#

გაეროს გარემოსდაცვითი პოლიტიკის კომიტეტის სესიაზე ნინო თანდილაშვილმა ჰაერის დაცვის კუთხით ნაკისრი ვალდებულებების შესრულების ანგარიში წარადგინა

ქ. ჟენევაში, გაეროს ევროპის ეკონომიკური კომისიის (UNECE) გარემოსდაცვითი პოლიტიკის კომიტეტის (CEP) 24-ე სესიის ფარგლებში, საქართველოს გარემოს დაცვისა და სოფლის მეურნეობის მინისტრის მოადგილემ, ნინო თანდილაშვილმა საქართველოს მიერ აღებული ნებაყოფლობითი ვალდებულებების განხორციელების მიმართულებით მიღწეული პროგრესის ანგარიში წარადგინა. აღნიშნული ვალდებულებები - ბათუმის ქმედებები უფრო სუფთა ჰაერისთვის (BACA) - 2016 წელს ბათუმში გამართულ „გარემო ევროპისთვის“ მე-8 მინისტერიალზე მინისტრებმა დაამტკიცეს და ის ატმოსფერული ჰაერის ხარისხის გაუმჯობესებისკენ მიმართული ნებაყოფლობითი ღონისძიებების ერთობლიობას წარმოადგენს. ბათუმის ქმედებები უფრო სუფთა ჰაერისთვის არის ინსტრუმენტი, რომელიც ქვეყნებს ეხმარება გააუმჯობესონ ჰაერის ხარისხი, დაიცვან ადამიანის ჯანმრთელობა და გარემო ჰაერის დაბინძურებისგან. საქართველომ ინიციატივის ფარგლებში 7 ნებაყოფლობითი ვალდებულება აიღო შემდეგი მიმართულებით: ●       ჰაერის ხარისხის მონიტორინგისა და შეფასების სისტემის გაუმჯობესება●       საწვავის ხარისხის გაუმჯობესება●       ქ. თბილისის საზოგადოებრივი ტრანსპორტის განვითარება●       ელექტროტრანსპორტისა და ავტომობილების მწვანე მართვის ხელშეწყობა●       გაფრქვევების აღრიცხვის გაუმჯობესება●       ჰაერის ხარისხის შესახებ ინფორმაციის ხელმისაწვდომობის გაზრდა.  როგორც სიტყვით გამოსვლისას მინისტრის მოადგილემ აღნიშნა, საქართველოს მთავრობის ერთ-ერთ უმნიშვნელოვანეს პრიორიტეტს ჰაერის ხარისხის მდგომარეობის გაუმჯობესება წარმოადგენს. ნინო თანდილაშვილმა ამ მიმართულებებით ბოლო პერიოდში გატარებული ღონისძიებებისა და მიღწეული პროგრესის შესახებ ისაუბრა და ხაზი გაუსვა ატმოსფერული ჰაერის ხარისხის, მისი დაცვის ღონისძიებების შესახებ ინფორმაციის ხელმისაწვდომობის უზრუნველყოფისა და ცნობიერების ამაღლების მიზნით სამინისტროს მიერ შექმნილი ატმოსფერული  ჰაერის ხარისხის ახალი პორტალის მნიშვნელობას.
#

ჟენევაში გარემოს დაცვისა და სოფლის მეურნეობის მინისტრის მოადგილემ საქართველოს მწვანე ეკონომიკის განვითარების ძირითადი ხედვა წარადგინა

