#

საქართველოში ოლიმპიური თამაშების გამართვის პერსპექტივის განხილვა

გარემოს დაცვისა და სოფლის მეურნეობის მინისტრი ლევან დავითაშვილი ოლიმპიური თამაშების მასპინძელი ქვეყნების შემფასებელი კომისიის მთავარ ექსპერტს, ჟილბერ ფელის და საერთაშორისო ოლიმპიური კომიტეტის დელეგაციის წევრებს შეხვდა.შეხვედრაზე მხარეებმა საქართველოში ოლიმპიური თამაშების გამართვის პერსპექტივები განიხილეს.შეხვედრაზე მინისტრმა საერთაშორისო ოლიმპიური კომიტეტის წევრებს, პრეზენტაციის სახით, ინფორმაცია მიაწოდა საქართველოს გეოგრაფიის, ლანდშაფტის, წყლის და სხვა ბუნებრივი რესურსებისა და ბიომრავალფეროვნების შესახებ. მინისტრმა ვრცლად ისაუბრა მეღვინეობის 8000 წლიან უწყვეტ ისტორიაზე და საქართველოზე, როგორც ქვეყანაზე, რომელიც ღვინის აკვანია. ლევან დავითაშვილმა დელეგაციის წევრებს ევროკავშირთან დაახლოების და ჰარმონიზაციის კონტექსტში საქართველოს საკანონდებლო ვალდებულებებიც გააცნო და ოლიმპიური თამაშებისთვის გარემოსდაცვითი საკითხების გათვალისწინებით, ქვეყნის ინფრასტრუქტურული მომზადების მნიშვნელობაზე გაამახვილა ყურადღება. ოლიმპიური თამაშების მასპინძელი ქვეყნების შემფასებელი კომისიის მთავარმა ექსპერტმა მინისტრის მიერ ქვეყნის პოტენციალის შესახებ წარმოდგენილი პრეზენტაცია დადებითად შეაფასა.„საქართველოს ბუნების სილამაზე და ბიომრავალფეროვნება ნამდვილად შთამბეჭდავია. მნიშვნელოვანია, რომ ინფრასტრუქტურის განვითარებამ ხელი არ უნდა შეუშალოს გარემოსდაცვით საკითხებს. ვიზიტის ფარგლებში ჩვენ ვხვდებით, რომ ყველა სამინისტრო როგორც ერთი ორგანიზმი ისე მუშაობს, რაც ნებისმიერი წამოწყების წარმატებისთვის უმნიშვნელოვანესი ფაქტორია“,- განაცხადა ჟილბერ ფელიმ.გარემოს დაცვისა და სოფლის მეურნეობის სამინისტროში გამართულ შეხვედრას მინისტრის პირველი მოადგილე ნოდარ კერესელიძე და მინისტრის მოადგილე ნინო თანდილაშვილი ესწრებოდნენ.საერთაშორისო ოლიმპური კომიტეტის წარმომადგენლების ვიზიტი საქართველოს პრემიერ-მინისტრის ლოზანაში ყოფნის პერიოდში დაიგეგმა, როდესაც გიორგი კვირიკაშვილი შეხვდა ოლიმპიური კომიტეტის თავმჯდომარეს, ტომას ბახს, სადაც განიხილეს სამომავლო თანამშრომლობის შესაძლებლობები და პერსპექტივები. 
#

სოლომონ პავლიაშვილმა BIOFIN-ის კონფერენციაში მონაწილეობა მიიღო

ინდოეთში, ქ. ჩენაიში, ბიომრავალფეროვნების ფინანსური ინიციატივის (BIOFIN) გლობალური კონფერენცია გაიმართა, რომელსაც გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი დაესწრო.კონფერენციაში ბიომრავალფეროვნების ფინანსური ინიციატივის 30 ქვეყნის 200-მდე წარმომადგენელმა მიიღო მონაწილეობა. მხარეებმა ბიომრავალფეროვნების დაფინანსებასთან დაკავშირებით ქვეყნების გამოცდილებაზე, არსებულ საჭიროებებსა და მდგომარეობის გაუმჯობესების კონკრეტულ მაგალითებზე იმსჯელეს.კონფერენციის მიზანია ქვეყნებს შორის გამოცდილების გაზიარება და ტექნიკური შეხვედრების ჩატარება, ბიომრავალფეროვნების ფინანსური ინიციატივის განხორციელებით მიღებული შედეგების განხილვა და ბიომრავალფეროვნებისათვის საჭირო ფინანსური რესურსების მოძიების გზებთან დაკავშირებით ერთობლივი კონსულტაცია.მინისტრის მოადგილემ მაღალი რანგის შეხვედრაზე სიტყვით მიმართა მონაწილეებს, რომლის ფარგლებშიც ხაზი გაუსვა ბიომრავალფეროვნების მნიშვნელობას და შესაბამისად კონსერვაციისათვის ფინანსური რესურსების მობილიზების აუცილებლობას, როგორც დონორული, ისე ადგილობრივი წყაროებიდან დაფინანსების ზრდის მნიშვნელობას.პროექტის გუნდის მიერ შეხვედრაზე წარდგენილი იქნა პროექტის ფარგლებში შემუშავებული დოკუმენტები „ბიომრავალფეროვნების პოლიტიკისა და ინსტიტუციური მოწყობის მიმოხილვა“ და „ბიომრავალფეროვნების ფინანსური გეგმა“. შეხვედრის მონაწილეებს წარედგინათ ინფორმაცია პროექტის ფარგლებში მიღწეული შედეგების, არსებული გამოწვევების და სამომავლოდ დაგეგმილი აქტივობები.ბიომრავალფეროვნების ფინანსური ინიციატივის პროექტი გაეროს განვითარების პროგრამის (UNDP) თაოსნობით და ხელშეწყობით ხორციელდება. 
#

