#

უნგრეთის სოფლის მეურნეობის სამინისტროს დელეგაციის წევრებმა კახეთში სახელმწიფო პროგრამების მხარდაჭერით შექმნილი აგრარული მიმართულებების საწარმოები დაათვალიერეს

გარემოს დაცვისა და სოფლის მეურნეობის მინისტრის მოადგილემ, ნინო თანდილაშვილმა და უნგრეთის სოფლის მეურნეობის სამინისტროს დელეგაციის წევრებმა, კახეთის რეგიონში, სახელმწიფო პროგრამების მხარდაჭერით შექმნილი აგრარული მიმართულებების საწარმოები  დაათვალიერეს.  დელეგაციას უნგრეთის სოფლის მეურნეობის სამინისტროს სახელმწიფო მდივნის მოადგილე საერთაშორისო ურთიერთობების საკითხებში, დავიდ ბენჩიკი ხელმძღვანელობს.  გარემოს დაცვისა და სოფლის მეურნეობის მინისტრის მოადგილის, ნინო თანდილაშვილის განცხადებით, საქართველოსა და უნგრეთს  შორის სოფლის მეურნეობის მიმართულებით თანამშრომლობის გაღრმავებისთვის უნგრელი სტუმრების ეს ვიზიტი ძალიან მნიშვნელოვანია. „განსაკუთრებით მინდა აღვნიშნო სამეცნიერო-კვლევითი მიმართულებით ორ ქვეყანას შორის ურთიერთობის პერსპექტივების და კერძო სექტორის წარმომადგენლების სამომავლო თანამშრომლობის გაღრმავების საკითხები, რომლებიც დელეგაციის წევრებთან ერთად განვიხილეთ”, - აღნიშნა ნინო თანდილაშვილმა.   „ჩვენ ვართ საქართველოში იმისათვის, რომ  ვაჭრობის სფეროში თანამშრომლობა გავაღრმავოთ. ვიზიტის ფარგლებში, დავათვალიერეთ საწარმოები, რომელიც სახელმწიფო პროგრამებით არის დაფინანსებული. გავიზიარეთ ის გამოცდილება, რაც საქართველოს აქვს სოფლის მეურნეობის დარგის განვითარების მიმართულებით. ვეწვიეთ კომპანიას „Agri Management Group of Georgia“, რათა გვენახა, თუ როგორ ხდება თხილის წარმოება თქვენთან და როგორ შეიძლება ამ წარმოების ინტეგრირება ევროკავშირის მიერ თხილის წარმოების პროცესში. მე ვფიქრობ, ეს არის პირველი ნაბიჯები და კიდევ ბევრი წინ არის”, - განაცხადა უნგრეთის სოფლის მეურნეობის სამინისტროს სახელმწიფო მდივნის მოადგილემ საერთაშორისო ურთიერთობების საკითხებში,  დავიდ ბენჩიკმა.  ვიზიტის ფარგლებში, დელეგაციის წევრები იმყოფებოდნენ და სამუშაო პროცესს გაეცნენ მესაქონლეობის ფერმაში „თეთრი ფერმა“  და კომპანიაში „შპს  ბადაგი+“, რომელიც ჩურჩხელას აწარმოებს. 
#

გიორგი ხანიშვილმა ონლაინ ვებინარში „ჩაის სექტორის მიმოხილვა საქართველოსა და აზერბაიჯანში“ მიიღო მონაწილეობა