გარემოს დაცვისა და სოფლის მეურნეობის მინისტრის მოადგილემ, ნინო თანდილაშვილმა, შვეიცარიაში ვიზიტის ფარგლებში, მონაწილეობა მიიღო სესიაში „მდგრადი განვითარება რეგიონში”, სადაც მოხსენება „მწვანე ეკონომიკის მიმართულებით საქართველოს ხედვის” შესახებ გააკეთა. 2018 წლის ივლისში საქართველოს პრემიერ-მინისტრმა, მამუკა ბახტაძემ „მწვანე ეკონომიკა“ საქართველოს მთავრობის გარემოსდაცვითი პოლიტიკის ერთ-ერთ მთავარ პრიორიტეტულ მიმართულებად გამოაცხადა.  სესიაზე მინისტრის მოადგილემ ისაუბრა მწვანე ეკონომიკის ხელშემწყობი ძირითადი ასპექტების მიმართულებით ქვეყნის მიერ განხორციელებულ ქმედებებზე, როგორიცაა ჰაერის ხარისხის გაუმჯობესება, მწვანე ტრანსპორტის პოლიტიკის შემუშავება, მწვანე ინფრასტრუქტურის განვითარება, ცირკულარული ეკონომიკის ხელშეწყობა, მწვანე მშენებლობის პრაქტიკის დანერგვა, ენერგოეფექტურობის წახალისება და მდგრადი განვითარების მიზნების განხორციელების ხელშეწყობა.2019 წლის 29-31 იანვარს, ქ. ჟენევაში (შვეიცარიის კონფედერაცია) გაეროს ევროპის ეკონომიკური კომისიის ეგიდით გარემოსდაცვითი პოლიტიკის კომიტეტის 24-ე სესია გაიმართა, რომელშიც მონაწილეობა 60-მდე ქვეყნის დელეგატმა მიიღო.
#

ჟენევაში საქართველოს ჰაერის ხარისხის პოლიტიკის ძირითადი მიმართულებები დადებითად შეაფასეს

საქართველოს გარემოს დაცვისა და სოფლის მეურნეობის მინისტრის მოადგილემ, ნინო თანდილაშვილმა, ქ. ჟენევაში, გაეროს ევროპის ეკონომიკური კომისიის (UNECE) გარემოსდაცვითი პოლიტიკის კომიტეტის (CEP) 24-ე სესიაზე ჰაერის ხარისხის გაუმჯობესების კუთხით საქართველოს მიერ აღებული ვალდებულებების განხორციელების პროგრესზე ისაუბრა. აღნიშნულ სესიას 60-მდე ქვეყნის სახელმწიფო და არასამთავრობო ორგანიზაციის წარმომადგენელი ესწრებოდა. როგორც ნინო თანდილაშვილმა საკუთარ გამოსვლაში აღნიშნა,  საქართველოს მთავრობისთვის გარემოსდაცვითი რეფორმების განხორციელება მნიშვნელოვანი პრიორიტეტია. მისივე თქმით, საქართველოს გარემოს დაცვისა და სოფლის მეურნეობის სამინისტრო აქტიურად ახორციელებს გარემოსდაცვითი მმართველობის გაუმჯობესებისა და დარგობრივ რეფორმებს. „რეფორმის ერთ-ერთ უმთავრეს მიმართულებას ჰაერის დაცვის ეფექტიანი ღონისძიებები და ამ პროცესში საზოგადოების აქტიური ჩართულობა წარმოადგენს. ახლადშექმნილი ჰაერის ხარისხის  პორტალის ამოქმედება საქართველოში საზოგადოების გარემოსდაცვითი ინფორმირების გამჭვირვალე ინსტრუმენტს წარმოადგენს“, - განაცხადა გარემოს დაცვის და სოფლის მეურნეობის მინისტრის მოადგილემ, ნინო თანდილაშვილმა.  „საქართველოში ჰაერის დაცვის მიმართულებით პროგრესი სახეზეა. ახლადშექმნილი ჰაერის პორტალი სრულიად აკმაყოფილებს ევროკავშირის მოთხოვნებს და ცხადყოფს საქართველოს მთავრობის ნებას, დაუახლოვდეს ევროკავშირს. აღნიშნული დასტურია მთავრობის მზადყოფნისა, მოაგვაროს ჰაერის დაბინძურების მიმართულებით არსებული გამოწვევა. ეს არის ძალიან პოზიტიური სიგნალი საქართველოს მოქალაქეებისთვის, ევროკავშირისთვის და საერთაშორისო საზოგადოებისთვის, რომ მთავრობა აღნიშნულ გამოწვევებს ადეკვატურად პასუხობს“, - განაცხადა ევროკავშირის გარემოს სააგენტოს აღმასრულებელმა დირექტორმა, ჰანს ბრუინინქსმა და  რეფორმირების პროცესში ქართველი ექსპერტების გამოცდილებასა და ჩართულობას გაუსვა ხაზი. საქართველოს გარემოს დაცვისა და სოფლის მეურნეობის მინისტრის მოადგილე ნინო თანდილაშვილი სესიის ფარგლებში გამართულ სხვადასხვა პანელზე სიტყვით გამოვიდა, სადაც 2016 წელს, ქ. ბათუმში გამართული „გარემო ევროპისთვის” მე-8 მინისტერიალზე ქვეყნის მიერ აღებული ვალდებულებების განხორციელების შედეგები წარადგინა.
#