„ტყის მდგრადი მართვის გაძლიერება საქართველოში“ შემაჯამებელი შეხვედრა

გარემოს დაცვისა და სოფლის მეურნეობის სამინისტროში, პროექტის- „ტყის მდგრადი მართვის გაძლიერება საქართველოში“ შემაჯამებელი შეხვედრა გაიმართა. მხარეებმა ევროკავშირის მხარდაჭერით ტყის მდგრადი მართვის სისტემის ჩამოყალიბებასა და სატყეო სექტორში დონორი ორგანიზაციების დახმარების კოორდინაციის გაძლიერებაზე იმსჯელეს. ასევე, არალეგალური ტყითსარგებლობის ფაქტების აღმოფხვრის პრაქტიკისა და სოციალური ჭრების სისტემის უფრო მდგრადი და მოქნილი სისტემით ჩანაცვლების საჭიროება განიხილეს. შეხვედრას საქართველოში ევროკავშირის წარმომადგენლობის გარემოსდაცვითი პროგრამის ხელმძღვანელი ალვარო ორტეგა, ლიტვის გარემოს დაცვის სამინისტროსა და არასამთავრობო ორგანიზაციების  წარმომადგენლები ესწრებოდნენ.
#

სამინისტროსა და USAID-ს შორის მემორანდუმი გაფორმდა

გარემოს დაცვისა და სოფლის მეურნეობის სამინისტროს და ამერიკის შეერთებული შტატების საერთაშორისო განვითარების სააგენტოს (USAID) შორის მემორანდუმი გაფორმდა. მემორანდუმის ფარგლებში, აზიურ ფაროსანასთან ბრძოლის ღონისძიებებისათვის გათვალისწინებულია 3,5 მილიონი დოლარის გამოყოფა. მემორანდუმს ხელი გარემოს დაცვისა და სოფლის მეურნეობის მინისტრმა, ლევან დავითაშვილმა და USAID- ის ადმინისტრატორის მოადგილემ ევროპისა და ევრაზიის ქვეყნებში, ბროკ ბირმანმა მოაწერეს. „ძალიან მნიშვნელოვანია ამერიკის შეერთებული შტატების საერთაშორისო განვითარების სააგენტოს მხარდაჭერა, რომლის ფარგლებშიც, საქართველო, აზიურ ფაროსანასთან ბრძოლის ღონისძიებების მხარდასაჭერად, დამატებით ფინანსურ დახმარებას მიიღებს. აღნიშნული ფინანსური რესურსით დამატებით მოხდება, ერთი მხრივ, ტექნიკის შესყიდვა (ტრაქტორები, შემასხურებლები, ფერომონები), მეორე მხრივ, ცოდნის გაზიარება და სურსათის ეროვნული სააგენტოს თანამშრომლებისთვის ტრენინგების უზრუნველყოფა“, - აღნიშნა ლევან დავითაშვილმა.ბროკ ბირმანის განცხადებით, აღნიშნული მემორანდუმის ფარგლებში, აშშ-ს მხარე საქართველოს აზიურ ფაროსანას წინააღმდეგ ბრძოლაში დაეხმარება. „პირადად მქონდა შესაძლებლობა დასავლეთ საქართველოში დამეთვალიერებინა ფაროსანას მიერ დაზიანებული თხილის პლანტაციები. ჩვენ მზად ვართ, პრობლემის გადასაჭრელად აქტიურად ჩავერთოთ დაგეგმილ ღონისძიებებში“, - განაცხადა ბროკ ბირმანმა.
#

