#

ლევან დავითაშვილი ბუქარესტში გამართულ მინისტერიალში მონაწილეობდა

საქართველოს გარემოს დაცვისა და სოფლის მეურნეობის მინისტრმა, ლევან დავითაშვილმა 21 მაისს, ქალაქ ბუქარესტში გამართულ მინისტერიალში ,,საერთო საზღვაო დღის წესრიგი შავი ზღვისთვის" მიიღო მონაწილეობა. ევროკომისიისა და რუმინეთის მთავრობის ორგანიზებით გამართული მინისტერიალის ფარგლებში დამტკიცდა შავი ზღვის საერთო დღის წესრიგი, რომელიც შავი ზღვის აუზის ქვეყნების და ევროკომისიის აქტიური მონაწილეობით შემუშავდა. დოკუმენტის მიზნად ისახავს ხელი შეეწყოს ზღვის რესურსების მდგრად მართვას, შავი ზღვის დაბინძურების წინააღმდეგ ბრძოლის კუთხით ერთობლივი ღონისძიებების ჩატარებას, ასევე ბიომრავალფეროვნების შენარჩუნების მიზნით შესაბამისი კვლევების და ღონისძიებების დაგეგმვა-განხორციელებას. ევროკომისია მოახდენს დაგეგმილი აქტივობების კოორდინაციას, ასევე შეიმუშავებს კონკრეტულ წინადადებებს დღის წესრიგის შესრულების უზრუნველსაყოფად. აღსანიშნავია, რომ დოკუმენტში ასახულია ის გამოწვევები და საჭიროებები, რაც შავი ზღვის აუზის ქვეყნებს, მათ შორის, საქართველოს აქვს. მინისტერიალში მონაწილეობდნენ ევროკომისარი გარემოს დაცვის, საზღვაო საქმეთა და მეთევზეობის საკითხებში - კარმენუ ველა, შავი ზღვის აუზის ქვეყნების გარემოსდაცვის მინისტრები და სხვა მაღალი თანამდებობის პირები, ასევე დიპლომატიური კორპუსის და საერთაშორისო საფინანსო ინსტიტუტების წარმომადგენლები.
#

კახეთში მევენახეთა პირველი კონფერენცია გაიმართა

გარემოს დაცვისა და სოფლის მეურნეობის სამინისტროს მხარდაჭერით, გურჯაანის მუნიციპალიტეტის სოფელ კაჭრეთში მევენახეთა კონფერენცია გაიმართა. კონფერენციაში მონაწილეობა რეგიონის მეღვინეებმა,  მევენახეებმა და დარგის სპეციალისტებმა მიიღეს.  კონფერენციის მონაწილეებს მისასალმებელი სიტყვით საქართველოს გარემოს დაცვისა და სოფლის მეურნეობის მინისტრის მოადგილემ, სოლომონ პავლიაშვილმა, პროექტის ინიციატორმა, გურჯაანის მაჟორიტარმა დეპუტატმა, დავით სონღულაშვილმა, ახმეტისა და თელავის მაჟორიტარმა დეპუტატმა, გელა სამხარაულმა და კახეთის მხარის რწმუნებულმა, ირაკლი ქადაგიშვილმა მიმართეს. „წელს მევენახეთა კონფერენცია  პირველად იმართება. ხაზგასმით აღსანიშნავია, რომ ღონისძიება  შუაგულ კახეთში ტარდება და მონაწილეობას ჩვენი მევენახეები, მეღვინეები, ფერმერები და დარგით დაინტერესებული პირები იღებენ. მათ ყველაზე კარგად იციან სექტორში არსებული გამოწვევები. გასულ წელს 85 მლნ ბოთლზე მეტი ექსპორტი განხორცილდა, ბოლო 4 წლის განმავლობაში კახეთში ახალი ვენახები 7 000 ჰექტარზეა გაშენებული. ეს არის გარემოს დაცვისა და სოფლის მეურნეობის სამინისტროს მიერ მევენახეობა-მეღვინეობის დარგის მიმართულებით განხორციელებული მხარდამჭერი პროექტების  შედეგი“, - განაცხადა სოლომონ პავლიაშვილმა.  კონფერენციაზე მევენახეობის დარგში არსებულ გამოწვევებზე სსიპ სოფლის მეურნეობის სამეცნიერო-კვლევითი ცენტრის, საქპატენტის, სსიპ ღვინის ეროვნული სააგენტოს, სსიპ სურსათის ეროვნული სააგენტოსა და გარემოს დაცვისა და სოფლის მეურნეობის სამინისტროს წარმომადგენლებმა ისაუბრეს. კონფერენციის დასასრულს, თითოეულ მონაწილეს სერტიფიკატი გადაეცა.
#

