#

მეცხოველეობის სექტორის მიმართულებით საგრანტო კონკურსში მონაწილეობის მისაღებად განაცხადების მიღება დაიწყო

პროექტის „ინვესტირება უვნებელ და ხარისხიან მესაქონლეობაში - SQIL” ფარგლებში, მეცხოველეობაში ინოვაციური ბიზნესიდეების დასაფინანსებლად, ახალი საგრანტო კონკურსის განაცხადების მიღება დაიწყო. მოთხოვნაზე დაფუძნებული ინოვაციური პროექტი  მიზნად ისახავს ადგილობრივი წარმოების რძის პროდუქტებისა და საქონლის ხორცის ღირებულებათა ჯაჭვში სურსათის უვნებლობისა და ხარისხის სტანდარტების გაუმჯობესებას. პროექტს ახორციელებს Land O’Lakes Venture37 საქართველოს ფერმერთა ასოციაციასთან პარტნიორობით. პროექტი დაფინანსებულია აშშ-ის სოფლის მეურნეობის დეპარტამენტის (USDA) მიერ.„ხელისუფლებისთვის მეცხოველეობის განვითარება პრიორიტეტულ მიმართულებას წარმოადგენს. შესაბამისად, აღნიშნულ ინიციატივას განსაკუთრებული მნიშვნელობა აქვს. მადლობას ვუხდი ამერიკის შეერთებული შტატების სოფლის მეურნეობის დეპარტამენტს (USDA) ფინანსური მხარდაჭერისთვის. ვფიქრობ, კონკურსის შედეგად შერჩეული საგრანტო პროექტების განხორციელებით, ხელშესახები პროგრესი გვექნება მესაქონლეობის სექტორში“, - განაცხადა გარემოს დაცვისა და სოფლის მეურნეობის მინისტრის პირველმა მოადგილემ, გიორგი ხანიშვილმა.მეცხოველეობაში ინოვაციური ბიზნესიდეების დასაფინანსებელ კონკურსში მონაწილეობისთვის, განაცხადების მიღება 2021 წლის 11 სექტემბერს დაიწყო და 11 ოქტომბერს დასრულდება.კონკურსი მიზნად ისახავს ბაზარზე ხელმისაწვდომობის გაზრდას, პროდუქციის წარმოების შემდგომ დამუშავებასა და შენახვას, პროდუქტიულობის გაუმჯობესებას, ფინანსურ მომსახურეობაზე ხელმისაწვდომობის გაუმჯობესებას. პროექტი ასევე აქტიურად მუშაობს მესაქონლეობის სექტორში ჩართული პირების ცოდნის ამაღლების კუთხით, რასაც სხვადასხვა სახის ტრენინგებისა თუ სასწავლო-საინფორმაციო სახელმძღვანელოების შემუშავებით ახორციელებს. დეტალური ინფორმაცია საგრანტო კონკურსის შესახებ, შეგიძლიათ იხილოთ შემდეგ ბმულზე: https://bit.ly/2YzQNX4 დამატებითი ინფორმაციისათვის შეგიძლიათ იხილოთ: https://www.facebook.com/SQILGeorgia
#

დღეის მდგომარეობით, საქართველოდან 24.3 მლნ აშშ დოლარის ღირებულების თხილია ექსპორტირებული

მიმდინარე წლის 1 აგვისტოდან 12 სექტემბრის ჩათვლით, საქართველოდან 5.5 ათასი ტონა თხილის ექსპორტი უკვე განხორციელდა. ექსპორტირებული თხილის ღირებულებამ 24.3 მლნ აშშ დოლარი შეადგინა. გასული წლის ანალოგიურ პერიოდთან შედარებით, წელს თხილის ექსპორტის მოცულობა 27% -ით (1.2 ათასი ტონა) გაიზარდა.ქართული თხილის ექსპორტი, ძირითადად, ევროკავშირის ბაზრებზე - იტალია (2 790 ტონა), გერმანია (747 ტონა), ესპანეთი (354 ტონა), ჩეხეთი (220 ტონა), პოლონეთი (168 ტონა), ლიეტუვა (110 ტონა), ლატვია (66 ტონა), საფრანგეთი (65 ტონა), ესტონეთი (44 ტონა), ბულგარეთი (22 ტონა), ბელგია (20 ტონა)  ხორციელდება.ქართული თხილი ექსპორტზე ასევე გადის სომხეთში (354 ტონა), უკრაინაში (138 ტონა), რუსეთში (82 ტონა), ერაყში (72 ტონა), ბელარუსში (71 ტონა), ჩინეთში (52 ტონა), არაბეთის გაერთიანებულ საამიროებში (40 ტონა), მექსიკაში (28 ტონა), არგენტინაში (26 ტონა), დიდ ბრიტანეთში (22 ტონა), თურქეთში (22 ტონა) და უზბეკეთში (22 ტონა).
#

