#

ლევან დავითაშვილი: „მიმდინარე წლის სექტემბრიდან, სასოფლო-სამეურნეო მექანიზაციის თანადაფინანსების პროგრამა იწყება“

„პრემიერ-მინისტრის ინიციატივით, სოფლის მეურნეობის განვითარების 10 წლიანი პროგრამის ფარგლებში, მოსახლეობას შევპირდით მექანიზაციის თანადაფინანსებას. ეს არის ყველაზე მეტად რაც სჭირდება ჩვენს მოსახლეობას, რომელიც სოფლად ცხოვრობს და სოფლის მეურნეობით არის დაკავებული.  ეს არის ის ძირითადი სურვილი და სათხოვარი, რომელიც ჩვენს მოქალაქეებს ჰქონდათ რეგიონებში ჩვენი ვიზიტებისას. შესაბამისად, ჩვენ გადავწყვიტეთ, რომ პროგრამა, რომელიც გვქონდა წინა წლებში, მაგრამ ძალიან შეზღუდული ბიუჯეტით, მასშტაბურად დავაფინანსოთ მიმდინარე წელს. უკვე სექტემბრიდან, ჩვენ შეგვიძლია მივიღოთ განაცხადები ამ პროგრამაში მონაწილეებისგან.ჩვენ გვექნება საგრანტო თანადაფინანსება, შესაბამისად, ნაწილი ტექნიკის ღირებულების იქნება გრანტის სახით, ხოლო დანარჩენი ნაწილი შეღავათიანი, საკრედიტო ან სალიზინგო რესურსით დაფინანსებული. ჩვენს მოსახლეობას, რომლსაც ფინანსური რესურსები არ ჰყოფნიდა სასოფლო-სამეურნეო მექანიზაციის შესაძენად, მნიშვნელოვან შეღავათს მივცემთ.  ჩვენ გვექნება როგორც მცირე მექანიზაციის დაფინანსების საშუალება - 20,000 ლარამდე ტექნიკის,  საშუალო თანხის მექანიზაციის - ესაა 20, 000 ლარიდან   100, 000 ლარამდე  ტექნიკა, ასევე მსხვილი ტექნიკის დაფინანსება 100,000 ლარზე მეტის ღირებულების შემთხვევაში; აქ შედის როგორც გამწევი ტექნიკა, ისე იმპლემენტები, ფაქტობრივად ყველა ის საშუალება,  რომელიც ჩვენს მოსახლეობას სჭირდება სასოფლო-სამეურნეო საქმიანობისთვის“, - განაცხადა ლევან დავითაშვილმა დღეს გამართულ მთავრობის სხდომაზე.  სასოფლო-სამეურნეო მექანიზაციის პროგრამის ღირებულება 50 მილიონი ლარია. პროგრამას სოფლის განვითარების სააგენტო  განახორციელებს. პროგრამით დადგენილი პირობით, შესასყიდი სასოფლო-სამეურნეო ტექნიკა უნდა იყოს ახალი. თანადაფინანსების მოცულობა, ჯამურად, ერთ ბენეფიციარზე განისაზღვარა შემდეგი პირობით: იმ შემთხვევაში, თუ შესასყიდი სასოფლო-სამეურნეო ტექნიკის ღირებულება შეადგენს 20,000 ლარამდე თანხას, თანადაფინანსება შეადგენს სასოფლო-სამეურნეო ტექნიკის ღირებულების  35%-ს,  სასოფლო-სამეურნეო ტექნიკის 20, 000 ლარიდან 100, 000 ლარამდე ღირებულების შემთხვევაში თანადაფინანსება  ასევე  შეადგენს ღირებულების 35% - ს, ხოლო  თუ შესასყიდი სასოფლო-სამეურნეო ტექნიკის ღირებულება შეადგენს არანაკლებ 100,000 ლარზე მეტს,  თანადაფინანსება  განისაზღვრა სასოფლო-სამეურნეო ტექნიკის ღირებულების  30%.-ით ამავე პირობებით დაფინანსდება 2021 წლის 31 დეკემბრის ჩათვლით შპს „სოფლის მეურნეობის ლოჯისტიკისა და სერვისების კომპანიისგან“ სასოფლო-სამეურნეო ტექნიკის, მათ შორის, კომბაინების შესყიდვა.  პროგრამის ფარგლებში განაცხადები მიიღება ელექტრონული ფორმით. პოტენციური ბენეფიციარების განაცხადების განხილვა განხორციელდება წარმოდგენილი განაცხადების რიგითობის შესაბამისად.
#

