#

სამცხე-ჯავახეთში მინისტრებმა ტერასული ვენახები მოინახულეს

რეგიონული განვითარებისა და ინფრასტრუქტურის მინისტრი, მაია ცქიტიშვილი და გარემოს დაცვისა და სოფლის მეურნეობის მინისტრი, ლევან დავითაშვილი, ადგილობრივი ხელისუფლების წარმომადგენლებთან ერთად, ასპინძის მუნიციპალიტეტში, სოფელ ჭაჭკარში იმყოფებოდნენ, რომელსაც 2016 წელს საქართველოს მთავრობის დადგენილების თანახმად ეროვნული მნიშვნელობის კულტურის უძრავი ძეგლის სტატუსი მიენიჭა. ჭაჭკარიდან ვარძიის სამეურნეო მარაგის შევსება ხდებოდა - კლდეში ნაკვეთ საწნახელებში კი დიდი რაოდენობის ღვინო იწურებოდა. სოფელში, გარდა დაზიანებული ტერასებისა და 50–მდე კლდეში ნაკვეთი საწნახელისა, შემორჩენილია ოთხსაუკუნოვანი ვაზიც. როგორც რეგიონული განვითარებისა და ინფრასტრუქტურის მინისტრმა, მაია ცქიტიშვილმა აღნიშნა, მნიშვნელოვანია, რომ ჭაჭკარში მესხური ჯიშის ვენახის აღდგენა დაიწყება. რეგიონში ვიზიტის ფარგლებში, მინისტრებმა ასპინძის მუნიციპალიტეტში აღდგენილ ტერასებზე ახლად გაშენებული ვენახები მოინახულეს. ვენახები საერთაშორისო საქველმოქმედო ფონდ „ქართუს“ ფინანსური მხარდაჭერით, სოფლის მეურნეობის სამეცნიერო-კვლევითი ცენტრის ჯიღაურას ბაზაზე დაცული ჯიშებით „თიბისი“ ჯგუფმა აღადგინა. ტერასებზე გაშენებული ვენახი რეგიონისთვის დამახასიათებელ მიკროგარემოს ქმნის. სოფელ ზიკილიაში, მაია ცქიტიშვილმა და ლევან დავითაშვილმა ყურძნის ჯიშების კოლექციონერის, ემზარ გაჩეჩილაძის მიერ ახლად გაშენებული ვენახები დაათვალიერეს, სადაც სანერგე მეურნეობაც არის მოწყობილი, რაც იშვიათი მესხური ჯიშების გავრცელების საშუალებას იძლევა. ემზარ გაჩეჩილაძე გაშენებული მესხური ჯიშის ყურძნისგან - მესხური მწვანე, სამარიებო, ასპინძური შავი და საფარულა ღვინოს ამზადებს და ადგილობრივ ბაზარზე უკეთებს რეალიზებას.მაია ცქიტიშვილის განცხადებით, ყურადღება გამახვილდა იმ პროექტებზე, რომელიც არსებული შესაძლებლობების ბოლომდე ათვისებასა და ისტორიული ადგილების გაცოცხლებას შეუწყობს ხელს. მისივე თქმით, მსგავსი აქტივობა აუცილებელია ვიზიტორების დაინტერესების, ადგილობრივების დასაქმებისა და რეგიონების ეკონომიკური წინსვლისთვის.
#

