#

სოლომონ პავლიაშვილი ცირკულარული ეკონომიკისადმი მიძღვნილ კონფერენციას დაესწრო

გარემოს დაცვის და სოფლის მეურნეობის მინისტრის მოადგილემ,  სოლომონ პავლიაშვილმა ცირკულარული ეკონომიკისადმი მიძღვნილი რიგით მესამე კონფერენცია „ბიზნესის როლი ცირკულარულ ეკონომიკაზე გადასვლის დაჩქარებაში საქართველოში“ მისასალმებელი სიტყვით გახსნა. „ჩვენი ქვეყნისთვის გარემოსდაცვითი პოლიტიკის განხორციელება და ცირკულარულ ეკონომიკაზე გადასვლა ერთ-ერთი პრიორიტეტია. შვედეთის მთავრობის აქტიური მხარდაჭერით და პარტნიორი ქვეყნების რეკომენდაციების გათვალისწინებით, ნარჩენების მართვის კოდექსი, სტრატეგია და ეროვნული გეგმა სრულ თანხვედრაშია ევროპულ კანონმდებლობასთან. მწვანე ეკონომიკის დანერგვის პირობებში, აუცილებელია  გამძლე, განახლებადი და ხელახლა გამოყენებადი პროდუქციის წარმოება და  აღნიშნულ საკითხზე საზოგადოების ცნობიერების ამაღლების ხელშეწყობა“, - აღნიშნა სოლომონ პავლიაშვილმა. კონფერენციაზე გაეროს ცირკულარული ეკონომიკის მრჩეველთა საბჭოს წევრმა, დამოუკიდებელმა საერთაშორისო ექსპერტმა, დარიუშ ედვარდ პრასეკმა საქართველოში ცირკულარულ ეკონომიკაზე გადასვლის დაჩქარების და ამ სისტემის ეფექტიანი დანერგვის შესახებ პრეზენტაცია წარმოადგინა. როგორც შეხვედრაზე აღინიშნა, ცირკულარული ეკონომიკა  გაეროს მდგრადი განვითარების მიზნების მნიშვნელოვანი ნაწილის მიღწევის შესაძლებლობას იძლევა. მსოფლიოს განვითარებული ქვეყნები ცირკულარულ ეკონომიკაზე გადასვლის ადრეულ ეტაპზე იმყოფებიან. კონფერენციის ფარგლებში, დაინტერესებულ პირებს შესაძლებლობა ჰქონდათ სოლომონ პავლიაშვილის მონოგრაფიას „ეკონომიკური ეფექტიანობის თეორიები, განვითარების მოდელები და ცირკულარულ ეკონომიკაზე გადასვლის აუცილებლობა საქართველოში“ გაცნობოდნენ. ღონისძიებას დონორი ორგანიზაციების, კერძო სექტორის და  შესაბამისი უწყების წარმომადგენლები ესწრებოდნენ.ცირკულარული ეკონომიკისადმი მიძღვნილი რიგით მესამე კონფერენცია პროექტის „დავიცვათ საქართველოს სისუფთავე“ ფარგლებში, საქართველოს ბუნების მკვლევართა კავშირის „ორქისი“ ორგანიზებით გაიმართა. 
#

ლევან დავითაშვილი: „ორგანიზებულობის კუთხით, „თხილის მწარმოებელთა ასოციაციამ“ სამაგალითო შედეგები აჩვენა, რაც მნიშვნელოვანი მაგალითია სოფლის მეურნეობის სხვა კულტურების თუ დარგების განვითარებისთვის”

