რაუნდი მსოფლიოში 2018 წლის 24 მარტს აღინიშნა. ადგილობრივი დროით, საღამოს 20:30 საათიდან, კამპანია მთელ დედამიწას მოიცავს. ეს მსოფლიოში უდიდესი გარემოსდაცვითი აქციაა, რომლის დროსაც მილიონობით ადამიანი ერთი საათით ელექტროენერგიის გამოყენებაზე უარს აცხადებს და ამით პლანეტის მწვანე და უსაფრთხო მომავლის მხარდაჭერას გამოხატავს. გარემოს დაცვისა და სოფლის მეურნეობის სამინისტროს ინიციატივით, ლისის ტბის მიმდებარე ტერიტორიაზე, საქართველოს კორპორატიული სპორტის ფედერაციის მხარდაჭერით, ველოტური და გარბენი გაიმართა, რომელშიც მონაწილეობა პროფესიონალმა და მოყვარულმა ველომრბოლელებმა მიიღეს. გარბენში გამოვლენილ 6 გამარჯვებულს (3 ქალი, 3 მამაკაცი) სამინისტროსა და აქციის ორგანიზატორებისგან სპეციალური პრიზები გადაეცათ ხოლო, პირველ ადგილზე გასულებს თინათინ პაპუაშვილსა და გიორგი შეკრელიძეს გარემოს დაცვისა და სოფლის მეურნეობის მინისტრის მოადგილემ ნინო თანდილაშვილმა „რონიუს პუნქტუას“ მაჯის საათები და წითელი ნუსხით დაცული სახეობების ნერგები გადასცა. ღონისძიება ქალაქ თბილისის მერიის, კავკასიის გარემოსდაცვითი არასამთავრობო ორგანიზაციების ქსელის (CENN), ბუნების დაცვის მსოფლიო ფონდის (WWF) და ავსტრიის თანამშრომლობა განვითარებისთვის (ADC) და კომპანია „ვისოლის“ მხარდაჭერით გაიმართა. ღონისძიების მთავარი მიზანია კლიმატის ცვლილების შესახებ ინფორმაციის მიწოდება, საზოგადოების გარემოსდაცვითი ცნობიერების ამაღლება, პასუხისმგებლობის გაზრდა, საკუთარი ქცევის შეფასება და შეცვლა გარემოს სასარგებლოდ. ამ დღეს მსოფლიოს ყველაზე ცნობილი ღირსშესანიშნაობები "დედამიწის საათის" დადგომისას კიდევ ერთხელ ჩაბნელდებიან და მისი მხარდამჭერები მთელი მსოფლიოს მასშტაბით კლიმატის ცვლილების შესაცვლელ მხარდამჭერ აქციას შეუერთდებიან. 20:30 საათიდან, ერთი საათის განმავლობაში შუქები ჩაქვრება - საქართველოს მთავრობის კანცელარიის შენობაში, პრეზიდენტის რეზიდენციაში, გარემოს დაცვისა და სოფლის მეურნეობის სამინისტროსა და სხვა სამინისტროების შენობებში; გაეროს სახლში, საქართველოს პარლამენტის შენობაში, შოთა რუსთაველის სახელობის აკადემიურ თეატრში, მოსწავლე-ახალგაზრდობის სასახლეში, მშვიდობის ხიდზე, აღმაშენებლის გამზირზე - თამარ მეფის გამზირიდან პასტერის ქუჩამდე, კარგარეთელისა და ბაქოს ქუჩებს შორის, მარჯანიშვილის მოედნიდან ზაარ ბრიუკენის მოედნამდე. მარჯანიშვილის მოედანზე, მეტრო მარჯანიშვილის მიმდებარე ტერიტორიაზე, ვარდების ბაღში, ახალ აღმაშენებელზე. ასევე გამოირთვება საჯარო რეესტრის შენობის, მეჩეთის, ნარიყალას, საპატრიარქოს შენობის, მეტეხის ხიდის, ზემო და ქვემო ბეთლემის, ფერიცვალების ეკლესიის, ტელეანძის, ქართლის დედის და თავისუფლების მოედანზე მდებარე წმინდა გიორგის მონუმენტის მინათება. შუქები ჩაქვრება ბალნეოლოგიური კურორტის, წითელი ჯვრის შენობაში, დედაენის ბაღში და სხვა კერძო ორგანიზაციებში. აქციის ფარგლებში, თბილისის სატელევიზიო ანძა მთელი ღამის განმავლობაში მწვანედ განათდება. კამპანია "ერთი საათის ფარგლებს" უკვე გასცდა და მიზნად ცხოვრების წესად დამკვიდრებას ისახავს. 
#

