#

ლევან დავითაშვილი შოკოლადის მწარმოებელი შვეიცარიული კომპანიის „Camille Bloch” პრეზიდენტს შეხვდა

გარემოს დაცვისა და სოფლის მეურნეობის მინისტრი ლევან დავითაშვილი შოკოლადის მწარმოებელი შვეიცარიული კომპანიის „Camille Bloch” პრეზიდენტს, დანიელ ბოშს შეხვდა. შეხვედრაზე კომპანიის „Camille Bloch” წარმომადგენლებმა საქართველოში თხილის ინოვაციური გზით წარმოების პროექტის პრეზენტაცია წარადგინეს.  შვეიცარიული კომპანიის პრეზიდენტმა, დანიელ ბოშმა ხაზგასმით აღნიშნა, რომ  საქართველოს თხილის წარმოების ძალიან დიდი პოტენციალი აქვს და თხილის მაღალი ხარისხით  გამოირჩევა. „Camille Bloch” წარმომადგენლებმა მზადყოფნა გამოთქვეს ქართულ მხარესთან თხილის წარმოებაში თანამედროვე და ინოვაციური მეთოდების გამოყენების გამოცდილების გაზიარების კუთხით  ითანამშრომლონ. როგორც ლევან დავითაშვილმა აღნიშნა, საქართველო თხილის უმსხვილეს მწარმოებელ ქვეყნებს შორის მოწინავე ადგილს იკავებს. „თხილი საქართველოსთვის ერთ-ერთი მნიშვნელოვანი საექსპორტო პროდუქტია. ჩვენთვის მნიშვნელოვანია ქვეყანაში კიდევ უფრო გავზარდოთ როგორც თხილის წარმოება, ასევე მისი ხარისხი. შესაბამისად, ჩვენ მზად ვართ გავიზიაროთ წარმატებული ევროპული  გამოცდილება“, - აღნიშნა ლევან დავითაშვილმა.  შოკოლადის მწარმოებელმა შვეიცარიულმა კომპანიამ „Camille Bloch” კახეთის რეგიონში, სიღნაღის მუნიციპალიტეტში, 40 მლნ ლარის ოდენობის ინვესტიცია განახორციელა და  50 ჰა მიწის ფართობზე, ინოვაციური ტექნოლოგიით თხილის ბაღების გაშენება დაიწყო.  კომპანია, თხილის პირველ მოსავალს, 2025 წლისთვის ელოდება. 
#

თხილის მიღება - გადამუშავების პროცესი საწარმოებში აქტიურად მიმდინარეობს

გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი, სამეგრელოს რეგიონში თხილის ჩაბარების პროცესს გაეცნო. დღეისათვის, ფერმერებისგან თხილის მიღება-გადამუშავების პროცესი საწარმოებში აქტიურად მიმდინარეობს. „ბოლო წლებში, სახელმწიფოს სწორი პოლიტიკის, მიმდინარე პროექტებისა და პროგრამების, გადამმუშავებელ და შემნახველ  საწარმოებში განხორციელებული  ინვესტიციების შედეგად,   ქვეყნის მასშტაბით შეიქმნა და ფუნქციონირებს თანამედროვე სტანდარტის, ახალი ტექნოლოგიებით აღჭურვილი საწარმოები, რაც ეხმარება ადგილობრივ ფერმერებს მოწეული მოსავლის დაბინავება-რეალიზებაში. ამავდროულად, წარმოების სრულ ჯაჭვში   თანამედროვე ტექნოლოგიების დანერგვა-განვითარება, უზრუნველყოფს მოსავლის ხარისხის შენარჩუნებას და ხელს უწყობს საერთაშორისო ბაზრებზე ქართული თხილის, როგორც ბრენდის დამკვიდრებას. თხილის წარმოების გაუმჯობესების მიზნით, სახელმწიფო მომავალშიც გააგრძელებს ხელშემწყობი ღონისძიებების განხორციელებას“, - აღნიშნა გიორგი ხანიშვილმა. გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი, სურსათის ეროვნული სააგენტოს უფროსთან, ზურაბ ჩეკურაშვილთან ერთად სენაკის მუნიციპალიტეტში მდებარე თხილის გადამმუშავებელი საწარმოს  „ნათს ელი“ მუშაობის პროცესს გაეცნო. თანამედროვე ტექნოლოგიებით აღჭურვილი საწარმო შეღავათიანი აგროკრედიტის პროგრამის ფარგლებში შეიქმნა. განხორციელებული ინვესტიცია 1,5 მლნ ლარს შეადგენს. ყოველწლიურად, „ნათს ელი“ ადგილობრივი ფერმერებისგან  საშუალოდ,  4-5 ათას  ტონამდე  თხილის იბარებს და ამუშავებს. საწარმო მოიცავს წარმოების სრულ ციკლს, რაც თხილის მაღალი ხარისხის შენარჩუნებას უზრუნველყოფს. საწარმოში 70 ადგილობრივია დასაქმებული.  აღსანიშნავია, რომ წელს თხილის საკმაოდ უხვი მოსავალია და  ხარისხის შესაბამისად, მისი ფასი 3-6 ლარის ფარგლებში მერყეობს. გადამუშავებული პროდუქციის ძირითადი ნაწილი ექსპორტზე გადის. 
