#

1 აგვისტოდან 27 დეკემბრამდე 6 მლნ აშშ დოლარის ხურმისა და კარალიოკის ექსპორტი განხორციელდა

2020 წლის 1 აგვისტოდან 27 დეკემბრამდე პერიოდში განხორციელდა 11.4 ათასი ტონა ხურმისა და კარალიოკის ექსპორტი, რომლის ღირებულებამ 6 მლნ აშშ დოლარი შეადგინა. აღნიშნულ პერიოდში განხორციელებული ხურმისა და კარალიოკის ექსპორტის მოცულობა 42%-ით, ხოლო ექსპორტის ღირებულება 43%-ით აღემატება 2019 წლის ანალოგიური პერიოდის მაჩვენებლებს. მიმდინარე წელს წარმოებული ხურმისა და კარალიოკის ექსპორტი ძირითადად განხორციელდა რუსეთის ფედერაციაში (4.8 ათასი ტონა), უკრაინასა (3.3 ათასი ტონა) და სომხეთში (3.2 ათასი ტონა). აღნიშნული ქვეყნების გარდა, ექსპორტი განხორციელდა აგრეთვე ბელორუსიაში, ყატარში, მოლდოვაში, ჰონკონგში, ყაზახეთსა და უნგრეთში.
#

1 აგვისტოდან 27 დეკემბრამდე 30.6 ათასი ტონა მანდარინის ექსპორტი განხორციელდა, რომლის ღირებულებამ 14.8 მლნ აშშ დოლარი შეადგინა

2020 წლის 1 აგვისტოდან 27 დეკემბრამდე პერიოდში განხორციელდა 30.6 ათასი ტონა მანდარინის ექსპორტი, რომლის ღირებულებამ 14.8 მლნ აშშ დოლარი შეადგინა. აღნიშნულ პერიოდში განხორციელებული მანდარინის ექსპორტის მოცულობა 13%-ით, ხოლო ექსპორტის ღირებულება 7%-ით გაიზარდა 2019 წლის ანალოგიური პერიოდის მაჩვენებელთან შედარებით.  მიმდინარე წელს წარმოებული მანდარინის ექსპორტი ძირითადად განხორციელდა რუსეთის ფედერაციაში (17.3 ათასი ტონა), სომხეთსა (6.6 ათასი ტონა) და უკრაინაში (4.8 ათასი ტონა).  აღნიშნული ქვეყნების გარდა, ექსპორტი განხორციელდა აგრეთვე მოლდოვაში, სლოვენიასა და ყაზახეთში.
#

27 დეკემბრამდე თხილის ექსპორტმა 70.7 მლნ აშშ დოლარის ღირებულება შეადგინა

2020 წლის 1 აგვისტოდან 27 დეკემბრამდე პერიოდში განხორციელდა 13.8 ათასი ტონა თხილის ექსპორტი, რომლის ღირებულებამ 70.7 მლნ აშშ დოლარი შეადგინა. აღნიშნულ პერიოდში განხორციელებული თხილის ექსპორტის მოცულობა 4.0 ათასი ტონით (41%) აღემატება 2019 წლის ანალოგიურ პერიოდში განხორციელებული ექსპორტის მოცულობის მაჩვენებელს, ხოლო ექსპორტის ღირებულება 21.5 მლნ აშშ დოლარით (44%)  გაიზარდა. ქართული თხილის ექსპორტი, ძირითადად, ევროკავშირის ბაზრებზე ხორციელდება, კერძოდ, გერმანიაში (3 694 ტონა), იტალიაში (3 368 ტონა), ჩეხეთში (660 ტონა), ლიეტუვაში (379 ტონა), პოლონეთში (354 ტონა), ესპანეთში (408 ტონა), ბულგარეთში (322 ტონა), საფრანგეთში (274 ტონა), ლატვიაში (106 ტონა), საბერძნეთში (97 ტონა), ესტონეთში (88 ტონა), ლუქსემბურგი (84 ტონა), სლოვაკეთში (74 ტონა), ბელგია (44 ტონა), ავსტრიასა (22 ტონა) და ხორვატიაში (10 ტონა).  ქართული თხილი ექსპორტზე გადის ასევე ისეთ ქვეყნებში, როგორებიცაა სომხეთი (807 ტონა), რუსეთი (627 ტონა), თურქეთი (530), ბელარუსი (404 ტონა), უკრაინა (240 ტონა), ბრაზილია (186 ტონა), ალჟირი (185 ტონა), კანადა (146 ტონა), საუდის არაბეთი (145 ტონა), მექსიკა (67 ტონა), უზბეკეთი (58 ტონა), სირია (50 ტონა), შვეიცარია (47 ტონა), არაბთა გაერთიანებული საამიროები (44 ტონა), იორდანია (38 ტონა), დიდი ბრიტანეთი (35 ტონა), ერაყი (24 ტონა), აშშ (19 ტონა) და სხვა. აღსანიშნავია, რომ 2016 წლიდან, აზიური ფაროსანას და სოკოვანი დაავადებების გავრცელების შედეგად, თხილის წარმოება (შესაბამისად ექსპორტი) მცირდებოდა და 2018 წელს მინიმალურ ნიშნულს, 17 ათას ტონას მიაღწია. 2020 წელს მიღებული მაღალი ხარისხის თხილის მოსავალი სახელმწიფო სტრატეგიის საფუძველზე, შესაბამისი სამსახურებისა და ფერმერების მიერ ფაროსანას წინააღმდეგ გატარებული მასშტაბურმა ღონისძიებების შედეგია.
#

