#

შიდა ქართლის რეგიონში, პროგრამით „დანერგე მომავალი“ ბლის ბაღი 204 ჰექტარზეა გაშენებული

გარემოს დაცვისა და სოფლის მეურნეობის მინისტრმა, ლევან დავითაშვილმა და შიდა ქართლის სახელმწიფო რწმუნებულმა, ვალერიან მჭედლიძემ გორის მუნიციპალიტეტის სოფელ მეჯვრისხევში ახლადგაშენებული ბლის ბაღი დაათვალიერეს. „პროგრამა „დანერგე მომავალი” სტრატეგიული მნიშვნელობისაა მეხილეობის განვითარებისთვის და განსაკუთრებული წარმატებით მუშაობს. პროგრამაში მრავალი ფერმერია ჩართული და, ყოველწლიურად, სულ უფრო პოპულარული ხდება. წელსაც ფერმერების მხრიდან განსაკუთრებული აქტივობაა; შვიდი ათასზე მეტი კონტრაქტია გეგმაში, რაც უპრეცედენტოდ მაღალი რიცხვია. კომპანიის „ჩერი.ჯე” ბლის ბაღი თანამედროვე ტექნოლოგიებით არის გაშენებული და რაც ძალიან სასიხარულოა, მათ ქართული წარმოების სარწყავი სისტემები აქვთ, ასევე, ადგილზე დამზადებული სეტყვის საწინააღმდეგო კონსტრუქციები, ბეტონის ბოძები, რომელიც ბოლო წლებია საქართველოში იწარმოება“, - განაცხადა ლევან დავითაშვილმა. პროგრამით „დანერგე მომავალი“ ბლის ბაღი შპს „ჩერი.ჯემ“  11 ჰექტარზე გააშენა; სოფლის განვითარების სააგენტოს თანადაფინანსება  112,000 ლარია;  ჭაბურღილის მოსაწყობად, კომპანიამ 18,000 ლარის დაფინანსება მიიღო. „ჩერი.ჯე“ შეღავათიანი აგროკრედიტის ბენეფიციარია; ბლის ბაღის გაშენებისთვის, სესხის თანხა  1,5 მლნ ლარს აჭარბებს.  პროგრამის „დანერგე მომავალი“ ფარგლებში, ქვეყნის მასშტაბით, ახალი მრავალწლოვანი ხეხილის ბაღი 12.9 ათას ჰექტარზე მეტ ფართობზე გაშენდა. სახელმწიფო თანადაფინანსება 81.1 მილიონ ლარს აჭარბებს   
#

საქართველოს მეცნიერებათა ეროვნულ აკადემიაში, ცირკულარული ეკონომიკის შესახებ სემინარი გაიმართა

გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი საქართველოს მეცნიერებათა ეროვნულ აკადემიაში ცირკულარული ეკონომიკის შესახებ გამართულ სემინარს დაესწრო. მინისტრის მოადგილემ საქართველოში ცირკულარული ეკონომიკის მიდგომებისა და არსებული გამოწვევების შესახებ ისაუბრა.როგორც სოლომონ პავლიაშვილმა  სემინარზე აღნიშნა, ცირკულარული ეკონომიკის მიდგომების დანერგვა სამრეწველო ნარჩენების შეკვეცის, საშიში ნივთიერებების წარმოებისა და მათი ზემოქმედების შემცირების, კლიმატური ცვლილებების შერბილებაში წვლილის შეტანის შესაძლებლობას იძლევა. „ცირკულარული ეკონომიკური სისტემა ბუნებრივ რესურსებს მაქსიმალურად ეფექტიანად მოიხმარს, მასალებისა და პროდუქციის ღირებულებას მათი წრებრუნვის გზით ინარჩუნებს და ეკონომიკური საქმიანობის მავნე ზემოქმედებას გარემოსა და ადამიანის ჯანმრთელობაზე ამცირებს. დღეს, მსოფლიოს ყველაზე განვითარებული ქვეყნებიც კი, ცირკულარულ ეკონომიკაზე გადასვლის ადრეულ ეტაპზე იმყოფებიან; ამ ეტაპზეა საქართველოც. ცირკულარული ეკონომიკა  ეფექტიანი გზაა  გაეროს მდგრადი განვითარების მიზნების მნიშვნელოვანი ნაწილის მისაღწევად “, - განაცხადა შეხვედრაზე სოლომონ პავლიაშვილმა.  
#

გარემოს დაცვისა და სოფლის მეურნეობის მინისტრი ლევან დავითაშვილი საქართველოს საზოგადოებრივ საქმეთა ინსტიტუტის (GIPA) გარემოსდაცვითი მენეჯმენტისა და პოლიტიკის სამაგისტრო პროგრამის სტუდენტებს შეხვდა