#

ლევან დავითაშვილი: ჩვენი მიზანია საექსპორტო გაყიდვების წახალისება და გაზრდა, გვინდა კიდევ უფრო შევამციროთ დამოკიდებულება არსებულ, ტრადიციულ ბაზრებზე“

„დღეს, საქართველოს მთავრობამ მიიღო მნიშვნელოვანი გადაწვეტილება, რომელიც კიდევ უფრო შეუწყობს ხელს ქართული ღვინის პოპულარიზაციას მთელ მსოფლიოში და საექსპორტო გაყიდვების ზრდას. მნიშვნელოვანია, რომ ჩვენ ამ ახალ პროექტს ვაანონსებთ ზუსტად რთველის პირობებში. აღნიშნულ პროექტზე მუშაობა მიმდინარე წლის დასაწყისიდან მიმდინარეობდა. პროექტის დიზაინი შეთანხმებულია ღვინის მწარმოებელთა ასოციაციასთან.  ჩვენ გვქონდა არაერთი შეხვედრა მეწარმეებთან, სადაც კონკრეტული პირობები  საბოლოოდ შევაჯამეთ. პროექტი ითვალისწინებს ე.წ. სავაჭრო მარკეტინგის „ტრეიმარკეტინგის“ ღონისძიებების დაფინანსებას, საგრანტო თანადაფინანსებას ღვინის მწარმოებელი კომპანიებისთვის. როგორც მოგეხსენებათ, საქართველოს ხელისუფლება, საქართველოს მთავრობა წლების განმავლობაში ახორციელებს ღვინის პოპულარიზაციის ღონისძიებებს. უნდა აღინიშნოს, რომ მნიშვნელოვნად გაიზარდა ქართული ღვინის პოპულარიზაციის დაფინანსება. 2013 წლიდან, გასამმაგდა ბიუჯეტი და  გახდა 3 მილიონი. დღეისთვის კი, ქართული ღვინის პოპულარიზაციის ბიუჯეტი, დაახლოებით 9-10 მლნ ლარია. პოპულარიზაციის ღონისძიებებს ღვინის ეროვნული სააგენტო ახორციელებს შერჩეულ სამიზნე ბაზრებზე. კვლევების შედეგად, შეირჩა კონკრეტული მიმართულებები, გვყავს არჩეული ყველაზე გამოცდილი და კომპეტენტური, ღვინის სფეროში წარმატებული მარკეტინგული კომპანიები, რომლებიც წლების განმავლობაში, მარკეტინგულ კომუნიკაციებს უზრუნველყოფენ,  ასევე შერჩეული გვყავს კონკრეტული, გავლენიანი ღვინის კრიტიკოსები, ინფლუენსერები, ღვინის მაგისტრები, ღვინის მასტერ-სომელიეები, რომლებიც წლების განმავლობაში, ქართული ღვინის ზოგად პოპულარიზაციაზე ზრუნავენ. ეს ადამიანები უკვე კარგად გაცნობიერებულები არიან ქართული ღვინის სპეციფიკაში. გამომდინარე აქედან, შეიქმნა უამრავი მასალა, სხვადასხვა ენაზე, მიზნობრივი ბაზრებისთვის. მუდმივად ხდება ქართული ღვინის შესახებ ინფორმაციების გავრცელება სამიზნე ბაზრებზე, ისეთებზე როგორიც არის  ამერიკის  შეერთებული შტატები, დიდი ბრიტანეთი, პოლონეთი, უკვე დაემატა ბალტიისპირეთის ქვეყნები,  სამხრეთ-აღმოსავლეთ აზია და ა.შ თუმცა, ჩვენ გვინდა, რომ ქართული ღვინო გახდეს კიდევ უფრო პოპულარული და ეს პირდაპირ აისახოს ქართული ღვინის კომპანიების წარმატებებში, რაც  საბოლოოდ, რა თქმა უნდა, მთლიანად ინდუსტრიის, მათ შორის, ჩვენი მევენახე ფერმერების წარმატება იქნება. სწორედ ამიტომ, ჩვენ გადავწყვიტეთ, რომ დღეს დადგა ეტაპი, როდესაც ქართული ღვინო ნიშური სეგმენტიდან ახალ ბაზრებზე უნდა გადავიდეს, რეალურად საყოველთაო ხელმისაწვდომ კატეგორიაში. ქართული ღვინო ხელმისაწვდომი უნდა იყოს  ძირითად გაყიდვის არხებში, როგორიც არის  ე.