#

მინისტრი ევროპის მერძევეთა ასოციაციის წარმომადგენლებს შეხვდა

მინისტრმა ვრცლად ისაუბრა საქართველოში მერძევეობის მიმართულების განვითარების მნიშვნელობასა და პოტენციალზე.„სოფლის მეურნეობის პოლიტიკა ფერმერული მეურნეობების განვითარებასა და წახალისებას გულისხმობს. გამოწვევების მიუხედავად, სექტორის განვითარება შთამბეჭდავია. დარგის პრიორიტეტულობიდან გამომდინარე, შევიმუშავეთ კანონი სასოფლო-სამეურნეო კოოპერატივების შესახებ, რადგან ვთვლით, რომ საქართველოში აგრარული დარგის განვითარებისთვის ძალების გაერთიანება უმნიშვნელოვანესი ფაქტორია. მნიშვნელოვანია ფერმერული მეურნეობების გაძლიერება და კონკურენტუნარიანობის ამაღლება, რაც სამინისტროს მუშაობის დღის წესრიგს წარმოადგენს. მერძევეობის სექტორის განვითარების კუთხით, სახელმწიფო აქტიურად მუშაობს რიგი პროექტების შემუშავებაზე“, - განაცხადა ლევან დავითაშვილმა.მინისტრმა მადლობა გადაუხადა დონორი ორგანიზაციების წარმომადგენლებს დარგის განვითარებაში შეტანილი წვლილისთვის და განსაკუთრებული ყურადღება შვეიცარიისგანვითარებისადა თანამშრომლობისსააგენტოს (SDC) მხარდაჭერის მნიშვნელობაზე გაამახვილა.„საქართველოში მერძევეობის სექტორის განვითარება თვალშისაცემია, რაც მნიშვნელოვანია ქვეყნისეკონომიკური განვითარებისთვის. ჩვენ მხარს ვუჭერთ ქვეყანაში სექტორის განვითარებას და მზად ვარ თანამშრომლობისთვის“, - განაცხადა ევროპის მერძევეთა ასოციაციის (EDA) გენერალურმა მდივანმა ალექსანდერ ანტონმა.ღონისძიება რძის პროდუქტების მწარმოებელთა ასოციაციის „საქრძე“ ორგანიზებით გაიმართა. ღონისძიების ფარგლებში, ასოციაციამ „საქრძე“ და EDA-მ ხელი მოაწერეს დოკუმენტს, რომლის საფუძველზეც „საქრძე“ ევროკავშირის მერძევეთა ასოციაციის წვერი გახდა.
#

საქართველოში ნარინჯისფერი რთველი აქტიურ ფაზაში შედის

21 ნოემბრის მონაცემებით, მანდარინის ექსპორტმა 3,069 ტონა შეადგინა. გასულ წელს, ამავე პერიოდში ექსპორტირებული იყო 911 ტონა. წლევანდელი მოსავალი ერთ-ერთი საუკეთესოა, რაც ექსპორტის მეტ შესაძლებლობას იძლევა. ძირითად საექსპორტო ქვეყნებად კვლავ რჩება რუსეთი (1,645.5 ტ) და უკრაინა (1,137.2 ტ), ასევე ლატვია (39.9 ტ), სომხეთი (210.3 ტ), ყირგიზეთი (20.9 ტ), ყაზახეთი (15.0 ტ).მანდარინზე საბითუმო ფასი 0.50-დან 0.80 ლარამდეა.აჭარის მთავრობის ხელშეწყობით, აჭარის სოფლის მეურნეობის სამინისტრომ ციტრუსის რეალიზაციის საკოორდინაციო შტაბი გაიხსნა. შტაბის ფუნქციონირების ძირითადი მიზანი მანდარინის ჩაბარების პროცესის შეუფერხებელი მიმდინარეობის უზრუნველყოფაა. საჭირო ინფორმაციის ოპერატიულად მისაღებად, ფუნქციონირებს საქართველოს გარემოს დაცვისა და სოფლის მეურნეობის სამინსიტროს ცხელი ხაზიც (1501).  25 ნოემბრიდან დაიწყება არასტანდარტული მანდარინის სუბსიდირების პროგრამა. აჭარის მთავრობის გადაწყვეტილებით, სამრეწველო გადამუშავების (არასტანდარტულ) 1 კგ სამრეწველო მანდარინზე 10 თეთრიანი თანადაფინანსება იქნება.  
#