„რადიოაქტიური ნარჩენების მართვა საქართველოში“ - ახალი პროექტი

გარემოს დაცვისა და სოფლის მეურნეობის მინისტრი ლევან დავითაშვილი საქართველოს პარლამენტის ეროვნულ ბიბლიოთეკაში პროექტის „რადიოაქტიური ნარჩენების მართვა საქართველოში“ პრეზენტაციას დაესწრო.ევროკავშირისა და შვედეთის რადიაციული უსაფრთხოების ცენტრის ფინანსური მხარდაჭერით დაწყებული პროექტი მიზნად ისახავს რადიოაქტიური ნარჩენების მართვის სისტემის გაუმჯობესებას, რომლის ფარგლებშიც, საქართველოში რადიოაქტიური ნარჩენების მართვის თანამედროვე ინფრასტრუქტურა უნდა შეიქმნას.„რადიოაქტიური ნარჩენების მართვა ჩვენი ქვეყნისთვის მნიშვნელოვანი გამოწვევაა. აღნიშნული პროექტის ფარგლებში შევძლებთ რადიოაქტიური ნარჩენების სწორ და მდგრად მართვას. მოგეხსენებათ, მთავრობამ 2017 წელს დაამტკიცა რადიოაქტიური ნარჩენების მართვის სტრატეგია, რაც აღნიშნული თემის მიმართ სახელმწიფო პოლიტიკის განმსაზღვრელ დოკუმენტს წარმოადგენს. ჩვენ ვაცნობიერებთ საკითხის კომპლექსურობას, არსებულ გამოწვევებს და ვფიქრობთ, რომ სახელმწიფოს ჩართულობით და დონორების მხარდაჭერით რადიოაქტიური ნარჩენების მართვის საკითხში მნიშვნელოვან პროგრესს მივაღწევთ“, - განაცხადა ლევან დავითაშვილმა.„რადიოაქტიური ნარჩენების მართვა საქართველოსთვის ძალიან დროული პროექტია. ჩვენ მჭიდრო თანამშრომლობა გვაქვს გარემოს დაცვისა და სოფლის მეურნეობის სამინისტროსთან და მოხარული ვარ, რომ აღნიშნული მიმართულებითაც გვიწევს თანამშრომლობა“, - განაცხადა ევროკავშირის ელჩმა საქართველოში, იანოშ ჰერმანმა.შვედეთის რადიაციული უსაფრთხოების ცენტრის წარმომადგენლის, ლარს ვან დასენის განცხადებით, აღნიშნული პროექტის მიზანია საქართველოში არსებული რადიოაქტიური ნარჩენების ერთად თავმოყრა და მათი უსაფრთხოების კონტროლი. „ვფიქრობ, რომ საქართველო რადიოაქტიური ნარჩენების მართვის კუთხით გამორჩეულად აქტიურია და მნიშვნელოვან ნაბიჯებს დგამს“, - აღნიშნა ლარს ვან დასენმა.პროექტის ფარგლებში, რომლის ბიუჯეტსაც 1 200 000 ევრო შედგენს დაგეგმილია სიტუაციური ანალიზი, რადიაციული ნარჩენების საცავის მშენებლობის პროექტირება და მშენებლობა, რაც მნიშვნელოვნად გააუმჯობესებს საქართველოში რადიოაქტიური ნარჩენების მდგრად მართვას.შეხვედრაზე ბირთვული და რადიაციული უსაფრთხოების სააგენტოს უფროსმა, ვასილ გედევანიშვილმა სააგენტოს საქმიანობის და პროექტის შინაარსის შესახებ ვრცლად ისაუბრა. შეხვედრას ევროკომისიის, საქართველოში შვედეთის საელჩოს, შვედეთის საერთაშორისო განვითარების თანამშრომლობის სააგენტო (SIDA) და ბირთვული და რადიაციული უსაფრთხოების სააგენტოს წარმომადგენლები ესწრებოდნენ.
#

