#

ლევან დავითაშვილი: „სტიქიის პირობებში, განსაკუთრებულ რეჟიმში მუშაობს როგორც საკოორდინაციო შტაბი, ისე თითოეული ჩვენი თანამშრომელი და მუნიციპალიტეტის წარმომადგენელი იმისთვის, რომ ყურძნის ჩაბარების პროცესში არანაირი შეფერხება არ მოხდეს“

„26 აგვისტოს, კახეთის რეგიონში, იყო მნიშვნელოვანი სტიქია, რომელმაც გაანადგურა სასოფლო-სამეურნეო ნარგაობები, შესაბამისად, სახელმწიფომ მყისიერად მოახდინა რეაგირება. პირველივე დღიდან, საკოორდინაციო შტაბმა, ადგილობრივ ხელისუფლებასთან ერთად, დაიწყო ზარალის შეფასება. დღევანდელი მონაცემებით, დაახლოებით, 5000 ჰა არის დაზიანებული კახეთის რეგიონში. ძირითადად, ეს არის თელავის, გურჯაანისა და ყვარლის მუნიციპალიტეტები, სადაც დაზიანება არის 100%-მდე, თუმცა არის რაიონები, სადაც ზარალი 30-50%-მდეა. მოხდა დეტალური შეფასება. 5000 ჰა-დან, ძირითადად დაზიანებულია ვენახის ფართობები.  ეს არის როგორც საფერავის, ისე რქაწითელის ვენახები,  შესაბამისად, სტიქია მეტწილად მევენახე ფერმერებს შეეხო. აქედან გამომდინარე, მივიღეთ გადაწყვეტილება, მომხდარიყო მყისიერი კომუნიკაცია ფერმერებთან, რათა მათ მიერ მოწეული მოსავალი, სეტყვისგან სხვადასხვა ხარისხის დაზიანების მიუხედავად, სახელმწიფოს მიერ დაქირავებულ რამდენიმე ქარხანაში ჩააბარონ. რთველის განმავლობაში, სახელმწიფო საწარმო შპს ,,მოსავლის მართვის კომპანია“ წარმოდგენილია კახეთის ყველა მუნიციპალიტეტში. მას დაქირავებული აქვს  არაერთი ღვინის ქარხანა იმისთვის, რომ ჭარბი მოსავლის დაბინავება შეუფერხებლად მოახერხონ ჩვენმა მევენახე ფერმერებმა და ეს  ასეც ხდება. სტიქიის პირობებშიც, განსაკუთრებულ რეჟიმში მუშაობს როგორც საკოორდინაციო შტაბი, ისე თითოეული ჩვენი თანამშრომელი და მუნიციპალიტეტის წარმომადგენელი იმისთვის, რომ ყურძნის ჩაბარების პროცესში არანაირი შეფერხება არ მოხდეს. სამწუხაროდ, ზოგიერთი მედიასაშუალების მიერ, გავრცელდა ცრუ ინფორმაცია, რომ მოსავლის დაბინავებას პრობლემა აქვს კახეთში. თუმცა, ეს არ გვიკვირს, რადგან წლების განმავლობაში, რთველი მიდის ორგანიზებულად, არცერთი კილოგრამი ყურძნის ჩაბარებას პრობლემა არ ჰქონია 2012 წლიდან დღემდე. არ ჩატარებულა არცერთი რთველი ისე, რომ ცრუ ინფორმაცია არ გავრცელებულიყო და პოლიტიზირებული არ გამხდარიყო რთველის მიმდინარეობის პროცესი. ზოგიერთი პოლიტიკური ძალა რთველს, მევენახეების მთელი წლის შრომის შედეგს, იყენებს საკუთარი პოლიტიკური მიზნებისთვის და ხშირად, ცდილობენ ამაზე ააგონ თავიანთი დღის წესრიგი.ამის მიუხედავად, ჩვენ ვაკეთებთ იმას რაც გასაკეთებელია. ვდგავართ ჩვენი ფერმერების და მევენახეების  გვერდში. პრემიერ-მინისტრის გადაწყვეტილებით და დავალებით, პირადად ვიმყოფებოდი რეგიონში. მხარის ხელმძღვანელებთან ერთად, ვიყავი  მევენახე ფერმერებთან, ვისაც უშუალოდ შეეხო სტიქია და დაზარალდა. ჩვენ ვისაუბრეთ მაქსიმუმი რა შეიძლება გაკეთებულიყო  და შემიძლია პირდაპირ გითხრათ, რომ მოლოდინები, რაც ჩვენს ფერმერებს ჰქონდათ, სრულად არის გამართლებული. კერძოდ, სახელმწიფო რქაწითელის ჯიშის დაზიანებულ ყურძენს, თეთრი იქნება თუ მწვანე, 80 თეთრად იბარებს. ხოლო, 1 ლარად ხდება  საფერავის ჯიშის დაზიანებული ყურძნის ჩაბარება ყველა იმ ლოკაციაზე, რომელიც არის გახსნილი სტიქიის რეგიონში. შესაბამისად, მოსახლეობას არ უწევს შორ მანძილზე მოწეული პროდუქცის გადატანა.  