#

ევროპული გამოცდილება სატყეო პოლიტიკის განხორციელებისათვის

სასტუმრო „რედისონ ბლუ ივერიაში“ პროექტზე - „ევროპული გამოცდილება გარემოსდაცვითი და სატყეო პოლიტიკის განხორციელებისთვის“ იმსჯელეს. შეხვედრის მონაწილეებს გარემოს დაცვისა და სოფლის მეურნეობის მინისტრმა ლევან დავითაშვილმა და კავკასიის გარემოსდაცვითი არასამთავრობო ორგანიზაციების ქსელის (CENN) დირექტორმა ნანა ჯანაშიამ მიმართეს.შეხვედრა CENN- ის ორგანიზებით გაიმართა და მიზნად ისახავს ტყეების მდგრადი მართვის პოლიტიკური, ინსტიტუციური და ფინანსური ინსტრუმენტების გაცნობას და ერთიანი, დაბალანსებული სახელმწიფო პოლიტიკის განხორციელების შესაძლებლობების განხილვას ქვეყნის სოციალურ–ეკონომიკური და გარემოსდაცვითი პრიორიტეტების გათვალისწინებით.შეხვედრაზე მხარეებმა ტყეების ტურისტულ–რეკრეაციული მართვის სამოქმედო გეგმაზე იმსჯელეს, რომელიც სახელმწიფო პრიორიტეტებთან ტყეების მართვის სისტემის სინქრონიზაციას და ეკონომიკური პოტენციალის გამოყენების ინსტიტუციური და ფინანსურ–ეკონომიკური მექანიზმების შემუშავებას ითვალისწინებს.შეხვედრაზე, ტყეებზე არსებული სოციალური და ენერგეტიკული ზეწოლის შემცირების მიმართულებით მოსახლეობის სათბობი რესურსით უზრუნველყოფის სახელმწიფო პროგრამის დოკუმენტზეც იმსჯელეს. პროექტი - „ტყის მდგრადი მართვა საქართველოში“ - ფარგლებში განხორციელდა, ავსტრიის თანამშრომლობა განვითარებისათვის (ADC) ფინანსური მხარდაჭერით.შეხვედრას ევროკავშირის წარმომადგენლობის გარემოს დაცვის და სოფლის მეურნეობის მიმართულების ხელმძღვანელი ალვარო ორტეგა აპარიციო, ავსტრიის ელჩი საქართველოში არად ბენკო, სხვადასხვა სამინისტროების, გარემოსდაცვითი არასამთავრობო და საერთაშორისო ორგანიზაციების წარმომადგენლები ესწრებოდნენ.
#

