#

მედიისთვის სოფლის განვითარების სტრატეგიული მიმართულებების გაცნობა

საქართველოს წამყვანი მედია საშუალებების 40 ჟურნალისტი დაესწრო საინფორმაციო შეხვედრას საქართველოს სოფლის განვითარების სტრატეგიული პრიორიტეტებისა და 2018-2020 წლების სტრატეგიისა და სამოქმედო გეგმის განხორციელების შესახებ, რომელიც 17-18 მარტს ყვარელში გაიმართა. შეხვედრა ჩატარდა საქართველოს გარემოს დაცვისა და სოფლის მეურნეობის სამინისტროს ინიციატივით და ევროკავშირისა (EU) და გაეროს განვითარების პროგრამის (UNDP) ხელშეწყობით. „სოფლის განვითარება საქართველოსათვის ახალი, მაგრამ სტრატეგიულად მნიშვნელოვანი კონცეფციაა. მისი დანერგვა და განხორციელება ბევრ საკვანძო სფეროზე აისახება, მათ შორის, ეკონომიკაზე, გარემოს დაცვაზე, სოციალურ საკითხებზე და სოფლის მეურნეობაზე. სამოქალაქო საზოგადოებასთან და მედიასთან ღია და გამჭვირვალე თანამშრომლობა უმნიშვნელოვანესია სოფლის განვითარების ეროვნული სტრატეგიისა და სამოქმედო გეგმის განხორციელების წარმატებისათვის“, - განაცხადა ლევან დავითაშვილმა, საქართველოს გარემოს დაცვისა და სოფლის მეურნეობის მინისტრმა. შეხვედრაზე სოფლის განვითარების სტრატეგიის განხორციელებასთან დაკავშირებულ საკითხებთან დაკავშირებით იმსჯელეს. ნოდარ კერესელიძემ, საქართველოს გარემოს დაცვისა და სოფლის მეურნეობის მინისტრის პირველმა მოადგილემ, სოფლის განვითარების პოლიტიკის შექმნასა და დანერგვაზე ისაუბრა და ჟურნალისტებს ევროკავშირის ქვეყნების გამოცდილება და საქართველოს რეალობაში მისი გამოყენების შესაძლებლობები გააცნო. ასევე ყურადღება გამახვილდა სოფლის განვითარებაში 2017 წლის სამოქმედო გეგმის შესრულებულ სამუშაოებზე და სამომავლო გეგმებზე. შეხვედრა გაგრძელდა სამუშაო ჯგუფებში, სადაც ჟურნალისტებმა სოფლის განვითარების შესახებ ინფორმაციის ეფექტიანი გავრცელების გამოწვევებსა და შესაძლებლობებზე იმსჯელეს და სხვადასხვა აუდიტორიაზე მორგებული საკომუნიკაციო მასალების საკუთარი ხედვა წარადგინეს. სოფლის განვითარების პირველი ეროვნული სტრატეგია და სამოქმედო გეგმა საქართველომ 2017 წლის მარტში მიიღო. სტრატეგიის მიზანია სოფლის განვითარების ევროპული მოდელის დანერგვა და საქართველოს ეროვნული ხედვის განსაზღვრა ისეთ საკითხებში, როგორიცაა ადგილობრივი ეკონომიკის ზრდა და დივერსიფიცირება, სოციალური და საჯარო სერვისების განვითარება, ბუნებრივი რესურსების მდგრადი გამოყენება და განვითარების პროცესში მოქალაქეთა ჩართულობა. სტრატეგიის მიღებას წინ უძღოდა ფართომასშტაბიანი ეროვნული განხილვა საქართველოს მთავრობის, პარლამენტის, ადგილობრივი ხელისუფლების, სამოქალაქო საზოგადოებისა და კერძო სექტორის მონაწილეობით. სოფლის განვითარების ეროვნული სტრატეგიის მიღებისა და განხორციელების პროცესს მხარს უჭერენ ევროკავშირი (EU) და გაეროს განვითარების პროგრამა (UNDP), ევროკავშირის უფრო ფართო ინიციატივის, ENPARD-ის, ფარგლებში. ევროკავშირი (EU) ხელს უწყობს სოფლად სიღარიბის შემცირებასა და სოფლის განვითარების თანამედროვე პრაქტიკის დანერგვას საქართველოში სოფლისა და სოფლის მეურნეობის განვითარების ევროპის სამეზობლო პროგრამის, ENPARD-ის დახმარებით. საქართველოში პროგრამა ENPARD 2013 წლიდან ხორციელდება, ხოლო მისი ბიუჯეტი 179 მილიონ ევროს შეადგენს. პროგრამის პირველი ფაზის პრიორიტეტი იყო სოფლის მეურნეობის განვითარების ხელშეწყობა, ხოლო მეორე ფაზა მიზნად ისახავს სოფლად მცხოვრები ადამიანების ეკონომიკური განვითარების შესაძლებლობების გაზრდას. დამატებითი ინფორმაციისათვის იხილეთ ვებ-გვერდი: www.enpard.ge 
#

