#

ევროკავშირის მხარდაჭერა სატყეო და ნარჩენების მართვის სექტორში

გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი საქართველოში ევროკავშირის წარმომადგენლობის გარემოს დაცვის და სოფლის მეურნეობის მიმართულების ხელმძღვანელს ალვარო ორტეგა აპარიციოს შეხვდა. მხარეებმა სატყეო სფეროსა და ნარჩენების მართვის სექტორის საკანონმდებლო და ინსტიტუციური ჩარჩოს ევროკავშირის სტანდარტებთან ჰარმონიზების პროცესზე იმსჯელეს. ლიტვის რესპუბლიკის გარემოს დაცვისა და უნგრეთის სოფლის მეურნეობის სამინისტროებთან თანამშრომლობით, ხორციელდება საჯარო სამსახურების დაძმობილების პროექტი “ტყის მდგრადი მართვის გაძლიერება საქართველოში”, რომელიც ხელს უწყობს ქვეყანაში მიმდინარე სატყეო სექტორის რეფორმასა და ტყის მდგრადი მართვის სისტემის ჩამოყალიბებას. შეხვედრაზე ასევე, ევროკავშირის მხარდაჭერით მიმდინარე პროექტზე „ტექნიკური დახმარება საქართველოში ნარჩენების მართვის სისტემების გაუმჯობესებისთვის“ იმსჯელეს, რომელიც მიზნად ისახავს საქართველოს დახმარებას ნარჩენების მართვის სისტემის განვითარებაში. ასოცირების შესახებ შეთანხმებისა და ნარჩენების მართვის კოდექსის შესაბამისად, უნდა განხორციელდეს სახიფათო ნარჩენების მართვის ეროვნული სისტემის შემუშავება. 
#

შვედეთის მთავრობის მიერ განხორციელებული პროექტები

გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი საქართველოში შვედეთის საელჩოს განვითარებისა და თანამშრომლობის განყოფილების ხელმძღვანელს, მოლი ლიენს შეხვდა. მხარეებმა შვედეთ-საქართველოს ორმხრივ ურთიერთობზე, სამინისტროში მიმდინარე ცვლილებებზე და ნარჩენების მართვის ორგანოს გაძლიერების შესაძლებლობაზე იმსჯელეს. ასევე, განიხილეს შვედეთის მთავრობის მხარდაჭერით მიმდინარე პროექტები- „ნარჩენების ინტეგრირებული მართვის სისტემის განხორციელების მხარდაჭერა და შესაძლებლობების ზრდა საქართველოში“ და „დავასუფთაოთ საქართველო“. პროექტი „დავასუფთაოთ საქართველო“ მიზნად ისახავს გააუმჯობესოს გარემო და შეამციროს კლიმატის ცვლილების ზემოქმედება საქართველოში, ნარჩენების მართვისა და მოსახლეობის პასუხისმგებლობის გაღრმავების გზით.  პროექტი „ნარჩენების ინტეგრირებული მართვის სისტემის განხორციელების მხარდაჭერა და შესაძლებლობების ზრდა საქართველოში“ მოიცავს ნარჩენების ინტეგრირებული მართვის შესახებ ცოდნის ამაღლებას, მწარმოებლის გაფართოებული ვალდებულების საუკეთესო პრაქტიკის გაცნობას, სახიფათო ნარჩენების მართვის სფეროში გამოცდილების გაზიარებას და ინვენტარიზაციის ჩატარებას რომელიმე შერჩეულ დაბინძურებულ ტერიტორიაზე. პროექტით გათვალისწინებულია დახმარება ისეთ საკითხებში, როგორიცაა მუნიციპალური ნარჩენების მართვისათვის ტექნიკური უსაფრთხოების მეთოდოლოგიის შემუშავება ნარჩენების შეგროვებაში, ტრანსპორტირებასა და განთავსებაში.
#

