#

გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი სანერგე მეურნეობების სერტიფიცირების ეროვნული სისტემის შესახებ ევროკავშირის დაფინანსებული პროექტის „ევროკავშირის ინოვაციური პროექტი საქართველოში კერძო სექტორის კონკურენტუნარიანობისთვის“ ფარგლებში გამართულ სამუშაო შეხვედრას დაესწრო.

გიორგი ხანიშვილმა მადლობა გადაუხადა დონორ ორგანიზაციებს საქართველოში სოფლის მეურნეობის დარგის განვითარების აქტიური მხარდაჭერისთვის და აღნიშნა, რომ ქვეყანაში სერტიფიცირებული სანერგე მეურნეობების არსებობა განსაკუთრებით მნიშვნელოვანია.შეხვედრაზე სანერგე მეურნეობების ეროვნული სერტიფიცირების სისტემა და კონტროლის მექანიზმები განიხილეს და ეროვნული სერტიფიცირების სქემასა და სანერგე მეურნეობების კვალიფიკაციის საკითხებზე იმსჯელეს.სამუშაო შეხვედრას სოფლის მეურნეობის სამეცნიერო-კვლევითი ცენტრის და სახელმწიფოს სხვა შესაბამისი უწყებების წარმომადგენლები ესწრებოდნენ.პროექტს „ევროკავშირის ინოვაციური პროექტი საქართველოში კერძო სექტორის კონკურენტუნარიანობისთვის“ გაეროს სურსათისა და სოფლის მეურნეობის ორგანიზაცია (FAO) ევროკავშირის დაფინანსებით ახორციელებს.
#

გაერთიანებული ერების განათლების, მეცნიერებისა და კულტურის ორგანიზაციაში (UNESCO) ქართული ხორბლის ენდემური ჯიშების დაცვის უზრუნველსაყოფად საჭირო დოკუმენტაციის შემუშავების მიზნით, გარემოს დაცვისა და სოფლის მეურნეობის სამინისტროში, ხორბლის დაცვის ჯგუფის პირველი სამუშაო შეხვედრა გაიმართა.

შეხვედრას მინისტრის მოადგილეები ხატია წილოსანი და იური ნოზაძე ესწრებოდნენ.როგორც შეხვედრაზე აღინიშნა, ისტორიულად, საქართველო ახლო აღმოსავლეთში რბილი ხორბლის წარმოების და მოშინაურების ერთ-ერთი მთავარი კერაა, შესაბამისად, ქართული ენდემური ხორბლის ჯიშების დაცვას, აღდგენას და მსოფლიო მასშტაბით აღნიშნული კულტურის შესახებ ცნობადობის ამაღლებას, განსაკუთრებული მნიშვნელობა ენიჭება.აღსანიშნავია, რომ 2019 წელს, ქართული ხორბლის კულტურა იუნესკოს არამატერიალური კულტურული მემკვიდრეობის გადაუდებელი დაცვის საჭიროების ნუსხაშია წარდგენილი.სამუშაო შეხვედრას სამინისტროს შესაბამისი უწყებების და სამსახურების ხელმძღვანელებთან ერთად, სამთავრობო, არასამთავრობო და კერძო სექტორის წარმომადგენლები ესწრებოდნენ.
#

გარემოს დაცვისა და სოფლის მეურნეობის მინისტრი ლევან დავითაშვილი შპს „საქართველოს მელიორაციის“ მიერ კახეთის რეგიონში, ქვემო სამგორის სარწყავი სისტემის სარეაბილიტაციო სამუშაოების მიმდინარეობას ადგილზე გაეცნო