აშშ-ს მეცნიერებმა ფაროსანასთან ბრძოლის სახელმწიფო გეგმა მოიწონეს

გარემოს დაცვისა და სოფლის მეურნეობის მინისტრი ლევან დავითაშვილი კომპანია TRECE Inc (აშშ) პრეზიდენტს, ბილ ლინგრენს და ამერიკის შეერთებული შტატების უნივერსიტეტებისა და კვლევითი ცენტრების წამყვან მეცნიერთა დელეგაციის წევრებს შეხვდა.მეცნიერთა შორის იყვნენ ამერიკის შეერთებული შტატების სოფლის მეურნეობის დეპარტამენტის სასოფლო-სამეურნეო კვლევის სამსახურის (USDA ARS), ვირჯინიის ტექნიკური უნივერსიტეტის, სასოფლო-სამეურნეო კვლევებისა და ექსტენციის ცენტრის, ოკლაჰომასა და პენსილვანიის სახელმწიფო უნივერსიტეტების წარმომადგენლები.შეხვედრაზე საქართველოში გავრცელებული ახალი ინვაზიური მავნებლის - აზიური ფაროსანას წინააღმდეგ საბრძოლველად შემუშავებული სამოქმედო გეგმა განიხილეს. „იმ გამოწვევის გათვალისწინებით, რის წინაშეც ვართ, უმნიშვნელოვანესია საქართველოში აშშ-ის დელეგაციის ვიზიტი, ამერიკელ სპეციალისტებთან თანამშრომლობა და მათი გამოცდილების გაზიარება“, - აღნიშნა ლევან დავითაშვილმა.ბილ ლინგრენის განცხადებით, საქართველოს ხელისუფლებას გააჩნია მოქნილი და ქმედითი სტრატეგია მავნებლის წინააღმდეგ საბრძოლველად, თუმცა, აზიური ფაროსანას დამარცხება 2018 წელს მაინც ვერ მოხერხდება.აღსანიშნავია, რომ ვიზიტის ფარგლებში დაგეგმილია აშშ-ის წამყვანი სპეციალისტების ვიზიტი რეგიონებში და ვითარების ადგილზე გაცნობა. ამერიკელი სპეციალისტები, ქართველ მეცნიერებთან ერთად, მონაწილეობას მიიღებენ სიმპოზიუმში „აზიური ფაროსანა (Halyomorpha halys) - გლობალური გამოწვევა, საერთაშორისო გამოცდილება და პრობლემების გადაწყვეტის საუკეთესო გზები“.შეხვედრა აშშ-ის საერთაშორისო განვითარების სააგენტოს საქართველოს სასოფლო-სამეურნეო წარმოების ეფექტიანობის აღდგენის პროექტის (USAID/REAP) და კომპანია TRECE Inc (აშშ) ორგანიზებით გაიმართა.გარემოს დაცვისა და სოფლის მეურნეობის სამინისტროში გამართულ შეხვედრას მინისტრის მოადგილე გიორგი ხანიშვილი, სურსათის ეროვნული სააგენტოს და სოფლის მეურნეობის სამეცნიერო-კვლევითი ცენტრის ხელმძღვანელი პირები ესწრებოდნენ. 
#

