#

26 მაისის აღსანიშნავი ღონისძიებები ოზურგეთში

26 მაისს, საქართველოს დამოუკიდებლობის დღესთან დაკავშირებული საზეიმო ღონისძიებების ფარგლებში, გარემოს დაცვისა და სოფლის მეურნეობის სამინისტრო ქალაქ ოზურგეთში არაერთ აქტივობას მართავს. ღონისძიებების კონცეფცია ცოდნის გაზიარება და მისი მნიშვნელობაა.ქალაქ ოზურგეთის ცენტრალურ მოედანზე მისულ სტუმრებს, შესაძლებლობა აქვთ გაეცნონ საქართველოს რეგიონებისთვის დამახასიათებელ კულინარიულ მრავალფეროვნებასა და ტრადიციებს, ხალხური რეწვის ნიმუშებს,  ასევე გარემოს დაცვის სფეროში გამორჩეული და წარმატებული ადამიანების ბიოგრაფიულ მონაცემებს. ღონისძიების ფარგლებში იმართება ქართული ღვინის გამოფენა-გაყიდვა, ბავშვებისთვის მოწყობილია გასართობი სივრცეები, სადაც  სპორტული შეჯიბრებები, მხიარული ვიქტორინები და შემეცნებითი თამაშები ტარდება. ღონისძიებას მოწვეულ სტუმრებთან ერთად, გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი, სახელმწიფო რწმუნებული გურიის მხარეში ზურაბ ნასარაია და ადგილობრივი თვითმმართველობის წარმომადგენლები ესწრებიან.საზეიმო ღონისძიებას განსაკუთრებულ ხიბლს ძენს ნიკო ფიროსმანის ტილოების მიხედვით გაცოცხლებული პერსონაჟები, ცოცხალი ყვავილებით შექმნილი პანო და ფოტოგადაღების კუთხე - ,,გახდი ფიროსმანის მაგიდის სტუმარი“. ღონისძიების სტუმრების განწყობაზე მომღერლები და მუსიკალური ჯგუფები მთელი დღის განმავლობაში ზრუნავენ.ოზურგეთის ცენტრალურ მოედანზე,  ისევე როგორც საქართველოს მთელს ტერიტორიაზე, საქართველოს ეროვნული ჰიმნი შესრულდება. ღონისძიებას “ერისიონის“ გრანდიოზული კონცერტი და ცნობილი ქართველი მომღერლები  დაასრულებენ.
#

გარემოს დაცვისა და სოფლის მეურნეობის სამინისტრო საქართველოს დამოუკიდებლობის დღის საზეიმო ღონისძიებებში მონაწილეობს

26 მაისს, საქართველოს დამოუკიდებლობის დღისადმი მიძღვნილი ღონისძიებები, მთელი საქართველოს მასშტაბით, ერთიანი კონცეფციით „ცოდნას მივყავართ თავისუფლებამდე”  იმართება. საზეიმო ღონისძიებების ფარგლებში, გარემოს დაცვისა და სოფლის მეურნეობის სამინისტრო, ქალაქ თბილისში, რუსთაველის გამზირზე  მოწყობილ სტენდზე ორ განსხვავებულ კუთხეს - მწვანე სივრცესა და ღვინის კუთხეს წარმოადგენს.მწვანე სივრცის კონცეფცია გარემოსდაცვით განათლებასა და ცოდნის გაზიარებას ეფუძნება და აერთიანებს შემეცნებით, საინფორმაციო და გასართობ სივრცეებს. სტენდის სტუმრებს საშუალება ექნებათ მონაწილეობა მიიღონ საგანმანათლებო და გარემოსდაცვით აქტივობებში, თამაშებსა და ვიქტორინებში, გაეცნონ გარემოს დაცვის თემატიკაზე შექმნილ ინსტალაციებს და კონსტრუქციებს. სპეციალურად მოწყობილ სივრცეში, ვირტუალური რეალობის სათვალეების გამოყენებით, მოქალაქეებს შესაძლებლობა მიეცემათ იმოგზაურონ ოკაცეს, კოლხეთის, მაჭახელას, მტირალას, მარტვილის, ალგეთის და ვაშლოვანის ეროვნულ პარკებსა და დაცულ ტერიტორიებზე.  გარემოს დაცვისა და სოფლის მეურნეობის სამინისტროს სტენდზე  მეღვინეობის 8 000-წლიან ისტორიას აერთიანებს ღვინის კუთხე, სადაც წარმოდგენილია არქეოლოგიური გათხრების შედეგად აღმოჩენილი ღვინის ჭურჭელი და საინფორმაციო მასალა მეღვინეობის უწყვეტი ტრადიციის შესახებ. სივრცეში საკუთარ პროდუქცია წარმოდგენილი აქვს  რვა ახალგაზრდა, წარმატებულ მეღვინეს, რომლებიც სტუმრებს მეღვინეობის დარგში საკუთარ გამოცდილებას უზიარებენ. სტენდის სტუმრებს საშუალება აქვთ დააგემოვნონ და შეიძინონ სხვადასხვა სახის ქართული ღვინო.17:10 სთ-ზე, ზუსტად იმ დროს, როდესაც 1918 წელს საქართველოს დამოუკიდებლობა გამოცხადდა, მთელი ქვეყნის მასშტაბით, საქართველოს ჰიმნი შესრულდება. გარემოს დაცვისა და სოფლის მეურნეობის სამინისტროს სტენდზე ეროვნულ ჰიმნს სმენადაქვეითებული მუსიკოსებისგან შემდგარი გუნდი ჟესტების ენაზე შეასრულებს.საქართველოს დამოუკიდებლობის დღისადმი მიძღვნილი ღონისძიებების ფარგლებში, გარემოს დაცვისა და სოფლის მეურნეობის სამინისტროს სტენდები წარმოდგენილია ქალაქებში ოზურგეთი და ახალციხე.  სტენდებზე წარმოდგენილია საქართველოს კონკრეტული რეგიონებისთვის დამახასიათებელი და გამორჩეული პროდუქცია - ღვინო, ყველი, ჩაი, თაფლი და სხვ. საინფორმაციო სტენდებზე ეროვნული პარკების და დაცული ტერიტორიების  შესახებ, შემეცნებითი ლექცია-სემინარები ასევე, ხალხური რეწვის ნიმუშების გამოფენა-გაყიდვა იმართება. 
#