ბაქოში, გამოფენაზე „Caspian Agro 2019“ ქართულმა კომპანიებმა საკუთარი პროდუქცია წარმოადგინეს

ბაქოში, აგროსამრეწველო სექტორის საერთაშორისო გამოფენის „CASPIAN AGRO 2019“ ფარგლებში, ქართულ სტენდზე 11 კომპანიის - „მადლიანი 2017“, „ნუტრიმაქსი“, „ასადელი“, „ნუგბარი“, „მეღვინეობა შათირი“, „პროაგრო“, „აპროფი ჯგუფი“, „ოქროთაფლი“, „თაფლი“, „ჩირიფრუტი“, „FRIXX“ - პროდუქცია იყო წარმოდგენილი.  ქართული სტენდი, რომელიც საქართველოს გარემოს დაცვისა და სოფლის მეურნეობის სამინისტროს ორგანიზებით მოეწყო, აზერბაიჯანის რესპუბლიკის პრეზიდენტმა, ილჰამ ალიევმა საქართველოს საგანგებო და სრულუფლებიან ელჩთან, ზურაბ პატარაძესთან და საქართველოს საგარეო საქმეთა მინისტრის  მოადგილესთან, ლაშა დარსალიასთან ერთად დაათვალიერა. ქართულმა მხარემ აზერბაიჯანის პრეზიდენტს ქართველი მწარმოებლების მიერ წარმოდგენილი პროდუქტები გააცნო და საჩუქრად  „ვეფხისტყაოსანი“ გადასცა.„განსაკუთრებული მადლობა მინდა გადავუხადო საქართველოს გარემოს დაცვისა და სოფლის მეურნეობის სამინისტროს და იმ ქართულ კომპანიებს, რომლებიც გამოფენაში იღებენ მონაწილეობას. გამოფენის ფარგლებში ბევრი საქმიანი შეხვედრა შედგა და სამომავლო ურთიერთობების პერსპექტივა გაჩნდა. აღსანიშნავია, რომ საქართველოსადმი ინტერესი, როგორც ტურისტული, ასევე სოფლის მეურნეობის და ერთობლივი წარმოების შექმნის მიმართულებით, ყოველდღიურად იზრდება“, - განაცხადა ზურაბ პატარაძემ.აგროსამრეწველო სექტორის საერთაშორისო გამოფენაში „CASPIAN AGRO’’ ქართველმა მეწარმეებმა მეექვსედ მიიღეს მონაწილეობა. საგამოფენო სივრცეში სხვადასხვა ქვეყნის, მათ შორის, გერმანიის, იტალიის, ესპანეთის, რუსეთის, თურქეთის, ინდონეზიის და ნიდერლანდების 450-მდე კომპანიის პროდუქცია იყო წარმოდგენილი.
#

საქართველოში ნარჩენების ინტეგრირებული მართვის სისტემის განხორციელების მხარდაჭერის შესახებ პროექტის მიმდინარეობა განიხილეს

