#

ლევან დავითაშვილი კახეთში ყურძნის ჩაბარების პროცესს გაეცნო

გარემოს დაცვისა და სოფლის მეურნეობის მინისტრი ლევან დავითაშვილი კახეთის რეგიონში რთველის მიმდინარეობას და ღვინის კომპანიებში „წინანდლის ძველი მარანი" და „მეღვინეობა შუმი"  ყურძნის ჩაბარების პროცესს გაეცნო.  მინისტრი მევენახეებს შეხვდა და ყურძნის ჩაბარებასთან დაკავშირებულ საკითხებზე ესაუბრა.  „რთველის პიკურ პერიოდში, თანმდევი პროცესია რიგები. მომავალი 10 დღე ყველაზე აქტიური პერიოდი იქნება.  ყოველდღიურად, სავარაუდოდ,  10 ათას ტონაზე მეტი ყურძნის გადამუშავება მოხდება, რასაც  საკმაოდ დიდი საწარმოო სიმძლავრეები სჭირდება. წელს, რთველში ასამდე კომპანიაა ჩართული. მიუხედავად ამისა, ტექნიკური პროცესების გამო, ყურძნის ჩასაბარებლად მანქანებს რამდენიმე საათი დაყოვნება უწევთ.  ჩვენ გვახსოვს, წლების წინ,  რთველის დროს სამი-ოთხი დღის განმავლობაში იდგნენ მევენახეები რიგებში, ამასთან ისიც არ იცოდნენ  საერთოდ ჩააბარებდნენ და  მიიღებდნენ თუ არა თავისი შრომის ანაზღაურებას.  რთველის საკოორდინაციო  შტაბიდან მაქვს ინფორმაცია, რომ  ყურძნის ჩაბარებისას 12 საათზე მეტი შეყოვნება არსად ყოფილა. ასე რომ წელს მიდის საკმაოდ მშვიდად რთველი. მიუხედავად იმისა, რომ გარკვეული ძალების მხრიდან არის მცდელობა  პროცესის დაძაბვის და პოლიტიზების, მშრომელი ადამიანების  ემოციებზე თამაშის, რაც ვფიქრობ, აბსოლუტურად უპასუხისმგებლობაა,  რთველი კახეთში შეფერხებების გარეშე ჩაივლის  და ყველა მევენახეს  ყურძნის დაბინავების შესაძლებლობა ექნება“, - აღნიშნა ლევან დავითაშვილმა. მიუხედავად ჭარბი მოსავლისა და კორონა ვირუსის პანდემიით მევენახეობა-მეღვინეობის დარგისადმი მიყენებული ზარალისა,  ყურძნის მოსავლის დაბინავება ორგანიზებულად მიმდინარეობს და მევენახეებს მოსავლის სრულად და შეუფერხებლად დაბინავების შესაძლებლობა ეძლევა. 19 სექტემბრის მონაცემებით, კახეთის რეგიონში გადამუშავებულია 94 ათასი ტონა ყურძენი: 68  ათასი ტონა რქაწითელი, 18 ათასი ტონა საფერავი, 1,7 ათასი ტონა კახური მწვანე და დანარჩენი სხვადასხვა ჯიშის ყურძენია.
#

ლევან დავითაშვილმა და ზურაბ პოლოლიკაშვილმა ტურიზმის საერთაშორისო ფორუმის ფარგლებში გამართული ფერმერული ბაზრობა გახსნეს