„უკვე ტრადიციად იქცა ჩვენი შეხვედრები GIPA-ს სტუდენტებთან. გარემოსდაცვითი მენეჯმენტისა და პოლიტიკის სამაგისტრო პროგრამა ძალიან მნიშვნელოვანია იმისათვის, რომ ქვეყანაში გამოცდილი კადრები გვყავდეს გარემოსდაცვითი გამოწვევების გასამკლავებლად. მადლობა მინდა გადავუხადო პარტნიორებს; ბევრი კურსდამთავრებული არის ჩვენი თანამშრომელი, ბევრი სტუდენტი კი, ჩვენი სტაჟიორი. ქვეყნის გარემოსდაცვითი პრიორიტეტი განისაზღვრა ასოცირების ხელშეკრულებით; ჩვენ ვაუმჯობესებთ გარემოსდაცვით პოლიტიკას, რაც გულისხმობს ახალ რეგულაციებს, ახალ გამოწვევებს; ეს კი ნიშნავს, რომ სამინისტროს სისტემაში, ინსტიტუციური გაძლიერების კუთხით, გვჭირდება ახალი კომპეტენტური კადრები. მოთხოვნა ამ პროფესიაზე არის კერძო სექტორშიც; კერძო კომპანიები მნიშვნელოვანი დამსაქმებლები იქნებიან, რაც საკმაოდ დიდ პერსპექტივებს გააჩენს GIPA-ს სტუდენტების კარიერულ წინსვლაში“, - განაცხადა ლევან დავითაშვილმა. სტუდენტებთან შეხვედრა კითხვა-პასუხის რეჟიმში წარიმართა. სტუდენტები სამინისტროს გარემოსდაცვითი პოლიტიკის დეტალებითა და სამომავლოდ არსებული პრიორიტეტებით დაინტერესდნენ. კლიმატის ცვლილებების, წყლის რესურსების, ბიომრავალფეროვნებისა და ატმოსფერული ჰაერის დაცვის შესახებ დასმულ კითხვებზე  ამომწურავი პასუხები უშუალოდ მინისტრისგან მიიღეს.გარემოსდაცვითი მენეჯმენტისა და პოლიტიკის სამაგისტრო პროგრამა სამინისტროს ინიციატივით, 2016 წელს შეიქმნა და საქართველოს საზოგადოებრივ საქმეთა ინსტიტუტის (GIPA), სამინისტროს გარემოსდაცვითი ინფორმაციისა და განათლების ცენტრისა და  გერმანიის საერთაშორისო თანამშრომლობის საზოგადოების (GIZ) მხარდაჭერით დაინერგა.   
#

ოთარ შამუგია, ქ. გორში, პროექტის „ეკონომიკური და გარემოსდაცვითი სარგებელი მიწის მდგრადი მართვის გზით მოწყვლადი თემებისათვის საქართველოში“ მიმდინარეობას გაეცნო

გარემოს დაცვისა და სოფლის მეურნეობის მინისტრის მოადგილე ოთარ შამუგია, ქ. გორში, პროექტის „ეკონომიკური და გარემოსდაცვითი სარგებელი მიწის მდგრადი მართვის გზით  მოწყვლადი თემებისათვის საქართველოში“ მიმდინარეობას გაეცნო. პროექტის საპილოტე მუნიციპალიტეტები: გორი, ქარელი, ყვარელი და საგარეჯოა.   „საპილოტე პროექტის მიზანია მიწის მდგრადი მართვის დანერგვა და შესაძლებლობების გაძლიერება; ასევე, ნიადაგის დეგრადაციის საწინააღმდეგო ღონისძიებების განხორციელება და ამ მიმართულებით ცოდნის გაზიარება, რამაც, თავის მხრივ, საქართველოს ბუნებრივი და ეკონომიკური კაპიტალის დაცვა უნდა უზრუნველყოს. პროექტში მონაწილეობა 100-მდე ფერმერმა მიიღო. ფერმერებს, გლობალური გარემოსდაცვითი ფონდის დაფინანსებით და კავკასიის რეგიონალური განვითარების ცენტრის მხარდაჭერით,  უსასყიდლოდ გადაეცათ სხვადასხვა სათესლე მასალა და ნერგები ქარსაფარი ზოლების გასაშენებლად. ჩვენ ვიზრუნებთ, რომ ასეთ პრაქტიკა სხვა რეგიონებშიც დაინერგოს და მეტი ფერმერი დაინტერესდეს მსგავსი ღონისძიებებით“, - განაცხადა ოთარ შამუგიამ. მიმდინარე პროექტის ფარგლებში, გორის მუნიციპალიტეტში, 2020 წლის დეკემბერში, 2935 მეტრი ქარსაფარი ზოლი გაშენდა, 6 ფერმერს უსასყიდლოდ გადაეცათ ნერგები და შესაღობი მასალა. 2020 წლის ოქტომბერში, გორში მდებარე 75 ჰა ფართობის სასოფლო-სამეურნეო დანიშნულების მიწა ნიადაგის დაუმუშავებლად დაითესა,თესვის ხარჯი სრულად დაფარა პროექტმა. საპილოტე პროექტის განხორციელება  2018 წლის 18 მარტს დაიწყო და  2023 წლის 18 მარტს დასრულდება. პროექტის ინიციატორია საქართველოს გარემოს დაცვისა და სოფლის მეურნეობის სამინისტრო; პროექტი დაფინანსებულია გლობალური გარემოსდაცვითი ფონდის (GEF) მიერ; განმახორციელებელი სააგენტოა გაეროს გარემოსდაცვითი პროგრამა (UN Environment), ხოლო აღმასრულებელი ორგანიზაცია „კავკასიის რეგიონული გარემოსდაცვითი ცენტრი“ (REC Caucasus). 
#