ქართულ-შვეიცარიული წარმატებული თანამშრომლობის შედეგად ევროპული სტანდარტის ხორცპროდუქტების კიდევ ერთი მაღაზია გაიხსნა

„მაღალმთიანი რეგიონების განვითარება და მეცხოველეობის დარგის ხელშეწყობა ძალიან მნიშვნელოვანია ჩვენი ქვეყნისთვის და ამ მიმართულებით,  სახელმწიფო არაერთ პროექტს ახორციელებს. 20-ზე მეტ მუნიციპალიტეტში, სახელმწიფო ახდენს კოოპერატიული მეურნეობების თანადაფინანსებას, რათა გაიზარდოს მათი პროდუქტიულობა  და  მაღალი ხარისხის პროდუქციის წარმოება.  კომპანია „ბლაუენშტაინ-საქართველო“ ქართულ-შვეიცარიული წარმატებული თანამშრომლობის  ნათელი მაგალითია. მაღალმთიან რეგიონში, რაჭაში, კომპანიამ შეძლო შეექმნა კარგი მოდელი, რაც ხორცის წარმოების სრულ ჯაჭვს მოიცავს და ევროპული სტანდარტის ეკოლოგიურად სუფთა, მაღალი ხარისხის პროდუქციის წარმოება უზრუნველყოფს. მნიშვნელოვანია, ქვეყანაში ბევრი ასეთი პროექტი განხორციელდეს, რადგან  ასეთი საწარმოები არის სტიმული მეცხოველეობის დარგის და წარმოების  განვითარებისთვის“,  - აღნიშნა  გარემოს დაცვისა და სოფლის მეურნეობის მინისტრმა, ლევან დავითაშვილმა ქართულ-შვეიცარიული კომპანიის „ბლაუენშტაინი-საქართველოს“ ახალი საფირმო მაღაზიის გახსნაზე.  თანამედროვე სტანდარტების მაღაზიაში, მომხმარებელს უმაღლესი ხარისხის ცოცხალი და „დავარგებული“ ხორცის გარდა, ხორცპროდუქტებისა და ნახევარფაბრიკატების შეძენის საშუალება ექნება. პროდუქცია ყოველგვარი ქიმიური დანამატის გარეშე, ევროპული ხარისხის შესაბამისად მზადდება. პროექტში განხორციელებული ინვესტიცია 2 მლნ ლარს შეადგენს. უნდა აღინიშნოს, რომ კომპანია  უზრუნველყოფს ხორცის წარმოების სრული ჯაჭვის კონტროლს, რაც გულისხმობს პირუტყვის დაბადებიდან მომხმარებლის კალათამდე, პროდუქციის წარმოების სრული ციკლის ევროპული პროტოკოლით მეთვალყურეობას.  ეს კი, პროდუქციის უმაღლეს ხარისხსა და სტანდარტს განაპირობებს. კომპანია პროდუქტის წარმოების ტრადიცულ მეთოდებთან ერთად, თანამედროვე სტანდარტებს წარმატებით ნერგავს. პირველად საქართველოში, ე.წ. „დავარგებული ხორცის“ წარმოება კომპანია „ბლაუენშტაინ საქართველომ“  დაიწყო.   ,,ბლაუენშტაინ საქართველო“ ქართული-შვეიცარიული ინვესტიციით, 2008 წელს, რაჭის რეგიონში შეიქმნა.  კომპანიაში განხორციელებული ინვესტიცია საერთო ჯამში 30 მლნ ლარის შეადგენს. კომპანია ფლობს საუკეთესო ჯიშის საქონლის  ფერმას, პირველადი გადამუშავების საწარმოს და ორ საფირმო მაღაზიას.  პირველი მაღაზია, 2015 წელს, ქალაქ თბილისში   გაიხსნა.
#

