#

სოფლის მეურნეობის სფეროში კვიპროსთან ურთიერთგაგების მემორანდუმს გაფორმდა

გარემოს დაცვისა და სოფლის მეურნეობის მინისტრმა, ლევან დავითაშვილმა და კვიპროსის რესპუბლიკის საგარეო საქმეთა მინისტრმა, ნიკოს ხრისტოდულიდისმა სოფლის მეურნეობის სფეროში ურთიერთგაგების მემორანდუმს მოაწერეს ხელი.  ორმხრივი დოკუმენტის ხელმოწერის ცერემონია საქართველოს სახელმწიფო ცერემონიების სასახლეში გაიმართა. ურთიერთგაგების მემორანდუმის მიზანია, უზრუნველყოს მხარეებს შორის თანამშრომლობის განვითარება, რომელიც მიზნად ისახავს სოფლის მეურნეობის სფეროში ერთობლივი საქმიანობისა და პროექტების განხორციელებას. „კვიპროსთან, როგორც ტურისტულად კარგად განვითარებულ ქვეყანასთან, აგროსასურსათო მიმართულებით სავაჭრო ურთიერთობის გაზრდა ძალიან მნიშვნელოვანია. ასევე მნიშვნელოვანია მევენახეობა-მეღვინეობის სექტორში თანამშრომლობა, რადგან განვითარების ტენდენცია მზარდია.  ჩვენ საშუალება გვაქვს ვენახის ისეთი ქართული ჯიშები შევთავაზოთ კვიპროსის მხარეს, რომლებიც მათ რთულ კლიმატურ პირობებს კარგად შეეგუება. ასე რომ, ორ ქვეყანას შორის თანამშრომლობის რეალური პერსპექტივა რამდენიმე მიმართულებით არსებობს და  პრიორიტეტულია“, - განაცხადა ლევან დავითაშვილმა. კვიპროსის დელეგაცია, პრეზიდენტის, ნიკოს ანასტასიადისის ხელმძღვანელობით, საქართველოში ოფიციალური ვიზიტით პირველად იმყოფება.  ვიზიტის ფარგლებში კვიპროსის რესპუბლიკის პრეზიდენტი საქართველოს პრეზიდენტ სალომე ზურაბიშვილს შეხვდა. დღესვე დაგეგმილია შეხვედრები პრემიერ-მინისტრთან, მამუკა ბახტაძესთან  და პარლამენტის თავმჯდომარესთან, ირაკლი კობახიძესთან.
#

სოფლის მეურნეობის და სოფლის განვითარების 2021-2027 წლების სტრატეგიის საჯარო განხილვის მიზნით შეხვედრა გაიმართა

გარემოს დაცვისა და სოფლის მეურნეობის მინისტრის პირველმა მოადგილემ, გიორგი ხანიშვილმა სოფლის მეურნეობის და სოფლის განვითარების 2021-2027 წლების სტრატეგიის საჯარო განხილვის მიზნით გამართული შეხვედრა მისასალმებელი სიტყვით გახსნა.გიორგი ხანიშვილის განცხადებით, უმნიშვნელოვანესია სოფლის მეურნეობისა და სოფლის განვითარების სტრატეგიების გაერთიანების შედეგად მიღებული ახალი სტრატეგიის სამუშაო ვერსიის დაინტერესებულ მხარეებთან ერთად განხილვა, რაც საჯაროობის პრინციპის დაცვით, სრულყოფილი დოკუმენტის შემუშავებას უზრუნველყოფს.როგორც მინისტრის პირველმა მოადგილემ განაცხადა, სტრატეგიის სამუშაო ვერსია მდგრადი განვითარების პრინციპებზე დაყრდნობით, სოფლად ეკონომიკური შესაძლებლობების განვითარებას, სოციალური მდგომარეობის გაუმჯობესებას და სასურსათო უსაფრთხოების უზრუნველყოფას ითვალისწინებს.როგორც შეხვედრაზე აღინიშნა, სოფლის მეურნეობის და სოფლის განვითარების 2021-2027 წლების სტრატეგიის ძირითად სტრატეგიულ მიმართულებებს - სასოფლო-სამეურნეო და არასასოფლო-სამეურნეო სექტორების კონკურენტუნარიანობის ამაღლება, სოციალური მდგომარეობის გაუმჯობესება, ბუნებრივი რესურსების რაციონალური გამოყენება და კლიმატის ცვლილებასთან ადაპტაცია ასევე, სურსათის, ვეტერინარიის და მცენარეთა დაცვის სისტემების გაუმჯობესება წარმოადგენს.ღონისძიებაზე სოფლის მეურნეობის და სოფლის განვითარების 2021-2027 წლების სტრატეგიის ძირითადი მიმართულებების პრეზენტაცია პოლიტიკისა და ანალიტიკის დეპარტამენტის ხელმძღვანელმა, ეკატერინე ზვიადაძემ წარმოადგინა.შეხვედრა საინტერესო დისკუსიით დასრულდა, რომელსაც სამთავრობო, არასამთავრობო, სამოქალაქო სექტორის, დონორი ორგანიზაციების და ადგილობრივი განვითარების ჯგუფების (LAG) წარმომადგენლები ესწრებოდნენ.
#