კარლო ამირგულაშვილი ბუნების დაცვის მსოფლიო კავშირის საბჭოს წევრად აირჩიეს

ბუნების დაცვის საერთაშორისო კავშირის (IUCN) მსოფლიო კონსერვაციის კონგრესის ფარგლებში, გარემოს დაცვისა და სოფლის მეურნეობის სამინისტროს  ბიომრავალფეროვნებისა და სატყეო დეპარტამენტის უფროსი კარლო ამირგულაშვილი ბუნების დაცვის მსოფლიო კავშირის საბჭოს წევრად, 4 წლის ვადით აირჩიეს. საბჭო, კონგრესებს შორის ინტერსესიურ პერიოდში, კავშირის მთავარ მმართველ ორგანოს წარმოადგენს. IUCN - ის მსოფლიო კონსერვაციის კონგრესი საფრანგეთში,  ქალაქ მარსელში,  3-11 სექტემბერს ტარდება. ღონისძიების  მიზანია ხელი შეუწყოს ბიომრავალფეროვნების კონსერვაციასთან დაკავშირებულ საკითხებზე ცოდნისა და ინფორმაციის გაცვლას, ასევე, ბიომრავალფეროვნების შენარჩუნებისთვის აუცილებელი ქმედებების განსაზღვრას.  კონგრესზე, განსახილველ საკითხებს შორის არის: 2020 წლის შემდგომი ბიომრავალფეროვნების სტრატეგია, ბუნებაზე დაფუძნებული გადაწყვეტილებების მიღება, დაცული ტერიტორიების და ტყის მდგრადი მართვა.
#

გურიის რეგიონში თხილის მოსავლის აღება აქტიურ ფაზაშია

გურიის რეგიონში, თხილის მოსავლის აღება აქტიურად მიმდინარეობს.  გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი  საწარმოებში თხილის მიღება-გადამუშავების პროცესს ადგილზე გაეცნო.     „წელს, თხილის მოსავალი მაღალი ხარისხისაა და ჩვენი ამოცანა ამ სტანდარტის  შენარჩუნებაა.  ვფიქრობ, ფერმერებთან ერთად, წლევანდელი მოსავლის ხარისხით და  საექსპორტო მოცულობით ექსპორტიორი კომპანიებიც კმაყოფილი იქნებიან. აღსანიშნავია, რომ თხილის ექსპორტი, ძირითადად, ევროკავშირის ქვეყნებში ხორციელდება. წლევანდელ სეზონზე,  საქართველოდან უკვე ექსპორტირებულია 4 ათასი ტონა თხილი, რაც გასული წლის ანალოგიურ პერიოდთან  შედარებით, 900 ტონით მეტია.  მიმდინარე წელს,  თხილის მოსავლის საპროგნოზო  მოცულობა 65-70 ათას ტონამდეა, რაც თანხობრივად, 150 მლნ დოლარის საექსპორტო პოტენციალს წარმოადგენს“, -  აღნიშნა გიორგი ხანიშვილმა. დღეისათვის, გურიის რეგიონში თხილის მოსავლის დიდი ნაწილი უკვე აღებული და დაბინავებულია. თხილის გადამმუშავებელ საწარმოებში თხილის მიღება-გადამუშავების პროცესი აქტიურად მიმდინარეობს. გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი და სურსათის ეროვნული სააგენტოს უფროსი ზურაბ ჩეკურაშვილი   ოზურგეთის მუნიციპალიტეტში, თანამედროვე სტანდარტის თხილის გადამმუშავებელი საწარმოს „გლობალ ექსპორტი“ სამუშაო პროცესს ადგილზე გაეცნენ. საწარმო აერთიანებს წარმოების სრულ ციკლს, რაც თხილის მაღალი ხარისხის შენარჩუნებას უზრუნველყოფს.  ამჟამად, „გლობალ ექსპორტის“ საწარმოში 120 ადამიანია დასაქმებული. კომპანია წარმოების გაფართოებას შეღავათიანი აგროკრედიტის დახმარებით  გეგმავს.   
#