 გარემოს დაცვისა და სოფლის მეურნეობის მინისტრის პირველმა მოადგილემ, გიორგი ხანიშვილმა ონლაინ ვებინარში „ჩაის სექტორის მიმოხილვა საქართველოსა და აზერბაიჯანში“  მიიღო მონაწილეობა.რეგიონული ვებინარის ორგანიზატორი იყო გაეროს სურსათისა და სოფლის მეურნეობის ორგანიზაციის რეგიონული ოფისი ევროპასა და ცენტრალურ აზიაში (FAO REU), FAO-ს საინვესტიციო ცენტრთან თანამშრომლობით.ვებინარაზე, მონაწილეებმა აზერბაიჯანსა და საქართველოში ჩაის წარმოების პოტენციალის შესახებ საერთაშორისო ცნობიერების ამაღლების, ჩაის წარმოებაში საერთაშორისო საუკეთესო პრაქტიკის გაზიარების საკითხები და FAO-სა და ევროპის რეკონსტრუქციის და განვითარების ბანკის (EBRD) ერთობლივი პროექტის შედეგები განიხილეს.შეხვედრაზე წარმოდგენილი იყო პრეზენტაციები საქართველოსა და აზერბაიჯანში ჩაის სექტორში არსებული მდგომარეობის, გამოწვევებისა და სამომავლო გეგმების შესახებ.„საქართველოს, აზერბაიჯანთან ერთად, საბჭოთა ქვეყნების ჩაით მომარაგებაში საკმაოდ მნიშვნელოვანი წილი ეკავა. საქართველოში, ჩაის პლანტაციებს 65 000 ჰა-მდე ფართობი ეჭირა. დღეის მდგომარეობით, გვაქვს მთელი რიგი პროექტები, რომლებზეც მნიშვნელოვნად არის დამოკიდებული ჩაის სექტორის აღორძინება. მომავალ წლებში, აქცენტი ქართული ჩაის ხარისხობრივ ზრდაზე გაკეთდება”, - განაცხადა გიორგი ხანიშვილმა.შეხვედრას აზერბაიჯანის სოფლის მეურნეობის მინისტრი ინამ ქარიმოვი, საერთაშორისო საფინანსო ინსტიტუტების (EBRD, World Bank), შესაბამისი სამინისტროების, სამთავრობო უწყებების, სამეცნიერო-კვლევითი ცენტრების და ჩაის მწარმოებელი კომპანიების წარმომადგენლები ესწრებოდნენ.  
#

იდეების კონკურსის GreenOvation მე-2 ეტაპი 25 მაისს დასრულდება

საქართველოს გარემოს დაცვისა და სოფლის მეურნეობის სამინისტროსა და გერმანიის საერთაშორისო თანამშრომლობის საზოგადოების (GIZ) ერთობლივი ინიციატივით დაწყებული იდეების კონკურსი „GreenOvation” (Green Innovation Challenge) გრძელდება.კონკურსის მიზანია, გამოვლინდეს სატყეო სექტორში არსებული მთავარი გამოწვევები და,  მდგომარეობის გაუმჯობესების ხელშეწყობისთვის, მოიძებნოს მათი ინოვაციური და ეკომეგობრული გადაჭრის  გზები. 25 მაისს, კონკურსის მეორე ეტაპი - პირველ ეტაპზე შერჩეული გამოწვევების გადაჭრის გზების წარდგენა დასრულდება. კონკურსის პირველ ეტაპზე  წარდგენილი  განაცხადები ასახავდა ერთი მხრივ, სამხრეთ კავკასიის ქვეყნებში - საქართველოში, სომხეთსა და აზერბაიჯანში აქტუალურ საკითხებს, ხოლო  მეორე მხრივ,  მოქალაქეებისა თუ ორგანიზაციების ენთუზიაზმს, აქტიურად ჩაერთონ მნიშვნელოვანი პრობლემების გარემოსადმი მეგობრული, მწვანე და ინოვაციური ხედვითა და მეთოდებით მოგვარების პროცესში.კონკურსის „GreenOvation” პირველ ეტაპზე შეირჩა 9 გამოწვევა, რომელთა შესახებაც ინფორმაცი განთავსებულია ვებგვერდზე:https://greenovation.hypeinnovation.com/  25 მაისამდე, ნებისმიერ მსურველს შესაძლებლობა აქვს მონაწილეობა მიიღოს კონკურსის მეორე ეტაპში და  წარმოადგინოს შერჩეული 9 გამოწვევის  მწვანე და ინოვაციური გადაწყვეტის გზები. კონკურსის ფარგლებში,  გამოვლინდება 9 გამარჯვებული - 3 გამარჯვებული თითო ქვეყნიდან (საქართველო, სომხეთი, აზერბაიჯანი), რომლებსაც, პროექტების განსახორციელებლად, გრანტის სახით გადაეცემათ თანხა 10 000 ევრომდე ოდენობით, წარმოდგენილი პროექტის ბიუჯეტის შესაბამისად.  იდეების კონკურსი „GreenOvation” საქართველოში, სომხეთსა და აზერბაიჯანში გარემოსდაცვითი პროგრამის „ბუნებრივი რესურსების მართვა და ეკოსისტემური მომსახურებებით უზრუნველყოფა სოფლად მდგრადი განვითარებისთვის სამხრეთ კავკასიაში" (ECOserve) ფარგლებში ტარდება.
#