სასტუმროში „Holiday Inn“ გამართულ შეხვედრაზე შვედეთის საერთაშორისო განვითარების თანამშრომლობის სააგენტოს  (SIDA) პროექტის მნიშვნელობაზე იმსჯელეს. აღნიშნული პროექტი საქართველოში ნარჩენების ინტეგრირებული მართვის სისტემის განხორციელების მხარდაჭერასა და შესაძლებლობების ზრდას ითვალისწინებს.შეხვედრის მონაწილეებს მისასალმებელი სიტყვით მიმართა გარემოს დაცვისა და სოფლის მეურნეობის მინისტრის მოადგილემ, სოლომონ პავლიაშვილმა და შვედეთის საელჩოს საქართველოში, შვედეთის განვითარების სააგენტოსა და შვედეთის გარემოს დაცვის სააგენტოს  გარემოს დაცვის სფეროში გაწეული მხარდაჭერისთვის მადლობა გადაუხადა. „საქართველოს ევროკავშირთან ასოცირების ხელშეკრულებით განსაზღვრული ვალდებულებების განხორციელება გარემოს დაცვის სფეროში ჩვენთვის უმნიშვნელოვანეს მიზანს წარმოადგენს. ვაფასებთ თქვენს მხარდაჭერას ნარჩენების მართვის კუთხით განხორციელებულ პროექტებში. სასწავლო ტურების ფარგლებში შვედეთის გამოცდილების გაზიარება მნიშვნელოვნად დაეხმარა სამინისტროს მწარმოებლის გაფართოებული ვალდებულების კანონქვემდებარე აქტების, სახიფათო ნარჩენების ეროვნული სისტემისა და ბიოდეგრადირებადი ნარჩენების მართვის სტრატეგიის შემუშავებაში“, - განაცხადა სოლომონ პავლიაშვილმა. შვედეთის გარემოს დაცვის სააგენტოსთან ნარჩენების მართვის სფეროში თანამშრომლობით განხორციელებული მიმდინარე პროექტი ფოკუსირებულია სახიფათო და ბიოდეგრადირებადი ნარჩენების ეფექტიანად მართვაზე და შესაბამისი დაინტერესებული საჯარო და კერძო სექტორის შესაძლებლობის გაძლიერებაზე. შეხვედრას გარემოს დაცვისა და სოფლის მეურნეობის სამინისტროს, შვედეთის საერთაშორისო განვითარების თანამშრომლობის ორგანიზაციის, შპს თბილსერვის ჯგუფისა და შპს საქართველოს მყარი ნარჩენების მართვის კომპანიის წარმომადგენლები ესწრებოდნენ. 
#

სტრატეგიული გარემოსდაცვითი შეფასების ეფექტიანი განხორციელების მიზნით, ტრენინგი მიმდინარეობს

სტრატეგიული გარემოსდაცვითი შეფასების (სგშ) ერთ-ერთი სექტორის - დაგეგმარების და სივრცითი მოწყობის გარემოზე ზემოქმედების განხილვის მიზნით, სასტუმროში „Holiday Inn“ ტრენინგი დაიწყო.ტრენინგი გარემოს დაცვისა და სოფლის მეურნეობის მინისტრის პირველმა მოადგილემ გიორგი ხანიშვილმა გახსნა.მინისტრის მოადგილემ ისაუბრა ტრენინგის მნიშვნელობის შესახებ და ყურადღება სტრატეგიული გარემოსდაცვითი შეფასების ეფექტიანი განხორციელების მიზნით, ცოდნის ამაღლების საჭიროებაზე გაამახვილა.ტრენინგის ფარგლებში, დაგეგმარების და სივრცითი მოწყობის გარემოზე ზემოქმედების საკითხი მარტვილის რაიონში, კურორტ ლებარდეს სივრცითი მოწყობის დოკუმენტის მაგალითზე განიხილეს.აღსანიშნავია, რომ სტრატეგიული გარემოსდაცვითი შეფასების სისტემა ქართული კანონმდებლობისთვის ახალ ინსტრუმენტს წარმოადგენს. შესაბამისად, ტრენინგი მნიშვნელოვანია სტრატეგიული გარემოსდაცვითი შეფასების პროცესში ჩართული ყველა მხარისთვის.ტრენინგი, გაეროს ევროპის ეკონომიკური კომისიის (UNECE), ჩეხეთის რესპუბლიკის მთავრობის და ევროკავშირის მხარდაჭერით გაიმართა.ორდღიან ტრენინგს გაეროს ევროპის ეკონომიკური კომისიის საერთაშორისო და ეროვნული კონსულტანტები გაუძღვებიან.ტრენინგში, გარემოს დაცვისა და სოფლის მეურნეობის სამინისტროს და გარემოს ეროვნული სააგენტოს წარმომადგენლებთან ერთად, ადგილობრივი და რეგიონული მუნიციპალიტეტების ასევე, შესაბამისი სამინისტროების წარმომადგენლები მონაწილეობდნენ.
#