პირველი ეროვნული აგრარული ოლიმპიადის გამარჯვებულები გამოვლინდა

საქართველოში პირველი ეროვნული აგრარული ოლიმპიადა დასრულდა. აგროოლიმპიადის გამარჯვებულები გარემოს დაცვისა და სოფლის მეურნეობის მინისტრმა, ლევან დავითაშვილმა და გაეროს სურსათისა და სოფლის მეურნეობის ორგანიზაციის (FAO) წარმომადგენელმა საქართველოში, მამუკა მესხმა დააჯილდოვეს. „საქართველოში პირველად ჩატარდა აგრარული ოლიმპიადა, რომელშიც   სპეციალისტები, ფერმერები, სტუდენტები და სკოლის მოსწავლეები მონაწილეობდნენ. ოლიმპიადის ფარგლებში, მომზადდა საკმაოდ მაღალი დონის ტესტები. შეგვიძლია ვთქვათ, რომ პირველი აგრარული ოლომპიადა შედგა და ძალიან მნიშვნელოვან ტრადიციას ჩაეყარა საფუძველი. ოლიმპიადამ დასახული ამოცანები შეასრულა. საზოგადოების მხრიდან დაინტერესება იყო საკმაოდ მაღალი. სამომავლოდ, აგროოლიმპიადა კიდევ უფრო მეტ ადამიანს გაუჩენს ინტერესს როგორც  სასოფლო-სამურნეო დარგის, ასევე, ზოგადად, სოფლის განვითარების მიმართულებით. დარწმუნებული ვარ,  მომავლ წლებში,  აგრარულ ოლიმპიადაში უფრო მეტი მონაწილე ჩაერთვება, გვეყოლება მეტი გამარჯვებული, რაც აგრარული განათლების პოპულარიზაციას და სოფლის მეურნეობის განვითარებას შეუწყობს ხელს“, - აღნიშნა ლევან დავითაშვილმა. აგრარული ოლიმპიადის სამიზნე აუდიტორიას  4 კატეგორია -  სპეციალისტი, სტუდენტი, ფერმერი და მოსწავლე წარმოადგენდა. საკონკურსო თემატიკა კი,  7 მიმართულებას - აგრონომია, ვეტერინარია, ღვინის ტექნოლოგია, სასურსათო ტექნოლოგია, მექანიზაცია, სატყეო საქმე  და მოსწავლეებისთვის გაერთიანებული საკითხები (სოფლის მეურნეობა, ბიომრავალფეროვნება, გარემოს დაცვა და ეკოლოგია) მოიცავდა.ელექტრონულ პლატფორმაზე, ოლიმპიადაში მონაწილეობის  755 მსურველი დარეგისტრირდა.  ორ ეტაპად ჩატარებული ტესტირების შემდგომ, პირველი ეროვნული აგრარული ოლიმპიადის 37 გამარჯვებული გამოვლინდა.  „დავაჯილოდოვეთ პირველი ეროვნული აგრარული ოლიმპიადის გამარჯვებულები.  განსაკუთრებით მინდა გამოვყო სკოლის მოსწავლეები - ისინი არიან  ჩვენი მომავალი თაობა. სკოლის მოსწავლეები, რომლებსაც ჯერ არ შეურჩევიათ  მომავალი პროფესია, უკვე ინტერესდებიან სოფლის მეურნეობის დარგით, აგრარული საკითხებით და ერთვებიან კონკურსში. ვფიქრობ, ეს ოლიმპიადის ერთ-ერთი გამარჯვებაა“, - აღნიშნა გაეროს სურსათისა და სოფლის მეურნეობის ორგანიზაციის (FAO) წარმომადგენელმა საქართველოში, მამუკა მესხმა.პირველი აგრარული ოლიმპიადის გამარჯვებულთა დაჯილდოების ცერემონიას გარემოს დაცვისა და სოფლის მეურნეობის მინისტრის მოადგილეები, სამინისტროს სისტემაში შემავალი უწყებაების ხელმძღვანელები, ოლიმპიადის პარტნიორი და მხარდამჭრი ორგანიზაციების წარმომადგენლები ესწრებოდნენ. აგროოლიმპიადა საქართველოს გარემოს დაცვის და სოფლის მეურნეობის სამინისტროს პატრონაჟით და გაეროს სურსათისა და სოფლის მეურნეობის ორგანიზაცის (FAO), ავსტრიის განვითარების თანამშრომლობის და სოფლის მეურნეობის განვითარების ასოციაციის ორგანიზებით ჩატარდა. პროექტის პარტნიორები იყვნენ  USAID-ის სოფლის მეურნეობის პროგრამა, პროექტი GRETA| მწვანე ეკონომიკა: მდგრადი სამთო ტურიზმი და ორგანული სოფლის მეურნეობა, კავკასიის გარემოსდაცვითი არასამთავრობო ორგანიზაციების ქსელი (CENN) და გარემოსდაცვითი ინფორმაციის და განათლების ცენტრი (EIEC).
#