ლევან დავითაშვილი ევროკავშირის მისიის წარმომადგენლებს შეხვდა

გარემოს დაცვისა და სოფლის მეურნეობის მინისტრი ლევან დავითაშვილი ევროკავშირის მისიის წარმომადგენლებს შეხვდა. დელეგაციას ევროკომისიის სოფლის მეურნეობისა და სოფლის განვითარების გენერალური დირექტორატის სამეზობლო პოლიტიკისა და გაფართოების საკითხებში სამსახურის ხელმძღვანელი სუსანა მარაზუელა ასპიროზი ხელმძღვანელობდა. მხარეებმა შეხვედრაზე ევროკავშირის მიერ საქართველოში დაფინანსებული და მხარდაჭერილი სასოფლო-სამეურნეო და სოფლის განვითარების პროგრამები მიმოიხილეს, მათ შორის, ღვინის სექტორის რეფორმა, რომელიც გაეროს სურსათისა და სოფლის მეურნეობის ორგანიზაციის (FAO) დახმარებით ხორციელდება სოფლისა და სოფლის მეურნეობის განვითარების ევროპის სამეზობლო პროგრამის (ENPARD) ფარგლებში. ლევან დავითაშვილმა ვრცლად ისაუბრა საქართველოს სოფლისა და სოფლის მეურნეობის განვითარების სტრატეგიის და მისი იმპლემენტაციის შესახებ და ყურადღება ევროკავშირის საიმედო პარტნიორობაზე გაამახვილა. როგორც მინისტრმა განაცხადა რესტრუქტურიზებული სამინისტროს ფარგლებში, სოფლისა და სოფლის მეურნეობის განვითარება კვლავ რჩება პრიორიტეტულ მიმართულებად და ევროკავშირის დელეგაციას მადლობა გადაუხადა აქტიური მხარდაჭერისთვის. შეხვედრაზე მხარეებმა ასევე ისაუბრეს ევროკავშირის  ტექნიკური დახმარების პროგრამებზე, რომლებსაც FAO ახორციელებს საქართველოს გარემოს დაცვისა და სოფლის მეურნეობის სამინისტროს შესაძლებლობების გაძლიერების მიზნით. ყურადღება გამახვილდა  ღვინის სექტორის მართვის რესტრუქტურიზაციის საკითხზე. სუსანა მარაზუელა ასპიროზიმ სამინისტროს საქმიანობა წარმატებულად შეაფასა და სოფლის და სოფლის მეურნეობის მიმართულებით აქტიური თანამშრომლობის სურვილი გამოთქვა. აღსანიშნავია, რომ საქართველოში ვიზიტის ფარგლებში ევროკომისიის წარმომადგენლებმა მოინახულეს რეგიონებში ადგილობრივი განვითარების ჯგუფები და ადგილზე გაეცნენ მათ მიერ განხორციელებულ პროექტებს. ვიზიტის ფარგლებში, ევროკაშირის დელეგაციის წევრებმა დაათვალიერეს ღვინის ეროვნული სააგენტო და გაეცნენ მის საქმიანობას. შეხვედრას გარემოს დაცვისა და სოფლის მეურნეობის მინისტრი ლევან დავითაშვილი, მინისტრის პირველი მოადგილე ნოდარ კერესელიძე, ევროკავშირის დელეგაციის კოოპერაციის ხელმძღვანელი ვინსენტ რეი და FAO-ENPARD-ის პროექტების კოორდინაციის ოფიცერი ხავიერ სანს ალვარესი ესწრებოდნენ. აღსანიშნავია, რომ ევროკავშირმა 2013 წლიდან დღემდე, საქართველოში სოფლისა და სოფლის მეურნეობის განვითარების მიზნით განხორციელებულ პროექტები 179.5 მილიონი ევროთი დააფინანსა. ევროკავშირი მხარს უჭერს სოფლის მეურნეობასა და სოფლის განვითარებას საქართველოში ENPARD-ის პროგრამის დახმარებით. პროგრამის პირველი ფაზის პრიორიტეტი სოფლის მეურნეობის განვითარების ხელშეწყობა იყო, ხოლო მეორე და მესამე ფაზა მიზნად ისახავს სოფლად მცხოვრები ადამიანების ეკონომიკური განვითარების შესაძლებლობების შექმნას.
#

