#

ლევან დავითაშვილი BP საქართველოს ხელმძღვანელს შეხვდა

გარემოს დაცვისა და სოფლის მეურნეობის მინისტრი ლევან დავითაშვილი ნავთობისა და გაზის კომპანიის BP საქართველოს ხელმძღვანელს, აიტან ჰაჯიევას შეხვდა. შეხვედრაზე, კლიმატის ცვლილების შერბილების მიზნით, ქვეყანაში განახლებადი ენერგიის წყაროების განვითარების კუთხით შესაძლო თანამშრომლობის საკითხები განიხილეს. ლევან დავითაშვილმა  BP საქართველოს ხელმძღვანელს კლიმატის ცვლილების შერბილების მიმართულებით  არსებული სახელმწიფო პოლიტიკა და განხორციელებული ღონისძიებები  გააცნო.  „ევროკავშირთან ასოცირების ხელშეკრულებით აღებული ვალდებულებების შესაბამისად, კლიმატის ცვლილების შერბილების მიზნით და ქვეყანაში მწვანე ეკონომიკის განვითარების მიმართულებით, ჩვენ მნიშვნელოვანი ნაბიჯები გადავდგით. უკვე დამტკიცებულია სამი მთავარი  დოკუმენტი -  ,,საქართველოს განახლებული ეროვნულ დონეზე განსაზღვრული წვლილი (NDC)“, საქართველოს კლიმატის ცვლილების 2030 წლის სტრატეგია და საქართველოს კლიმატის ცვლილების 2030 წლის სტრატეგიის 2021-2023 წლების სამოქმედო გეგმა. ქვეყანა იღებს ვალდებულებას, რომ, 2030 წლისთვის, ეროვნულ დონეზე, სათბურის აირების ემისიების ჯამური მაჩვენებელი, 1990 წელს დაფიქსირებულ მაჩვენებელთან შედარებით, 35%-ით შეამციროს. აღნიშნულ პროცესში მნიშვნელოვან მხარდაჭერას გვიწევენ ჩვენი პარტნიორები - ევროკავშირის წევრი ქვეყნები, საერთაშორისო დონორი ორგანიზაციები. ჩვენ ღია ვართ  ყველა ინიციატივისთვის, მზად ვართ, სამომავლო თანამშრომლობისთვის ყველა იმ ორგანიზაციასთან,  რომელიც დაეხმარება საქართველოს  ევროკავშირთან ასოცირების ხელშეკრულებით აღებული ვალდებულებების შესრულებაში“, - განაცხადა ლევან დავითაშვილმა. როგორც შეხვედრაზე BP საქართველოს ხელმძღვანელმა, აიტან ჰაჯიევამ აღნიშნა, ბოლო წლების განმავლობაში, კომპანიის განვითარების სტრატეგიის ერთ-ერთი მთავარი მიმართულება განახლებადი ენერგიის წყაროების და სხვა ახალი ტექნოლოგიების განვითარება და მასზე ხელმისაწვდომობის ზრდაა, რაც ხელს შეუწყობს კლიმატის ცვლილების შერბილებას.  „კომპანია BP საქართველოში უკვე 25 წელია ოპერირებს. ნავთობისა და გაზის უმსხვილესი პროექტების გარდა, კომპანია მნიშვნელოვან პროექტებს ახორციელებს საქართველოს რეგიონების ეკონომიკური გაძლიერების და გარემოსდაცვის მიმართულებით. ჩვენ ვგეგმავთ ახალი შესაძლებლობების განვითარებას, რომლებიც კლიმატური ცვლილებების შერბილებას  შეუწყობს ხელს. შესაბამისად, გვსურს  გავეცნოთ ამ კუთხით   საქართველოში არსებულ სახელმწიფო პოლიტიკას, რათა შევძლოთ განვსაზღვროთ შესაძლო თანამშრომლობის კონკრეტული მიმართულებები“, - აღნიშნა აიტან ჰაჯიევამ.
#

ლევან დავითაშვილი „ბიუჯეტში გამოყოფილია 100 მლნ ლარი. ეს საკმაოდ დიდი რიცხვია, მაგრამ აუცილებელი საჭიროება იმისათვის, რომ ღვინის სექტორის სტაბილურობა და განვითარების პერსპექტივები შევინარჩუნოთ”