ლევან დავითაშვილი საფრანგეთის ელჩს შეხვდა

გარემოს დაცვისა და სოფლის მეურნეობის მინისტრი ლევან დავითაშვილი საფრანგეთის რესპუბლიკის ელჩს საქართველოში, პასკალ მენიეს შეხვდა.შეხვედრაზე მხარეებმა ქვეყნებს შორის სამომავლო თანამშრომლობის საკითხები განიხილეს, მათ შორის, მექანიზაციის, ირიგაციის და მიწის მართვის მიმართულებებით. ლევან დავითაშვილმა პასკალ მენიეს საქართველოში განხორციელებული მიზნობრივი პროექტების მხარდაჭერისთვის მადლობა გადაუხადა და ელჩს ის ღონისძიებები გააცნო, რომელსაც საქართველოს ხელისუფლება კონსოლიდირებული სამინისტროს ფარგლებში დარგის სწრაფი და ეფექტიანი განვითარებისთვის ახორციელებს. როგორც პასკალ მენიემ შეხვედრაზე განაცხადა, საქართველოს დარგის განვითარების დიდი პოტენციალი აქვს. ელჩმა ლევან დავითაშვილს საფრანგეთში მესაქონლეობის მიმართულებით დაგეგმილი გამოფენების შესახებ მიაწოდა ინფორმაცია და აღნიშნულ გამოფენაში საქართველოს მონაწილეობის უზრუნველსაყოფად მხარდაჭერის სურვილი გამოთქვა. 
#

ლევან დავითაშვილი ნილს სკოტს შეხვდა

გარემოს დაცვისა და სოფლის მეურნეობის მინისტრი ლევან დავითაშვილი გაეროს განვითარების პროგრამის (UNDP) ხელმძღვანელს საქართველოში, ნილს სკოტს და გაეროს განვითარების პროგრამის წარმომადგენლებს შეხვდა.შეხვედრაზე მხარეებმა პროგრამის ფარგლებში წარმოდგენილი გარემოსდაცვითი მიმართულებით არსებული პროექტები განიხილეს და სამომავლო თანამშრომლობის საკითხებზე იმსჯელეს.როგორც ლევან დავითაშვილმა აღნიშნა, კონსოლიდირებული სამინისტროს ფარგლებში აქტიურად გაგრძელდება მუშაობა და თანამშრომლობა აგრარული და გარემოსდაცვითი მიმართულების პროექტებზე და ერთიანი მენეჯმენტის ქვეშ პროექტების სწრაფი და ეფექტიანი განხორციელების შესაძლებლობაზე გაამახვილა ყურადღება.ლევან დავითაშვილმა შეხვედრაზე პროექტების განხორციელებაში დონორი ორგანიზაციების ჩართულობის მნიშვნელობაზე ისაუბრა.გაეროს განვითარების პროგრამის (UNDP) ხელმძღვანელმა ლევან დავითაშვილს სამინისტროს ინიციატივების მხარდაჭერა აღუთქვა და აღნიშნა, რომ სოფლის მეურნეობის და გარემოს დაცვის კუთხით სამინისტროსთან თანამშრომლობა მნიშვნელოვანია.გარემოს დაცვისა და სოფლის მეურნეობის სამინისტროში გამართულ შეხვედრას მინისტრის მოადგილე ნინო თანდილაშვილი ესწრებოდა.
#

