#

ლევან დავითაშვილი: „თხილის წარმოება ქვეყანაში მზარდია, რადგან სექტორს განვითარების დიდი პოტენციალი აქვს“

გარემოს დაცვისა და სოფლის მეურნეობის მინისტრი ლევან დავითაშვილი იტალიის რესპუბლიკის საგანგებო და სრულუფლებიან ელჩს საქართველოში ანტონიო ბარტოლის და კომპანიის „Ferrero“ აღმასრულებელ დირექტორს, მარკო გონკალვესს შეხვდა. „თხილის წარმოება ქვეყანაში მზარდია, რადგან სექტორს განვითარების დიდი პოტენციალი აქვს. დარგის განვითარებისთვის მნიშვნელოვანი სახელმწიფო პროგრამები ხორციელდება.  მადლობა მინდა გადავუხადო კომპანიის „Ferrero“ აღმასრულებელ დირექტორს საქართველოს თხილის სექტორის განვითარებაში შეტანილი წვლილისთვის და ხაზგასმით აღვნიშნო, რომ თხილის წარმოებაში კომპანიის გამოცდილების გაზიარება განსაკუთრებით მნიშვნელოვანია“, - განაცხადა გარემოს დაცვისა და სოფლის მეურნეობის მინისტრმა, ლევან დავითაშვილმა. როგორც მინისტრმა შეხვედრაზე აღნიშნა, თხილის სექტორის განვითარებაში მნიშვნელოვანია საქართველოს თხილის მწარმოებელთა ასოციაციის როლი, რომლის ქმედით სტრუქტურად ჩამოყალიბებაში დიდია კომპანიის „Ferrero“ წვლილი. „ჩვენ ვაფასებთ თქვენს მხარდაჭერას და ვფიქრობ, რომ ასოციაცია დაგროვილი გამოცდილებით ეფექტიანად შეძლებს საქმიანობის გაგრძელებას“, - განაცხადა მინისტრმა.შეხვედრაზე მხარეებმა ინვაზიური მავნებლის, აზიური ფაროსანას მიერ მიყენებული ზარალის და ბრძოლის სტრატეგიის საკითხიც განიხილეს. მარკო გონკალვესმა მადლობა გადაუხადა ლევან დავითაშვილს საქართველოში წარმოების განვითარების მხარდაჭერისთვის და აღნიშნა, რომ კომპანია მომავალშიც გააგრძელებს თხილის სექტორში ინვესტირებას. შეხვედრაზე კომპანიის დირექტორმა ღიად დააფიქსირა, რომ მზად არის აქტიურად ითანამშრომლოს იმ მეთხილე ფერმერებთან, რომლებიც სტანდარტების დაცვით აწარმოებენ პროდუქციას, რაც საშუალებას მოგვცემს  დამატებული ღირებულება ადგილზე შეიქმნას.  საქართველოში იტალიის რესპუბლიკის საგანგებო და სრულუფლებიან ელჩმა, ანტონიო ბარტოლმა შეხვედრაზე ორ ქვეყნას შორის გრძელვადიანი და სტაბილური თანამშრომლობის მნიშვნელობაზე ისაუბრა.
#

