#

კონკურსის „შეაჩერე პლასტმასით დაბინძურება“ გამარჯვებულ ჟურნალისტებს ჯილდოები გადაეცათ

პირველი ადგილი თეა თოფურიამ (რადიო თავისუფლება), მეორე ადგილი კი, ანანო მჭედლიშვილმა (on.ge) დაიკავეს. გამარჯვებულები გარემოს დაცვისა  და სოფლის მეურნეობის მინისტრის მოადგილემ, სოლომონ პავლიაშვილმა დააჯილდოვა. „პლასტმასის ნარჩენების სწორი მართვა არა მარტო საქართველოში, არამედ მთელ მსოფლიოში აქტუალურია. გარემოს დაცვისა და სოფლის მეურნეობის სამინისტრომ, უკანასკნელ წლებში, ნარჩენების მართვის კუთხით მნიშვნელოვანი რეფორმები განახორციელა. შეიქმნა არაერთი საკანონმდებლო და სტრატეგიული დოკუმენტი, რომლებიც ხელს უწყობს ქვეყანაში ნარჩენების, მათ შორის, პლასტმასის ნარჩენების მართვის საკითხების საერთაშორისო სტანდარტებთან შესაბამისობაში მოყვანას. საზოგადოების როლი სუფთა და ჯანსაღი გარემოს შენარჩუნებაში უდიდესია, რისთვისაც საჭიროა, მოსახლეობას მივაწოდოთ სწორი ინფორმაცია და დავანახოთ ის საფრთხე, რომელსაც პლასტმასის ნარჩენები უქმნის გარემოს და, შესაბამისად, ადამიანის ჯანმრთელობას“, - განაცხადა სოლომონ პავლიაშვილმა.კონკურსში „შეაჩერე პლასტმასით დაბინძურება“ სტატიები, ბლოგები და ვიდეოები პლასტმასის ნარჩენებით დაბინძურების შესახებ 30 მონაწილემ წარადგინა. გამარჯვებული ფინალისტები ჟიურიმ გამოავლინა.აღნიშნული კონკურსი პროექტის „პლასტმასის ნარჩენების პრევენციის ეროვნული პროგრამის” ფარგლებში განხორციელდა, რომელიც გარემოს დაცვისა და სოფლის მეურნეობის სამინისტროს, CENN-ის და ნორვეგიის საელჩოს მხარდაჭერით შემუშავდა. მისი მიზანია, ხელი შეუწყოს საქართველოს სწრაფვას, გახდეს ნარჩენების პრევენციასა და რეციკლირებაზე ორიენტირებული ქვეყანა და უზრუნველყოს პლასტმასის პროდუქტების მდგრადი და უსაფრთხო მოხმარება და წარმოება. 
#

განხორციელებული პროექტების შედეგებსა და არსებულ გამოწვევებზე კარტოფილის საერთაშორისო ცენტრის (CIP) ორგანიზებით გამართულ კონფერენციაზე იმსჯელეს