„მელიორაციის გარეშე, სოფლის მეურნეობის განვითარება წარმოუდგენელია. 2012 წლიდან, სამელიორაციო ინფრასტრუქტურის აღდგენა-რეაბილიტაციისთვის ბიუჯეტიდან მნიშვნელოვანი თანხები დაიხარჯა და შედეგად, უკვე 130 ათასი ჰექტარი ფართობია გასარწყავებული. ეს ნიშნავს იმას, რომ ფაქტობრივად, ახალი სიცოცხლე დაუბრუნდა მიწას. სამელიორაციო სამუშაოები ზამთრის პერიოდში ინტენსიურად მიმდინარეობს, რათა სეზონს მომზადებული დავხვდეთ. სამუშაოები გაგრძელდება 2020 წელსაც. ამბიციური გეგმები გვაქვს ქვემო სამგორის სარწყავი სისტემის რეაბილიტაციასთან დაკავშირებით. სამელიორაციო ინფრასტრუქტურის სარეაბილიტაციო სამუშაოები მსოფლიო ბანკის პროექტის ფარგლებში დაფინანსდა. უნდა აღინიშნოს, რომ ზემო ალაზნის ორი არხი, ფაქტობრივად, მთლიანად კახეთის რეგიონს ამარაგებს სარწყავი წლით, რაც სოფლის მეურნეობის განვითარებისათვის უმნიშვნელოვანესია. კახეთში მაღალი ღირებულების კაკლოვანი კულტურის ახალი ბაღები შენდება. შესაბამისად, წყლით უზრუნველყოფა კიდევ უფრო აქტუალური ხდება. კლიმატის ცვლილებების ფონზე, გამოწვევები სულ უფრო იზრდება და სამინისტრო მუშაობს, რომ კლიმატზე ადაპტირებული პოლიტიკის შემუშავება თანმიმდევრულად განხორციელდეს“, - აღნიშნა ლევან დავითაშვილმა.შპს „საქართველოს მელიორაცია“ სარეაბილიტაციო სამუშაოებს საგარეჯოს მუნიციპალიტეტში, მარჯვენა და მარცხენა მაგისტრალური არხებზე ახორციელებს. პროექტით გათვალისწინებულია მაგისტრალური არხის 4,4 კმ-იანი მონაკვეთზე არსებული ჰიდროტექნიკური ნაგებობების (გალერეა, წყალგამშვებები და მათი მექანიკური მოწყობილობები, მილხიდები) რეაბილიტაცია. სამუშაოები მიმდინარე წლის სექტემბერში დაიწყო და 2020 წლის ივლისში დასრულდება. პროექტის ღირებულება 1 397 000 ლარს შეადგენს.საგარეჯოს მუნიციპალიტეტში, სამელიორაციო ინფრასტრუქტურის მოწესრიგების შედეგად, სარწყავი წყლის მიწოდება 3 330 ჰექტარ სასოფლო-სამეურნეო მიწის ფართობზე გაუმჯობესდება.საირიგაციო სისტემით სარგებლობას საგარეჯოს მუნიციპალიტეტის სოფლების: ნინოწმინდა, გიორგიწმინდა, წყაროსთავი, იორმუღანლო, დუზაგრამა, ლამბალო, ყანდაურას (ნაწილი) მოსახლეობა შეძლებს.
#

გარემოს დაცვისა და სოფლის მეურნეობის სამინისტროს ეზოში, გარემოსდაცვითი ინფორმაციისა და განათლების ცენტრის ინიციატივით დაწყებული და უკვე ტრადიციად ქცეული კამპანიის „ნუ მოჭრი-მორთე” ფარგლებში, ნაძვის ხე მოირთო.

ნაძვის ხის საზეიმოდ ანთების ღონისძიებას მინისტრის მოადგილეები და უწყების ხელმძღვანელები დაესწრნენ. გარემოს დაცვისა და სოფლის მეურნეობის პირველმა მოადგილემ გიორგი ხანიშვილმა მისალოცი სიტყვით გამოსვლისას თანამშრომლებსა და მათ შვილებს დამდეგი შობა-ახალი წელი მიულოცა.გიორგი ხანიშვილმა წინასაახალწლოდ ნაძვის ხეების ჭრის პრევენციის მნიშვნელობაზე და ამ მიზნით დაწყებულ კამპანიაში „ნუ მოჭრი-მორთე“ ახალგაზრდების ჩართულობის მნიშვნელობაზე ისაუბრა.
#

ერთიანი აგროპროექტის ფარგლებში კახეთის რეგიონში მესაქონლეობის ახალი ფერმა ამოქმედდა