საქართველო ზეთისხილის საერთაშორისო საბჭოში გაწევრიანდა

საქართველოს გარემოს დაცვისა და სოფლის მეურნეობის მინისტრი ლევან დავითაშვილი სამუშაო ვიზიტით მაროკოს სამეფოში იმყოფებოდა.ვიზიტის ფარგლებში, მინისტრი ქალაქ მარაკეშში გამართულ ზეთისხილის საერთაშორისო საბჭოს სესიას დაესწრო. სესიაზე საქართველო ზეთისხილის საერთაშორისო საბჭოს წევრად მიიღეს. საერთაშორისო საბჭო ზეთისხილისა და ზეითუნის ზეთის უმსხვილეს მწარმოებელ 20-მდე ქვეყანას აერთიანებს.როგორც სესიაზე საქართველოს გარემოს დაცვისა და სოფლის მეურეობის მინისტრმა ლევან დავითაშვილმა განაცხადა, სამინისტროს ერთ-ერთი პრიორიტეტი საქართველოში სოფლის მეურნეობის ახალი კულტურების გაშენების ხელშეწყობაა.„სახელმწიფო პროექტების დახმარებით და თანამედროვე ბაზრის პრინციპების დაცვით, ქვეყანაში ასობით ჰექტარი ნახევრადინტენსიური და ინტენსიური მრავალწლოვანი კულტურები, მათ შორის ზეთისხილის ბაღები გაშენდა. საქართველოში არსებული კლიმატური და ნიადაგური პირობები ხელსაყრელია აღნიშნული კულტურის მოსაყვანად, შესაბამისად საქართველო დაინტერესებულია დაიწყოს ზეთისხილის ინდუსტრიაში ოპერირება. დღეისათვის, უკვე გაშენებულია პლანტაციები და იწარმოება ზეთისხილის ზეთი. ჩვენი მიზანია, ხელი შევუწყოთ ქვეყანაში კლიმატგონივრული და გარემოზე ადაპტირებული სასოფლო-სამეურნეო კულტურების გაშენებას“, -აღნიშნა ლევან დავითაშვილმა.ზეთისხილის საბჭოს სესიას ზეთისხილისა და ზეთისხილის ზეთის მწარმოებელი და ექსპორტიორი ქვეყნებიდან დარგობრივი მიმართულების 6 მინისტრი ესწრებოდა. სესიის ფარგლებში, ზეთისხილის საერთაშორისო საბჭოს წევრობის დამდასტურებელი სიგელი, ქვეყნის სახელით, საქართველოს ზეთისხილის ასოციაციის პრეზიდენტს, გიორგი სვანიძეს გადაეცა.სამუშაო ვიზიტის ფარგლებში, გარემოს დაცვისა და სოფლის მეურნეობის მინისტრმა, ლევან დავითაშვილმა სამომავლო თანამშრომლობის საკითხების განხილვის მიზნით, ორმხრივი შეხვედრები გამართა მაროკოს სამეფოს, ეგვიპტის და ლიბიის რესპუბლიკის სოფლის მეურნეობის მინისტრებთან, ბიზნესწრეებისა და ექსპერტ-ჯგუფების წარმომადგენლებთან.სამუშაო შეხვედრებს მინისტრთან ერთად საქართველოს ელჩი ესპანეთის სამეფოში, ანდორის სამთავროში, მაროკოს სამეფოსა და ალჟირის სახალხო დემოკრატიულ რესპუბლიკაში ილია გიორგაძე, საქართველოს გარემოს დაცვისა და სოფლის მეურნეობის მინისტრის მოადგილე ხატია წილოსანი და საქართველოს ზეთისხილის ასოციაციის პრეზიდენტი გიორგი სვანიძე ესწრებოდნენ.ზეთისხილის საერთაშორისო საბჭო 1959 წელს, მადრიდში დაარსდა და გაეროს სპეციალიზებულ სააგენტოს წარმოადგენდა. ორგანიზაციის მიზანია არა მხოლოდ ზეთისხილის პირველადი წარმოებისა და ექსპორტის მხარდაჭერა, არამედ კვლევა, გადამზადება და ტექნოლოგიების გადაცემა.
#

