#

მინისტრმა ვაშლის ინტენსიური ბაღი დაათვალიერა

გორის რაიონის სოფელ კვარხეთში, სახელმწიფო პროექტის „დანერგე მომავალი“ ფარგლებში, შპს „ტირიფონის ბაღებმა“ ხეხილის ინტენსიური ბაღი გააშენა.გარემოს დაცვისა და სოფლის მეურნეობის მინისტრმა ლევან დავითაშვილმა, შიდა-ქართლის გუბერნატორთან გიორგი ხოჯევანიშვილთან ერთად, ინტენსიური ტიპის ბაღები დაათვალიერა და მოვლის ოპერაციებს - მექანიკური სხვლა, ფესვების მიწისქვეშა შეკვეცა, სეტყვის საწინააღმდეგო ბადის გაშლა - გაეცნო.„კვარხეთში გაშენებული ახალი ბაღები არის ნათელი მაგალითი იმისა, რომ სოფლის მეურნეობის განვითარების ჩვენი პოლიტიკა არის სწორი. ჩვენ გვინდა კონკურენტუნარიანი, თანამედროვე მეურნეობები, რომლებიც წარმოებული პროდუქციით ბაზარზე თავს დაიმკვიდრებენ. თანამედროვე ტექნოლოგიების გამოყენებით „ტირიფონის ბაღებში“ საუკეთესო ხარისხის მოსავალი მიიღეს“, - აღნიშნა ლევან დავითაშვილმა.„ტირიფონის ბაღები" პროგრამაში 2015 წელს ჩაერთო და 27 ჰა-ზე ვაშლის ინტენსიური ბაღის გაშენებისთვის სახელმწიფოსგან 100,000 ლარის თანადაფინანსება მიიღო. კომპანიამ შეღავათიანი აგროკრედიტითაც ისარგებლა და 2,000,000 ლარის ოდენობით სესხი სეტყვისგან დამცავი ბადეების, საყრდენი ბოძების, სარწყავი წვეთოვანი სისტემების მოწყობისთვის გამოიყენა. ბაღის გაშენებისთვის, სულ, 4,700,000 ლარის ინვესტიცია განხორციელდა. წელს ვაშლის პირველ მოსავალს უკვე აიღებენ. შიდა-ქართლის გუბერნატორის გიორგი ხოჯევანიშვილის განცხადებით, სწორედ საერთაშორისო სტანდარტის სოფლის მეურნეობა არის ერთ-ერთი მთავარი მიმართულება, რომელიც ქვეყანაში ეკონომიკის ზრდას უწყობს ხელს. აღსანიშნავია, რომ „ტირიფონის ბაღები" პირველი კომპანიაა, რომელმაც, სახელმწიფო პროგრამის ფარგლებში, Global Gap-ის პირველადი წარმოების საერთაშორისო სერთიფიკატი აიღო.2018 წლის 31 ივლისის მდგომარეობით, პროექტის „დანერგე მომავალი“ ფარგლებში, საქართველოს მასშტაბით, დაფინანსებულია ხეხილის ახალი ბაღების გაშენება 5,546 ჰექტარზე; სახელმწიფო დაფინანსების მოცულობა29,304,613 მილიონ ლარს შეადგენს. აქედან, შიდა-ქართლის რეგიონში დაფინანსებულია ხეხილის ბაღების გაშენება 1,674 ჰა მიწის ფართობზე.სოფლის მეურნეობის პროექტების მართვის სააგენტო ახორციელებს „ერთიან აგროპროექტს“, რომელიც გათვლილია გრძელვადიან განვითარებაზე და მისი მიზანია ისეთი გარემოს შექმნა, რომელიც ხელს შეუწყობს სოფლის მეურნეობაში კონკურენტუნარიანობის ამაღლებას, მაღალხარისხიანი პროდუქციის წარმოების სტაბილურ ზრდას, სურსათის უვნებლობის საერთაშორისო სტანდარტების დანერგვას.
#