მსოფლიო ბანკის პროექტის „სოფლის მეურნეობის, მიწისა და წყლის სექტორებში გასატარებელი ღონისძიებები აგროსისტემების მდგრადი განვითარებისთვის” განხორციელების საკითხები გარემოს დაცვისა და სოფლის მეურნეობის სამინისტროში განიხილეს

მსოფლიო ბანკის პროექტის „სოფლის მეურნეობის, მიწისა და წყლის სექტორებში გასატარებელი ღონისძიებები აგროსისტემების მდგრადი განვითარებისთვის” განხორციელების საკითხები გარემოს დაცვისა და სოფლის მეურნეობის მინისტრის პირველმა მოადგილემ, გიორგი ხანიშვილმა, დაინტერესებულ მხარეებთან ერთად, ონლაინ შეხვედრაზე განიხილა.შეხვედრას მსოფლიო ბანკის რეგიონალური დირექტორი სებასტიან მოლინეუ, საჯარო და კერძო სექტორის, საერთაშორისო და დონორი ორგანიზაციების ხელმძღვანელები, ექსპერტები და სამოქალაქო საზოგადოების წარმომადგენლები ესწრებოდნენ.„ჩვენ გვაქვს მნიშვნელოვანი გამოწვევები მიწის მართვის, მიწის საკუთრების, გამსხვილების, კონსოლიდაციის, აღრიცხვისა და რეგისტრაციის მიმართულებებით. ძალიან რთული პროცესები მიმდინარეობს ამ კუთხით, რაც მრავალწლიან შრომას მოითხოვს. აღსანიშნავია, რომ მსოფლიო ბანკის, იუსტიციის სამინისტროსა და ჩვენი გუნდის ერთობლივი მუშაობით, სერიოზული საფუძველი ჩაეყარა მიწების სისტემურ აღრიცხვასა და რეგისტრაციას, რაც წინგადადგმული ნაბიჯია. ამასთანავე, ის საკანონმდებლო დოკუმენტები, რომელთაც ქარსაფარ ზოლებთან, საძოვრებთან და გაუდაბნოებასთან დაკავშირებით ვღებულობთ, ვფიქრობ, არსებული გამოწვევების დაძლევაში ძალიან დაგვეხმარება“, - განაცხადა გიორგი ხანიშვილმა.სამუშაო შეხვედრა მსოფლიო ბანკის და თბილისის სახელმწიფო უნივერსიტეტის ეკონომიკის საერთაშორისო სკოლის (ISET) კვლევითი ინსტიტუტის მიერ იყო ორგანიზებული.
#

საქართველო-უნგრეთის სოფლის მეურნეობის სამუშაო ჯგუფის რიგით მეორე შეხვედრა გაიმართა