წ on trade, მომსახურება-ჰორეკა სექტორი და ქსელური მაღაზიები, რითეილი. სწორედ ამიტომ, მნიშვნელოვანია კონკრეტული სავაჭრო მარკეტინგული ღონისძიებების დაფინანსება, რასაც ქართული ღვინის კომპანიები აკეთებენ, თუმცა არა საჭირო მასშტაბით, რადგან ამას სჭირდება მნიშვნელოვანი ფინანსური რესურსი. სწორედ  ამიტომ, ჩვენ გადავწყვიტეთ, საგრანტო თანადაფინანსება იმ ბაზრებზე, სადაც ქართული ღვინო უკვე არის წარმოდგენილი, თუმცა ჯერ კიდევ არ გვაქვს მიღწეული იმ პოზიციებამდე, რასაც ჩვენ ვგეგმავთ.  ქართულმა ღვინომ უნდა დაიმკვიდროს მნიშვნელოვანი ადგილი ღვინის ცნობილ მწარმოებელ თუ ექსპორტიორ ქვეყნებს შორის. ე.წ ახალი სამყაროს ქვეყნების ღვინო ხელმისაწვდომია ევროპის ყველა ქვეყნის ბაზარზე, ასევე ცნობილი ევროპული მწარმოებლების ღვინოები ხელმისაწვდომია, მათ შორის, აშშ-სა თუ სამხრეთ-აღმოსავლეთ აზიაში.  სწორედ ასეთ კატეგორიაში უნდა გადავიდეს ქართული ღვინო.დღეს, ქართული ღვინო იყიდება, დაახლოებით, 60 ქვეყანაში.  2019 წელს, 341-მა კომპანიამ განახორციელა  ექსპორტი 53 ქვეყანაში. 2020 წელს, კომპანიების და საექსპორტო ქვეყნების რაოდენობა კიდევ უფრო გაიზარდა. 2020 წლის მონაცემებით, მსოფლიოს 60 ქვეყანაში, 376 კომპანია ახორციელებდა ექსპორტს.  თუმცა, ჩვენ გვინდა, რომ ეს გაზრდილი რიცხვები,  უკვე გაყიდვების რაოდენობებში აისახოს. დღეს, ჩვენ უკვე  მივაღწიეთ 100 მლნ-იან ნიშნულს. 100 მლნ ბოთლი წელიწადში, ეს არის 2021 წლის საპროგნოზო მონაცემი. მაგრამ ჩვენ დავაანონსეთ, რომ 10 წლიანი გეგმის ფარგლებში, 2030 წლისთვის, ღვინის სექტორის საექსპორტო შემოსავლები უნდა იყოს 1 მლრდ დოლარი. ფაქტობრივად, უნდა გასამმაგდეს დღევანდელი შემოსავლები ყურძნისეული წარმოშობის ალკოჰოლური პროდუქტებიდან.მარკეტინგული ღონისძიებების თანადაფინანსების პროგრამა ითვალისწინებს თანადაფინანსებას ყველა იმ ბაზარზე, სადაც  ქართული ღვინო გავა, გარდა დსთ-სა და საქართველოსი. ბუნებრივია, საქართველოში ღვინის რეალიზაციას, ჩვენგან არ ჭირდება  პოპულარიზაციაში ხელშეწყობა. ამას ახერხებენ როგორც მცირე, საშუალო და დიდი კომპანიები. ჩვენი მიზანია, საექსპორტო გაყიდვების წახალისება და გაზრდა, მათ შორის ახალ გეოგრაფიაში. ხშირად იყო დასმული საკითხი ბაზრების დივერსიფიცირებაზე. რა თქმა უნდა, ჩვენ ვაკეთებთ ამ დივერსიფიცირებას იმიტომ, რომ შერჩეულ სამიზნე ბაზრებზე, ეს არის ახალი ბაზრები,  სადაც  სახელმწიფო ფულს ხარჯავდა,  ქართული ღვინო იმკვიდრებს ადგილს. თუმცა, ჩვენ გვინდა ტემპი გავზარდოთ და კიდევ უფრო შევამციროთ დამოკიდებულება არსებულ, ტრადიციულ ბაზრებზე. შესაბამისად, მარკეტინგული ღონისძიებები არ დაფინანსდება დსთ-ს ქვეყნებში, მაგრამ დაფინანსდება ყველა დანარჩენ ქვეყანაში, სადაც ღვინის კომპანიები განახორციელებენ მარკეტინგულ ღონისძიებებს.