აგროდაზღვევის პროგრამის ფარგლებში, 2014 წლიდან დღემდე, ანაზღაურებული ზარალი 35 მილიონ ლარზე მეტია

2019 წელს, აგროდაზღვევის პროგრამისთვის სახელმწიფო ბიუჯეტიდან  8 მილიონი ლარი გამოიყო. დღეის მონაცემებით,  საქართველოს მასშტაბით, პროგრამის ფარგლებში გაცემულია 4 217  პოლისი, საიდანაც 3,381 პოლისი კახეთის რეგიონში გაიცა. მიმდინარე წელს, აგროდაზღვევის სახელმწიფო პროგრამაში ჩართულია 8 სადაზღვევო კომპანია. სურვილის შემთხვევაში, პროგრამაში ჩართვა საქართველოს ტერიტორიაზე მოქმედ ყველა ლიცენზირებულ  სადაზღვევო კომპანიას შეუძლია.2019 წელს, წინა წლების მსგავსად, სახელმწიფო სადაზღვევო პოლისის ღირებულების თანადაფინანსებას ყველა კულტურაზე 70%-ით, ხოლო ვაზზე  50% - ით  განახორციელებს. აგროდაზღვევის პროგრამაში ჩართვა შეუძლია ფიზიკურ ან იურიდიულ პირს, რომელსაც საკუთრებაში, სარგებლობაში ან ფაქტობრივ მფლობელობაში გააჩნია არაუმეტეს  5 ჰა  (ხორბლის მოსავლის დაზღვევის შემთხვევაში არაუმეტეს 30 ჰა) ფართობის ჩათვლით სასოფლო-სამეურნეო დანიშნულების მიწის ნაკვეთი. ასევე ნებისმიერ ბენეფიციარი, რომელიც ფლობს მაგალითად 30 ან 100 ჰა ფართობის ნაკვეთს, 5 ჰა  მიწის ნაკვეთის დაზღვევისას  შეძლებს სახელმწიფოს მხრიდან თანადაფინანსება მიიღოს.  აგროდაზღვევის პროგრამის ფარგლებში, სადაზღვევო პოლისი ფარავს შემდეგ სადაზღვევო  რისკებს: სეტყვა, წყალდიდობა, ქარიშხალი და საშემოდგომო ყინვა (ციტრუსოვანი კულტურებისთვის).წლიდან წლამდე პროექტი ცვლილებებს განიცდის და საერთაშორისო სტანდარტის გათვალისწინებით იხვეწება. 2018 წელს, გარემოს დაცვისა და სოფლის მეურნეობის სამინისტროს ინიციატივით, აგროდაზღვევის სახელმწიფო  პროგრამაში შევიდა ცვლილება, რომლის თანახმად, დაზღვევას ექვემდებარება მხოლოდ სსიპ საჯარო რეესტრის ეროვნულ სააგენტოში დარეგისტრირებულ მიწის ნაკვეთზე მოყვანილი მოსავალი. აღნიშნული ცვლილება 2019 წელსაც იმოქმედებს. მოცდის პერიოდი და სადაზღვევო პოლისის გაცემის თარიღიდან 4 დღის ვადითაა განსაზღვრული.2014- 2018 წლებში აგროდაზღვევის პროგრამის ფარგლებში:  გაცემულია 81 453 პოლისი დაზღვეულია  71 413  ჰა ფართობი დაიზღვა საერთო ჯამში 551 366 395 ლარის მოსავალი დაზღვევის მომსახურებაში გადასახდელი თანხიდან, სახელმწიფომ 33 854 463 ლარის სუბსიდირება მოახდინა.აგროდაზღვევის სახელმწიფო პროგრამა 2014 წელს დაიწყო. დაწყების დღიდან დღემდე, აგროდაზღვევის პროგრამის ფარგლებში  ანაზღაურებული ზარალი 35 304 952 მლნ. ლარს შეადგენს.პროგრამის მიზანი აგროსექტორში სადაზღვევო ბაზრის განვითარება,  სასოფლო-სამეურნეო საქმიანობის ხელშეწყობა და სასოფლო-სამეურნეო საქმიანობით დაკავებული პირებისთვის შემოსავლის  შენარჩუნება და რისკების (სეტყვა, წყალდიდობა, ქარიშხალი, საშემოდგომო ყინვა) შემცირებაა.
#