ლევან დავითაშვილი რომში, FAO-ს გენერალური დირექტორობის კანდიდატთა წინასაარჩევნო პროგრამების პრეზენტაციას დაესწრო

საქართველოს გარემოს დაცვისა და სოფლის მეურნეობის მინისტრი ლევან დავითაშვილი რომში, გაეროს სურსათისა და სოფლის მეურნეობის ორგანიზაციის (FAO) გენერალური დირექტორის ვაკანტურ თანამდებობაზე ქვეყნების მიერ წარდგენილი კანდიდატების წინასაარჩევნო პროგრამების პრეზენტაციას დაესწრო. გაეროს სურსათისა და სოფლის მეურნეობის ორგანიზაციის საბჭოს სხდომაზე  საქართველოს მიერ წარდგენილმა კანდიდატმა საკუთარ გამოსვლაში ორგანიზაციის რეფორმირების აუცილებლობას, პროფესიონალი, მაღალკვალიფიციური კადრების მობილიზების მნიშვნელობას, ორგანიზაციის დეცენტრალიზაციისა და გარემოსდაცვითი და სასურსათო უსაფრთხოების სისტემების გაძლიერების აუცილებლობას გაუსვა ხაზი. აღსანიშნავია, რომ რომში, პოლიტიკის სწავლებათა ინსტიტუტში,  „ჩეთემ ჰაუსის“ ფორმატში, FAO-ს გენერალური დირექტორობის ქართველი და ფრანგი კანდიდატების დებატები გაიმართა თემაზე „სასურსათო უსაფრთხოების მიღმა“. დებატების მიზანია, ხელი შეუწყოს კანდიდატთა წინასაარჩევნო პროგრამების გამჭვირვალობას, საზოგადოების ჩართულობასა და ცნობადობის გაზრდას. დებატები მაღალი ინტერესის საგანს წარმოადგენდა და მასში მონაწილეობდნენ არასამთავრობო სექტორის, აკადემიური წრეების, FAO-ს წევრი ქვეყნების მუდმივი წარმომადგენლები და აკრედიტებული მედია. „ქართველი კანდიდატის წარდგენა FAO-ს გენერალური დირექტორის თანამდებობაზე არის არამხოლოდ საქართველოს, არამედ რეგიონისთვის პირველი პრეცედენტი. მინდა იმედი გამოვთქვა, რომ წევრი ქვეყნები მხარს დაუჭერენ კომპეტენტურ, მაღალი კვალიფიკაციის მქონე და რეფორმებზე ორიენტირებულ კანდიდატს, რაც უზრუნველყოფს მსოფლიოს ყველა რეგიონის თანაბარ წარმომადგენლობას სიღარიბის დაძლევის და სურსათზე თანაბარი ხელმისაწვდომობის მიმართულებით“, - განაცხადა გარემოს დაცვისა და სოფლის მეურნეობის მინისტრმა, ლევან დავითაშვილმა.როგორც საქართველოს საგანგებო და სრულუფლებიანმა ელჩმა იტალიის რესპუბლიკაში კონსტანტნე სურგულაძემ აღნიშნა, საქართველოს კანდიდატს შეუძლია ღირსეულად წარადგინოს ქვეყანა საერთაშორისო ასპარეზზე და აღნიშნული ორგანიზაციის განვითარების მიმართულებით საკუთარი ხედვა გააცნოს აკადემიური, პოლიტიკურ წრეებისა და მედიის წარმომადგენლებს.საერთაშორისო აგროსასურსათო კავშირის განვითარებისა და პოლიტიკის მრჩეველმა, ბრაიან ბოლდუინმა ქართველი კანდიდატის შეფასებისას აღნიშნა, რომ განსაკუთრებით მნიშვნელოვანი იყო კანდიდატის ხედვა კერძო სექტორის როლზე, რაც დაკავშირებულია როგორც სურსათის წარმოების, ისე სურსათის უვნებლობის, მცირე და საშუალო ფერმერების როლზე სასურსათო სისტემების გაძლიერებაში; ასევე, მისი დამოკიდებულება ორგანიზაციის გამჭვირვალობის საკითხზე, რაც ხელს შეუწყობს FAO-ს ორგანიზაციულ გაძლიერებასა და მენეჯმენტის როლის წარმოჩენას. FAO-ს გენერალური დირექტორის არჩევნები ივნისში გაიმართება. აღნიშნულ თანამდებობაზე კენჭს იყრიან საქართველოს, ჩინეთის, საფრანგეთისა და ინდოეთის წარმომადგენლები.
#