მარკეტინგული ღონისძიებების ბიუჯეტი, ერთი კომპანიისთვის, წლის განმავლობაში 600 000 ლარით განისაზღვრა. თუმცა, ეს არის საწყისი, საპილოტე ვერსია და  შემდგომში შეიძლება კიდევ უფრო მეტი თანხები გამოყოს სახელმწიფომ, თუ დავინახავთ, რომ პროგრამა წარმატებით ხორციელდება. ამავე დროს, ეს პირდაპირ დაკავშირებულია გაყიდვების ზრდასთან. ჩვენ მივიღებთ შედარებას, კონკრეტულ საანგარიშო წელში, როდესაც   მარკეტინგული ღონისძიებების დაფინანსება მოხდება, უნდა იყოს გაზრდილი გაყიდვების რაოდენობა წინა წელთან შედარებით და ზუსტად ეს ნაზარდი იქნება  ჩვენთვის ამოსავალი წერტილი. ამ შემთხვევაში, შემზღუდველი დამატებითი ფაქტორი არის 2 ლარი, ერთ ბოთლ დამატებით გაყიდულ ღვინოზე, ეს არის ბიუჯეტი. მაგრამ გითხარით, რომ მთლიანი ბიუჯეტი ერთ კომპანიაზე არის დაახლოებით 600  ათასი ლარი მოაზრებული, რომელიც შეიძლება მომავალში გაიზარდოს. რეალურად, ჩვენ არ გვინდა, რომ  ღვინის კომპანიებმა სახელმწიფო ბიუჯეტის ხარჯზე  თავიანთი მარკეტინგული აქტივობები ჩაანაცვლონ, შესაბამისად,  პროგრამის კიდევ ერთ კრიტერიუმს გულისხმობს - მათ უნდა გაზარდონ არსებული მარკეტინგული ბიუჯეტი და ესეც, რა თქმა უნდა, აუდიტის მიერ დადასტურდება. კონკრეტულად, მიმდინარე საანგარიშო წლის მარკეტინგული ხარჯი, წინა წელთან შედარებით, უნდა იყოს გაზრდილი და ზუსტად ეს ნაზარდი ხდება ამ კონკრეტული ლიმიტებით დაფინანსებული ჩვენი მხრიდან. დარწმუნებული ვარ, რომ პროგრამა იქნება პოპულარული, რადგან ის  სახელმწიფომ კერძო სექტორთან შეთანხმებით შეიმუშავა. ჩვენ გვქონდა ბევრი შეხვედრა, დისკუსია, მოლაპარაკება ღვინის მწარმოებელ კომპანიებთან, ბევრი აზრი მოვისმინეთ და პოზიციები შევაჯერეთ. შესაბამისად, ეს არის ერთობლივი მუშაობის შედეგი და აქედან გამომდინარე, ვფიქრობ, რომ კომპანიები ენთუზიაზმით ჩაერთვებიან ამ პროგრამაში.  ჩვენ ვგეგმავთ მნიშვნელოვანი ფინანსური რესურსის მიმართვას შემდეგი 3-4 წლის განმავლობაში,  რათა რეალური შედეგები მივიღოთ და უკვე საშუალოვადიან პერსპექტივაში, 5 წლის თავზე,  ვფიქრობ, გარდატეხა მოხდება ქართული ღვინის პოპულარიზაციის და ზოგადად, საექსპორტო გაყიდვების წარმატების კუთხით“, - განაცხადა საქართველოს ვიცე-პრემიერმა, გარემოს დაცვისა და სოფლის მეურნეობის მინისტრმა ლევან დავითაშვილმა დღეს, მთავრობის სხდომის დასრულების შემდეგ.