„ჩვენ, შეიძლება შევქმნათ ზოგადი პოლიტიკა, პირობები, მაგრამ ეს ყველაფერი თქვენთან ერთად უნდა გაკეთდეს და კიდევ ერთხელ მადლობა მეთხილე ფერმერებს, რომლებმაც გააკეთეს შეუძლებელი, დაამარცხეს ფაროსანა და გამოწვევა, რომელიც ხარისხთან დაკავშირებით გვქონდა. წელს, ხარისხის მიხედვით თხილის ერთ-ერთი ყველაზე კარგი მოსავალი გვაქვს. ხარისხი პირდაპირ აისახება შემოსავალზე, ფასზე და გვაქვს დიდი იმედი, რომ შემდეგ წლებში  უკეთესი ხარისხი გვექნება. ძალიან დიდი პოტენციალი გააჩნია თხილის კულტურას. იმ შემთხვევაში, თუ უფრო მეტად ორგანიზებული ვიქნებით, მეტ შედეგს მივიღებთ ყველა ერთად. ერთობლივი ძალისხმევით შევძლებთ, რომ საქართველოდან თხილის ასეულობით მილიონი დოლარის ექსპორტი განვახოციელოთ, რაც ქვეყანის ეკონომიკას მნიშვნელოვან შემოსავალს მოუტანს“, - განაცხადა გარემოს დაცვისა და სოფლის მეურნეობის მინისტრმა ლევან დავითაშვილმა.
#

ლევან დავითაშვილი: „მინდა საქართველოს პრემიერ-მინისტრს მადლობა გადავუხადო იმ პროცესში და გამოწვევებში მხარდაჭერისთვის, რამაც დღევანდელ ზეიმამდე მოგვიყვანა“

„მინდა საქართველოს პრემიერ-მინისტრს მადლობა გადავუხადო იმ პროცესში და გამოწვევებში მხარდაჭერისთვის, რამაც დღევანდელ ზეიმამდე მოგვიყვანა.  ეს ძალიან დიდი, მნიშვნელოვანი და წარმატებული გზის მხოლოდ დასაწყისია. არ შეიძლება არ აღინიშნოს მჭიდრო თანამშრომლობა ჩვენს პარტნიორებთან. პირველ რიგში, მადლობა მინდა გადავუხადო ამერიკის შეერთებულ შტატებს.  ის პირველი დღიდან იყო ჩვენი მხარდამჭერი. პირველი დღიდან, როგორც კი, საქართველოში ფაროსანა გამოჩნდა, რაც რეალურად სტიქიური მოვლენა  იყო სოფლის მეურნეობაში. პირველი მყისიერი დახმარება ჩვენ ამერიკელი მეგობრებისგან მივიღეთ  და USAID, როგორც ამერიკის მთვარობის წარმომადგენელი იყო ჩვენს გვერდით.  ჩვენ, ამერიკელი მეგობრებისგან არა მხოლოდ მნიშვნელოვანი ფინანსური დახმარება, არამედ,  ექსპერტული ცოდნა და ტექნიკური დახმარება მივიღეთ, რომ გაგვეძლიერებინა ჩვენი მცენარეთა დაცვის საშუალებები, სამსახურები, რის საფუძველზეც  საქართველო იქცა  ცენტრად, სადაც გამოცდილების გასაზიარებლად  მსოფლიოს წამყვანი ენტომოლოგები ჩამოდიან. აქ, რა თქმა უნდა, ამერიკის დახმარება განსაკუთრებულია, თუმცა შემდგომში  ბევრი მეგობარი ქვეყანა დაგვეხმარა და ყველა მათგანს მინდა  დიდი მადლობა  გადავუხადო. ფაროსანასთან წინააღმდეგ ბრძოლის ფარგლებში, მინდა მადლობა ასევე გადავუხადო  რეგიონის ხელისუფლებას და ფერმერებს, იმ ადამიანებს, რომლებიც უშუალოდ მუშაობენ თხილის ბაღებში, უვლიან მოსავალს და იღებენ შედეგებს“, - განაცხადა გარემოს დაცვისა და სოფლის მეურნეობის მინისტრმა ლევან დავითაშვილმა.
#

ლევან დავითაშვილი: „„თხილობა 2020“ კარგი ტრადიციის დასაწყისია, ეს იქნება ზეიმი, რომელიც ყოველ წელს საქართველოში, სამეგრელოში გაიმართება, სადაც ჩვენი შრომის შედეგის ჩვენება და ცოდნის გაზიარება შეგვეძლება“