სოლომონ პავლიაშვილმა „ევროკავშირი გარემოსათვის“ პროექტის ფარგლებში გამართულ სამუშაო შეხვედრაში მიიღო მონაწილეობა

გარემოს დაცვისა და სოფლის მეურნეობის მინისტრის მოადგილემ, სოლომონ პავლიაშვილმა „ევროკავშირი გარემოსათვის“ პროექტის ფარგლებში გამართულ  სამუშაო შეხვედრაში მიიღო მონაწილეობა.შეხვედრაზე, რომელსაც სხვადასხვა სამთავრობო უწყების 25 წარმომადგენელი ესწრებოდა, დაინტერესებულ მხარეთა ჩართულობით, ნარჩენების მართვის ეროვნული სტრატეგიისა და სამოქმედო გეგმის (2016-2020) განხორციელების გადასინჯვაზე, პრიორიტეტებისა და საჭიროებების იდენტიფიცირებისა და ნარჩენების ახალი (2021-2026) სამოქმედო გეგმის შემუშავების საკითხებზე იმსჯელეს. „ჩვენი ქვეყნისათვის პრიორიტეტული იქნება ცირკულარული ეკონომიკის მოდელით ნარჩენების მართვის ახალი ეროვნული გეგმის  შემუშავება“, - განაცხადა სოლომონ პავლიაშვილმა მისასალმებელი სიტყვით გამოსვლისას.გაერთიანებული ერების გარემოსდაცვითი ორგანიზაციის (UNEP) ევროპის ოფისის ხელმძღვანელმა, ბრუნო პოზიმ, ქართული მხარის იმ ძალისხმევაზე ისაუბრა, რომლის საფუძველზეც ნარჩენების  მართვის ადგილობრივი სისტემა ევროკავშირის დირექტივების მოთხოვნებს უახლოვდება.  „გაერთიანებული ერების გარემოსდაცვითი ორგანიზაცია (UNEP) გააგრძელებს თანამშრომლობას საქართველოს გარემოს დაცვის და სოფლის მეურნეობის სამინისტროსთან, რათა საუკეთესო საერთაშორისო პრაქტიკის გამოყენებით, ერთობლივად შემუშავდეს ნარჩენების ეროვნული სამოქმედო გეგმა (2022-2026 წწ.) “,  - აღნიშნა ბრუნო პოზიმ.პროექტი „ევროკავშირი გარემოსათვის” (EU4Environment) რეგიონულ ინიციატივას წარმოადგენს. საქართველოში პროექტი ხორციელდება გაეროს გარემოსდაცვითი პროგრამის (UNEP) მიერ, აღმასრულებელი ორგანიზაცია კავკასიის რეგიონული გარემოსდაცვითი ცენტრია (REC Caucasus).
#

