#

რთველის ორგანიზებულად ჩატარების უზრუნველსაყოფად, სამინისტრომ მუშაობა უკვე დაიწყო

ქართული ღვინის ხარისხის გაუმჯობესების მიზნით, რთველი 2021-ის ფარგლებში,  ყურძნის ხარისხსა  და ადგილწარმოშობის ჯიშების სპეციფიკაციებით განსაზღვრულ მოსავლიანობის ლიმიტზე კონტროლი გამკაცრდება. ამასთან ერთად, დაგეგმილია რთველის ჩატარება ვენახების კადასტრის პროგრამის მონაცემების საფუძველზე  და ყურძნის ჩაბარების დროს არსებული რიგების მართვის ელექტრონული პროგრამის დანერგვა.აღნიშნული საკითხები გარემოს დაცვისა და სოფლის მეურნეობის მინისტრის  მოადგილემ,  ოთარ შამუგიამ რაჭა-ლეჩხუმისა და ქვემო სვანეთის სამხარეო ადმინისტრაციის ხელმძღვანელებთან და ადგილობრივი მუნიციპალიტეტების მერებთან ამბროლაურში გამართულ შეხვედრაზე განიხილა.  მინისტრის მოადგილის განცხადებით, შემოდგომაზე ყურძნის მოსავლის დაბინავების პროცესის ორგანიზებულად და შეუფერხებლად წარმართვის უზრუნველსაყოფად, რთველისთვის მზადება უკვე დაწყებულია.  „გასულ წელს, რაჭა-ლეჩხუმის რეგიონში რეკორდული რაოდენობის ყურძნის მოსავალი დაბინავდა; შესაბამისად, მნიშვნელოვნად გაიზარდა მევენახეების შემოსავალიც. თუმცა, იყო პანდემიით განპირობებული გამოწვევებიც, რასაც ერთობლივად უნდა გავუმკლავდეთ და 2021 წლის რთველიც წარმატებულად დასრულდეს. ძალიან მნიშვნელოვანია, ქართული ღვინის ხარისხის გაუმჯობესების მიმართულებით დაგეგმილი ღონისძიებების შესახებ ინფორმაცია დროულად იყოს მიტანილი მევენახე ფერმერებამდე. ამ მიმართულებით აქტიურად მუშაობენ სამინისტროს საინფორმაციო-საკონსულტაციო სამსახურები, რომლებიც, ღვინის ეროვნული სააგენტოს წარმომადგენლებთან ერთად, მაისის თვიდან დაიწყებენ შეხვედრებს რეგიონის ყველა სოფელში. მსგავსი შეხვედრები უკვე ჩატარდა კახეთის რეგიონში“, - განაცხადა ოთარ შამუგიამ.აღსანიშნავია, რომ მიმდინარე წელს, იგეგემება ვენახების კადასტრის პროგრამის დასრულება კახეთისა და რაჭა-ლეჩხუმის რეგიონებში, რაც მნიშვნელოვანია მევენახეობა-მეღვინეობის დარგის განვითარების და ხარისხიანი ღვინის წარმოების ხელშეწყობისთვის. რაჭა-ლეჩხუმის რეგიონში ვენახების საკადასტრო სამუშაოები 2014 წელს ჩატარდა. ვინაიდან მას შემდეგ რეგიონში მნიშვნელოვნად გაიზარდა ვენახების ფართობები, მიმდინარე წელს მონაცემების განახლების მიზნით განხორციელდება „ტვიშისა“ და „ხვანჭკარის“ მიკროზონების აეროგადაღებები.როგორც რაჭა-ლეჩხუმისა და ქვემო სვანეთის სახელმწიფო რწმუნებულმა, პაპუნა მარგველიძემ აღნიშნა, დაგეგმილი სიახლეები არის დროული და განსაკუთრებით მნიშვნელოვანი რაჭა-ლეჩხუმის რეგიონის მოსახლეობისთვის, რომელთა ეკონომიკური შემოსავლები პირდაპირ არის დამოკიდებული მევენახეობა-მეღვინეობის დარგთან. ღვინის ეროვნული სააგენტოს თავმჯდომარის, ლევან მეხუზლას განცხადებით, ჩასაბარებელი ყურძნის შაქრიანობა, რომელიც შესაბამისი ნორმატიული დოკუმენტაციებითაა დადგენილი, განსაზღვრავს ყურძნის ხარისხს, რაც შემდგომ მის საბაზრო ღირებულებაზეც აისახება. სოფლის განვითარების სააგენტოს რეგიონებთან ურთიერთობის დეპარტამენტის უფროსმა, ლაშა შალამბერიძემ შეხვედრაზე იმ აქტივობებზე ისაუბრა, რომელთა ფარგლებშიც,  ფერმერები ამომწურავ ინფორმაციას მიიღებენ სამინისტროს მიერ დაგეგმილ და მიმდინარე პროექტებზე, მათ შორის, რთველის დროს რიგების მართვის ელექტრონულ პროგრამაზე.
#

