#

ლევან დავითაშვილი: „ფონდი „ქართუ“ ჩვენი მუდმივი პარტნიორი და მხარდამჭერია ძალიან ბევრ კარგ საქმეში“

მთაწმინდის პარკში, ურბანული ტყის ლანდშაფტის აღდგენა-რეაბილიტაციის პროექტის პრეზენტაცია გაიმართა.როგორც პრეზენტაციაზე გარემოს დაცვისა და სოფლის მეურნეობის მინისტრმა, ლევან დავითაშვილმა აღნიშნა, პროექტი ქალაქში ეკოლოგიური მდგომარეობის გაუმჯობესებას მნიშვნელოვნად შეუწყობს ხელს. პროექტი პირდაპირ თანხვედრაშია იმ პოლიტიკასთან, რომელიც მთავრობას გარემოსდაცვითი მიმართულებით, კერძოდ, ჰაერის ხარისხის გაუმჯობესების კუთხით აქვს. „ეს არის მულტიდისციპლინური პროექტი, რომელიც ურბანულ გარემოს თვისობრივად განაახლებს, ხარისხობრივად შეცვლის და გააუმჯობესებს. ჩვენი მიზანია, შევქმნათ შესაბამისი ეკოტურისტული ინფრასტრუქტურა, რომელიც მოსახლეობას აქტიური ცხოვრებისა და რეკრეაციის საშუალებას მისცემს. ურბანული ტყის ლანდშაფტის აღდგენა-რეაბილიტაციის პროექტი სხვადასხვა სახელმწიფო უწყების კოორდინირებული მუშაობის კარგი მაგალითია. პროექტის განხორციელებაც შეუძლებელი იქნებოდა, რომ არა ბატონი ბიძინა ივანიშვილის და „ფონდი ქართუს“ უპრეცედენტო დახმარება. ეს არის მრავალმილიონიანი ინვესტიცია, რომელიც რამდენიმე წლის განმავლობაში უნდა განხორციელდეს. „ფონდი ქართუ“ ჩვენი მუდმივი პარტნიორი და მხარდამჭერია ძალიან ბევრ კარგ საქმეში, რაც  არა მხოლოდ ზოგადი ინფრასტრუქტურის განვითარებასა და კულტურული მემკვიდრეობის შენარჩუნებას უკავშირდება, არამედ ბიომრავალფეროვნების შენარჩუნებასაც. დაცულ ტერიტორიებზე ძალიან ბევრი ეკოტურისტული ინფრასტრუქტურა სწორედ „ფონდი ქართუს“ მხარდაჭერით განხორციელდა“, - განაცხადა ლევან დავითაშვილმა.
#

30 წლიანი პაუზის შემდეგ, სოფლებში, ხიხანსა და შაუმიანში სარწყავი სისტემა ამოქმედდება