გარემოს დაცვისა და სოფლის მეურნეობის მინისტრის მოადგილემ, სოლომონ პავლიაშვილმა კარტოფილის საერთაშორისო ცენტრის (CIP) ორგანიზებით გამართულ კონფერენციაში მიიღო მონაწილეობა. კონფერენციაზე CIP-ის მიერ საქართველოში სახელმწიფო და დონორ ორგანიზაციებთან ერთად განხორციელებულ პროექტებზე, შედეგებსა და დარგში არსებულ გამოწვევებზე იმსჯელეს.  „ქვეყანაში წარმოებული კარტოფილის მოსავლიანობა და ხარისხი მეტად გაუმჯობესებას საჭიროებს. სამინისტრო აქტიურად არის ჩართული დარგის განვითარების ხელშეწყობაში. გასულ წელს 30 ტონა საადრეო კარტოფილი გავიტანეთ ექსპორტზე, რაც ცხადყოფს, რომ ქვეყანას ამ მიმართულებით დიდი პოტენციალი აქვს. კარტოფილის საერთაშორისო ცენტრის მხარდაჭერა და თანამედროვე ტექნოლოგიების დანერგვა ჩვენს ფერმერებს მეტ შესაძლებლობას მისცემს კონკურენტუნარიანი პროდუქცია აწარმოონ და ექსპორტზე გაიტანონ“, - აღნიშნა სოლომონ პავლიაშვილმა. საქართველოში კარტოფილის კულტურა, დაახლოებით,  25,000 ჰექტარ ფართობზე ითესება. კარტოფილის საშუალო მოსავლიანობა, ერთ ჰექტარზე, 12 ტონაა, რაც, ევროპის ქვეყნების მაჩვენებელთან შედარებით, დაბალია. დარგის ძირითადი პრობლემა ფერმერების მიერ გამოყენებული დაბალი ხარისხის ან დაბალმოსავლიანი სათესლე კარტოფილის გამოყენებაა.  გარემოს დაცვისა და სოფლის მეურნეობის სამინისტროს სოფლის მეურნეობის სამეცნიერო-კვლევითი ცენტრი კარტოფილის საერთაშორისო ცენტრთან 2016 წლიდან თანამშრომლობს. ცენტრი საქართველოს კარტოფილის ელიტური ჯიშების და ინოვაციური მეთოდების დანერგვაში ეხმარება, რას ქვეყანას სასურსათო უსაფრთხოებას და ფერმერების შემოსავლების სტაბილურ ზრდას უზრუნველყოფს. 5 წლიანი პროექტის ფარგლებში, უკვე დარეგისტრირებულია კარტოფილის 3 ახალი ჯიში - მესხური, მესხური წითელი და ჯავახეთური, რომლებიც გარემო პირობებთან ადაპტირებული, დაავადებებისადმი გამძლე და მაღალმოსავლიანია;  3 ჯიშის დარეგისტრირება ამ ეტაპზე მიმდინარეობს. 
#

სოლომონ პავლიაშვილმა ონლაინ სემინარში „შეფუთვების ტექნოლოგია და წრიული ეკონომიკა“ მიიღო მონაწილეობა