გიორგი ხანიშვილმა საქართველო-თურქეთის სოფლის მეურნეობის III ონლაინ კომიტეტი მისასალმებელი სიტყვით გახსნა

გარემოს დაცვისა და სოფლის მეურნების მინისტრის პირველმა მოადგილემ, გიორგი ხანიშვილმა საქართველო-თურქეთის სოფლის მეურნეობის III  ონლაინ კომიტეტი მისასალმებელი სიტყვით გახსნა.გიორგი ხანიშვილმა  ქვეყნებს შორის არსებულ პარტნიორულ თანამშრომლობაზე და სავაჭრო-ეკონომიკური ურთიერთობების გაღრმავების მნიშვნელობაზე ისაუბრა. ყურადღება გამახვილდა სოფლის მეურნეობის საექსპორტო პოტენციალის მქონე პროდუქტებზე. როგორც მინისტრის პირველმა მოადგილემ განაცხადა, სასოფლო-სამეურნეო და სატყეო მიმართულებით ქვეყნების თანამშრომლობის მნიშვნელოვანი პერსპექტივები არსებობს და აკვაკულტურის, მცენარეთა დაცვის, ცხოველთა ჯანდაცვისა და  სამეცნიერო მიმართულებით ქვეყნებს შორის თანამშრომლობის გააქტიურების  სურვილი გამოთქვა. თურქეთის რესპუბლიკის სოფლის მეურნეობისა და მეტყევეობის მინისტრის მოადგილე აკიფ ოზქალდის განცხადებით, საქართველოში სოფლის მეურნეობის განვითარება თვალსაჩინოა. აკიფ ოზქალდიმ ქვეყნებს შორის სავაჭრო-ეკონომიკური თანამშრომლობის გაფართოების მნიშვნელობაზე და საქართველოში წარმოებისა და სამეცნიერო მიმართულებით ინვესტირების შესაძლებლობაზე ისაუბრა.
#