„პატარა ექსკურსი მინდა შემოგთავაზოთ  - თურქ და აზერბაიჯანელ კოლეგებთან და მეგობრებთან ერთად, ჩვენ შარშან, ორდუში გადავწყვიტეთ, საქართველოში თხილის ფესტივალის ჩატარება. იცით, რომ  თურქეთი, აზერბაიჯანი და საქართველო - თხილის კულტურაში, სამი წამყვანი ძირითადი მწარმოებელი ქვეყანაა. ჩვენ თხილის ფესტივალი საქართველოს სხვადასხვა რეგიონშიც ვიზეიმეთ. პრემიერმაც აღნიშნა, რომ თხილი მხოლოდ სამეგრელოში არ მოგვყავს. მოგეხსენებათ, გურიაში, იმერეთში, კახეთში და საქართველოს სხვადასხვა რეგიონში თხილი ერთ-ერთი წამყვანი კულტურაა, თუმცა თხილის კულტურის მნიშვნელობა განსაკუთრებულია სამეგრელოს რეგიონისთვის შესაბამისად, სიმბოლური არის, რომ ყველა რეგიონში ჩატარებული ზეიმი-ზუგდიდში გვირგვინდება“, - განაცხდა გარემოს დაცვისა და სოფლის მეურნეობის მინისტრმა ლევან დავითაშვილმა.
#

ლევან დავითაშვილი: „გადაწყვეტილება, რაც დღეს მთავრობაზე მივიღეთ, უკავშირდება აგროკრედიტის საბრუნავი საშუალებების კომპონენტს ვაშლის მოსავლის დაბინავების ხელშეწყობისთვის“

 „ჩვენი სამინისტროსთვის აქტიური პერიოდია, რომელიც მოსავლის დაბინავებას უკავშირდება. რამდენიმე სეზონური მოსავლის პროდუქტის დაბინავება უკვე დასრულებულია. ახლა ინტენსიურად იწყება რთველი კახეთში. 3 200 ტონაზე მეტი ყურძენი უკვე გადამუშავებულია, ძირითადად, დედოფლისწყაროს მუნიციპალიტეტიდან. ყოველდღიურად მოსავლის გადამუშავება მოიმატებს, თუ ამინდი მოგვცემს ამის შესაძლებლობას. გადამუშავებულია ადრეული ყურძენი, ძირითადად, საშამპანურე ღვინის დასამზადებლად. დღე-დღეზე დაიწყება საფერავის რთველიც. გადაწყვეტილება, რაც დღეს მთავრობაზე მივიღეთ, უკავშირდება აგროკრედიტის საბრუნავი საშუალებების კომპონენტს ვაშლის მოსავლის დაბინავების ხელშეწყობისთვის. ეს არის დამატებითი ფინანსური რესურსი გადამმუშავებელი კომპანიებისთვის, რომელიც ვაშლის კონცენტრირებულ წვენს ამზადებენ და რომელიც საექსპორტო პროდუქტია. სუბსიდირებას ვახდენთ იმისათვის, რომ, უხვი მოსავლის პირობებში, ვაშლის ფასი ფერმერებისთვის მისაღები იყოს; ამასთან ერთად, მნიშვნელოვანია, რომ ჩვენი კომპანიების მსყიდველობითი უნარი გაიზარდოს, რისთვისაც საბრუნავი საშუალების თანადაფინანსება ხორციელდება. 21 ნოემბრამდე ექნებათ კომპანიებს კრედიტის აღების შესაძლებლობა, რაც ნამდვილად გაზრდის კერძო სექტორიდან მოთხოვნას და მოგვცემს შესაძლებლობას ის უხვი მოსავალი, რომელიც წელს გვაქვს, წარმატებით დავაბინაოთ და ფერმერებს პრობლემა არ შეექმნათ. ძალიან მალე დავასრულებთ თხილის მოსავლის აღებას დასავლეთ საქართველოში. თხილის მოსავალს უკავშირდება ღონისძიება - „თხილობა 2020“, რომელიც კვირას, 6 სექტემბერს გაიმართება სამეგრელოში, ზუგდიდში. ეს არის ახალი ტრადიცია. გასულ წელს თურქეთის და აზერბაიჯანის მინისტრებთან გვქონდა შეხვედრა. თხილის მოსავლის დაბინავებასთან დაკავშირებული ღონისძიება თურქეთში წლების განმავლობაში არსებობს; გადაწყდა, რომ ასეთი ღონისძიება ჩატარდეს საქართველოსა და აზერბაიჯანშიც. ძალიან მნიშვნელოვანია, რომ ფერმერებმა წელს ძალიან კარგი მოსავალი მიიღეს, როგორც რაოდენობით, ისე ხარისხით. წლევანდელი წელი გამორჩეულია, რაც ძალიან დამაიმედებელი პროგნოზების საშუალებას გვაძლევს თხილის ექსპორტთან დაკავშირებით. თხილის მოსავლის დიდი ნაწილი უკვე დაბინავებულია“, - განაცხადა გარემოს დაცვისა და სოფლის მეურნეობის მინისტრმა ლევან დავითაშვილმა.
#