დაბინავება ხდება ოპერატიულად. გვესმის, რომ როდესაც არის დაზიანების სხვადასხვა ხარისხი, მალფუჭებადი პროდუქცია კიდევ უფრო სათუთია და მას სჭირდება ოპერატიულად დაბინავება. ამისთვის, სახელმწიფოს ყველაფერი აქვს გაკეთებული. ყველაფერი არის ორგანიზებული.რაც შეეხება, იმ მევენახე ფერმერებს, რომელთაც სრულად  დაუზიანდათ ვენახები, ჩვენ ვახდენთ 3000 ლარის ანაზღაურებას. ფაქტობრივად, ეს არის ის თანხა, რაც მათ სჭირდებათ იმისთვის, რომ მოიწიონ მოსავალი. სამწუხაროდ, სტიქიამ რთველის პერიოდში მოგვისწრო. აქედან გამომდინარე, სრულად მოხდება ზარალის ანაზღაურება, რაც მათ საშუალებას მისცემს კვლავ გააგრძელონ წარმოება, ვენახების მოვლა და თავიანთი საქმიანობა მომავალში. ამავე დროს, ჩვენ შევთანხმდით, რომ იმ სხვა მრავალწლიან კულტურებში, სადაც გვაქვს დიდი ზიანი,  საჭიროა სრულად ჩანაცვლდეს ან განახლდეს ბაღები, ეს სურვილისამებრ შეუძლიათ გადაწყვიტონ ფერმერებმა. ეს კომპონენტი, პროექტის  „დანერგე მომავალი“ ფარგლებში, შარშანწინ ავამოქმედეთ დროებით. წელს, მას განვაახლებთ, სადაც მოხდება ნერგის ღირებულების სრული ანაზღაურება და ასევე, ბაღის მოწყობისთვის, წვეთოვანი სისტემის დაყენების შემთხვევაში, თანადაფინანსება, რაც მებაღეებს, მათ შორის მევენახეებს, საშუალებას მისცემს ხელახლა აღადგინონ თავიანთი ბაღები. უნდა აღინიშნოს, რომ სადაზღვეო კომპანიები რეგიონში ოპერატიულად მუშაობენ. ჩვენ ვართ მუდმივ კონტაქტზე იმ სადაზღვეო კომპანიებთან, რომლებსაც განხორციელებული ჰქონდათ დაზღვევა კახეთის რეგიონში. კიდევ ერთხელ ვიყენებ შესაძლებლობას და მივმართავ მოსახლეობას, რომ მომავალ წლებში, აუცილებლად გამოიყენონ დაზღვევის ის პროდუქტი, რომელსაც სახელმწიფო სთავაზობს.  აგროდაზღვევის პროგრამაში, სადაზღვეო პრემიის, ანუ სადაზღვეო შენატანის თანხის ნახევარს, ვენახების შემთხვევაში, სახელმწიფო იხდის. შესაბამისად, ეს არის მნიშვნელოვნად გაიაფებული სერვისი.  ჩვენ გვქონდა შეხვედრები ფერმერებთან და ყველა აღიარებდა, რომ სამწუხაროდ, მათ წელს არ გამოიყენეს დაზღვევა. მიუხედავად იმისა, რომ დაზღვევის პროცენტი მზარდია, შემიძლია გითხრათ, რომ დაზიანებული ფართობიდან, დაახლოებით 1200 ჰექტრამდე ფართობია დაზღვეული.  დაზღვეული მევენახეები  სრულ ანაზღაურებას მიიღებენ. რა თქმა უნდა, ისინი უპირატეს მდგომარეობაში არიან. გვესმის, რომ ესეც მაგალითია, რომ დაზღვევა აუცილებელი საჭიროებაა სასოფლო-სამეურნეო საქმიანობისას, რათა მსგავსი პრობლემები, რომელზეც დღეს ვსაუბრობთ,  მომავალში ავირიდოთ თავიდან“, - განაცხადა საქართველოს ვიცე-პრემიერმა, გარემოს დაცვისა და სოფლის მეურნეობის მინისტრმა ლევან დავითაშვილმა დღეს, მთავრობის სხდომის დასრულების შემდეგ.
#