ლევან დავითაშვილმა ცირკულარული ეკონომიკის შეფასების პროგრამის პირველ პლენარულ შეხვედრაში მიიღო მონაწილეობა

ცირკულარული ეკონომიკის შეფასების პროგრამის პირველ პლენარულ შეხვედრაში მონაწილეობა გარემოს დაცვისა და სოფლის მეურნეობის მინისტრმა, ლევან დავითაშვილმა და მინისტრის მოადგილემ, სოლომონ პავლიაშვილმა მიიღეს. შეხვედრაზე, საქართველოს მთავრობის უწყებათაშორისი საკოორდინაციო საბჭოს და საქართველოს ბუნების   მკვლევართა   კავშირის  „ორქისი“ ცირკულარული   ეკონომიკის   შეფასების სამუშაო ჯგუფის წევრებმა საქართველოში ცირკულარული ეკონომიკის შეფასების ასპექტები და გამოწვევები განიხილეს. „საქართველომ დაისახა ძალიან ამბიციური გეგმა - შექმნას ცირკულარული ეკონომიკის განვითარების სტრატეგია და შესაბამისი სამოქმედო გეგმა. მიმდინარეობს სამიზნე ინდიკატორების განსაზღვრა. ჩვენი ეკონომიკური განვითარების პოლიტიკაში, ნარჩენების მართვის ახალი კოდექსი ითვალისწინებს ცირკულარულობის პირველ ნაბიჯებს. კოდექსის პარალელურად, დავნერგეთ მწარმოებლის გაფართოებული ვალდებულების ახალი პრინციპები, მივიღეთ რამდენიმე რეგლამენტი, რათა ნარჩენების ცირკულარულობას შევუწყოთ ხელი, რომ მოხდეს ნედლეულის პრევენცია, ამოღება და გადამუშავება”, - განაცხადა ლევან დავითაშვილმა. შეფასების პროგრამა შვედეთის მთავრობის დაფინანსებით მომზადდა; მისი მიზანი ცირკულარული ეკონომიკის   საკითხებზე დაინტერესებულ   მხარეთა  ცნობიერების   გაზრდაა. პროგრამა ითვალისწინებს   დაინტერესებული   მხარეების   სხვადასხვა ჯგუფისათვის, საფინანსო ინსტიტუტებისა და ბიზნესის სფეროს წარმომადგენლებისათვის რეკომენდაციების გაცემას, თუ როგორ დაჩქარდეს ცირკულარული ეკონომიკის პრინციპების დანერგვა ქვეყნის ეკონომიკის სხვადასხვა დონეზე. პლენარული   შეხვედრა   ორგანიზებული იყო  საქართველოს   ბუნების   მკვლევართა   კავშირის  „ორქისი“ მიერ,   პროექტის   „დავიცვათ საქართველოს   სისუფთავე“   კომპონენტის   „ცირკულარული   ეკონომიკის   შეფასება საქართველოში“ ფარგლებში. პროექტს „დავიცვათ საქართველოს სისუფთავე“ ახორციელებს არასამთავრობო   ორგანიზაციათა   კონსორციუმი:  სბმკ   „ორქისი”,   დავიცვათ   საქართველოს სისუფთავე   და   საქართველოს   მწვანეთა   მოძრაობა/დედამიწის   მეგობრები-საქართველო, შვედეთის   მთავრობის   ფინანსური   უზრუნველყოფით,   საქართველოს   გარემოს   დაცვისა   და სოფლის   მეურნეობის   სამინისტროს,   რეგიონული   განვითარებისა   და   ინფრასტრუქტურის სამინისტროს, განათლების, მეცნიერების,   კულტურისა   და   სპორტის   სამინისტროს მხარდაჭერით, საქართველოს მყარი ნარჩენების მართვის კომპანიასთან და გარემოსდაცვითი ინფორმაციისა და განათლების ცენტრთან  თანამშრომლობით. შეხვედრას განვითარების თანამშრომლობის სააგენტოს ხელმძღვანელი ერიკ ილესი, გარემოს დაცვის, სოციალური, მმართველობისა და ცირკულარული ეკონომიკის საკითხების საერთაშორისო ექსპერტი, გაეროს ცირკულარული ეკონომიკის მრჩეველთა საბჭოს წევრი და დამოუკიდებელი   ექსპერტი დარიუშ ედვარდ პრასეკი, საქართველოს ბუნების მკვლევართა კავშირის „ორქისი“ თავმჯდომარე და პროექტის „დავიცვათ საქართველოს სისუფთავე“ მენეჯერი  მარიამ ქიმერიძე, გარემოს დაცვისა და სოფლის მეურნეობის სამინისტროს სისტემაში შემავალი შესაბამისი სტრუქტურებისა და კერძო სექტორის წარმომადგნელები ესწრებოდნენ.
#

