#

ატმის მოსავლის აღების სეზონი სრულდება, ექსპორტის ღირებულებამ 21.3 მლნ აშშ დოლარი შეადგინა

მიმდინარე წელი ატმისა და ვაშლატამას განსაკუთრებით მაღალი მოსავლით გამოირჩეოდა. წარმოების ზრდასთან ერთად, გაიზარდა ხარისხიც. 2020 წლის 1 მაისიდან 4 ოქტომბრამდე პერიოდში, განხორციელდა 25.3 ათასი ტონა ატმისა და ვაშლატამას ექსპორტი, რომლის ღირებულებამ 21.3 მლნ აშშ დოლარი შეადგინა. აღნიშნულ პერიოდში განხორციელებული ატმისა და ვაშლატამას ექსპორტის მოცულობა 2-ჯერ აღემატება 2019 წლის ანალოგიურ პერიოდში განხორციელებული ექსპორტის მოცულობის მაჩვენებელს, ხოლო ექსპორტის ღირებულება 8.8 მლნ აშშ დოლარით გაიზარდა.  მიმდინარე წელს წარმოებული ატმისა და ვაშლატამას ექსპორტი, ძირითადად, განხორციელდა შემდეგ ქვეყნებში: რუსეთი - 16 769 ტონა, სომხეთი - 7 510 ტონა, აზერბაიჯანი - 567 ტონა. აღნიშნული ქვეყნების გარდა, ექსპორტი განხორციელდა ყაზახეთში, უკრაინაში, პოლონეთში, მოლდოვაში, სლოვენიაში, სინგაპურსა და ყატარში. მოსავლის შეუფერხებლად დაბინავებისა და რეალიზებისთვის სრული დატვირთვით მუშაობდა 22 სამაცივრო მეურნეობა.  ატმის ექსპორტის ხელშეწყობის მიზნით, საჭირო დოკუმენტაციის მომზადება და გაცემა „ერთი ფანჯრის“ პრინციპით განხორციელდა. პროცესში ჩართულები იყვნენ  ფიტოსანიტარიული და საბაჟო სამსახურების წარმომადგენლები. გარემოს დაცვისა და სოფლის მეურნეობის სამინისტროში შეიქმნა სამუშაო ჯგუფი, რომელიც აქტიურად მუშაობდა ინფორმაციის მოპოვების, სისტემატიზაციის, ფერმერებისა და ატმის რეალიზატორების დაკავშირების მიმართულებებით.
#

ლევან დავითაშვილი: „ჩვენ გვჭირდება აგრარული სფეროს პროფესიონალები. ამიტომ პროექტები, რომლებიც პოპულარიზაციას უწევს ახალგარზრდებში სოფლის მეურნეობის მიმართულებებს, განსაკუთრებით მნიშვნელოვანია”