სახელმწიფოს ხელშეწყობით შექმნილი საწარმო 12 სახეობის გაყინულ ხილს აწარმოებს

გარემოს დაცვისა და სოფლის მეურნეობის მინისტრი ლევან დავითაშვილი სოფლის განვითარების სააგენტოს დირექტორთან, ილია თამარაშვილთან ერთად სახელმწიფოს ხელშეწყობით შექმნილ ხილის გადამმუშავებელ საწარმოში  წარმოების პროცესს გაეცნო.   „ჩვენთვის მნიშვნელოვანია ღირებულებათა ჯაჭვის ყველა რგოლის განვითარება. შესაბამისად, სამინისტროს პოლიტიკა მიმართულია როგორც პირველადი წარმოების ხელშეწყობის, ასევე შემნახველი და გადამმუშავებელი ინფრასტრუქტურის განვითარებისკენ. მეხილეობის მიმართულებით დადებითი შედეგები უკვე სახეზეა. დღეისათვის, ქვეყნის მასშტაბით, 11 000 ჰა-ზე მეტი ფართობის ინტენსიური, თანამედროვე ბაღია გაშენებული, იმისთვის, რომ მაქსიმალური ღირებულება მივიღოთ, შევძლოთ ნედლეულის უდანაკარგოდ შენახვა, ჩავანაცვლოთ იმპორტი და საექსპორტო პოტენციალი გავზარდოთ, განსაკუთრებით მნიშვნელოვანია თანამედროვე სტანდარტების შემნახველი, გადამმუშავებელი და სამაცივრო საწარმოების შექმნა. ამ მიმართულებით, სახელმწიფოს აქვს  როგორც საგრანტო, ისე საკრედიტო რესურსით დახმარების პაკეტები. აღნიშნული საწარმოც, რომელიც მთელი წლის განმავლობაში ახორციელებს ხილის, მათ შორის, კენკრის შოკური გაყინვის მეთოდით წარმოებას,  სახელმწიფოს მხარდაჭერით არის შექმნილი“, - განაცხადა ლევან დავითაშვილმა. შპს „მამბო ფროსტი“  სოფლის განვითარების სააგენტოს მხარდაჭერით შექმნილი საწარმოა, რომელიც   შოკური მეთოდით დამუშავებული ხილის რეალიზაციას ადგილობრივ ბაზარზე  ახდენს, ექსპორტს კი აზერბაიჯანში ახორციელებს.   საწარმო სოფლის განვითარების სააგენტოს მხარდაჭერით, 2020 წელს შეიქმნა. საწარმოში, ჯამურად, 4 მლნ ლარამდე ინვესტიცია განხორციელდა, მათ შორის 1,500,000 ლარზე მეტი  შეღავათიანი აგროკრედიტია.   შპს „მამბო ფროსტის“, საწარმო სადაც 20-მდე ადამიანია  დასაქმებულია  12 დასახელების  ცოცხლად  გაყინულ ხილს, მათ შორის კენკრას აწარმოებს. საწარმოში შოკური გაყინვის მეთოდის გამოყენებით, 24 საათში, 2,5 ტონა ხილის გადამუშავებაა შესაძლებელი.  საწარმოში მხოლოდ ადგილობრივი წარმოების ნედლეული გადამუშავდება. სოფლის განვითარების სააგენტოს საგრანტო პროგრამების ფარგლებში, მხარდაჭერილია 50 სამაცივრო და შემნახველი მეურნეობა, მათი დაფინანსება კი,  ჯამურად, 23 მილიონ ლარს აღემატება.  შეღავათიანი აგროკრედიტის პროექტის ფარგლებში შემნახველი და სამაცივრო ინფრასტრუქტურის განვითარებისთვის ჯამში გაცემულია 165 მილიონ ლარზე მეტი  ღირებულების 1,645 სესხი, სააგენტოს გაცემული თანადაფინანსება 25,700,000 ლარზე მეტია.
#

„სუფთა რეგიონი 2020“ კონკურსის გამარჯვებულები გამოვლინდნენ

საქართველოს მწვანეთა მოძრაობა/დედამიწის მეგობრები-საქართველოს, საქართველოს გარემოს დაცვისა და სოფლის მეურნეობის სამინისტროსა და თბილისის საკრებულოს მხარდაჭერით, კონკურსის „სუფთა რეგიონი 2020“ გამარჯვებულების დაჯილდეობის ღონისძიება გაიმართა. მიმდინარე წელს, კონკურისის „სუფთა რეგიონი“  დაჯილდოების ღონისძიება მეხუთედ აღინიშნა და ის 8 ნომინაციაში ჩატარდა. კონკურსის პერიოდში, მონაწილეებს საშუალება ჰქონდათ ორგანიზატორებისთვის ჩამოთვლილი ნომინაციების ამსახველი ფოტო/ვიდეო მასალები წარმოედგინათ.2020 წლის „სუფთა რეგიონის“ კონკურსის ნომინაციებში გამარჯვებულები არიან:„სუფთა რეგიონი 2020“ - კახეთის რეგიონი„სუფთა ქალაქი 2020“ - ქ. ქუთაისი„სუფთა მუნიციპალიტეტი 2020“ - ზუგდიდის მუნიციპალიტეტი„სუფთა სოფელი 2020“ - სოფელი ზედა ეწერი (სამეგრელო-ზემო სვანეთი)„ლამაზი აივანი 2020“ - რუსუდან ხარგელია (ქ. ზუგდიდი)„სუფთა/ლამაზი ქუჩა 2020“ -  ს. ზაქარიაძის ქუჩა (ქ. თბილისი) და გამსახურდიას გამზირი (ქ. ზუგდიდი)„საწარმოს ლამაზი ეზო 2020“ - შპს „ღვინაშვილების მარანი“ (ქ. საგარეჯო)„ლამაზი ეზო 2020" - ლუიზა ფანცულაია (ხონის მუნიციპალიტეტი)კონკურსის ჟიურის გადაწყვეტილებით სიგელები გადაეცა:'ლაგოდეხისა და ახალციხის მუნიციპალიტეტებს - ნარჩენების მართვის სისტემის გაუმჯობესებაში შეტანილი წვლილისთვის;სოფლების  ხურჩა და ველისციხის წარმომადგენლებს ნომინაციაში სუფთა/ლამაზი ეზო; სიგელი ასევე გადაეცა  ეთერ პატარაიას (ქ.თბილისი, წყნეთი);ნომინაციაში სუფთა/ლამაზი ქუჩა, სიგელი მიენიჭა გოგებაშვილის ქუჩას (ქ. გორი). კონკურსი ჩატარდა პროექტის „დავიცვათ საქართველოს სისუფთავე“ ფარგლებში, რომელსაც ახორციელებს არასამთავრობო ორგანიზაციები „დავიცვათ საქართველოს სისუფთავე“ (KGT), ადგილობრივ და შვედ პარტნიორ-ორგანიზაციებთან ერთად, საქართველოს ბუნების მკვლევართა კავშირი „ორქისი“, „საქართველოს მწვანეთა მოძრაობა/დედამიწის მეგობრები - საქართველო“, საქართველოს გარემოს დაცვისა და სოფლის მეურნეობის სამინისტრო და მისი სტრუქტურული ერთეული სსიპ „გარემოსდაცვითი ინფორმაციისა და განათლების ცენტრი“, ასევე მყარი ნარჩენების მართვის კომპანიასთან თანამშრომლობის ფარგლებში, შვედეთის მთავრობის მხარდაჭერით.
#