„სახელმწიფოს მხრიდან ბიუჯეტში გამოყოფილია 100 მლნ ლარი. ეს არის საკმაოდ დიდი რიცხვი, მაგრამ აუცილებელი საჭიროება იმისათვის, რომ ღვინის სექტორის სტაბილურობა და განვითარების პერსპექტივები შევინარჩუნოთ”, - განაცხადა გარემოს დაცვისა და სოფლის მეურნეობის მინისტრმა, ლევან დავითაშვილმა დღეს გამართულ მათავრობის სხდომაზე.  „წელს ველოდებით საკმაოდ კარგი ხარისხის მოსავალს; რაოდენობაშიც გვაქვს ზრდა. ბატონო პრემიერო, თქვენ ახსენეთ, ბოლო რამდენიმე წლის განმავლობაში გაშენებული ვენახები და ეს ტენდენცია გრძელდება. მიმდინარე წელს, პანდემიის გამო, გარკვეული დისბალანსი ნედლეულსა და კერძო კომპანიების მოთხოვნებს შორის მაინც არსებობს და არა მხოლოდ საქართველოში; მინდა განვმარტო, ასეთი რთული სიტუაცია მეღვინეობის სექტორში შექმნილია პრაქტიკულად ყველა ქვეყანაში. მიუხედავად ამისა, ჩვენ გვაქვს ექსპორტის ზრდა და წელს ველოდებით მონაცემთა კიდევ უფრო გაუმჯობესებას, თუმცა ეს არის არის საკმარისი; ზრდის მოლოდინი კიდევ უფრო მეტი იყო. ჩვენ ვგეგმავდით, დაახლოებით, 15-20 %-იან ზრდას, რეალური ზრდა კი, 7-8 %-ის ფარგლებშია, რაც საკმარისი არ არის; შესაბამისად, სახელმწიფოს უწევს ინტერნვენცია, რომ დააბალანსოს ფასები, ფერმერებს შრომის ანაზღაურება იყოს ადეკვატური და შევინარჩუნოთ მოტივაცია, რომ მათ განაგრძონ საქმიანობა მომავალ წლებშიც.  წელს ველოდებით, დაახლოებით, 300 000 ტონა ყურძნის ინდუსტრიულად გადამუშავებას.  ეს იქნება მორიგი რეკორდი დამოუკიდებლობის პირობებში, მაგრამ, იმის გათვალისწინებით, რომ მომავალში უნდა გავზარდოთ ექსპორტი, გავასამმაგოთ, რაც 10 წლიან გეგმაშიც წარმოვადგინეთ, საჭიროა სანედლეულო ბაზის ზრდა და  ქვეყანში ვენახების გაშენების ტენდენციის და ახალი წარმოებების შექმნის გაგრძელება. სწორედ ამიტომ ,ჩვენი პასუხისმგებლიანი გადაწვეტილებაა წელსაც ჩავერიოთ, დავაბალანსოთ, კოვიდის შედეგები შევუმსუბუქოთ, როგორც მევენახე-ფერმერებს ისე ღვინის საწარმოებს, იმისთვის, რომ დარგის სტაბილური განვითარება შევინარჩუნოთ მომავალი წლებისთვის“, -განაცხადა ლევან დავითაშვილმა როგორც მინისტრმა აღნიშნა, სამინისტროს მხრიდან სრული მზადყოფნაა, რომ ორგანიზებულად ჩატარდეს რთველის პროცესი.„თითქმის ყველა ფერმერთან გვქონდა კომუნიკაცია. 2014 წლიდან დაწყებული გვაქვს ვენახების ელექტრონული პასპორტიზაცია. ეს არის ქართული ღვინის ხარისხის კონტროლის უმნიშვნელოვანესი ელემენტი. მიმდინარე წელს, კახეთის და რაჭა-ლეჩხუმის მთელი რეგიონი დაფარული იქნება ელექტორნული პასპორტებით ანუ გვექნება ზუსტი მონაცემები თთოეულ ვენახში არსებული სიტუაციის შესახებ და,  შესაბამისად,  გვექნება სრული ინფორმაცია მოსავლიანობაზე, რათა ქართულ ღვინოში მიკვლევადობის ხარისხი, რაც შემდგომში სანდოობას განაპირობებს, იყოს მაქსიმალურად მაღალ დონეზე. დარწმუნებული ვარ, განსაკუთრებულად კარგად ორგანიზებული იქნება მიმდინარე წლის რთველი. მინდა სამინისტროს თანამშრომლებს მადლობა გადავუხადო - პანდემიის პერიოდში არ გაგვიჩერებია სამუშაო პროცესი. იმედი გაქვს, რომ რთველისთვის სრულად იქნება მოცული ყველა ვენახი, თუმცა, გვაქვს ალტერნატივაც, იმ შემთხვევაში, თუ რომელიმე ფერმერი ვერ მოახერხებს რეგისტრაციას, მათ რთველის განმავლობაშიც შეეძლებათ დარეგისტრირება. მოვუწოდებ ჩვენს მევენახე ფერმერებს, რომ გაიმარტივონ პროცესი, იმისათვის, რომ უფრო ადვილი იყოს ჩაბარება,  არ ჰქონდეთ შეფერხება, მინიმუმამდე იყოს დაყვანილი რიგები, წინასწარ მოახდინონ თავიანთი ვენახების ელექტრონული რეგისტრაცია, რაც შესაძლებელია კახეთსა და რაჭა-ლეჩხუმის რეგიონებში. ბატონო პრემიერო, ვფიქრობ, თქვენი მხარდაჭერით ყველაფერია გაკეთებული, რომ ჩვენი სამინისტრო ამ გამოწვევებს გაუმკლავდეს”, - განაცხადა ლევან დავითაშვილმა.
#

