#

გარემოს დაცვისა და სოფლის მეურნეობის მინისტრის მოადგილე იური ნოზაძე, სამუშაო ვიზიტით, სლოვენიის რესპუბლიკაში იმყოფება

საქართველოს გარემოს დაცვისა და სოფლის მეურნეობის მინისტრის მოადგილე იური ნოზაძე, ეროვნული სატყეო სააგენტოს ხელმძღვანელები და შესაბამისი დარგობრივი დეპარტამენტების ხელმძღვანელები, სამუშაო ვიზიტით, სლოვენიის რესპუბლიკაში იმყოფებიან.  ვიზიტის ფარგლებში, შეხვედრები გაიმართა სლოვენიის რესპუბლიკის სოფლის მეურნეობის, სატყეო და სურსათის სამინისტროს და სახელმწიფო ტყის მართვის ორგანოების წარმომადგენლებთან. შეხვედრებზე აღინიშნა, რომ მნიშვნელოვანია, საქართველომ და სლოვენიის რესპუბლიკამ ტყის მდგრადი მართვის სფეროში გამოცდილება გააზიარონ და არსებული თანამშრომლობა კიდევ უფრო გააღრმავონ.  აღსანიშნავია, რომ  საქართველოსა და სლოვენიის რესპუბლიკას შორის თანამშრომლობა 2018 წელს, საქართველოში ტყის ბუნებრივ ეკოსისტემასთან მიახლოებული მართვის მიდგომის დანერგვის მხარდაჭერით დაიწყო.„საქართველოს გარემოს დაცვისა და სოფლის მეურნეობის სამინისტროს სახელით,  მადლობას ვუხდი სლოვენიის რესპუბლიკის მთავრობას, ასევე სლოვენიის საერთაშორისო თანამშრომლობისა და განვითარების ცენტრს მხარდაჭერისთვის. ჩვენ, 2020 წელს, გავაფორმეთ ტყის მდგრადი მართვის სფეროში თანამშრომლობის მემორანდუმი. მოხარული ვარ, რომ მოგვეცა შესაძლებლობა, გავეცნოთ ტყის მართვის სლოვენიურ პრაქტიკას, რომელიც განსაკუთრებულია ევროპის მასშტაბით და აერთიანებს ბუნების კონსერვაციისა და რესურსების მდგრადი გამოყენების კომპონენტებს”, - განაცხადა გარემოს დაცვისა და სოფლის მეურნეობის მინისტრის მოადგილემ, იური ნოზაძემ. ეროვნული სატყეო სააგენტო სლოვენიის საერთაშორისო თანამშრომლობისა და განვითარების ცენტრის ფინანსური, ასევე WWF-ისა და კომპანიის „ზავიტა“ ტექნიკური მხარდაჭერით, ახორციელებს პროექტს „ტყის მდგრადი მართვა ადიგენში".  პროექტის ფარგლებში, მომზადდება  ტყის მართვის გეგმა ადიგენის სატყეო უბნისთვის, შემუშავდება სატყეო მოდელი და მერქნული რესურსების ღირებულებათა ჯაჭვი,  უზრუნველყოფილი იქნება სატყეო ოპერაციებში ადგილობრივი მოსახლეობის ჩართულობა ეროვნული სატყეო სააგენტოს ზედამხედველობით, გადამზადდებიან ეროვნული სატყეო სააგენტოს თანამშრომლები.  პროექტი „ტყის მდგრადი მართვა ადიგენში" 2021 წლის ბოლოს დასრულდება. პროექტის მიზანია ტყის მდგრადი მართვის ხელშეწყობა და ადგილობრივი მოსახლეობის სოციალურ-ეკონომიკური მდგომარეობის გაუმჯობესება.
#

გარემოს დაცვისა და სოფლის მეურნეობის სამინისტროსა და კავკასიის ბუნების ფონდს (CNF) შორის მემორანდუმი გაფორმდა