გარემოს დაცვისა და სოფლის მეურნეობის მინისტრმა, ლევან დავითაშვილმა სიღნაღის მუნიციპალიტეტის სოფელ ქვემო ბოდბეში, თანამედროვე სტანდარტების, ახლადგახსნილი მესაქონლეობის ფერმა შპს „თეთრი ფერმა“ დაათვალიერა და სამუშაო პროცესს გაეცნო.„ეს ფერმა ნამდვილად გამორჩეული და ალბათ, ერთ-ერთი საუკეთესოა საქართველოში. აქ დაცულია ყველა ის სტანდარტი, რაც დღეს მესაქონლეობის და სურსათის უვნებლობის კუთხით არსებობს. ეს არის ნათელი მაგალითი, თუ რა მნიშვნელოვანი შედეგი მოაქვს სახელმწიფოს მიერ განხორციელებულ პროგრამებს. პროგრამებს, რომლებიც პასუხობს ყველა იმ გამოწვევას, რაც მესაქონლეობის კუთხით არსებობს და რაზეც, სამინისტრო ბოლო წლებში ინტენსიურად მუშაობს. ჩვენთვის მნიშვნელოვანია ქვეყანაში გვქონდეს სულ უფრო მეტი მაღალპროდუქტიული, ეკონომიკურად ძლიერი, განვითარებული ფერმა, სადაც ყველა სტანდარტი დაცული და გათვალისწინებული იქნება. ეს საშუალებას მოგვცემს, გავზარდოთ ქვეყნის კონკურენტუნარიანობა მესაქონლეობის მიმართულებით“, - აღნიშნა ლევან დავითაშვილმა.ფერმა სახელმწიფოს დახმარებით, „ერთიანი აგროპროექტის“ ფარგლებში აშენდა. პროექტში ჯამურად, 15 200 000 ლარამდე ინვესტიცია განხორციელდა. აქედან, 1 500 000 ლარი შეღავათიანი აგროკრედიტი, ხოლო დანარჩენი თანხა ბენეფიციარის ინვესტიციაა.„თეთრი ფერმა“ ნიდერლანდურ-ქართული ინვესტიციით შექმნილი კომპანიაა, რომელიც ყოველდღიურად აწარმოებს პირველი კატეგორიის 10 ტონა ნედლ რძეს. წარმოებული პროდუქციის რეალიზაცია ადგილობრივ ბაზარზე ხორციელდება. კომპანიაში, მუდმივად დასაქმებულია 35 ადგილობრივი მცხოვრები.სახელმწიფოს ფინანსურმა მხარდაჭერამ მეწარმეებს დამატებითი ბიძგი მისცა, წარმოების განვითარება-გაფართოებისთვის. 2013 წლიდან დღემდე, სახელმწიფოს დახმარებით, „ერთიანი აგროპროექტის“ ფარგლებში, დაფინანსდა 212 ახალი საწარმო, მათ შორის, კახეთის რეგიონში - 74 ახალი საწარმო. 
#

თევზის უსიამოვნო სუნთან დაკავშირებით არსებული პრობლემის მოგვარების გზებზე ფოთის მერიაში იმსჯელეს