გარემოს დაცვისა და სოფლის მეურნეობის მინისტრი ლევან დავითაშვილი  კომპანიის „საქართველოს მელიორაცია“ დირექტორთან, დავით წითლიძესთან ერთად, ქვემო ქართლის რეგიონის სოფლებში, ხიხანსა და შაუმიანში სარწყავი სისტემის  სარეაბილიტაციო და სამშენებლო სამუშაოებს გაეცნო. „სამელიორაციო-საირიგაციო ინფრასტრუქტურული სამუშაოები მთელი წლის განმავლობაში, კოვიდ 19-ის პანდემიის პირობებშიც კი,  შეუფერხებლად მიმდინარეობდა. ერთ-ერთი მნიშვნელოვანი პროექტი, რომელიც ჩვენ  ქვემო ქართლის რეგიონში დავიწყეთ  სრულდება, რაც, დამატებით, 1000 ჰექტარზე მეტი ტერიტორიის წყალუზრუნველყოფის   საშუალებას მოგვცემს. ამ ეტაპისთვის, მთლიანად ქვემო ქართლში,  20 000 ჰექტარზე მეტი ფართობი ირწყვება. წლიდან წლამდე, წყალუზრუნველყოფილი ტერიტორიები როგორც ქვემო ქართლში, ისე საქართველოს სხვა რეგიონებში იზრდება, რაც ახალ შესაძლებლობებს აჩენს სოფლის მეურნეობის განვითარებისთვის. სასოფლო-სამეურნეო ინფრასტრუქტურის არსებობის გარეშე, განსაკუთრებით კლიმატის ცვლილებების პირობებში, თანამედროვე სოფლის მეურნეობა, რომელიც პირდაპირ კავშირშია წყლით უზრუნველყოფასთან, ვერ განვითარდება. ჩვენ აქტიურად გავაგრძელებთ სარწყავი და სადრენაჟე ინფრასტრუქტურის განვითარებას, რაც ჩვენი მომდევნო ოთხი წლის მნიშვნელოვანი გეგმა და პრიორიტეტია“, -აღნიშნა ლევან დავითაშვილმა. სოფლებში ხიხანსა და შაუმიანში სამელიორაციო ინფრასტრუქტურა 3 ათეული წელია არ ფუნქციონირებს. „საქართველოს მელიორაციის“ მიერ განხორციელებული სამუშაოების შედეგად აღდგენილი საირიგაციო სისტემის მეშვეობით, მარნეულის მუნიციპალიტეტში   1000 ჰექტარზე მეტი   სასოფლო-სამეურნეო  მიწის ფართობი მოირწყვება.     აღნიშნული პროექტის ფარგლებში განხორციელდა სატუმბი სადგურების მშენებლობა,  სადაწნეო მილსადენების, წყალგამანაწიებელი კვანძების, წყალშემკრებებისა და სხვა სამელიორაციო ნაგებობების მოწყობა. ამ ეტაპზე, რეაბილიტაცია  უტარდება ხიხანისა და შაუმიანის სარწყავ არხებს.   პროექტის ჯამური ღირებულებაა 3 659 900 ლარს შეადგენს.   მარნეულის მუნიციპალიტეტის სამელიორაციო ინფრასტრუქტურის მოწესრიგების სამუშოები 2019 წლის შემოდგომაზე დაიწყო და მიმდინარე წელს დასრულდება. 
#

საუდის არაბეთში განხორციელებული ცოცხალი ცხვრის ექსპორტის ღირებულება 4.5 მლნ აშშ დოლარით გაიზარდა

„სოფლის მეურნეობის განვითარების ხელშეწყობისთვის შემუშავებული სახელმწიფო პოლიტიკის შედეგად, ხელშესახები პოზიტიური შედეგები უკვე გვაქვს. გაზრდილია ქართული პროდუქციის ექსპორტის მაჩვენებლები, მათ შორის, ცოცხალი ცხვრის. ფერმერები კმაყოფილები არიან. მნიშვნელოვანია აღინიშნოს, რომ წინა წლის ანალოგიურ პერიოდთან შედარებით, 36%-ით გაიზარდა ექსპორტირებული ცოცხალი ცხვრის ღირებულება, რაც საექსპორტო ფასის ზრდითაა განპირობებული“, - განაცხადა გარემოს დაცვისა და სოფლის მეურნეობის მინისტრის პირველმა მოადგილემ, გიორგი ხანიშვილმა, რომელიც ცოცხალი ცხვრის საექსპორტოდ მზადების პროცესს ნინოწმინდის მუნიციპალიტეტში გაეცნო.  შპს „აგროქიზიყი“ ცხვარს საექსპორტოდ ამზადებს. ნინოწმინდის მუნიციპალიტეტში, მადათაფას ტბის მიმდებარედ მოწყობილია სპეციალური საკარანტინე სივრცე, სადაც ცხვარი დაკვირვებასა და შესაბამის გამოკვლევებს გადის. საკარანტინო ვადის დასრულების შემდეგ, ცხვრის ექსპორტი საუდის არაბეთში განხორციელდება.  შპს „აგროქიზიყის“  წარმომადგენლის  ბექა გონაშვილის განცხადებით, ბოლო პერიოდში, შეკვეთების რაოდენობა გაზრდილია. საქართველოდან ცოცხალი ცხვრის ექსპორტი ძირითადად არაბულ ქვეყნებში ხორციელდება. 2020 წელს, ძირითად საექსპორტო ქვეყნები საუდის არაბეთი და აზერბაიჯანია. 2020 წლის 9 თვეში, წინა წლის ანალოგიურ პერიოდთან შედარებით, საუდის არაბეთში განხორციელებული ცოცხალი ცხვრის ექსპორტის ღირებულება 6-ჯერ, 4.5 მლნ აშშ დოლარით გაიზარდა.
#