გარემოს დაცვისა და სოფლის მეურნეობის სამინისტროში საქართველო-უნგრეთის სოფლის მეურნეობის სამუშაო ჯგუფის რიგით  მეორე შეხვედრა გაიმართა. შეხვედრა საქართველოს გარემოს დაცვისა და სოფლის მეურნეობის მინისტრის მოადგილემ, ნინო თანდილაშვილმა და უნგრეთის სოფლის მეურნეობის სამინისტროს სახელმწიფო მდივნის მოადგილემ საერთაშორისო ურთიერთობების საკითხებში,  დავიდ ბენჩიკმა გახსნეს.„სოფლის მეურნეობის განვითარების ხელშეწყობა ჩვენი პრიორიტეტია. სახელმწიფოს სწორი და თანმიმდევრული პოლიტიკის შედეგად, აღნიშნული მიმართულებით მიღწეული პოზიტიური შედეგები უკვე სახეზეა. ყოველწლიურად იზრდება როგორც ადგილობრივი წარმოება, ასევე ქართული პროდუქციის ექსპორტი. თუმცა, ჩვენ ქვეყანას კიდევ მეტი პოტენციალი აქვს. ევროპული ქვეყნების გამოცდილების გაზიარება და მათთან მჭიდრო თანამშრომლობა დაგვეხმარება,  ეს პოტენციალი მაქსიმალურად ავითვისოთ. იმედი მაქვს, უნგრეთის დელეგაციის ვიზიტი  ნაყოფიერი იქნება; სამომავლოდ, ჩვენ ქვეყნებს შორის თანამშრომლობა არაერთი მიმართულებით გაღრმავდება და სარგებელს მოუტანს ორივე მხარეს“, - განაცხადა  ნინო თანდილაშვილმა. როგორც შეხვედრაზე უნგრეთის სოფლის მეურნეობის სამინისტროს სახელმწიფო მდივნის მოადგილემ საერთაშორისო ურთიერთობების საკითხებში, დავიდ ბენჩიკმა აღნიშნა, საქართველოს სოფლის მეურნეობის განვითარების და ქართული პროდუქციის ექსპორტის დიდი პოტენციალი გააჩნია. უნგრეთი მზადაა საქართველოსთან გააღრმავოს თანამშრომლობა  გამოცდილებისა და ექსპერტული ცოდნის გაზიარების, ასევე,  სამეცნიერო-კვლევითი მიმართულებით, რაც მნიშვნელოვან შედეგებს მოუტანს ორივე ქვეყანას. სამუშაო ჯგუფის შეხვედრაზე საუბარი შეეხო ბიოწარმოების, ორგანული მეურნეობების, აკვაკულტურის განვითარების, ასევე, კვების მრეწველობისა და ღვინის წარმოების საკითხებს, სამეცნიერო-კვლევით პროექტებს. მხარეებმა  მეთევზეობისა და აკვაკულტურის,  სამეცნიერო-კვლევითი და ციფრული სოფლის მეურნეობის, ასევე მევენახეობა-მეღვინეობის მიმართულებით თანამშრომლობის პერსპექტივები განიხილეს. საქართველო-უნგრეთის სოფლის მეურნეობის სამუშაო ჯგუფის შეხვედრას საქართველოს გარემოს დაცვისა და სოფლის მეურნეობის სამინისტროსა და მის სისტემაში შემავალი შესაბამისი უწყების ხელმძღვანელები, უნგრეთის სოფლის მეურნეობის სამინისტროსა და სამეცნიერო-კვლევითი ცენტრის წარმომადგენლები ესწრებოდნენ. 
#

მადრიდში გამართულ პრეზენტაციაში „საქართველო - ღვინის აკვანი“ მონაწილეობა ქართული დელეგაციის წევრებმა მიიღეს

