#

ლევან დავითაშვილი: „საქართველოს აგრარული სექტორის განვითარებისთვის აშშ-თან და ისრაელთან მჭიდრო თანამშრომლობას ვაგრძელებთ“

აშშ-ს საერთაშორისო განვითარების სააგენტოსა (USAID) და ისრაელის სახელმწიფო განვითარების საერთაშორისო თანამშრომლობის სააგენტოს (MASHAV) შორის ურთიერთგაგების მემორანდუმი გაფორმდა. მემორანდუმს ხელი აშშ-ის საერთაშორისო განვითარების სააგენტოს (USAID) ადმინისტრატორის მოადგილემ, ბონი გლიკმა და ისრაელის საგანგებო და სრულუფლებიანმა ელჩმა საქართველოში, რან გიდორმა მოაწერეს. მემორანდუმი საქართველოს, ამერიკასა და ისრაელს შორის გლობალური პარტნიორობის გაძლიერებას ითვალისწინებს. მემორანდუმის ფარგლებში განხორციელებული აქტივობები და თანამშრომლობა საქართველოში სოფლის მეურნეობის დარგში შემოსავლების ზრდას, სოფლად მცხოვრები მოსახლეობის კეთილდღეობის გაუმჯობესებას და, შესაბამისად, ქვეყნის ეკონომიკურ განვითარებას შეუწყობს ხელს. გარემოს დაცვისა და სოფლის მეურნეობის მინისტრმა, ლევან დავითაშვილმა მადლობა გადაუხადა აშშ-სა და ისრაელს ხანგრძლივი, პარტნიორული თანამშრომლობისთვის და აღნიშნა, რომ მემორანდუმი საქართველოს სოფლის მეურნეობის განვითარებაში დაეხმარება.  „აშშ-ის საერთაშორისო განვითარების სააგენტოს (USAID) ადმინისტრატორის მოადგილე, ბონი გლიკი არის ყველაზე მაღალი რანგის სტუმარი, რომელიც 2008 წლის შემდგომ იმყოფება საქართველოში. მისი ვიზიტი ადასტურებს ჩვენი სტრატეგიული პარტნიორის, აშშ-ის მხარდაჭერას საქართველოს პოლიტიკის მიმართ. სოფლის მეურნეობის მიმართულებით ჩვენ გვაკავშირებს მჭიდრო, მრავალწლიანი თანამშრომლობა როგორც აშშ-თან, ისე ისრაელის სახელმწიფოსთან. დღეს გაფორმებული მემორანდუმი მნიშვნელოვანი წინაპირობაა იმისა, რომ ამერიკელი და ებრაელი ექსპერტები ცოდნასა და გამოცდილებას გაგვიზიარებენ აგრარულ სფეროში“, - განაცხადა ლევან დავითაშვილმა. „სამმხრივი პარტნიორობის ფარგლებში განსაკუთრებული ყურადღება დაეთმობა სოფლის მეურნეობასა და ტურიზმს. ეს ორი სფერო არის საქართველოს ეკონომიკისთვის გადამწყვეტი. ჩვენ ვგეგმავთ, რომ ავიღოთ ჩვენი და ისრაელის ინოვაციები და მოვძებნოთ საქართველოსთვის მათ გაზიარების გზები. ამის მიზანია საქართველოში სასოფლო-სამეურნეო  წარმოების გაზრდა და ასევე, სასოფლო-სამეურნეო ჩართულობის გაძლიერება გლობალურ ეკონომიკაში“, - განაცხადა ბონი გლიკმა. „27 წლის განმავლობაში დავატრენინგეთ 1500-ზე მეტი ქართველი სხვადასხვა თემაზე. დღევანდელი ურთიერთგაგების მემორანდუმი ამ სამმხრივი თანამშრომლობის გასაღრმავებლად შეიქმნა, რომელიც საქართველოს, ამერიკასა და ისრაელს შორის გაფორმდა, რათა ამ ყველაფერს მიეცეს მუდმივი სახე. ჩვენი მიზანია, სამმხრივი თანამშრომლობა გავაფართოვოთ და გასცდეს სოფლის მეურნოების სფეროს, მოვიცვათ საქართველოსთვის მნიშვნელოვანი ყველა სფერო", - განაცხადა რან გიდორმა.
#