ესპანეთში მდგრადი ნადირობის მსოფლიო ფორუმი გაიმართა

გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი და ბიომრავალფეროვნებისა და სატყეო პოლიტიკის დეპარტამენტის უფროსი კარლო ამირგულაშვილი ქ. მადრიდში ველური ბუნებისა და ნადირობის საერთაშორისო საბჭოს გენერალური ასამბლეის 65-ე სესიას დაესწრნენ.ღონისძიებები ორგანიზებული იყო ველური ბუნებისა და ნადირობის საერთაშორისო საბჭოს და ესპანეთის სოფლის მეურნეობის, თევზჭერის, სურსათისა და გარემოს დაცვის სამინისტროს მიერ. აღსანიშნავია, რომ საქართველო ნადირობის საერთაშორისო საბჭოს წევრია 2017 წლიდან და პირველად მონაწილეობდა მდგრადი ნადირობის საერთაშორისო ფორუმში. გენერალურ ასამბლეას ესწრებოდნენ პრინცი ხუან (იოანე) ბაგრატიონი და დიპლომატიური კორპუსი. საქართველოს სახელით დელეგატებს სიტყვით მიმართა მინისტრის მოადგილემ - სოლომონ პავლიაშვილმა. ასამბლეის ფარგლებში გაიმართა მდგრადი ნადირობის მსოფლიო ფორუმი, სადაც განხილულ იქნა 2018 წლის სატროფეო ნადირობის კალენდარი, სანადირო ფრინველთა სახეობების, ველურ ცხოველთა დაავადებების, აფრიკული ღორის ცხელების, მგლის პოპულაციის რეგულირების და სხვა ნადირობასთან დაკავშირებული საკითხები. 
#

საინფორმაციო–საკონსულტაციო სამსახურის 5 წლის იუბილე აღინიშნა

გარემოს დაცვისა და სოფლის მეურნეობის სამინისტროს საინფორმაციო–საკონსულტაციო სამსახურის 5 წლის ანგარიშის პრეზენტაციას მინისტრი ლევან დავითაშვილი დაესწრო. საინფორმაციო-საკონსულტაციო სამსახური რეგიონებში აგრარული სექტორის განვითარების ხელშეწყობას ახდენს და სახელმწიფოსა და ფერმერს შორის არსებული შუა რგოლია.ღონისძიებაზე მინისტრმა სიტყვით გამოსვლისას საინფორმაციო–საკონსულტაციო სამსახურის თანამშრომლების საქმიანობის მნიშვნელობაზე ისაუბრა და აღნიშნა, რომ მათი საქმიანობა რეგიონებში, აგრარული სექტორის განვითარების ხელშემწყობია. „სწორედ თქვენი მუშაობით სამინისტრომ ბოლო წლებში შეძლო რთულ ამოცანებთან და გამოწვევებთან გამკალვება, რისთვისაც მადლობას გიხდით, თუმცა, წინ ახალი გამოწვევები გვაქვს. ჩვენ, ევროკავშირის მხარდაჭერით ექსტენციის ახალი სტრატეგია მივიღეთ. მისი დიდი ნაწილი სწორედ საინფორმაციო–საკონსულტაციო სამსახურის გაძლიერებასა და ახალ ეტაპზე გადასვლას ისახავს მიზნად. თქვენ, რეგიონებში ფერმერებს უწევთ დახმარებას და კონსულტაციას, რათა მათი საქმიანობა იყოს მეტად ეფექტიანი. ასევე, ეხმარებით სამინისტროს დაგეგმილი პროექტების შესახებ ფერმერი დროულად იყოს ინფორმირებული, რაც აგრარული სექტორის განვითარებისათვის მეტად მნიშვნელოვანია“, – განაცხადა ლევან დავითაშვილმა.საინფორმაციო–საკონსულტაციო სამსახურის ქსელი 2013 წელს ჩამოყალიბდა. მასში 9 რეგიონალური სამმართველო და 45 საინფორმაციო–საკონსულტაციო სამსახური შედის, რომლის თანმშრომლები ყოველწლიურად, მთელი ქვეყნის მასშტაბით, ათასობით ფერმერს კონსულტაციას უწევენ და მათ სახელმწიფოს მიერ შემუშავებული პროექტების შესახებ აწვდიან ინფორმაციას.ღონისძიებას ყველა რეგიონის საინფორმაციო–საკონსულტაციო სამსახურისა და რეგიონალური სამმართველოს თანამშრომელი ესწრებოდა, რომელთაც წარმატებული საქმიანობისათვის სიგელებიც გადაეცათ.5 წლის ანგარიშის პრეზენტაციას დაესწრნენ გარემოს დაცვისა და სოფლის მეურნეობის მინისტრის მოადგილეები, სოფლის მეურნეობის ყოფილი მინისტრები და საერთაშორისო ორგანიზაციების წარმომადგენლები.
#