გარემოს დაცვისა და სოფლის მეურნეობის მინისტრმა, ლევან დავითაშვილმა,  მინისტრის პირველ მოადგილესთან, გიორგი ხანიშვილთან, საქართველოში აშშ-ის სოფლის მეურნეობის დეპარტამენტის წარმომადგენელთან, დემნა ძირკვაძესთან  და ორგანიზაციის „მომავლის ფერმერი“ თავმჯდომარესთან, რუსუდან გიგაშვილთან ერთად, სოფლის მეურნეობის პოპულარიზაციის მიზნით გამართული კონკურსის  გამარჯვებულები დააჯილდოვა. „სოფლის მეურნეობის ეფექტიანად და სწორად განვითარებისთვის, თანამედროვე ცოდნა აუცილებელია. ჩვენ გვჭირდება აგრარული სფეროს ახალგაზრდა პროფესიონალები, ამიტომ პროექტები, რომლებიც პოპულარიზაციას უწევს ახალგარზრდებში სოფლის მეურნეობის მიმართულებებს, განსაკუთრებით დასაფასებელია. აღსანიშნავია, სამინისტროსა და  აშშ-ის სოფლის მეურნეობის დეპარტამენტის მჭიდრო თანამშრომლობის მნიშვნელობა, რომლის ფარგლებში არაერთი წარმატებული პროექტი განხორციელდა. მათ შორის არის ეს ინიციატივაც, რომელიც ახალგაზრდების სოფლის მეურნეობის დარგით დაინტერესებისა და წახალისების მიზნით, კონკურსის ჩატარებას გულისხმობს“, - განაცხადა ლევან დავითაშვილმა. კონკურსი, რომელიც  მიზნად ისახავს სოფლის მეურნეობის შესახებ ცნობიერების ამაღლებასა და დარგით მომავალი თაობის დაინტერესებას, ორგანიზაციის „მომავლის ფერმერი“ ინიციატივით გაიმართა. კონკურსის მხარდამჭერები არიან  საქართველოს გარემოს დაცვისა და სოფლის მეურნეობის სამინისტრო, საქართველოს განათლების, მეცნიერების, კულტურისა და სპორტის სამინისტრო, აშშ-ის სოფლის მეურნეობის დეპარტამენტი (USDA) და კალიფორნიის ფრეზნოს უნივერსიტეტი. როგორც „მომავლის ფერმერის“ თავმჯდომარემ, რუსუდან გიგაშვილმა აღნიშნა, კონკურსში, ქვეყნის მასშტაბით მდებარე ათეულობით სკოლა ჩაერთო.  მონაწილეებმა წარადგინეს ინფორმაცია საკუთარი მეურნეობების და საკარმიდამო ბოსტნების, შერჩეული სათესლე/სანერგე მასალების, ჩატარებული აგროტექნიკური სამუშაოებისა და მიღებული მოსავლის შესახებ.  კონკურსი, სკოლების მეურნეობებისა და საკარმიდამო ბოსტნების ადგილზე ნახვასა და შეფასებას  ითვალისწინებდა, თუმცა  კორონავირუსის პანდემიის გამო დაწესებული რეგულაციების გათვალისწინებით,  პროცედურები  ონლაინ რეჟიმში განხორციელდა.   საკონკურსო კომისიამ გამარჯვებულები კალიფორნიის ფრეზნოს უნივერსიტეტის მიერ სასკოლო კონკურსების შეფასებისთვის შემუშავებული კრიტერიტერიუმების მიხედვით გამოავლინა.  კონკურსის პირველ ეტაპზე შეირჩა 37 მონაწილე, საიდანაც მეორე ეტაპზე გადავიდა 10. ქართველი და ამერიკელი სპეციალისტებით დაკომპლექტებულმა კომპეტენტურმა კომისიამ კი, სამი გამარჯვებული გამოავლინა შემდეგ ნომინაციაში:  გუნდური ნამუშევარი - მარნეულის მუნიციპალიტეტის მარადისის საჯარო სკოლა, ეკოკლუბი „მაი“ - მე-9, მე-10, მე-11 კლასის 9 მოსწავლე.  წარმოებული კულტურები:  სალათის ფურცლები, ბროკოლი.  მრავალფეროვანი ბოსტანი - გორის მუნიციპალიტეტი, სოფელ თორტიზას საჯარო სკოლის მე-10 კლასის მოსწავლე გიორგი სირბილაძე. წარმოებული კულტურები: პომიდორი, ბულგარული წიწაკა, ბადრიჯანი, კიტრი, ყაბაყი, გოგრა, კომბოსტო.  ყველაზე მოტივირებული - ჩოხატაურის მუნიციპალიტეტი, სოფელ იანეულის საჯარო სკოლის მე-9 კლასის მოსწავლე ლაშა-გიორგი კუჭაშვილი. წარმოებული კულტურა: მარწყვი.  გამარჯვებულებს პლანშეტები, მაღაზიის „ბიბლუსი“ ვაუჩერები, სიგელები და სერტიფიკატები გადაეცათ. 
#