ლევან დავითაშვილი შოკოლადის მწარმოებელი შვეიცარიული კომპანიის „Camille Bloch” პრეზიდენტს შეხვდა

გარემოს დაცვისა და სოფლის მეურნეობის მინისტრი ლევან დავითაშვილი შოკოლადის მწარმოებელი შვეიცარიული კომპანიის „Camille Bloch” პრეზიდენტს, დანიელ ბოშს შეხვდა.შეხვედრაზე კომპანიის „Camille Bloch” წარმომადგენლებმა საქართველოში თხილის ინოვაციური გზით წარმოების პროექტის პრეზენტაცია წარადგინეს. შვეიცარიული კომპანიის პრეზიდენტმა, დანიელ ბოშმა ხაზგასმით აღნიშნა, რომ  საქართველოს თხილის წარმოების ძალიან დიდი პოტენციალი აქვს და თხილის მაღალი ხარისხით  გამოირჩევა. „Camille Bloch” წარმომადგენლებმა მზადყოფნა გამოთქვეს ქართულ მხარესთან თხილის წარმოებაში თანამედროვე და ინოვაციური მეთოდების გამოყენების გამოცდილების გაზიარების კუთხით  ითანამშრომლონ.როგორც ლევან დავითაშვილმა აღნიშნა, საქართველო თხილის უმსხვილეს მწარმოებელ ქვეყნებს შორის მოწინავე ადგილს იკავებს.„თხილი საქართველოსთვის ერთ-ერთი მნიშვნელოვანი საექსპორტო პროდუქტია. ჩვენთვის მნიშვნელოვანია ქვეყანაში კიდევ უფრო გავზარდოთ როგორც თხილის წარმოება, ასევე მისი ხარისხი. შესაბამისად, ჩვენ მზად ვართ გავიზიაროთ წარმატებული ევროპული  გამოცდილება“, - აღნიშნა ლევან დავითაშვილმა. შოკოლადის მწარმოებელმა შვეიცარიულმა კომპანიამ „Camille Bloch” კახეთის რეგიონში, სიღნაღის მუნიციპალიტეტში, 40 მლნ ლარის ოდენობის ინვესტიცია განახორციელა და  50 ჰა მიწის ფართობზე, ინოვაციური ტექნოლოგიით თხილის ბაღების გაშენება დაიწყო.  კომპანია, თხილის პირველ მოსავალს, 2025 წლისთვის ელოდება. 
#

თხილის მიღება - გადამუშავების პროცესი საწარმოებში აქტიურად მიმდინარეობს

 გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი, სამეგრელოს რეგიონში თხილის ჩაბარების პროცესს გაეცნო. დღეისათვის, ფერმერებისგან თხილის მიღება-გადამუშავების პროცესი საწარმოებში აქტიურად მიმდინარეობს.„ბოლო წლებში, სახელმწიფოს სწორი პოლიტიკის, მიმდინარე პროექტებისა და პროგრამების, გადამმუშავებელ და შემნახველ საწარმოებში განხორციელებული  ინვესტიციების შედეგად, ქვეყნის მასშტაბით შეიქმნა და ფუნქციონირებს თანამედროვე სტანდარტის, ახალი ტექნოლოგიებით აღჭურვილი საწარმოები, რაც ეხმარება ადგილობრივ ფერმერებს მოწეული მოსავლის დაბინავება-რეალიზებაში. ამავდროულად, წარმოების სრულ ჯაჭვში   თანამედროვე ტექნოლოგიების დანერგვა-განვითარება, უზრუნველყოფს მოსავლის ხარისხის შენარჩუნებას და ხელს უწყობს საერთაშორისო ბაზრებზე ქართული თხილის, როგორც ბრენდის დამკვიდრებას. თხილის წარმოების გაუმჯობესების მიზნით, სახელმწიფო მომავალშიც გააგრძელებს ხელშემწყობი ღონისძიებების განხორციელებას“, - აღნიშნა გიორგი ხანიშვილმა.გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი, სურსათის ეროვნული სააგენტოს უფროსთან, ზურაბ ჩეკურაშვილთან ერთად სენაკის მუნიციპალიტეტში მდებარე თხილის გადამმუშავებელი საწარმოს  „ნათს ელი“ მუშაობის პროცესს გაეცნო. თანამედროვე ტექნოლოგიებით აღჭურვილი საწარმო შეღავათიანი აგროკრედიტის პროგრამის ფარგლებში შეიქმნა. განხორციელებული ინვესტიცია 1,5 მლნ ლარს შეადგენს. ყოველწლიურად, „ნათს ელი“ ადგილობრივი ფერმერებისგან  საშუალოდ, 4-5 ათას ტონამდე  თხილის იბარებს და ამუშავებს. საწარმო მოიცავს წარმოების სრულ ციკლს, რაც თხილის მაღალი ხარისხის შენარჩუნებას უზრუნველყოფს. საწარმოში 70 ადგილობრივია დასაქმებული. აღსანიშნავია, რომ წელს თხილის საკმაოდ უხვი მოსავალია და  ხარისხის შესაბამისად, მისი ფასი 3-6 ლარის ფარგლებში მერყეობს. გადამუშავებული პროდუქციის ძირითადი ნაწილი ექსპორტზე გადის.  
#