საქართველო ინვაზიური სახეობების სამუშაო ჯგუფის შეხვედრას მასპინძლობს

საქართველო ინვაზიური სახეობების შესახებ სამუშაო ჯგუფის მეცამეტე შეხვედრას მასპინძლობს. შეხვედრის მონაწილეები ერთმანეთს უზიარებენ გამოცდილებას და საუკეთესო პრაქტიკას ინვაზიურ სახეობებთან ბრძოლის კუთხით, ასევე განიხილავენ ინვაზიურ უცხო სახეობებთან დაკავშირებით ევროპული სტრატეგიის დანერგვის საკითხს და  ინვაზიური უცხო სახეობების შესახებ ახალ სახელმძღვანელო დოკუმენტებს.    „ინვაზიური სახეობების გავრცელება ბიომრავალფეროვნებისთვის ერთ-ერთ მნიშვნელოვან საფრთხედ მიიჩნევა. ჩვენი, როგორც გარემოს დამცველების ვალდებულებაა შევამციროთ მათი გავრცელება. ამისათვის მნიშვნელოვანია სხვადასხვა ქვეყნის სპეციალისტებთან მჭიდრო თანამშრომლობა, ცოდნისა და გამოცდილების  გაზიარება. მოხარული ვარ, რომ საქართველო მასპინძლობს ღონისძიებას, სადაც მნიშვნელოვანი გამოწვევები და მათი დაძლევის საკითხები განიხილება“, - აღნიშნა გარემოს დაცვისა და სოფლის მეურნეობის მინისტრის მოადგილემ, იური ნოზაძემ. ქალაქ ბათუმში გამართულ შეხვედრას ევროპის ველური ბუნებისა და ბუნებრივი ჰაბიტატების დაცვის შესახებ კონვენციისა (ბერნის კონვენცია)  21 ხელმომწერი ქვეყნის დელეგატი ესწრება. ღონისძიების ფარგლებში, შეხვედრის მონაწილეებისთვის მტირალას ეროვნულ პარკში საველე ვიზიტი გაიმართება. საქართველოში ბერნის კონვენციის დანერგვა 2008 წლიდან დაიწყო. ქართული მხარე მაქსიმალურად ცდილობს შეასრულოს კონვენციით დაკისრებული ვალდებულებები, დაიცვას და შეინარჩუნოს ეროვნული და საერთაშორისო კონსერვაციული მნიშვნელობის მქონე ტერიტორიები. ბოლო წლების განმავლობაში,  სახელმწიფოს ძალისხმევით,  ქვეყანაში შეიქმნა  „ზურმუხტის ქსელი“, რაც ბიომრავალფეროვნებისთვის მნიშვნელოვანი არეალების დაცვას და შენარჩუნებას ემსახურება.
#

ტყის სექტორის განვითარების მიზნით, მსოფლიო ბანკი მნიშვნელოვან პროექტს ახორციელებს

„სატყეო სექტორის განვითარება ქვეყნისთვის უმნიშვნელოვანეს მიმართულებას წარმოადგენს. ჩვენთვის მნიშვნელოვანია ტყის რესურსების გამოყენება ეკონომიკური პრინციპების დაცვით. მადლობა მინდა გადავუხადო მსოფლიო ბანკს ტყის ახალი კოდექსის შემუშავებაში გაწეული ფინანსური დახმარებისთვის. ჩვენ უნდა შევქმნათ სატყეო მეურნეობების მოდელი და ვფიქრობ, დონორ ორგანიზაციებთან და კერძო სექტორთან თანამშრომლობით სასურველ შედეგს მივიღებთ“, - განცხადა გარემოს დაცვისა და სოფლის მეურნეობის მინისტრის მოადგილემ, იური ნოზაძემ მსოფლიო ბანკის პროექტის  „სამხრეთ კავკასია - კერძო სექტორის როლის გაძლიერება ტყის სექტორის განვითარების მიზნით“ ფარგლებში გამართულ ღონისძიებაზე მისასალმებელი სიტყვით გამოსვლის დროს. შეხვედრაზე საქართველოს, სომხეთის და აზერბაიჯანის ტყის სექტორის კვლევის შედეგები და  განვითარების შესაძლებლობები განიხილეს.  მსოფლიო ბანკის ჯგუფის ლიდერმა, ტუკა კასტრენმა,  შეხვედრაზე აღნიშნა, რომ საქართველო მდიდარია ტყის ბუნებრივი საფარით, რასაც დაცვა-განვითარება სჭირდება და ამ კუთხით ქართულ მხარესთან თანამშრომლობის გაგრძელების სურვილი გამოთქვა. შეხვედრას სამინისტროს შესაბამისი უწყებების, ასევე, სომხეთის და აზერბაიჯანის რესპუბლიკის სატყეო სექტორის წარმომადგენლები ესწრებოდნენ.
#

საქართველოს სოფლისა და სოფლის მეურნეობის განვითარების ხელშეწყობისთვის ორი მილიონი ევროს ღირებულების ახალი პროექტი იწყება