ECOserve -ის კონკურსი გარემოსდაცვითი კამპანიის განხორციელებისთვის

გერმანიის საერთაშორისო თანამშრომლობის საზოგადოების (GIZ) პროექტი „ბუნებრივი რესურსების მართვა და ეკოსისტემური მომსახურებებით უზრუნველყოფა სოფლად მდგრადი განვითარებისთვის სამხრეთ კავკასიაში“ (ECOserve) აცხადებს კონკურსს არასამთავრობო ორგანიზაციებისთვის ტყის მდგრადი მართვის (SFM), მათ შორის ენერგოეფექტურობის/ალტერნატიული ენერგიის (EE/AE) შესახებ ცნობიერების ასამაღლებლად.  კამპანია გულისხმობს  ახალგაზრდების ცნობიერების ამაღლებისა და განათლებისთვის, მათ ჩართულობას სხვადასხვა აქტიობაში როგორც ეროვნულ დონეზე, ასევე, ადგილობრივად, ახმეტის მუნიციპალიტეტში.კონკურსის მიზანია  ახალგაზრდებისთვის (ასაკობრივი ჯგუფი: 14-29 წელი), გენდერული ასპექტის გათვალისწინებით, მოახდინოს ტყის მდგრად მართვასა და ენერგოეფექტურობა/ალტერნატიული ენერგიაზე ცნობიერების ასამაღლებელი ღონისძიებების იდენტიფიცირება და იმპლემენტაცია.საკონკურსო განაცხადში წარმოდგენილი უნდა იყოს ინოვაციური, კრეატიული იდეები, თუ როგორ უნდა მოხდეს ახალგაზრდების ინფორმირება და განათლება პრიორიტეტულ საკითხებზე: • ტყის ღირებულება (მათ შორის ეკოსისტემური სერვისები, კლიმატის ცვლილების შრბილება და ადაპტაცია)• ენერგოეფექტურობა (მათ შორის შეშის გამოყენება და თბოიზოლაცია)არასამთავრობო ორგანიზაციებმა  განაცხადები უნდა წარმოადგინონ ინგლისურ ენაზე და გააგზავნონ ელ.ფოსტაზე: ECOserve@giz.de წარდგენილი განაცხადი უნდა მოიცავდეს:• შესავალი/არასამთავრობო ორგანიზაციის აღწერა (ნახევარი გვერდი);• კანპანიის შინაარსი, მათ შორის ძირითადი გზავნილები  და საკომუნიკაციო საშუალებები (2 გვერდი);• დაგეგმილი აქტივობების განრიგი (1 გვერდი);• დეტალური ბიუჯეტი (1 გვერდი);• პასუხები კითხვებზე (შეკითხვები იხილეთ დანართში).არასამთავრობო ორგანიზაციებს მიეწოდებათ დოკუმენტები: გარემოსდაცვითი KAP კვლევა - ცოდნა, დამოკიდებულება და პრაქტიკა (KAP), რომელიც ეხება ბუნებრივი რესურსების მართვას და ეკოსისტემური მომსახურებების დაცვას  მდგრადი სოფლის განვითარებისათვის საქართველოში (1) და სატყეო სექტორის საკომუნიკაციო სტრატეგია და სამოქმედო გეგმა (2). აღნიშნული დოკუმენტები შეგიძლიათ გამოიყენოთ სახელმძღვანელოდ საპროექტო განაცხადების მომზადებისთვის. კონკურსში მონაწილეობა შეუძლია ნებისმიერ არასამთავრობო ორგანიზაციას,  გამოცდილების  მიუხედავად.პროექტის  ბიუჯეტი 100 000  ლარამდეა.პროექტის განხორციელების პერიოდი შეადგენს 10 კვირას (2021 წლის 6 სექტემბრიდან 15 ნოემბრამდე).კონკურსში მონაწილობის მსურველთა განაცხადების მიღების ბოლო ვადაა 2021 წლის  9 აგვისტო. საკონკურსო განაცხადებს შეაფასებს  ჟიური, რომელის შემადგენლობაში იქნებიან გერმანიის საერთაშორისო თანამშრომლობის საზოგადოების (GIZ), გარემოს დაცვისა და სოფლის მეურნეობის სამინისტროს (MEPA), სურსათის ეროვნული სააგენტოს (NFA), სოფლის განვითარების სააგენტოს (RDA) და გარემოსდაცვითი ინფორმაციისა და განათლების ცენტრის (EIEC) წარმომადგენლები.კონკურსის შედეგები ცნობილი გახდება  ა/წ 16 აგვისტოს. კონკურსის შესახებ დამატებითი ინფორმაციისთვის მიმართეთ მარიამ თათარაშვილს.ტელ.: 599 961 121;ელ.ფოსტა: mariam.tatarashvili@giz.de 
#

ლევან დავითაშვილი: „წელს მარცვლეული კულტურების კარგი მოსავალია როგორც ხარისხობრივი, ისე რაოდენობრივი თვალსაზრისით“