გარემოს დაცვისა და სოფლის მეურნეობის მინისტრმა, ლევან დავითაშვილმა ტურიზმის საერთაშორისო ფორუმის ფარგლებში გამართული ფერმერული ბაზრობა მისასალმებელი სიტყვით გახსნა.  „მოხარული ვარ, რომ დღეს ჩვენი ქვეყანა მსოფლიო ტურიზმის ორგანიზაციის (UNWTO) აღმასრულებელი საბჭოს 112-ე სხდომის მონაწილეებს, მაღალი რანგის სტუმრებს მასპინძლობს. საქართველო გამორჩეულია კულინარიული ტრადიციებით და გასტრონომიით, რაც დღეს, მსოფლიოში, ტურიზმის განუყოფელ ნაწილს წარმოადგენს. ვფიქრობ, ამ კუთხით ჩვენ ქვეყანას განსაკუთრებული უპირატესობა გააჩნია და  ჩვენი მიზანია ქართული გასტრონომიული სიმდიდრე მსოფლიოს გავაცნოთ.  ჩვენ ყოველთვის ვსაუბრობთ  სოფლის მეურნეობაზე, არა მხოლოდ როგორც ცალკე დარგის განვითარებაზე, არამედ ზოგადად, სოფლის განვითარებაზე, რაც სოფლის მეურნეობასთან სხვადასხვა სექტორის კავშირს გულისხმობს. ჩვენ აქტიურად ვმუშაობთ როგორც პროდუქციის წარმოება - გადამუშავების ხელშეწყობის, ისე სხვადასხვა ტურისტული  ინფრასტრუქტურის, აგროტურიზმის, გასტროტურიზმისა და ღვინის ტურიზმს განვითარების მიმართულებით. მინდა ხაზგასმით აღვნიშნო, რომ ჩვენი ქვეყნისთვის ერთ-ერთი მნიშვნელოვანი მიმართულება ეკოტურიზმის განვითარებაა, რადგან საქართველოს ამ კუთხით დიდი პოტენციალი გააჩნია. ვფიქრობ, რომ ეკოტურიზმი ქართული ბუნების მრავალფეროვნების გაცნობის  საუკეთესო შესაძლებლობაა. დღეს, სპეციალურად თქვენთვის, ჩვენი ქვეყნის სტუმრებისთვის მოწყობილ ბაზრობაზე, ადგილობრივი ფერმერები სხვადასხვა რეგიონიდან წარმოადგენენ როგორც ტრადიციულ სასოფლო-სამეურნეო პროდუქტებს, ასევე ქართული რეწვის  ნიმუშები, რაც ჩვენი სამინისტროს პოლიტიკას პირდაპირ ეხმიანება.  მოხარული ვარ, რომ საქართველო მსგავსი მაღალი დონის ღონისძიებას მასპინძლობს, რაც   მნიშვნელოვანია როგორც საქართველოს ცნობადობის ამაღლების, ასევე ქართული პროდუქციის პოპულარიზაციის კუთხით, რაც ხელს შეუწყობს  ადგილობრივი წარმოების ზრდა-განვითარებას და კეთილდღეობას სოფლად“, - აღნიშნა ლევან დავითაშვილმა.   ღონისძიების მონაწილეებს მისასალმებელი სიტყვით საქართველოს გაეროს მსოფლიო ტურიზმის ორგანიზაციის გენერალურმა მდივანმა, ზურაბ პოლოლიკაშვილმა მიმართა. სასოფლო-სამეურნეო გამოფენა, საქართველოს ბანკის, საქართველოს ფერმერთა ასოციაციის და დონორი ორგანიზაციების მხარდაჭერით გაიმართა.გაეროს მსოფლიო ტურიზმის ორგანიზაციის (UNWTO) აღმასრულებელი საბჭოს 112-ე სხდომა თბილისში 16-17 სექტემბერს გაიმართა. 
#

„დავასუფთაოთ მსოფლიო - 2020“ კამპანიასთან დაკავშირებით! 2020 წლის მსოფლიო დასუფთავების კამპანიის გზავნილია: „ყოველი მცირე ქმედება სამყაროს განსხვავებულს ხდის“