ლევან დავითაშვილი: ,,როგორც ყოველ წელს, წელსაც, ხელისუფლება ხალხის გვერდით დგას და ჩვენ გავაკეთებთ ყველაფერს, რომ სტიქიის მიერ მოსახლეობისთვის მიყენებული ზარალი მინიმუმამდე შემცირდეს“

საქართველოს ვიცე-პრემიერი, გარემოს დაცვისა და სოფლის მეურნეობის მინისტრი ლევან დავითაშვილი, საქართველოს მთავრობის ადმინისტრაციის რეგიონებთან ურთიერთობის დეპარტამენტის უფროსი ლერი ბარნაბიშვილი და კახეთის მხარის სახელმწიფო რწმუნებული ირაკლი შიოშვილი  სტიქიისგან დაზარალებულ ფერმერებს შეხვდნენ და მთავრობის მიერ სეტყვით დაზარალებული ფერმერების მხარდასაჭერად მიღებული გადაწყვეტილებები   გააცნეს. „ხაზგასმით მინდა აღვნიშნო, რომ როგორც  ყოველ წელს,  წელსაც ხელისუფლება დგას ხალხის გვერდით და ჩვენ გავაკეთებთ ყველაფერს, რომ სტიქიის მიერ მოსახლეობისთვის მიყენებული ზარალი მინიმუმამდე შემცირდეს. ზოგიერთი პოლიტიკური ძალა ცდილობს სპეკულირებას და მოსახლეობის გრძნობებით თამაშს. აცხადებენ, რომ მოსახლეობა მიტოვებულია და   ხელისუფლებისგან მხარდაჭერა არ აქვს, რაც არის აბსოლუტური სიცრუე. პირველი დღიდან, რთველის საკორდინაციო შტაბის თანამშრომლები მუშაობენ ფერმერებთან, რათა ორგანიზებულად მოხდეს დაზიანებული ყურძნის ჩაბარება. უნდა ითქვას, რომ სწორედ ჩვენი ხელისუფლების პირობებში ხდებოდა მევენახეობის დარგის უპრეცედენტო მხარდაჭრა, როგორც თანმიმდევრული პოლიტიკის და ზოგადად, დარგის განვითრების, ასევე კონკრეტულ შემთხვევების, მათ შორის კომპენსაციების კუთხით. 2012 წელს, გვახსოვს მასშტაბური კომპენსაციები, როდესაც ბატონმა ბიძინა ივანიშვილმა და ფონდმა ,,ქართუმ“ დაზარალებული მევენახეების კომპენსაცია განახორციელა. წელსაც, მთავრობის გადაწყვეტილებით, სტიქიით დაზარალებული მოსახლეობა, ვისაც სრულად, 100 %-ით გაუნადგურდა ყურძნის მოსავალი, ერთჯერადი კომპენსაცის სახით, 1 ჰა-ზე 3000 ლარს მიიღებს. მევენახეები დაზიანებულ ყურძენს - 1 კგ რქაწითელს 80 თეთრად, ხოლო  1 კგ საფერავს 1 ლარად  ჩაიბარებენ“, - აღნიშნა ლევან დავითაშვილმა. 26 აგვისტოს, ძლიერმა სეტყვამ და ქარმა, კახეთის რეგიონში, ყვარლის, თელავის და გურჯაანის მუნიციპალიტეტებში 4 600 ჰექტარი ვენახი დააზიანა. 
#