საქართველოში საკონსერვაციო შეთანხმებებს მოეწერა ხელი

ადიგენის ახალგაზრდულ ცენტრში, ხელი მოეწერა 1,200,000 ლარის ღირებულების საკონსერვაციო შეთანხმებებს, რომლებიც ეკო-კორიდორების ფონდის (ECF) ფარგლებში, ბუნების დაცვის მსოფლიო ფონდსა (WWF) და ბოლაჯურის, ჩორჩნის, ზანავის, ხევაშენის, ფხეროს და კიკიბოს სათემო კავშირებს შორის გაფორმდა.ღონისძიებას გარემოს დაცვისა და სოფლის მეურნეობის მინისტრის მოადგილე იური ნოზაძე ესწრებოდა.„დაცულ ტერიტორიებს შორის არსებულ  სივრცეში ეკო-კორიდორის მოწყობა, შესაძლებლობას მოგვცემს ტერიტორიაზე არსებული განსაკუთებული მნიშვნელობის ჰაბიტატების დაცვის, რაც ძალიან მნიშვნელოვანია ჩვენი, როგორც ბიომრავალფროვნებით მდიდარი ქვეყნისთვის. პროექტში სამინისტროსთან და დონორ ორგანიზაციებთან ერთად, ჩართული იქნება ადგილობრივი მოსახლეობა და ვფიქრობ, ერთიანი ძალებით უფრო მეტად შევძლებთ ჩვენი ქვეყნის უნიკალური ბუნების ფლორისა და ფაუნის დაცვასა და შენარჩუნებას“, - განაცხადა იური ნოზაძემ.პროექტის ერთ-ერთი მთავარი მიზანია გარემოს დაცვისა და სოფლის მეურნეობის სამინისტროსთან, ადგილობრივ მოსახლეობასა და თვითმმართველობასთან მჭიდრო თანამშრომლობით, ეკოლოგიური კორიდორის ფარგლებში, მდგრადი მიწათ და ტყით სარგებლობის პრაქტიკის დანერგვა. აღნიშნული საქმიანობა ბუნების კონსერვაციასთან ერთად, უზრუნველყოფს მოსახლეობის არსებული სოციალურ-ეკონომიკური მდგომარეობის შენარჩუნებას ან ხშირ შემთვევაში, მის გაუმჯობესებას.  პროგრამის ფარგლებში უკვე ხელმოწერილია ოთხი ათწლიანი საკონსერვაციო შეთანხმება - დერცელის, მოხის, ნამინაურისა და ციხისუბნის სათემო კავშირებთან, რომელთა საერთო ბიუჯეტი 2,250,000 (751 000 ევრო) ლარზე მეტია. საკონსერვაციო არეალის ფართობი კი შეადგენს დაახლოებით 8700 ჰა-ს.ხელმოწერის ცერემონიალის შემდეგ, სტუმრებს საშუალება ჰქონდათ მოენახულებინათ საკონსერვაციო არეალი და დაეთვალიერებინათ 2018 წელს გაფორმებული ხელშეკრულებით, თემების მიერ საკონსერვაციო შეთანხმების ფარგლებში გათვალისწინებული პირველადი ინვესტიციით შეძენილი საველე ტექნიკა/აღჭურვილობა, რაც საჭიროა საკონსერვაციო გეგმით გათვალისწინებული აქტივობების შესასრულებლად.ეკო-კორიდორების ფონდი კავკასიაში (ECF) წარმოადგენს გრძელვადიან ფინანსურ ინსტრუმენტს, რომელიც გრძელვადიანი საკონსერვაციო ხელშეკრულებების საშუალებით, უზრუნველყოფს ბიომრავალფეროვნების კონსერვაციას სამხრეთ კავკასიაში არსებულ ლანდშაფტებში. ღონისძიებას სამთავრობო და არასამთავრობო ორგანიზაციების, გერმანიის საელჩოს, გერმანიის ეკონომიკური განვითარების და თანამშრომლობის სამინისტროს (BMZ), გერმანიის რეკონსტრუქციის საკრედიტო ბანკის (KfW) წარმომადგენლები ესწრებოდნენ.პროგრამა ხორციელდება ბუნების დაცვის მსოფლიო ფონდის (WWF) კავკასიის ოფისის მიერ საქართველოში, სომხეთსა და აზერბაიჯანში სხვადასხვა სამთავრობო თუ არასამთავრობო ორგანიზაციებთან მჭიდრო თანამშრომლობით. ხელმოწერის ღონისძიება გერმანიის ეკონომიკური თანამშრომლობისა და განვითარების სამინისტროს (BMZ), გერმანიის რეკონსტრუქციის საკრედიტო ბანკის (KfW) ფინანსური მხარდაჭერითა და გერმანიის WWF-ის თანადაფინანსებით გაიმართა. პროექტს საკონსულტაციო მომსახურებას უწევს „GOPA Consultants“, „DFS“ და „HessenForst“-ის კონსორციუმი.
#