მწვანეთა მოძრაობა/დედამიწის მეგობრები-საქართველოსა (პარტნიორ ორგანიზაციებთან თანამშრომლობით) და გარემოს დაცვისა და სოფლის მეურნეობის სამინისტროს თანამშრომლობის ფარგლებში, ბოლო 10 წელია „დავასუფთაოთ მსოფლიო“ კამპანია აღინიშნება. საერთაშორისო კამპანია - „დავასუფთაოთ მსოფლიო“ 1992 წელს გაეროს გარემოსდაცვითი პროგრამის (UNEP) ინიციატივით დაარსდა. იგი ადგილობრივი გარემოს გაუმჯობესებას ემსახურება და ფართომასშტაბიანი დასუფთავების აქციების ჩასატარებლად მთელი რიგი ქვეყნების ხელისუფლებისა და ბიზნეს-სექტორის წარმომადგენლებს, საზოგადოებრივი ორგანიზაციებსა და მოქალაქეებსა ერთიანებს.  დღეს, მასში 130-ზე მეტი ქვეყანაა ჩართული, მათ შორის საქართველო.მიმდინარე წელსაც „დავასუფთაოთ მსოფლიო“ კამპანია ტრადიციულად მსოფლიოს მრავალ ქვეყანაში აღინიშნება. საქართველოში დასუფთავების აქციები 18, 19 და 20 სექტემბერს გაიმართება.კამპანია საქართველოში „საქართველოს მწვანეთა მოძრაობა/დედამიწის მეგობრები - საქართველოს“ მიერ (პარტნიორ ორგანიზაციებთან ერთად), პროექტის „დავიცვათ საქართველოს სისუფთავე“ ფარგლებში, შვედეთის მთავრობის მხარდაჭერით ხორციელდება.თუმცა, გამომდინარე მსოფლიო პანდემიიდან და ქვეყანაში არსებული ეპიდემიოლოგიური სიტუაციიდან, მიმდინარე წელს დასუფთავების აქციები ჩატარდება მცირე რიცხოვან ჯგუფებში (10-მდე მოხალისის მონაწილეობით) და სხვადასხვა ადგილას.ვითვალისწინებთ, რა მსოფლიო ჯანდაცვის რეკომენდაციებსა და სახელმწიფო რეგულაციებს, მოგმართავთ თხოვნით, ვისთვისაც მნიშვნელოვანია საარსებო გარემო, გამოიჩინოთ მაღალი პასუხისმგებლობა და დასუფთავების აქციები, თვითორგანიზების შემთხვევაში ჩაატაროთ  მცირე რაოდენობრივ (10-მდე) ჯგუფებში, შესაბამისი უსაფრთხოების წესების დაცვით!დავასუფთაოთ საკუთარი სახლის, ეზოს, ქუჩის მიმდებარე ტერიტორიები და საკუთარი წვლილი შევიტანოთ მსოფლიო კამპანიაში!"დავიცვათ დისტანცია-დავასუფთაოთ მსოფლიო-დავასუფთაოთ საქართველო"!!!დავიცვათ საქართველოს სისუფთავე!
#

ხატია წილოსანი: „არარეალურია და ძალიან უხერხულია, როდესაც პოლიტიკური პარტია საკუთარი მიზნების მისაღწევად იყენებს ქვეყანაში პანდემიიდან გამომდინარე დღეს არსებულ სიტუაციას“