საქართველოს ვენახების ეროვნული კადასტრის შექმნა რთველის პროცესის გამარტივებას და ყურძნისეული პროდუქტების ხარისხს უზრუნველყოფს. დღეის მონაცემებით, კახეთის რეგიონში რეგისტრაცია 20.000-მდე მევენახე ფერმერმა გაიარა

ვენახების კადასტრის პროგრამა მიმდინარე წელს დასრულდება კახეთისა და რაჭა-ლეჩხუმის რეგიონებში. მომდევნო წლებში კი, საქართველოს მევენახეობის ყველა რეგიონს მოიცავს.საქართველო, ვენახების კადასტრის შექმნით, კიდევ ერთ მნიშვნელოვან ევროპულ გამოცდილებას გაიზიარებს და დანერგავს.ღვინის ეროვნული სააგენტო საქართველოს ვენახების კადასტრის პროგრამას 2014 წლიდან ახორციელებს.  საქართველოს ვენახების ეროვნული კადასტრის შექმნა უზრუნველყოფს რთველის პროცესის გამარტივებას და გამჭვირვალედ ჩატარებას, წარმოებული ღვინის და სხვა ყურძნისეული პროდუქტის მიკვლევადობასა და ხარისხის უზრუნველყოფას.ვენახების კადასტრის პროგრამის ფარგლებში, 2021 წლიდან, ვენახების რეგისტრაცია და კადასტრის ამონაწერით მოსავლის ჩაბარება ყველა მევენახისთვის სავალდებულო გახდა. დღეის მონაცემებით, რეგისტრაცია კახეთის რეგიონში 20.000-მდე მევენახე ფერმერმა გაიარა.
#

საქართველოს მასშტაბით, 13 სრულად ფუნქციური, ეროვნული და საერთაშორისო სტანდარტის მქონე სოფლის მეურნეობის ლაბორატორია იმუშავებს

სოფლის მეურნეობის სახელმწიფო ლაბორატორია ეროვნული სტანდარტის სსტ ისო/იეკ 17025:2017/2018 შესაბამის აკრედიტაციის სტატუსს ფლობს და დანერგილი აქვს საერთაშორისო სტანდარტის ISO 9001:2015 მოთხოვნების შესაბამისი ხარისხის მენეჯმენტის სისტემა.ლაბორატორიაში ყოველწლიურად მიმდინარეობს ახალი, საერთაშორისო სტანდარტების შესაბამისი კვლევის მეთოდების შესწავლა, დანერგვა და შემდგომ აკრედიტაცია. უახლოეს 10 წელიწადში, ლაბორატორიაში ამჟამად არსებული კვლევების რაოდენობა  50%-ით  გაიზრდება.მოსახლეობის ინტერესის გათვალისწინებით, უახლოეს პერიოდში, ლაბორატორიის ქსელში, უკვე არსებულ ლაბორატორიებთან ერთად (თბილისი, ქუთაისი, ახალციხე, დუშეთი, გურჯაანი, ოზურგეთი, გორი, მარნეული, ბათუმი, ამბროლაური, ზუგდიდი), დამატებით, ორი ახალი ლაბორატორია (საჩხერე, მესტია) დაიწყებს აქტიურ მუშაობას. საქართველოს მასშტაბით, 13 სრულად ფუნქციური, ეროვნული და საერთაშორისო სტანდარტის მქონე ლაბორატორია იმუშავებს.ლაბორატორიაში უწყვეტი აკრედიტაციის პროცესი მიმდინარეობს. შესაბამისად, ყოველ ოთხ წელიწადში ერთხელ  ხდება არსებული კვლევის მეთოდების რეაკრედიტაცია. გარდა ამისა, ლაბორატორიის სპეციალისტები ყოველწლიურად წარმატებით გადიან საერთაშორისო საკვალიფიკაციო ტესტირებებს.