ლევან დავითაშვილი ბელარუსში საკუთარ კოლეგას შეხვდა

საქართველოს გარემოს დაცვისა და სოფლის მეურნეობის მინისტრი ლევან დავითაშვილი, ქართული დელეგაციის წევრებთან ერთად, ბელარუსის რესპუბლიკაში იმყოფებოდა. ვიზიტის ფარგლებში, ბელარუსის რესპუბლიკის ვიცე-პრემიერთან, მიხაილ რუსისთან და სოფლის მეურნეობისა და სურსათის მინისტრთან, ლეონიდ ზაიაცთან გამართულ შეხვედრაზე მხარეებმა აგრარულ დარგში თანამშრომლობის პოტენციალის ფარგლებში კონკრეტული მიმართულებები განიხილეს. შეხვედრას ესწრებოდა საქართველოს საგანგებო და სრულუფლებიანი ელჩი საქართველოში, ვალერი კვარაცხელია.ქართული დელეგაციის შემადგენლობაში შედიოდნენ როგორც სახელმწიფო უწყების, ასევე ბიზნესსექტორის წარმომადგენლები.შეხვედრაზე აღინიშნა, რომ საქართველოსა და ბელარუსის რესპუბლიკას შორის სავაჭრო-ეკონომიკური თანამშრომლობის განვითარების მიზნით, ბელარუსის რესპუბლიკის პრეზიდენტის საქართველოში ვიზიტის დროს, ხელი მოეწერა ოქმს.ლევან დავითაშვილის განცხადებით, საქართველო-ბელარუსის ეკონომიკური თანამშრომლობის მთავრობათაშორისი კომისიის ფარგლებში, უკვე არსებობს კონკრეტული მიმართულებები, სადაც განსაზღვრულია თანამშრომლობის შესაძლებლობები.„ჩვენ ვთანამშრომლობთ ბელარუსის რესპუბლიკის სურსათის და სოფლის მეურნეობის სამინისტროსთან მელიორაციის კუთხით, ასევე, სავაჭრო ბრუნვის გაზრდის მიმართულებით; ძალიან მნიშვნელოვანია საქართველოდან სხვადასხვა ხილის და ალკოჰოლური პროდუქციის ექსპორტი გაიზარდოს ბელარუსიის რესპუბლიკაში; ასევე ძალიან მნიშვნელოვანია, ვითანამშრომლოთ ერთობლივი პროექტების განხორციელების კუთხით. საუბარია საქართველოში ერთობლივი საწარმოს შექმნაზე. ასეთი პროექტები ხელს შეუწყობს სავაჭრო ბრუნვის გაზრდას ჩვენს ორ ქვეყანას შორის და იმ სავაჭრო პლატფორმის გამოყენებას, რომელიც საქართველოს გააჩნია“, - განაცხადა ლევან დავითაშვილმა.სოფლის მეურნეობისა და სურსათის მინისტრის, ლეონიდ ზაიაცის განცხადებით, მნიშვნელოვანია საქართველოსა და ბელარუსს შორის აგრარული მიმართულებით თანამშრომლობის გაღრმავება, რისთვისაც კონკრეტული ნაბიჯები უკვე გადადგმულია.ლევან დავითაშვილმა, ქართული დელეგაციის წევრებთან ერთად თანამედროვე სასათბურე მეურნეობა „აგრომირი“, ვიტებსკის მეფრინველეობის ფაბრიკა, რამდენიმე მეცხოველეობის ფერმა, სასაწყობო მეურნეობა დაათვალიერა და საწარმოების ხელმძღვანელებს შეხვდა. 
#