სოლომონ პავლიაშვილი საქართველოს მეცნიერებათა ეროვნული აკადემიის წევრებს შეხვდა

გარემოს დაცვის და სოფლის მეურნეობის მინისტრის მოადგილე, სოლომონ პავლიაშვილი საქართველოს მეცნიერებათა ეროვნული აკადემიის წევრებს შეხვდა. მეცნიერებათა ეროვნული აკადემიის პრეზიდიუმის სხდომათა დარბაზში გამართული ღონისძიების მიზანი საქართველოში ცირკულარულ ეკონომიკაზე გადასვლის დაჩქარებისა და სისტემის დროულად დანერგვის საჭიროების დაინტერესებული მხარეებისთვის გაცნობა იყო. როგორც მინისტრის მოადგილემ შეხვედრაზე აღნიშნა, ცირკულარული ეკონომიკის მიდგომების გამოყენება ხელს შეუწყობს ქვეყანაში არსებული ნარჩენების, საშიში ნივთიერებების წარმოების და მათი ზემოქმედების შემცირებასა და კლიმატური ცვლილებების შერბილებას. „დღევანდელი ეკონომიკური სისტემა, ე.წ., წრფივი ეკონომიკა „აიღე-მოიხმარე-გადაყარე“ პრინციპით მოქმედებს და რესურსებს არაეფექტიანად მოიხმარს. შედეგად, რესურსების დეფიციტისა და გარემოს დაბინძურების საკითხები დღითიდღე მწვავდება. ცირკულარული ეკონომიკა წრფივი ეკონომიკის (წარმოება, მოხმარება, ნარჩენების გადაყრა) ალტერნატივაა, სადაც რესურსებს შეძლებისდაგვარად დიდხანს ვიყენებთ, სარგებლობისას მათი ღირებულების მაქსიმუმს მოვიხმართ, ხოლო შემდეგ, ექსპლუატაციის ყოველი ციკლის ბოლოს პროდუქტებსა თუ ნედლეულს აღვადგენთ და ახალ სიცოცხლეს შევძენთ”,- განაცხადა  შეხვედრაზე სოლომონ პავლიაშვილმა.
#

ლევან დავითაშვილი: „USAID ერთად, თხილის სექტორის რეაბილიტაციის დახმარების პროექტის ფარგლებში, მნიშვნელოვანი ინფრასტრუქტურული პროექტები განხორციელდა”

გარემოს დაცვისა და სოფლის მეურნეობის მინისტრი ლევან დავითაშვილი და აშშ-ის ელჩი საქართველოში კელი დეგნანი ლაგოდეხში, თხილის გადამმუშავებელ საწარმოში იმყოფებოდნენ.  ახალი საწარმო სახელმწიფოს და USAID-ის საქართველოს თხილის სექტორის განვითარების პროექტის  (G-HIP)  მხარდაჭერით შეიქმნა. თანამედროვე სტანდარტებით აღჭურვილი შპს „კახეთის თხილი“ თხილის სარჩევს, საშრობსა და სასაწყობო  ცენტრს მოიცავს.  „ჩვენ, USAID ერთად, რამდენიმე წელია ვახორციელებთ თხილის სექტორის რეაბილიტაციის დახმარების პროექტს, რომლის ფარგლებშიც მნიშვნელოვანი ინფრასტრუქტურული პროექტები განხორციელდა. ლაგოდეხის მუნიციპალიტეტში გახსნილი  თხილის საშრობი ძალიან მნიშვნელოვანია თხილის ღირებულებათა ჯაჭვის განვითარებისთვის. ამ პროექტის განხორციელებას გავაგრძელებთ მომავალ წელსაც, რათა ფერმერებმა შეძლონ თავიანთი მოსავლის სწორად დაბინავება, გაშრობა, მაღალი ხარისხის პროდუქტის მაღალ ფასში რეალიზება და მიიღონ მეტი შემოსავლი", - განაცხადა ლევან დავითაშვილმა. „ახალი საწარმო  რიგით მეექვსეა, რომელიც USAID-ის, საქართველოს მთავრობისა და თხილის მწარმოებელთა ასოციაციის მხარდაჭერით ამოქმედდა. საწარმო, რომელიც რეგიონის 200-ზე მეტ ფერმერს მოემსახურება, გაზრდის ფერმერების შემოსავალს,  გააუმჯობესებს მათი ოჯახების კეთილდღეობას და  ხელს შეუწყობს ბაზრების დივერსიფიკაციას. ამერიკის შეერთებული შტატები და USAID ამაყია, რომ ქართველ პარტნიორებთან ერთად ახორციელებს აღნიშნულ პროექტს”, - განაცხადა კელი დეგნანმა. საწარმოში, ჯამურად 250,000 აშშ დოლარზე მეტი  ინვესტიცია განხორციელდა. მათ შორის 275,000 ლარი სახელმწიფო გრანტია, 277,000 ლარი შეღავათიანი აგროკრედიტი, 50,000 აშშ დოლარი USAID-ის საქართველოს თხილის სექტორის განვითარების პროექტის  (G-HIP) ფარგლებში გაცემული გრანტი, ხოლო დანარჩენი თანხა ბენეფიციარის ინვესტიციაა.  საწარმოში  წლიურად 1,000 ტონა თხილის გაშრობა და 500 ტონის შენახვაა შესაძლებელი.  შეიქმნა 16 ახალი სამუშაო ადგილი; საწარმოს მომსახურებით 200 ფერმერზე მეტი ისარგებლებს.   ახალი საწარმოს გახსნას, ლევან დავითაშვილთან და კელი დეგნანთან ერთად, კახეთის სახელმწიფო რწმუნებულის მოვალეობის შემსრულებელი ირაკლი შიოშვილი და სოფლის განვითარების სააგენტოს ხელმძღვანელი ილია თამარაშვილი ესწრებოდნენ.
#