„ტყის მდგრადი მართვის გაძლიერება საქართველოში“ კონფერენცია

 საჯარო სამსახურების დაძმობილების პროექტის „ტყის მდგრადი მართვის გაძლიერება საქართველოში“ დასკვნითი კონფერენცია მისასალმებელი სიტყვით გარემოს დაცვისა და სოფლის მეურნეობის მინისტრმა, ლევან დავითაშვილმა და ლიეტუვას რესპუბლიკის გარემოს დაცვის მინისტრმა, კესტუტის ნავიცკასმა გახსნეს.ლევან დავითაშვილმა საქართველოს სატყეო სექტორის ევროკავშირის რეგულაციებთან დაახლოებასა და ევროპული სტანდარტების დანერგვის მნიშვნელობაზე ისაუბრა.კონფერენციის მონაწილეებმა ლიეტუვას, უნგრეთისა და სლოვაკეთის გარემოს დაცვის სამინისტროს წარმომადგენლების მიერ 18 თვის განმავლობაში მომზადებული რეკომენდაციები და განხორციელებული აქტივობები შეაჯამეს. საქართველო-ევროკავშირის ასოცირების ხელშეკრულების გარემოსდაცვითი ნაწილი ითვალისწინებს ეროვნული სატყეო კანონმდებლობის ევროკავშირის შესაბამის კანონმდებლობასთან ჰარმონიზაციას და სატყეო სექტორში მდგრადი მართვის პრინციპების დანერგვას; აგრეთვე, მერქნული რესურსებით უკანონო სარგებლობისა და ვაჭრობის აღმოფხვრას. ჩამოთვლილი ვალდებულებების უკეთ შესასრულებლად, 18 თვის განმავლობაში, მიმდინარეობდა ევროკავშირის მიერ დაფინანსებული საჯარო სამსახურების დაძმობილების პროექტი „ტყის მდგრადი მართვის გაძლიერება საქართველოში“. შეხვედრას სატყეო სექტორის წარმომადგენლებთან ერთად, ლიეტუვას რესპუბლიკის საგანგებო და სრულუფლებიანი ელჩი საქართველოში გიედრიუს პოდჟუნასი, საგანგებო ელჩი, აღმოსავლეთ პარტნიორობის კოორდინატორი სიმონას შატუნასი, უნგრეთის საგანგებო და სრულუფლებიანი ელჩი საქართველოში ვიქტორია ჰორვატი, და ევროკავშირის წარმომადგენლები ესწრებოდნენ. ღონისძიების ფარგლებში, სოფელ ფრეზეთში „მზის პანელების“ პრეზენტაცია გაიმართა, რომელსაც გარემოს დაცვისა და სოფლის მეურნეობის მინისტრის მოადგილე იური ნოზაძე და ნინო თანდილაშვილი, ეკონომიკისა და მდგრადი განვითარების მინისტრის მოადგილე, ნათია თურნავა და ლიეტუვას რესპუბლიკის დელეგაციის წევრები დაესწრნენ.   
#