იტალიის მთავრობამ საქართველოს 2 მილიონი ევრო გამოუყო

 ატმოსფერული ჰაერის ხარისხზე დაკვირვების ახალი სადგურების შეძენისა და ქ. თბილისის ბუნებრივი საფრთხეების რისკების დეტალური შესწავლისათვის იტალიის მთავრობამ 2 მილიონი ევრო გამოყო. საქართველოს გარემოს დაცვისა და სოფლის მეურნეობის მინისტრის მოადგილე ნინო თანდილაშვილი სამინისტროს წარმომადგენლებთან ერთად, საქართველოში ვიზიტად მყოფ იტალიელ ექსპერტთა ჯგუფს შეხვდა. ვიზიტის მიზანია იტალიის რესპუბლიკის გარემოს, ხმელეთისა და ზღვის სამინისტროსა და  საქართველოს გარემოსა და ბუნებრივი რესურსების დაცვის სამინისტროს შორის  გაფორმებული მემორანდუმის ფარგლებში, ქართული მხრისთვის გარემოს დაცვის სფეროში ფინანსური დახმარება.  ურთიერთანამშრომლობის ფარგლებში დაგეგმილია ჰაერის ხარისხის მონიტორინგის ახალი სადგურების შეძენა და ატმოსფერული ჰაერის მოდელირებისა დაპროგნოზირების სისტემის დანერგვა იტალიის გამოცდილების გაზიარებით,  ასევე ქ. თბილისის ტერიტორიის ფარგლებში მდინარე მტკვრისა და მისი შენაკადების აუზებში ჰიდროლოგიური და გეოლოგიური კვლევების განხორციელება. აღსანიშნავია, რომ ჰაერის ხარისხის მონიტორინგის ქსელის გაფართოება კვლავ რჩება სამინისტროს ერთ-ერთ ძირითად პრიორიტეტად. მონიტორინგის გაძლიერების ფარგლებში იგეგმება 5 ახალი თანამედროვე, ევროპული სტანდარტებით აღჭურვილი ჰაერის მონიტორინგის სადგურის შეძენა და ინსტალირება, რაც ხელს შეუწყობს გარემოს ეროვნულ სააგენტოს მონიტორინგის ქსელის გაფართოებას, ხოლო მოდელირების საშუალებით შესაძლებელი იქნება სხვადასხვა არეალებში ჰაერის  ხარისხის მდგომარეობის შეფასება. ასევე მოხდება საველე კვლევების საფუძველზე მიღებული ინფორმაციის დამუშავება და საკვლევ ტერიტორიაზე არსებული ჰიდრომეტეოროლოგიური და გეოლოგიური საფრთხეების შეფასება.იტალიელი ექსპერტების ვიზიტი 12 აპრილამდე გაგრძელდება, ვიზიტის ფარგლებში დაგეგმილია უცხოელი ექსპერტებისა და გარემოს ეროვნული სააგენტოს სპეციალისტების ერთობლივი საველე გასვლები, ატმოსფერული ჰაერის მინიტორინგის ავტომატური საგურების დათვალიერება და სამუშაო პროცესის ადგილზე გაცნობა, ჰიდრომეტეოროლოგიური და გეოლოგიური საფრთხეების კუთხით უკიდურესად დაძაბული, მდ. ვერეს და ლეღვთახევის  ხეობების შეფასება.შეხვედრას გარემოს ეროვნული სააგენტოს, ქ. თბილისის მერიის და თბილისის სახელმწიფო უნივერსიტეტის წარმომადგენლები ესწრებოდნენ. 
#

