#

საქართველოს სოფლის მეურნეობისა და სოფლის განვითარების სტრატეგიისა და სამოქმედო გეგმის განხილვა დასრულდა

სოფლის განვითარების უწყებათაშორისი საკოორდინაციო საბჭოს შემაჯამებელ სხდომაზე საქართველოს სოფლის მეურნეობისა და სოფლის განვითარების 2021-2027 წლების სტრატეგიის და 2021-2023 წლების სამოქმედო გეგმის განხილვა დასრულდა.საკოორდინაციო საბჭოს სხდომას საბჭოს თავმჯდომარე, გარემოს დაცვისა და სოფლის მეურნეობის მინისტრის პირველი მოადგილე, გიორგი ხანიშვილი ხელმძღვანელობდა. მინისტრის პირველმა მოადგილემ ევროკავშირს, გაეროს განვითარების პროგრამის (UNDP), გაეროს სურსათის და სოფლის მეურნეობის ორგანიზაციას (FAO) მხარდაჭერისთვის მადლობა გადაუხადა და აღნიშნა, რომ სტრატეგია და სამოქმედო გეგმის დოკუმენტზე მუშობა დაინტერესებული მხარეების აქტიური ჩართულობით, გამოთქმული შენიშვნებისა და რეკომენდაციების გათვალისწინებით მიმდინარეობდა.აღინიშნა, რომ სოფლის მეურნეობის და სოფლის განვითარების 2021-2027 წლების სტრატეგიის ძირითად მიზნებს კონკურენტუნარიანი სასოფლო-სამეურნეო და არასასოფლო-სამეურნეო სექტორების განვითარება, ბუნებრივი რესურსების მდგრადი გამოყენება, ეკოსისტემების შენარჩუნება, კლიმატის ცვლილებებთან ადაპტაცია და სურსათის/ცხოველთა საკვების უვნებლობის, ვეტერინარიისა და მცენარეთა დაცვის ეფექტიანი სისტემების განვითარება წარმოადგენს.გაეროს განვითარების პროგრამის (UNDP) ეროვნული მენეჯერის, ნოდარ კერესელიძის განცხადებით, სოფლის განვითარების პოლიტიკის შემუშავებისა და განხორციელების პროცესში სახელმწიფო და კერძო სექტორს, არასამთავრობო ორგანიზაციებსა და დაინტერესებულ მხარეებს შორის მჭიდრო თანამშრომლობას და აღნიშნულ პროცესში სამოქალაქო საზოგადოების ჩართულობას უდიდესი მნიშვნელობა ენიჭება.საქართველოს სოფლის განვითარების უწყებათაშორის საკოორდინაციო საბჭოს შეხვედრას საქართველოში ევროკავშირის, გაეროს განვითარების პროგრამის (UNDP) და გარემოს დაცვისა და სოფლის მეურნეობის სამინისტროს წარმომადგენლები ესწრებოდნენ.
#

სტრასბურგში, ევროპის ველური ბუნებისა და ბუნებრივი ჰაბიტატების დაცვის შესახებ (ბერნის) კონვენციის მუდმივმოქმედი კომიტეტის 39-ე შეხვედრაზე კომიტეტმა კონვენციის ბიუროს წევრად საქართველოს გარემოს დაცვისა და სოფლის მეურნეობის სამინისტროს ბიომრავალფეროვნებისა და სატყეო დეპარტამენტის უფროსი კარლო ამირგულაშვილი აირჩია!

ევროპის ველური ბუნებისა და ბუნებრივი ჰაბიტატების დაცვის შესახებ (ბერნის) კონვენციის მუდმივმოქმედი კომიტეტის 39-ე შეხვედრაზე საქართველოს მიერ წარდგენილი 7 ტერიტორია დამტკიცდა. დღეისათვის, საქართველოში ზურმუხტის ქსელი 58 ტერიტორიისგან შედგება და მისი ფართობი 1 285 974 ჰექტარს შეადგენს. გარემოს დაცვის სფეროში ბერნის კონვენცია ერთ-ერთი უმნიშვნელოვანესი კონვენციაა. აღნიშნული კონვენციის დანერგვისა და საქართველო-ევროკავშირს შორის ასოცირების შეთანხმებით აღებული ვალდებულების შესრულებისათვის, საქართველოში ზურმუხტის ქსელი შეიქმნა და მისი განვითარება მიმდინარეობს.ზურმუხტის ქსელის შესახებ ვრცლად იხილეთ:https://mepa.gov.ge/Ge/PublicInformation/17069
#