მემორანდუმს, რომელიც საქართველოს დაცული ტერიტორიების სისტემის გაფართოების და განვითარების ფინანსურ მხარდაჭერას ითვალისწინებს, გარემოს დაცვისა და სოფლის მეურნეობის მინისტრმა, ლევან დავითაშვილმა, კავკასიის ბუნების ფონდის (CNF) სამეთვალყურეო საბჭოს თავმჯდომარემ, დევიდ მორისონმა და CNF-ის აღმასრულებელმა დირექტორმა, თობიას მიუნხმაიერმა მოაწერეს ხელი. „საგრანტო დახმარებას, რომელიც რამდენიმე მილიონ დოლარს შეადგენს,  საქართველო კავკასიის ბუნების ფონდისგან WYSS Foundation-ის შემოწირულობის სახით მიიღებს. ამ ფინანსური მხარდაჭერით, ჩვენ შევძლებთ ახალი დაცული ტერიტორიების შექმნას, ინფრასტრუქტურის გაუმჯობესება-განვითარებას და ისეთი პროექტების განხორციელებას, რომელიც, კონსერვაციასთან ერთად, ითვალისწინებს  დაბალანსებულ სოციალურ მიდგომებს და ეკონომიკური შესაძლებლობების გაუმჯობესებას ადგილობრივი მოსახლეობისთვის“, - აღნიშნა ლევან დავითაშვილმა.ურთიერთგაგების მემორანდუმის ფარგლებში, დაგეგმილია საქართველოში დაცული ტერიტორიების ფართობის გაზრდა, რაც გულისხმობს რაჭის, სამეგრელო-ზემო სვანეთის, შიდა ქართლისა და გურიის რეგიონებში ხუთი ახალი სივრცის შექმნას. საქართველო კავკასიის ბუნების ფონდისგან, ახლადშექმნილი დაცული ტერიტორიების ფართობის შესაბამისად, 6-10 მლნ აშშ დოლარამდე დახმარებას მიიღებს. მემორანდუმი, დაცული ტერიტორიების მართვის პრაქტიკულ საკითხებთან ერთად, CNF-ის მხრიდან სამართლებრივი ბაზის ჩამოყალიბებაში  მხარდაჭერასაც ითვალისწინებს.  „დღეს გაფორმებული მნიშვნელოვანი მემორანდუმით, ქვეყანაში და, ზოგადად, რეგიონში,  პირველად  შემოდის გარემოსდაცვით სფეროში მოქმედი ერთ-ერთი უმსხვილესი კერძო ამერიკული  საქველმოქმედო ფონდი. ეს წინ გადადგმული ნაბიჯია, რაც დაეხმარება საქართველოს, ერთი მხრივ,  დაცული ტერიტორიების ქსელის გაფართოება-განვითარებაში და, მეორე მხრივ, საერთაშორისო ვალდებულებების შესრულებაში, რაც გაზრდის საქართველოს ცნობადობას საერთაშორისო დონეზე“, - განაცხადა დევიდ მორისონმა. როგორც CNF-ის აღმასრულებელმა დირექტორმა, თობიას მიუნხმაიერმა აღნიშნა, მნიშვნელოვანია დაცული ტერიტორიების დაცვა, რათა ბიომრავალფეროვნება და  გადაშენების საფრთხის წინაშე მყოფი სახეობები შენარჩუნდეს. კავკასიის ბუნების ფონდი, გარემოს დაცვისა და სოფლის მეურნეობის სამინისტროსთან ერთად, შეეცდება 5 ახალი დაცული ტერიტორია განავითაროს და მართოს იმ გზით, რომ კავკასიაში არსებული ველური სახეობები დაცული იყოს საფრთხეებისგან, რაც სტიმული იქნება საქართველოსთვის, კიდევ უფრო გააძლიეროს ბუნების და ბიომრავალფეროვნების დაცვა დღეს, როდესაც მსოფლიო  კლიმატის ცვლილებას ებრძვის. კავკასიის ბუნების ფონდი საქართველოს გარემოს დაცვისა და სოფლის მეურნეობის სამინისტროს დაცული ტერიტორიების სააგენტოსთან 2008 წლიდან თანამშრომლობს როგორც რეინჯერების ფინანსური მხარდაჭერის, ასევე ინფრასტრუქტურის შექმნა-განვითარების კუთხით. კავკასიის ბუნების ფონდის მიზანი  დაცული ტერიტორიების მართვის საკითხებში საქართველოს, სომხეთისა და აზერბაიჯანის დახმარება და რეგიონში ბიომრავალფეროვნების შენარჩუნებისა და ეკოსისტემის დაცვის მხარდაჭერაა.
#