გიორგი ხანიშვილი: „საფრანგეთის ფინანსური კონტრიბუცია აგრარული დარგის განვითარებაში უმნიშვნელოვანესია“

„საფრანგეთის მხარის ფინანსური კონტრიბუცია მესაქონლეობის, ხორბლის წარმოების და კოოპერაციული მეურნეობების განვითარებაში უმნიშვნელოვანესია. საფრანგეთი ჩვენი მხარდამჭერი და პარტნიორია“, - განაცხადა გარემოს დაცვისა და სოფლის მეურნეობის მინისტრის პირველმა მოადგილემ, გიორგი ხანიშვილმა საფრანგეთის რესპუბლიკის ილ დე ფრანსის რეგიონული საბჭოს ვიცე-პრეზიდენტთან, ჟერომ შარტიესთან და საქართველოში საფრანგეთის ელჩთან,  პასკალ მენიესთან  გამართულ შეხვედრაზე. შეხვედრაზე მხარეებმა ქვეყნებს შორის დარგობრივი განათლების და კვების მრეწველობის კუთხით თანამშრომლობის პერსპექტივები განიხილეს. გიორგი ხანიშვილმა ჟერომ შარტიეს სოფლის მეურნეობის დარგის განვითარების მხარდამჭერი პროგრამები გააცნო და ყურადღება  დარგის პრიორიტეტულობის საკითხზე გაამახვილა. „საფრანგეთს მდიდარი ეკონომიკა აქვს, თუმცა, საქართველო მდიდარია  წარმატების მიღწევის პოტენციალის მქონე ადამიანებით. ჩვენი დიდი სურვილია, აგრარული დარგის განვითარებით საქართველოს დავეხმაროთ უკეთესი ეკონომიკის მშენებლობაში“, - განაცხადა ჟერომ შარტიემ. ჟერომ შარტიემ დაადასტურა ქვეყნებს შორის მეგობრული და პარტნიორული ურთიერთობების მნიშვნელობის საკითხი და მჭიდრო თანამშრომლობის სურვილი გამოთქვა.
#

ჯავახეთის დაცული ტერიტორიების გაფართოების კანონპროექტი დასამტკიცებლად პარლამენტს გადაეგზავნა