პლასტიკის პარკების რეგულაციის წესები მწარმოებლებს გააცნეს

გარემოს დაცვისა და სოფლის მეურნეობის მინისტრის პირველი მოადგილე ნოდარ კერესელიძე საქართველოში პლასტიკის პარკების იმპორტიორებს, მწარმოებლებს, მსხვილი სუპერმარკეტებისა და ფარმაცევტული კომპანიების ქსელის წარმომადგენლებს შეხვდა.შეხვედრაზე მინისტრის პირველმა მოადგილემ მოწვეულ სტუმრებს ტექნიკური რეგლამენტის პროექტი „პლასტიკის და ბიოდეგრადირებადი პარკების რეგულირების წესი“ გააცნო.ნოდარ კერესელიძის განცხადებით, გაერთიანებული სამინისტროს ერთ-ერთი მთავარი პრიორიტეტი გარემოზე ზრუნვა და მისი დაცვაა.„ჩვენ გვინდა ბიზნესსექტორთან კოორდინირებული თანამშრომლობით შევძლოთ პლასტიკის პარკების გამოყენების შემცირება და შესაბამისად, პლასტიკის პარკებისგან გარემოს დაცვა. გარემოს დაცვაზე ზრუნვა თოთოეული ჩვენგანის ვალდებულებაა და ვფიქრობ, შევძლებთ ეფექტიან თანამშრომლობას“, - განაცხადა ნოდარ კერესელიძემ.გარემოს დაცვისა და სოფლის მეურნეობის სამინისტროში გამართულ შეხვედრას ნარჩენებისა და ქიმიური ნივთიერებების მართვის დეპარტამენტის უფროსი ალვერდ ჩანქსელიანი ესწრებოდა. 
#

შვეიცარია საქართველოში აგრარული დარგის მხარდაჭერას აგრძელებს

გარემოს დაცვისა და სოფლის მეურნეობის მინისტრის პირველი მოადგილე შვეიცარიის განვითარებისა და თანამშრომლობის სააგენტოს გენერალურ დირექტორს (SDC) მანუელ ზაგერს, შვეიცარიის კონფედერაციის საგანგებო და სრულუფლებიან ელჩს საქართველოში ლუკას ბერლინგერს, შვეიცარიის განვითარებისა და თანამშრომლობის სააგენტოს რეგიონულ ხელმძღვანელს ოლივიე ბურკს და სააგენტოს სხვა წარმომადგენლებს შეხვდა. შეხვედრაზე მხარეებმა სამომავლო თანამშრომლობის პერსპექტივები განიხილეს.მინისტრის პირველმა მოადგილემ დეტალურად ისაუბრა სოფლის მეურნეობის სფეროში განხორციელებულ და მიმდინარე პროექტებზე და ხაზი გაუსვა შვეიცარიის ფინანსური და ტექნიკური დახმარების, ასევე, დარგის განვითარებაში ევროკავშირის მხარდაჭერის მნიშვნელობის საკითხებს. ნოდარ კერესელიძემ მანუელ ზაგერს სოფლის მეურნეობის განვითარების სტრატეგია გააცნო და ხაზგასმით აღნიშნა სახელმწიფოსთვის აგრარული დარგის პრიორიტეტულობის საკითხი.მინისტრის პირველმა მოადგილემ ასევე ისაუბრა ცხოველთა იდენტიფიკაცია-რეგისტრაციის პროგრამის მიმდინარეობის შესახებ და აღნიშნა, რომ შვეიცარიასთან თანამშრომლობის ყველა მიმართულება სრულ თანხვედრაშია სოფლის მეურნეობის განვითარების სტრატეგიასთან.შეხვედრაზე საუბარი შეეხო აზიურ ფაროსანასთან ბრძოლის 2018 წლის სტრატეგიულ გეგმას. ნოდარ კერესელიძემ შვეიცარიის განვითარებისა და თანამშრომლობის სააგენტოს გენერალურ დირექტორს მავნებელთან ბრძოლის 2018 წლის დოკუმენტის ძირითადი მიმართულებები გააცნო. „ჩვენთვის უაღრესად მნიშვნელოვანია თქვენი მხარდაჭერა. მოგეხსენებათ, პროფესიული განათლება და სწავლება არის ნებისმიერი დარგის განვითარების წინაპირობა, რასაც აგრარულ სფეროში კიდევ უფრო დიდი მნიშვნელობა ენიჭება“, - განაცხადა ნოდარ კერესელიძემ.„მრავალი წელია შვეიცარია მხარს უჭერს საქართველოს სოფლის მეურნეობის განვითარებას. ჩვენ ვაფასებთ დარგის განვითარების მიზნით განხორციელებულ და მიმდინარე პროგრამებს. შედეგები ნამდვილად თვალსაჩინოა და გიდასტურებთ სრულ მხარდაჭერას“,- განაცხადა მანუელ ზაგერმა.გარემოს დაცვისა და სოფლის მეურნეობის სამინისტროში გამართულ შეხვედრას სურსათის ეროვნული სააგენტოს უფროსის მოადგილე დემნა ხელაია ესწრებოდა.  
#

