#

„თბილისის ჩაის ფესტივალი"

ჩაისა და თაფლის საერთაშორისო ფესტივალი, მთაწმინდის პარკში, გარემოს დაცვისა და სოფლის მეურნეობის მინისტრის მოადგილემ გიორგი ხანიშვილმა გახსნა. „თბილისის ჩაის ფესტივალი“ სამინისტროს, საქართველოს ჩაის მწარმოებელთა ასოციაციისა და მთაწმინდის პარკის მიერ არის ორგანიზებული.ფესტივალის მთავარი ამოცანაა მეჩაიეობის სფეროში ეკონომიკური ზრდის წახალისება, ერთობლივი ეკონომიკური რეგიონული პროექტების განხორციელება, ადგილობრივი საშუალო და მცირე მწარმოებლების მხარდაჭერა, ასევე საზოგადოებაში მომხმარებელთა შორის ნატურალური ჩაის პოპულარიზაცია და შიდა ბაზრის ათვისება.„დღევანდელ ფესტივალზე წარმოდგენილია ჩაის და თაფლის სეგმენტი, მონაწილეობას იღებენ ჩაის იმპორტიორებიც. ფესტივალი აჩვენებს თუ როგორი პროგრესია ყოველ წლიურად ამ სფეროში, ჩნდებიან ახალი კომპანიები და ვითარდებიან უკვე არსებულები. ასეთი ღონისძიებები ხელს უწყობს, როგორც ტრადიციების შენარჩუნებას და განვითარებას, ასევე რეგიონში ამ დარგის აღორძინებას,“ – განაცხადა გიორგი ხანიშვილმა.ჩაის მწარმოებელთა ასოციაციის პრეზიდენტმა თენგიზ სვანიძემ ფესტივალის მნიშვნელობაზე ისაუბრა და აღნიშნა, რომ 2005 წლიდან ის ყოველ წლიურად მეტ მონაწილეს აერთიანებს და დარგის პოპულარიზაციას ახდენს. ფესტივალში 10–მდე ქართული კომპანია და ასევე, უცხოელი მწარმოებლებიც იღებდნენ მონაწილეობას. ფესტივალზე წარმოდგენილი იყო ჩაისა და თაფლის უნიკალური სახეები.„თბილისის ჩაის ფესტივალში“ მონაწილეობა მიიღეს პარლამენტისა და მთავრობის წევრებმა, ასევე საქართველოში აკრედიტირებულმა საელჩოების წარმომადგენლებმა.
#