გარემოსდაცვითი განათლების საერთაშორისო დღისადმი მიძღვნილ ღონისძიებაზე, გარემოს დაცვისა და სოფლის მეურნეობის სამინისტროს გარემოსდაცვითი ინფორმაციისა და განათლების ცენტრმა პროგრამის „გარემოსდაცვითი და აგრარული განათლება სკოლაში” პრეზენტაცია გამართა.

გარემოსდაცვითი განათლების საერთაშორისო დღისადმი მიძღვნილ ღონისძიებაზე,  გარემოს დაცვისა და სოფლის მეურნეობის სამინისტროს გარემოსდაცვითი ინფორმაციისა და განათლების ცენტრმა პროგრამის  „გარემოსდაცვითი და აგრარული განათლება სკოლაში” პრეზენტაცია გამართა.შეხვედრა გარემოს დაცვისა და სოფლის მეურნეობის მინისტრმა ლევან დავითაშვილმა გახსნა. „14 ოქტომბერი გარემოსდაცვითი განათლების მსოფლიო დღეა. წელს ამ დღეს ძალიან მნიშვნელოვანი პროგრამის ,,გარემოსდაცვითი და აგრარული განათლების პროგრამის” პრეზენტაცია და ასევე, მნიშვნელოვანი სახელმძღვანელოს წარდგენა მოხდა. სახელმძღვანელო 8 ნაწილს მოიცავს, განკუთვნილია პირველიდან მეექვსე კლასის მოსწავლეებისთვის და გარემოსდაცვითი და აგრარული მიმართულებით განათლების მიღების კარგი საშუალებაა. ეს არის ჩვენი თანმიმდევრული პოლიტიკის შედეგი. ჩვენ დავიწყეთ ქვეყანაში გარემოსდაცვითი განათლების ჩამოყალიბება. ამას მოჰყვა სასკოლო გარემოსდაცვითი განათლების პროგრამების მომზადება, რაც ძალიან მნიშვნელოვანია იმისთვის, რომ გაიზარდოს ქვეყანაში თაობა, რომელსაც სწორი აღქმა ექნება გარემოს დაცვის მიმართულებით და ასევე, ინტერესი გაუჩნდება აგრარული მიმართულებით აირჩიოს პროფესია” -განაცხადა ლევან დავითაშვილმა. ღონისძიებაზე ევროკავშირის ელჩმა საქართველოში კარლ ჰარცელმა ხაზი გაუსვა კლიმატის ცვლილების და გარემოსდაცვის საკითხების მნიშვნელობას. ასევე აღნიშნა, რომ „ცოდნა და განათლება არის ერთ-ერთი წამყვანი და ის ცვლილებები, რომელიც ხდება მთელს მსოფლიოში ამ მიმართულებით ძალიან საგულისხმოა. ეს ახალი სახელმძღანელოები, რომელიც იქნება მიძღვნილი გარემოსდაცვითი საკითხებისადმი არის ძალიან მნიშვნელოვანი.“ „გარემოსდაცვითი და აგრარული განათლება სკოლაში” დამხმარე სახელმძღვანელოა დაწყებითი საფეხურის პედაგოგებისთვის და მოიცავს ორივე სფეროს ისეთ მნიშვნელოვან საკითხებს, რომელიც მარტივად ადაპტირებადია დაწყებითი კლასების (I-VI კლასი) მოსწავლეებისთვის. ცენტრის მიერ შემუშავებული სახელმძღვანელო სრულ თანხვედრაშია განათლების მეცნიერების, კულტურისა და სპორტის სამინისტროს მოთხოვნებთან, შეესაბამება განათლების სფეროში მიმდინარე რეფორმებსა და არსებულ სტანდარტებს. ქვეყანაში გარემოსდაცვითი მდგომარების გაუმჯობესებასა  და სოფლის მეურნეობის განვითარებაში უდიდესი მნიშვნელობა განათლებას ენიჭება, სწორედ ამიტომ,  გარემოსდაცვითი ინფორმაციისა და განათლების ცენტრი აქტიურად აგრძელებს საგანმანათლებლო პროგრამების განხორციელებას. 
#