ლევან დავითაშვილმა სამინისტროს 2019 წლის საქმიანობა შეაჯამა

გარემოს დაცვისა და სოფლის მეურნეობის მინისტრმა, ლევან დავითაშვილმა საქართველოს პრემიერ-მინისტრს, მთავრობის, დიპლომატიური კორპუსის, დარგობრივი ასოციაციებისა და მედიის წარმომადგენლებს სამინისტროს 2019 წლის საქმიანობის შედეგები გააცნო.  „ჩვენი სამინისტრო ორი უმნიშვნელოვანესი მიმართულების - გარემოს დაცვისა და სოფლის მეურნეობის განვითარების - სახელმწიფო პოლიტიკის შემუშავებაზე და ამ პოლიტიკის ეფექტიან განხორციელებაზე მუშაობს. თამამად შემიძლია ვთქვა, რომ ორივე მიმართულებით ხელშესახები წინსვლა გვაქვს, მიუხედავად რთული მემკვიდრეობისა და არაერთი გაუთვალისწინებელი გამოწვევისა“, - განაცხადა მინისტრმა. როგორც ლევან დავითაშვილმა აღნიშნა, აგრარულ დარგში სწორი სახელმწიფო პოლიტიკის შედეგად, გაზრდილია ქართული პროდუქციის წარმოება. „ჩვენ დახლებზე ყოველდღიურად სულ უფრო მეტი ახალი ქართული ბრენდირებული პროდუქტი ჩნდება, რაც იმპორტის ჩანაცვლების შეუქცევადი პროცესის მაჩვენებელია. საქართველო, ტრადიციულად, აგროსასურსათო წარმოებით გამორჩეული ქვეყანა იყო. ჩვენ ამ სტატუსს ეტაპობრივად ვიბრუნებთ. მიუხედავად მზარდი მოხმარებისა, რაც ტურისტული ნაკადის ზრდითაც არის განპირობებული, აგროსასურსათო პროდუქტის სავაჭრო დეფიციტი  ყოველწლიურად სულ უფრო მცირდება. მცირდება იმპორტსა და ექსპორტს შორის სხვაობა, 900 მილიონიდან ეს დეფიციტი  350 მილიონ დოლარამდე შემცირდა, რაც იმას ნიშნავს, რომ ჩვენ შევძელით წარმოების მნიშვნელოვნად გაზრდა“, - განაცხადა მინისტრმა. ლევან დავითაშვილმა გარემოსდაცვითი მიმართულებით სამინისტროს მიერ გაწეული საქმიანობა მნიშვნელოვან წინგადადგმულ ნაბიჯად შეაფასა და აღნიშნა, რომ სულ ცოტა ხანში დასრულდება ძირითადი საკანონმდებლო ბაზების შემუშავების ეტაპი. გარემოსდაცვითი კანონმდებლობა თანხვედრაში იქნება ევროპულ კანონმდებლობასთან. „ჩვენ, მდგრადი განვითარების პრინციპებით, შევძლებთ ეკონომიკის განვითარებას გარემოს დაზიანების მინიმუმამდე შემცირებით. დღეისათვის,  გაფართოებული ვალდებულებების პირობებში, მწარმოებლებს გარემოზე ზიანის შემცირების მიმართულებით მეტი პასუხისმგებლობა უკვე აქვთ. წარმოებაში საერთაშორისო სტანდარტების დანერგვა, ადეკვატური მაკონტროლებელი სისტემა და მწარმოებელთა პასუხიმგებლობის მუდმივი ზრდა - ეს არის სახელმწიფო პოლიტიკა, რაც გარემოს დაცვის გარანტია უნდა გახდეს“, - განაცხადა ლევა დავითაშვილმა.  შემაჯამებელი ღონისძიების დასასრულს, მინისტრმა, გარემოს დაცვისა და სოფლის მეურნეობის მიმართულებებით 2020 წლისთვის განსაზღვრულ პრიორიტეტულ საკითხებზე ისაუბრა. ღონისძიებაზე ნაჩვენები იყო ვიდეორგოლი, რომელშიც, თავმოყრილი იყო კადრები სახელმწიფოს ხელშეწყობით შექმნილი საწარმოებიდან, მელიორაციის განახლებული ინფრასტრუქტურული ობიექტებიდან, საერთაშორისო სტანდარტების ლაბორატორიებიდან, საკვლევ-სადემონსტრაციო ბაზებიდან.
#