გიორგი ხანიშვილი შპს „ეფკოს“ ლურჯი მოცვის საინვესტიციო პროექტის პრეზენტაციას დაესწრო

ეკონომიკისა და მდგრადი განვითარების მინისტრი ნათია თურნავა და გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი შპს „ეფკოს“ ლურჯი მოცვის საინვესტიციო პროექტის პრეზენტაციას დაესწრნენ.  მისასალმებელ სიტყვაში, გიორგი ხანიშვილმა ვრცლად ისაუბრა ქვეყანაში სოფლის მეურნეობის განვითარების ხელშემწყობი პროექტების შესახებ და ყურადღება პროექტის „დანერგე მომავალი“ ფარგლებში, კენკროვანი კულტურების დაფინანსების ქვეკომპონენტის მნიშვნელობაზე გაამახვილა.  „რიცხვები ეფექტიანობის კარგი მზომელია. დღეისათვის, ლურჯი მოცვი, საექსპორტო პოტენციალის თვალსაზრისით, ერთ-ერთი ლიდერი პროდუქტია. მოგეხსენებათ, მუდმივად ვმუშაობთ საექსპორტო ბაზრების დივესიფიკაციის მიმართულებით. 2019 წელს, 664 ტონა ლურჯი მოცვის ექსპორტი განხორციელდა, რაც შთამბეჭდავი მონაცემია. მხოლოდ ლურჯი მოცვის გასაშენებლად, სახელმწიფომ 14 მლნ ლარის ინვესტიცია განახორციელა, რაც რამდენიმე მილიონი დოლარის შემოსავალია ქართველი ფერმერებისთვის“,- განაცხადა გიორგი ხანიშვილმა. მნიშვნელოვანია, რომ შპს „ეფკოს“ 32 ჰა ლურჯი მოცვის პლანტაცია, რომელიც გურიაში, დაბა ლაითურში მდებარეობს, 2016 წელს, სს „საპარტნიორო ფონდის“ ინვესტიციის შედეგად გაფართოვდა.შპს „ეფკოს“ მმართველი, ქართული მულტიპროფილური საინვესტიციო კომპანია „ფორსაიტ ინვესტმენტ გრუპია“, რომლის მიზანსაც რეგიონში ერთ-ერთი ყველაზე მსხვილი ლურჯი მოცვის მწარმოებელი აგროკომპანიის შექმნა წარმოადგენს და რომელიც, მომავალი ხუთი წლის განმავლობაში, 9 მლნ დოლარის ინვესტირებას გეგმავს. ღონისძიებას, „საპარტნიორო ფონდის“ აღმასრულებელი დირექტორი დავით საგანელიძე, კომპანიის „ფორსაიტ ინვესტმენტ გრუპი“ აღმასრულებელი დირექტორი გია მორჩილაძე, შესაბამისი ორგანიზაციების წარმომადგენლები და დაინტერესებული პირები ესწრებოდნენ.
#