გარემოს დაცვისა და სოფლის მეურნეობის მინისტრის მოადგილემ,  სოლომონ პავლიაშვილმა შეფუთვების მსოფლიო ორგანიზაციის (WPO) მიერ ორგანიზებულ ონლაინ სემინარში „შეფუთვების ტექნოლოგია და წრიული ეკონომიკა“ მიიღო მონაწილეობა. WPO-ს მიერ საქართველოში პირველად ორგანიზებული სემინარის მიზანს შეფუთვების ტექნოლოგიების, წრიული ეკონომიკისა და გარემოს მიმართ მდგრადობის, ასევე, სექტორში მიმდინარე სიახლეებისა და გამოწვევების შესახებ საერთაშორისო გამოცდილების გაზიარება წარმოადგენდა. მისასალმებელ სიტყვაში, მინისტრის მოადგილემ მადლობა გადაუხადა ევროკავშირს და გაეროს განვითარების პროგრამას (UNDP) პროექტის მხარდაჭერისთვის და ყურადღება ქვეყანაში გარემოსდაცვითი პოლიტიკის პრიორიტეტულობის საკითხსა და ამ კუთხით სახელმწიფოს მიერ შემუშავებულ საკანონმდებლო ინიციატივებზე გაამახვილა. „შეფუთვის ნარჩენების მართვა ქვეყნის გარემოსდაცვითი პოლიტიკის ერთ-ერთი მნიშვნელოვანი კომპონენტია. მოგეხსენებათ, გარემოს დაცვისა და სოფლის მეურნეობის სამინისტრომ, მთავრობასთან აქტიური თანამშრომლობით, ნარჩენების მართვის სტრატეგია და სამოქმედო გეგმა შეიმუშავა. მწარმოებლის გაფართოებული ვალდებულების 4 რეგლამენტი უკვე დამტკიცებულია საქართველოს მთავრობის მიერ. ჩვენთვის მნიშვნელოვანია, რომ სახელმწიფოს მიერ მიღებული გადაწყვეტილებები კერძო სექტორთან მჭიდრო თანამშრომლობით მიიღწევა. მივესალმებით საერთაშორისო გამოცდილების გაზიარებას და სექტორის განვითარებისთვის ქვეყანაში ინვესტიციების განხორციელებას“, - განაცხადა სოლომონ პავლიაშვილმა. როგორც მინისტრის მოადგილემ აღნიშნა, მწარმოებლის გაფართოებული ვალდებულება განვითარებულ ქვეყნებში მთავარ ფინანსურ ინსტრუმენტს წარმოადგენს, რომლის  ქვეყანაში დანერგვაც ხელს შეუწყობს რესურსდამზოგავი ცირკულარული ეკონომიკის განვითარებასა და ნარჩენების მართვის თანამედროვე სისტემის ჩამოყალიბებას. ონლაინ სემინარი ევროკავშირისა და გაეროს ერთობლივი პროგრამის „ევროკავშირის ინოვაციური პროექტი კერძო სექტორის კონკურენტუნარიანობისთვის საქართველოში" და PMAG შემფუთველთა კლასტერის  მხარდაჭერით გაიმართა. მნიშვნელოვანია, რომ PMAG შემფუთველთა კლასტერი შეფუთვების მსოფლიო ორგანიზაციის  ერთადერთი  ქართული ორგანიზაციაა, რომელიც 45 ქვეყნის 65 წევრს აერთიანებს. ონლაინ სემინარს სამინისტროს შესაბამისი სამსახურის ხელმძღვანელი პირები და შესაფუთი მასალების მწარმოებელი და შემფუთველი კომპანიების წარმომადგენლები ესწრებოდნენ.
#

საქართველოს მთავრობამ „სახელმწიფო საკუთრებაში არსებული საძოვრების ხელმისაწვდომობის“ სახელმწიფო პროგრამა დაამტკიცა