სოფლის მეურნეობის დარგში არსებული გამოწვევები და გადაჭრის გზები განიხილეს

გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი სამცხე-ჯავახეთის რეგიონში იმყოფებოდა, სადაც მხარის გუბერნატორთან აკაკი მაჭუტაძესთან ერთად, ადგილობრივი თვითმმართველობის წარმომადგენლებს და საინფორმაციო-საკონსულტაციო სამსახურის თანამშრომლებს შეხვდა. შეხვედრაზე სოფლის მეურნეობის დარგში არსებული გამოწვევები და გადაჭრის გზები განიხილეს. ყურადღება გამახვილდა აზიური ფაროსანას წინააღმდეგ ბრძოლის 2018 წელს დაგეგმილ ღონისძიებებზე, აღინიშნა, რომ პროცესში სამინისტროს ყველა უწყება თვითმმართველობებთან და სამხარეო ადმინისტრაციასთან ერთად კოორდინირებულად იქნება ჩართული. დამონტაჟდება მონიტორინგის სისტემები და შედეგების მიხედვით დაიგეგმება ღონისძიებები.
#

23 მარტი მსოფლიო მეტეოროლოგიის დღეა

გარემოს დაცვისა და სოფლის მეურნეობის მინისტრმა, ლევან დავითაშვილმა, მინისტრის მოადგილე ნინო თანდილაშვილთან ერთად, გარემოს ეროვნული სააგენტოს ჰიდრომეტეოროლოგებს პროფესიული დღე მიულოცა და ღვაწლმოსილი თანამშრომლებს მადლობის სიგელები გადასცა.  საქართველოში მეტეოროლოგიის დღე 1992 წლიდან აღინიშნება, მას შემდეგ რაც ქვეყანა მსოფლიო მეტეოროლოგიური ორგანიზაციაში გაწევრიანდა. გარემოს ეროვნულ სააგენტოში გამართულ შეხვედრაზე, ჰიდრომეტეოროლოგიის დეპარტამენტის უფროსმა მნიშვნელოვანი პროექტების შესახებ პრეზენტაცია წარმოადგინა და სამომავლო გეგმებზე ისაუბრა. ლევან დავითაშვილმა მადლობა გადაუხადა დარგის სპეციალისტებს, სიგელები გადასცა და უსურვა,რომ დიდხანს იყვნენ ქვეყნის სამსახურში. აღსანიშნავია, რომ საქართველოს მასშტაბით, მეტეოროლოგიური სადამკვირვებლო ქსელის გაფართოების მიზნით მთელი რიგი სამუშაოები განხორციელდა. დამონტაჟდა 50-ზე მეტი ერთეული ჰიდრომეტეოროლოგიური პარამეტრების ავტომატურად გამზომი სტაციონალური ხელსაწყო-დანადგარი, რაც მეტეოროლოგიური პროგნოზის გაუმჯობესებას შეუწყობს ხელს. მონიტორინგი ამჟამად 86 მეტეოროლოგიური და 52 ჰიდროლოგიური დაკვირვების პუნქტზე მიმდინარეობს. მსოფლიო მეტეოროლოგიის დღის დაარსება 1950 წლის 23 მარტს მსოფლიო მეტეოროლოგიური ორგანიზაციის კონვენციის ძალაში შესვლას უკავშირდება, რის საფუძველზეც გაეროს მსოფლიო მეტეოროლოგიური ორგანიზაცია (WMO) შეიქმნა.
#