„არარეალურია და ძალიან უხერხულია, როდესაც პოლიტიკური პარტია, პოლიტიკური ძალა საკუთარი მიზნების მისაღწევად იყენებს ქვეყანაში დღეს არსებულ მგრძნობიარე სიტუაციას, რაც კოვიდ 19-ის პანდემიამ განაპირობა. მინდა აღვნიშნო, პროგნოზების მიხედვით, ჩვენ ველოდებით 180 000 ტონაზე მეტ ყურძენს  და როდესაც პოლიტიკური ძალა საუბრობს იმაზე, რომ მათ აქვთ შესაძლებლობა 1 კგ ყურძენზე დღეს არსებულ სუბსიდიაზე, დამატებით კიდევ გასცენ 80 თეთრი, ძალიან უხერხულია და უპასუხისმგებლობაა.  ფერმერები არიან გონიერი ადამიანები, მათ იციან როგორ ხდება სახელმწიფოს მიერ გატარებული ღონისძიებებით ქვეყანაში მევენახეობა-მეღვინეობის დარგის ეტაპობრივი განვითარება. ისიც იციან, რომ დღეის მდგომარეობით,  40-ზე მეტ ქვეყანაში  იყიდება ქართული ღვინო და პანდემიის გამო არსებული გამოწვევების მიუხედავად, სახელმწიფოს სწორი პოლიტიკით, ამერიკის, პოლონეთის და ლატვიის ბაზრებზე, დადებითი ტენდენციები ექსპორტის კუთხით შენარჩუნებულია. ძალიან კარგად მოეხსენება ჩვენს ხალხს, თუ რა პირობები და  მდგომარეობა იყო წინა წლებში და 2013 წლიდან, რა ნაბიჯები გადაიდგა იმისთვის, რომ ფერმერების შემოსავლები გაზრდილიყო და ქონოდათ  იმის შესაძლებლობა, რომ  უკეთეს პირობებში, ორგანიზებულად, შეფერხებების გარეშე მოეხდინათ თავიანთი პროდუქციის რეალიზაცია. მინდა ხაზი გავუსვა  დაზღვევის მექანიზმის მნიშვნელობას. ფერმერებმა კარგად იციან, რომ  სეტყვისა და სხვა ბუნებრივი პირობების გათვალისწინებით,  მათ წინაშე არსებული გამოწვევები, აგროდაზღვევის პროგრამაში მაქსიმალურადაა გათვალისწინებული და სახელმწიფოს მხრიდან არის მაქსიმალური მხარდაჭერა. ბოლო წლების განმავლობაში,  განხორციელებული სწორი პოლიტიკით და კერძო სექტორთან აქტიური თანამშრომლობით, სახელმწიფო თანდათან გამოვიდა სუბსიდირების პროცესებიდან, თუმცა 2020 წელს, საქართველო და ზოგადად, მთელი მსოფლიო დიდი გამოწვევების წინაშე დადგა, რამაც სუბსიდირების საჭიროება განაპირობა. ბევრ ქვეყანას, რომელთა ეკონომიკის დიდ ნაწილს ღვინის რეალიზაციიდან მიღებული შემოსავლები წარმოადგენს, მტკივნეული გადაწყვეტილებების მიღება მოუწია.  საქართველოს მთავრობამ პასუხისმგებლიანი მიდგომა გამოიჩინა და არაერთი მიმართულებით, მათ შორის მევენახეობა-მეღვინეობის სექტორში,  ფერმერების მხარდაჭერა გადაწყვიტა.  უნდა აღინიშნოს, რთველი აქტიურ ფაზაშია და შეუფერხებლად მიმდინარეობს. ყოველდღიურად მზარდია გადამუშავებული ყურძნის რაოდენობა, რაც ღვინის მწარმოებელ კომპანიებს მეტი ხარისხიანი პროდუქციის წარმოების, ხოლო ფერმერებს მეტი შემოსავლის მიღების შესაძლებლობას აძლევს.   დღეისათვის, შეგვიძლია ვთქვათ, რომ 2020 წლის რთველი  წარმატებულად მიმდინარეობს“,- განაცხადა ხატია წილოსანმა.
#

ლევან დავითაშვილი: „როდესაც მოსავლის სრულად დაბინავების რესურსი არსებობს ქვეყანაში, აქციების მოწყობა უპასუხისმგებლობაა“