გარემოს დაცვისა და სოფლის მეურნეობის სამინისტროში, თბილისის ურბანული ტყის ლანდშაფტის აღდგენისა და რეკრეაციული ინფრასტრუქტურის განვითარების პროექტი განიხილეს

გარემოს დაცვისა და სოფლის მეურნეობის მინისტრმა, ლევან დავითაშვილმა ქალაქ თბილისის მერის მოადგილესთან, მაია ბითაძესთან ერთად, თბილისის ურბანული ტყის ლანდშაფტის აღდგენისა და რეკრეაციული ინფრასტრუქტურის განვითარების პროექტი სამუშაო შეხვედრაზე განიხილა. როგორც ლევან დავითაშვილმა  აღნიშნა, ურბანული ტყის აღდგენა ქალაქში არსებულ ეკოლოგიურ მდგომარეობას მნიშვნელოვნად  გააუმჯობესებს. შეხვედრაზე მთაწმინდის ფერდის გამწვანების პროექტის ავტორმა, მონადირეთა და მეთევზეთა ფედერაციის პრეზიდენტმა, თემურ ტყემალაძემ დეტალურად ისაუბრა  პროექტის მოსამზადებელ სამუშაოებსა და პროექტის ფარგლებში ჩატარებულ კვლევებზე. თბილისის ურბანული ტყის სივრცით-ფუნქციური და ტექნიკურ-ეკონომიკური ხედვის შესახებ პრეზენტაცია დისტანციური ზონდირებისა და გეოინფორმაციული სისტემების საკონსულტაციო ცენტრის „გეოგრაფიკი“ დირექტორმა, გიორგი გოცირიძემ წარადგინა.  პროექტი, რომელიც ფონდის „ქართუ“ დაფინანსებით ხორციელდება, ითვალისწინებს მთაწმინდის ფერდის ტყის ლანდშაფტის სრულ აღდგენა-რეაბილიტაციას და ოთხ სეზონად გადაქცევას, რაც მარადმწვანე და ფოთლოვანი ხეების, ასევე, ბუჩქოვანი და ბალახოვანი საფარის განაშენიანება-რეაბილიტაციას  ითვალისწინებს. პროექტის დასრულება,  დაახლოებით, ოთხ წელიწადში იგეგმება. სამუშაო შეხვედრაზე აღინიშნა, რომ პირველ ეტაპზე მოხდება არსებული ტერიტორიის სტატუსის ამაღლება, ერთიანი სივრცითი ხედვის შექმნა და პროექტის  ფარგლებში გათვალისწინებული სამუშაოების ეტაპობრივი განხორციელება. პროექტირება და  გეგმარება მომავალი წლის დასაწყისში დასრულდება.  თბილისის ურბანული ტყის ლანდშაფტის აღდგენისა და რეკრეაციული ინფრასტრუქტურის განვითარების პროექტის შუალედური ანგარიშის პრეზენტაცია 15 ოქტომბერს გაიმართება.  სამუშაო შეხვედრას ესწრებოდნენ გარემოს დაცვისა და სოფლის მეურნეობის მინისტრის მოადგილე იური ნოზაძე, სამინისტროსა და თბილისის მერიის წარმომადგენლები.
#