ლევან დავითაშვილი: „2012 წლის შემდეგ ღვინის წარმოება და ექსპორტი 5-ჯერ გაზრდილია, რაც ჩვენი თანმიმდევრული პოლიტიკის შედეგია”

„საქართველოში წარმოებული ღვინის დიდი ნაწილი, 80%-ზე მეტი, ექსპორტზე გადის. ზოგადად, საქართველოში აქცენტები კეთდება საექსპორტო პროდუქტებზე, რადგან პატარა ქვეყანა ვართ და მცირე შიდა ბაზარი გვაქვს. გარდა ამისა, შიდა ბაზარზე ტურისტული ნაკადების შემცირებამ იმოქმედა და ღვინის კომპანიებისთვის მდგომარეობა გაართულა. ექსპორტი შემცირებულია მცირედით რაოდენობაში, მაგრამ უფრო დიდად თანხაში. შემცირებული შემოსავლების პირობებში, შემცირებული იყო ღვინის კომპანიების მსყიდველობითი უნარი და თუ არა ის მასტიმულირებელი მექანიზმები, რომლებიც ჩვენ შევქმენით და თანხის განაწილება, რომელიც, ერთი მხრივ, გულისხმობდა სუბსიდირებას და, მეორე მხრივ, კომპანიებისთვის იაფი ფინანსური საბრუნავი საშულებების გაჩენას, რთველი იქნებოდა პრობლემატური. ჩვენ, გავაკეთეთ ყველაფერი იმისთვის, რომ წლევანდელი რთველი ჩავატაროთ წარმატებით და ფერმერების შრომა დაფასდეს. მომავალ წლებში, რა თქმა უნდა, გავაგრძელებთ თანმიმდევრულ მუშაობას, რომელიც მიდიოდა საექსპორტო ბაზრების ზრდის და გაფართოების კუთხით. ჩვენ, 2012 წელს, გვქონდა, დაახლოებით, 20 მლნ ბოთლი ღვინის ექსპორტი, დღეს გვაქვს, დაახლოებით, 100 მლნ ბოთლის ანუ 5-ჯერ გაზრდილი რაოდენობაში. ასევე, მინიმუმ, 5-ჯერ არის გაზრდილი ინდუსტრია, გაზრდილია გადამმუშავებელი სიმძლავრეებიც, რომლებიც სახელმწიფოს მხრიდან იყო თანადაფინანსებული. დღეს, დაახლოებით, 300 000 ტონა ყურძნის დაბინავებაზე ვსაუბრობთ, როდესაც ინდუსტრიულად 50 000 ტონა ყურძენი მუშავდებოდა. ეს რიცხვები ნათლად მეტყველებს, რომ ჩვენი პოლიტიკა თანმიმდევრულია“, - განაცხადა ლევან დავითაშვილმა.
#

გარემოს დაცვისა და სოფლის მეურნეობის სამინისტრომ 33 მილიონი ევროს ოდენობის გრანტი მიიღო