გარემოს დაცვისა და სოფლის მეურნეობის მინისტრი ლევან დავითაშვილი და სამეგრელო-ზემო სვანეთის სახელმწიფო რწმუნებული ალექსანდრე მოწერელია ქალაქ ფოთში თევზის უსიამოვნო სუნთან დაკავშირებით ადგილობრივ მოსახლეობას და თევზის გადამმუშავებელი კომპანიის წარმომადგენლებს შეხვდნენ.როგორც მინისტრმა აღნიშნა, მიღწეულია შეთანხმება, რომ თევზის საწარმოო პროცესით გამოწვეული სუნი, მოსახლეობისთვის გაუსაძლისი არ უნდა იყოს. შესაბამისად, ყველა საწარმოს, რომელიც არ აკმაყოფილებს ნორმებს, სამუშაო პროცესი შეუჩერდება.„გარემოზე ზემოქმედების შემთხვევაში, ჩვენი კანონმდებლობა ითვალისწინებს როგორც სანქციებს ჯარიმის სახით, ისე ზიანის ანაზღაურებას კომპანიების მხრიდან. გრძელვადიან გეგმებზე თუ ვისაუბრებთ, სანქციები უფრო უნდა გამკაცრდეს და ეს ინიციატივა მთავრობამ საქართველოს პარლამენტს უკვე წარუდგინა. რაც შეეხება მოკლევადიან გეგმას, სეზონის განმავლობაში სამუშაო ჯგუფი, გუბერნიასთან და სამოქალაქო აქტივთან ერთად აქტიურად ვიმუშავებთ, რომ იგივე პრობლემის გაჩენის შემთხვევაში, ნორმების დამრღვევმა საწარმომ მუშაობის გაგრძელება ვეღარ შეძლოს. უნდა აღინიშნოს, რომ ხშირ შემთხვევაში, წარმოქმნილი პრობლემა და სუნი არაჯანსაღი სანედლეულო ბაზის არსებობით იყო გამოწვეული, რადგან არ ხდებოდა პროდუქციის დროული მიწოდება საწარმოებისთვის. საწარმოთა უმრავლესობას თანამედროვე ფილტრები და გამწმენდი საშუალებები აქვს, თუმცა მათ მიმართ მაინც არსებობს პრეტენზია, რაც გამოყენებული წყლების უტილიზაციას უკავშირდება. ყველა ასეთი საწარმოს მიმართ კანონით გათვალისწინებული ზომები გატარდება“, – განაცხადა ლევან დავითაშვილმა.როგორც სახელმწიფო რწმუნებულმა, ალექსანდრე მოწერელიამ აღნიშნა, ყველა შესაბამისი უწყება ჩართულია პრობლემის მოგვარებაში.„დღევანდელი მდგომარეობით, საწარმოებს დაახლოებით 60 ტონამდე ნაშთი აქვთ დარჩენილი, რომელიც სამოქალაქო აქტივისტებისა და სამუშაო ჯგუფის ზედამხედველობის ქვეშ, ერთ-ერთ ფაბრიკაში გადამუშავდება. ამის შემდეგ, კი, ფაბრიკები შეაჩერებენ მუშაობას. რა თქმა უნდა, მოსახლეობის მოთხოვნა არის სამართლიანი. სამუშაო ჯგუფი გარემოსდაცვითი ზედამხედველობის დეპარტამენტის და სურსათის ეროვნული სააგენტოს სპეციალისტებთან ერთად გავაგრძელებთ მუშაობას, რომ ყველა საკითხი გადაწყდეს სამართლებრივ ჭრილში და საწარმოებმა კარგად გაითავისონ თუ რა პირობებში უნდა მოახდინონ თევზის გადამუშავება ისე, რომ მოსახლეობა არ დააზარალონ“, - განაცხადა სახელმწიფო რწმუნებულმა.ხელისუფლების წარმომადგენლების ინიციატივით, შეიქმნა საინიციატივო ჯგუფი, რომელიც ადგილობრივ მოოქალაქეებს, ხელისუფლების წარმომადგენლებს და თევზის გადამმუშავებელი საწარმოების მფლობელებს გააერთიანებს. სამუშაო ჯგუფი მონიტორინგს გაუწევს ფოთში აღნიშნული პრობლემის მოგვარებას და აქტიური კომუნიკაცია ექნება ხელისუფლებასთან.ფოთის მერიაში გამართულ სამუშაო შეხვედრას გარემოსდაცვითი ზედამხედველობის დეპარტამენტის და სურსათის ეროვნული სააგენტოს ხელმძღვანელი პირები ესწრებოდნენ.შეხვედრის დასრულების შემდეგ, გარემოს დაცვის მინისტრმა და სახელმწიფო რწმუნებულმა, ადგილობრივ მოსახლეობასთან ერთად, თევზის გადამმუშავებელი საწარმოები და ნავმისადგომის ტერიტორია დაათვალიერეს, სადაც თევზის რეწვის სეინერებიდან ქაფშიის გადმოტვირთვა ხორციელდება.ამ ეტაპზე, ფოთში თევზის პროდუქტების გადამმუშავებელი 4 ქარხანა ფუნქციონირებს. მათ მიერ, სამუშაო პროცესის მიმდინარეობისას არსებული ნორმების დაცვას, შესაბამისი სამსახურები დეტალურად სწავლობენ.
#