 „იმ დროს, როდესაც მოსავლის სრულად დაბინავების რესურსი არსებობს ქვეყანაში, მოსახლეობის გამოყვანა და აქციების მოწყობა, რაც მათი ბელადის საკმაოდ უცნაურ ვიდეოკლიპს ეხმიანება, კიდევ ერთხელ ადასტურებს, იმას, რომ ეს პოლიტიკური მოძრაობა არის უპასუხისმგებლო და მათთვის მოსახლეობის ინტერესები არაფერს არ წარმოადგენს. მოკლე მიმოხილვა მნიშვნელოვანი იქნება იმისთვის, რომ გაიხსენოთ, თუ რა მდგომარეობა იყო მევენახეობა-მეღვინეობის სექტორში 2012 წლამდე და რა პარამეტრებია დღეს. ეს არის პასუხი იმ არასწორ ინფორმაციაზე, რომელიც ვრცელდება და რომლის პროპაგანდასაც დღეს ვხედავთ. ეს ეხება კონკრეტულად ინდუსტრიულად გადამუშავებული ყურძნის რაოდენობას.  დღეისათვის, საფერავის ჯიშის ყურძნის ფასი, მინიმუმ 1.5 ლარია, კონკრეტულ ზონებში ოდნავ მეტიც და ამ შემთხვევაში, სპეკულირება, რომ უფრო მეტი ფასი უნდა იყოს წარმოუდგენელია. ჩვენ  შეგვიძლია  შევამოწმოთ რა ჯდება მოსავლის მიღება და ამ პერიოდში, როდესაც ეკონომიკის ყველა დარგს პრობლემები აქვს და  ყველა სოციალურ ფენას უჭირს,  ჩვენ გარანტირებულად გვაქვს საკმაოდ მაღალი რენტაბელობით ყურძნის რეალიზების საშუალება.  2012 წელს,  საყოველთაოდ მიღებული პრაქტიკა იყო, სხვადასხვა ძალოვანი სტრუქტურების მონაწილეობით, დაშინების მექანიზმით, მსხვილ მევენახე ფერმერებს, 10 ჰექტარზე მეტი ფართობის მქონე მევენახეებს, არ ჰქონოდათ ყურძნის ჩაბარების საშუალება.  მათ, ე.წ. „ფაშისტებს“ ეძახდნენ და მათთვის ყურძნის ჩაბარება დიდ პრობლემებთან იყო დაკავშირებული. ამის ფონზე,  გვესმის რიტორიკა, რომ დღეს, სახელმწიფო არ ზრუნავს ფერმერებზე, არჩევნებში გამარჯვების შემთხვევაში, მათ აქვთ გეგმა და ისინი მევენახეებს დამატებით მისცემენ თანხას. ეს არის პირდაპირი სპეკულაცია, მოსყიდვის ისეთი მცდელობა, რომელიც ჩვენს მოსახლეობას ბევრჯერ აქვს მოსმენილი და რა თქმა უნდა, არ სჯერათ.  2012 წელს, მთელ საქართველოში,  60 000 ტონაზე ნაკლები ყურძენი გადამუშავდა. წელს საქართველოში,  მხოლოდ საფერავის მოსავალი დაახლოებით 100 ათას ტონამდეა.  ამავე დროს, როდესაც საუბარია თუ რა გაკეთდა ღვინის სექტორში, მარტივად ვიტყვი, რომ ადრე, საქართველოდან ექსპორტირებული იყო 24 მილიონი ბოთლი, საიდანაც 50% გადიოდა მხოლოდ უკრაინაში. ეს იყო ჩვენი გაყიდვების გეოგრაფია. დღეისათვის, კი 100 მლნ ბოთლამდე ქართული  ღვინო იყიდება მსოფლიოს 40-ზე მეტ ქვეყანაში და ეს არის შედეგი, რომელიც თანმიმდევრული პოლიტიკით არის მიღწეული. ჩვენი პოლიტიკით, სახელმწიფო გამოდიოდა სუბსიდირების რეჟიმიდან. 2 წლის წინ, ჩვენ  ჩავატარეთ რთველი, როდესაც მოსახლეობამ, სახელმწიფოს ჩარევისა და სუბსიდირების გარეშე, 300 მლნ ლარზე მეტი შემოსავალი მიიღო. წელს, საქართველოს მთავრობამ, კოვიდ 19-ის პანდემიის პირობებში, ანტიკრიზისული გეგმის ფარგლებში, უპრეცედენტო დახმარების პაკეტი გამოყო სხვადასხვა მიმართულებით, მათ შორის,  მევენახეობა-მეღვინეობის სექტორისთვის. ამ დროს, ჩვენ ვნახეთ  კონკრეტული ოპოზიციური პარტიის აქცია, რომელიც იყო აბსოლუტური სპეკულირება. უნდა ითქვას, რომ მარტივია რაღაცეების დაპირება, რთულია, საქმის სწორად კეთება, განსაკუთრებით უპასუხისმგებლობა კი ცრუ დაპირებებია“, - განაცხადა ლევან დავითაშვილმა. 
#