ლევან დავითაშვილმა USAID-ის წარმომადგენლებთან წყლის რესურსებისა და ნარჩენების მართვის საკითხებზე იმსჯელა

გარემოს დაცვისა და სოფლის მეურნეობის მინისტრი ლევან დავითაშვილი ამერიკის შეერთებული შტატების საერთაშორისო განვითარების სააგენტოს USAID ეკონომიკური განვითარების ოფისის დირექტორს ვერონიკა ლის, USAID-ის კონტრაქტორი „მმართველობა განვითარებისთვის“ პროექტის ხელმძღვანელს ნატო ბერუაშვილს და სხვა წარმომადგენლებს შეხვდა. შეხვედრაზე მხარეებმა წყლის რესურსებისა და ნარჩენების მართვის საკითხები განიხილეს. შეხვედრაზე ლევან დავითაშვილმა ვრცლად ისაუბრა ირიგაციის კუთხით განხორციელებულ პროექტებზე. მინისტრმა ხაზგასმით აღნიშნა, რომ კონსოლიდირებული სამინისტროს ფარგლებში გარემოსდაცვითი თემები პრიორიტეტულ მიმართულებას წარმოადგენს და ამერიკის შეერთებული შტატების საერთაშორისო განვითარების სააგენტოსთან მჭიდრო თანამშრომლობის სურვილი გამოთქვა. შეხვედრაზე ნატო ბერუაშვილმა „მმართველობა განვითარებისთვის“ პროექტის ფარგლებში შემუშავებული წყლის რესურსების მართვის რეფორმის დოკუმენტი წარმოადგინა და ვრცლად ისაუბრა წყლის რესურსების ეფექტიანად გამოყენების მიზნით განხორციელებულ და დაგეგმილ ღონისძიებებზე. ლევან დავითაშვილის განცხადებით სექტორალური განვითარებისთვის უაღრესად მნიშვნელოვანია დონორების ჩართულობა და ამერიკის შეერთებული შტატების საერთაშორისო განვითარების სააგენტოს (USAID) მადლობა გადაუხადა აქტიური მხარდაჭერისთვის. ვერონიკა ლიმ აღნიშნა, რომ საქართველოს გარემოსდაცვითი მიმართულებით განვითარების სწორი ხედვა გააჩნია, რასაც შეთანხმება საქართველო-ევროკავშირს შორის ასოცირების შესახებ ცხადყოფს და კონსოლიდირებულ სამინისტროსთან გარემოსდაცვითი თემების მიმართულებით მჭიდრო თანამშრომლობის სურვილი გამოთქვა. გარემოს დაცვისა და სოფლის მეურნეობის სამინისტროში გამართულ შეხვედრას მინისტრის მოადგილეები გიორგი ჩხეიძე, ნინო თანდილაშვილი და შპს საქართველოს მელიორაციის გენერალური დირექტორი არჩილ ბუკია ესწრებოდნენ.
#