12 მილიონი ევროს ღირებულების პროექტი იწყება

გარემოს დაცვისა და სოფლის მეურნეობის მინისტრმა, ლევან დავითაშვილმა და გაეროს სურსათისა და სოფლის მეურნეობის ორგანიზაციის (FAO) წარმომადგენელმა საქართველოში, რაიმუნდ იელემ ევროკავშირის ENPARD-ის III ფაზის ფარგლებში სოფლის მეურნეობის განვითარების ხუთწლიანი პროექტის განხორციელების შეთანხმებას მოაწერეს ხელი. „დღეს ხელი მოვაწერეთ საქართველოში სოფლის მეურნეობის განვითარებისთვის ევროკავშირის მხარდაჭერით 12 მილიონი ევროს ღირებულების პროექტის განხორციელების შეთანხმებას, რომელიც მნიშვნელოვანია ჩვენი ქვეყნის სოფლის მეურნეობის დარგის განვითარებისთვის. ამ პროექტის დიდი ნაწილი, გრანტების სახით, პირდაპირ იქნება მიმართული ჩვენი ფერმერების და მეწარმეობის ხელშესაწყობად. ამავე დროს, გაგრძელდება ის დახმარება, რომელიც სამინისტროს შესაძლებლობების ზრდას უკავშირდება და ENPARD-ის პირველი ფაზის ფარგლებშიც ხორციელდებოდა. ევროკავშირის დახმარებით, საქართველოს სოფლის მეურნეობისა და სოფლის განვითარების კუთხით ძალიან მნიშვნელოვანი ახალი ფაზა იწყება“, - განაცხადა ლევან დავითაშვილმა. სოფლად არსებული შინამეურნეობების, სასოფლო-სამეურნეო კოოპერატივებისა და მცირე და საშუალო საწარმოებისთვის ფინანსებზე ხელმისაწვდომობა, მომსახურებისა და წარმოების გაუმჯობესება, ასევე, გარემოს დაცვისა და სოფლის მეურნეობის სამინისტროს შესაძლებლობების გაზრდა ქვეყნის სასოფლო-სამეურნეო სექტორის კონკურენტუნარიანობას მნიშვნელოვნად აამაღლებს. სწორედ ეს არის ახალი, 12 მილიონი ევროს ღირებულების პროექტის მიზანი, რომელიც, ევროკავშირის (EU) მხარდაჭერით, სოფლისა და სოფლის მეურნეობის განვითარების ევროპის სამეზობლო პროგრამის (ENPARD) III ფაზის ფარგლებში, გაერო-ს სურსათისა და სოფლის მეურნეობის ორგანიზაციის (FAO) მიერ ხორციელდება. პროექტი ითვალისწინებს FAO-ს მიერ გარემოს დაცვისა და სოფლის მეურნეობის სამინისტროს მხარდაჭერას ეფექტიანი პოლიტიკის შემუშავებასა და „სოფლის მეურნეობის განვითარების 2015-2020 წლების სტრატეგიის“ განხორციელებაში. პროექტის ფარგლებში დაგეგმილია სხვადასხვა სახის საპილოტე ღონისძიება - ფერმერების, ფერმერული კოოპერატივების, მეწარმეებისა და მცირე და საშუალო საწარმოებისთვის გათვალისწინებულია საინფორმაციო და საგანმანათლებლო აქტივობები, ასევე, ინდივიდუალური გრანტები, რაც მათ კონკურენტუნარიანობას აამაღლებს. 2013 წელს, ENPARD-ის პირველი ფაზის დაწყებიდან დღემდე, FAO-მ საქართველოში სასოფლო-სამეურნეო განვითარების მხარდასაჭერად რამდენიმე პროექტი განახორციელა. FAO-ENPARD-ის პირველი ორი პროექტი ითვალისწინებდა სოფლის მეურნეობის სამინისტროსთვის ტექნიკური დახმარების გაწევას და სამინისტროს პერსონალის შესაძლებლობების განვითარების ხელშეწყობას. გარდა ამისა, FAO-მ „სოფლის მეურნეობის განვითარების 2015-2020 წლების სტრატეგიის“ ცალკეული კომპონენტების იმპლემენტაციაზე იზრუნა, კერძოდ: სასოფლო-სამეურნეო კოოპერაცია, ექსტენციის სერვისების ხელმისაწვდომობა, სტატისტიკური/ანალიტიკური შესაძლებლობები, ღირებულებათა ჯაჭვის და კლიმატგონივრული სოფლის მეურნეობის განვითარება. ENPARD III-ის ფარგლებში დაწყებული ახალი პროექტი პირველ ორ ეტაპზე FAO- ს მიერ განხორციელებული ღონისძიებების შედეგებს დაეფუძნება. „ENPARD-ის I და II ფაზების ფარგლებში, FAO-მ სოფლის მეურნეობის სამინისტროს შესაძლებლობების გაძლიერებაზე იმუშავა, აღნიშნულ საკითხზე მუშაობა ENPARD III-ის ფარგლებშიც გაგრძელდება. ახალი პროექტით FAO საკუთარ ცოდნასა და გამოცდილებას ქართველ ფერმერებს და მწარმოებლებს უფრო ინტენსიურად გაუზიარებს, რათა მათ ჰქონდეთ უკეთესი წვდომა კარგ სასოფლო-სამეურნეო პრაქტიკებზე, თანამედროვე ცოდნაზე და ტექნოლოგიებზე“, - განაცხადა რაიმუნდ იელემ, FAO-ს წარმომადგენელმა საქართველოში. პროექტის შესახებ შეთანხმების ხელმოწერის ცერემონიალს ევროკავშირის (EU) დელეგაციის ატაშე, პროგრამის მენეჯერი კრისტინა კასელა დაესწრო. მან ხაზგასმით აღნიშნა, რომ ევროკავშირი მზადაა დაეხმაროს საქართველოს სოფლისა და სოფლის მეურნეობის განვითარებასა და მოქალაქეთა ცხოვრების ხარისხის გაუმჯობესებაში. „FAO-სა და სამინისტროს მიერ დღეს ხელმოწერილი შეთანხმება პირველია, რომელიც ENPARD-ის პროგრამის III ფაზის ფარგლებში გაფორმდა. პროგრამის მესამე ეტაპის დაწყება საქართველოს პრემიერ-მინისტრმა და საქართველოში ევროკავშირის ელჩმა ოფიციალურად გასული წლის დეკემბერში გამოაცხადეს. 2013 წელს, ENPARD-ის პროგრამის დაწყებიდან დღემდე, სოფლის მეურნეობისა და სოფლის განვითარებისთვის ევროკავშირი საქართველოს ძლიერ და თანმიმდევრულ მხარდაჭერას უწევს. პროგრამის ფარგლებში შემუშავდა ახალი საწარმოო მოდელები და სტიმული მიეცა სოფლის მეურნეობაში თანამედროვე სერვისების განვითარებას. ჩვენი შეფასებით, ENPARD-ის პროგრამით საქართველოში სოფლად მცხოვრები მოსახლეობის დაახლოებით მესამედმა, ამა თუ იმ ფორმით, ისარგებლა. ახლახანს დაწყებული მესამე ფაზის ფარგლებში, ჩვენ კვლავ ვაგრძელებთ მთავრობის მხარდაჭერას, რათა ხელი შევუწყოთ სოფლის მეურნეობის სექტორის კონკურენტუნარიანობის ამაღლებას", - განაცხადა კრისტინა კასელამ. ევროკავშირი მხარს უჭერს სოფლის მეურნეობისა და სოფლის განვითარებას საქართველოში ENPARD-ის პროგრამის დახმარებით. პროგრამა ხორციელდება 2013 წლიდან და მისი მთლიანი ბიუჯეტი შეადგენს 179.5 მილიონ ევროს. პროგრამის პირველი ფაზის პრიორიტეტი სოფლის მეურნეობის განვითარების ხელშეწყობა იყო, ხოლო მეორე და მესამე ფაზები მიზნად ისახავს სოფლად მცხოვრები ადამიანების ეკონომიკური განვითარების შესაძლებლობების შექმნას არამარტო აღნიშნულ სექტორში. მეტი ინფორმაციისათვის ეწვიეთ ENPARD-ის ვებ-გვერდს:
#