შიდა ქართლის რეგიონში ხორბლის აღების პროცესი აქტიურ ფაზაშია.  გარემოს დაცვისა და სოფლის მეურნეობის მინისტრი ლევან დავითაშვილი, შიდა ქართლის სახელმწიფო რწმუნებულთან, ვალერიან მჭედლიძესთან ერთად, გორის მუნიციპალიტეტის სოფელ შინდისში, კომპანიის „სილქ უოთერ გრუპი“  ფართობზე ხორბლის აღების პროცესს - ალოობას დაესწრო. „ალოობა აქტიურ ფაზაშია.  მოსავლის აღება ერთდროულად იწყება კახეთისა და ქვემო ქართლის რეგიონებში, რაც გარკვეულ სირთულეს ქმნის მოსავლის აგროვადების დაცვით აღებისა და დაბინავების კუთხით; თუმცა, შეიძლება ითქვას, რომ პიკური პერიოდი უკვე გავლილია, ხოლო მოსავლის დიდი ნაწილი უკვე დაბინავებული. წელს მარცვლეული კულტურების კარგი მოსავალია როგორც ხარისხობრივი, ისე რაოდენობრივი  თვალსაზრისით, რაც ბევრ სისტემურ ცვლილებასა და გადაწყვეტილებას უკავშირდება. აღსანიშნავია ისიც, რომ ჩვენი ფერმერების ცოდნა და გამოცდილება გაიზარდა, ისინი იყენებენ თანამედროვე მიდგომებს, ფართობებზე ახორციელებენ თესლბრუნვას, ზრუნავენ ნიადაგის ნაყოფიერებაზე და პროდუქტიულობაზე. ჩვენ შეგვიძლია ვაწარმოოთ მაღალპროდუქტიული და ხარისხიანი მარცვლეული კულტურები, მათ შორის, ხორბალი და ქერი. შესაბამისად, აქტიურად გავაგრძელებთ მუშაობას მემარცვლეობის დარგის განვითარებისთვის, რაც ხარისხიან სათესლე მასალასა და მექანიზაციაზე ხელმისაწვდომობას, თესლის სერტიფიცირებას, ფერმერებისთვის ცოდნის, თანამედროვე ტექნოლოგიების და საუკეთესო პრაქტიკის გაზიარებას მოიცავს; ვიმუშავებთ ხარისხის კონტროლის მიმართულებითაც, რაც მნიშვნელოვანია ფერმერების ინტერესების დაცვისა და სამართლიანი კონკურენციისთვის“, - აღნიშნა ლევან დავითაშვილმა. კომპანიას „სილქ უოთერ გრუპი“ გორის მუნიციპალიტეტის სოფელ შინდისში 120 ჰა-ზე ქართული ჯიშის ,,ლომთაგორა“ ხორბალს, 50 ჰა-ზე  ქერს და 100 ჰა ფართობზე იონჯას აწარმოებს. ნიადაგის ნაყოფიერების ამაღლებისთვის, კომპანია თესლბრუნვას ახორციელებს დღისათვის, მარცვლოვანი კულტურების მოსავლის აღება აგროვადების დაცვით, შეუფერხებლად მიმდინარეობს.  ქვეყნის მასშტაბით, მობილიზებულია შპს „სოფლის მეურნეობის ლოჯისტიკის და სერვისების კომპანიის“ 95 ერთეული კომბაინი. აღნიშნული ტექნიკის საშუალებით, შიდა ქართლის, კახეთისა და ქვემო ქართლის რეგიონებში, ჯამში, 14 000 ჰა-მდე ფართობზე, მარცვლოვანი კულტურების მოსავალი უკვე აღებული და დაბინავებულია. სოფელ შინდისში ხორბლის აღების პროცესს გარემოს დაცვისა და სოფლის მეურნეობის მინისტრის პირველი მოადგილე, გიორგი ხანიშვილი და სოფლის განვითარების სააგენტოს დირექტორი ილია თამარაშვილი ესწრებოდნენ.
#