რუსთავში არსებული ეკოლოგიური მდგომარეობის შესახებ სამუშაო შეხვედრა გაიმართა

გარემოს დაცვისა და სოფლის მეურნეობის მინისტრის მოადგილე ნინო თანდილაშვილი, ქვემო ქართლში სახელწმიფო რწმუნებული შოთა რეხვიაშვილი, რუსთავის მერი და საკრებულოს წარმომადგენლები სამოქალაქო სექტორის წარმომადგენლებს შეხვდნენ.შეხვედრაზე რუსთავში განხორციელებული ეკოლოგიური მდგომარეობის მასშტაბური მონიტორინგის შედეგები განიხილეს და მის საფუძველზე, ქალაქში არსებული საწარმოებისთვის დაწესებულ სანქციებზე იმსჯელეს. საუბარი შეეხო დაგეგმილ საკანონმდებლო ცვლილებებს და რეგულაციებს, რომლებიც გარემოზე მავნე ზემოქმედების კუთხით კონტროლისა და სანქციების გამკაცრებას ითვალისწინებს.„ბოლო 20 წლის განმავლობაში, რუსთავში არსებული სამრეწველო საწარმოების მსგავსი მასშტაბის მონიტორინგი არ ჩატარებულა. წელს პირველად, სამინისტრომ განახორციელა მასშტაბური შემოწმება, რომლის მიზანი, საწარმოებში არსებული მდგომარეობის და პრობლემების შესახებ სრულყოფილი ინფორმაციის მიიღება იყო. სამომავლოდ, აღნიშნული პრობლემების აღმოფხვრის მიზნით, საწარმოებს დაუწესდებათ კონკრეტული მოთხოვნები, რაც სავალდებულო იქნება შესასრულებლად. ეს მოგვცემს საშუალებას, საწარმოთა კონკრეტული ქმედებების გატარებით, ეტაპობრივად გამოსწორდეს არსებული ეკოლოგიური მდგომარეობა. პარალელურ რეჟიმში, ჩვენ ვმუშაობთ საკანონმდებლო ინიციატივებზე, რომლებიც გულისხმობს გაზრდილ საჯარიმო სანქციებს მათთვის, ვინც არ ასრულებს გარემოსდაცვითი ნებართვების პირობებს, საქმიანობენ ფილტრების გარეშე და ა.შ. სანქციები იქნება საკმაოდ სოლიდური, რაც ვფიქრობ, რომ გარკვეულ შედეგს მოგვცემს და საწარმოების მხრიდან, გარემოსდაცვის კუთხით მეტად პასუხისმგებლიან დამოკიდებულებას გააჩენს“, - განაცხადა გარემოს დაცვისა და სოფლის მეურნეობის მინისტრის მოადგილემ, ნინო თანდილაშვილმა.როგორც ქვემო ქართლში სახელწმიფო რწმუნებულმა, შოთა რეხვიაშვილმა აღნიშნა, შეხვედრის ფარგლებში განისაზღვრა კონკრეტული ნაბიჯები, რომლის განხორციელების შედეგად, უახლოეს მომავალში, მოსახელობა ეკოლოგიური მდგომარეობის კუთხით გარკვეულ უკეთესობას იგრძნობს.შეხვედრაზე გადაწყდა, რომ შეიქმნება სამუშაო ჯგუფი, რომლის შემადგენლობაში შევლენ აღმასრულებელი, საკანონმდებლო და ადგილობრივი ხელისუფლების წევრები, საერთაშორისო ექსპერტები და სამოქალაქო სექტორის წარმომადგენლები. აღნიშნული ჯგუფი ხელს შეუწყობს წევრებს შორის კოორდინირებულ საქმიანობას და აქტიურ კომუნიკაციას.