#

მუხურის მეფუტკრეობის ბაზაზე ქართული ფუტკრის მეგრული პოპულაციის აღდგენითი სამუშაოები აქტიურად მიმდინარეობს

გარემოს დაცვისა და სოფლის მეურნეობის მინისტრის მოადგილე, სოლომონ პავლიაშვილი  ჩხოროწყუს მუნიციპალიტეტის მერთან, დავით გოგუასთან და სოფლის მეურნეობის სამეცნიერო-კვლევითი ცენტრის დირექტორთან, ლევან უჯმაჯურიძესთან ერთად  მუხურის მეფუტკრეობის ბაზაზე მიმდინარე სამუშაოებს გაეცნო. 2017 წლიდან, მუხურის მეფუტკრეობის ბაზა ქართული ფუტკრის მეგრული პოპულაციის აღდგენით სამუშაოებს ახორციელებს და უნიკალურ სანაშენე მასალას აწარმოებს.   „მუხურის მეფუტკრეობის საცდელ მეურნეობას 70-წლიანი ისტორია აქვს. აქ წლების განმავლობაში მიმდინარეობს სადედე ფუტკრის გამოყვანა. ჩვენთვის მნიშვნელოვანია აღნიშნული მიმართულება განვითარდეს, რასაც მუხურის მეფუტკრეობის ბაზის წარმატებული ფუნქციონირება მნიშვნელოვნად შეუწყობს ხელს. სამინისტრო ყველაფერს გააკეთებს იმისთვის, რომ ქართული უნიკალური ჯიშების შენარჩუნება და გავრცელება მოხდეს“, - აღნიშნა გარემოს დაცვისა და სოფლის მეურნეობის მინისტრის მოადგილემ, სოლომონ პავლიაშვილმა. მუხურის ბაზაზე ქართული ფუტკრის აღდგენითი სამუშაოების გარდა, ფუტკრის გენეტიკური პასპორტიზაცია, მისი პოპულარიზაცია და ქვეყნის შიგნით და მის ფარგლებს გარეთ გავრცელება მიმდინარეობს. ფუტკრის მეგრული პოპულაცია განსაკუთრებული შრომისუნარიანობით, მაღალი პროდუქტიულობით, სუსტი ღალის კარგი გამოყენებით და გრძელი ხორთუმით გამოირჩევა. ბაზაზე, 2017 წლიდან დღემდე, სანაშენე და რეპროდუქტორი ფუტკრის ოჯახებიდან,  გამოყვანილია  1700-მდე დედა ფუტკარი, ყოველ წლიურად კი, ფერმერებისთვის, განაყოფიერებული დედა ფუტკრის  გადაცემა მიმდინარეობს. ბაზა აქტიურად არის ჩართული მეფუტკრე-ფერმერების გადამზადება-სწავლებაში და რეგულარულად ატარებს უფასო ტრენინგებს ფუტკრის ოჯახების მოვლა-მოშენების და დაავადებების წინააღმდეგ პრევენციული ღონისძიებების გატარების შესახებ. მუხურის სახელმწიფო საჯიშე მეურნეობა 1949 წელს შეიქმნა. მეურნეობა ახორციელებდა ქართული დედა ფუტკრის გამოყვანას, ამანათნაყრების წარმოებას და მათ მრავალ ქვეყანაში ექსპორტს ახდენდა. აღნიშნული ბაზის აღდგენა 2017 წელს, გარემოს დაცვისა და სოფლის მეურნეობის სამინისტროს სამეცნიერო-კვლევითი ცენტრის მიერ განხორციელდა. 