ლევან დავითაშვილი: ჩვენი მიზანია საექსპორტო გაყიდვების წახალისება და გაზრდა, გვინდა კიდევ უფრო შევამციროთ დამოკიდებულება არსებულ, ტრადიციულ ბაზრებზე“

 „დღეს, საქართველოს მთავრობამ მიიღო მნიშვნელოვანი გადაწვეტილება, რომელიც კიდევ უფრო შეუწყობს ხელს ქართული ღვინის პოპულარიზაციას მთელ მსოფლიოში და საექსპორტო გაყიდვების ზრდას. მნიშვნელოვანია, რომ ჩვენ ამ ახალ პროექტს ვაანონსებთ ზუსტად რთველის პირობებში. აღნიშნულ პროექტზე მუშაობა მიმდინარე წლის დასაწყისიდან მიმდინარეობდა. პროექტის დიზაინი შეთანხმებულია ღვინის მწარმოებელთა ასოციაციასთან.  ჩვენ გვქონდა არაერთი შეხვედრა მეწარმეებთან, სადაც კონკრეტული პირობები  საბოლოოდ შევაჯამეთ. პროექტი ითვალისწინებს ე.წ. სავაჭრო მარკეტინგის „ტრეიმარკეტინგის“ ღონისძიებების დაფინანსებას, საგრანტო თანადაფინანსებას ღვინის მწარმოებელი კომპანიებისთვის. როგორც მოგეხსენებათ, საქართველოს ხელისუფლება, საქართველოს მთავრობა წლების განმავლობაში ახორციელებს ღვინის პოპულარიზაციის ღონისძიებებს. უნდა აღინიშნოს, რომ მნიშვნელოვნად გაიზარდა ქართული ღვინის პოპულარიზაციის დაფინანსება. 2013 წლიდან, გასამმაგდა ბიუჯეტი და  გახდა 3 მილიონი. დღეისთვის კი, ქართული ღვინის პოპულარიზაციის ბიუჯეტი, დაახლოებით 9-10 მლნ ლარია. პოპულარიზაციის ღონისძიებებს ღვინის ეროვნული სააგენტო ახორციელებს შერჩეულ სამიზნე ბაზრებზე. კვლევების შედეგად, შეირჩა კონკრეტული მიმართულებები, გვყავს არჩეული ყველაზე გამოცდილი და კომპეტენტური, ღვინის სფეროში წარმატებული მარკეტინგული კომპანიები, რომლებიც წლების განმავლობაში, მარკეტინგულ კომუნიკაციებს უზრუნველყოფენ,  ასევე შერჩეული გვყავს კონკრეტული, გავლენიანი ღვინის კრიტიკოსები, ინფლუენსერები, ღვინის მაგისტრები, ღვინის მასტერ-სომელიეები, რომლებიც წლების განმავლობაში, ქართული ღვინის ზოგად პოპულარიზაციაზე ზრუნავენ. ეს ადამიანები უკვე კარგად გაცნობიერებულები არიან ქართული ღვინის სპეციფიკაში. გამომდინარე აქედან, შეიქმნა უამრავი მასალა, სხვადასხვა ენაზე, მიზნობრივი ბაზრებისთვის. მუდმივად ხდება ქართული ღვინის შესახებ ინფორმაციების გავრცელება სამიზნე ბაზრებზე, ისეთებზე როგორიც არის  ამერიკის  შეერთებული შტატები, დიდი ბრიტანეთი, პოლონეთი, უკვე დაემატა ბალტიისპირეთის ქვეყნები,  სამხრეთ-აღმოსავლეთ აზია და ა.შ თუმცა, ჩვენ გვინდა, რომ ქართული ღვინო გახდეს კიდევ უფრო პოპულარული და ეს პირდაპირ აისახოს ქართული ღვინის კომპანიების წარმატებებში, რაც  საბოლოოდ, რა თქმა უნდა, მთლიანად ინდუსტრიის, მათ შორის, ჩვენი მევენახე ფერმერების წარმატება იქნება. სწორედ ამიტომ, ჩვენ გადავწყვიტეთ, რომ დღეს დადგა ეტაპი, როდესაც ქართული ღვინო ნიშური სეგმენტიდან ახალ ბაზრებზე უნდა გადავიდეს, რეალურად საყოველთაო ხელმისაწვდომ კატეგორიაში. ქართული ღვინო ხელმისაწვდომი უნდა იყოს  ძირითად გაყიდვის არხებში, როგორიც არის  ე.