კონკურსის „სუფთა რეგიონი” გამარჯვებულები გამოვლინდნენ

გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი პროექტის „დავიცვათ საქართველოს სისუფთავე“ ფარგლებში გამოცხადებული კონკურსის „სუფთა რეგიონი” დაჯილდოების ღონისძიებას დაესწრო და გამარჯვებულებს სპეციალური ჯილდოები გადასცა.„ნარჩენების მართვა გარემოსდაცვითი პოლიტიკის ერთ-ერთი პრიორიტეტული მიმართულებაა. ვფიქრობ, აღნიშნული კონკურსი ხელს შეუწყობს საზოგადოებაში გარემოსდაცვითი კუთხით ცნობიერების ამაღლებას და ქვეყანაში ნარჩენების მართვის გაუმჯობესებას. სამინისტრო ყოველთვის იქნება ისეთი პროექტების მხარდამჭერი, რომლებიც გარემოსდაცვით ღონისძიებებში მოსახლეობის ჩართულობას გაზრდის”, - აღნიშნა სოლომონ პავლიაშვილმა.პროექტის „დავიცვათ საქართველოს სისუფთავე“ ფარგლებში, კონკურსი „სუფთა რეგიონი” ქვეყნის მასშტაბით უკვე მეოთხედ ჩატარდა.2019 წლის კონკურსის გამარჯვებულები გამოვლინდნენ შემდეგ ნომინაციებში: „სუფთა რეგიონი“ - კახეთის რეგიონი„სუფთა ქალაქი“ - ქ. ზუგდიდი „სუფთა მუნიციპალიტეტი“ - ზუგდიდის მუნიციპალიტეტი „სუფთა სოფელი“ - ორსანტია (ზუგდიდის მუნიციპალიტეტი)„ლამაზი აივანი“ - ქ. მცხეთა ლილი კაპანაძე სახლის აივანი„სუფთა ქუჩა“ ქ. თბილისი, ს. ზაქარიაძის ქუჩა„საწარმოს ლამაზი ეზო“ - ქ. თელავი, ღვინის კომპანია „შუმის“ ეზო„ლამაზი ეზო" - ქ. გურჯაანი იზა გაბიტაშვილის ეზო დაჯილდოების ღონისძიებას შვედეთის სამეფოს საგანგებო და სრულუფლებიანი ელჩი საქართველოსა და სომხეთში, ულრიკ თიდესტრომი, საქართველოს პარლამეტის გარემოს დაცვისა და ბუნებრივი რესურსების კომიტეტის თავმჯდომარე, ნინო წილოსანი, ქ. თბილისის საკრებულოს თავმჯდომარე, გიორგი ტყემალაძე და პროექტის განმახორციელებელი ჯგუფის წევრები ესწრებოდნენ. ღონისძიება საქართველოს მწვანეთა მოძრაობა/დედამიწის მეგობრები-საქართველოს ორგანიზებით, გარემოს დაცვისა და სოფლის მეურნეობის სამინისტროსა და თბილისის საკრებულოს მხარდაჭერით გაიმართა
#

არემოს დაცვისა და სოფლის მეურნეობის მინისტრი, ლევან დავითაშვილი და მინისტრის მოადგილე, ხატია წილოსანი საქართველოში იტალიის რესპუბლიკის ახლადდანიშნულ საგანგებო და სრულუფლებიან ელჩს, ენრიკო ვალვოს შეხვდნენ.

მხარეებმა ქვეყნებს შორის არსებული ორმხრივი ურთიერთობების მნიშვნელობაზე ისაუბრეს და გარემოსდაცვითი და სოფლის მეურნეობის მიმართულებით თანამშრომლობის განვითარების პერსპექტივები განიხილეს.შეხვედრაზე ლევან დავითაშვილმა საქართველოში თხილის წარმოების პოტენციალზე და თხილის სექტორის განვითარებაში კომპანიის „Ferrero“ როლზე გაამახვილა ყურადღება.მხარეებმა საქართველოს სოფლის მეურნეობისთვის მეხილეობის, როგორც ტრადიციული აგრარული დარგის მნიშვნელობაზე და მეწარმეების ფინანსური მხარდაჭერის სახელმწიფო საგრანტო პროგრამებზე ისაუბრეს.როგორც ლევან დავითაშვილმა შეხვედრაზე აღნიშნა, 2020 წელს საქართველო პირველად მიიღებს მონაწილეობას ისეთი მასშტაბის გამოფენაში, როგორიცაა მცენარეთა, ტექნოლოგიების და მომსახურების საერთაშორისო გამოფენა ახალი ხილისა და ბოსტნეულის წარმოების, კონდიცირების, ვაჭრობისა და ტრანსპორტირებისთვის - Macfrut, რაც ჩვენს ფერმერებს შესაძლებლობას მისცემს ქართული პროდუქცია მსოფლიოს გააცნონ.იტალიის რესპუბლიკის ახლადდანიშნულმა საგანგებო და სრულუფლებიანმა ელჩმა, ენრიკო ვალვომ, სამინისტროსთან მჭიდრო თანამშრომლობისთვის მზადყოფნა გამოთქვა.
#