#

ლევან დავითაშვილი: „სტიქიის პირობებში, განსაკუთრებულ რეჟიმში მუშაობს როგორც საკოორდინაციო შტაბი, ისე თითოეული ჩვენი თანამშრომელი და მუნიციპალიტეტის წარმომადგენელი იმისთვის, რომ ყურძნის ჩაბარების პროცესში არანაირი შეფერხება არ მოხდეს“

„26 აგვისტოს, კახეთის რეგიონში, იყო მნიშვნელოვანი სტიქია, რომელმაც გაანადგურა სასოფლო-სამეურნეო ნარგაობები, შესაბამისად, სახელმწიფომ მყისიერად მოახდინა რეაგირება. პირველივე დღიდან, საკოორდინაციო შტაბმა, ადგილობრივ ხელისუფლებასთან ერთად, დაიწყო ზარალის შეფასება. დღევანდელი მონაცემებით, დაახლოებით, 5000 ჰა არის დაზიანებული კახეთის რეგიონში. ძირითადად, ეს არის თელავის, გურჯაანისა და ყვარლის მუნიციპალიტეტები, სადაც დაზიანება არის 100%-მდე, თუმცა არის რაიონები, სადაც ზარალი 30-50%-მდეა. მოხდა დეტალური შეფასება. 5000 ჰა-დან, ძირითადად დაზიანებულია ვენახის ფართობები.  ეს არის როგორც საფერავის, ისე რქაწითელის ვენახები,  შესაბამისად, სტიქია მეტწილად მევენახე ფერმერებს შეეხო. აქედან გამომდინარე, მივიღეთ გადაწყვეტილება, მომხდარიყო მყისიერი კომუნიკაცია ფერმერებთან, რათა მათ მიერ მოწეული მოსავალი, სეტყვისგან სხვადასხვა ხარისხის დაზიანების მიუხედავად, სახელმწიფოს მიერ დაქირავებულ რამდენიმე ქარხანაში ჩააბარონ. რთველის განმავლობაში, სახელმწიფო საწარმო შპს ,,მოსავლის მართვის კომპანია“ წარმოდგენილია კახეთის ყველა მუნიციპალიტეტში. მას დაქირავებული აქვს  არაერთი ღვინის ქარხანა იმისთვის, რომ ჭარბი მოსავლის დაბინავება შეუფერხებლად მოახერხონ ჩვენმა მევენახე ფერმერებმა და ეს  ასეც ხდება. სტიქიის პირობებშიც, განსაკუთრებულ რეჟიმში მუშაობს როგორც საკოორდინაციო შტაბი, ისე თითოეული ჩვენი თანამშრომელი და მუნიციპალიტეტის წარმომადგენელი იმისთვის, რომ ყურძნის ჩაბარების პროცესში არანაირი შეფერხება არ მოხდეს. სამწუხაროდ, ზოგიერთი მედიასაშუალების მიერ, გავრცელდა ცრუ ინფორმაცია, რომ მოსავლის დაბინავებას პრობლემა აქვს კახეთში. თუმცა, ეს არ გვიკვირს, რადგან წლების განმავლობაში, რთველი მიდის ორგანიზებულად, არცერთი კილოგრამი ყურძნის ჩაბარებას პრობლემა არ ჰქონია 2012 წლიდან დღემდე. არ ჩატარებულა არცერთი რთველი ისე, რომ ცრუ ინფორმაცია არ გავრცელებულიყო და პოლიტიზირებული არ გამხდარიყო რთველის მიმდინარეობის პროცესი. ზოგიერთი პოლიტიკური ძალა რთველს, მევენახეების მთელი წლის შრომის შედეგს, იყენებს საკუთარი პოლიტიკური მიზნებისთვის და ხშირად, ცდილობენ ამაზე ააგონ თავიანთი დღის წესრიგი.ამის მიუხედავად, ჩვენ ვაკეთებთ იმას რაც გასაკეთებელია. ვდგავართ ჩვენი ფერმერების და მევენახეების  გვერდში. პრემიერ-მინისტრის გადაწყვეტილებით და დავალებით, პირადად ვიმყოფებოდი რეგიონში. მხარის ხელმძღვანელებთან ერთად, ვიყავი  მევენახე ფერმერებთან, ვისაც უშუალოდ შეეხო სტიქია და დაზარალდა. ჩვენ ვისაუბრეთ მაქსიმუმი რა შეიძლება გაკეთებულიყო  და შემიძლია პირდაპირ გითხრათ, რომ მოლოდინები, რაც ჩვენს ფერმერებს ჰქონდათ, სრულად არის გამართლებული. კერძოდ, სახელმწიფო რქაწითელის ჯიშის დაზიანებულ ყურძენს, თეთრი იქნება თუ მწვანე, 80 თეთრად იბარებს. ხოლო, 1 ლარად ხდება  საფერავის ჯიშის დაზიანებული ყურძნის ჩაბარება ყველა იმ ლოკაციაზე, რომელიც არის გახსნილი სტიქიის რეგიონში. შესაბამისად, მოსახლეობას არ უწევს შორ მანძილზე მოწეული პროდუქცის გადატანა.  