საქართველოს მთავრობამ ჯავახეთის დაცული ტერიტორიების გაფართოების შესახებ კანონპროექტი განიხილა და დასამტკიცებლად პარლამენტს გადაუგზავნა. სამცხე-ჯავახეთის უნიკალური ეკოსისტემების დაცვა მოითხოვს გარემოს დაცვისა და რეგიონის მდგრადი განვითარების ერთიან მიდგომას, რაც შესაძლებელია განხორციელდეს სწორედ დაცული ტერიტორიების გაფართოებით. „ჯავახეთის დაცული ტერიტორიების შექმნისა და მართვის  შესახებ“ კანონპროექტის თანახმად, დაგეგმილია ჯავახეთის დაცული ტერიტორიების გაფართოება 5152 ჰა-ით. გაფართოებული ნაწილი მდებარეობს ნინოწმინდის მუნიციპალიტეტის ადმინისტრაციულ საზღვრებში და მოიცავს აბულის,  საღამოსა და ფარავნის ტბებსა და მიმდებარე ტერიტორიებს.  გარემოს დაცვისა და სოფლის მეურნეობის მინისტრის, ლევან დავითაშვილის განცხადებით, ჯავახეთის რეგიონის განსაკუთრებული მნიშვნელობა მაღალმთის ჭაობების არსებობით არის განპირობებული. იგი წარმოადგენს გადამფრენი ფრინველების საიმიგრაციო გზას, ამდენად მას გლობალური მნიშვნელობა აქვს. აღნიშნულ რეგიონში, ჯავახეთის ეროვნული პარკისა და 5 აღკვეთილი, დაცული ტერიტორიის  სახით, 2011 წლიდან ოფიციალურად ფუნქციონირებს.  სამცხე-ჯავახეთის რეგიონში, ბუნებრივი ფაქტორები ხელსაყრელ გარემოს ქმნის მეცხოველეობის და მიწათმოქმედების განვითარებისათვის. ხანგრძლივი პერიოდის განმავლობაში, ტერიტორიები ინტენსიურად გამოყენებოდა სასოფლო-სამეურნეო საქმიანობისათვის. ხშირად ადგილი ჰქონდა გაუმართლებელ ქმედებებს (ჭარბტენიანი ტერიტორიების დაშრობა, ტბების წყლის არასწორი გამოყენება, მცენარეთა და ცხოველთა არასასურველი სახეობების ინტროდუქცია, გადაჭარბებული ძოვება, არასწორ დროს თიბვა, ტერიტორიის დაბინძურება საყოფაცხოვრებო ნარჩენებით, არასისტემური თევზჭერა, უცხო სახეობების თევზების ინტროდუქცია და ა.შ.), რის გამოც  ჯავახეთის რეგიონის  ეკოსისტემები  დაცვას მნიშვნელოვნად საჭიროებენ. „ჯავახეთის დაცული ტერიტორიების ქსელის გაფართოება ხელს შეუწყობს რეგიონში ეკოტურიზმის განვითარებასა  და მოსახლეობის სოციალურ-ეკონომიკური მდგომარეობის გაუმჯობესებას. 2018 წლის მონაცემებით ჯავახეთის დაცულ ტერიტორიებს 10 000-მდე ვიზიტორი ესტუმრა. დაცული ტერიტორიების ქსელის გაფართოებით, შესაბამისი ეკოტურისტული სერვისების დანერგვა/განვითარებითა და ტურისტული ინფრასტრუქტურის კეთილმოწყობით ტურისტების რაოდენობა  მნიშვნელოვანად გაიზრდება“, - აღნიშნა მინისტრმა.  სამომავლოდ, საქართველოს გარემოს დაცვისა და სოფლის მეურნეობის სამინისტრო გეგმავს  საღამოსა და ფარავნის ტბებში წარსულში დამახასიათებელი იხტიოფაუნის გამრავლებას, თევზის სახეობების აღდგენას, რაც ხელს შეუწყობს ადგილობრივ მოსახლეობას მდგრადად ისარგებლოს ბუნებრივი რესურსით.  ჯავახეთის დაცული ტერიტორიების გაფართოება ხელს შეუწყობს ბუნებრივი პროცესების უწყვეტ განვითარებას, ბუნებრივი მრავალფეროვნებით გამორჩეული ჯავახეთის ზეგანის ჭარბტენიანი, განსაკუთრებით წყლის ფრინველთა საბინადროდ ვარგისი, ტერიტორიებისა და საქართველოს წითელ ნუსხასა და ბუნების დაცვის მსოფლიო კავშირის (IUCN) გლობალურ წითელ ნუსხაში არსებული გადაშენების კრიტიკული საფრთხის წინაშე მყოფი ორნითო და იხტიო ფაუნის, ფლორის სახეობების შენარჩუნებას, დაცვას და მათი სიცოცხლისუნარიანი პოპულაციების აღდგენას.
#