ლევან დავითაშვილი: „სახელმწიფომ შექმნა ყველა ინსტრუმენტი და გარანტიები იმისთვის, რომ არცერთი კილოგრამი ყურძენი ჩაუბარებელი არ დარჩეს“

„იცით, რომ რთველი  საკმაოდ აქტიურ ფაზაშია. დღეღამური გადამუშავება 10 000 ტონას აღემატება. ამ მომენტისთვის, კახეთის რეგიონში, 60 000 ტონა ყურძენია ინდუსტრიულად გადამუშავებული. ყურძნის სიმწიფე კარგია ყველა მუნიციპალიტეტში და  ახლა, ყურძნის კრეფა და ჩაბარება ადგილწარმოშობის ზონებში - გურჯაანისა და ყვარლის მუნიციპალიტეტებში დაიწყება.  მინდა გამოვეხმაურო გარკვეული პოლიტიკური ძალების აბსოლუტურად უპასუხისმგებლო ქმედებებს. ეს არის პოლიტიკური პოპულიზმი, საკმაოდ მდარე, პოპულისტური ნაბიჯები,  რომელიც ჩვენი მოსახლეობის გრძნობებზე თამაშობს, არანაირად არ პასუხობს და პირიქით, აზიანებს ფერმერების ინტერესებს და  ხელს  უშლის პროცესის სწორად, ლოგიკურად წარმართვას. იმ პერიოდში, როდესაც კოვიდ 19-ის პანდემიის გამო გართულდა გაყიდვები, ტურისტული ინდუსტრია, რომელიც არის ძირითადი მყიდველი, იყო შეზღუდული, HORECA სეგმენტს ჰქონდა დარტყმა ყველა სამიზნე ბაზარზე, განსაკუთრებით გართულდა პრემიუმ ხარისხის პროდუქციის რეალიზაცია. წინასწარი შეფასებით, პრაქტიკულად მოსავლის 80 %  იქნებოდა ჩაუბარებელი, რადგან  კერძო სექტორში არ იქნებოდა საკმარისი ფინანსური რესურსი  ბაზარზე ყურძნის შესაძენად. იმ ღონისძიებების შედეგად, რომელიც  ჩავატარეთ, ჩვენ შევძელით, კერძო სექტორის მხრიდან მოთხოვნის მნიშვნელოვნად გაზრდა.  ამავე დროს, ავამოქმედეთ მეორე ინსტრუმენტი, რომელიც უკავშირდება პირდაპირ ფასებს.  ეს არის რქაწითელის და კახური მწვანის ჯიშის ყურძენზე პირდაპირი სუბსიდირება, რომელიც 1 კგ ყურძენზე დაახლოებით, 30 თეთრით განისაზღვრა.  დაიდო პირობა, რომ მინიმალური ფასი, რომელსაც კომპანიები გადაიხდიდნენ სუბსიდირების, კომპენსაციის მიღების შემთხვევაში,  იქნებოდა 80 თეთრი და ეს არის ის საფასო ნიშნული, რაც ჩვენი მევენახე ფერმერების ინტერესების დაცვას პასუხობს და რა თქმა უნდა, ისინი მოგებით შეძლებენ თავიანთი შრომით მოწეული პროდუქტის რეალიზებას.  სახელმწიფომ შექმნა ყველა ინსტრუმენტი და გარანტიები იმისთვის, რომ არცერთი კილოგრამი ყურძენი ჩაუბარებელი არ დარჩეს. ასევე, გამოიყო სახსრები  სახელმწიფო კომპანიისთვის, რათა ყველა ღონისძიების მიუხედავად, ჭარბი მოსავლის დარჩენის შემთხვევაში, მან ჩაიბაროს და გადაამუშაოს ყურძენი. ეს იმ პირობებში, როდესაც ევროპის რამდენიმე ქვეყანაში მიღებულია გადაწყვეტილება, რომ უბრალოდ ვენახებში დატოვონ მოუკრეფავი ყურძენი, იმის გამო, რომ ჭარბი სიმძლავრეები, კონკრეტული მოცულობები  არ არსებობს, რომ ჩაიწუროს ყურძენი“, - განაცხადა გარემოს დაცვისა და სოფლის მეურნეობის მინისტრმა ლევან დავითაშვილმა.
#