შიდა ქართლში ხილის გადამმუშავებელი ახალი საწარმო ამოქმედდა

ქარელის მუნიციპალიტეტის სოფელ საღოლაშენში ხილის გადამმუშავებელი ახალი, თანამედროვე სტანდარტებით აღჭურვილი საწარმო, შპს „ხილის ქაღალდის კომპანია“ სახელმწიფოს ფინანსური მხარდაჭერით შეიქმნა. საწარმოში, ჯამურად, 1,013,000 ლარამდე ინვესტიცია განხორციელდა, აქედან, 405,000 ლარი გრანტია, ხოლო 507,000 ლარი - შეღავათიანი აგროკრედიტი. გარემოს დაცვისა და სოფლის მეურნეობის მინისტრის მოადგილემ, გიორგი ხანიშვილმა ახალი საწარმო შიდა ქართლის გუბერნატორთან, გიორგი ხოჯევანიშვილთან და სოფლის მეურნეობის პროექტების მართვის სააგენტოს დირექტორის მოადგილესთან, გიორგი ჯიბლაძესთან ერთად გახსნა. საწარმოს დღიურად შეუძლია 10 ტონა ნედლეულის გადამუშავება, რომლისგანაც მზადდება ისეთი პროდუქტები როგორიცაა: ტყლაპი, ჯანჯუხა და სხვადასხვა სახის ხილფაფა და მურაბა. პროდუქციის რეალიზაცია, ამ ეტაპზე, ადგილობრივ ბაზარზე მოხდება; სამომავლოდ, დაგეგმილია ექსპორტზე გატანაც. გადამმუშავებელ საწარმოში 29 ადამიანია დასაქმებული. სოფლის მეურნეობის პროექტების მართვის სააგენტოს მხარდაჭერით 2019 წელს, საწარმოში დაგეგმილია სურსათის უვნებლობის საერთაშორისო სტანდარტის - ISO 22:000 დანერგვა. აღსანიშნავია, რომ 2013 წლიდან დღემდე, სახელმწიფოს დახმარებით, „ერთიანი აგროპროექტის“ ფარგლებში, 180 ახალი საწარმოს შექმნა დაფინანსდა. სახელმწიფოს ფინანსურმა მხარდაჭერამ მეწარმეებს დამატებითი ბიძგი მისცა, წარმოების განვითარება-გაფართოებისთვის. სოფლის მეურნეობის პროექტების მართვის სააგენტო ახორციელებს „ერთიან აგროპროექტს“, რომელიც გათვლილია გრძელვადიან განვითარებაზე და მისი მიზანია ისეთი გარემოს შექმნა, რომელიც ხელს შეუწყობს სოფლის მეურნეობაში კონკურენტუნარიანობის ამაღლებას, მაღალხარისხიანი პროდუქციის წარმოების სტაბილურ ზრდას, სურსათის უვნებლობის საერთაშორისო სტანდარტების დანერგვას.   
#