გარემოსდაცვითი პასუხისმგებლობის კანონის აღსრულების ხელშეწყობის მიზნით, გარემოს დაცვისა და სოფლის მეურნეობის სამინისტროსა და გაეროს განვითარების პროგრამას (UNDP) შორის თანამშრომლობის მემორანდუმი გაფორმდა

გარემოსდაცვითი პასუხისმგებლობის კანონის აღსრულების ხელშეწყობის მიზნით,  გარემოს დაცვისა და სოფლის მეურნეობის სამინისტროსა და გაეროს განვითარების პროგრამას (UNDP) შორის თანამშრომლობის მემორანდუმი გაფორმდა. მემორანდუმს ხელი გარემოს დაცვისა და სოფლის მეურნეობის მინისტრმა, ლევან დავითაშვილმა და  UNDP-ის მოქმედმა ხელმძღვანელმა, ანა ჩერნიშოვამ მოაწერეს.მემორანდუმი სამინისტროს, მის სისტემაში შემავალ უწყებებსა და კერძო სექტორს შორის მჭიდრო თანამშრომლობას ითვალისწინებს გარემოზე ზემოქმედების შეფასების მოქნილი მექანიზმის შემუშავების, გარემოსდაცვითი ცნობიერების ამაღლებისა და საშუალო სკოლებში გარემოსდაცვითი განათლების დანერგვის მიმართულებებით.  „საჯარო, კერძო და სამოქალაქო სექტორების თანამშრომლობა მნიშვნელოვანია საქართველოს გარემოსდაცვითი მიზნების მისაღწევად. ჩვენთვის გარემოსდაცვითი კანონმდებლობის შემუშავება და აღსრულება უმნიშვნელოვანეს პრიორიტეტს წარმოადგენს. მადლობას ვუხდი ევროკავშირს, გაეროს განვითარების პროგრამას და შვედეთის განვითარებისა და თანამშრომლობის სააგენტოს მრავალწლიანი თანამშრომლობისა და გაწეული მხარდაჭერისთვის. გარემოსდაცვითი პოლიტიკის განვითარების პროცესში, ჩვენთვის ტექნიკურ მხარდაჭერას, რომელსაც დონორი და პარტნიორი ორგანიზაციები ახორციელებენ, განსაკუთრებული მნიშვნელობა აქვს“,- განაცხადა ლევან დავითაშვილმა.„ეს არის ძალიან მნიშვნელოვანი მემორანდუმი, რომელიც ხელს შეუწყობს ქვეყანაში გარემოს დაცვის ეფექტიან უზრუნველყოფას. მოხარული ვარ, რომ  მთავრობასთან და შვედ პარტნიორებთან თანამშრომლობით გვექნება საქართველოს მწვანე ქვეყანად განვითარების ხელშეწყობის შესაძლებლობა“, - განაცხადა ანა ჩერნიშოვამ.  106,000 აშშ დოლარის ღირებულების ცხრათვიანი პროექტი  UNDP-სა და შვედეთის მთავრობის ფართომასშტაბიანი პროგრამის ფარგლებში განხორციელდება, რომლის მიზანსაც საქართველოს საჯარო სექტორში მიმდინარე რეფორმირების პროცესის ხელშეწყობა წარმოადგენს.„გარემოს დაცვა ჩვენი საერთო პასუხისმგებლობაა. შვედეთი მხარს უჭერს საქართველოს მიერ მდგრადი განვითარების მიზნების მიღწევას. მოხარული ვარ ქვეყანაში გარემოსდაცვითი პასუხისმგებლობის კანონის აღსრულების ხელშეწყობის პროცესში მონაწილეობით”, - განაცხადა საქართველოში შვედეთის ელჩის მოადგილემ, შვედეთის განვითარებისა და თანამშრომლობის სააგენტოს ხელმძღვანელმა, ერიკ ილესმა.აღსანიშნავია, რომ, 2021 წლის მარტში, საქართველოს პარლამენტმა მიიღო კანონი გარემოსდაცვითი პასუხისმგებლობის შესახებ, რომელიც ძალაში 2022 წელს უნდა შევიდეს. UNDP-ის მხარდაჭერით, გარემოს დაცვისა და სოფლის მეურნეობის სამინისტრო დაასრულებს აღნიშნული კანონის ხუთი კანონქვემდებარე აქტის შემუშავებას, რომლებშიც დეტალურად იქნება გაწერილი გარემოზე ზემოქმედების მონიტორინგისა და მიყენებული ზიანის შემთხვევაში ვალდებულების დაკისრებისა და აღსრულების მექანიზმები.მემორანდუმის ფარგლებში, სამინისტროს 60 თანამშრომელი გადამზადდება გარემოსდაცვითი მონიტორინგის ჩატარებისა და გარემოსდაცვითი პასუხისმგებლობის აღსრულების საკითხებში.ღონისძიებას მინისტრის მოადგილე ნინო თანდილაშვილი, გარემოსდაცვითი ინფორმაციისა და განათლების ცენტრის დირექტორი თამარ ალადაშვილი,  ევროკავშირის წარმომადგენელი საქართველოში, ატაშე/კავშირის, ენერგიის, გარემოს დაცვისა და კლიმატის ცვლილებების სექტორის კოორდინატორი ალექსანდრე დარასი და სამინისტროს შესაბამისი სამსახურის წარმომადგენლები  ესწრებოდნენ. 
#