პრეზენტაცია ევროპის პრესტიჟულ ბიზნესსკოლაში, მადრიდის IE უნივერსიტეტში გაიმართა.  ღონისძიებაზე, რომელსაც დიპლომატიური კორპუსის, მთავრობის, ბიზნესწრეების წარმომადგენლები და სტუდენტები ესწრებოდნენ, ქართული ღვინის ისტორიაზე ისაუბრეს.  საქართველოს გარემოს დაცვისა და სოფლის მეურნეობის მინისტრმა, ლევან დავითაშვილმა, სიტყვით გამოსვლისას, ყურადღება ქართული ღვინის ისტორიით მსოფლიოში ერთ-ერთი ყველაზე მაღალრეიტინგული ბიზნესსკოლის დაინტერესების მნიშვნელობაზე გაამახვილა და აღნიშნა, რომ ეს კიდევ ერთი მნიშვნელოვანი ხელშემწყობი ფაქტორი იქნება ქართული ღვინის პოპულარიზაციის გაზრდის და მის შესახებ ცნობადობის ამაღლების საქმეში.  „მისასალმებელია, რომ მადრიდის ერთ-ერთი წამყვანი უნივერსიტეტი, მსოფლიოში ერთ-ერთი ყველაზე მაღალრეიტინგული ბიზნესსკოლა, სადაც ქართველებიც სწავლობენ, დაინტერესდა ქართული ღვინის წარმატების ისტორიით და შექმნა case study ქართულ ღვინოზე. ეს ფაქტი ხელს შეგვიწყობს ქართული ღვინის პოპულარიზაციაში, ქართული ღვინის შესახებ ცნობადობის ამაღლებაში, რამდენადაც ამ უნივერსიტეტში სწავლობენ ბიზნესით დაინტერესებული სტუდენტები მთელი მსოფლიოდან“, - განაცხადა ლევან დავითაშვილმა.  მინისტრმა ისაუბრა იმ არაერთი მნიშვნელოვანი ნაბიჯის შესახებ, რომლის გადადგმა ღვინის ინდუსტრიაში უახლოეს მომავალში იგეგმება. მისი განმარტებით, გარდა იმისა, რომ საქართველო ღვინის სამშობლოა და ღვინის წარმოების განსაკუთრებული მეთოდები გააჩნია, საჭიროა მეტი კომერციალიზაცია და, გრძელვადიან გეგმაში, აქცენტი სწორედ ღვინის პოპულარიზაციასა და ექსპორტის ზრდაზე გაკეთდება. ლევან დავითაშვილმა საერთაშორისო ტურიზმის გამოფენის შესახებაც ისაუბრა, რომელშიც საქართველო პარტნიორი ქვეყნის სტატუსით მონაწილეობს. მინისტრმა ტურიზმის ინდუსტრიაში გამოკვეთილ ახალ ტენდენციებზე გაამახვილა ყურადღება.  „საქართველოსთვის ტურიზმის სექტორი ყოველთვის გამორჩეულად მნიშვნელოვანი იყო. სამწუხაროდ, პანდემიამ მნიშვნელოვნად შეამცირა ტურისტული ნაკადები მთელს მსოფლიოში და დიდი გამოწვევების წინაშე დააყენა ტურისტული ინდუსტრია. თუმცა, უკვე გაზრდილია აქტივობა და მსოფლიო ნელ-ნელა უბრუნდება პანდემიამდელ მდგომარეობას. ახალი ტენდენციები, რომლებიც თვალსაჩინოა, არის მეტი ინტერესი ეკოტურიზმის, აგრო და ღვინის ტურიზმის მიმართულებებით, რაშიც საქართველოს განსაკუთრებული უპირატესობები გააჩნია“, - განაცხადა ლევან დავითაშვილმა.  პრეზენტაციას „საქართველო - ღვინის აკვანი“ საქართველოს ეკონომიკისა და მდგრადი განვითარების მინისტრი ნათია თურნავა, პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარე დავით სონღულაშვილი, საქართველოს საგანგებო და სრულუფლებიანი ელჩი ესპანეთის სამეფოში ილია გიორგაძე და საპარტნიორო ფონდის აღმასრულებელი დირექტორი დავით საგანელიძე დაესწრნენ.
#

ნინო თანდილაშვილმა ტრანსპორტის, ჯანმრთელობისა და გარემოს დაცვით საკითხებთან დაკავშირებით რიგით მეხუთე მაღალი დონის ონლაინ შეხვედრაში მიიღო მონაწილეობა