22 მარტი მსოფლიო წყლის რესურსების დაცვის საერთაშორისო დღეა

საქართველო წლის რესურსით მდიდარი ქვეყანაა, რაც იმას ნიშნავს, რომ თითოეულ მოქალაქეს კიდევ უფრო კარგად უნდა ჰქონდეს გაცნობიერებული ამ რესურსის სწორად გამოყენების და მისი დაცვის მნიშვნელობა. 22 მარტს წყლის რესურსების დაცვის საერთაშორისო დღე გაერთიანებული ერების ორგანიზაციის გენერალური ასამბლეის გადაწყვეტილებით აღინიშნება. ამ დღის დაწესებისა და აღნიშვნის მიზანია, მსოფლიო საზოგადოებას კიდევ ერთხელ შეახსენოს, როგორი მნიშვნელობა აქვს წყლის რესურსების მოფრთხილებას და მის დაცვას. მსოფლიო წყლის რესურსების დაცვის საერთაშორისო დღის აღსანიშნავად, გარემოს დაცვისა და სოფლის მეურნეობის მინისტრის მოადგილემ, ნინო თანდილაშვილმა, გარემოს ეროვნული სააგენტოს სპეციალისტებთან ერთად, თბილისის ზღვაზე წყლის სინჯების აღების პროცესში მიიღო მონაწილეობა. სპეციალისტებმა აღებულ სინჯებში წყლის ფიზიკურ-ქიმიური პარამეტრები ადგილზე განსაზღვრეს, ქიმიური და მიკრობიოლოგიური კვლევები გარემოს ეროვნული სააგენტოს ლაბორატორიაში ჩატარდება. მიღებული შედეგები ათ დღეში გახდება ცნობილი. გარემოს ეროვნული სააგენტო საქართველოს მასშტაბით ზედაპირული წყლების მუდმივ მონიტორინგს ახორციელებს და წყლის ხარისხს მდინარეების და ტბების 150-მდე წერტილში იკვლევს. აღსანიშნავია, რომ ამ ეტაპზე საქართველოში აქტიურად მიმდინარეობს წყლის რესურსების მართვის შესახებ ახალ კანონპროექტზე მუშაობა, რაც ევროკავშირის წყლის კანონმდებლობასთან ჰარმონიზებას ითვალისწინებს. ასევე, მნიშვნელოვანი სამუშაოები ხორციელდება საქართველოში წყლის რესურსების სააუზო მართვის დანერგვის მიზნით
#