31 ივლისი რეინჯერთა მსოფლიო დღეა

რეინჯერთა მსოფლიო დღე თბილისის ეროვნულ პარკში აღინიშნა. გარემოს დაცვისა და სოფლის მეურნეობის მინისტრმა, ლევან დავითაშვილმა, საქართველოში ამერიკის შეერთებული შტატების ელჩ კელი დეგნანთან ერთად, რეინჯერებს პროფესიული დღე მიულოცა და სიმბოლური საჩუქრები გადასცა. ღონისძიებას საქართველოს მთავრობის, დიპლომატიური კორპუსისა და საერთაშორისო ორგანიზაციების წარმომადგენლები ესწრებოდნენ. გარემოს დაცვისა და სოფლის მეურნეობის სამინისტროს დაცული ტერიტორიების სააგენტო რეინჯერთა პროფესიულ დღეს 2017 წლიდან აღნიშნავს. სააგენტომ, დაცული ტერიტორიების დაცვასა და განვითარებაში შეტანილი განსაკუთრებული წვლილისთვის, 100-ზე მეტი რეინჯერი დააჯილდოვა მადლობის სიგელითა და ფულადი პრემიით. კომპენსაციები გადაეცათ სამსახურეობრივი მოვალეობის შესრულების დროს დაღუპული რეინჯერების ოჯახებს. „მოხარული ვარ, რომ თქვენთან ერთად აღვნიშნავ ამ მნიშვნელოვან თარიღს - რეინჯერთა მსოფლიო დღეს.  კარგია, რომ ჩვენც ვართ ამ საერთაშორისო დღის აღნიშვნის მონაწილენი და ეს ტრადიცია მუდმივად გაგრძელდება. ჩვენ გვყავს გმირი რეინჯერები, რომლებმაც სამსახურეობრივ მოვალეობას შესწირეს თავი. სამწუხაროდ, რისკები რეინჯერთა საქმიანობას მუდმივად თან ახლავს, მათ შორის, ბუნებიდან მომდინარე, ტყის ხანძრები.. რეინჯერები ყველა ამ გამოწვევას გმირულად უმკლავდებიან, რისთვისაც დიდ მადლობას ვუხდი. წელს, მსოფლიოში, ამ დღის აღნიშვნის თემა  რეინჯერთა კეთილდღეობაა. 2013  წლიდან,  რეინჯერების ეკონომიკური, მატერიალური, სოციალური მდგომარეობის გაუმჯობესება ჩვენი ზრუნვის საგანია, რაშიც აუცილებლად უნდა აღინიშნოს დონორი ორგანიზაციების დამსახურება, რომლებიც დაცული ტერიტორიების არა მხოლოდ განვითარებაზე, არამედ რეინჯერების მატერიალური, სოციალური თუ ტექნიკური მდგომარეობის გაუმჯობესებაზე ზრუნავენ. რეინჯერებს მინდა გისურვოთ უსაფრთხო სამუშაო, გისურვოთ ჯანმრთელობა, იმისათვის, რომ ჩვენი ქვეყნის სიმდიდრის გამორჩეული ნაწილი დავიცვათ, რაც თქვენი პასუხისმგებლობის ქვეშაა", - განაცხადა გარემოს დაცვისა და სოფლის მეურნეობის მინისტრმა, ლევან დავითაშვილმა. საქართველოში ამერიკის შეერთებული შტატების ელჩის, კელი დეგნანის განცხადებით, რეინჯერები ძალიან ბევრს აკეთებენ გარემოს დაცვისთვის; შეაქვთ წვლილი ქვეყნის ეკონომიკურ განვითარებაში.  „დღევანელი დღე იყო არაჩვეულებრივი შესაძლებლობა, დაგვეფასებინა და აღგვენიშნა რეინჯერების წვლილი, მათი ძალიან დიდი სამუშაო ბუნების დაცვის მიმართულებით", -განაცხადა კელი დეგნანმა. საქართველოს დაცულ ტერიტორიებს, 21 ადმინისტრაციულ ერთეულში გადანაწილებული 400-მდე რეინჯერი იცავს. რეინჯერების დაცვის ქვეშ საქართველოს ტერიტორიის 800 ათას ჰექტრამდე ტერიტორიაა. მათი საქმიანობა გულისხმობს ბრაკონიერობის ფაქტების აღკვეთას, ბუნებრივ და დაუდევრობით გამოწვეულ ხანძრებთან გამკლავებას, ბიომრავალფეროვნების მონიტორინგს, სისუფთავის უზრუნველყოფას და, კომპეტენციის ფარგლებში, ვიზიტორთა დახმარებას. აღსანიშნავია, რომ წელს მსოფლიოს 10 საუკეთესო რეინჯერს შორის ბაწარა-ბაბანეურის დაცული ტერიტორიების უფროსი რეინჯერი, გიორგი აბრამიშვილი დასახელდა. ბუნების დაცვის საერთაშორისო კავშირისა (IUCN) და დაცული ტერიტორიების მსოფლიო კომისიის მიერ, საქართველოს დაცული ტერიტორიების რეინჯერს, „საერთაშორისო რეინჯერთა ჯილდო“ გადაეცა. საქართველოს  მთავრობის მიერ შემუშავებული ერთიანი პოლიტიკის შესაბამისად და დონორი ორგანიზაციების მხარდაჭერით, სახელმწიფო მუდმივად ზრუნავს რეინჯერებზე. ყოველწლიურად უმჯობესდება მათი სამუშაო პირობები, სახელფასო ანაზღაურება ეტაპობრივად იზრდება, რეინჯერები უზრუნველყოფილნი არიან საკვები დანამატით, შესაბამისი სადაზღვევო პაკეტებითა და სამუშაო ეკიპირებით. სამსახურეობრივი მოვალეობის შესრულების დროს დაღუპული რეინჯერების ოჯახებს დანიშნული აქვთ დახმარება. რეინჯერთა პროფესიული დღე  რეინჯერთა საერთაშორისო  ფედერაციის მიერ დაწესდა და მსოფლიოში პირველად 2007 წელს აღინიშნა.
#

ლევან დავითაშვილი სომხეთის რესპუბლიკის ეკონომიკის მინისტრს, ვაჰან ქერობიანს შეხვდა

გარემოს დაცვისა და სოფლის მეურნეობის მინისტრი ლევან დავითაშვილი სომხეთის რესპუბლიკის ეკონომიკის მინისტრს, ვაჰან ქერობიანს შეხვდა.  შეხვედრაზე მხარეებმა ორ ქვეყანას შორის სავაჭრო-ეკონომიკური კუთხით მიმდინარე თანამშრომლობის და არსებული პოტენციალის ათვისების საკითხებზე ისაუბრეს.  „ჩვენ ქვეყნებს წარმატებული პარტნიორული ურთიერთობების მრავალწლიანი ისტორია აქვთ. საინტერესო შეხვედრა გვქონდა სომხეთის რესპუბლიკის ეკონომიკის მინისტრთან. აღსანიშნავია, რომ სომხეთში ეკონომიკის სამინისტრო ფარავს სოფლის მეურნეობის სექტორსაც, შესაბამისად, საუბარი იყო იმაზეც, რომ ქართულმა და სომხურმა ბიზნესსექტორმა ძალისხმევა გააერთიანონ, რათა თავისუფალი ვაჭრობის შეთანხმებები გამოვიყენოთ ახალ ბაზრებზე ქართული და სომხური კომპანიების წვდომის უზრუნველსაყოფად“, - განაცხადა ლევან დავითაშვილმა. შეხვედრას ღვინის ეროვნული სააგენტოს თავმჯდომარე ლევან მეხუზლა,  სომხეთის რესპუბლიკის ეკონომიკის მინისტრის მოადგილე და მევენახეობისა და ღვინის წარმოების ფონდის დირექტორი ესწრებოდნენ.
#