ლევან დავითაშვილი: „ყველა რესურსი მობილიზებულია, იმისთვის, რომ დაზარალებულმა მევენახეებმა მოსავლის დაბინავება შეუფერხებლად შეძლონ“

საქართველოს ვიცე-პრემიერი, გარემოს დაცვისა და სოფლის მეურნეობის მინისტრი ლევან დავითაშვილი, საქართველოს მთავრობის ადმინისტრაციის რეგიონებთან ურთიერთობის დეპარტამენტის უფროსი ლერი ბარნაბიშვილი და კახეთის მხარის სახელმწიფო რწმუნებული ირაკლი შიოშვილი სახელმწიფო საწარმოში შპს „მოსავლის მართვის კომპანია" სეტყვით დაზიანებული ყურძნის ჩაბარების პროცესს ადგილზე გაეცნენ.  „ყველა რესურსი  მობილიზებულია, იმისთვის, რომ დაზარალებულმა მევენახეებმა მოსავლის დაბინავება შეუფერხებლად შეძლონ. სეტყვის შედეგად დაზიანებული ყურძნის ჩაბარებას მევენახეები 3 სექტემბრის ჩათვლით შეძლებენ. დასეტყვილი ყურძნის მიღება თელავის, გურჯაანისა და ყვარლის მუნიციპალიტეტებში, სხვადასხვა ლოკაციაზე, უკვე შესაძლებელია. მევენახეები დაზიანებულ 1 კგ რქაწითელს 80 თეთრად და 1კგ საფერავს 1 ლარად ჩააბარებენ“, - აღნიშნა ლევან დავითაშვალმა. 26 აგვისტოს, ძლიერმა სეტყვამ და ქარმა, კახეთის რეგიონში, ყვარლის, თელავის და გურჯაანის მუნიციპალიტეტებში 4 600 ჰექტარი ვენახი დააზიანა. სახელმწიფო საწარმომ შპს „მოსავლის მართვის კომპანიამ" სეტყვისგან დაზიანებული ყურძნის ჩაბარება  27 აგვისტოდან დაიწყო და 3 სექტემბრის ჩათვლით გააგრძელებს.
#

ლევან დავითაშვილი: ,,მევენახეები დაზიანებულ ყურძენს - 1 კგ რქაწითელს 80 თეთრად და 1კგ საფერავს ერთ ლარად ჩააბარებენ, ხოლო ფერმერები, რომელთაც მოსავალი სრულად გაუნადგურდა, ერთჯერადი კომპენსაციის სახით 1 ჰა-ზე 3000 ლარს მიიღებენ“