დღეისათვის საქართველოდან ექსპორტირებულია 31.3 მლნ აშშ დოლარის ღირებულების თხილი

დღეისათვის საქართველოდან  განხორციელდა 7.2 ათასი ტონა თხილის ექსპორტი, რომლის ღირებულებამ 31.3 მლნ აშშ დოლარი შეადგინა. გასული წლის ანალოგიურ პერიოდთან შედარებით, ექსპორტირებული თხილის მოცულობა 2.1 ათასი ტონით (42%), ხოლო ღირებულება - 2.8 მლნ აშშ დოლარით (10%) გაიზარდა. ქართული თხილის ექსპორტი, ძირითადად, ევროკავშირის ქვეყნებში განხორციელდა. კერძოდ:  იტალია (3,662 ტონა), გერმანია (945 ტონა), ესპანეთი (411 ტონა), ჩეხეთი (263 ტონა), პოლონეთი (209 ტონა), ლიტვა (110 ტონა),  ლატვია (66 ტონა), საფრანგეთი (65 ტონა), ესტონეთი (44 ტონა), ბულგარეთი (44 ტონა) და ბელგია (20 ტონა).საანგარიშო პერიოდში, ქართული თხილი ექსპორტზე ასევე გავიდა შემდეგ ქვეყნებში: სომხეთი (443 ტონა), უკრაინა (171 ტონა), რუსეთი (104 ტონა), ერაყი (120 ტონა), ბელორუსია (113 ტონა), ჩინეთი (104 ტონა), არაბ. გაერთ საამიროები (54 ტონა), მექსიკა (28 ტონა), არგენტინა (26 ტონა), დიდი ბრიტანეთი (22 ტონა), თურქეთი (22 ტონა), უზბეკეთი (22 ტონა)  და სხვა ქვეყნები (116 ტონა).
#

ლევან დავითაშვილი: „ჩვენი თანმიმდევრული პოლიტიკის ერთ-ერთი წარმატებული ნიმუშია „სართიჭალის საშრობი“, რომელიც დღეს გავხსენით”

გარდაბნის მუნიციპალიტეტში, სოფელ სართიჭალაში, თანამედროვე სტანდარტებით აღჭურვილი საშრობი და მარცვლეულის შესანახი კომპლექსი შპს „სართიჭალის საშრობი“ სახელმწიფოს ფინანსური მხარდაჭერით მოეწყო.„ეს არის ახალი თანამედროვე საწარმო, სადაც მარცვლეულის ხარისხიან პირობებში დაბინავებაა შესაძლებელი. საწარმო სახელმწიფოს მიერ დაფინანსებულია როგორც საგრანტო, ისე შეღავათიანი საკრედიტო რესურსებით -  გაცემულია ნახევარი მილიონის ოდენობის გრანტი და შეღავათიანი, 3,5 მილიონიანი აგროკრედიტი… თუ ჩვენ უნდა მოვიყვანოთ მეტი მაღალხარისხიანი პირველადი წარმოების პროდუქცია, რა თქმა უნდა, მას სჭირდება შესაბამისი შემნახველი და გადამმუშავებელი სიმძლავრეები. ჩვენი მიდგომა არის კომპლექსური და ითვალისწინებს წარმოების ჯაჭვის ყველა რგოლის ხელშეწყობას”, - განაცხადა გარემოს დაცვისა და სოფლის მეურნეობის მინისტრმა, ლევან დავითაშვილმა, სოფელ სართიჭალაში, სადაც ქართლის რეგიონის სახელმწიფო რწმუნებულთან, შოთა რეხვიაშვილთან ერთად იმყოფებოდა.   როგორც მინისტრმა აღნიშნა, საქართველოში მოსავლის დაბინავება უკვე თანამედროვე პირობებში ხდება. შეღავათიანი აგროკრედიტის ფარგლებში, ქვეყნის მასშტაბით, 900 მილიონ ლარამდეა დაფინანსებული შემნახველი და გადამმუშავებელი ინფრასტრუქტურა. ფუნქციონირებს ასეული შემნახველი და გადამმუშავებელი მეურნეობა, თანამედროვე საწარმო. „ამას ემატება საგრანტო დაფინანსება, რომელსაც სახელმწიფო სპეციალური პროგრამით - გადამმუშავებელი და შემნახველი საწარმოების თანადაფინანსებით ახორციელებს, სადაც 80 მილიონ ლარამდე სახელმწიფოს მხრიდან თანადაფინანსება და რამდენიმე ასეული მილიონი ლარის კერძო ინვესტიციაა მოზიდული. პროგრამის ფარგლებში, 200-მდე ახალი საწარმო დაფინანსდა“, - განაცხადა ლევან დავითაშვილმა. საშრობი და მარცვლეულის შესანახი კომპლექსის შპს „სართიჭალის საშრობი“ ინფრასტრუქტურის მოსაწყობად 3,5 მილიონი ლარის ინვესტიცია განხორციელდა, მათ შორის, 500,000 ლარი სოფლის განვითარების სააგენტოს გრანტია, ხოლო 3,000,000 ლარი შეღავათიანი აგროკრედიტი. „სართიჭალის საშრობში”, სადაც 10 ადგილობრივია დასაქმებული, 9,000 ტონა მარცვლეულის გაშრობაა შესაძლებელი.  აღსანიშნავია, რომ შეღავათიანი აგროკრედიტის პროექტის ფარგლებში შემნახველი და გადამმუშავებელი ინფრასტრუქტურის განვითარებისთვის ჯამში გაცემულია 880 მლნ ლარზე მეტი ღირებულების 3,900 სესხი, სააგენტოს გაცემული თანადაფინანსება 11,4 მლნ ლარს აჭარბებს. საგრანტო პროგრამის ფარგლებში ქვემო ქართლის რეგიონში შეიქმნა 10 შემნახველი მეურნეობა; სახელმწიფოს მხრიდან თანადაფინანსება, ჯამურად,5,2 მლნ ლარზე მეტია.
#