შეხვედრა ახალგაზრდა ფერმერებთან

„სოფლის მეურნეობაში ახალგაზრდების ჩართვა ძალიან მნიშვნელოვანია. სწორედ ახალგაზრდები არიან სოფლის მეურნეობის განვითარების მთავარი მამოძრავებელი ძალა“, - განაცხადა გარემოს დაცვისა და სოფლის მეურნეობის მინისტრმა, ლევან დავითაშვილმა საქართველოს  ფერმერთა  ასოციაციის (GFA) ახალგაზრდა  ფერმერებთან გამართულ შეხვედრაზე. სასტუმროში „ჰოლიდეი ინ“, საქართველოს ფერმერთა ასოციაციის (GFA) ორგანიზებით გამართულ შეხვედრას  საქართველოს პრემიერ-მინისტრი მამუკა ბახტაძე დაესწრო. მთავრობის მეთაურმა ქვეყანაში სოფლის მეურნეობის განვითარების პერსპექტივაზე ისაუბრა და აღნიშნა, რომ აგრარული სფერო თავის სიტყვას აუცილებლად იტყვის ქვეყნის ეროვნული ეკონომიკის განვითარებაში და 21-ე საუკუნეში იქნება წარმატებული, თანამედროვე ტექნოლოგიებზე დაფუძნებული.  შეხვედრაზე ლევან დავითაშვილმა ცოდნის მნიშვნელობას გაუსვა ხაზი და პროფესიული უნარებით ფერმერთა შესაძლებლობების გაძლიერებაზე ისაუბრა.  „ბოლო წლების ტენდენციას თუ დავაკვირდებით, სასოფლო-სამეურნეო საქმიანობა მათთვის სულ უფრო მეტად საინტერესო ხდება. ფერმერობა ადვილი არაა, ფერმერს მეწარმეობის ყველა რისკთან ერთად, ბუნებრივ რისკებთან გამკლავებაც უხდება, ამიტომ ფერმერობა არის საკმაოდ რთული და ამას დიდი სიმამაცე და სითამამე სჭირდება. მადლიერი ვარ, რომ თქვენთან ერთად მიწევს საქმის კეთება",- განაცხადა ლევან დავითაშვილმა. ახალგაზრდა ფერმერებთან შეხვედრა კითხვა პასუხის რეჟიმში გაგრძელდა და მას განათლების, მეცნიერების, კულტურისა და სპორტის მინისტრი მიხეილ ბატიაშვილი ესწრებოდა.ღონისძიების ფარგლებში, საქართველოს ფერმერთა ასოციაციის (GFA) მიერ შემუშავებული წიგნის „მეცხოველეობა-მეფრინველეობა - წარმოების ტექნოლოგია“  პრეზენტაცია გაიმართა. წიგნის გამოცემა ფონდის „კონსტანტა“ და საქართველოს პრეზიდენტის სარეზერვო ფონდის ფინანსური მხარდაჭერით განხორციელდა.
#

საგარეჯოს, გურჯაანის და დედოფლისწყაროს მუნიციპალიტეტებში, 18 ჰექტარზე ქარსაფარი ზოლები გაშენდება

გარემოს დაცვისა და სოფლის მეურნეობის სამინისტროში ახალი პროექტის - „ქარსაფარი ზოლების აღდგენა და გაშენება კახეთის მხარეში“ პრეზენტაცია გაიმართა. პროექტის ფარგლებში, საგარეჯოს, გურჯაანის და დედოფლისწყაროს მუნიციპალიტეტებში 25 კმ (18 ჰა ფართობი)  ქარსაფარი ზოლები გაშენდება. „ნიადაგის დაცვის უზრუნველყოფის მიზნით, მნიშვნელოვანია ქარსაფარი ზოლების აღდგენისა და გაუდაბნოების წინააღმდეგ ბრძოლის ღონისძიებების განხორციელება. მინდორდაცვითი ზოლების აღდგენის საკითხზე  სამინისტრო აქტიურად მუშაობს. მადლობა მინდა გადავუხადო დონორ ორგანიზაციებს მხარდაჭერისთვის, რასაც მათგან ვიღებთ ზოგადად დარგის განვითარებისთვის და ახალი პროექტის „ქარსაფარი ზოლების აღდგენა და გაშენება კახეთის მხარეში“ განხორციელებისთვის“, - განაცხადა გარემოს დაცვისა და სოფლის მეურნეობის მინისტრის პირველმა მოადგილემ, გიორგი ხანიშვილმა. პროექტი „ქარსაფარი ზოლების აღდგენა და გაშენება კახეთის მხარეში“ მულტისექტორულია, რაც ნიადაგის და ბიომრავალფეროვნების დაცვასთან ერთად, კლიმატთან ადაპტაციის ხელშეწყობას ითვალისწინებს. ზემოაღნიშნულ პროექტს კავკასიის რეგიონული გარემოსდაცვითი ცენტრი (RECC) სოფლის მეურნეობის განვითარების საერთაშორისო ფონდის (IFAD) ფინანსური მხარდაჭერით, სოფლის მეურნეობის მოდერნიზაციის, ბაზარზე წვდომისა და მოქნილობა (AMMAR) პროექტის ფარგლებში ახორციელებს. გარემოსდაცვითი ინფორმაციისა და განათლების ცენტრში გამართულ შეხვედრას გარემოს დაცვისა და სოფლის მეურნეობის მინისტრის მოადგილეები იური ნოზაძე და  სოლომონ პავლიაშვილი,  კახეთის რეგიონის შესაბამისი მუნიციპალიტეტების და დონორი ორგანიზაციების  წარმომადგენლები  ესწრებოდნენ