საფრანგეთის რესპუბლიკაში, ქ. ლიონში საქართველო ყველაზე მასშტაბურ გასტრონომიულ გამოფენაში Sirha პირველად მონაწილეობს

გამოფენაში საქართველოს ჩართვის თანაორგანიზატორები საქართველოს გარემოს დაცვისა და სოფლის მეურნეობის სამინისტრო, სსიპ საქართველოს ინტელექტუალური საკუთრების ეროვნული ცენტრი „საქპატენტი" და  სსიპ ღვინის ეროვნული სააგენტო იყვნენ.  გამოფენაში საქართველოს მონაწილეობას ორგანიზება საქართველოს კულინარიის ფედერაციამ და  კვების დაწესებულების ბიზნესსააგენტომ „გასტრონავტმა“ გაუწია. გამოფენა, რომელმაც 6 000-ზე მეტ ვიზიტორს უმასპინძლა, ქალაქ ლიონის მერმა, ჟერარდ კოლომბიმ და გასტრონომიული ჩემპიონატის Bocuse d’Or  პრეზიდენტმა, ჟერომე ბოკიუზიმ გახსნეს. საქართველო  11-მა ახალგაზრდა მზარეულმა, შეფმზარეულის ლევან კობიაშვილის ხელმძღვანელობით, წარმოადგინა და გამოფენის სტუმრებს ქართული კერძები და ავთენტური ინგრედიენტები გააცნო.  „ჩვენ  გავხდით დიდი კულინარიული ოჯახის სრულფასოვანი წევრი. ქართულ სამზარეულოს უკვე პროფესიონალები წარადგენენ  და მსოფლიოს გააცნობენ იმ მაღალი სტანდარტით, რასაც Syrha და Bocuse d’Or ითვალისწინებს“, -  ღვინის ეროვნული სააგენტოს თავჯდომარის მოადგილემ, დავით ტყემალაძემ განაცხადა. გამოფენაზე ქართული კერძები ღია სამზარეულოში მომზადდა და ვიზიტორებს  ქართული კერძების, როგორიცაა  ხინკალი, ხაჭაპური, ჩაქაფული, დამბალხაჭო, ხარჩო, ელარჯი, მომზადების პროცესზე დაკვირვების და დაგემოვნების საშუალება მიეცათ. სპეციალური სივრცე ღვინის დეგუსტაციისთვისაც იყო გამოყოფილი. ქართული სტენდზე კერძები  Bocuse d’Or -ის პრეზიდენტმა, ჟერომე ბოკიუზიმ დააგემოვნა. ქართულ სტენდს სტუმრობდა  მსოფლიოში ერთ-ერთი საუკეთესო ფრანგი შეფ-მზარეული, ფრანსუა ბაკრიც. იგი ქართველ მზარეულებს შეხვდა და მათ  გამოცდილება და შთაბეჭდილებები გაუზიარა.   „Sirha 2019” ყველაზე მასშტაბური კულინარიული გამოფენაა, რომელიც საფრანგეთში, ქალაქ ლიონში იმართება და მთელი მსოფლიოდან კვების მრეწველობაში ჩართულ ადამიანებს, მწარმოებლებსა და ორგანიზაციებს აერთიანებს. გამოფენის პარალელურად, გაიმართა მსოფლიოს ყველაზე დიდი გასტრონომიული ჩემპიონატი „Bocuse d’Or 2019”. გამოფენისა და ჩემპიონატის ორგანიზატორი ერთი გუნდია; მათთან ორწლიანი მოლაპარაკებების შემდეგ, საქართველო გახდა „ბოკუზ დორის” გასტრონომიული ოჯახის წევრი .  „Sirha 2019” კიდევ ერთი მნიშვნელოვანი საერთაშორისო პლატფორმაა, სადაც საქართველოს შესაძლებლობა ეძლევა ქართული სამზარეულო, ქართული კულტურის უნიკალურობა და ქვეყნის ტურისტული პოტენციალი, მსოფლიოს მასშტაბით, კიდევ უფრო მეტ ადამიანს გააცნოს. 
#