საქართველოს გარემოს დაცვისა და სოფლის მეურნეობის სამინისტრო, გაეროს სურსათისა და სოფლის მეურნეობის ორგანიზაციასთან (FAO) ერთად, სოფლისა და სოფლის მეურნეობის განვითარების ხელშემწყობ ახალ პროექტს იწყებს. პროექტს ავსტრიის თანამშრომლობა განვითარებისთვის (ADC) ორი მილიონი ევროთი დააფინანსებს. ახალი პროექტი მიზნად ისახავს საქართველოში სოფლის განვითარების პოლიტიკის შემუშავებას, ღირებულებათა ჯაჭვის გაუმჯობესებას, ბუნებრივი რესურსების მდგრად გამოყენებასა და გარემოსთან თავსებადი სასოფლო-სამეურნეო პრაქტიკის განვითარებას. ღონისძიება გარემოს დაცვისა და სოფლის მეურნეობის მინისტრის პირველმა მოადგილე გიორგი ხანიშვილმა გახსნა. მინისტრის პირველმა მოადგილემ მადლობა გადაუხადა დონორ ორგანიზაციებს მხარდაჭერისთვის და პროექტის მნიშვნელობაზე გაამახვილა ყურადღება.  „ქვეყანაში თითოეული ახალი პროექტის ინიცირება სოფლისა და სოფლის მეურნეობის განვითარების ხელშეწყობას ნიშნავს. ასეთი პროექტები აძლიერებს ფერმერთა შესაძლებლობებს, ზრდის რეგიონების კონკურენტუნარიანობას, ხელს უწყობს მათი პოტენციალის წარმოჩენას. ვფიქრობ, პროექტი ეფექტიანი იქნება და მეტ ახალგაზრდას გაუჩენს აგრარულ დარგში საქმიანობის სურვილს“, - განაცხადა გიორგი ხანიშვილმა. ღონისძიების მონაწილეებს მისასალმებელი სიტყვით გაეროს სურსათისა და სოფლის მეურნეობის ორგანიზაციის (FAO) წარმომადგენელმა საქართველოში, მამუკა მესხმა და ავსტრიის განვითარება თანამშრომლობისთვის (ADC) წარმომადგენლობის ხელმძღვანელმა სამხრეთ კავკასიაში, გერჰარდ შაუმბერგერმა მიმართეს. სოფლის მეურნეობისა და სოფლის განვითარების პროექტი ოთხწლიანია. მის ფარგლებში დაგეგმილია, როგორც ფერმერთა საინფორმაციო-საკონსულტაციო ცენტრების გაძლიერება, ასევე კონკრეტულ მუნიციპალიტეტებში ფერმერებისთვის სასოფლო-სამეურნეო გრანტების გაცემა.  გრანტების გაცემის საპილოტე მუნიციპალიტეტებად რაჭა-ლეჩხუმისა და ქვემო სვანეთის რეგიონში  ონისა და ცაგერის, ხოლო  შიდა ქართლის რეგიონში - ხაშურისა და გორის მუნიციპალიტეტები შეირჩა. გრანტები მიმართული იქნება ფერმერების კონკურენტუნარიანობის გაძლიერებისა და აგროწარმოებით გამოწვეული კლიმატის ცვლილების შემცირებისკენ, რაც გათვალისწინებულია საქართველოს სოფლისა და სოფლის მეურნეობის განვითარების ეროვნული სტრატეგიებით. პროექტის პრეზენტაციას დაინტერესებული მხარეები და პოტენციური ბენეფიციარები ესწრებოდნენ. ღონისძიების ფარგლებში  გაიმართა სამუშაო შეხვედრაც, სადაც პროექტის ტექნიკური საკითხები და  განსახორციელებელი ღონისძიებები  განიხილეს.
#

ლევან დავითაშვილი თავისუფალი უნივერსიტეტის სტუდენტებს შეხვდა

„სოფლის მეურნეობის განვითარების მხარდამჭერი პროგრამების მეტი პოპულარიზაციისა და მოქნილი კომუნიკაციისთვის, მნიშვნელოვანია ჩვენი ახალგაზრდა თაობის ჩართულობა, მათი მოსაზრებებისა და ხედვების გაცნობა“, - ამის შესახებ გარემოს დაცვისა და სოფლის მეურნეობის მინისტრმა, ლევან დავითაშვილმა, თავისუფალი უნივერსიტეტის ბიზნესსკოლის მეორე კურსის სტუდენტებთან შეხვედრის შემდეგ განაცხადა.  შეხვედრაზე სტუდენტებმა სახელმწიფოს მიერ ფერმერებისათვის განკუთვნილი პროგრამების საკომუნიკაციო კამპანიაზე მათ მიერ მომზადებული პრეზენტაციები წარადგინეს.  ლევან დავითაშვილმა სტუდენტებს მადლობა გადაუხადა და სამომავლოდ თანამშრომლობა შესთავაზა. „ჩვენ მჭიდროდ ვითანამშრომლებთ სტუდენტებთან. შეიძლება ითქვას, რომ ახალგაზრდებს ერთგვარი პარტნიორი ეყოლებათ პროექტების მართვის სააგენტოს სახით. ისინი სტაჟირების ფორმატში ითანამშრომლებენ სააგენტოსთან ჩვენი პროექტების პოპულარიზაციაში მიიღებენ მონაწილეობას“, - განაცხადა ლევან დავითაშვილმა. სტუდენტებთან შეხვედრას გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი, მინისტრის მრჩეველი დავით მარკოზაშვილი, პროექტების მართვის სააგენტოს ხელმძღვანელი პაატა შეყელაძე და ღვინის ეროვნული სააგენტოს ხელმძღვანელი ლევან მეხუზლა ესწრებოდნენ.
#