აგროდაზღვევის პროგრამაში ჩართულ ფერმერებს სტიქიის შედეგად მიყენებული ზარალი აუნაზღაურდებათ

გარემოს დაცვისა და სოფლის მეურნეობის მინისტრი ლევან დავითაშვილი კახეთისა და შიდა ქართლის რეგიონების გუბერნატორებს, საქართველოს სადაზღვევო  და საბანკო ასოციაციების თავმჯდომარეებს შეხვდა.  შეხვედრაზე მიმდინარე წლის მაისში, კახეთისა  და შიდა ქართლის რეგიონებში  მომხდარი სტიქიური მოვლენების შედეგები განიხილეს.  გარემოს დაცვისა და სოფლის მეურნეობის მინისტრმა აგროდაზღვევის პროგრამის მნიშვნელობაზე გაამახვილა ყურადღება და აღნიშნა, რომ სტიქიით მიყენებული ზარალის მინიმუმადე შემცირებისათვის,  აღნიშნული პროგრამა ფერმერებისთვის უალტერნატივოა.  „აგროსექტორის განვითარებისთვის მნიშვნელოვანია მაქსიმალურად ბევრი ფერმერი ჩაერთოს აგროდაზღვევის პროგრამაში, რომლის მიზანი  ფერმერებისთვის რისკების შემცირება და შემოსავლის შენარჩუნებაა. ჩვენ აქტიურად ვმუშაობთ პროგრამის დახვეწისა და მასშტაბის ზრდის მიმართულებით. სტიქიის შედეგად დაზარალებული ფერმერების დახმარების მიზნით, სამინისტრო მზად არის აქტიურად ჩაერთოს აგროდაზღვევის პროგრამის ბენეფიციარებსა და სადაზღვევო კომპანიებს შორის ეფექტიანი კომუნიკაციის უზრუნველყოფაში“, -  აღნიშნა ლევან დავითაშვილმა. შეხვედრაზე საბანკო და სადაზღვევო სექტორის წარმომადგენლებმა მზადყოფნა გამოთქვეს, სტიქიის შედეგად დაზარალებული  თითოეული ფერმერის შემთხვევა ინდივიდუალურად განიხილონ.მიმდინარე წლის მაისში, კახეთისა  და შიდა ქართლის რეგიონებში  მომხდარი სტიქიური მოვლენების შემდეგ, სადაზღვევო კომპანიებს აგროდაზღვევის პროგრამაში ჩართულმა 169-მა ბენეფიციარმა (150-მა კახეთის რეგიონიდან, 19-მა - გორის მუნიციპალიტეტიდან) მიმართა. სადაზღვევო კომპანიების წარმომადგენლები, მიყენებული ზარალის დათვლის მიზნით, სტიქიის ზონებში უკვე მუშაობენ. სამინისტროში გამართულ შეხვედრაზე  ასევე იმსჯელეს აგროსექტორში სადაზღვევო კუთხით არსებულ გამოწვევებზე, ფერმერთა საჭიროებების გათვალისწინებით აგროდაზღვევის პროგრამაში ახალი კომპონენტების დამატების საკითხებზე.   საბანკო და სადაზღვევო სექტორის წარმომადგენლებთან  გამართულ შეხვედრას გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი და  სოფლის მეურნეობის პროექტების მართვის სააგენტოს წარმომადგენლები ესწრებოდნენ.  2019 წელს, აგროდაზღვევის პროგრამისთვის სახელმწიფო ბიუჯეტიდან  8 მილიონი ლარი გამოიყო. დღეის მონაცემებით,  საქართველოს მასშტაბით, პროგრამის ფარგლებში გაცემულია 4 217  პოლისი, საიდანაც 3,381 პოლისი კახეთის რეგიონში გაიცა.