ტბების ეკოსისტემის აღსადგენად დაცვითი ღონისძიებები შემუშავდება

გარემოს დაცვისა და სოფლის მეურნეობის სამინისტრო სამცხე-ჯავახეთში არსებული სამრეწველო ტბების ეკოსისტემის აღსადგენად დაცვითი ღონისძიებების შემუშავებას იწყებს. რეგიონში გარემოს დაცვისა და სოფლის მეურნეობის მინისტრი ლევან დავითაშვილი იმყოფებოდა.სამცხე-ჯავახეთში 7 ტბაა, რომელთაგან 5 (ბუღდაშენი, ტაბაწყური, ხანჩალი, კარწიხი და მადათაფა), დაცულ ტერიტორიებში შედის, 2 ტბა კი, ფარავანი და საღამოს ტბა, რეგულაციების მიღმაა დარჩენილი. სამინისტრო იწყებს არსებული ორი ტბის ეკოსისტემის კვლევას და, მოსახლეობასთან აქტიური კომუნიკაციის ფარგლებში, ისეთი სქემის შემუშავებას, რაც ტბების ეკოსისტემის აღდგენასა და რეგულაციას მოახდენს.გარემოს დაცვისა და სოფლის მეურნეობის მინისტრი სამცხე-ჯავახეთში მეცხოველეობის მიმართულებით შექმნილ ვითარებას და ტრადიციული ყველის წარმოების საკითხებს გაეცნო. ლევან დავითაშვილი დედათა მონასტერში ყველის წარმოებით დაინტერესდა, რომელიც „ფოკის მონასტრის ყველით“ არის ცნობილი და მას დედები უკვე 7 წელია აწარმოებენ. მინისტრმა განსაკუთრებული ყურადღება გეოგრაფიული ადგილწარმოშობის ყველის წარმოების მნიშვნელობაზე გაამახვილა და ჯავახეთის ზეგანზე მაღალი ხარისხის ყველის წარმოების შესაძლებლობებზე ისაუბრა.გარემოს დაცვისა და სოფლის მეურნეობის მინისტრთან ერთად, სამცხე-ჯავახეთში დაცული ტერიტორიების სააგენტოს თავმჯდომარე დავით მარკოზაშვილი და ტურიზმის დეპარტამენტის ხელმძღვანელის მოადგილე მედეა ჯანიაშვილი იმყოფებოდნენ.
#