აღნიშნული პროგრამა საქართველოს ტერიტორიაზე სახელმწიფოს საკუთრებაში რეგისტრირებული საძოვრების რაციონალურად გამოყენების და ხელმისაწვდომობის გაუმჯობესების მიზნით შემუშავდა. პროგრამის განმახორციელებელია სსიპ მიწის მდგრადი მართვისა და მიწათსარგებლობის მონიტორინგის ეროვნული სააგენტო; პროგრამის განხორციელებას კოორდინაციას უწევს საქართველოს გარემოს დაცვისა და სოფლის მეურნეობის სამინისტრო. საქართველოს ტერიტორიაზე ბუნებრივი სათიბებისა და საძოვრების ფართობი დაახლოებით 1,8 მლნ ჰა-ს შეადგენს, მათ შორის, დაახლოებით, 500 ათასი ჰექტარი ეროზიულია. საძოვრების ეკოსისტემას და მცენარეულ საფარს განსაკუთრებით აზიანებს პირუტყვის მრავალწლიანი ექსტენსიური ძოვება, სიმჭიდროვის ზრდა და საძოვრების არარაციონალური გამოყენება. უსისტემო გამოყენების შედეგად, მცირდება ნიადაგის ზედაპირის ბალახოვანი საფარი. საძოვრების არარაციონალური გამოყენება და ბალახის საფარის განადგურება იწვევს  ნიადაგის სტრუქტურის შეცვლას.  ახალი პროგრამის „სახელმწიფო საკუთრებაში არსებული საძოვრების ხელმისაწვდომობა“ ფარგლებში, გათვალისწინებულია საქართველოს ტერიტორიაზე სახელმწიფო საკუთრებაში რეგისტრირებული საძოვრის კატეგორიის 3219 ერთეული მიწის ნაკვეთზე, საერთო ფართი - 89 905  ჰექტარი, ხელმისაწვდომობის გაუმჯობესება და საძოვრების მოვლა-სარგებლობაზე ლეგიტიმური კერძო პასუხისმგებლობის გაჩენა, რაც თავის მხრივ, საძოვრების რაციონალური გამოყენების, ხარისხობრივი გაუმჯობესების, მეცხოველეობის განვითარების და ადგილობრივი პროდუქციის რაოდენობრივი და ხარისხობრივი ზრდის ერთ-ერთი მთავარი წინაპირობაა. პროგრამაში მონაწილეობის მიღების უფლება აქვს ფიზიკურ ან იურიდიულ პირს, მათ შორის, სასოფლო-სამეურნეო კოოპერატივს, ასევე, ამხანაგობას, რომელსაც შერჩეული აქვს იჯარის უფლებით გასაცემი საძოვარი და, ამავდროულად განაცხადის წარდგენისას, მფლობელობაში გააჩნია იჯარის უფლებით გასაცემი საძოვრის ასათვისებლად საკმარისი რაოდენობის მსხვილფეხა ან/და წვრილფეხა რქოსანი პირუტყვი (ერთი სული მსხვილფეხა რქოსანი პირუტყვისთვის არანაკლებ 1 ჰა და არაუმეტეს 1.5 ჰა, ხოლო წვრილფეხა რქოსანი პირუტყვისთვის -  0.2 ჰა და არაუმეტეს 0.5 ჰა). პროექტი ითვალისწინებს დაინტერესებული პირის განცხადების საფუძველზე დაურეგისტირებელი საძოვრის კატეგორიის მიწის ნაკვეთების გამოვლენასა და დარეგისტრირებას მათი ამ პროგრამაში ჩართვის მიზნით. ასევე მოხდება შესაბამისი კატეგორიის გარეშე რეგისტრირებული სასოფლო-სამეურნეო დანიშნულების მიწის ნაკვეთების კატეგორიების დადგენა. პროგრამის ფარგლებში, სახელმწიფო საკუთრებაში არსებული საძოვრები გაიცემა აუქციონის წესით, 3-წლიანი იჯარით, ხოლო საძოვარი რომელიც მდებარეობს „წიაღის შესახებ“ საქართველოს კანონით განსაზღვრულ სახელმწიფო საკუთრებაში არსებულ მიწებზე - ერთი წლის ვადით, თუ ლიცენზიის მფლობელთან შეთანხმებით სხვა ვადა არ იქნა განსაზღვრული.
#

გიორგი ხანიშვილმა სოფლის განვითარების უწყებათაშორისი საკოორდინაციო საბჭოსთან არსებული სამოქალაქო კომიტეტის შეხვედრაში მიიღო მონაწილეობა