ლევან დავითაშვილი კონფერენციას დაესწრო

გარემოს დაცვისა და სოფლის მეურნეობის მინისტრი ლევან დავითაშვილი კონფერენციას „საქართველოს რეგიონული განვითარების პოლიტიკა“ დაესწრო. კონფერენციაზე სამთავრობო და არასამთავრობო სექტორის და საერთაშორისო ორგანიზაციების წარმომადგენლებმა „საქართველოს რეგიონული განვითარების პროგრამა 2018-2021“ განიხილეს.ლევან დავითაშვილმა კონფერენციაზე ქვეყნის რეგიონული განვითარების პროგრამის მნიშვნელობაზე ისაუბრა და ყურადღება სოფლის განვითარების სახელმწიფო პოლიტიკაზე გაამახვილა. მინისტრმა ხაზგასმით აღნიშნა ამ მიმართულებით ევროკავშირის მხარდაჭერის განსაკუთრებული წვლილის მნიშვნელობა. „საქართველოს მოსახლეობის საკამოდ დიდი ნაწილი, დაახლოებით 40%-ზე მეტი, სასოფლო დასახლებებში ცხოვრობს. შესაბამისად, მათთვის პირობების გაუმჯობესება მნიშვნელოვანწილად არის დაკავშირებული ისეთ ეკონიმიკურ საქმიანობასთან, როგორიც არის სოფლის მეურნეობა, სოფლის მეურნეობის პროდუქციის გადამუშავება ან სხვა ეკონომიკური საქმიანობები, რაც სოფლად ცხოვრების დონეს გააუმჯობესებს. სოფლის განვითარების სტრატეგია მჭიდროდ არის დაკავშირებული რეგიონული განვითარების სტრატეგიასთან. ჩვენი მიზანია სწორი პოლიტიკით სოფლის განვითარების პროცესი სწრაფი და შეუქცევადი გავხადოთ“, - განაცხადა ლევან დავითაშვილმა.კონფერენცია საქართველოს რეგიონული განვითარებისა და ინფრასტრუქტურის სამინისტროს, „ევროკავშირი საქართველოსთვის“ და გერმანიის საერთაშორისო თანამშრომლობის საზოგადოების (GIZ) ორგანიზებით გაიმართა.
#