მეთხილე ფერმერებისთვის შესაწამლი აპარატების დარიგება იწყება

გარემოს დაცვისა და სოფლის მეურნეობის სამინისტრომ „თხილის გადარჩენის პროგრამის“ ფარგლებში, თხილის მწარმოებელთა ასოციაციას შესაწამლი აპარატები გადასცა. პირველ ეტაპზე  ასოციაციას 100 შესაწამლი აპარატი გადაეცა. პროგრამის ფარგლებში სულ 2000 აპარატის გადაცემაა დაგეგმილი.თხილის მწარმოებელთა ასოციაციამ, შესაწამლი აპარატების დარიგება, სამეგრელოში დღეიდან  დაიწყო  და გურიასა და იმერეთში გააგრძელებს.   შესაწამლი აპარატების გადაცემას ზუგდიდის მუნიციპალიტეტის სოფელ ნაცატუში გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი და სამეგრელო-ზემო სვანეთის სახელმწიფო რწმუნებული ალექსანდრე მოწერელია დაესწრნენ.  ფერმერებმა მიიღეს ინფორმაცია  აპარატის გამოყენებისა და თხილის შეწამვლის მეთოდების შესახებ. „შესაწამლი აპარატების გადაცემა მნიშვნელოვანია, რადგან ამით დავეხმარებით მეთხილეებს მოსავლიანობის გაზრდაში. თავის მხრივ, ფერმერთა დაინტერესებაც საკმაოდ მაღალია. გასულმა წელმა დადებითი შედეგი მოიტანა, წარმატებული იყო აზიურ ფაროსანასთან ბრძოლა, მაგრამ სამწუხაროდ, ფერმერთა ნაკლები ჩართულობის გამო ვერ მივიღეთ თხილის ის მოსავალი, როგორიც სასურველი იყო. ფერმერთა მოსავალი არის ძალზე აქტუალური და ვფიქრობ, მიმდინარე წელი იქნება გარდამტეხი წელი თხილის წარმოების თვალსაზრისით“, - განაცხადა გიორგი ხანიშვილმა. თხილის მოსავლის გადარჩენის კამპანია გადამწყვეტ ეტაპზე  გადადის და მიზნად ისახავს თხილში გავრცელებულ სოკოვან დაავადებებთან და მავნებლებთან ბრძოლას, ფერმერების ცნობიერების ამაღლებას, რაც ხელს შეუწყობს მაღალი ხარისხის მოსავლის მიღებას. „თხილის დაცვის პროგრამის“ ფარგლებში, სახელმწიფოს და ასოციაციის მონაწილეობით შემუშავებულია კომპლექსური ღონისძიებების გეგმა, რომელიც მეთხილე ფერმერებს საშუალებას მისცემს, მავნებლების და სოკოვანი დაავადებების წინააღმდეგ აგროსამუშაოები დროულად და ეფექტიანად ჩაატარონ, რათა თავიდან აიცილონ თხილის მოსავლის დაზიანება და ეკონომიკური ზარალი. თხილის მწარმოებელთა ასოციაცია ფერმერების უმსხვილესი გაერთიანებაა. ამჟამად „თხილის  გადარჩენის პროგრამაში“ უკვე 15 000-მდე ფერმერია ჩართული. ჯგუფებად დაყოფილ ფერმერებს ჰყავთ საკუთარი ლიდერები, რომლებიც პროცესს ზედამხედველობას გაუწევენ. გარდა აპარატებით უზრუნველყოფისა, თხილის მოსავლის გადარჩენის პროექტის ფარგლებში, ფერმერებს საშუალება აქვთ, შეღავათიანი პირობებით შეიძინონ სასუქი პრეპარატები და პესტიციდები. ასოციაციის აგრონომები ზედამხედველობას გაუწევენ აგროღონისძიებების ხარისხიანად ჩატარებას, რაც მაღალი ხარისხის თხილის მოსავლის მიღების წინაპირობაა.
#

საერთაშორისო კონფერენცია „სოფლის განვითარების პოლიტიკა 2020+ - ევროპული პრაქტიკის დანერგვა საქართველოში“ ფარგლებში, გარემოს დაცვისა და სოფლის მეურნეობის მინისტრმა ლევან დავითაშვილმა „სოფლის განვითარების 2017-2020 წლების სტრატეგია“ შესრულების ანგარიში წარმოადგინა