საქართველოს ვიცე-პრემიერმა, გარემოს დაცვისა და სოფლის მეურნეობის მინისტრმა, ლევან დავითაშვილმა, საქართველოს მთავრობის ადმინისტრაციის რეგიონებთან ურთიერთობის დეპარტამენტის უფროსმა, ლერი ბარნაბიშვილმა და კახეთის მხარის სახელმწიფო რწმუნებულმა,  ირაკლი შიოშვილმა რთველი 2021-ის საკოორდინაციო შტაბში სეტყვით შედეგად დაზიანებული ყურძნის მიღება-გადამუშავების საკითხთან დაკავშირებით სამუშაო შეხვედრა გამართეს.  „კახეთის რეგიონის 5 მუნიციპალიტეტში დაფიქსირდა უპრეცედენტოდ დიდი სტიქია, სეტყვა, რომელმაც გაანადგურა სასოფლო-სამეურნეო სავარგულები. ჩვენ გვქონდა მყისიერი რეაგირება, საკოორდინაციო შტაბის მიერ კონკრეტული გადაწყვეტილებები უკვე მიღებულია. მთავრობის გადაწყვეტილებით, დასეტყვილი ყურძენი ჩაუბარებელი არ დარჩება.  რეგიონის მასშტაბით, რამდენიმე ლოკაციაზე გახსნილია პუნქტები, სადაც მევენახეები დაზიანებულ ყურძენს - 1 კგ რქაწითელს  80 თეთრად, ხოლო 1კგ საფერავს 1 ლარად ჩააბარებენ. ეს არის მაქსიმალური კომპენსაცია, რასაც ჩვენი ფერმერები მიიღებენ. იმ მევენახეებს, რომელთაც სრულად გაუნადგურდათ ყურძნის მოსავალი, ერთჯერადი კომპენსაციის სახით, სახელმწიფო  1 ჰა-ზე 3000 ლარს გადაუხდის,  რათა მოახერხონ  ვენახების აღდგენა და ყურძნის წარმოება. ჩვენთვის ასევე მნიშვნელოვანია, რომ ის განადგურებული ხილის ბაღები, სადაც მომავალ წლებში, რეალურად ვეღარ მოხდება მოსავლის მიღება,  ჩავანაცვლოთ. სწორედ ამ მიზნით, პროგრამის ,,დანერგე  მომავალი“ ფარგლებში, ბაღების აღდგენა-ჩანაცვლების კომპონენტი ამოქმედდება, მოხდება ნერგების სრული დაფინანსება და სარწყავი სისტემის თანადაფინანსება. ამ სტიქიიდან გამომდინარე, ეს იქნება ადეკვატური პასუხი ჩვენი ფერმერების საჭიროებებზე“, - აღნიშნა ლევან დავითაშვილმა. 26 აგვისტოს, ძლიერმა სეტყვამ და ქარმა, კახეთის რეგიონში, ყვარლის, თელავის და გურჯაანის მუნიციპალიტეტებში 4 600 ჰექტარი ვენახი დააზიანა.
#

დღეის მონაცემებით საქართველოდან 26.1 მლნ დოლარის ატამი და ვაშლატამაა ექსპორტირებული

მიმდინარე წლის 1 მაისიდან დღემდე განხორციელდა 28.7 ათასი ტონა ატმისა და ვაშლატამას ექსპორტი, რომლის ღირებულებამ 26.1 მლნ აშშ დოლარი შეადგინა. გასული წლის ანალოგიურ პერიოდთან შედარებით, ატმისა და ვაშლატამას ექსპორტის მოცულობა 5.7 ათასი ტონით (25%), ხოლო ღირებულება - 6.9 მლნ აშშ დოლარით (36%) გაიზარდა.ექსპორტი განხორციელდა რუსეთში (18,942), სომხეთში (8,156 ტონა), უკრაინაში (768 ტონა), აზერბაიჯანში (269 ტონა), ყაზახეთში (134 ტონა), ბელარუსში (119 ტონა), მოლდოვაში (116 ტონა), პოლონეთსა (98 ტონა) და სლოვენიაში (59 ტონა).
#

ლევან დავითაშვილი ურუგვაის აღმოსავლეთ რესპუბლიკის საგარეო საქმეთა მინისტრს შეხვდა