გიორგი ხანიშვილი იაპონიის საერთაშორისო თანამშრომლობის სააგენტოს (JICA) საქართველოს ოფისის მუდმივ წარმომადგენელს და სასოფლო კოოპერატივების ექსპერტს შეხვდა

გარემოს დაცვისა და სოფლის მეურნეობის მინისტრის მოადგილე გიორგი ხანიშვილი იაპონიის საერთაშორისო თანამშრომლობის სააგენტოს (JICA) საქართველოს ოფისის მუდმივ წარმომადგენელს, იუკიჰო ეჯირის და სასოფლო კოოპერატივების ექსპერტს, ტერუნუმა ჰიროშის შეხვდა.შეხვედრაზე მხარეებმა კოოპერაციის შესახებ ქვეყნების გამოცდილება გააზიარეს და სოფლის მეურნეობის მიმართულებით სამომავლო თანამშრომლობასა  და საჭიროებებზე ისაუბრეს. მინისტრის მოადგილემ სოფლის განვითარების სააგენტოში მიმდინარე რეფორმაზე, ქვეყანაში კოოპერატივების განვითარების მიმართულებით განხორციელებულ პროექტებზე და ექსტენციის რეგიონული სამსახურების გააქტიურების მნიშვნელობაზე გაამახვილა ყურადღება.„ჩვენი მიზანია, სოფლის განვითარების სააგენტო ევროპული ტიპის გადამხდელ სააგენტოდ გარდავქმნათ. სააგენტო, სოფლის მეურნეობის განვითარების მხარდაჭერის მიმართულების გარდა, გარემოს დაცვის მიმართულებებსაც მოიცავს, რომელთა შორისაა სატყეო და  ბუნებრივი რესურსების სწორად გამოყენების შესაძლებლობების გაზრდის ხელშეწყობა. გარდა ამისა, მნიშვნელოვან მიმართულებად რჩება კოოპერატივების გაძლიერება, ისინი უფრო მეტად მდგრადი უნდა გავხადოთ”,- განაცხადა გიორგი ხანიშვილმა. იაპონურმა მხარემ სურვილი გამოთქვა, სოფლის მეურნეობის მიმართულებით ჩამოყალიბდეს სამუშაო ჯგუფები, რომლებიც სოფლის მეურნეობის  სპეციალისტებით დაკომპლექტდება. ტექნიკური დახმარების ფარგლებში, გათვალისწინებული იქნება დარგობრივი ტრენინგების ჩატარება და იაპონიაში სასწავლო ტურების ორგანიზება. შეხვედრაზე საუბარი შეეხო საქართველოში ორწლიანი პროექტის განხორციელების საკითხს, რომელიც გულისხმობს სასოფლო-სამეურნეო კოოპერატივის მოდელის შექმნის შესაძლებლობის შესწავლას და რომლის დასრულების შემდეგაც რეკომენდაციები მომზადდება. 
#