სატყეო სექტორის რეფორმის დოკუმენტის განხილვა

გარემოს დაცვისა და სოფლის მეურნეობის სამინისტროში, საჯარო სამსახურების დაძმობილების პროექტის „ტყის მდგრადი მართვის გაძლიერება საქართველოში“ ფარგლებში, სატყეოს სექტორის სტრატეგიული დოკუმენტების მომზადებასა და განხორციელებაზე იმსჯელეს. ლიტვის რესპუბლიკის გარემოს დაცვის სამინისტროსა და უნგრეთის სატყეო კვლევების ინსტიტუტის წარმომადგენლებმა ქართულ მხარეს ამ მიმართულებით ევროკავშირის გამოცდილება გაუზიარეს.საქართველოს მთავრობის 2014 წლის 8 მაისის N343 დადგენილებით დამტკიცებული „2014-2020 წწ. საქართველოს ბიომრავალფეროვნების სტრატეგია და მოქმედებათა გეგმა“, რომელიც გაერთიანებული ერების ბიომრავალფეროვნების შესახებ კონვენციის ეროვნულ დონეზე განხორციელების პრინციპული ინსტრუმენტია, ავალდებულებს ქვეყანას სატყეო სექტორის სტრატეგიისა და სამოქმედო გეგმის შემუშავებას. აგრეთვე, მნიშვნელოვანია 2016 წელს ძალაში შესული საქართველოსა და ევროკავშირს შორის ასოცირების შესახებ შეთანხმება, რომლის თანახმადაც საქართველოს ევალება ტყის მდგრადი მართვის სისტემის შექმნა. ეს პროცესი კი მოითხოვს კონკრეტული ქმედებების დროში გაწერასა და ღონისძიებების გატარებას, შედეგების მონიტორინგსა და ანგარიშგებას. სწორედ ამ პროცესის თანმიმდევრულად წარმართვისთვის, გერმანიის საერთაშორისო თანამშრომლობის საზოგადოების დახმარებით (GIZ), მუშავდება სატყეო სექტორის რეფორმის სტრატეგია და სამოქმედო გეგმა. შეხვედრაზე „საქართველოს სატყეო სექტორის რეფორმის სტრატეგიის“ სამუშაო დოკუმენტზეც იმსჯელეს. შეხვედრას, ევროკავშირის, მსოფლიო ბანკის, სამთავრობო და არასამთავრობო ორგანიზაციების წარმომადგენლები ესწრებოდნენ.
#

ინსტიტუციონალური თანამშრომლობის შესახებ მემორანდუმი გაფორმდა

სასტუმრო „რედისონ ბლუ ივერია“-ში ნორვეგიის წყლის რესურსებისა და ენერგეტიკის დირექტორატს (NVE), გარემოს დაცვისა და სოფლის მეურნეობის სამინისტროს, ეკონომიკისა და მდგრადი განვითარების სამინისტროს, გარემოს ეროვნული სააგენტოს, სახელმწიფო ელექტროსისტემის, ტექნიკურ უნივერსიტეტს შორის ინსტიტუციონალური თანამშრომლობის შესახებ მემორანდუმი გაფორმდა.მემორანდუმს გარემოს დაცვისა და სოფლის მეურნეობის მინისტრის მოადგილემ ნინო თანდილაშვილმა, ეკონომიკისა და მდგრადი განვითარების მინისტრის მოადგილემ გიორგი ჩიქოვანმა და გარემოს ეროვნული სააგენტოს უფროსმა თამარ ბაგრატიამ მოაწერეს ხელი.მემორანდუმი, გარემოს ეროვნულ სააგენტოს კლიმატის ცვლილების ზეგავლენის შეფასებას, მდინარეთა ჩამონადენზე და ჰიდროელექტროენერგიის წარმოებას, ჰიდროლოგიური და მეტეოროლოგიური მონაცემების მართვის სისტემების განვითარებასა და წყლის რესურსების მართვის მოდელირების დანერგვას ითვალისწინებს. შეხვედრას ნორვეგიის ელჩი, აშშ-ის საერთაშორისო განვითარების სააგენტოს USAID, გერმანიის განვითარების ბანკის KFW, მსოფლიო ბანკის, Clean Enenrgy, აზიის განვითარების ბანკის ADB, ევროპის საინვესტიციო ბანკის EIB, ევროპის კომისიის წარმომადგენლები ესწრებოდნენ.
#