გარემოს დაცვისა და სოფლის მეურნეობის მინისტრი ლევან დავითაშვილი შვეიცარიის მისიის ხელმძღვანელს, ქრისტიან შონენბერგერს შეხვდა.

გარემოს დაცვისა და სოფლის მეურნეობის მინისტრი ლევან დავითაშვილი შვეიცარიის თანამშრომლობის ოფისის ხელმძღვანელს, ქრისტიან შონენბერგერს შეხვდა. მხარეებმა ორ ქვეყანას შორის მრავალწლიანი წარმატებული თანამშრომლობის მნიშვნელობა შეაფასეს და სამომავლო გეგმებზე იმსჯელეს. შეხვედრაზე საქართველოში ადგილობრივი ბიოწარმოების, მეცხოველეობისა და რძის სექტორის განვითარების ხელშეწყობის, ასევე, ფერმერთათვის საერთაშორისო სასწავლო პროგრამებში მონაწილეობის მხარდაჭერისა და აგრარულ სფეროში პროფესიული სასწავლებლების  გაძლიერების მიმართულებით თანამშრომლობის საკითხები განიხილეს. მინისტრმა სოფლის მეურნეობის სფეროში, მათ შორის, მეცხოველეობისა და რძის სექტორში განხორციელებულ და მიმდინარე პროექტებზე ისაუბრა და შვეიცარიის ფინანსური და ტექნიკური დახმარების მნიშვნელობას გაუსვა ხაზი.სამინისტროში გამართულ შეხვედრას ესწრებოდა გარემოს დაცვისა და სოფლის მეურნეობის მინისტრის მოადგილე ნინო თანდილაშვილი, რომელმაც  კლიმატის ცვლილებასთან ადაპტაციის გაძლიერების მნიშვნელობაზე გაამახვილა ყურადღება და აღნიშნა, რომ ამ მიმართულებით, საქართველოში პირველად, კლიმატური კატასტროფების მართვისა და ადრეული შეტყობინების სისტემა დაინერგა. აღსანიშნავია, რომ მიმდინარე წლის 21 ოქტომბერს, ქალაქ ბერნში დაგეგმილია სამუშაო ვიზიტი, სადაც საქართველოს გარემოს დაცვისა და სოფლის მეურნეობის მინისტრი და შვეიცარიის გარემოს დაცვის მინისტრი საქართველოსა და შვეიცარიის კონფედერაციას შორის პარიზის შეთანხმების განმახორციელებელ მემორანდუმს მოაწერენ ხელს.
#

გარემოს დაცვისა და სოფლის მეურნეობის სამინისტროს მხარდაჭერით იტალიაში, საერთაშორისო აგროგამოფენაში „მაკფრუტ 2021“, 8 ქართულმა კომპანიამ მიიღო მონაწილება