ნინო თანდილაშვილი თურქეთის სახელმწიფო მეტეოროლოგიური სამსახურის გენერალურ დირექტორს შეხვდა

საქართველოს გარემოს დაცვისა და სოფლის მეურნეობის მინისტრის მოადგილე ნინო თანდილაშვილი თურქეთის სახელმწიფო მეტეოროლოგიური სამსახურის გენერალურ დირექტორს, ვოლკან კოსკუნის შეხვდა. შეხვედრაზე მინისტრის მოადგილემ აღნიშნა, რომ ქართული მხარისთვის მნიშვნელოვანია თურქეთის მეტეოროლოგიური სამსახურის გამოცდილების გაზიარება ისეთი მიმართულებებით, როგორებიცაა სწრაფად განვითარებადი წყალმოვარდნების შესახებ ადრეული გაფრთხილებების მომზადება და საქართველოს ტერიტორიაზე ატმოსფეროს მაღალ ფენებში მტვრის გადმოტანის შესაძლებლობის პროგნოზირება. აღსანიშნავია, რომ თურქეთის მეტეოროლოგიური სამსახური ერთ-ერთი მოწინავეა რეგიონში. მეტეოროლოგიური სამსახურის გენერალურმა დირექტორმა გარემოს დაცვისა და სოფლის მეურნეობის სამინისტროსა და გარემოს ეროვნული სააგენტოს წარმომადგენლებს, გასულ წელს გამართულ მსოფლიო მეტეოროლოგიურ კონგრესზე, თურქეთის მეტეოროლოგიური სამსახურისთვის მსოფლიო მეტეოროლოგიური ორგანიზაციის სასწავლო ცენტრის სტატუსის მინიჭებაში მხარდაჭერისთვის მადლობა გადაუხადა. როგორც შეხვედრაზე აღინიშნა, თურქეთის მეტეოროლოგიურ ცენტრებში, გარემოს ეროვნული სააგენტოს ჰიდრომეტეოროლოგიის დეპარტამენტის რამდენიმე სპეციალისტმა უკვე აიმაღლა კვალიფიკაცია; გარდა ამისა, თურქეთის მეტეოსამსახურის სპეციალისტების მიერ, საქართველოში სინოპტიკური პროდუქციის ვიზუალიზაციის თანამედროვე თურქული სისტემა დაინერგა. შეხვედრას თურქეთის სახელმწიფო მეტეოროლოგიური სამსახურის გენერალური დირექტორის მოადგილე, მუსტაფა კელიკი, მეტეოროლოგიური სამსახურის საერთაშორისო ურთიერთობების დეპარტამენტის დირექტორი, მურატ ალტიიოლარი, გარემოს ეროვნული სააგენტოს უფროსი, ანდრო ასლანიშვილი და სამინისტროს სისტემაში შემავალი შესაბამისი უწყების წარმომადგენლები ესწრებოდნენ.
#