NAHP-ის სამეთვალყურეო ჯგუფის რიგით 30-ე შეხვედრა გაიმართა

გარემოს დაცვისა და სოფლის მეურნეობის სამინისტროში ცხოველთა ჯანმრთელობის ეროვნული პროგრამის (NAHP) სამეთვალყურეო ჯგუფის რიგით 30-ე შეხვედრა გაიმართა.შეხვედრას სოფლის მეურნეობის მინისტრის პირველი მოადგილე ნოდარ კერესელიძე ხელმძღვანელობდა.მისასალმებელ სიტყვაში მინისტრის პირველმა მოადგილემ ცხოველთა ჯანმრთელობის საკითხებზე სამეთვალყურეო ჯგუფის ფორმატში მუშაობის 10 წლიანი გამოცდილების შესახებ ისაუბრა და მიღწეული წარმატებებისთვის სამეთვალყურეო ჯგუფის წევრებს მადლობა გადაუხადა.„10 წლიანი მუშაობის განმავლობაში, სამეთვალყურეო ჯგუფის შემადგენლობაც გაიზარდა, დონორთა და კერძო სექტორის ჩართულობაც; კონსოლიდირებული მუშაობა, სახელმწიფოსა და კერძო სექტორის თანამშრომლობა უმნიშვნელოვანესია ცხოველთა ჯანდაცვის ეროვნული პროგრამის ფარგლებში დასახული მიზნების მისაღწევად“, - განაცხადა ნოდარ კერესელიძემ.როგორც მინისტრის პირველმა მოადგილემ შეხვედრაზე აღნიშნა, 2019 წელს გარემოს დაცვისა და სოფლის მეურნეობის სამინისტროს, ამერიკის შეერთებული შტატების სოფლის მეურნეობის დეპარტამენტის პროგრამის დასრულების შემდეგ, სამეთვალყურეო ჯგუფის მენეჯმენტის გადაბარება სრულად მოუწევს. „ცხოველთა ჯანმრთელობის საკითხი აქტუალობას დღესაც არ კარგავს, შესაბამისად, მინდა თითოეულ თქვენგანს ვთხოვო განსაკუთრებული მხარდაჭერა მოსალოდნელ გარდამავალ პერიოდში. ჩვენი მიზანია, წლების განმავლობაში მიღებული შედეგები განვამტკიცოთ და კიდევ უფრო განვავითაროთ“, - განაცხადა ნოდარ კერესელიძემ. შეხვედრაზე საუბარი შეეხო ცხოველთა დაავადებების ზედამხედველობისა და კონტროლის კუთხით განხორციელებულ ღონისძიებებს. სურსათის ეროვნული სააგენტოს, სამინისტროს ლაბორატორიის, დაავადებათა კონტროლისა და საზოგადოებრივი ჯანმრთელობის ეროვნული ცენტრის წარმომადგენლებმა მიმდინარე აქტივობების და სამომავლო გეგმების შესახებ ისაუბრეს. შეხვედრას კავკასიის ალიანსების პროგრამის და შიდა ქართლის ვეტერინართა რეგიონული ასოციაციის წარმომადგენლები ესწრებოდნენ.გარემოს დაცვისა და სოფლის მეურნეობის სამინისტროში გამართულ შეხვედრას აშშ-ის სოფლის მეურნეობის დეპარტამენტის (USDA), კოლორადოს სახელმწიფო უნივერსიტეტის (CSU), საქართველოს საზოგადოებრივ საქმეთა ინსტიტუტის (GIPA) სოფლის მეურნეობის განვითარების დეპარტამენტის, გაეროს სურსათის და სოფლის მეურნეობის ორგანიზაციის (FAO), საფრთხეების შემცირების სააგენტოს (DTRA), ავსტრიის განვითარების სააგენტოს (ADA), საქართველოში შვეიცარიის თანამშრომლობის ოფისის (SCO) წარმომადგენლები ესწრებოდნენ.
#

ურთიერთგაგების მემორანდუმის გაფორმება

„საქართველოში ქიმიური ნივთიერებების მდგრადი მართვის შესაძლებლობების გაძლიერების“ პროექტის ფარგლებში, გარემოს დაცვისა და სოფლის მეურნეობის სამინისტროს და ჩეხეთის განვითარების სააგენტოს შორის ურთიერთგაგების მემორანდუმი გაფორმდა.მემორანდუმს ხელი გარემოს დაცვისა და სოფლის მეურნეობის მინისტრმა, ლევან დავითაშვილმა და ჩეხეთის რესპუბლიკის საგანგებო და სრულუფლებიანმა ელჩმა საქართველოში, ტომაშ პერნიცკიმ მოაწერეს. „პროექტის ფარგლებში, საქართველო ჩეხეთის განვითარების სააგენტოსაგან მნიშვნელოვან დახმარებას მიიღებს როგორც საქართველოში ქიმიური ნივთიერებების მართვის შესაძლებლობების განვითარების, ასევე, კანონმდებლობის შექმნის კუთხით, რაც ხელს შეუწყობს ქართული კანონმდებლობის ჰარმონიზაციას ევროკავშირის კანონმდებლობასთან. მნიშვნელოვანია, რომ ჩეხეთის რესპუბლიკა ასევე დაგვეხმარება მდგრადი განვითარების მიზნების შესრულების ნაწილშიც, რაც საქართველო-ევროკავშირის ასოცირების შეთანხმების ფარგლებში, ქვეყნის ვალდებულებას წარმოადგენს“,- განაცხადა ლევან დავითაშვილმა.„მოხარული ვარ, რომ მემორანდუმის ფარგლებში მოგვეცემა შესაძლებლობა საქართველოს გავუზიაროთ ჩვენი გამოცდილება ქიმიური ნივთიერებების მდგრადი მართვის მიმართულებით, რაც გარემოს დაცვისთვის უმნიშვნელოვანეს ფაქტორს წარმოადგენს. ასევე, მივესალმები ქიმიური ნივთიერებების მიმართულებით კანონმდებლობის შექმნის ინიციატივას და მასში ჩვენს ჩართულობას, რაც მხარდაჭერაა ქართული კანონმდებლობის ევროკავშირის კანონმდებლობასთან ჰარმონიზაციის პროცესში“, - განაცხადა ჩეხეთის რესპუბლიკის საგანგებო და სრულუფლებიანმა ელჩმა საქართველოში ტომაშ პერნიცკიმ.