ტრანსპორტის, ჯანმრთელობისა და გარემოს დაცვით საკითხებთან დაკავშირებით რიგით მეხუთე მაღალი დონის ონლაინ შეხვედრაში მონაწილეობა გარემოს დაცვისა და სოფლის მეურნეობის მინისტრის მოადგილემ, ნინო თანდილაშვილმა მიიღო.შეხვედრა ორგანიზებული იყო ავსტრიის მთავრობის მიერ, გაეროს ევროპის ეკონომიკურ კომისიასთან (UNECE) და ჯანდაცვის მსოფლიო ორგანიზაციის ევროპის რეგიონალურ ოფისთან (WHO/Europe) თანამშრომლობით, ტრანსპორტის, ჯანმრთელობისა და გარემოს პან-ევროპული პროგრამის ფარგლებში (PEP). შეხვედრის მონაწილეებმა სატრანსპორტო საშუალებების მოსახლეობის ჯანმრთელობასა და გარემოზე გავლენის საკითხები განიხილეს და ამ მიმართულებით არსებულ გამოწვევებზე იმსჯელეს. „საქართველოში კლიმატის ცვლილების მულტისექტორული საბჭო დაარსდა, რომელიც მიზნად ისახავს გაეროს კლიმატის ცვლილების ჩარჩო კონვენციის, კიოტოს პროტოკოლისა და პარიზის შეთანხმების ეფექტიანი განხორციელების უზრუნველყოფას. საბჭომ მხარი დაუჭირა საქართველოს განახლებულ „ეროვნულ დონეზე განსაზღვრულ წვლილს” (NDC), რომელიც ცოტა ხნის წინ დამტკიცდა საქართველოს მთავრობის მიერ. ამასთანავე, ახლახან დამტკიცდა 2030 წლის კლიმატის ცვლილების სტრატეგია და 2021-2023 წლების კლიმატის სამოქმედო გეგმა. პან-ევროპული პროგრამის (PEP) მთავარი მიზანი ტრანსპორტის, ჯანმრთელობისა და გარემოს დაცვის სექტორების წინსვლისთვის ისეთი ღონისძიებების განხორციელებაა, რომლის შედეგადაც მივიღებთ მწვანე და ჯანსაღ ტრანსპორტს, ადამიანის ჯანმრთელობის გაუმჯობესებას და გარემოს დაცვას. ჩვენ სრულად ვაცნობიერებთ, რომ ერთიანი ძალისხმევით უნდა შევძლოთ მწვანე და ჯანსაღი ტრანსპორტის განვითარება. შესაბამისად, საქართველოს მთავრობა ძირითად პრიორიტეტულ მიმართულებად დაბალი ემისიების განვითარებას ადგენს“, - განაცხადა ნინო თანდილაშვილმა. ტრანსპორტის, ჯანმრთელობისა და გარემოს პან-ევროპული პროგრამა (PEP) გაეროს ევროპის ეკონომიკური კომისიისა (UNECE) და ჯანდაცვის მსოფლიო ორგანიზაციის ევროპის რეგიონული ოფისის (WHO/Europe) 56 წევრი ქვეყნის მინისტრებსა და მაღალი რანგის თანამდებობის პირებს, ევროკომისიის წარმომადგენლებს, საერთაშორისო, მთავრობათაშორის და არასამთავრობო ორგანიზაციებს, ტრანსპორტის, ჯანმრთელობისა და გარემოს დაცვაში მონაწილე სხვა დაინტერესებულ მხარეებს აერთიანებს. პან-ევროპული პროგრამა ხელს უწყობს ინტეგრირებულ პოლიტიკურ მიდგომას, რომელიც ტრანსპორტის, ჯანმრთელობისა და გარემოს დაცვის სექტორების ერთობლივი მუშაობით, ევროპაში მწვანე და ჯანსაღი სატრანსპორტო საშუალებების  განვითარებას ისახავს მიზნად. შეხვედრის ბოლოს, მონაწილეებმა ტრანსპორტის, ჯანმრთელობისა და გარემოს შესახებ ვენის დეკლარაცია მიიღეს. დეკლარაცია ტრანსპორტის უფრო ახალ, სუფთა, უსაფრთხო, ჯანსაღ და ინკლუზიურ გარდაქმნაზე ფოკუსირდება. ასევე, დამტკიცდა პირველი პან-ევროპული გენერალური გეგმა, რომელიც რეგიონში ველოსიპედით მოძრაობის პოპულარიზაციას ითვალისწინებს.