ლევან დავითაშვილმა და ნათია თურნავამ მეფრინველეობის ახალი კომპლექსი გახსნეს

ეკონომიკისა და მდგრადი განვითარების მინისტრმა, ნათია თურნავამ და გარემოს დაცვისა და სოფლის მეურნეობის მინისტრმა, ლევან დავითაშვილმა სართიჭალაში, მეფრინველეობის ახალი კომპლექსი გახსნეს. კომპანიამ „ჩირინა", ევროპის რეკონსტრუქციის და განვითრების ბანკის (EBRD) თანადაფინანსებით, მეფრინველეობის კომპლექსი „სართიჭალა 3" ააშენა. „თანამედროვე სოფლის მეურნეობის განვითარების ერთ-ერთი კარგი მაგალითია ახალი კომპლექსი, რომელიც, მეფრინველეობაზეა ორიენტირებული და მნიშვნელოვნად ზრდის ჩვენს თვითუზრუნველყოფას. ქვეყანაში ფრინველის ხორცის წარმოება, ბოლო ოთხი წლის განმავლობაში, 40%-ზე მეტით არის გაზრდილი. ჩვენი მიზანია, არა მხოლოდ ქვეყნის ფრინველის ხორცით თვითუზრუნველყოფა, არამედ ექსპორტზეც გავიდეს პროდუქცია. განსაკუთრებით ხაზგასასმელი და სასიხარულოა, რომ ასეთი მასშტაბური და მსხვილი ინვესტიცია პანდემიის პირობებში განხორციელდა“,  - განაცხადა ლევან დავითაშვილმა. ახალი კომპლექსის „სართიჭალა 3" მშენებლობა 2019 წელს დაიწყო და 2020 წელს დასრულდა. თანამედროვე ტექნოლოგიით აღჭურვილი კომპლექსის ფარგლებში, „ჩირინა" ყოველთვიურად დამატებით 600 ტონა ხორცის წარმოებას მოახდენს. გახსნის ღონისძიებას ესწრებოდნენ ქვემო ქართლის სახელმწიფო რწმუნებული შოთა რეხვიაშვილი, EBRD კავკასიის ასოცირებული დირექტორი გიორგი ახალკაცი და  გარდაბნის მუნიციპალიტეტის მერი რამაზ ბუდაღაშვილი.
#

ლევან დავითაშვილი შვედეთის სამეფოს ელჩს საქართველოში, ულრიკ ტიდესტრომს შეხვდა

გარემოს დაცვისა და სოფლის მეურნეობის მინისტრი ლევან დავითაშვილი შვედეთის სამეფოს ელჩს საქართველოში, ულრიკ ტიდესტრომს შეხვდა.  შეხვედრაზე მხარეებმა მიმდინარე პროექტები და სამომავლო თანამშრომლობის შესაძლებლობები განიხილეს. ლევან დავითაშვილმა მადლობა გადაუხადა ელჩს,  შვედეთის სამეფოს მიერ გარემოსდაცვითი მიმართულებით გაწეული მხარდაჭერისთვის და ყურადღება ქვეყანაში ნარჩენების მართვის კუთხით  მიღწეულ  მნიშვნელოვან  შედეგებზე გაამახვილა. საუბარი შეეხო  ცირკულარული ეკონომიკის, დაცული ტერიტორიების და ტყის სექტორის განვითარების ხელშეწყობის მიმართულებით თანამშრომლობის საკითხებს. გარემოს დაცვისა და სოფლის მეურნეობის სამინისტროში გამართულ შეხვედრას მინისტრის მოადგილეები: ნინო თანდილაშვილი, სოლომონ პავლიაშვილი და შესაბამისი დეპარტამენტის წარმომადგენლები ესწრებოდნენ.