იტალიაში, ქალაქ რიმინიში გამართულ საერთაშორისო აგროგამოფენაში „მაკფრუტ 2021“, საქართველოს გარემოს დაცვისა და სოფლის მეურნეობის სამინისტროს მხარდაჭერით, 8 ქართულმა კომპანიამ მიიღო მონაწილება.   საქართველოს სტენდზე წარმოდგენილი იყო კომპანიების: „ქარელი ფრუტს“ (ჩიკორი), „ჯორჯიას ნეიჩერალ“, „ლურჯი ველი“, „აგროლეინი“, „ნათს ჯი“, „კავკასუს ორგანიქ ფრუტს“, „აუგუსტის ხილის ქარხანა“ და „ჯეო ორგანიქი“ ხილის და ბოსტნეულის ქართული პროდუქცია.   გამოფენის ფარგლებში, ქართულ სტენდთან გამართულ შეხვედრაზე, საქართველოს ელჩმა იტალიაში კონსტანტინე სურგულაძემ, „მაკფრუტ 2021“-ის პრეზიდენტმა, რენცო პირაჩინიმ, საქართველოს გარემოს დაცვისა და სოფლის მეურნეობის სამინისტროსა და ქართული კომპანიების წარმომადგენლებმა ქართული აგროსასურსათო პროდუქციის იტალიაში ექსპორტის სამომავლო პერსპექტივებზე იმსჯელეს. საუბრისას, ყურადღება საქართველოსთვის ევროინტეგრაციისა და ევროკავშირის ქვეყნებთან საერთაშორისო ვაჭრობის მნიშვნელობას საკითხებზე გამახვილდა. საერთაშორისო აგროგამოფენის „მაკფრუტ 2021“ ფარგლებში, ქართული კომპანიების წარმომადგენლებმა შეხვედრები იტალიურ კომპანიებთან და საერთაშორისო ბიზნესასოციაციებთან გამართეს.  ქართული აგროსასურსათო პროდუქციის მსოფლიო ბაზრებზე პოპულარიზაციისთვის საერთაშორისო აგროგამოფენებში მონაწილეობა ერთ-ერთი მთავარი პრიორიტეტია; შესაბამისად, საქართველოს გარემოს დაცვისა და სოფლის მეურნეობის სამინისტრო აქტიურად მუშაობს აღნიშნული მიმართულებით და ქართულ კომპანიებს შესაძლებლობას აძლევს საკუთარი პროდუქციის ცნობადობის გაზრდა უზრუნველყონ.
#

საქართველოს ბუნების მკვლევართა კავშირის „ორქისი“ ორგანიზებით ნარჩენების მართვის რეგიონული გეგმა განიხილეს

საქართველოს ბუნების მკვლევართა კავშირის „ორქისი“ ორგანიზებით გამართულ ონლაინ შეხვედრაზე კახეთის მხარეში ნარჩენების მართვის რეგიონული გეგმა განიხილეს. გეგმა მოიცავს ნარჩენების მართვის თანამედროვე სისტემის დანერგვას ნარჩენების მართვისა და რეგიონული განვითარების სტრატეგიების მოთხოვნების გათვალისწინებით, კახეთის სამხარეო ადმინისტრაციასთან, 8 მუნიციპალიტეტთან და დაინტერესებულ მხარეებთან მჭიდრო თანამშრომლობით და აქტიური მონაწილეობით.  კახეთის რეგიონში ნარჩენების მართვის გეგმა არასამთავრობო ორგანიზაციათა კონსორციუმის: საქართველოს ბუნების მკვლევართა კავშირის „ორქისი”, დავიცვათ საქართველოს სისუფთავე და საქართველოს მწვანეთა მოძრაობა/დედამიწის მეგობრები –საქართველოს მიერ განხორციელებული პროექტის „დავიცვათ საქართველოს სისუფთავე“ ერთ-ერთი მთავარი კომპონენტია.  პროექტი „დავიცვათ საქართველოს სისუფთავე“ შვედეთის მთავრობის ფინანსური უზრუნველყოფით, გარემოს დაცვის და სოფლის მეურნეობის სამინისტროს მხარდაჭერით, რეგიონული  განვითარებისა  და ინფრასტრუქტურის სამინისტროსთან და  საქართველოს მყარი ნარჩენების მართვის კომპანიასთან თანამშრომლობით ხორციელდება.„შვედეთის განვითარების სააგენტოს მხარდაჭერით, კახეთის მხარეში ნარჩენების მართვის საპილოტე პროექტი ხორციელდება. ნარჩენების მართვა ჩვენი ქვეყნის ერთ-ერთი მთავარი გამოწვევაა. შესაბამისად, ჩვენი მიზანია კახეთის რეგიონისთვის შევქმნათ ისეთი ნარჩენების მართვის მოდელი, რომელიც ევროკავშირის სტანდარტებისა და შვედეთის გამოცდილების გათვალისწინებით განხორციელდება“, - განაცხადა გარემოს დაცვისა და სოფლის მეურნეობის მინისტრის მოადგილემ, სოლომონ პავლიაშვილმა, რომელიც აღნიშნულ ონლაინ შეხვედრას  ესწრებოდა. შეხვედრაში მონაწილეობდნენ  შვედეთის გევლეს ასოციაციის წარმომადგენელი/ექსპერტი პერ-ოლაფ ჰალბერგი, სბმკ „ორქისის” წარმომადგენლები, ექსპერტები და კახეთის რეგიონული ნარჩენების მართვის გეგმაზე მომუშავე ჯგუფის წევრები.