ლევან დავითაშვილმა აღნიშნა სტრატეგიაში განსაზღვრული სამი პრიორიტეტული მიმართულების -  სოფლად კონკურენტუნარიანობის ზრდის, სოციალური დონის ამაღლების და გარემოს დაცვისა და ბუნებრივი რესურსების მდგრადი განვითარების კომპონენტის შესახებ და საზოგადოებას თითოეული მიმართულებით განხორციელებული პროექტები გააცნო.მინისტრის განცხადებით, შედეგები სამივე მიმართულებით მნიშვნელოვანია, თუმცა, მეტი ფინანსური რესურსია საჭირო მეტად ეფექტიანი შედეგისთვის.მინისტრმა სტრატეგიის შესრულების ნაწილში, დონორი ორგანიზაციების და არასამთავრობო სექტორის მიერ ფინანსური დახმარების მნიშვნელობაზე ისაუბრა და მადლობა გადაუხადა მხარდაჭერისთვის. „ ახალგაზრდა მეწარმე ერთ-ერთი ასეთი დონორული დახმარების პროექტი იყო, რომელიც IFAD-ის მხარდაჭერით და დანიის მთავრობის ფინანსური დახმარებით  განხორციელდა. მნიშვნელოვანია, რომ საგრანტო დაფინანსებით,  სოფლად ეკონომიკური საქმიანობების წახალისების მიზნით   ჩვენ 114 ახალგაზრდა მეწარმე  დავაფინანსეთ. აქვე, მინდა მოგახსენოთ, რომ ახალგაზრდული პოლიტიკის ნაწილი ახალ სტრატეგიულ დოკუმენტში მნიშვნელოვნად იქნება წარმოდგენილი“ - განაცხადა ლევან დავითაშვილმა. მინისტრმა ანგარიშის წარდგენისას ყურადღება მრავალწლიანი კულტურების  გაშენების და სამელიორაციო პროექტების პრიორიტეტულობის საკითხზე გაამახვილა.„ ჩვენ დავიწყეთ  არსებული სარწყავი სისტემების რეაბილიტაცია, რაც ქვეყანაში 60-70-იანი წლების შემდეგ არ მომხდარა. შედეგად, მხოლოდ ბოლო ორი წლის განმავლობაში, დამატებით გასარწყავიანებული  6600 ჰექტარი მივიღეთ.  მოგეხსენებათ,  სულ ცოტა ხნის წინ პრემიერს ჰქონდა მნიშვნელოვანი ახალი პროექტი, წყალსაცავების აშენების მიმართულებით. ყოველ წელს სახელმწიფო მნიშვნელოვან რესურსებს ხარჯავს არსებული ინფრასტრუქტურის რეაბილიტაციის მოწყობის კუთხით.“- განაცხადა მინისტრმა.