სოფლის განვითარების უწყებათაშორისი საკოორდინაციო საბჭოსთან არსებული სამოქალაქო კომიტეტის ონლაინ შეხვედრას გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი ხელმძღვანელობდა.  სამოქალაქო კომიტეტის მიზანია, ევროკავშირის წევრ ქვეყნებში არსებული პრაქტიკის შესაბამისად, ხელი შეუწყოს სამოქალაქო სექტორთან თანამშრომლობის გაძლიერებას, სოფლის მეურნეობისა და სოფლის განვითარების პოლიტიკის დაგეგმვისა და განხორციელების გაუმჯობესებას.შეხვედრაზე გიორგი ხანიშვილმა ყურადღება გაამახვილა სამინისტროში მიმდინარე ინსტიტუციურ რეფორმაზე, რომელიც ევროკავშირისა (EU) და გაეროს განვითარების პროგრამის  (UNDP) მხარდაჭერით, სოფლისა და სოფლის მეურნეობის განვითარების ევროპის სამეზობლო პროგრამის (ENPARD) ფარგლებში, პროექტ „სოფლის განვითარების გაუმჯობესება“ თანამშრომლობით ხორციელდება. რეფორმა მიზნად ისახავს გარემოს დაცვისა და სოფლის მეურნეობის სამინისტროში ევროპული ტიპის წარმმართველი ორგანოსა (Managing Authority) და გადამხდელი სააგენტოს (Paying Agency) ჩამოყალიბებას. „ინსტიტუციური რეფორმა მნიშვნელოვანია სოფლის განვითარების სააგენტოს გადამხდელ სააგენტოდ გარდაქმნისთვის. რეფორმის განხორციელებისთვის განსაკუთრებით მნიშვნელოვანია ჩვენი სამოქალაქო და სახელმწიფო სექტორის მხრიდან აქტიური ჩართულობა. მადლობას ვუხდი ევროკავშირის და UNDP-ის ექსპერტებს, სამოქმედო გეგმის შემუშავებაში დახმარებისთვის“, - განაცხადა გიორგი ხანიშვილმა. სამოქალაქო კომიტეტის სამუშაო შეხვედრაზე, ევროკავშირის სოფლის განვითარების საკითხებში ექსპერტმა მოსაზრებები წარადგინა მსგავსი კომიტეტების მუშაობის წესზე, პროცესში მონაწილე მხარეების როლსა და ევროპულ გამოცდილებაზე. შეხვედრაზე ასევე განიხილეს საქართველოს გარემოს დაცვის და სოფლის მეურნეობის სამინისტროს მიერ შემუშავებული სტატისტიკური კრებულები, რომლებიც მოიცავს როგორც უშუალოდ მემცენარეობის და მეცხოველეობის მიმართულებების, ასევე, სოფლის მეურნეობის დარგის ამსახველ მაკროეკონომიკურ მაჩვენებლებს. აღნიშნული პუბლიკაციები მნიშვნელოვანი დოკუმენტებია სოფლის მეურნეობის და სოფლის განვითარების საკითხებით დაინტერესებული საჯარო და სამოქალაქო პირებისთვის. სამოქალაქო კომიტეტის ონლაინ გამართულ შეხვედრას გარემოს დაცვისა და სოფლის მეურნეობის, ეკონომიკისა და მდგრადი განვითარების, რეგიონული და ინფრასტრუქტურის, განათლებისა და მეცნიერების და იუსტიციის სამინისტროების, სამოქალაქო კომიტეტის, გაეროს განვითარების პროგრამის (UNDP) წარმომადგენლები და ექსპერტი ევროკავშირის სოფლის განვითარების საკითხებში ესწრებოდნენ.
#

საქართველოში კლიმატის მწვანე ფონდის (GCF) პროექტი „საქართველოში ტყის სექტორის რეფორმის განხორციელების მხარდაჭერა - ECO.Georgia“ იწყება