მთავრობის ახალი ინიციატივა

ლურჯი მოცვის, მაყვლის და ჟოლოს ინტენსიური ბაღების გაშენების მხარდასაჭერად, სახელმწიფო პროექტში „დანერგე მომავალი“ ცვლილებები შევიდა. ბაღების თანადაფინანსების კომპონენტს ახალი ქვეკომპონენტი - „კენკროვანი კულტურები“ დაემატა.გარემოს დაცვისა და სოფლის მეურნეობის მინისტრმა ლევან დავითაშვილმა, მცხეთა-მთიანეთის გუბერნატორმა შალვა კერესელიძემ და სოფლის მეურნეობის პროექტების მართვის სააგენტოს დირექტორმა რევაზ ასათიანმა დუშეთის კულტურის სახლში შეკრებილ მოსახლეობას ახალი ქვეკომპონენტის დეტალები გააცნეს.„მრავალწლიანი კულტურების გაშენება სოფლის მეურნეობის განვითარების პრიორიტეტული მიმართულებაა. ჩვენთვის ძალიან მნიშვნელოვანია ინკლუზიური განვითარება, რაც გულისხმობს, რომ ყველა, მათ შორის მცირე მწარმოებელიც, იყოს ჩართული განვითარების პროცესში. ახალი ქვეკომპონენტი, „კენკროვანი კულტურები“ სწორედ მცირემიწიანი ფერმერების მხარდაჭერას გულისხმობს“, - განაცხადა ლევან დავითაშვილმა.როგორც მცხეთა-მთიანეთის გუბერნატორმა, შალვა კერესელიძემ პროექტით დაინტერესებულ მოსახლეობასთან შეხვედრაზე აღნიშნა, აღნიშნული პროგრამა ძალიან მნიშვნელოვანია ადგილობრივი მოსახლეობისთვის, რომელსაც შესაძლებლობა ეძლევა განავითაროს საკუთარი მცირე ფერმერული მეურნეობები და მიიღოს სარგებელი. ახალი ქვეკომპონენტის ფარგლებში, განსაზღვრულ რეგიონებში, დაფინანსდება შესაძენი ნერგების ღირებულების 100%, როგორც ადგილობრივ ბაზარზე შეძენისას, ასევე მათი იმპორტის შემთხვევაში; 100%-ით დაფინანსდება წვეთოვანი სარწყავი სისტემების ღირებულებაც; საჭიროების შემთხვევაში, დაფინანსდება ბაღის გაშენებისათვის საჭირო მასალების ღირებულების 100%.ქვეკომპონენტი განხორციელდება: იმერეთში - საჩხერის, ტყიბულის, ჭიათურის, ხარაგაულის, ბაღდათის, ვანის, ხონის მუნიციპალიტეტებში და ზესტაფონის მუნიციპალიტეტის რამდენიმე სოფელში; გურიაში - ოზურგეთის, ლანჩხუთის და ჩოხატაურის მუნიციპალიტეტებში;რაჭა-ლეჩხუმში და ქვემო სვანეთში - ამბროლაურის, ლენტეხის, ონის და ცაგერის მუნიციპალიტეტებში; სამეგრელო-ზემო სვანეთში - წალენჯიხის, მარტვილის და ჩხოროწყუს მუნიციპალიტეტებში;მცხეთა-მთიანეთში - მცხეთის, თიანეთის, დუშეთის და ყაზბეგის მუნიციპალიტეტებში.ფიზიკური პირის შემთხვევაში, ერთ ბენეფიციარზე დასაშვებია არანაკლებ 0.15 ჰა და არაუმეტეს 0.5 ჰა კენკროვანი კულტურის ბაღის გაშენების დაფინანსება. სასოფლო-სამეურნეო კოოპერატივის (რომლის საკუთრებაშია მეპაიეების მიერ პაის სახით შეტანილი სასოფლო-სამეურნეო დანიშნულების მიწის ნაკვეთები) მიერ კენკროვანი კულტურის ბაღის გაშენების ფართობი განისაზღვრება თითოეული მეპაიის მიერ შეტანილი სასოფლო-სამეურნეო დანიშნულების მიწის ნაკვეთის რაოდენობის მიხედვით, თითოეულ მეპაიეზე არაუმეტეს 0,5 ჰა-ის გადაანგარიშებით.სასოფლო-სამეურნეო სტატუსის მქონე კოოპერატივს, რომელიც დაფინანსებას მიიღებს არანაკლებ 5 ჰექტარზე ბაღის გასაშენებლად, უსასყიდლოდ გადაეცემა პირველადი დასაწყობებისთვის საჭირო 1 ერთეული სტაციონალური მაცივარკონტეინერი, რომლის ტევადობა, საშუალოდ, 20 ტონაა. პროექტის „დანერგე მომავალი“ განხორციელება გარემოს დაცვისა და სოფლის მეურნეობის სამინისტროს სოფლის მეურნეობის პროექტების მართვის სააგენტომ 2015 წლის მარტში დაიწყო.პროექტის მიზანია, მრავალწლოვანი კულტურების გაშენების გზით, საქართველოში არსებული სასოფლო-სამეურნეო მიწების ეფექტიანი გამოყენება, რის შედეგადაც, მოხდება იმპორტირებული პროდუქციის ქართული პროდუქციით ჩანაცვლება, გაიზრდება ექსპორტი, გაადვილდება გადამმუშავებელი საწარმოების ნედლეულით უზრუნველყოფა და გაუმჯობესდება სოფლად მოსახლეობის სოციალურ-ეკონომიკური მდგომარეობა.  
#