წ on trade, მომსახურება-ჰორეკა სექტორი და ქსელური მაღაზიები, რითეილი. სწორედ ამიტომ, მნიშვნელოვანია კონკრეტული სავაჭრო მარკეტინგული ღონისძიებების დაფინანსება, რასაც ქართული ღვინის კომპანიები აკეთებენ, თუმცა არა საჭირო მასშტაბით, რადგან ამას სჭირდება მნიშვნელოვანი ფინანსური რესურსი. სწორედ  ამიტომ, ჩვენ გადავწყვიტეთ, საგრანტო თანადაფინანსება იმ ბაზრებზე, სადაც ქართული ღვინო უკვე არის წარმოდგენილი, თუმცა ჯერ კიდევ არ გვაქვს მიღწეული იმ პოზიციებამდე, რასაც ჩვენ ვგეგმავთ.  ქართულმა ღვინომ უნდა დაიმკვიდროს მნიშვნელოვანი ადგილი ღვინის ცნობილ მწარმოებელ თუ ექსპორტიორ ქვეყნებს შორის. ე.წ ახალი სამყაროს ქვეყნების ღვინო ხელმისაწვდომია ევროპის ყველა ქვეყნის ბაზარზე, ასევე ცნობილი ევროპული მწარმოებლების ღვინოები ხელმისაწვდომია, მათ შორის, აშშ-სა თუ სამხრეთ-აღმოსავლეთ აზიაში.  სწორედ ასეთ კატეგორიაში უნდა გადავიდეს ქართული ღვინო.დღეს, ქართული ღვინო იყიდება, დაახლოებით, 60 ქვეყანაში.  2019 წელს, 341-მა კომპანიამ განახორციელა  ექსპორტი 53 ქვეყანაში. 2020 წელს, კომპანიების და საექსპორტო ქვეყნების რაოდენობა კიდევ უფრო გაიზარდა. 2020 წლის მონაცემებით, მსოფლიოს 60 ქვეყანაში, 376 კომპანია ახორციელებდა ექსპორტს.  თუმცა, ჩვენ გვინდა, რომ ეს გაზრდილი რიცხვები,  უკვე გაყიდვების რაოდენობებში აისახოს. დღეს, ჩვენ უკვე  მივაღწიეთ 100 მლნ-იან ნიშნულს. 100 მლნ ბოთლი წელიწადში, ეს არის 2021 წლის საპროგნოზო მონაცემი. მაგრამ ჩვენ დავაანონსეთ, რომ 10 წლიანი გეგმის ფარგლებში, 2030 წლისთვის, ღვინის სექტორის საექსპორტო შემოსავლები უნდა იყოს 1 მლრდ დოლარი. ფაქტობრივად, უნდა გასამმაგდეს დღევანდელი შემოსავლები ყურძნისეული წარმოშობის ალკოჰოლური პროდუქტებიდან.მარკეტინგული ღონისძიებების თანადაფინანსების პროგრამა ითვალისწინებს თანადაფინანსებას ყველა იმ ბაზარზე, სადაც  ქართული ღვინო გავა, გარდა დსთ-სა და საქართველოსი. ბუნებრივია, საქართველოში ღვინის რეალიზაციას, ჩვენგან არ ჭირდება  პოპულარიზაციაში ხელშეწყობა. ამას ახერხებენ როგორც მცირე, საშუალო და დიდი კომპანიები. ჩვენი მიზანია, საექსპორტო გაყიდვების წახალისება და გაზრდა, მათ შორის ახალ გეოგრაფიაში. ხშირად იყო დასმული საკითხი ბაზრების დივერსიფიცირებაზე. რა თქმა უნდა, ჩვენ ვაკეთებთ ამ დივერსიფიცირებას იმიტომ, რომ შერჩეულ სამიზნე ბაზრებზე, ეს არის ახალი ბაზრები,  სადაც  სახელმწიფო ფულს ხარჯავდა,  ქართული ღვინო იმკვიდრებს ადგილს. თუმცა, ჩვენ გვინდა ტემპი გავზარდოთ და კიდევ უფრო შევამციროთ დამოკიდებულება არსებულ, ტრადიციულ ბაზრებზე. შესაბამისად, მარკეტინგული ღონისძიებები არ დაფინანსდება დსთ-ს ქვეყნებში, მაგრამ დაფინანსდება ყველა დანარჩენ ქვეყანაში, სადაც ღვინის კომპანიები განახორციელებენ მარკეტინგულ ღონისძიებებს.