სახელმწიფოს და USAID-ის სოფლის მეურნეობის პროგრამის მხარდაჭერით, ყვარელში ახალი სამაცივრო მეურნეობა გაიხსნა

გარემოს დაცვისა და სოფლის მეურნეობის მინისტრი ლევან დავითაშვილი და აშშ-ის ელჩი საქართველოში, კელი დეგნანი, ყვარელში, სასოფლო-სამეურნეო კოოპერატივის  „აგროსთორი“ სამაცივრო მეურნეობის გახსნის ღონისძიებას დაესწრნენ. თანამედროვე სტანდარტებით აღჭურვილი სამაცივრო მეურნეობა სახელმწიფოს და USAID-ის სოფლის მეურნეობის  პროგრამის მხარდაჭერით  ამოქმედდა.  „ჩვენ რეგულარული, მჭიდრო და ეფექტიანი თანამშრომლობა გვაკავშირებს ამერიკის შეერთებულ შტატებთან სოფლის მეურნეობის განვითარების მიმართულებით. ბოლო წლების განმავლობაში, ქვეყანაში სოფლის მეურნეობის განვითარება პრიორიტეტული გახდა. შესაბამისად, სახელმწიფო ძალიან ბევრს აკეთებს დარგის მოდერნიზაციისთვის. ამ ფონზე, ჩვენს პარტნიორებთან თანამშრომლობა კიდევ უფრო ხელშესახებია და რეალურ შედეგებს იძლევა. გაჩნდა მრავალი შესაძლებლობა,  რადგან, ტექნიკური დახმარების კუთხით, ამერიკელი მეგობრები და პარტნიორები მხარში გვიდგანან. პარალელურად, სახელმწიფო ფინანსურად ეხმარება კარგ ინიციატივებს; საბოლოოდ კი, დამატებითი ღირებულება იქმნება გადამუშავებაში“, - განაცხადა გარემოს დაცვისა და სოფლის მეურნეობის მინისტრმა, ლევან დავითაშვილმა. როგორც აშშ-ის ელჩმა კელი დეგნანმა აღნიშნა, სოფლის მეურნეობის მხარდაჭერა USAID-ის საქართველოში საქმიანობის უმნიშვნელოვანესი მიმართულებაა.   „ახალი სამაცივრო მეურნეობა დაეხმარება ფერმერებს მეტი შემოსავლის მიღებაში და  ხელს შეუწყობს რეგიონში ახალი სამუშაო ადგილების შექმნას. სასიამოვნოა, ისეთ ინიციატივის განხორციელებაში ჩართულობა, რომელიც საშუალებას აძლევს ადგილობრივ ფერმერებს შეინახონ მალფუჭებადი პროდუქტი, გააფართოონ სარეალიზაციო ბაზრები, გაზარდონ პროდუქტის ხარისხი და ფასი.  აღნიშნული  სამაცივრო მეურნეობა  კერძო სექტორის, USAID-ისა და საქართველოს მთავრობის თანამშრომლობის კიდევ ერთი ნათელი მაგალითია“, - განაცხადა აშშ-ის ელჩმა. პროგრამის „დანერგე მომავალი“  ფარგლებში, კოოპერატივმა „აგროსთორი“ ყვარლის მუნიციპალიტეტში  3 ჰექტარზე გააშენა  ჟოლოს ბაღი. სააგენტოს თანადაფინანსებამ  30,000 ლარი შეადგინა. კოოპერატივმა „შეღავათიანი აგროკრედიტითაც“ ისარგებლა და 390,000 ლარი მიიღო. USAID-ის სოფლის მეურნეობის პროგრამასთან კონსულტაციით,  კოოპერატივმა ჟოლოს ახალი სახეობა „Tulamagic“ გააშენა. ამ სახეობის ჟოლო ადვილად ტრანსპორტირებადია და შენახვის ხანგრძლივობა მეტი  აქვს, შესაბამისად, ის საუკეთესოა საექსპორტოდ. კოოპერატივი მუდმივად 6,   სეზონურად კი, 150-მდე ადგილობრივს დაასაქმებს.  კოოპერატივმა USAID-ის სოფლის მეურნეობის პროგრამის გრანტი 72,436 აშშ დოლარი, ცივი შენახვის ორი სათავსოსა და წინასწარი გაგრილების ოთახის აღჭურვილობის შესაძენად გამოიყენა.  300 მ2 მიწისა და 180 მ2  ფართის შენობის შეძენა და შესაბამისად მოწყობა კოოპერატივმა საკუთარი სახსრებით მოახდინა. 
#