დაბინავება ხდება ოპერატიულად. გვესმის, რომ როდესაც არის დაზიანების სხვადასხვა ხარისხი, მალფუჭებადი პროდუქცია კიდევ უფრო სათუთია და მას სჭირდება ოპერატიულად დაბინავება. ამისთვის, სახელმწიფოს ყველაფერი აქვს გაკეთებული. ყველაფერი არის ორგანიზებული.რაც შეეხება, იმ მევენახე ფერმერებს, რომელთაც სრულად  დაუზიანდათ ვენახები, ჩვენ ვახდენთ 3000 ლარის ანაზღაურებას. ფაქტობრივად, ეს არის ის თანხა, რაც მათ სჭირდებათ იმისთვის, რომ მოიწიონ მოსავალი. სამწუხაროდ, სტიქიამ რთველის პერიოდში მოგვისწრო. აქედან გამომდინარე, სრულად მოხდება ზარალის ანაზღაურება, რაც მათ საშუალებას მისცემს კვლავ გააგრძელონ წარმოება, ვენახების მოვლა და თავიანთი საქმიანობა მომავალში. ამავე დროს, ჩვენ შევთანხმდით, რომ იმ სხვა მრავალწლიან კულტურებში, სადაც გვაქვს დიდი ზიანი,  საჭიროა სრულად ჩანაცვლდეს ან განახლდეს ბაღები, ეს სურვილისამებრ შეუძლიათ გადაწყვიტონ ფერმერებმა. ეს კომპონენტი, პროექტის  „დანერგე მომავალი“ ფარგლებში, შარშანწინ ავამოქმედეთ დროებით. წელს, მას განვაახლებთ, სადაც მოხდება ნერგის ღირებულების სრული ანაზღაურება და ასევე, ბაღის მოწყობისთვის, წვეთოვანი სისტემის დაყენების შემთხვევაში, თანადაფინანსება, რაც მებაღეებს, მათ შორის მევენახეებს, საშუალებას მისცემს ხელახლა აღადგინონ თავიანთი ბაღები. უნდა აღინიშნოს, რომ სადაზღვეო კომპანიები რეგიონში ოპერატიულად მუშაობენ. ჩვენ ვართ მუდმივ კონტაქტზე იმ სადაზღვეო კომპანიებთან, რომლებსაც განხორციელებული ჰქონდათ დაზღვევა კახეთის რეგიონში. კიდევ ერთხელ ვიყენებ შესაძლებლობას და მივმართავ მოსახლეობას, რომ მომავალ წლებში, აუცილებლად გამოიყენონ დაზღვევის ის პროდუქტი, რომელსაც სახელმწიფო სთავაზობს.  აგროდაზღვევის პროგრამაში, სადაზღვეო პრემიის, ანუ სადაზღვეო შენატანის თანხის ნახევარს, ვენახების შემთხვევაში, სახელმწიფო იხდის. შესაბამისად, ეს არის მნიშვნელოვნად გაიაფებული სერვისი.  ჩვენ გვქონდა შეხვედრები ფერმერებთან და ყველა აღიარებდა, რომ სამწუხაროდ, მათ წელს არ გამოიყენეს დაზღვევა. მიუხედავად იმისა, რომ დაზღვევის პროცენტი მზარდია, შემიძლია გითხრათ, რომ დაზიანებული ფართობიდან, დაახლოებით 1200 ჰექტრამდე ფართობია დაზღვეული.  დაზღვეული მევენახეები  სრულ ანაზღაურებას მიიღებენ. რა თქმა უნდა, ისინი უპირატეს მდგომარეობაში არიან. გვესმის, რომ ესეც მაგალითია, რომ დაზღვევა აუცილებელი საჭიროებაა სასოფლო-სამეურნეო საქმიანობისას, რათა მსგავსი პრობლემები, რომელზეც დღეს ვსაუბრობთ,  მომავალში ავირიდოთ თავიდან“, - განაცხადა საქართველოს ვიცე-პრემიერმა, გარემოს დაცვისა და სოფლის მეურნეობის მინისტრმა ლევან დავითაშვილმა დღეს, მთავრობის სხდომის დასრულების შემდეგ.