რძის სექტორის მეორე კავკასიური კონგრესი

სასტუმროში „Radisson Blu Iveria “ რძის სექტორის მეორე კავკასიური კონგრესი გაიმართა. კონგრესის მთავარი თემა მცირე და საშუალო ბიზნესის ურთიერთთანამშრომლობის და ახალი შესაძლებლობების განხილვა იყო. კონგრესი გარემოს დაცვისა და სოფლის მეურნეობის მინისტრმა ლევან დავითაშვილმა გახსნა.   როგორც მინისტრმა აღნიშნა, რძის მრეწველობის განვითარება გარემოს დაცვისა და სოფლის მეურნეობის სამინისტროს ერთ-ერთი პრიორიტეტული მიმართულებაა. ლევან დავითაშვილმა კოოპერაციული მეურნეობების განვითარებაზე, სამინისტროს მიერ შემუშავებულ რძის ტექნიკურ რეგლამენტზე და მის ეფექტიანობაზე, ასევე დარგში ინვესტიციების მოზიდვის, სურსათის უვნებლობის უზრუნველყოფისა და ახალი ტექნოლოგიების დანერგვის საჭიროებაზე ისაუბრა. მინისტრმა მადლობა გადაუხადა კონგრესის ორგანიზატორებს და აღნიშნა, რომ მსგავსი ღონისძიებები მნიშვნელოვნად უწყობს ხელს დარგის განვითარებას. „მე მინდა მადლობა გადავუხადო დონორ ორგანიზაციებს და ევროკავშირს ჩვენთვის უაღრესად მნიშვნელოვან სექტორში ფინანსური კონტრიბუციისა და მოდერნიზაციისთვის.   ჩვენ არ გვაქვს რძის სექტორში სახარბიელო მდგომარეობა, მაგრამ  ვფიქრობ სახელმწიფოს და დონორი ორგანიზაციების კოორდინირებული მუშაობით რძის სექტორი  მნიშვნელოვნად განვითარდება.  ჩვენ მზად ვართ სწორი რეგულაციებით მოვახდინოთ სექტორის წახალისება“- განაცხადა ლევან დავითაშვილმა. გარემოს დაცვისა და სოფლის მეურნეობის მინისტრმა ხაზი გაუსვა დარგის ეფექტიანობის ამაღლებისა და კონკურენტუნარიანობის ზრდის უმთავრეს ფაქტორად რძის პროდუქტების ხარისხისა და უვნებლობის გაუმჯობესების მნიშვნელობას. „ასოცირების ხელშეკრულების შედეგად, ქართველ ფერმერებს შეუძლიათ საკუთარი ნაწარმის ექსპორტი ევროკავშირის ბაზარზე. საქართველოში კი, მოქალაქეებს შეუძლიათ ისარგებლონ უკეთესი ხარისხის რძის პროდუქტებით. ამისათვის, რძის მწარმოებლებმა უნდა დააკმაყოფილონ ევროკავშირის სტანდარტები, და ჩვენ ვეხმარებით მათ ამაში რამდენიმე მიმდინარე პროექტის საშუალებით“ - განაცხადა იანოშ ჰერმანმა, ევროკავშირის ელჩმა საქართველოში. ევროპის რეკონსტრუქციისა და განვითარების ბანკის (EBRD) რეგიონული დირექტორის კავკასიაში, მოლდოვასა და ბელარუსში ბრუნო ბალვენერას განცხადებით, EBRD-ი მხარს უჭერს საქართველოში რძის სექტორის განვითარებას. „დღეს ძალიან მნიშვნელოვანი ღონისძიებაა. მოგეხსენებათ, სარძეო სექტორის განვითარება საქართველოში  EBRD -ის მნიშვნელოვან მიმართულებას წარმოადგენს. ჩვენი მთავარი მიზანი სექტორში პროდუქტიულობის ზრდაა, რის მიღწევასაც ინვესტიციების განხორციელებითა და ცოდნის გაზიარებით ვაპირებთ“- განაცხადა ბრუნო ბალვანერამ. კონგრესზე, გარემოს დაცვისა და სოფლის მეურნეობის მინისტრმა ლევან დავითაშვილმა ავტორთა ჯგუფი წიგნისთვის „რძის სამრეწველო წარმოების თანამედროვე ტექნოლოგიები და სარძეო ფერმის ეფექტიანი მართვა საქართველოში“ მადლობის სიგელით დააჯილდოვა. ღონისძიება გაეროს სურსათისა და სოფლის მეურნეობის ორგანიზაციისა (FAO) და ევროპის რეკონსტრუქციისა და განვითარების ბანკის (EBRD) ორგანიზებით ჩატარდა. კონგრესს კავკასიიდან  და აღმოსავლეთ ევროპიდან 200-ზე მეტი მონაწილე  ესწრებოდა. მათ შორის იყვნენ ფერმერები, გადამამუშავებლები, დანადგარ-მოწყობილობების მომწოდებლები, დარგის ექსპერტები და საქართველოს მთავრობის წარმომადგენლები.
#