გიორგი გახარია: „სოფლის მეურნეობა უნდა გახდეს ეფექტურად მზარდი დარგი როგორც ექსპორტის ნაწილში, ასევე შიდა მოხმარების დაკმაყოფილებისა და პირველ რიგში იმპორტის შემცირების ნაწილში“

ამის შესახებ საქართველოს პრემიერ-მინისტრმა გიორგი გახარიამ გარემოს დაცვისა და სოფლის მეურნეობის სამინისტროს თანამშრომლებთან შეხვედრისას განაცხადა.შეხვედრაზე პრემიერმა ხაზი გაუსვა აგროსასურსათო ბალანსის გაუმჯობესების აუცილებლობას და აღნიშნა, რომ მთავარი მიზანია, ქვეყანაში წარმოებულმა სოფლის მეურნეობის პროდუქციამ მაქსიმალურად ჩაანაცვლოს იმპორტი, დააკმაყოფილოს შიდა მოთხოვნა და გავიდეს ექსპორტზე.გიორგი გახარიას თქმით, უმნიშვნელოვანესია მეტი აქცენტი გაკეთდეს ქართული ღვინის ინდუსტრიის ხარისხის სტანდარტებზე.პრემიერმა აღნიშნა, რომ საჭიროა სასოფლო-სამეურნეო პროდუქციაზე კონცენტრირებულად მუშაობა და ისეთი თემები, როგორიცაა მიწის სისტემური რეგისტრაცია, რომელსაც გარემოს დაცვისა და სოფლის მეურნეობის სამინისტრო იუსტიციის სამინისტროსთან ერთად ახორციელებს, მაქსიმალურად მოკლე ვადაში დასრულდეს. გარდა ამისა, უნდა მოხდეს სამეწარმეო სიმძლავრეების გამსხვილება და ქმედითი ნაბიჯები გადაიდგას მეცხოველეობის ხელშეწყობისკენ. მთავრობის მეთაურმა უწყებას დაავალა, უმოკლეს დროში წარუდგინოს მეცხოველეობის დარგის განვითარების სტრატეგია და კონკრეტული სამოქმედო გეგმა.შეხვედრისას ასევე აქცენტი გაკეთდა მელიორაციაზე და ამ კუთხით 2020 წლის გეგმებზე.გიორგი გახარიამ, სოფლის მეურნეობის დარგში დასაქმების მაღალ კონცენტრაციასთან ერთად, ყურადღება ეფექტურობის კუთხით არსებულ გამოწვევებზეც გაამახვილა.„ყველას კარგად გვესმის, რომ იმ ცვლილებებსა და ინვესტიციებს, რაც ბოლო წლების განმავლობაში სოფლად განხორციელდა, თავისი ხელშესახები შედეგები უკვე უნდა ჰქონდეს - აქვს, თუმცა ერთმნიშვნელოვნად უნდა ვიფიქროთ როგორც ბაზრების, ასევე პროდუქტიულ დივერსიფიცირებაზე. სოფლის მეურნეობა უნდა გახდეს ეფექტურად მზარდი დარგი როგორც ექსპორტის, ასევე შიდა მოხმარების დაკმაყოფილებისა და პირველ რიგში იმპორტის შემცირების ნაწილში. რა თქმა უნდა, მნიშვნელოვანია გარემოსდაცვითი კომპონენტი. მესმის, რამდენად რთულია ამ ორი საკმაოდ რთული სფეროს ერთმანეთთან ინტეგრირება და ამას დრო სჭირდება, თუმცა ვიცი, რომ აქაც გარკვეული წარმატებები გვაქვს“, - განაცხადა პრემიერ-მინისტრმა.მთავრობის მეთაურმა გარემოს დაცვისა და სოფლის მეურნეობის მინისტრ ლევან დავითაშვილისგან და სამინისტროს თანამშრომლებისგან მოისმინა ინფორმაცია სამინისტროს 2019 წლის შედეგებისა და 2020 წლისთვის დაგეგმილი პროექტების შესახებ.შეხვედრას მინისტრის მოადგილეები და უწყების დაქვემდებარებაში არსებული საჯარო სამართლის იურიდიული პირების ხელმძღვანელები დაესწრნენ.  
#

მსოფლიო მასშტაბით, სათბურის აირების ემისიების კონცენტრაციამ ატმოსფეროში საგანგაშო მაჩვენებელს მიაღწია