გიორგი ხანიშვილი გურიაში ფერმერებს შეხვდა

 გარემოს დაცვისა და სოფლის მეურნეობის მინისტრის მოადგილე გიორგი ხანიშვილი გურიის რეგიონში იმყოფებოდა. მინისტრის მოადგილე გურიის გუბერნატორთან, ზურაბ ნასარაიასთან და ლანჩხუთი-ჩოხატაურის მაჟორიტარ დეპუტატთან, ნინო წილოსანთან ერთად, ფერმერებს შეხვდა და რეგიონში 2012 წლიდან დღემდე განხორციელებული პროექტების შედეგები გააცნო.გიორგი ხანიშვილმა ხაზგასმით აღნიშნა, რომ სახელმწიფოს მიერ ყველა მხარდამჭერი ღონისძიება გათვლილია დარგის განვითარების ხელშეწყობაზე, რაც ფერმერებსა და მეწარმეებს საშუალებას აძლევს, კონკურენტუნარიანი პროდუქცია აწარმოონ და ეკონომიკური მდგომარეობა გაიუმჯობესონ. მინისტრის მოადგილის განცხადებით, სახელმწიფოს მხარდაჭერით, ფერმერებისა და მეწარმეებისთვის ხელმისაწვდომი გახდა შეღავათიანი ფინანსური რესურსი, რომლის ფარგლებშიც 15 ათასზე მეტმა პირმა ისარგებლა შეღავათიანი აგროკრედიტი. რის შედეგადაც, ამოქმედდა 180 ახალი და გადაიარაღდა 880 საწარმო. კერძოდ გურიის რეგიონში, დღეის მდგომარეობით, გაცემულია 200-ზე მეტი სესხი, რომელიც მესაქონლეობის, მებაღეობის, მეთევზეობის და მეფუტკრეობის განვითარებას ხმარდება. სახელმწიფოს მხარდაჭერით გახსნილია 7 ახალი და გაფართოებულია 7 საწარმო. შექმნილია ჩაის, ხილის და თხილის გადამმუშავებელი საწარმოები. მნიშვნელოვანია აღინიშნოს, რომ ბოლო ორი წლის განმავლობაში, რეგიონში ერთ-ერთი მთავარი გამოწვევა, აზიური ფაროსანას წინააღმდეგ ბრძოლაა. სახელმწიფოს მიერ ფერმერების აქტიური ჩართულობით დაგეგმილი ღონისძიებების მთავარი მიზანი სასოფლო-სამეურნეო კულტურების დაზიანებისა და მიყენებული ზარალის მინიმუმამდე დაყვანაა. აღნიშნულის გათვალისწინებით, გურიის რეგიონში თერმული ნისლით დამუშავდა 139 350 ჰა ფართობი, ცივი შესხურებით - 17 629 ჰა, 7030,7 ჰა -სატრაქტორე და 600 ჰა სამანქანე აგრეგატით. გურიის გუბერნატორის ზურაბ ნასარაიას განცხადებით, ფაროსანასთან ბრძოლა მომავალ წელსაც აქტიურად გაგრძელდება.„ფერმერებს გავაცანით ის ღონისძიებები რაც იგეგმება, ფაროსანას წინააღმდეგ ბრძოლის მიმართულებით. ვესაუბრეთ იმ დეტალებზე, თუ რა პერიოდულობით უნდა მოხდეს კონკრეტული კულტურების, ჯიშების მოვლა-პატრონობა, რათა მოსავალი გვქონდეს კარგი“, - განაცხადა ზურაბ ნასარაიამ.ლანჩხუთისა და ჩოხატაურის მაჟორიტარმა დეპუტატმა, ნინო წილოსანმა ყურადღება რეგიონის ეკონომიკური განვითარების კუთხით სოფლის მეურნეობის პროექტებში ადგილობრივების აქტიურ ჩართულობაზე გაამახვილა.  
#

ნოდარ კერესელიძემ Agro/Food/Drink/Tech გამოფენა გახსნა

გარემოს დაცვისა და სოფლის მეურნეობის მინისტრის პირველმა მოადგილემ, ნოდარ კერესელიძემ სოფლის მეურნეობის, კვების მრეწველობის, გადამმუშავებელი და შემფუთველი ტექნოლოგიების (Agro/Food/Drink/Tech) მე-18 საერთაშორისო გამოფენა მისასალმებელი სიტყვით გახსნა. როგორც მინისტრის პირველმა მოადგილემ აღნიშნა, სოფლის მეურნეობის, კვების მრეწველობის, გადამმუშავებელი და შემფუთველი ტექნოლოგიების საერთაშორისო გამოფენის მიზანია საქართველოსა და კავკასიის რეგიონში ინდუსტრიის განვითარებას და ქვეყნის ეკონომიკურ წინსვლას შეუწყოს ხელი უცხოური კომპანიების ბაზარზე შემოყვანით და ადგილობრივ კომპანიებთან დაკავშირებით. გამოფენის მონაწილეებს სიტყვით ასევე მიმართეს იტალიის და პოლონეთის საგანგებო და სრულუფლებიანმა ელჩებმა საქართველოში.გამოფენაზე წარმოდგენილია სასოფლო-სამეურნეო ტექნიკა, მანქანა-დანადგარები, ტარა და შესაფუთი მასალები, სასათბურე მეურნეობის ტექნოლოგიები და აღჭურვილობა, სარწყავი სისტემები, ლაბორატორიული აღჭურვილობა, სარგავი და სათესლე მასალები, სასუქი და პესტიციდები, საკონსულტაციო მომსახურება და თანამედროვე ტექნოლოგიები.აღსანიშნავია, რომ საერთაშორისო გამოფენაში მონაწილეობას 14 ქვეყნის 120- ზე მეტი კომპანია იღებს. მათ შორის, ბელარუსი მწარმოებლები. გამოფენის ფარგლებში, ნოდარ კერესელიძემ ბელარუსის ნაციონალური პავილიონი საზეიმოდ გახსნა და დაათვალიერა. ნაციონალურ პავილიონში წარმოდგენილია უმსხვილესი ეროვნული საკონდიტრო საწარმოები, ძეხვეულის, ბავშვთა კვებისა და სასოფლო-სამეურნეო ტექნიკის მწარმოებელი კომპანიები. გამოფენა გარემოს დაცვისა და სოფლის მეურნეობის სამინისტროს მხარდაჭერით და საგამოფენო ცენტრის „ექსპო ჯორჯია“ ორგანიზებით იმართება. გამოფენა „ექსპო ჯორჯიას“ მე-11 პავილიონში გაიხსნა და 3 დღის განმავლობაში, 10:00-დან 18:00 საათამდე იმუშავებს.  
#