27 დეკემბრამდე 8.0 ათასი ტონა ვაშლია ექსპორტირებული

2020 წლის 1 აგვისტოდან 27 დეკემბრამდე პერიოდში განხორციელდა 8.0 ათასი ტონა ვაშლის ექსპორტი, რომლის ღირებულებამ 3.4 მლნ აშშ დოლარი შეადგინა. აღნიშნულ პერიოდში განხორციელებული ვაშლის ექსპორტის მოცულობა 14-ჯერ აღემატება 2019 წლის ანალოგიურ პერიოდში განხორციელებული ექსპორტის მოცულობის მაჩვენებელს, ხოლო ექსპორტის ღირებულება 3.1 მლნ აშშ დოლარით გაიზარდა.  მიმდინარე წელს წარმოებული ვაშლის ექსპორტი ძირითადად განხორციელდა რუსეთის ფედერაციაში, კერძოდ 7.6 ათასი ტონა.  რუსეთის ფედერაციის გარდა, ექსპორტი განხორციელდა აგრეთვე ყაზახეთში, სომხეთში, უნგრეთში, თურქმენეთში, სინგაპურსა და ჰონკონგში.
#

პანდემიის მიუხედავად, ტყის ეროვნული ინვენტარიზაციის სამუშაოები შეუფერხებლად მიმდინარეობს

ტყის ეროვნული  აღრიცხვის 2020 წლის შემაჯამებელი საჯარო ონლაინ შეხვედრა  გარემოს დაცვისა და სოფლის მეურნეობის მინისტრის მოადგილემ, იური ნოზაძემ გახსნა.  შეხვედრაზე წარმოდგენილი იყო ინფორმაცია 2019-2020 წლებში განხორციელებული საველე სამუშაოების, მისი ანალიზის, შედეგებისა და 2021 წელს დაგეგმილი საქმიანობის შესახებ. 2019-2020 წლებში, ტყის ეროვნული აღრიცხვის საველე სამუშაოები ჩატარდა გურიის, მცხეთა-მთიანეთის, აჭარის ა/რ-ის, სამეგრელო-ზემო სვანეთის, სამცხე-ჯავახეთის, იმერეთის, შიდა ქართლის ტერიტორიაზე არსებულ ტყეებში და კახეთის ტერიტორიაზე არსებულ ტყის ნაწილში. 2021 წლისთვის, დაგეგმილია პროექტის დასრულება და დარჩენილი (ქვემო ქართლი, რაჭა-ლეჩხუმი, ქვემო სვანეთი და კახეთის დარჩენილი ნაწილი) რეგიონების აღწერა. შეხვედრაზე ასევე წარმოდგენილი იყო ინფორმაცია ტყის საინფორმაციო და მონიტორინგის სისტემის დანერგვის განხორციელებულ და მიმდინარე საქმიანობაზე და სამომავლო გეგმებზე.როგორც შეხვედრაზე გარემოს დაცვისა და სოფლის მეურნეობის მინისტრის მოადგილემ, იური ნოზაძემ აღნიშნა, პანდემიის მიუხედავად,  სამინისტრომ შეძლო და საქართველოს 6 რეგიონში სრულად და კახეთში ნაწილობრივ დაასრულა ტყის ეროვნული ინვენტარიზაციის სამუშაოები. „2021 წელს, ტყის ეროვნული  აღრიცხვის საველე სამუშაოები დასრულდება და  განხორციელდება მიღებული მონაცემების დამუშავება. ტყის ეროვნული აღრიცხვიდან მიღებული ინფორმაციის საფუძველზე შესაძლებელია საქართველოს ტყეების მდგომარეობის მონიტორინგი. მიღებული მონაცემების ანალიზი საშუალებას მოგვცემს, შევიმუშაოთ სატყეო სექტორის განვითარებისთვის საჭირო სტრატეგიები და ვაწარმოოთ გამართული და მოქნილი საერთაშორისო ანგარიშგება”, - განაცხადა იური ნოზაძემ. აღსანიშნავია, რომ 2019 წელს, საქართველოში და კავკასიის რეგიონში პირველად, გერმანიის მთავრობის ფინანსური და ტექნიკური მხარდაჭერით, დაიწყო ტყის ეროვნული აღრიცხვა. სპეციალურად ამ პროცესისთვის შემუშავდა მეთოდოლოგია და ტექნიკური დოკუმენტაცია. მთავარ მიზანს სახელმწიფოსთვის ტყის მონიტორინგის ეროვნული სისტემის ფუნქციონირება და ქვეყანაში არსებულ ტყეებზე მონაცემთა სარწმუნო ბაზის შექმნა-გამოყენება წარმოადგენს. ტყის ეროვნული ინვენტარიზაციის შედეგად მიღებული და დამუშავებული ინფორმაცია სჭირდება გადაწყვეტილების მიმღებ პირებს და წარმოადგენს საფუძველს, რომელიც დასაბუთებული გადაწყვეტილებების მიღებას უზრუნველყოფს.
#