პროექტის ფარგლებში, გარემოს დაცვისა და სოფლის მეურნეობის სამინისტროს, ეკონომიკისა და მდგრადი განვითარების სამინისტროსა და გერმანიის საერთაშორისო თანამშრომლობის საზოგადოებას (GIZ) შორის შეთანხმება „ტექნიკური თანამშრომლობის პროექტების განხორციელების შესახებ” გაფორმდა. შეთანხმებას ხელი მოაწერეს  გარემოს დაცვისა და სოფლის მეურნეობის მინისტრმა, ლევან დავითაშვილმა, ეკონომიკისა და მდგრადი განვითარების მინისტრმა, ნათია თურნავამ, გერმანიის საერთაშორისო თანამშრომლობის საზოგადოების (GIZ) საქართველოს ოფისის ხელმძღვანელმა, კარლ ტესტენსენმა და პროექტის ECO.Georgia-ს ხელმძღვანელმა, ლუტც იარჩინსკიმ. „ვიწყებთ  პროექტს, რომელიც კლიმატის მწვანე ფონდის, გერმანიისა და შვეიცარიის მთავრობების მიერ 47 მლნ ევროს საგრანტო დაფინანსებას ითვალისწინებს და დაგვეხმარება ქვეყანაში ტყის მდგრადი მართვის ჩამოყალიბებაში, ენერგოეფექტური და კლიმატგონივრული ტექნოლოგიების დანერგვაში,  ტყის მართვის გაუმჯობესებაში. პროექტი ხელს შეუწყობს ადგილობრივი მოსახლეობის კეთილდღეობას, გაძლიერდება და გაუმჯობესდება ტყისა და ტყის რესურსების კონტროლი, ბიომრავალფეროვნების კონსერვაცია. პროექტი ხელს შეუწყობს ტყის ახალი  კოდექსის დანერგვას და ახალი მიდგომების აღსრულებას“,- განაცხადა ლევან დავითაშვილმა. პროექტის განხორციელებისთვის, GCF-ის სამეთვალყურეო საბჭომ, 2020 წლის აგვისტოში,  33 მილიონი ევროს ოდენობის გრანტი დაამტკიცა. პროექტის, რომლის  ხანგრძლივობა 7 წელია (2021-2027 წწ), თანადამფინანსებლები არიან გერმანიის ფედერაციული რესპუბლიკის მთავრობა (10 000 000 მილიონი ევრო) და შვეიცარიის კონფედერაციის მთავრობა (4 090 000 მილიონი ევრო).„საქართველოში დაიწყო მნიშვნელოვანი რეფორმის განხორციელება, რომელიც ტყით ეფექტიანი სარგებლობის სისტემის და ენერგოეფექტური ტექნოლოგიების დანერგვას უკავშირდება. მნიშვნელოვანია, რომ ამ პროცესში საქართველოს მხარდამჭერები არიან მსხვილი საერთაშორისო ორგანიზაციები  - კლიმატის მწვანე ფონდი (GCF), გერმანიის საერთაშორისო თანამშრომლობის საზოგადოება (GIZ), ასევე გერმანიის და შვეიცარიის მთავრობები და გვეხმარებიან პროცესის სწორად დაგეგმვასა და წარმართვაში. ეს არის მნიშვნელოვანი, როგორც ენერგოეფექტურობის ამაღლებისთვის, ასევე ეკოტურიზმის განვითარებისთვის“, - აღნიშნა ნათია თურნავამ. პროექტი, ტყის აღდგენის, ტყის კარგვის შემცირების, ტყის მდგრადი მართვისა და კონსერვაციის გზით, ხელს შეუწყობს ტყის ნახშირბადის მარაგების გაზრდას, ასევე, დაეხმარება ენერგოეფექტური და ალტერნატიული საწვავისთვის ბაზრის განვითარებას, მოსახლეობის საცხოვრებელი პირობების გაუმჯობესებას და ადგილობრივი თვითმმართველობის როლის გაზრდას ტყის მდგრად მართვაში, ცნობიერების ამაღლების, პროფესიული უნარ-ჩვევების გაუმჯობესებისა და შესაბამისი პოლიტიკისა და რეგულაციების მეშვეობით. აღნიშნული პროექტი  ხელს შეუწყობს საქართველოს გაეროს კლიმატის ცვლილების ჩარჩო კონვენციისადმი „ეროვნულ დონეზე განსაზღვრული წვლილის“ უპირობო და განსაზღვრული პირობით ვალდებულებების შესრულებას, ასევე  ტყის ახალი კოდექსის აღსრულებას. პროექტი საქართველოს სამი რეგიონის - გურიის, მცხეთა-მთიანეთის და კახეთის 8 მუნიციპალიტეტს (ახმეტა, თელავი, დედოფლისწყარო, ყვარელი, თიანეთი, ლანჩხუთი ოზურგეთი და ჩოხატაური) მოიცავს. ღონისძიების ფარგლებში, გარემოს დაცვისა და სოფლის მეურნეობის მინიტრმა, ლევან დავითაშვილმა, გერმანიის ფედერაციული რესპუბლიკის საგანგებო და სრულუფლებიანმა ელჩმა საქართველოში ჰუბერტ კნირშმა და გერმანიის საერთაშორისო თანამშრომლობის საზოგადოების (GIZ) საქართველოს ოფისის ხელმძღვანელმა, კარლ ტესტენსენმა სამინისტროს ეზოში GIZ-ის ახალი ოფისი გახსნეს.შეთანხმებაზე ხელმოწერის ღონისძიებას ესწრებოდნენ გერმანიის ფედერაციული რესპუბლიკის საგანგებო და სრულუფლებიანი ელჩი საქართველოში ჰუბერტ კნირში, შვეიცარიის კონფედერაციის საგანგებო და სრულუფლებიანი ელჩი საქართველოში ქრისტიან შონენბერგერი, დიპლომატიური მისიების და საქართველოს პარლამენტის წარმომადგენლები, გურიის, მცხეთა-მთიანეთის და კახეთის რეგიონების სახელმწიფო რწმუნებულები, გარემოს დაცვისა და სოფლის მეურნეობის სამინისტროს შესაბამისი უწყებების ხელმძღვანელები. 
#