მსოფლიო ბანკმა საქართველოს მელიორაციას სატრანსპორტო საშუალებები გადასცა

„მსოფლიოს ბანკის მიერ გადმოცემული ტექნიკა, „საქართველოს მელიორაციის“ საქმიანობის ეფექტიანი წარმართვისთვის მეტად მნიშვნელოვანია,“ - ამის შესახებ გარემოს დაცვისა და სოფლის მეურნეობის მინისტრმა ლევან დავითაშვილმა განაცხადა ღონისძიებაზე, სადაც მსოფლიო ბანკმა „ირიგაციისა და მიწის ბაზრის განვითარების პროგრამის" ფარგლებში შპს „საქართველოს მელიორაციას“ 25 ერთეული „რენოს“ მარკის ავტომანქანა, სპეციალური ეკიპირება და კომპიუტერული ტექნიკა გადასცა.  „მელიორაციის კომპანიამ მსოფლიო ბანკის პროექტის ფარგლებში სრულად განაახლა ავტოპარკი, რაც ძალზედ მნიშვნელოვანია. აღსანიშნავია, რომ საირიგაციო არხების აღდგენისა თუ ირიგაციის გამართული სამუშაოებისთვის კომპანიის რებრედინგი საქმიანობის წარმართვას კიდევ უფრო ეფექტიანს გახდის.“ - განაცხადა ლევან დავითაშვილმა.  სატრანსპორტო საშუალებებისა და სპეციალური ეკიპირების „საქართველოს მელიორაციისთვის“ გადაცემის ღონისძიებას გარემოს დაცვისა და სოფლის მეურნეობის მინისტრის მოადგილეები, შპს “საქართველოს მელიორაციის“ გენერალური დირექტორი ოთარ შამუგია, მსოფლიო ბანკის ადგილობრივი წარმომადგენელი, პროექტის მენეჯერი ლალი დურმიშიძე და კომპანიის თანამშრომლები დაესწრნენ.  საქართველოს გარემოს დაცვისა და სოფლის მეურნეობის სამინისტროს შპს „საქართველოს მელიორაცია“ 2015 წლიდან მსოფლიო ბანკის დაფინანსებით, როგორც სამელიორაციო ინფრასტრუქტურის რეაბილიტაციის, ისე ტექნიკური აღჭურვილობის უზრუნველყოფის მიზნით, 45 მლნ აშშ დოლარის ღირებულების პროექტს ახორციელებს.  დღეისათვის დასრულებულია ქვემო სამგორის, ზედა რუსა და ტბისი კუმისის საირიგაციო  სისტემების მაგისტრალური არხების სარეაბილიტაციო-აღდგენითი სამუშაოები; ამჟამად აღნიშნული სისტემების შიდა სამეურნეო ქსელებზე მიმდინარეობს საპროექტო სამუშაოები, რომელიც 2019 წლის ბოლოსთვის დასრულდება.  „ირიგაციისა და მიწის ბაზრის განვითარების პროგრამა” შპს „საქართველოს მელიორაციის“ ინსტიტუციონალურ განვითარებას უწყობს ხელს, რაც ტექნიკური აღჭურვილობის უზრუნველყოფას, ეროვნული მოდერნიზაციის გეგმის შემუშავებას, წყალმომხმარებელთა ორგანიზაციების შექმნის ხელშეწყობასა და შესაბამისი საკანონმდებლო ბაზის მომზადებას ითვალისწინებს.