ქართველი აგრონომების ცოდნის ასამაღლებლად USAID პროგრამა

გარემოს დაცვისა და სოფლის მეურნეობის მინისტრის პირველმა მოადგილემ ნოდარ კერესელიძემ და აშშ-ის საერთაშორისო განვითარების სააგენტოს (USAID) ადმინისტრატორის მოადგილემ ევროპისა და ევრაზიის საკითხებში ბროკ ბირმენიმ პრაქტიკოს აგრონომების ტრენინგ პროგრამის დახურვის ღონისძიებაში მიიღეს მონაწილეობა. პროგრამაში ჩართული იყო საქართველოს 10 რეგიონი. 7 ქალაქში 96 თეორიული და 60 პრაქტიკული სესია ჩატარდა და მასში მონაწილეობდნენ მაღალკვალიფიციური ექსპერტები.როგორც მინისტრის მოადგილემ ნოდარ კერესელიძემ აღნიშნა, აშშ სოფლის განვითარების კუთხით საქართველოსთვის უმნიშვნელოვანესი მხარდამჭერი ქვეყანაა.„ექსტენციის სისტემის განვითარება არის ერთ-ერთი უმნიშვნელოვანესი კომპონენტი დარგის განვითარებისთვის, ვინაიდან სწორედ ექსტენციის მეშვეობით ფერმერთან ჩვენ მიგვაქვს ცოდნა და ინფორმაცია სოფლის მეურნეობაში ახალი ტექნოლოგიების შესახებ, რათა ამაღლდეს მათი კონკურენტუნარიანობა. ეს პროექტი ამას ემსახურებოდა, რომ ჩვენი საინფორმაციო-საკონსულტაციო ცენტრების თანამშრომლებმა, რომლებიც უშუალოდ მუშაობენ ფერმერებთან, ამ სასერთიფიკაციო კურსებში აღიჭურვნენ ახალი უნარჩვევებით, როგორც თეორიული ისე პრაქტიკული და სამომავლოდ ამ ცოდნას გადასცემენ ფერმერებს,“ - განაცხადა ნოდარ კერესელიძემ.„განსაკუთრებით მნიშვნელოვანია საქართველოსთვის მსგავსი პროექტების განხორციელება. ჩვენ ვფიქრობთ, რომ ვასწავლოთ ფერმერებს და გავუზიაროთ მათ ის ინფორმაცია, რაც მართლა გამოადგებათ მომავალში, ჩვენ ვაძლევთ იმის საშუალებას, რომ თავიანთი ცოდნა გაუზიარონ სხვებსაც, რათა უფრო მეტად შეუწყონ ხელი სოფლის მეურნეობის განვითარებას,“ - განაცხადა ბროკ ბირმენიმ. პროგრამის ფარგლებში, საინფორმაციო-საკონსულტაციო ცენტრის თანამშრომლებმა პრაქტიკოსი აგრონომების ცოდნის გაღრმავება, ახალი სასოფლო-სამეურნეო ტექნოლოგიების, მცენარეთა დაცვის ინტეგრირებული სისტემის, არატრადიციული კულტურების და ახალი ჯიშების შესახებ ამომწურავი ინფორმაცია მიიღეს, რაც საბოლოო ჯამში ხელს შეუწყობს ექსტენციის სერვისის ეფექტიანობის გაზრდას. რეგიონალურ უნივესრიტეტებში ჩატარდა რამდენიმე სემინარი ისეთ აქტუალურ თემებზე, როგორიც მაგალითად მავნებლებთან ბრძოლის ღონისძიებებია. პროგრამა განხორციელდა საქართველოს აგრარული და სამი რეგიონული უნივერსიტეტის მეშვეობით, და საქართველოს მასშტაბით, მასში მონაწილეობა მიიღო საინფორმაციო-საკონსულტაციო ცენტრების 103-მა თანამშრომელმა.
#