დაცული ტერიტორიების სააგენტოს 2017 წლის მიღწევების გაცნობა

სასტუმრო „თბილისი მერიოტში“ საქართველოს დაცული ტერიტორიების მართვის ეფექტურობის გაძლიერების საკითხებზე იმსჯელეს. გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილმა დონორი ორგანიზაციების წარმომადგენლებს დაცული ტერიტორიების სააგენტოს 2017 წლის მიღწევები გააცნო. შეხვედრაზე, ბოლო პერიოდში დონორი ორგანიზაციების ჩართულობით სააგენტოს მიერ განხორციელებული პროექტები განიხილეს, ისაუბრეს სამომავლო ხედვებზე და თანამშრომლობის გაძლიერების გზებზე. 2017 წელს, დონორთა მხარდაჭერით დაცულ ტერიტორიებზე 9 საერთაშორისო პროექტი განხორციელდა, სხვადასხვა ტერიტორიებზე მოეწყო ეკოტურისტული ინფრასტრუქტურა და აშენდა ვიზიტორთა ცენტრები. შეხვედრაზე ასევე შეაჯამეს დაცული ტერიტორიების მეგობართა ასოციაციების საქმიანობა. შეხვედრას საერთაშორისო დონორი ორგანიზაციების, დიპლომატიური კორპუსის და დაცული ტერიტორიების სააგენტოს მეგობართა ასოციაციების წარმომადგენლები ესწრებოდნენ.
#

ლევან დავითაშვილი ევროკავშირის სპეციალურ წარმომადგენელს შეხვდა

გარემოს დაცვისა და სოფლის მეურნეობის მინისტრი ლევან დავითაშვილი ევროკავშირის სპეციალურ წარმომადგენელს სამხრეთ კავკასიასა და საქართველოში კრიზისების საკითხებში, ტოივო კლაარს შეხვდა.შეხვედრაზე ლევან დავითაშვილმა ვრცლად ისაუბრა საქართველოს გარემოს დაცვისა და სოფლის მეურნეობის დარგში განხორციელებული პროექტების შესახებ და ყურადღება ახალი ინვაზიური მავნებლის, აზიური ფაროსანას წინააღმდეგ ბრძოლაში სამინისტროს მიერ განხორციელებულ ღონისძიებებზე გაამახვილა. მინისტრმა აზიურ ფაროსანასთან ბრძოლის 2018 წლის სტრატეგიულ გეგმაზე ისაუბრა და ტოივო კლაარს ძირითადი მიმართულებები გააცნო. „უაღრესად მნიშვნელოვანია თქვენთან შეხვედრა ქვეყანაში ფიტოსანიტარიის დაცვის უზრუნველყოფის მიზნით. 2018 წლის სტრატეგიული ხედვა, 2017 წლის გამოცდილებას ემყარება და მავნებელთან ბრძოლის კომპლექსურ ღონისძიებებს ითვალისწინებს. სახელმწიფოს ჩართულობა იქნება აქტიური, რათა მაქსიმალურად შემცირდეს მავნებლის პოპულაცია და მისგან მიყენებული ეკონომიკური ზარალის ოდენობა“, - განაცხადა ლევან დავითაშვილმა.გარემოს დაცვისა და სოფლის მეურნეობის სამინისტროში გამართულ შეხვედრას მინისტრის მოადგილე ნინო თანდილაშვილი ესწრებოდა.
#

კავკასიაში პირველი გამაჯანსაღებელი მღვიმე გაზაფხულზე გაიხსნება

გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი დაცული ტერიტორიების სააგენტოს თავმჯდომარე დავით მარკოზაშვილთან ერთად, იმერეთის რეგიონში იმყოფებოდა, სადაც საწურბლიას მღვიმეში თანამედროვე ინფრასტრუქტურას ადგილზე გაეცნო. საწურბლიას მღვიმე პირველი საერთაშორისო სტანდარტების სპელეო-გამაჯანსაღებელი მღვიმე იქნება კავკასიის რეგიონში. მღვიმის ბუნებრივი სამკურნალო თვისებები ჩეხი და ქართველი სპეციალისტების მიერაა შესწავლილი. ადგილზე აშენდა ვიზიტორთა ცენტრი; ამბულატორია; მღვიმეში დამონტაჟდა განათების სისტემა. საწურბლიას მღვიმე ორ - აქტიურ და პასიურ ზონად გაიყო. მღვიმე პირველ ვიზიტორებს ახალ ტურისტულ სეზონზე მიიღებს.ინფრასტრუქტურული პროექტისთვის საქართველოს ბიუჯეტიდან 647 000 ლარი დაიხარჯა.