გარემოს დაცვისა და სოფლის მეურნეობის მინისტრი ლევან დავითაშვილი ქართული თაფლის მწარმოებლებს შეხვდა

„ქართული პროდუქციის მხარდაჭერა პრინციპულად მნიშვნელოვანი საკითხია ქვეყნის მთავრობისთვის. ქართული თაფლი ე.წ. პრივილეგირებულ პროდუქტთა შემადგენლობაშია. მისი წარმოების ხელშეწყობისა და მსოფლიო ბაზარზე ღირსეული ადგილის დასამკვიდრებლად არაერთი მიმართულებით ვმუშაობთ. სწორედ ქართული თაფლი გახდა პირველი ცხოველური პროდუქტი, რომელიც საქართველოდან ევროპის ბაზარზე გავიდა. რაც შეეხება კონსოლიდირებული ტენდერით ნატურალური თაფლის შესყიდვის საკითხს და შექმნილ აჟიოტაჟს, ვფიქრობ, ნაჩქარევი იყო აღელვება. ზოგადად, საზოგადოების და დაინტერესებული პირების მხრიდან არასწორად იქნა გაგებული მიმდინარე პროცესები. კომისიის გადაწყვეტილებით, პრეტენდენტს მიენიჭა დისკვალიფიკაცია, ვინაიდან, წარმოდგენილი ნიმუში არ აკმაყოფილებდა სატენდერო დოკუმენტაციითა და კანონმდებლობით დადგენილ მოთხოვნებს. “– განაცხადა ლევან დავითაშვილმა. შეხვედრის დასასრულს მინისტრმა მადლობა გადაუხადა ქართული თაფლის მწარმოებლებს და მხარდაჭერა კიდევ ერთხელ ღიად დააფიქსირა. შეხვედრას თაფლის მწარმოებლებთან ერთად, ფერმერთა ასოციაციის ხელმძღვანელი ნინო ზამბახიძეც ესწრებოდა.
#

ეკონომიკური კონფერენციის „საქართველო და მსოფლიო 2019“ მეორე პანელში ლევან დავითაშვილმა მწვანე ეკონომიკის მნიშვნელობაზე გაამახვილა ყურადღება