22 აპრილს დედამიწის დღე აღინიშნება

ყოველი წლის 22 აპრილს, მსოფლიოს 175 ქვეყანაში დედამიწის საერთაშორისო დღეს აღნიშნავენ. საქართველო ამ ქვეყნების სიას 1990 წლიდან შეუერთდა. გარემოს დაცვისა და სოფლის მეურნეობის მინისტრის პირველმა მოადგილემ, ნოდარ კერესელიძემ, პარტნიორ ორგანიზაციებთან და დიპლომატიური კორპუსის წარმომადგენლებთან ერთად, საზოგადოებას მასშტაბური გარემოსდაცვითი კამპანიების შესახებ ინფორმაცია გააცნო. დედამიწის საერთაშორისო დღის წლევანდელი გზავნილია მსოფლიოს მობილიზება პლასტიკის ნარჩენების შესამცირებლად. დედამიწის დღე ამერიკელმა სენატორმა გეოლორდ ნელსონმა მას შედეგ დაარსა, რაც სანტა ბარბარას საბადოდან ნავთობი დაიღვარა, რის შედეგადაც ოკეანე დაბინძურდა და წყლის ბინადრები დაიხოცნენ. „ძალიან მნიშვნელოვანია, რომ უახლოეს მომავალში, სახელმწიფოს მიერ შემუშავებული რეგულაციების ამოქმედებით, მინიმუმადე იქნება დაყვანილი პლასტიკის პარკების მოხმარება და, შესაბამისად, ამ ტიპის ნარჩენებით გარემოს დაბინძურება. სამინისტროს მიერ შემუშავებულია მთავრობის დადგენილების პროექტი „პლასტიკის და ბიოდეგრადირებადი პარკების რეგულირების წესი". აღნიშნულის საჭიროება გამოწვეულია იმ გარემოებით, რომ ბოლო წლებში მთელ მსოფლიოში და, მათ შორის, საქართველოში გაზრდილია პლასტიკის პარკების მოხმარება, რაც მნიშვნელოვან პრობლემას უქმნის გარემოს. შემუშავებული ტექნიკური რეგლამენტი ადგენს საქართველოს ტერიტორიაზე პლასტიკის და ოქსო-დეგრადირებადი პლასტიკის პარკების, ასევე ბიოდეგრადირებადი და კომპოსტირებადი პარკების წარმოებასთან, რეალიზაციასთან და იმპორტთან დაკავშირებულ ძირითად მოთხოვნებს“, - განაცხადა ნოდარ კერესელიძემ. აღსანიშნავია, რომ საზოგადოებამ იცოდეს და, შესაბამისად, აქტიურად ჩაერთოს იმ მასშტაბურ გარემოსდაცვით კამპანიებში, რომლებიც დედამიწის დღესთან დაკავშირებით, მთელი ქვეყნის მასშტაბით არის დაგეგმილი. საქართველოში, ამ დღეს, ოფიციალურად აიღებს სტარტს მასშტაბური გარემოსდაცვითი კამპანია „გარემოს გულისთვის”. კამპანია მიზნად ისახავს სამთავრობო სექტორის, კერძო კომპანიების, არასამთავრობო ორგანიზაციებისა და ადგილობრივი მოსახლეობის ჩართვას საქართველოში სუფთა და მწვანე გარემოს შენარჩუნების ღონისძიებებში. კომპანიებს, ორგანიზაციებს და ყველა დაინტერესებულ პირს შეუძლიათ აირჩიონ ადგილი - გზის განაპირა უბანი, პარკი, სალაშქრო ბილიკი, ქუჩა - და სამი წლის განმავლობაში მის მოვლა-პატრონობაზე აიღონ პასუხისმგებლობა. კამპანიას უკვე შემოუერთდა კერძო, საჯარო და არასამთავრობო სექტორის 15-მდე წარმომადგენელი. „დედამიწის დღის“ აღსანიშნავად, პროექტის „დავასუფთაოთ საქართველო - დავასუფთაოთ მსოფლიო“ ფარგლებში, საქართველოში, წელს უკვე მესამედ გამოცხადდა კონკურსი „სუფთა რეგიონი“. კონკურსის ფარგლებში, ყველა მუნიციპალიტეტში დაასუფთავებენ დანაგვიანებულ ადგილებს. გამოვლინდება ყველაზე სუფთა რეგიონი, სუფთა მუნიციპალიტეტი, სუფთა ქალაქი/დაბა, სუფთა სოფელი/თემი და ლამაზი ეზო. „მადლობა მინდა გადავუხადო საერთაშორისო და პარტნიორ ორგანიზაციებს ჩვენთან აქტიური თანამშრომლობისთვის და უმნიშვნელოვანესი ღონისძიებების განხორციელების პროცესში თანადგომისთვის“, - აღნიშნა ნოდარ კერესელიძემ. დღევანდელ ღონისძიებას ესწრებოდნენ შვედეთის სამეფოს ელჩი მარტინა ქვიქი, USAID-ის ეკონომიკური განვითარების ოფისის დირექტორი ვერონიკა ლი, შვედეთის განვითარების სააგენტოს ხელმძღვანელი საქართველოში მოლი ლეინი, საქართველოს მწვანეთა მოძრაობა/დედამიწის მეგობრები-საქართველო ხელმძღვანელი ნინო ჩხობაძე, კავკასიის გარემოსდაცვითი არასამთავრობო ორგანიზაციების ქსელი (CENN) აღმასრულებელი დირექტორი ნანა ჯანაშია, საქართველოს ბუნების მკვლევართა კავშირი „ორქისი“ და „ეკოლოგიური ცნობიერების ამაღლება და ნარჩენების მართვა“.
#