ლევან დავითაშვილმა OIE -ის გენერალურ დირექტორს უმასპინძლა

გარემოს დაცვისა და სოფლის მეურნეობის მინისტრმა ლევან დავითაშვილმა ცხოველთა ჯანდაცვის მსოფლიო ორგანიზაციის (OIE) გენერალურ დირექტორს მონიკ ელუას უმასპინძლა. შეხვედრაზე მინისტრმა ვეტერინარიის კუთხით განხორციელებულ პროექტებზე ისაუბრა და ყურადღება ქვეყანაში ვეტერინარული განათლების, როგორც რეგულირებადი პროფესიის მნიშვნელობასა და მის პოპულარიზაციაზე გაამახვილა.„მინდა მადლობა გადაგიხადოთ თანამშრომლობისათვის. მნიშვნელოვანია, რომ ცხოველთა ჯანდაცვის მსოფლიო ორგანიზაციის (OIE) ევროპის რეგიონული კომისიის 28-ე კონფერენცია თბილისში გაიმართა. სწორედ ასეთი ღონისძიებები უწყობს ხელს საქართველოს საერთაშორისო რეპუტაციის დამკვიდრებას ცხოველთა ჯანდაცვის უსაფრთხოების კუთხით,“ - განაცხადა ლევან დავითაშვილმა.ცხოველთა ჯანდაცვის მსოფლიო ორგანიზაციის (OIE) გენერალურმა დირექტორმა აღნიშნა, რომ საქართველოს ჩართულობა ცხოველთა ჯანმრთელობის მსოფლიო ორგანიზაციის რეგიონულ კომისიაში ძალიან მნიშვნელოვანია.„ჩვენ მზად ვართ, დახმარება გაგიწიოთ საკანონმდებლო ცვლილებების შეტანის კუთხით და ხელი შევუწყოთ საქართველოს საექსპორტო პოტენციალის კიდევ უფრო გაზრდას, რაც ქვეყნის განვითარებისათვის მნიშვნელოვანი კომპონენტია,“ - განაცხადა მონიკ ელუამ.პირისპირ შეხვედრის შემდეგ ლევან დავითაშვილი და მონიკ ელუა ცხოველთა ჯანმრთელობის ეროვნული პროგრამის სამეთვალყურეო ჯგუფის 32-ე შეხვედრას დაესწრნენ, რომელსაც სურსათის ეროვნული სააგენტოს უფროსი ზურაბ ჩეკურაშვილი ხელმძღვანელობდა. სამეთვალყურეო ჯგუფის წევრებმა OIE-ს წარმომადგენლებს ცხოველთა ჯანმრთელობის ეროვნულ პროგრამასთან დაკავშირებული ინფორმაცია გაუზიარეს და შემდგომი ნაბიჯების განხორციელების გზები და ახალი წევრების მიღების საკითხი განიხილეს.შეხვედრაზე ყურადღება გაამახვილეს მსხვილფეხა პირუტყვის ვირუსული დაავადების ნოდულარული დერმატიტის (Lumpy Skin Disease) საწინააღმდეგო ღონისძიებებზე, რომელსაც სურსათის ეროვნული სააგენტო განსაკუთრებულ ყურადღებასა და რესურსს უთმობს.სამეთვალყურეო ჯგუფის შეხვედრას გარემოს დაცვისა და სოფლის მეურნეობის სამინისტროს, სურსათის ეროვნული სააგენტოს, დაავადებათა კონტროლის ეროვნული ცენტრის, სოფლის მეურნეობის სამინისტროს ლაბორატორიის, გაეროს სურსათისა და სოფლის მეურნეობის ორგანიზაციის (UN FAO) და ევროკავშირის ყოვლისმომცველი ინსტიტუციური განვითარების პროგრამის (CIB) და საერთაშორისო ორგანზაციების წარმომადგენლები ესწრებოდნენ. აღსანიშნავია, რომ საქართველოს ცხოველთა ჯანმრთელობის ეროვნული პროგრამა აყალიბებს ხედვას, ამოცანებს, მიზნებსა და სპეციფიკურ პრიორიტეტებს, რათა გაუმჯობესდეს ცხოველთა ჯანმრთელობა და განვითარდეს ვეტერინარული სექტორი. ცხოველთა ჯანმრთელობის პროგრამის სამეთვალყურეო ჯგუფის სამუშაო შეხვედრები პერიოდულად, სამ თვეში ერთხელ იმართება.
#