მინისტრის განცხადებით, საქართველოს მთავრობა მწვანე ეკონომიკას ქვეყნის მომავალი განვითარების ერთ-ერთ უმთავრეს საშუალებად განიხილავს და, მდგრადი განვითარების ხელშეწყობის მიზნით, კონკრეტულ ღონისძიებებს ახორციელებს. ლევან დავითაშვილმა გარემოსდაცვითი მმართველობის გაუმჯობესების საკითხზე საუბრისას ყურადღება  ,,გარემოსდაცვითი შეფასების კოდექსის“ ამოქმედებაზე გაამახვილა და აღნიშნა, რომ კოდექსის საფუძველზე მაქსიმალურად უზრუნველყოფილია გარემოსდაცვითი გადაწყვეტილების მიღების პროცესში საქმიანობის განხორციელებით შესაძლო საფრთხეების იდენტიფიცირება.  ასევე, აღნიშნა, რომ გათვალისწინებულია სტრატეგიული გარემოსდაცვითი შეფასებაც, რაც გულისხმობს სხვადასხვა სექტორების პოლიტიკის დაგეგმარების ადრეულ ეტაპზე  გარემოსა და ადამიანის ჯანმრთელობის საკითხების ინტეგრირებას, რაც აზღვევს გარემოსდაცვით რისკებს. ლევან დავითაშვილმა აღნიშნა, რომ ატმოსფერული ჰაერის ხარისხის გაუმჯობესების მიზნით სამინისტრო მნიშვნელოვან ღონისძიებებს ატარებს. „2017 წლიდან ქვეყანაში ევრო 5 სტანდარტის ბენზინი მოიხმარება. 2019 წლის პირველი იანვრიდან, დიზელის საწვავის ხარისხი ევრო 4 ნორმამდე გაიზარდა, ხოლო წლის ბოლოდან იგი ევრო 5-ს მიაღწევს. შედეგად, მნიშვნელოვანი დამბინძურებლები - გოგირდის ორჟანგი და ბენზოლი დღეს ქვეყნის მასშტაბით ნორმის ფარგლებშია“, - აღნიშნა მინისტრმა. ლევან დავითაშვილის განცხადებით, ჰაერის ხარისხის მართვის თანამედროვე ევროპული პრინციპების დანერგვის მიზნით, შემუშავდა საკანონმდებლო ცვლილებები და შეიქმნა ჰაერის ხარისხის პორტალი, რომლის საშუალებითაც მარტივად გასაგები ინფორმაცია ჰაერის ხარისხის შესახებ ყველასთვის ხელმისაწვდომია უწყვეტ რეჟიმში. გარემოს დაცვისა და სოფლის მეურნეობის მინისტრმა მოხსენებაში ყურადღება გაამახვილა ტყის კოდექსის და დაცული ტერიტორიების მნიშვნელობაზე. დაცულ ტერიტორიებზე საუბრისას ლევან დავითაშვილმა აღნიშნა, ამჟამად საქართველოში 5 კატეგორიის 86 დაცული ტერიტორიაა, რაც ქვეყნის ტერიტორიის თითქმის 10%-ია (9.55%) და იგეგმება 5 ახალი დაცული ტერიტორიის დაარსება (არაგვის და თრუსოს დაცული ლანდშაფტები, ერუშეთის და რაჭის ეროვნული პარკები, რიონის აღკვეთილი).   მინისტრი შეეხო ნარჩენების მართვის საკითხსაც და აღნიშნა, რომ 2019 წლის 1 თებერვლიდან ეტაპობრივად დაინერგება ნარჩენების სეპარირებული შეგროვების სისტემა. აღინიშნა, რომ საქართველოს მთავრობის მიერ დამტკიცდა „ტექნიკური რეგლამენტი - პლასტიკის და ბიოდეგრადირებადი პარკების რეგულირების წესი“, რაც მიმართულია  პოლიეთილენის პარკების გარემოში მოხვედრის შემცირებაზე/პრევენციაზე და ის ასევე ხელს შეუწყობს ბიოდეგრადირებადი და კომპოსტირებადი პარკების წარმოების განვითარება/წახალისებას. პირველ ეტაპზე, 2018 წლის 1 ოქტომბრიდან აიკრძალა 15 მიკრონზე ნაკლები სისქის, ხოლო 2019 წლის 1 აპრილიდან იკრძალება ნებისმიერი ტიპის პლასტიკის პარკების წარმოება, რეალიზაცია და იმპორტი. ასევე, აიკრძალა ოქსო-ბიოდეგრადირებადი პლასტიკის პარკების წარმოება, რეალიზაცია და იმპორტი. ამასთან ერთად, მიმდინარეობს წამახალისებელი ზომების შემუშავება პლასტიკის და მინის ბოთლებისათვის ე.წ. დეპოზიტის სისტემის დასანერგად, რაც მომხმარებლებს გაუჩენს მოტივაციას იმისა, რომ მოხდეს ბოთლების დიდი ნაწილის უკან ჩაბარება.
#