2018 წლის პირველ კვარტალში ევროკავშირის ქვეყნებთან აგროსასურსათო პროდუქციის ექსპორტი გაზრდილია

2018 წლის პირველ კვარტალში ევროკავშირის ქვეყნებთან აგროსასურსათო პროდუქციის ექსპორტი გაზრდილია. კერძოდ, საქართველოდან ევროკავშირის ქვეყნებში განხორციელდა 42.5 მლნ აშშ დოლარის ღირებულების აგროსასურსათო პროდუქციის ექსპორტი, რაც 37.2%-ით აღემატება 2017 წლის ანალოგიური პერიოდის მაჩვენებელს. 2018 წლის პირველი კვარტლის მთლიან აგროსასურსათო ექსპორტში ევროკავშირის წილი შეადგენს 20.6%-ს.2018 წლის პირველ კვარტალში, საქართველოდან ევროკავშირის ქვეყნებში ძირითადად ექსპორტირებულია: სპირტიანი სასმელები, თხილი, ყურძნის ნატურალური ღვინოები, მინერალური და მტკნარი წყლები, გადამუშავებული თხილი და სხვ.2018 წლის პირველ კვარტალში, წინა წლის შესაბამის პერიოდთან შედარებით, საქართველოდან ევროკავშირში ექსპორტირებული აგროსასურსათო პროდუქციიდან, სპირტიანი სასმელების ექსპორტი გაიზარდა 6.3 მლნ აშშ დოლარით (112%), რაც ექსპორტის ზრდის განმაპირობებელი ძირითადი ფაქტორია, ღვინის ექსპორტი გაიზარდა 1.9 მლნ აშშ დოლარით (62%), მინერალური წყლების ექსპორტი გაიზარდა 0.7 მლნ აშშ დოლარით (21%), ხოლო გადამუშავებული თხილის ექსპორტი გაიზარდა 0.6 მლნ აშშ დოლარით (37%). 2018 წლის პირველი კვარტლის განმავლობაში, 2017 წლის ანალოგიურ პერიოდთან შედარებით, აგროსასურსათო პროდუქციის ექსპორტი ძირითადად გაიზარდა ევროკავშირის წევრ შემდეგ ქვეყნებში: საფრანგეთში (2.7-ჯერ და 6.9 მლნ აშშ დოლარი შეადგინა), ლიტვაში (19%-ით და 5.5 მლნ აშშ დოლარი შეადგინა), ესპანეთში (3.5-ჯერ და 3.7 მლნ აშშ დოლარი შეადგინა) და ნიდერლანდებში (33%-ით და 3.3 მლნ აშშ დოლარი შეადგინა).