 გარემოს დაცვისა და სოფლის მეურნეობის მინისტრი ლევან დავითაშვილი ურუგვაის აღმოსავლეთ რესპუბლიკის საგარეო საქმეთა მინისტრ ფრანსისკო ბუსტილიო ბონასოს შეხვდა.შეხვედრაზე მხარეებმა ქვეყნებს შორის სავაჭრო-ეკონომიკური თანამშრომლობის საკითხები განიხილეს. ლევან დავითაშვილმა ვრცლად ისაუბრა საქართველოს საგარეო სავაჭრო ურთიერთობების შესახებ და ყურადღება ურუგვაის აღმოსავლეთ რესპუბლიკასთან სავაჭრო ბრუნვის გაზრდის, ასევე, სოფლის მეურნეობის დარგში არსებული გამოცდილების გაზიარების შესაძლებლებებზე გაამახვილა. „საქართველოს აქვს კეთილსაიმედო მდგომარეობა ცხოველთა ჯანდაცვის კუთხით. შესაბამისად, ცხოველური წარმოშობის სასურსათო პროდუქტებისა და ცოცხალი ცხოველის ექსპორტის მიმართულებით ურუგვაის აღმოსავლეთ რესპუბლიკასთან ჩვენი თანამშრომლობა, ვფიქრობ, ორმხრივად სასარგებლო იქნება“,- განაცხადა ლევან დავითაშვილმა.    „ჩვენ მზად ვართ ეფექტიანი და შედეგზე ორიენტირებული საქმიანი ურთიერთობებისთვის. ვფიქრობ, სოფლის მეურნეობის, მათ შორის, მეცხოველეობის მიმართულებით ნაყოფიერად ვითანამშრომლებთ“,- განაცხადა ფრანსისკო ბუსტილიო ბონასომ. 
#

სოფელ ტიბაანში თანამედროვე ტექნოლოგიებით აღჭურვილი ფერმა ამოქმედდება

 გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი, სიღნაღის  მუნიციპალიტეტის სოფელ ტიბაანში, შპს „ბუტრანას“ თანამედროვე ტექნოლოგიებით აღჭურვილი ფერმის მშენებლობის მიმდინარეობას გაეცნო.  სოფელ ტიბაანში ახალი ფერმერული მეურნეობა სექტემბრის მეორე ნახევარში ამოქმედდება. ფერმის აღჭურვასა და მის გამართულ მუშაობას კომპანია „კავკასიის გენეტიკა" განახორციელებს.   „ახალი მეურნეობა იქნება სრულყოფილი სასწავლო-სამეცნიერო კომპლექსი, სადაც, ერთი მხრივ, სანაშენე მიმართულება იფუნქციონირებს, ხოლო, მეორე მხრივ, გადამზადდება პერსონალი. ძალიან მნიშვნელოვანია, რომ ასეთი ტიპის საწარმოები სხვა რეგიონებშიც კეთდება, რაც ნიშნავს, რომ მეცხოველეობა ვითარდება სწრაფი ტემპით. სახელმწიფოს მხარდაჭერით, როგორც სოფლის მეურნეობის პრაქტიკულად ყველა მიმართულებით, მეცხოველეობის განვითარებისთვის  მნიშვნელოვანი ნაბიჯები იდგმება. ყველაფერი კეთდება, რომ საქართველოში ფერმერული მეურნეობა და სანაშენე მეურნეობა თანამედროვე სტანდარტებით განვითარდეს. ჩვენ გვაქვს ათწლიანი სამოქმედო გეგმა, სადაც მნიშვნელოვანი მხარდაჭერა მესაქონლეობის მიმართულებითაც გათვალისწინებულია“, - განაცხადა გიორგი ხანიშვილმა.  თანამედროვე ტექნოლოგიებით აღიჭურვილი ფერმის მოსაწყობად შპს „ბუტრანამ“ შეღავათიანი აგროკრედიტით ისარგებლა, სესხის თანხა 325,000 ლარს შეადგენს. ახალ ფერმაში მეწარმეს 50 სული მაღალპროდუქტიული საქონელი ეყოლება; შესაბამისად, დაგეგმილია ყველის წარმოების გაზრდა.  ამჟამად, კომპანია 20 დასახელების ყველს აწარმოებს, მათ შორის,  საფერავში დაძველებული ყველი, თაფლში დავარგებული ყველი, მწვანე და წითელ პესტოში დამზადებული ყველი, თხილიანი, კენკტიანი აჯიკიანი. გაფართოების შემდეგ, ასორტიმენტი 30-მდე გაიზრდება.