აზიური ფაროსანას წინააღმდეგ ბრძოლის 2018 წლის პროგრამა

დღეისათვის, აზიური ფაროსანას წინააღმდეგ ბრძოლა, საქართველოს გარემოს დაცვისა და სოფლის მეურნეობის სამინისტროს, სსიპ სურსათის ეროვნული სააგენტოს და სამთავრობო კომისიის წევრი ყველა სახელმწიფო სტრუქტურის ერთ-ერთი მთავარი გამოწვევაა. საქართველოს ხელისუფლებამ, ქართველი და უცხოელი მეცნიერებისა და სპეციალისტების ჩართულობით და მიღებული გამოცდილების საფუძველზე ბრძოლის სტრატეგია და სამოქმედო პროგრამა შეიმუშავა, რომლის დეტალები გარემოს დაცვისა და სოფლის მეურნეობის მინისტრმა ჟურნალისტებსგააცნო. ლევან დავითაშვილმა საქართველოში ამერიკელი მეცნიერების და სპეციალისტების ვიზიტი შეაფასა და აღნიშნა, რომ მსოფლიოში წამყვანმა სპეციალისტებმა, ქართველ მეცნიერებთან ერთად სახელმწიფო პროგრამა საერთაშორისო სიმპოზიუმზე განიხილეს. გარემოს დაცვისა და სოფლის მეურნეობის მინისტრის განცხადებით, სპეციალისტებმა 2017 წელს სახელმწიფოს მიერ ჩატარებული ღონისძიებები და 2018 წლის ფაროსანასთან ბრძოლის სტრატეგია დადებითად შეაფასეს.სახელმწიფო სტრატეგიის მიზანია, მოხდეს აზიური ფაროსანას მართვა, მისი პოპულაციის შემცირება და სასოფლო-სამეურნეო კულტურების დაზიანებისა და მიყენებული ზარალის მინიმუმამდე დაყვანა. „2018 წელს ჩვენი სამოქმედო გეგმა ითვალისწინებს 4 ძირითად მიმართულებას. აზიური ფაროსანას რიცხოვნობის მინიმალურ ზღვრამდე დაყვანა და კონტროლი მიღწევადია მხოლოდ სახელმწიფოს, ფერმერების და მთლიანად საზოგადოების ერთობლივი ძალისხმევით. პირველი ამოცანა ჩვენი სტრატეგიის არის ის, რომ ჩვენ მინიმუმამდე შევამციროთ ეკონომიკური ზარალი, მოვახდინოთ კონტროლი და სასოფლო-სამეურნეო საქმიანობა არ იყოს წამგებიანი. ჩვენ უნდა გავუმკლავდეთ აზიურ ფაროსანას - ეს არის ჩვენი ამოცანა“, - განაცხადა ლევან დავითაშვილმა.გარემოს დაცვისა და სოფლის მეურნეობის მინისტრმა ასევე აღნიშნა, რომ მარტის შუა რიცხვებიდან მონიტორინგის სისტემა მთელ საქართველოს ტერიტორიაზე განთავსდება და მონიტორინგის შედეგები მოსახლეობას ოპერატიულად მიეწოდება.„დათბობასთან ერთად აზიური ფაროსანას აქტივობა გაიზრდება, თუმცა ამ ეტაპზე გვაქვს ცივი პერიოდი. ახლა მავნებელი იმყოფება გამოზამთრების ფაზაში. ის იქნება შენობაში და შესაბამისად, ეს არის პერიოდი, როდესაც ჩვენ ვერ ჩავატარებთ ვერანაირ წამლობას, რადგან სახლში ქიმიური წამლობა დაუშვებელია. ბევრი ცდილობს პანიკის დათესვას, მათ შორის ბევრმა პოლიტიკოსმა, სამწუხაროდ, ეს თავის დღის წესრიგის ნაწილი გახადა. ამ ეტაპზე, მარტის ბოლომდე, მავნებლის წინააღმდეგ ეფექტიანია მხოლოდ მექანიკური ღონისძიებების გატარება. ამიტომ თითოეულმა მოქალაქემ თავის ტერიტორიაზე, საკუთარი პასუხისმგებლობის ფარგლებში, საცხოვრებელ სახლებში თუ დამხმარე ნაგებობებში მექანიკურად უნდა მოახდინოს ამ მავნებლის განადგურება“, - განაცხადა ლევან დავითაშვილმა.
#