მარკეტინგული ღონისძიებების ბიუჯეტი, ერთი კომპანიისთვის, წლის განმავლობაში 600 000 ლარით განისაზღვრა. თუმცა, ეს არის საწყისი, საპილოტე ვერსია და  შემდგომში შეიძლება კიდევ უფრო მეტი თანხები გამოყოს სახელმწიფომ, თუ დავინახავთ, რომ პროგრამა წარმატებით ხორციელდება. ამავე დროს, ეს პირდაპირ დაკავშირებულია გაყიდვების ზრდასთან. ჩვენ მივიღებთ შედარებას, კონკრეტულ საანგარიშო წელში, როდესაც   მარკეტინგული ღონისძიებების დაფინანსება მოხდება, უნდა იყოს გაზრდილი გაყიდვების რაოდენობა წინა წელთან შედარებით და ზუსტად ეს ნაზარდი იქნება  ჩვენთვის ამოსავალი წერტილი. ამ შემთხვევაში, შემზღუდველი დამატებითი ფაქტორი არის 2 ლარი, ერთ ბოთლ დამატებით გაყიდულ ღვინოზე, ეს არის ბიუჯეტი. მაგრამ გითხარით, რომ მთლიანი ბიუჯეტი ერთ კომპანიაზე არის დაახლოებით 600  ათასი ლარი მოაზრებული, რომელიც შეიძლება მომავალში გაიზარდოს. რეალურად, ჩვენ არ გვინდა, რომ  ღვინის კომპანიებმა სახელმწიფო ბიუჯეტის ხარჯზე  თავიანთი მარკეტინგული აქტივობები ჩაანაცვლონ, შესაბამისად,  პროგრამის კიდევ ერთ კრიტერიუმს გულისხმობს - მათ უნდა გაზარდონ არსებული მარკეტინგული ბიუჯეტი და ესეც, რა თქმა უნდა, აუდიტის მიერ დადასტურდება. კონკრეტულად, მიმდინარე საანგარიშო წლის მარკეტინგული ხარჯი, წინა წელთან შედარებით, უნდა იყოს გაზრდილი და ზუსტად ეს ნაზარდი ხდება ამ კონკრეტული ლიმიტებით დაფინანსებული ჩვენი მხრიდან.  დარწმუნებული ვარ, რომ პროგრამა იქნება პოპულარული, რადგან ის  სახელმწიფომ კერძო სექტორთან შეთანხმებით შეიმუშავა. ჩვენ გვქონდა ბევრი შეხვედრა, დისკუსია, მოლაპარაკება ღვინის მწარმოებელ კომპანიებთან, ბევრი აზრი მოვისმინეთ და პოზიციები შევაჯერეთ. შესაბამისად, ეს არის ერთობლივი მუშაობის შედეგი და აქედან გამომდინარე, ვფიქრობ, რომ კომპანიები ენთუზიაზმით ჩაერთვებიან ამ პროგრამაში.  ჩვენ ვგეგმავთ მნიშვნელოვანი ფინანსური რესურსის მიმართვას შემდეგი 3-4 წლის განმავლობაში,  რათა რეალური შედეგები მივიღოთ და უკვე საშუალოვადიან პერსპექტივაში, 5 წლის თავზე,  ვფიქრობ, გარდატეხა მოხდება ქართული ღვინის პოპულარიზაციის და ზოგადად, საექსპორტო გაყიდვების წარმატების კუთხით“, - განაცხადა საქართველოს ვიცე-პრემიერმა, გარემოს დაცვისა და სოფლის მეურნეობის მინისტრმა ლევან დავითაშვილმა დღეს, მთავრობის სხდომის დასრულების შემდეგ.