მომავალ საჯარო მოხელეებს ბელარუსიდან ნოდარ კერესელიძე შეხვდა

გარემოს დაცვისა და სოფლის მეურნეობის მინისტრის პირველი მოადგილე ნოდარ კერესელიძე ბელარუსის რესპუბლიკის საჯარო ადმინისტრირების მიმართულებით ახალგაზრდა მენეჯერთა სკოლის (SYMPA) საგანმანათლებლო პროგრამაში მონაწილე საჯარო მოხელეებს შეხვდა.შეხვედრაზე ნოდარ კერესელიძემ ბელარუს საჯარო მოხელეებს გაერთიანებული სამინისტროს ძირითადი მიმართულებები გააცნო და ყურადღება აგრარული და გარემოსდაცვითი მიმართულებით განხორციელებულ და მიმდინარე პროექტებზე გაამახვილა. ღვინის ეროვნულ სააგენტოში გამართულ შეხვედრაზე მინისტრის პირველმა მოადგილემ ასევე ისაუბრა ქართული ღვინის 8000 წლიანი უწყვეტი ტრადიციის, ღვინის დაყენების წესისა და ქართული პროდუქციის საექსპორტო პოტენციალის შესახებ. აღსანიშნავია, რომ SYMPA საგანმანათლებლო პროგრამა ყოველწლიურად ხორციელდება ბელორუსში მოღვაწე მოაზროვნე საჯარო მოხელეებისთვის და პროგრამა მიზნად ისახავს წარმატებული რეფორმატორი ქვეყნების გამოცდილების შესწავლის საფუძველზე ბელარუსის რესპუბლიკაში მმართველობის სისტემის გაუმჯობესებას.
#

შეხვედრა ტყის მდგრადი მართვის საერთაშორისო გამოცდილებაზე

გარემოს დაცვისა და სოფლის მეურნეობის სამინისტროში ტყის საინფორმაციო და მონიტორინგის სისტემის სექტორში ევროპული გამოცდილების გაზიარების თემები განიხილეს. შეხვედრა ევროკავშირის საჯარო სამსახურების დაძმობილების პროექტის „ტყის მდგრადი მართვის გაძლიერება საქართველოში“ ფარგლებში გაიმართა. მინისტრის მოადგილემ, სოლომონ პავლიაშვილმა შეხვედრაზე ქვეყნისთვის ტყის მონიტორინგის მოდელების შემუშავების საკითხებზე ისაუბრა და პროექტში გერმანიის საერთაშორისო თანამშრომლობის საზოგადოების (GIZ) ჩართულობის საკითხის და მათი ფინანსური მხარდაჭერით დაგეგმილი ტყის ეროვნული ინვენტარიზაციის პროცესის მნიშვნელობაზე გაამახვილა ყურადღება.შეხვედრაზე ტყის საინფორმაციო და მონიტორინგის სისტემების ევროპაში მოქმედი მოდელების გაცნობის მიზნით, უცხოელი ექსპერტების მიერ წარმოდგენილი იყო ლიტვის, უნგრეთის, სლოვაკეთისა და გერმანიის მაგალითები. „ტყის საინფორმაციო და მონიტორინგის სისტემა სატყეო სექტორში გადაწყვეტილებების მიღებისა და ეფექტიანი დაგეგმარების ერთ-ერთი მნიშვნელოვანი ინსტრუმენტია. ჩვენთვის უაღრესად მნიშვნელოვანია ტყის მდგრადი მართვის კუთხით საერთაშორისო გამოცდილების გაზიარება, შესაბამისად მინდა განსაკუთრებული მადლობა გადავუხადო დიპლომატიური კორპუსის წარმომადგენლებს და პროექტში ჩართულ უცხოელ ექსპერტებს თანამშრომლობისა და გამოცდილების გაზიარებისთვის“, - განაცხადა სოლომონ პავლიაშვილმა.გარემოს დაცვისა და სოფლის მეურნეობის სამინისტროში გამართულ შეხვედრას ლიტვის რესპუბლიკის საგანგებო და სრულუფლებიანი ელჩი საქართველოში გიედრიუს პუოჯუნასი, უნგრეთის საგანგებო და სრულუფლებიანი ელჩი საქართველოში ვიქტორია ჰორვატი, სლოვაკეთის სრულუფლებიანი და საგანგებო ელჩი საქართველოში რუდოლფ მიხალკა, გარემოს დაცვისა და სოფლის მეურნეობის სამინისტროს ბიომრავალფეროვნების და სატყეო დეპარტამენტის უფროსი კარლო ამირგულაშვილი, არასამთავრობო ორგანიზაციების და სამინისტროს სისტემაში შემავალი დარგობრივი უწყებების წარმომადგენლები ესწრებოდნენ.
#