ლევან დავითაშვილი ევროპარლამენტის დელეგაციას შეხვდა

გარემოს დაცვისა და სოფლის მეურნეობის მინისტრი ლევან დავითაშვილი ევროპარლამენტის დელეგაციას შეხვდა.დელეგაციას ევროპარლამენტის თავმჯდომარის მოადგილე საჯად კარიმი ხელმძღვანელობდა.შეხვედრაზე ლევან დავითაშვილმა ევროპარლამენტის წევრებს კონსოლიდირებული სამინისტროს სტრუქტურა და პრიორიტეტები გააცნო და ყურადღება მწვანე ეკონომიკის კონცეფციის განვითარების მნიშვნელობაზე გაამახვილა.მინისტრმა მადლობა გადაუხადა ევროპარლამენტის წევრებს მხარდაჭერისთვის და აღნიშნა, რომ საქართველოსა და ევროკავშირს შორის ასოცირების შესახებ შეთანხმების შესრულება ქვეყნის დღის წესრიგს წარმოადგენს.მინისტრის განცხადებით ქვეყნისთვის გარემოსდაცვითი მიმართულება, სოფლის განვითარებასთან ერთად პრიორიტეტს წარმოადგენს და ევროპარლამენტარებს სატყეო სექტორში განხორციელებული საკანონმდებლო რეფორმა გააცნო.საუბარი ასევე შეეხო კლიმატის ცვლილების, ტყის რესურსების მდგრადი განვითარების, წყლის რესურსების მენეჯმენტის და ნარჩენების მართვის მნიშვნელობის საკითხებს.ლევან დავითაშვილმა ევროპარლამენტის წევრებს სოფლის მეურნეობის განვითარების მხარდამჭერი პროგრამები გააცნო და ყურადღება სოფლის განვითარების სტრატეგიაზე გაამახვილა.როგორც საჯად კარიმმა განაცხადა, საქართველოს გარემოსდაცვითი და სოფლის განვითარების კუთხით სწორი ხედვა გააჩნია, დაადასტურა მხარდაჭერა ქვეყნის მიმართ და მინისტრს წარმატებები უსურვა შემდგომ საქმიანობაში.გარემოს დაცვისა და სოფლის მეურნეობის სამინისტროში გამართულ შეხვედრას მინისტრის მოადგილე ნინო თანდილაშვილი ესწრებოდა.
#

სამინისტროს დელეგაცია უნგრეთში სამუშაო ვიზიტით იმყოფება

ევროკავშირის საჯარო სამსახურების დაძმობილების პროექტის ,,ტყის მდგრადი მართვის გაძლიერება საქართველოში“ ფარგლებში, საქართველოს გარემოს დაცვისა და სოფლის მეურნეობის სამინისტროს დელეგაცია უნგრეთის რესპუბლიკაში სამუშაო და სასწავლო ვიზიტით იმყოფება. ვიზიტის ფარგლებში, გარემოს დაცვისა და სოფლის მეურნეობის მინისტრის მოადგილე იური ნოზაძე უნგრეთის სოფლის მეურნეობის სამინისტროს საპარლამენტო სახელმწიფო მდივანს, მინისტრის მოადგილე შანდორ ფარკაშს შეხვდა. მხარეებმა სატყეო და გარემოსდაცვითი ზედამხედველობის სექტორებში ურთიერთთანამშრომლობის საკითხები განიხილეს. ქართველი სპეციალისტები სასწავლო მივლინების ფარგლებში მოინახულებენ სატყეო საწარმოებს, გაეცნობიან გარემოსდაცვითი ზედამხედველობის, ტყის ინვენტარიზაციის, ნადირობისა და ბიომრავალფეროვნების დაცვის საკითხებს.
#

შეხვედრა WIPO-ს აღმასრულებელ დირექტორთან

გარემოს დაცვისა და სოფლის მეურნეობის მინისტრი ლევან დავითაშვილი ინტელექტუალური საკუთრების მსოფლიო ორგანიზაციის (WIPO) აღმასრულებელ დირექტორს, შერიფ საადალას შეხვდა.შეხვედრაზე მხარეებმა საქართველოსა და WIPO-ს შორის სამომავლო თანამშრომლობის საკითხები განიხილეს.მინისტრმა ხაზი გაუსვა საქართველოსთვის WIPO-ს მხარდაჭერის მნიშვნელობას და გეოგრაფიული აღნიშვნების საკითხებს. საუბარი შეეხო აგრარულ დარგში ინტელექტუალური საკუთრების მიმართულებით სამაგისტრო პროგრამის შემუშავების მნიშვნელობასაც.როგორც შერიფ საადალამ აღნიშნა, ინტელექტუალური საკუთრების მსოფლიო ორგანიზაციას საქართველოსთან კარგი პარტნიორული ურთიერთობა აქვს და ყურადღება საგანმანათლებლო მიმართულებით რეგიონში საქართველოს, როგორც ჰაბის პოტენციალზე გაამახვილა.გარემოს დაცვისა და სოფლის მეურნეობის სამინისტროში გამართულ შეხვედრას საქართველოს ინტელექტუალური საკითხების ეროვნული ცენტრის (საქპატენტი) თავმჯდომარე ნიკოლოზ გოგილაძე ესწრებოდა.#სოფლისმეურნეობა2018