ეკონომიკური კონფერენციის „საქართველო და მსოფლიო 2019 წელს“ ფარგლებში ლევან დავითაშვილმა მოხსენება გააკეთა

ლევან დავითაშვილმა საქართველოს რეგიონის ეკონომიკურ ცენტრად გადაქცევის მიზნის მიღწევაში აგრარული დარგის კონტრიბუციის პოტენციალზე და არსებულ გამოწვევებზე ისაუბრა, შეაჯამა განხორციელებული პროექტების შედეგები და აღნიშნა, რომ აგრარულ სექტორში დასაქმებულთა კონკურენტუნარიანობის ამაღლების, ინსტიტუციური განვითარებისა და დამატებული ღირებულების შემქმნელი სრული ციკლის წარმოების განვითარების ხელშეწყობის მიმართულებით სახელმწიფო კვლავ აქტიურად ახორციელებს არაერთ პროექტს. „სახელმწიფოს ფინანსური მხარდაჭერით, დღეისათვის, შექმნილია 186 ახალი და გადაიარაღებულია 900 საწარმო. 6,347 ჰა-ზე გაშენებულია 993 ინტენსიური, სხვადასხვა კულტურის ბაღი, მიმდინარეობს ქართული ჩაის რეაბილიტაციის 44 პროექტი. 116 ახალგაზრდა ბენეფიციარი ჩართულია პროექტში, რომელსაც სახელმწიფო დარგის განვითარებაში ახალგაზრდების ჩართულობის მიზნით ახორციელებს“, - აღნიშნა ლევან დავითაშვილმა.  მთავარ გამოწვევებად ღირებულებათა ჯაჭვის თითოეული რგოლის გაძლიერება, მაღალკვალიფიციური კადრების მომზადება, თანამედროვე ტექნოლოგიებზე ხელმისაწვდომობა, ადგილობრივი პროდუქციის ხარისხობრივი და რაოდენობრივი ზრდა, იმპორტის ჩანაცვლება, საექსპორტო პროდუქციის ზრდა, ბაზრის დივერსიფიკაცია, მწვანე ეკონომიკის ფარგლებში ბიო წარმოების ხელშეწყობა და საკანონმდებლო რეგულირება დასახელდა. „იმ არაერთ პროგრამასთან ერთად, რომელსაც ვახორციელებთ, 2019 წლიდან ემატება მოსავლის ამღები ტექნიკის თანადაფინანსების პროგრამა, ტექნიკური დახმარებისა და სასოფლო-სამეურნეო პროდუქციის მარკეტინგის და მესაქონლეობის ხელშეწყობის პროექტები, რაც მნიშვნელოვან როლს შეასრულებს ეკონომიკის ზრდაში“, - განაცხადა ლევან დავითაშვილმა.  მინისტრმა ყურადღება გაამახვილა სამელიორაციო პროექტებზე, მიწის მართვის პოლიტიკაზე, კოოპერაციის წამახალისებელ პროექტებსა და ღვინის სექტორში მიღწეულ შედეგებზეც  ისაუბრა. დაანონსდა, რომ თებერვალში სამინისტრო გამართავს ხარისხის ნიშნის პრეზენტაციას, რაც ხელს შეუწყობს ქართული სოფლის მეურნეობის პროდუქტების პოპულარიზაციას, როგორც ქვეყნის ფარგლებში, ასევე ფარგლებს გარეთ.