აშშ-ის და საქართველოს სამეცნიერო წრეების შეხვედრა

აშშ-ის და საქართველოს სამეცნიერო წრეები აზიურ ფაროსანასთან ბრძოლის საკითხებს განიხილავენ „აზიური ფაროსანა-გლობალური გამოწვევა, საერთაშორისო გამოცდილება და პრობლემების გადაწყვეტის გზები“ თემაზე, თბილისში მიმდინარეობს სამეცნიერო სამუშაო შეხვედრა რომელშიც აშშ-ის წამყვანი სპეციალისტები და ქართველი მეცნიერები მონაწილეობენ. ღონისძიება საერთაშორისო განვითარების სააგენტოს საქართველოს სასოფლო-სამეურნეო წარმოების ეფექტიანობის აღდგენის პროექტის (USAID /REAP) და კომპანიის TRECE Inc (აშშ) ორგანიზებით იმართება. კონფერენციაზე ხაზგასმით აღინიშნა, რომ ინვაზიური მავნებელი აზიური ფაროსანა (Halyomorpha halys) მნიშვნელოვანი გამოწვევაა არა მარტო საქართველოს, არამედ მსოფლიოს მრავალი ქვეყნის სოფლის მეურნეობისა და ეკონომიკისთვის. მეცნიერებას წამყვანი როლი ენიჭება ამ მავნებლის წინააღმდეგ მიმართული ბრძოლის ეფექტური მეთოდების შემუშავებაში, დანერგვასა და განხორციელებაში. ამერიკის შეერთებულ შტატებს მავნებელთან ბრძოლის მრავალწლიანი გამოცდილება გააჩნია. სამეცნიერო სამუშაო შეხვედრაზე, აშშ-ის წამყვანი მეცნიერები ქართველ კოლეგებს უახლეს მიღწევებს, კვლევების შედეგებსა და პერსპექტიულ თანამედროვე ტექნოლოგიებს გააცნობენ. ქართველი მეცნიერებს კი საშუალება აქვთ წარმოადგინონ მათ მიერ განხორციელებული კვლევების შედეგები, სამომავლო ხედვები, გააღრმაონ სამეცნიერო კავშირები და ამერიკელ მეცნიერებთან ერთობლივი სამეცნიერო პროექტები დაგეგმონ. კონფერენციის ფარგლებში განიხილება მავნებლის ბიოლოგიის, საქართველოს ბიომრავლფეროვნების, მონიტორინგის თანამედროვე სისტემების, ბიოინსექტიციდების და პოპულაციის მართვის საკითხები. სურსათის ეროვნული სააგენტოს მცენარეთა დაცვის სპეციალისტები წარმოადგენენ ინფორმაციას 2016-2017 წლებში გატარებული ღონისძიებების და 2018 წლის სტრატეგიული ხედვის შესახებ. ხოლო სოფლის მეურნეობის სამინისტროს სამეცნიერო კვლევითი ცენტრის მეცნიერები ბიოინსექტიციდების გამოცდის შედეგებზე ისაუბრებენ. გამოცდილების გაზიარების მიზნით, ღონისძიებას ესწრებიან საქართველოს მეზობელი ქვეყნების სპეციალისტები. აშშ-ის საერთაშორისო განვითარების სააგენტოს საქართველოს სასოფლო-სამეურნეო წარმოების ეფექტიანობის აღდგენის პროექტის (USAID /REAP) და კომპანია TRECE Inc (აშშ) ორგანიზებით, საქართველოში იმყოფებიან აშშ-ის უნივერსიტეტების და კვლევითი ცენტრების წამყვანი მეცნიერები, მათ შორის აშშ-ის სოფლის მეურნეობის დეპარტამენტის სასოფლო-სამეურნეო კვლევის სამსახურის (USDA, ARS), ვირჯინიის ტექნიკური უნივერსიტეტის, სასოფლო-სამეურნეო კვლევებისა და ექსტენციის ცენტრის, ოკლაჰომას და პენსილვანიის სახელმწიფო უნივერსიტეტების წარმომადგენლები. ამერიკელ მეცნიერებთან ერთად სამეცნიერო შეხვედრას ესწრებიან საქართველოს სამეცნიერო წრეების წარმომადგენლები, საქართველოს მეცნიერებათა ეროვნული აკადემიის, საქართველოს სოფლის მეურნეობის აკადემიის, საქართველოს პროფილაქტიკური მედიცინის მეცნიერებათა აკადემიის, ივ, ჯავახიშვილის თბილისის სახელმწიფო უნივერსიტეტის, საქართველოს სახელმწიფო უნივერსიტეტის, საქართველოს სახელმწიფო სამედიცინო უნივერსიტეტის წარმომადგენლები.