მსოფლიო მეტეოროლოგიური ორგანიზაციის მიერ მომზადებული ანგარიშის მიხედვით, სათბურის აირების ემისიების კონცენტრაციამ ატმოსფეროში საგანგაშო მაჩვენებელს მიაღწია. აღნიშნულ საკითხი ესპანეთში, ქალაქ მადრიდში, გაეროს კლიმატის ცვლილების ჩარჩო კონვენციის მხარეთა 25-ე კონფერენციაზე განიხილეს.კონფერენციის მუშაობაში მონაწილეობა გარემოს დაცვისა და სოფლის მეურნეობის მინისტრის მოადგილემ, ნინო თანდილაშვილმა მიიღო.გაეროს გენერალურმა მდივანმა, ანტონიო გუტიერესმა ქვეყნებს კლიმატის ცვლილების შერბილებისათვის ქმედებების გაძლიერებისკენ მოუწოდა და აღნიშნა რომ, უკანასკნელი 5 წელი იყო რეკორდულად ცხელი, რასაც თან ახლავს ბუნებრივი კატასტროფების, გვალვების და ხანძრების გახშირება.კონფერენციას სხვადასხვა ქვეყნის ლიდერები, ექსპერტები, კერძო და სამეცნიერო სექტორების მაღალი რანგის წარმომადგენლები ესწრებოდნენ. საქართველოს დელეგაციას გარემოს დაცვისა და სოფლის მეურნეობის მინისტრის მოადგილე ნინო თანდილაშვილი ხელმძღვანელობდა.ესპანეთში ვიზიტის ფარგლებში, ნინო თანდილაშვილი კლიმატის მწვანე ფონდის წარმომადგენლებს შეხვდა, სადაც საქართველოსა და ფონდს შორის თანამშრომლობის გაძლიერების და საქართველოსთვის სტრატეგიული პროექტების დაფინანსების შესაძლებლობები განიხილეს.საქართველო გაეროს კლიმატის ცვლილების ჩარჩო კონვენციის წევრი 1994 წელს გახდა და მას შემდეგ აქტიურად არის ჩართული კონვენციაში არსებული მექანიზმების მუშაობასა და მოლაპარაკების პროცესში.
#

ლევან დავითაშვილი „ნარჩენების მართვის თანამედროვე სისტემის შექმნა და დანერგვა ქვეყნისთვის პრიორიტეტული მიმართულებაა

გარემოს დაცვისა და სოფლის მეურნეობის მინისტრი ლევან დავითაშვილი „მწარმოებლის გაფართოებული ვალდებულების“ (მგვ) შესახებ საკანონმდებლო პაკეტის განხილვის შემაჯამებელ შეხვედრას დაესწრო.„კანონპროექტის შემუშავების პროცესი იყო საკმაოდ ხანგრძლივი და შრომატევადი. ევროკავშირთან ასოცირების ხელშეკრულების გათვალისწინებით, მოხდა ნარჩენების მართვის შესახებ კანონმდებლობის ევროდირექტივებთან შესაბამისობაში მოყვანა, რაც ნარჩენების მართვის თანამედროვე მიდგომების ეტაპობრივ დანერგვას ითვალისწინებს. ბოლო წლებში მნიშვნელოვნად იცვლება საქართველოში ნარჩენების მართვის მიდგომები. ახალი რეგულაციების ამოქმედების შემდეგ, საჭიროების შემთხვევაში, დოკუმენტში გარკვეული კორექტირება შევა. თუმცა ჩვენ, მაქსიმალურად შევეცადეთ, გაგვეთვალისწინებინა ყველა დაინტერესებული მხარის - სახელმწიფოს, თვითმმართველობისა და ბიზნესის მოსაზრებები“, - განაცხადა ლევან დავითაშვილმა.მწარმოებლის გაფართოებული ვალდებულების პრინციპის დანერგვა შემდეგი სპეციფიკური ნარჩენების - შესაფუთი ნარჩენები, ელექტრო და ელექტრონული მოწყობილობები, გამოყენებული ზეთები, აკუმულატორები და ბატარეები, საბურავები და სხვა სატრანსპორტო საშუალებები - მართვას ითვალისწინებს.აღსანიშნავია, რომ გარემოს დაცვისა და სოფლის მეურნეობის სამინისტროში შემუშავებულია ნარჩენების მართვის ეროვნული სტრატეგია და ეროვნული სამოქმედო გეგმა.საკანონმდებლო პაკეტში არსებულ ტექნიკურ რეგლამენტებზე მუშაობა ევროკავშირის, USAID-ის, SIDA-ს დახმარებით, საერთაშორისო და ადგილობრივი ექსპერტების ჩართულობით განხორციელდა. შემაჯამებელი განხილვის ორგანიზატორები კი USAID-ის და CENN–ის წარმომადგენლები იყვნენ.
#