#

ლევან დავითაშვილი: ,,როგორც ყოველ წელს, წელსაც, ხელისუფლება ხალხის გვერდით დგას და ჩვენ გავაკეთებთ ყველაფერს, რომ სტიქიის მიერ მოსახლეობისთვის მიყენებული ზარალი მინიმუმამდე შემცირდეს“

საქართველოს ვიცე-პრემიერი, გარემოს დაცვისა და სოფლის მეურნეობის მინისტრი ლევან დავითაშვილი, საქართველოს მთავრობის ადმინისტრაციის რეგიონებთან ურთიერთობის დეპარტამენტის უფროსი ლერი ბარნაბიშვილი და კახეთის მხარის სახელმწიფო რწმუნებული ირაკლი შიოშვილი  სტიქიისგან დაზარალებულ ფერმერებს შეხვდნენ და მთავრობის მიერ სეტყვით დაზარალებული ფერმერების მხარდასაჭერად მიღებული გადაწყვეტილებები   გააცნეს. „ხაზგასმით მინდა აღვნიშნო, რომ როგორც  ყოველ წელს,  წელსაც ხელისუფლება დგას ხალხის გვერდით და ჩვენ გავაკეთებთ ყველაფერს, რომ სტიქიის მიერ მოსახლეობისთვის მიყენებული ზარალი მინიმუმამდე შემცირდეს. ზოგიერთი პოლიტიკური ძალა ცდილობს სპეკულირებას და მოსახლეობის გრძნობებით თამაშს. აცხადებენ, რომ მოსახლეობა მიტოვებულია და   ხელისუფლებისგან მხარდაჭერა არ აქვს, რაც არის აბსოლუტური სიცრუე. პირველი დღიდან, რთველის საკორდინაციო შტაბის თანამშრომლები მუშაობენ ფერმერებთან, რათა ორგანიზებულად მოხდეს დაზიანებული ყურძნის ჩაბარება. უნდა ითქვას, რომ სწორედ ჩვენი ხელისუფლების პირობებში ხდებოდა მევენახეობის დარგის უპრეცედენტო მხარდაჭრა, როგორც თანმიმდევრული პოლიტიკის და ზოგადად, დარგის განვითრების, ასევე კონკრეტულ შემთხვევების, მათ შორის კომპენსაციების კუთხით. 2012 წელს, გვახსოვს მასშტაბური კომპენსაციები, როდესაც ბატონმა ბიძინა ივანიშვილმა და ფონდმა ,,ქართუმ“ დაზარალებული მევენახეების კომპენსაცია განახორციელა. წელსაც, მთავრობის გადაწყვეტილებით, სტიქიით დაზარალებული მოსახლეობა, ვისაც სრულად, 100 %-ით გაუნადგურდა ყურძნის მოსავალი, ერთჯერადი კომპენსაცის სახით, 1 ჰა-ზე 3000 ლარს მიიღებს. მევენახეები დაზიანებულ ყურძენს - 1 კგ რქაწითელს 80 თეთრად, ხოლო  1 კგ საფერავს 1 ლარად  ჩაიბარებენ“, - აღნიშნა ლევან დავითაშვილმა. 26 აგვისტოს, ძლიერმა სეტყვამ და ქარმა, კახეთის რეგიონში, ყვარლის, თელავის და გურჯაანის მუნიციპალიტეტებში 4 600 ჰექტარი ვენახი დააზიანა. 
#

ლევან დავითაშვილი: „ყველა რესურსი მობილიზებულია, იმისთვის, რომ დაზარალებულმა მევენახეებმა მოსავლის დაბინავება შეუფერხებლად შეძლონ“

საქართველოს ვიცე-პრემიერი, გარემოს დაცვისა და სოფლის მეურნეობის მინისტრი ლევან დავითაშვილი, საქართველოს მთავრობის ადმინისტრაციის რეგიონებთან ურთიერთობის დეპარტამენტის უფროსი ლერი ბარნაბიშვილი და კახეთის მხარის სახელმწიფო რწმუნებული ირაკლი შიოშვილი სახელმწიფო საწარმოში შპს „მოსავლის მართვის კომპანია" სეტყვით დაზიანებული ყურძნის ჩაბარების პროცესს ადგილზე გაეცნენ.  „ყველა რესურსი  მობილიზებულია, იმისთვის, რომ დაზარალებულმა მევენახეებმა მოსავლის დაბინავება შეუფერხებლად შეძლონ. სეტყვის შედეგად დაზიანებული ყურძნის ჩაბარებას მევენახეები 3 სექტემბრის ჩათვლით შეძლებენ. დასეტყვილი ყურძნის მიღება თელავის, გურჯაანისა და ყვარლის მუნიციპალიტეტებში, სხვადასხვა ლოკაციაზე, უკვე შესაძლებელია. მევენახეები დაზიანებულ 1 კგ რქაწითელს 80 თეთრად და 1კგ საფერავს 1 ლარად ჩააბარებენ“, - აღნიშნა ლევან დავითაშვალმა. 26 აგვისტოს, ძლიერმა სეტყვამ და ქარმა, კახეთის რეგიონში, ყვარლის, თელავის და გურჯაანის მუნიციპალიტეტებში 4 600 ჰექტარი ვენახი დააზიანა. სახელმწიფო საწარმომ შპს „მოსავლის მართვის კომპანიამ" სეტყვისგან დაზიანებული ყურძნის ჩაბარება  27 აგვისტოდან დაიწყო და 3 სექტემბრის ჩათვლით გააგრძელებს.