ლევან დავითაშვილმა შესაბამისი სახელმწიფო უწყებების ჩართულობით, აგროტურიზმის, ტურიზმის და კულტურული მემკვიდრეობის მიმართულებით არსებულ ხელისშემწყობ პროექტებზე ისაუბრა და ყურადღება სასტუმროების შექმნის და სამუზეუმო ინფრასტრუქტურის რეაბილიტაციაზე  მნიშვნელობაზე გაამახვილა.ანგარიშის წარმოდგენისას მინისტრი ასევე შეეხო ქართული ენის გადამზადების პროგრამას, რომლითაც 1150-მა ბენეფიციარმა ისარგებლა. რეგიონებში ინოვაციების განვითარების თემაზე საუბრისას, ლევან დავითაშვილმა ყურადღება ინოვაციების ორი ცენტრის  და  ინოვაციების ჰაბის დაფინანსების საკითხზე გაამახვილა.„განათლება ჩვენი ეკონომიკური განვითარების საფუძველი და ჩვენი მთავარი პრიორიტეტია. ახალი საკანონმდებლო ინიციატივით განათლებას ექნება ძალიან მნიშვნელოვანი დაფინანსება“ - განაცხადა ლევან დავითაშვილმა.ლევან დავითაშვილმა ვრცლად ისაუბრა გარემოს დაცვის პრიორიტეტულობის საკითხზე და ყურადღება ტყის მდგრადი მართვის კუთხით განხორციელებულ რეფორმაზე გაამახვილა.„ქვეყანაში ეკოსისტემის შენარჩუნება არის ძალიან მნიშვნელოვანი პრიორიტეტი, ბუნებრივი რესურსები, რომლებიც ქვეყანას გააჩნია, მდგრადი გამოყენების პირობებში შეიძლება ასრულებდეს მნიშვნელოვან როლს სიღარიბის დაძლევის კუთხით“ - განაცხადა მინისტრმა.საუბარი შეეხო ასევე დაცული ტერიტორიების მნიშვნელობის საკითხს, როგორც მინისტრმა განაცხადა, ქვეყნის  საერთო ფართობის დაახლოებით 10 % დაცული ტერიტორიაა. ლევან დავითაშვილის განცხადებით, არსებობს ამბიციური გეგმა ფართობის ზრდასთან დაკავშირებით, რაშიც ევროკავშირი და საერთაშორისო  თანამეგობრობა სრულ მხარდაჭერას გამოთქვამს. საერთაშორისო კონფერენცია „სოფლის განვითარების პოლიტიკა 2020+  ევროპული პრაქტიკის დანერგვა საქართველოში“ ევროკავშირის (EU) და გაეროს განვითარების პროგრამა (UNDP) მხარდაჭერით გაიმართა.