ლევან დავითაშვილი : „ერთი პარტიის გამოსვლა მოსახლეობის აზრს არ ნიშნავს - ეს არის სპეკულაცია“

„დღესაც ჩატარდა აქცია კახეთში და ეს იყო პოლიტიკური სპეკულაცია. როდესაც კონკრეტულად ერთი პარტიის რამდენიმე აქტივისტი გამოვა და რაღაცას იტყვის, ეს არ არის მოსახლეობის საყოველთაო აზრი. გთხოვთ, ჟურნალისტებს - არ ენდოთ არც ჩემ ნათქვამს, არც ოპონენტების სიტყვას,  შეხვდით მოსახლეობას და გულწრფელად ჰკითხეთ, რა ჯდება მოსავლის მიღება. ჩემი პირადი სურვილია, რომ რაც შეიძლება მეტად გაიყიდოს ნებისმიერი პროდუქტი და ეს არ ეხება მხოლოდ ყურძენს. ჩემი ინტერესია, რომ ფერმერს მეტი შემოსავალი ქონდეს, რადგან თუ  კმაყოფილი იქნება ფერმერი, ე.ი. ჩვენ კარგად ვმუშაობთ. ჩვენი საქმე ფაქტობრივად ამით იზომება, მაგრამ ობიექტური რეალობაც გასათვალისწინებელია.  ამ ობიექტურ რეალობაში, საუბარია იმაზე, რომ ეს ფასი, ნამდვილად სრულად ფარავს დანახარჯებს და ფერმერი იღებს მოგებას, თან იმ პირობებში,  როდესაც ბევრ სხვა ქვეყანაში, ევროპის ქვეყნებს ვგულისხმობ, რთული ვითარებაა მევენახეობა-მეღვინეობის დარგში.  ეს არის თანხა, რომელიც გადასახადის გადამხდელებმა, თბილისელებმა, იგივე თქვენ და თქვენი ოჯახის წევრებმა, გადაიხადეთ ბიუჯეტში და სოლიდარობის პრინციპით გაუნაწილეთ  ჩვენს მევენახეებს კახეთში, რათა რთული პერიოდი გადავაგოროთ და ამ რთულ პერიოდში, არც ერთი კილოგრამი ყურძენი ჩაუბარებელი არ დარჩება. ინტენსიურად მიმდინარეობს ყურძნის კრეფა. დღეში ათი ათას ტონაზე მეტი ყურძნის ჩაბარება-გადამუშავება ხდება და ეს უპრეცედენტოდ მაღალი ციფრებია ამ პირობებში. ასე რომ, არც ერთი კილოგრამი ყურძენი არ დარჩება ჩაუბარებელი. საბოლოოდ,  ჩვენ რთველს დავამთავრებთ წარმატებით და ვნახავთ, რომ ესეც ისეთივე ორგანიზებული და მაღალ დონეზე ჩატარებული რთველი იქნება, როგორიც მანამდე, ჩვენი ხელისუფლებაში ყოფნის პერიოდში“,- განაცხადა გარემოს დაცვისა და სოფლის მეურნეობის მინისტრმა ლევან დავითაშვილმა.