ლევან დავითაშვილი: „აგროტურიზმი არის ახალი შესაძლებლობა სოფლის განვითარების კუთხით, რომელიც კომპლექსურია და ჩვენ ახალ სტრატეგიაში პრიორიტეტად არის გამოცხადებული”

გარემოს დაცვისა და სოფლის მეურნეობის მინისტრი ლევან დავითაშვილი, ეკონომიკისა და მდგრადი განვითარების მინისტრ ნათია თურნავასთან, აშშ-ის ელჩ კელი დეგნანთან, დიპლომატიური კორპუსისა და საერთაშორისო დონორი ორგანიზაციების წარმომადგენლებთან ერთად, ციფრული პლატფორმის პრეზენტაციას და პანელურ დისკუსიას „პანდემია - შესაძლებლობა თუ გამოწვევა აგროტურიზმისთვის“ დაესწრო. აგროტურისტული ონლაინ პლატფორმა agrogate.world  საქართველოს ფერმერთა ასოციაციამ შექმნა და ერთ სივრცეში საქართველოს, სომხეთისა და აზერბაიჯანის აგროტურისტული ობიექტები გააერთიანა. „ასოციაციის წევრი ფერმერები აძლევთ მაგალითს ყველას, რომ ფერმერული საქმიანობა შეიძლება იყოს პრესტიჟული, ინოვაციური და წარმატებული. ფერმერთა ასოციაციის საქმიანობა მოტივაციას ზრდის ჩვენ სფეროში. მიუხედავად პანდემიისა, 2020 წელი სოფლის მეურნეობაში  უპრეცედენტოდ წარმატებული  და რეკორდული მაჩვენებლების იყო,  რაც არის შედეგი ხელისუფლების თანმიმდევრული პოლიტიკის და დიდი დახმარების ჩვენი მხარდამჭერი დონორი ორგანიზაციების მხრიდან. რაც შეეხება აგროტურიზმს, ეს არის ახალი შესაძლებლობა სოფლის განვითარების კუთხით, რომელიც უფრო კომპლექსურია, ვიდრე სოფლის მეურნეობა და ჩვენ ახალ სტრატეგიაში პრიორიტეტად არის გამოცხადებული. ეს არის შესაძლებლობა, უშუალოდ ადგილზე გაყიდოს ფერმერმა თავის წარმოებული პროდუქცია და გრძელვადიანად უფრო მდგრადი იყოს მათი საქმიანობა", - განაცხადა ლევან დავითაშვილმა. როგორც ამერიკის ელჩმა, კელი დეგნანმა აღნიშნა, საქართველოს ძალიან ბევრი რამის შეთავაზება შეუძლია ტურიზმის სექტორში, განსაკუთრებით კი, აგროტურიზმში.  ღონისძიება საგარეჯოს რაიონის სოფელ უდაბნოში გაიმართა, სადაც ევროპაში ერთ-ერთი ყველაზე დიდი ნუშის ბაღების მქონე კომპანია ოპერირებს. კომპანიის ინვესტიციის არეალის ფართობი მოიცავს 8000 - მდე ჰექტარს, რომელსაც კომპანია ეტაპობრივად ავითარებს. 2000 ჰა-ზე გაშენებულია ნუშის ბაღი, 18 ჰა-ზე კენკროვანი კულტურები და 8 ჰა-ზე ქართული ენდემური ჯიშის ვაზი. ასევე, მოწყობილია მეფრინველეობის და მეცხოველეობის ფერმა; დასაქმებულია 400-მდე ადგილობრივი მოსახლე. კომპანიას მნიშვნელოვანი წვლილი შეაქვს აგროტურიზმის განვითარებაში, პროფესიულ განათლებაში, ადგილობრივ წარმოებასა და ექსპორტში.