USAID-ის სოფლის მეურნეობის ახალი პროგრამის პრეზენტაცია გაიმართა

ქ. ქუთაისის დემოკრატული ჩართულობის ცენტრში, გარემოს დაცვისა და სოფლის მეურნეობის მინისტრის პირველი მოადგილე, ნოდარ კერესელიძე, ამერიკის შეერთებული შტატების ელჩის მოვალეობის შემსრულებელთან, როს ვილსონთან და USAID-ის მისიის დირექტორთან, პიტერ ვიბლერთან ერთად, USAID-ის სოფლის მეურნეობის ახალი პროგრამის პრეზენტაციას დაესწრო. USAID-ის ახალი პროგრამა მობილიზებას გაუწევს USAID-ის პარტნიორ წამყვან აგრობიზნესებს, რომლებიც საკუთარ გამოცდილებას დამწყებ კომპანიებს გაუზიარებენ. აღნიშნული პარტნიორობის ფარგლებში, დაგეგმილია 3 000 სამუშაო ადგილის შექმნა, აგრობიზნესის გაყიდვების 60 მილიონი დოლარით გაზრდა და 7 მილიონი დოლარის კერძო ინვესტიციების მოზიდვა. შეხვედრაზე ნოდარ კერესელიძემ მადლობა გადაუხადა აშშ-ის ელჩის მოვალეობის შემსრულებელს აგრარული დარგის განვითარების მიმართულებით გაწეული მხარდაჭერისთვის. მინისტრის პირველი მოადგილის განცხადებით, ახალი პროგრამის ეფექტიანად განხორციელებისთვის, მაქსიმალურად იქნება გამოყენებული დაგროვილი გამოცდილება, რათა მომავალშიც არაერთი წარმატებული ბიზნესმოდელი შეიქმნას. ამერიკის შეერთებული შტატების ელჩის მოვალეობის შემსრულებლის, როს ვილსონის განცხადებით, ამერიკის შეერთებული შტატები მხარს უჭერს საქართველოს განვითარებას. სოფლის მეურნეობის ახალი პროგრამის დაწყება საქართველოს მხარდაჭერის კიდევ ერთი დადასტურებაა. ღონისძიების ფარგლებში, გარემოს დაცვისა და სოფლის მეურნეობის მინისტრის პირველმა მოადგილემ, ნოდარ კერესელიძემ, ამერიკის შეერთებული შტატების ელჩის მოვალეობის შემსრულებელთან, როლ ვილსონთან და USAID-ის მისიის დირექტორთან პიტერ ვიბლერთან ერთად, USAID/REAP პროექტის ფარგლებში დაფინანსებული საწარმო „ჰერბია“ დაათვალიერა