პირველად საქართველოს ისტორიაში, 4 დაცული ტერიტორია UNESCO-ს ბუნებრივი მემკვიდრეობის ნუსხაში შევიდა

ჩინეთის ქალაქ ფუჟოუში, UNESCO-ს მსოფლიო მემკვიდრეობის კომიტეტის 44-ე სესიაზე მიღებული გადაწყვეტილებით, კოლხეთისა და მტირალას ეროვნული პარკები და კინტრიშისა და ქობულეთის დაცული ტერიტორიები, „კოლხური ტყეებისა და ჭარბტენიანი ტერიტორიების“ სახელით, მსოფლიოს 213 ბუნებრივი მემკვიდრეობის ნუსხას დაემატა და ღირსეული ადგილი მოიპოვა ამაზონის ტყის, გრანდ კანიონის ეროვნული პარკის, იელოუსტოუნის ეროვნული პარკის, მთა ეტნას, შვეიცარიის ალპების გვერდით. დაცული ტერიტორიების მსოფლიო აღიარების მოპოვების აღსანიშნავად, ღონისძიება კოლხეთის ეროვნულ პარკში გაიმართა, რომელსაც გარემოს დაცვისა და სოფლის მეურნეობის მინისტრი ლევან დავითაშვილი, საქართველოს მთავრობის, დიპლომატიური კორპუსისა და საერთაშორისო ორგანიზაციების წარმომადგენლები ესწრებოდნენ. „ვულოცავ თითოეულ ჩვენ მოქალაქეს მთელი ქვეყნისთვის  უმნიშვნელოვანეს დღეს.  პირველად საქართველოსა და მთლიანად სამხრეთ კავკასიაში, ქართული ბუნების უნიკალური ნაწილი, „კოლხური ტყეები და ჭარბტენიანი ტერიტორიები"  UNESCO-ს მსოფლიო ბუნებრივ  მემკვიდრეობად იქნა აღიარებული, რაც განსაკუთრებულ პასუხისმგებლობას გვანიჭებს თითოეულ ჩვენგანს. კოლხური ტყეები და ჭარბტენიანი ტერიტორიები მნიშვნელოვანია არა მხოლოდ ჩვენი ქვეყნისთვის, არამედ მსოფლიოსთვის. ამ გადაწყვეტილებით საქართველო კიდევ ერთხელ გამოჩნდა მსოფლიო რუკაზე, რაც საქართველოს სახელის საერთაშორისო ასპარეზზე გატანას უწყობს ხელს… ბუნების შენარჩუნება, ბუნების დაცვა, ბუნებაზე ზრუნვა და ამავე დროს სწორად განვითარება არის ძალიან მნიშვნელოვანი პასუხისმგებლობა. ეს არის უნიკალური შესაძლებლობები ტურიზმის განვითარებისთვის, რასაც, რა თქმა უნდა, ხელი უნდა შევუწყოთ", - განაცხადა გარემოს დაცვისა და სოფლის მეურნეობის მინისტრმა, ლევან დავითაშვილმა.  საქართველოს დაცული ტერიტორიებისთვის მსოფლიო მემკვიდრეობის უბნად დასახელება, უმნიშვნელოვანესი ფაქტია არა მხოლოდ ქვეყნის, არამედ რეგიონის მასშტაბით. აღნიშნული ტერიტორიები წარმოადგენს კავკასიის ეკორეგიონისა და შავი ზღვის აუზის უმნიშვნელოვანეს ნაწილს, გამოირჩევა უნიკალური ეკოსისტემებითა და ბიომრავალფეროვნებით. საქართველოს დაცული ტერიტორიებისთვის მსოფლიო ბუნებრივი მემკვიდრეობის სტატუსის მინიჭება UNESCO-ს მსოფლიო ბუნებრივი მემკვიდრეობის IX და X კრიტერიუმების გათვალისწინებით მოხდა, რაც გულისხმობს მსოფლიო მნიშვნელობის უნიკალურობას, ცოცხალ ეკოსისტემებსა და ცოცხალ გეოლოგიურ პროცესებს. კოლხეთისა და მტირალას ეროვნული პარკები და კინტრიშისა  და ქობულეთის დაცული ტერიტორიები აღნიშნულ კრიტერიუმებს სრულად აკმაყოფილებს. საქართველოს მთავრობის, გარემოს დაცვისა და სოფლის მეურნეობის სამინისტროსა და დაცული ტერიტორიების სააგენტოს ინიციატივით, კოლხეთისა და მტირალას ეროვნული პარკებისა და კინტრიშისა და ქობულეთის დაცული ტერიტორიების UNESCO-ს ბუნებრივი მემკვიდრეობის ნუსხაში შეტანისთვის შესაბამისი პროცედურული სამუშაოები 2017 წელს დაიწყო ბუნების დაცვის მსოფლიო ფონდის (WWF), გერმანიის მთავრობისა და მიხეილ ზუკოვის ფონდის ფინანსური, ტექნიკური და ექსპერტული მხარდაჭერით. 2019 წელს კი, შერჩეული ტერიტორიების ნომინაციაზე ,,კოლხური ტყეები და ჭარბტენიანი ტერიტორიები” წარდგენა მოხდა.
#