შეხვედრა აგრარულ და გარემოსდაცვით მიმართულების პროექტებზე

გარემოს დაცვისა და სოფლის მეურნეობის მინისტრი ლევან დავითაშვილი ნიდერლანდების სამეფოს საგანგებო და სრულუფლებიან ელჩს საქართველოში, ჯოს დოუმას შეხვდა.შეხვედრაზე მხარეებმა გაერთიანებული სამინისტროს ფარგლებში დაგეგმილი პროექტები და სამომავლო თანამშრომლობის საკითხები განიხილეს.როგორც ლევან დავითაშვილმა აღნიშნა, კონსოლიდირებული სამინისტროს ფარგლებში აქტიურად გაგრძელდება თანამშრომლობა აგრარული და გარემოსდაცვითი მიმართულების პროექტებზე. მინისტრმა ერთიანი მენეჯმენტის ქვეშ პროექტების სწრაფი და ეფექტიანი განხორციელების შესაძლებლობაზე გაამახვილა ყურადღება.ლევან დავითაშვილმა ელჩს მსხვილი სასათბურე კლასტერის პროექტი გააცნო, რომელიც სახელმწიფოს მხარდაჭერით, იმერეთის რეგიონში აგროზონის შექმნას ითვალისწინებს. მინისტრმა ასევე ნიდერლანდების სამეფოში ქართული სასოფლო-სამეურნეო პროდუქციის ექსპორტის ზრდის შესაძლებლობებზე ისაუბრა. შეხვედრაზე საუბარი შეეხო საქართველოში კენკროვანი კულტურების განვითარების პროექტსაც.  
#

ტყის მოვლა-აღდგენის სამუშაოებზე შეხვედრაზე იმსჯელეს

გარემოს დაცვისა და სოფლის მეურნეობის სამინისტროში პროექტის Global Forest Watch” (GFW) ეროვნული სამეთვალყურეო/მრჩეველთა საბჭოს შეხვედრა გაიმართა, რომელსაც გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი ხელმძღვანელობდა. შეხვედრაზე სატყეო პოლიტიკა და სტრატეგია, დაგეგმილი და პრიორიტეტული აქტივობები და მოსალოდნელი შედეგები განიხილეს. პროექტის წარმომადგენლებმა „ტყისა და მიწათსარგებლობის ინფორმაციის და გადაწყვეტილების მხარდამჭერი“ (FLUIDS) სისტემის შემუშავების პროცესზე, მიმდინარე და დაგეგმილ ღონისძიებებსა და არსებულ გამოწვევებზე ისაუბრეს. ინტერაქტიულ რეჟიმში წარიმართა მსჯელობა ტყის მართვის დონის ინვენტარიზაციაზე, ტყის მოვლა-აღდგენის სამუშაოებსა და UNFCCC / NCD ტყის ნაწილის ვალდებულებების აღსრულებაზე, ასევე განხილულ იქნა ეროვნული ტყის ინვენტარიზაციის სტატუსი.შეხვედრას გარემოს დაცვისა და სოფლის მეურნეობის მინისტრის მოადგილესთან, სოლომონ პავლიაშვილთან ერთად, გაეროს გარემოსდაცვითი პროგრამის (UNEP), მსოფლიო რესურსების ინსტიტუტის (WRI), გარემოსდაცვითი არასამთავრობო ორგანიზაციებისა და აკადემიური სფეროს წარმომადგენლები ესწრებოდნენ. 
#

ფაროსანათან ბრძოლის ღონისძიებები კახეთში განიხილეს

გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი კახეთში იმყოფებოდა, სადაც რეგიონის გუბერნატორთან ერთად, ადგილობრივი თვითმმართველობის წარმომადგენლებს და საინფორმაციო-საკონსულტაციო სამსახურის თანამშრომლებს შეხვდა. შეხვედრაზე სოფლის მეურნეობის დარგში არსებული გამოწვევები და გადაჭრის გზები განიხილეს. განსაკუთრებული ყურადღება აზიური ფაროსანას წინააღმდეგ ბრძოლის 2018 წლისთვის დაგეგმილ ღონისძიებებს დაეთმო. ასევე აღინიშნა, რომ პროცესში სამინისტროს ყველა უწყება თვითმმართველობებთან და სამხარეო ადმინისტრაციასთან ერთად კოორდინირებულად იქნება ჩართული ფაროსანას წინააღმდეგ ბრძოლის გასატარებელ ღონისძიებებში.