სოლომონ პავლიაშვილი UNDP და BIOFIN წარმომადგენლებს შეხვდა

საქართველოს გარემოს დაცვისა და სოფლის მეურნეობის მინისტრის მოადგილე, სოლომონ პავლიაშვილი გაეროს განვითარების პროგრამის (UNDP) ბიომრავალფეროვნების ფინანსური ინიციატივის (BIOFIN) ფარგლებში ფინანსურ ექსპერტს გარემოს დარგში, მარკო არლოს და უფროს მრჩეველს ტექნიკურ საკითხებში, დევიდ მეიერს შეხვდა. შეხვედრაზე მხარეებმა საქართველოში ბიომრავალფეროვნების ფინანსური ინიციატივის განხორციელების შესახებ იმსჯელეს და ბიომრავალფეროვნებისათვის საჭირო ფინანსური რესურსების მოძიებასთან დაკავშირებით დონორების მხარდაჭერაზე გაამახვილეს ყურადღება.მინისტრის მოადგილემ საქართველოში ბიომრავალფეროვნების დაცვის, განვითარებისა და კონსერვაციის შესახებ ისაუბრა და საქართველოს კანონმდებლობის ევროკავშირის კანონმდებლობასთან ჰარმონიზაციის პროცესში საქართველოს მიერ ნაკისრი ვალდებულებების შესრულებაზე გაამახვილა ყურადღება. შეხვედრაზე სოლომონ პავლიაშვილმა დაცული ტერიტორიები ბიომრავალფეროვნებისა და ეკოსისტემების დაცვა-შენარჩუნების კუთხით ერთერთ პრიორიტეტულ მიმართულებად დაასახელა. მინისტრის მოადგილემ ვრცლად ისაუბრა გარემოს დაცვის სფეროში სახელმწიფო პოლიტიკის განხორციელების მნიშვნელობაზე. მხარეებმა საერთაშორისო ორგანიზაციების ფინანსური მხარდაჭერისა და გამოცდილების გაზიარების მნიშვნელობას გაუსვეს ხაზი და სამომავლო თანამშრომლობის სურვილი გამოთქვეს.შეხვედრის ფარგლებში, ხაზი გაესვა საქართველოს მიერ პროექტის ფარგლებში მიღწეული შედეგების მნიშვნელობას როგორც ადგილობრივ, ასევე რეგიონულ კონტექსტში. აღინიშნა, რომ ამ ეტაპზე ბიომრავალფეროვნების ფინანსური ინიციატივის ფარგლებში მიმდინარეობს ბიომრავალფეროვნებასთან დაკავშირებული ფინანსური გეგმის მომზადება, სადაც მოხდება ბიომრავალფეროვნების დაფინანსების გაუმჯობესების კონკრეტული გზების დასახვა.სტუმრების მიერ ასევე აღინიშნა საქართველოს აქტიური მონაწილეობა ბიომრავალფეროვნების ფინანსური ინიციატივის მესამე გლობალურ კონფერენციაში. სადაც 35 ქვეყნის მაღალი დონის წარმომადგენლებს წარედგინათ ინფორმაცია საქართველოში ბიომრავალფეროვნების დაცვის მიმართულებით არსებულ გამოწვევებთან დაკავშირებით, ხაზი გაესვა ბიომრავალფეროვნების გლობალური კონვენციით აღებული ვალდებულებების შესრულების მნიშვნელობას და ბიოფინის როლს აღნიშნული ვალდებულებების განხორციელებისა და დასახული მიზნების მიღწევის პროცესში.ინფორმაციისათვის, BIOFIN პროექტის განხორციელება საქართველოში პროექტის განხორციელება დაიწყო 2016 წელს და მისი მიზანია სპეციალურად შემუშავებული მეთოდოლოგიის გამოყენებით, ბიომრავალფეროვნებისათვის გაწეული დანახარჯების შეფასება, ბიომრავალფეროვნების საჭიროებების შეფასება და ამ საჭიროებებზე მორგებული ფინანსური გადაწყვეტების შემუშავება.
#

ლევან დავითაშვილი „საქართველოს ბიზნესასოციაციის“ წევრებს შეხვდა

გარემოს დაცვისა და სოფლის მეურნეობის მინისტრი ლევან დავითაშვილი „საქართველოს ბიზნესასოციაციის“ წევრი ორგანიზაციების წარმომადგენლებს შეხვდა. ლევან დავითაშვილმა შეხვედრის მონაწილეებს აგრარულ დარგში სახელმწიფო პოლიტიკის ძირითადი მიმართულებები გააცნო და დეტალურად ისაუბრა იმ მიღწევებსა და გამოწვევებზე, რომელიც დღეისათვის არსებობს. მინისტრმა ხაზგასმით აღნიშნა, რომ სახელმწიფოსა და კერძო სექტორს შორის კომუნიკაცია უმნიშვნელოვანესია განვითარების ეფექტიანი პოლიტიკის შემუშავების პროცესში და რომ მიღებული გადაწყვეტილებები მისაღები და გაზიარებული უნდა იყოს ბიზნესწრეების მიერ. „ბიზნესსექტორის წარმომადგენლებთან მთავრობა შეხვედრებს სისტემატურად მართავს. ბიზნესთან კომუნიკაცია უმნიშვნელოვანესი საკითხია, რომელიც სწორი სახელმწიფო პოლიტიკის შემუშავებაში ერთ-ერთ გადამწყვეტ როლს ასრულებს,“ - განაცხადა ლევან დავითაშვილმა.შეხვედრას 20-მდე კომპანიის წარმომადგენელი ესწრებოდა, რომლებმაც მათთვის საინტერესო კონკრეტული მიმართულებებით არსებული ვითარებისა და გეგმების შესახებ დასმულ კითხვებზე პასუხები მინისტრისგან მიიღეს