კლიმატის მწვანე ფონდის სამეთვალყურეო საბჭომ გარემოს დაცვისა და სოფლის მეურნეობის სამინისტროს 33 მილიონი ევროს ოდენობის გრანტი გადასცა.გრანტი სამინისტრომ პროექტის „საქართველოში ტყის სექტორის რეფორმის გატარების მხარდაჭერა ტყის დეგრადაციით გამოწვეული სათბური აირების ემისიის შემცირების მიზნით“ ფარგლებში მიიღო. პროექტის ინიცირების ღონისძიება, მისასალმებელი სიტყვით, გარემოს დაცვისა და სოფლის მეურნეობის მინისტრმა, ლევან დავითაშვილმა გახსნა.მინისტრმა მადლობა გადაუხდა კლიმატის მწვანე ფონდს, ასევე გერმანიის, შვედეთის და შვეიცარიის სახელმწიფოებს თანადაფინანსებისთვის და პროცესს საეტაპო უწოდა. „მოგეხსენებათ, სატყეო რეფორმა 6 წელია მიმდინარეობს. გვქონდა ძალიან ბევრი შეხვედრა, მომზადდა პოლიტიკის დოკუმენტი. დღეს უკვე გვაქვს პარლამენტის მიერ დამტკიცებული ახალი სატყეო კოდექსი. შესაბამისად, შეიქმნა ახალი საკანონმდებლო საფუძველი იმისთვის, რომ ტყე უკეთესად იმართოს, მართვის პროცესში მივიღოთ მაქსიმალური ეკონომიკური სარგებელი, შევინარჩუნოთ ტყის ეკოსისტემა, რათა გაუმჯობესდეს ტყის ეკოლოგიური მდგომარეობა. ტყის კოდექსით განსაზღვრული ტყის მართვის პრინციპების განხორციელებისათვის, ქვეყანას სჭირდება რესურსები. კლიმატის მწვანე ფონდის სამეთვალყურეო საბჭოსგან მიღებული მხარდაჭერა მნიშვნელოვანად დაგვეხმარება ტყის დაცვის გაძლიერებაში“, - განაცხადა ლევან დავითაშვილმა. გერმანიის ელჩის, ჰუბერტ ქნირშის განცხადებით, გერმანიისთვის მნიშვნელოვანია,  საქართველოში სატყეო სექტორის მხარდაჭერა, შესაბამისად, გერმანიის მთავრობა აქტიურად დაეხმარება საქართველოს აღნიშნული პროექტის განხორციელებაში.   როგორც შვეიცარიის ელჩმა საქართველოში პატრიკ ფრანცენმა განაცხდა, შვეიცარია დაეხმარება საქართვლოს განახორციელოს სატყეო რეფორმა, რომელიც უნდა იყოს წარმატებული, ეს მნიშვნელოვანია მოსახლეობისთვის. პროექტი „საქართველოში ტყის სექტორის რეფორმის გატარების მხარდაჭერა ტყის დეგრადაციით გამოწვეული სათბური აირების ემისიის შემცირების მიზნით“ საქართველოს მთავრობას დაეხმარება მიაღწიოს ამბიციურ პოლიტიკურ მიზანს, რომ ტყის მდგრადი მართვის პრინციპების საშუალებით დაფაროს ეროვნული სატყეო სააგენტოს (NFA) მიერ მართული ტყეების 1.8 მილიონი ჰა, რაც უზრუნველყოფს საქართველოს ტყეების რაოდენობრივი და ხარისხობრივი მახასიათებლების გაუმჯობესებას და, შესაბამისად, ტყის დეგრადაციით გამოწვეული სათბური გაზების გაფრქვევის შემცირებას. 7 წლიანი პროექტი განხორციელდება დედოფლისწყაროს, თელავის, ახმეტის, ყვარლის,  ჩოხატაურის, ლანჩხუთის, ოზურგეთის და  თიანეთის მუნიციპალიტეტებში. ღონისძიებას გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი, მინისტრის მოადგილეები ხატია წილოსანი, ნინო თანდილაშვილი, სოლომონ პავლიაშვილი, იური ნოზაძე,  შვეიცარიის საგანგებო და სრულუფლებიანი ელჩი საქართველოში პატრიკ ფრანცენი, გერმანიის საერთაშორისო თანამშრომლობის საზოგადოების (GIZ), მუნიციპალიტეტების და სამინისტროს შესაბამისი სამსახურის წარმომადგენლები ესწრებოდნენ.