ლევან დავითაშვილი პურის მწარმოებლებს შეხვდა

გარემოს დაცვისა და სოფლის მეურნეობის მინისტრი ლევან დავითაშვილი პურ-პროდუქტების და ხორბლის მწარმოებლებს შეხვდა. „პანდემიის ფონზე მსოფლიოში არსებული ეკონომიკური ვითარების გათვალისწინებით, ჩვენ რეგულარული შეხვედრები გვაქვს ბიზნესსექტორის წარმომადგენლებთან. მორიგი  სამუშაო შეხვედრა გვქონდა ხორბლის და პურის მწარმოებლებთან. პურზე ფასის მომატების საფუძველი არ გვაქვს. ჩვენ ვახორციელებთ ხორბლის მარაგების მუდმივ მონიტორინგს. არანაირი შეფერხება არც პურის და არც ფქვილის მიწოდებაში არ გვექნება; ფასები შენარჩუნდება“, - განაცხადა მინისტრმა. ლევან დავითაშვილმა შეხვედრაზე ფქვილსა და პურზე, როგორც ყველაზე მოთხოვნად პროდუქტებზე, სტაბილური ფასის შენარჩუნების აუცილებლობაზე და ბიზნესსექტორის მხრიდან, არსებულ ვითარებაში, პასუხსმგებლიანი  გადაწყვეტილებების მიღების მნიშვნელობაზე ისაუბრა. „ვფიქრობ, ჩვენი თანამშრომლობა კონსტრუქციული, გამჭვირვალე და ეფექტიანია. ჩვენ უნდა შევძლოთ სტაბილურობის და, ამავე დროს, ბიზნესის განვითარებისთვის პოზიტიური გარემოს შენარჩუნება“, - განაცხადა ლევან დავითაშვილმა.  როგორც ხორბლისა და ფქვილის მწარმოებელთა ასოციაციის აღმასრულებელმა დირექტორმა, ლევან სილაგავამ აღნიშნა, სოციალური მიმართულება შეხვედრის მონაწილე ყველა კომპანიისთვის ძალიან მნიშვნელოვანია; გარკვეული მარაგების ხარჯზე, რომელიც ქვეყანაში არსებობს ფქვილის ბაზარზე, სტაბილიზაცია იქნება.  პურპროდუქტების ასოციაციის თავმჯდომარის, მალხაზ დოლიძის განცხადებით, მსოფლიო ბაზარზე ხორბლის ფასები იცვლება, რამაც გარკვეული დაძაბულობა გამოიწვია, თუმცა ქვეყანაში გარკვეული მარაგები არსებობს, ამიტომ  სტაბილური ფასი უნდა შენარჩუნდეს.  ხორბლის, ფქვილისა და პურის სექტორის წარმომადგენლებთან შეხვედრას გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი და შესაბამისი დეპარტამენტების წარმომადგენლები ესწრებოდნენ.