ბერლინში გამოფენა „მწვანე კვირეული“ მიმდინარეობს

გარემოს დაცვისა და სოფლის მეურნეობის მინისტრის პირველი მოადგილე ნოდარ კერესელიძე ქალაქ ბერლინში, სურსათის, სოფლის მეურნეობისა და მებაღეობის საერთაშორისო გამოფენის „მწვანე კვირეული 2018″ (Gruene Woche 2018) გახსნის ღონისძიებას დაესწრო.ბერლინის საერთაშორისო გამოფენა სოფლის მეურნეობის მიმართულებით მსოფლიოში ერთ-ერთი ყველაზე მასშტაბური და პრესტიჟულია. აღნიშნული გამოფენა უკვე 83 წელია ყოველწლიურად იმართება. წელს, ,,მწვანე კვირეული 2018-ში“ (Gruene Woche 2018) სხვადასხვა ქვეყნის 1600-ზე მეტი კომპანია მონაწილეობს, რომლებიც 100 000-ზე მეტ სხვადასხვა დასახელების სასურსათო პროდუქციას წარუდგენს მომხმარებელს. გამოფენის ვიზიტორთა რაოდენობა ყოველწლიურად 400 000 -ზე მეტს აღწევს. მიმდინარე წელს, გამოფენა ,,მწვანე კვირეულის“ პარტნიორ ქვეყანას, გერმანიასთან ერთად, ბულგარეთი წარმოადგენს.საქართველოს გარემოს დაცვისა და სოფლის მეურნეობის სამინისტროს მხარდაჭერით, აღნიშნულ გამოფენაში ყოველწლიურად იღებენ მონაწილეობას ქართული კომპანიები.წელს, საქართველოს სტენდზე 20-მდე კომპანიის პროდუქცია — ღვინო, ჭაჭა, ლიმონათი, წვენი, ჩაი, თაფლი, ჩურჩხელა, ტყლაპი, ტყემალი, ჯემი, თხილი, მშრალი ხილი, სუნელი და საწებელია წარმოდგენილი.ევროკავშირთან ასოცირების ხელშეკრულების ხელმოწერის შემდეგ, ქართული პროდუქციის პოპულარიზაციას საერთაშორისო ბაზრებზე განსაკუთრებული მნიშვნელობა ენიჭება. შესაბამისად, წლევანდელ გამოფენაზე საქართველო მრავალფეროვანი პროდუქციით არის წარმოდგენილი. ბერლინში გამართულ გამოფენას საქართველოს პარლამენტის აგრარულ საკითხთა კომიტეტის თავმჯდომარე ოთარ დანელია და გერმანიის ფედერაციულ რესპუბლიკაში საქართველოს საქმეთა დროებითი რწმუნებული ლევან დიასამიძე ესწრებოდნენ.გერმანიაში ვიზიტის ფარგლებში, საქართველოს გარემოს დაცვისა და სოფლის მეურნეობის მინისტრის პირველმა მოადგილემ, ნოდარ კერესელიძემ მონაწილეობა მიიღო Gruene Woche 2018-ის ფარგლებში გამართულ მინისტერიალში, სადაც 80-ზე მეტი ქვეყნის სოფლის მეურნეობის სამინისტროს ოფიციალური დელეგაცია მონაწილეობდა.ნოდარ კერესელიძემ შეხვედრები გამართა გერმანიის ფედერაციული რესპუბლიკის ბუნდესტაგის საპარლამენტო სახელმწიფო მდივანთან, პეტერ ბლეზერთან, ლატვიის სოფლის მეურნეობის მინისტრთან, იანის დუკლავსთან, ბელორუსიის რესპუბლიკის სურსათისა და სოფლის მეურნეობის მინისტრის მოადგილესთან, იგორ ბრილოსთან და ბუნდესტაგის დეპუტატთან, სამხრეთ კავკასიის საპარლამენტო ჯგუფის ხელმძღვანელთან კარენ შტრელცთან.
#