ნარინჯისფერი რთველი დასრულდა

2019 წელი საქართველოში მანდარინის განსაკუთრებულად მაღალი ხარისხის მოსავალით გამოირჩეოდა. წინასწარი ინფორმაციით, მოსავლის რაოდენობამ 50 ათას ტონას გადააჭარბა, ხოლო ექსპორტმა,  გასული წლის სექტემბერ-იანვრის თვეში, 31 ათასი ტონა შეადგინა, რაც 5%-ით აღემატება 2018 წლის ანალოგიური პერიოდის მაჩვენებელს. ექსპორტი განხორციელდა რუსეთში (20.0 ათასი ტ), უკრაინაში (5.2 ათასი ტ), სომხეთში (4.4 ათასი ტ), ბელარუსში (319 ტ), ყაზახეთსა (140 ტ) და ყირგიზეთში (58 ტ). საექსპორტო ქვეყნებს წელს დაემატა სლოვენია, მოლდოვა, ლიეტუვა, პოლონეთი, ყატარი და სინგაპური. პროდუქციის მაღალი ხარისხი პირდაპირპროპორციულად განაპირობებდა მაღალ საბაზრო ფასს. მანდარინზე საბითუმო ფასი 0.6-დან 2.0 ლარამდე იყო. ამასთან, აღსანიშნავია, რომ სამრეწველო გადამუშავებისთვის, ქარხნების მიერ მიღებული არასტანდარტული მანდარინის რაოდენობამ, 19 იანვრის მდგომარეობით  10 ათასი ტონა შეადგინა. აღსანიშნავია, რომ წლევანდელი მოსავალის  მაღალი ხარისხი დიდწილად განაპირობა აზიური ფაროსანას წინააღმდეგ სახელმწიფოს მიერ გატარებულმა მასშტაბურმა ღონისძიებებმა. ბრძოლის პროგრამის ფარგლებში, ნარგავებში ჩატარდა პრევენციული ღონისძიებები - თერმული ნისლით დამუშავდა ტერიტორიები, რამაც მინიმუმამდე შეამცირა  მავნებლის  მიერ ციტრუსის კულტურის დაზიანება. ნარინჯისფერი რთველის ორგანიზებულად ჩატარების მიზნით, გარემოს დაცვისა და სოფლის მეურნეობის სამინისტროსა და აჭარის მთავრობის ხელშეწყობით, აქტიურად მუშაობდა ციტრუსის რეალიზაციის საკოორდინაციო შტაბი, რომლის ფუნქციონირების ძირითადი მიზანი მანდარინის ჩაბარების პროცესის შეუფერხებელი მიმდინარეობის უზრუნველყოფა იყო. საჭირო ინფორმაციის ოპერატიულად მისაღებად, მოქმედებდა საქართველოს გარემოს დაცვისა და სოფლის მეურნეობის სამინისტროს  ცხელი ხაზიც (1501).
#

ENPARD-ის ფარგლებში სამინისტროს მიერ განხორციელებული სამუშაოები წარმატებულად შეფასდა

გარემოს დაცვისა და სოფლის მეურნეობის მინისტრის მოადგილემ, ხატია წილოსანმა ევროპის სამეზობლო პროგრამა სოფლის მეურნეობისა და სოფლის განვითარებისათვის  (ENPARD) მუდმივმოქმედი კომიტეტის რიგით 22-ე  შეხვედრა მისასალმებელი სიტყვით გახსნა. შეხვედრაზე ხატია წილოსანმა ყურადღება გაერთიანებული დოკუმენტის -  „საქართველოს სოფლის მეურნეობისა და სოფლის განვითარების 2021-2027 წლების სტრატეგია“ მნიშვნელობაზე გაამახვილა და პარტნიორ ორგანიზაციებს მადლობა გადაუხადა მხარდაჭერისთვის. შეხვედრაზე საუბარი შეეხო ENPARD-ის II და III ფაზის ფარგლებში შესრულებულ ვალდებულებებს. საქართველოში ევროკავშირის წარმომადგენლობის ატაშემ სოფლის მეურნეობისა და სურსათის უვნებლობის საკითხებში, ჟორჟ დეუმ სამინისტროს მიერ განხორციელებული სამუშაოები წარმატებულად შეაფასა და ENPARD-ის IV ფაზის დაწყების შესაძლებლობაზე ისაუბრა. მინისტრის მოადგილემ შეხვედრის მონაწილეებს „მიწის მდგრადი მართვის და მიწათსარგებლობის მონიტორინგის ეროვნული სააგენტოს“, ასევე, გეოგრაფიული აღნიშვნებისა და აკვავულტურის შესახებ შემუშავებული კანონპროექტების  შესახებ მიაწოდა ინფორმაცია. შეხვედრას საქართველოში ევროკავშირის წარმომადგენლობის სოფლის განვითარების, სამოქალაქო დაცვის და კრიზისების მართვის პროგრამის მენეჯერი ქეთევან ხუციშვილი,  ENPARD-ის კონსორციუმის წევრები, საერთაშორისო და დონორი ორგანიზაციების წარმომადგენლები ესწრებოდნენ.