მიმდინარე წლის 1 მაისიდან 25 ივლისის ჩათვლით საქართველოდან 16,9 მლნ აშშ დოლარის ატამი და ვაშლატამაა ექსპორტირებული

მიმდინარე წლის 1 მაისიდან 25 ივლისის ჩათვლით პერიოდში განხორციელდა 18.9 ათასი ტონა ატმისა და ვაშლატამას ექსპორტი, რომლის ღირებულებამ 16 მილიონ 9 ათასი აშშ დოლარი შეადგინა.  გასული წლის ანალოგიურ პერიოდთან შედარებით, ატმისა და ვაშლატამას ექსპორტის მოცულობა 6.3 ათასი ტონით, ხოლო ღირებულება - 5 მილიონ 9 ათასი აშშ დოლარით გაიზარდა. ექსპორტი ძირითადად განხორციელდა რუსეთსა (11,935) და სომხეთში (5,872 ტონა), ასევე, მცირე რაოდენობით აზერბაიჯანში (269 ტონა), უკრაინაში (493 ტონა) ბელარუსში (99 ტონა), ყაზახეთში (95 ტონა), მოლდოვასა (116 ტონა) და სლოვენიაში (38 ტონა).
#

ლევან დავითაშვილი: „მინდა, ჩვენი ქვეყნის თითოეულ მოქალაქეს მივულოცო. საქართველოს 4 დაცული ტერიტორია - კოლხეთისა და მტირალას ეროვნული პარკები და კინტრიშისა და ქობულეთის დაცული ტერიტორიები, UNESCO-ს მსოფლიო ბუნებრივი მემკვიდრეობის სიაში შევიდა“.

„სწორად იყო პრემიერის მიერ აღნიშნული, ის ფაქტი, რომ საქართველოს უნიკალური ბუნება UNESCO-ს ბუნებრივი მემკვიდრეობის სიაში შევიდა, არ არის მხოლოდ საქართველოსთვის მნიშვნელოვანი, ეს არის მნიშვნელოვანი მთელი რეგიონისთვის, შავი ზღვის აუზისთვის, ეს არის საერთაშორისო აღიარება; საქართველო კიდევ ერთხელ გამოჩნდა მსოფლიო მასშტაბით რუკაზე, როგორც გამორჩეული ბიომრავალფეროვნების მქონე ქვეყანა, რომელსაც უნიკალური ბუნება აქვს, რაც არ არის მხოლოდ საქართველოს კუთვნილება, ეს არის მთელი მსოფლიოსთვის მნიშვნელოვანი, რაც UNESCO-მ დაადასტურა.2019 წლიდან დავიწყეთ ამ ნომინაციაზე მუშაობა. აქ, ჩვენს სამინისტროსთან ერთად, მნიშვნელოვანია საგარეო საქმეთა სამინისტროსი წვლილი, რომელიც მუშაობდა იუნესკოსთან, და საბოლოოდ, დღეს ეს გადაწყვეტილება იქნა მიღებული“, - განაცხადა გარემოს დაცვისა და სოფლის მეურნეობის მინისტრმა, ლევან დავითაშვილმა.