გარემოს დაცვისა და სოფლის მეურნეობის მინისტრის პირველმა მოადგილემ ნოდარ კერესელიძემ „მწვანე კვირეულის“ ფარგლებში შეხვედრები გამართა

 საქართველოს გარემოს დაცვისა და სოფლის მეურნეობის მინისტრის პირველმა მოადგილემ, ნოდარ კერესელიძემ, ქალაქ ბერლინში, სურსათის, სოფლის მეურნეობისა და მებაღეობის საერთაშორისო გამოფენის „მწვანე კვირეული 2018-ის″ (Gruene Woche 2018) ფარგლებში აგრარული მიმართულებით სხვადასხვა ქვეყნის დელეგაციებთან ოფიციალური შეხვედრები გამართა.გერმანიის ფედერაციული რესპუბლიკის სოფლის მეურნეობის სამინისტროს საპარლამენტო სახელმწიფო მდივანთან, პეტერ ბლეზერთან შეხვედრაზე, ნოდარ კერესელიძემ საქართველოში აგრარული და გარემოსდაცვითი მიმართულებით დაგეგმილ და განხორციელებულ პროექტებზე ისაუბრა. პეტერ ბლეზერი საქართველოში არსებული საინვესტიციო გარემოთი დაინტერესდა და ერთობლივი პროექტების განხორციელების მზადყოფნა გამოთქვა. აღსანიშნავია, რომ პეტერ ბლეზერმა 2017 წლის ზაფხულში, საქართველოში, ბიზნესდელეგაციასთან ერთად შეხვედრები გამართა, როგორც სახელმწიფო, ასევე კერძო სექტორის წარმომადგენლებთან. გარემოს დაცვისა და სოფლის მეურნეობის მინისტრის პირველმა მოადგილემ გერმანულ მხარეს ინფორმაცია მიაწოდა საქართველოში ბოლო დროს გავრცელებული საკარანტინო მავნებლის აზიური ფაროსანას შესახებ და აღნიშნა, რომ 2017 წელს ქართულ სასოფლო-სამეურნეო კულტურის ნაწილს ზიანი მიადგა, რამაც თხილის ექსპორტის შემცირება გამოიწვია. მხარეებმა ხაზი გაუსვეს ერთობლივი ღონისძიებების გატარების მნიშვნელობას და შეთანხმდნენ ფიტოსანიტარიის კუთხით თანამშრომლობის გააქტიურების აუცილებლობაზე. „მსგავსი გამოწვევების დროს, საჭიროა ერთობლივი ძალისხმევა, რათა დროულად იქნას პრობლემა იდენტიფიცირებული და ერთობლივი ღონისძიებები დაიგეგმოს საკითხის მოსაგვარებლად. გერმანული მხარე მზადაა ითანამშრომლოს ქართველ კოლეგებთან რისკების შემცირებისა და ფიტოსანიტარიული დაავადებების გავრცელების წინააღმდეგ ბრძოლის მიმართულებით“, - განაცხადა პეტერ ბლეზერმა. ნოდარ კერესელიძემ მადლობა გადაუხადა პეტერ ბლეზერს გერმანული კომპანიის მიერ ჩატარებული კვლევისთვის, რომელიც საქართველოს საინვესტიციო გარემოს გაუმჯობესების კუთხით აგრარულ სექტორში გარკვეულ რეკომენდაციებს გულისხმობდა. ვიზიტის ფარგლებში, ნოდარ კერესელიძემ შეხვედრები გამართა ლატვიის სოფლის მეურნეობის მინისტრთან, იანის დუკლავსთან, ბელორუსიის რესპუბლიკის სურსათისა და სოფლის მეურნეობის მინისტრის მოადგილესთან იგორ ბრილოსთან და ბუნდესტაგის დეპუტატთან, სამხრეთ კავკასიის საპარლამენტო ჯგუფის ხელმძღვანელთან, კარენ შტრელცთან.