ლევან დავითაშვილი: „ჩვენი მოქალაქეებისთვის ყველა სახელმწიფო პროექტის შესახებ ინფორმაცია ერთიან სივრცეში იქნება თავმოყრილი“

სახელმწიფოს მხარდაჭერით განხორციელებული პროგრამების შესახებ ინფორმაცია დღეიდან ხელმისაწვდომია რუკაზე, რომელიც განთავსებულია ვებგვერდზე www.programs.gov.ge.„ჩვენ ანგარიშვალდებული ვართ ჩვენს მოქალაქეებთან, შესაბამისად, ყველა ინფორმაცია, რომელიც სახელმწიფო პროგრამების ფარგლებში შექმნილი აქტივების შესახებ არსებობს თავმოყრილი იქნება ახალ ინტერაქციულ რუკაზე.მადლობას ვუხდი ეკონომიკისა და მდგრადი განვითარების სამინისტროს, ასევე ყველა იმ უწყებას და ადამიანს, რომლებიც ჩართული იყვნენ ამ მნიშვნელოვანი საინფორმაციო რუკის მომზადების პროცესში. განსაკუთრებით მინდა აღვნიშნო იუსტიციის სამინისტროს წვლილი, რომელიც ჩვენი პარტნიორია. იუსტიციის სამინისტროს საზოგადოების მომსახურების ცენტრებში,  იუსტიციის სახლებში - ერთიან სივრცეში ჩვენი მოქალაქეებისთვის ყველა სახელმწიფო პროექტის შესახებ ინფორმაცია ხელმისაწვდომია. ხშირად ისმოდა კითხვა  იმის შესახებ, თუ ჩვენს მიერ წარმოდგენილი სტატისტიკა რამდენად შეესაბამებოდა რეალობას. ინტერაქციული რუკაზე მოცემულია კონკრეტული საწარმოების შესახებ სრული ინფორმაცია. ვფიქრობ, ეს არის საიმედო, სარწმუნო წყარო იმისათვის, რომ ჩვენ მივიღოთ გადაწყვეტილება, დავკავდეთ მეწარმეობით, ჩავერთოთ სახელმწიფო პროგრამებში, შევამციროთ სიღარიბე, რაც ჩვენი მთავარი ამოცანაა, და ხელი შევუწყოთ ეკონომიკის ზრდას“, - განაცხადა ლევან დავითაშვილმა. გარემოს დაცვისა და სოფლის მეურნეობის და ეკონომიკისა და მდგრადი განვითარების სამინისტროებში შემავალი საქვეუწყებო დაწესებულებების - სააგენტოს „აწარმოე საქართველოში“, სახელმწიფო ქონების ეროვნული სააგენტოსა და სოფლის განვითარების სააგენტოს მიერ, 2013 წლიდან დღემდე, ჯამურად, მხარდაჭერილია 1,806 პროექტი. მოზიდულმა ინვესტიციამ 2,5 მლრდ ლარი შეადგინა და 52,831 ახალი სამუშაო ადგილი შეიქმნა.