საქართველოს პრემიერ-მინისტრმა ორი ახალი ვიცე-პრემიერი დანიშნა

მინისტრთა კაბინეტში ვიცე-პრემიერის თანამდებობებს კულტურის, სპორტისა და ახალგაზრდობის მინისტრი თეა წულუკიანი და გარემოს დაცვისა და სოფლის მეურნეობის მინისტრი ლევან დავითაშვილი დაიკავებენ. ვიცე-პრემიერები ირაკლი ღარიბაშვილმა მთავრობის დღევანდელ სხდომაზე წარადგინა. მთავრობის შემადგენლობაში ჯამში სამი ვიცე-პრემიერია. აღნიშნული თანამდებობა ასევე უკავია საქართველოს საგარეო საქმეთა მინისტრ დავით ზალკალიანს.
#

ლევან დავითაშვილმა ქართული რძის დღისადმი მიძღვნილი ღონისძიება მისასალმებელი სიტყვით გახსნა

გარემოს დაცვისა და სოფლის მეურნეობის მინისტრმა, ლევან დავითაშვილმა ქართული რძის დღისადმი მიძღვნილი ღონისძიება მისასალმებელი სიტყვით გახსნა.მინისტრმა მადლობა გადაუხადა დონორ ორგანიზაციებს ქართული რძის ხარისხის ნიშნის - „ქართული რძე” შექმნის მხარდაჭერისთვის. ხარისხის ნიშანი მომხმარებელს საშუალებას აძლევს, მარტივად განასხვავოს, პროდუქცია ნედლი რძისგან არის დამზადებული თუ აღდგენილისგან. „რძის სექტორი დიდი როლს თამაშობს სოფლის მეურნეობის ეკონომიკაში. სამინისტროს მიერ შემუშავებულმა რძის ტექნიკურმა რეგლამენტმა რძის პროდუქტებისადმი საიმედოობის საკითხი აბსოლუტურად შეცვალა. რეგლამენტის დახმარებით, მნიშვნელოვანი პროგრესი გვაქვს უვნებელი პროდუქციის მიღების თვალსაზრისით. ქართული რძის დღისადმი მიძღვნილი ღონისძიების მონაწილე საშუალო და პატარა მწარმოებლებს აერთიანებთ ხარისხის სავაჭრო ნიშანი; ამ მეწარმეების უკან კი, ათასობოთ ფერმერია. შესაბამისად, მნიშვნელოვანია, მხარი დავუჭიროთ მეწარმეებს, გაერთიანებებს; მნიშვნელოვანია ხარისხის ნიშნების წახალისებაც, რაც სამინისტროს პოლიტიკის ნაწილს წარმოადგენს“,- განაცხადა ლევან დავითაშვილმა. „ღონისძიების ფარგლებში რამდენიმე ათეული წარმატებული რძის გადამმუშავებელი მეწარმის ხილვა უტყუარი დადასტურებაა დარგის განვითარების სწორი სახელმწიფო პოლიტიკის. ახლა მნიშვნელოვანია, როგორც  ნედლი რძისგან ნაწარმოები პროდუქციის ექსპორტის ზრდის ხელშეწყობა, ასევე, იმპორტჩანაცვლებაზე მუშაობა“, - განაცხადა საქართველოს პარლამენტის აგრარული კომიტეტის თავმჯდომარემ, ნინო წილოსანმა. ღონისძიებას საქართველოს პარლამენტის გარემოს დაცვისა და ბუნებრივი რესურსების კომიტეტის თავმჯდომარის პირველი მოადგილე ხატია წილოსანიც ესწრებოდა, რომელმაც ღონისძიების მონაწილეებს ქართული რძის დღე მიულოცა და  ხარისხის ნიშნის მნიშვნელობაზე გაამახვილა ყურადღება. ღონისძიება, რომელშიც 20-ზე მეტი რძის პროდუქციის მწარმოებელი კომპანია მონაწილეობდა, „საქართველოს ბიზნესინსტიტუტის“ ორგანიზებით გაიმართა.  აღსანიშნავია, რომ სწორედ „საქართველოს ბიზნესინსტიტუტია“ ქართული რძის ნიშნის გამოყენების უფლების მიმნიჭებელი ორგანიზაცია.  ქართული რძის პროდუქტების პოპულარიზაციის გარდა, ღონისძიების მიზანი HACCP-ის მფლობელი რძის პროდუქტების მწარმოებლებისა და რესტორნების, კაფეების, სასტუმროების და სავაჭრო ობიექტების წარმომადგენელთა შეხვედრის და თანამშრომლობის ხელშეწყობა იყო.