საქართველოს სოფლის მეურნეობის მეცნიერებათა აკადემიაში, კონფერენცია „საქართველოს ნიადაგები მსოფლიო ნიადაგების ჭრილში” გაიმართა

კონფერენციაზე გარემოს დაცვისა და სოფლის მეურნეობის მინისტრის მოადგილემ, სოლომონ პავლიაშვილმა ნიადაგის დეგრადაციის გამომწვევ ფაქტორებსა და მათთან ბრძოლის ღონისძიებებზე ისაუბრა.„ნიადაგის დაცვა და მისი ნაყოფიერების შენარჩუნება ჩვენი ქვეყნისთვის უმნიშვნელოვანესი საკითხია, რადგან საქართველოში ნიადაგის მდგრადი გამოყენება სოფლის მეურნეობისა და ეკონომიკის განვითარების მთავარი რეზერვი და მდგრად გარემოში ცხოვრების წინაპირობაა. საქართველოსთვის მიწის დეგრადაცია არა მარტო ეკოლოგიური, არამედ სოციალური და ეკონომიკური პრობლემაა“, - განაცხადა შეხვედრაზე სოლომონ პავლიაშვილმა.კონფერენციაზე საქართველოს სოფლის მეურნეობის მეცნიერებათა აკადემიის წევრებმა ნიადაგის ნაყოფიერების ეფექტიანი მართვის, ნიადაგის დაცვისა და მიწის ბაზრის ფორმირებისა და ფუნქციონირების თანამედროვე მდგომარეობასა და პრობლემებზე ისაუბრეს.კონფერენციას საქართველოს სოფლის მეურნეობისა და გარემოს დაცვის სამინისტროს შესაბამისი უწყების წარმომადგენლები, საქართველოს სოფლის მეურნეობის მეცნიერებათა აკადემიის წევრები და საქართველოს ტექნიკური უნივერსიტეტის პროფესორები ესწრებოდნენ.
#

გარემოს დაცვისა და სოფლის მეურნეობის მინისტრი ლევან დავითაშვილი საბერძნეთის რესპუბლიკის ელჩს საქართველოში დიმიტრის კარაბალის შეხვდა

შეხვედრაზე მხარეებმა ქვეყნებს შორის გარემოსდაცვითი მიმართულებით, მათ შორის, ჰაერის ხარისხის გაუმჯობესების და მყარი ნარჩენების მართვის მიმართულებით გამოცდილების გაზიარებისა და თანამშრომლობის პერსპექტივები განიხილეს.„გარემოს დაცვა ქვეყნის ერთ-ერთი მნიშვნელოვანი პრიორიტეტია. აღნიშნული მიმართულებით, საქართველო-ევროკავშირის ასოცირების შეთანხმების ფარგლებში, ჩვენ გვაქვს მთელი რიგი ვალდებულებები, რაც საქართველოსთვის მნიშვნელოვანი გამოწვევაა და მათ ეფექტიან და დროულ შესრულებაზე ვმუშაობთ “, - განაცხადა ლევან დავითაშვილმა.შეხვედრაზე ლევან დავითაშვილმა გარემოსდაცვითი მიმართულებით განხორციელებულ პროექტებსა და ინიციატივებზე ისაუბრა და ყურადღება ატმოსფერული ჰაერის ხარისხის პორტალსა და ჰაერის ხარისხის მონიტორინგის მობილური ავტომატური სადგურების მნიშვნელობაზე გაამახვილა.როგორც დიმიტრის კარაბალიმ აღნიშნა, საქართველოს და საბერძნეთის მჭიდრო პარტნიორული ურთიერთობების საფუძველზე შესაძლებელია არაერთი საინტერესო გარემოსდაცვითი პროექტის განხორციელება.გარემოს დაცვისა და სოფლის მეურნეობის სამინისტროში გამართულ შეხვედრას მინისტრის მოადგილეები ნინო თანდილაშვილი და ხატია წილოსანი ესწრებოდნენ.