ლევან დავითაშვილი: „სახელმწიფოს მიერ გაცემული დაფინანსება იყო მიზნობრივი და ის სოციალური ზეწოლა, რაც პანდემიამ გამოიწვია, იყო მაქსიმალურად შემცირებული”

„ჩვენი ანტიკრიზისული გეგმა შეფასდა ძალიან მაღალი ნდობის მქონე უწყების მიერ.  სახელმწიფოს მიერ გადადგმული ნაბიჯები, ძირითადად, შეფასებულ იქნა როგორც ეფექტიანი. მიზანმიმართული იყო ჩვენი დახმარების პაკეტი. საკმაოდ მაღალი იყო სამიზნე ჯგუფების შერჩევის კრიტერიუმები. რომ არა ის ინტერვენციები, რაც სახელმწიფომ განახორციელა, ჩვენს ქვეყანაში სოციალური ფონი ბევრად მძიმე იქნებოდა, ბევრად მძიმე იქნებოდა თითოეული ჩვენი მოქალაქის მდგომარეობა. ჩვენ არ გვაქვს ილუზია, რომ პანდემიიდან გამომდინარე პრობლემები არ არსებობს; აქ საუბარია იმაზე, რომ ჩვენს მიერ რესურსები ეფექტანად და მიზნობრივად დაიხარჯა“, - განაცხადა ლევან დავითაშვილმა.
#

ლევან დავითაშვილი: „მიწის რეფორმის ფარგლებში, კანონქვემდებარე აქტები შემუშავებულია და უახლოეს მომავალში დამტკიცდება“

გარემოს დაცვისა და სოფლის მეურნეობის მინისტრობის კანდიდატმა, ლევან დავითაშვილმა, საქართველოს პარლამენტის აგრარული კომიტეტის თავმჯდომარის, ნინო წილოსანის შეკითხვაზე, მიწის რეფორმის ფარგლებში კანონქვემდებარე აქტების მიღებასთან დაკავშირებით, განმარტება გააკეთა. „2020 წელს შეიქმნა მიწის მდგრადი მართვის სააგენტო, რომელსაც 3 კანონქვემდებარე აქტის მიღება ჰქონდა დავალებული. ეს კანონქვემდებარე აქტები შემუშავდა კერძო სექტორთან თანამშრომლობით, მაგრამ, პანდემიიდან გამომდინარე და იმის გამო, რომ ბევრი საჯარო განხილვის ჩატარება იყო საჭირო, რათა დაინტერესებული პირები ჩართულიყვნენ და მათი ინტერესები ყოფილიყო გათვალისწინებული, მათი მიღება ვერ მოხერხდა. ეს არის კანონქვემდებარე აქტები, რომლებიც უცხოელ ინვესტორებს პირდაპირ უკავშირდება. მათი პოზიციების გათვალისწინება მნიშვნელოვანი იყო ჩვენი ქვეყნის ინტერესების გათვალისწინებით. აქ მთავარი საქართველოს ინტერესების დაცვაა. ეს ნორმატივებიც ზუსტად ამ პრინციპებზე დაყრდნობით შემუშავდა. კანონქვემდებარე აქტები შემუშავებულია და, უახლოეს პერიოდში, დარწმუნებული ვარ, სამივე დაამტკიცდება”, - განაცხადა ლევან დავითაშვილმა.