#

სოფელ ტიბაანში თანამედროვე ტექნოლოგიებით აღჭურვილი ფერმა ამოქმედდება

 გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი, სიღნაღის  მუნიციპალიტეტის სოფელ ტიბაანში, შპს „ბუტრანას“ თანამედროვე ტექნოლოგიებით აღჭურვილი ფერმის მშენებლობის მიმდინარეობას გაეცნო.  სოფელ ტიბაანში ახალი ფერმერული მეურნეობა სექტემბრის მეორე ნახევარში ამოქმედდება. ფერმის აღჭურვასა და მის გამართულ მუშაობას კომპანია „კავკასიის გენეტიკა" განახორციელებს.   „ახალი მეურნეობა იქნება სრულყოფილი სასწავლო-სამეცნიერო კომპლექსი, სადაც, ერთი მხრივ, სანაშენე მიმართულება იფუნქციონირებს, ხოლო, მეორე მხრივ, გადამზადდება პერსონალი. ძალიან მნიშვნელოვანია, რომ ასეთი ტიპის საწარმოები სხვა რეგიონებშიც კეთდება, რაც ნიშნავს, რომ მეცხოველეობა ვითარდება სწრაფი ტემპით. სახელმწიფოს მხარდაჭერით, როგორც სოფლის მეურნეობის პრაქტიკულად ყველა მიმართულებით, მეცხოველეობის განვითარებისთვის  მნიშვნელოვანი ნაბიჯები იდგმება. ყველაფერი კეთდება, რომ საქართველოში ფერმერული მეურნეობა და სანაშენე მეურნეობა თანამედროვე სტანდარტებით განვითარდეს. ჩვენ გვაქვს ათწლიანი სამოქმედო გეგმა, სადაც მნიშვნელოვანი მხარდაჭერა მესაქონლეობის მიმართულებითაც გათვალისწინებულია“, - განაცხადა გიორგი ხანიშვილმა.  თანამედროვე ტექნოლოგიებით აღიჭურვილი ფერმის მოსაწყობად შპს „ბუტრანამ“ შეღავათიანი აგროკრედიტით ისარგებლა, სესხის თანხა 325,000 ლარს შეადგენს. ახალ ფერმაში მეწარმეს 50 სული მაღალპროდუქტიული საქონელი ეყოლება; შესაბამისად, დაგეგმილია ყველის წარმოების გაზრდა.  ამჟამად, კომპანია 20 დასახელების ყველს აწარმოებს, მათ შორის,  საფერავში დაძველებული ყველი, თაფლში დავარგებული ყველი, მწვანე და წითელ პესტოში დამზადებული ყველი, თხილიანი, კენკტიანი აჯიკიანი. გაფართოების შემდეგ, ასორტიმენტი 30-მდე გაიზრდება. 
#

გიორგი ხანიშვილმა და ადა ბასეტმა სამინისტროსთვის „დაავადებათა ზედამხედველობის ელექტრონული ინტეგრირებული სისტემის“ (დზეის) მართვაზე პასუხისმგებლობის გადაცემისა და უზრუნველყოფის გეგმას ხელი ოფიციალურად მოაწერეს

გარემოს დაცვისა და სოფლის მეურნეობის მინისტრის პირველმა მოადგილემ, გიორგი ხანიშვილმა და ამერიკის შეერთებული შტატების თავდაცვის საფრთხის შემცირების სააგენტოს ბიოლოგიური საფრთხის შემცირების პროგრამის ხელმძღვანელმა, ადა ბასეტმა სამინისტროსთვის  „დაავადებათა ზედამხედველობის ელექტრონული ინტეგრირებული სისტემის“ (დზეის) მართვაზე პასუხისმგებლობის გადაცემისა და უზრუნველყოფის გეგმას ხელი ოფიციალურად მოაწერეს. „დაავადებათა ზედამხედველობის ელექტრონული ინტეგრირებული სისტემა“ (დზეის) წარმოადგენს დაავადებათა შესახებ ერთიან ინფორმაციულ ბაზას და ეპიდზედამხედველობის ინტეგრირებულ ეროვნულ სისტემაში შემავალ ორგანოებს შორის ინფორმაციის გაცვლის ინსტრუმენტს, რომელიც გამოიყენება დაავადებათა შემთხვევების დროული შეტყობინება/ანგარიშგების, მონიტორინგისა და ანალიზისთვის.   ბიოლოგიური საფრთხის შემცირების პროგრამის (BTRP) ფარგლებში, „დაავადებათა ზედამხედველობის ელექტრონული ინტეგრირებული სისტემის“ დანერგვა სურსათის ეროვნულ სააგენტოსა და სოფლის მეურნეობის სახელმწიფო ლაბორატორიაში 2004 წლიდან დაიწყო. სისტემა ეტაპობრივად დაინერგა საქართველოს მასშტაბით ყველა რეგიონულ ლაბორატორიაში და ეპიდემიოლოგიურ ზედამხედველობაში ჩართულ  ორგანიზაციებში.გარემოს დაცვისა და სოფლის მეურნეობის მინისტრის პირველმა მოადგილემ, გიორგი ხანიშვილმა მადლობა გადაუხადა ამერიკის შეერთებული შტატების თავდაცვის საფრთხის შემცირების სააგენტოს ევრაზიის ოფისის უფროსის მოადგილე მარგო შილდს, ბიოლოგიური საფრთხის შემცირების პროგრამის (BTRP) ფარგლებში ქვეყნისთვის გაწეული უმნიშვნელოვანესი დახმარებისთვის და განაცხადა, რომ აღნიშნული პროგრამის დამსახურებით, ქვეყანაში ბიოუსაფრთხოების განვითარებამ მნიშვნელოვან პროგრესს მიაღწია. მინისტრის პირველმა მოადგილემ ასევე ხაზგასმით აღნიშნა თავდაცვის საფრთხის შემცირების სააგენტოს მიერ სოფლის მეურნეობის სახელმწიფო ლაბორატორიის კოვიდის დიაგნოსტირებისთვის და თავდაცვისთვის საჭირო ინვენტარით აღჭურვის მნიშვნელობის  საკითხი. „ჩვენთვის გამორჩეულად დასაფასებელია თქვენი მხარდაჭერა, რისთვისაც გიხდით გულწრფელ მადლობას. შეძენილი ცოდნით და გამოცდილებით,  ჩვენ სათანადოდ შევძლებთ დაავადებათა ზედამხედველობის ელექტრონული ინტეგრირებული სისტემის მართვის პასუხისმგებლობის  გადმობარებას. ეს ჩვენი ერთობლივი მუშაობის მნიშვნელოვანი აღიარებაა. ვიმედოვნებ, ჩვენი თანამშრომლობა კიდევ უფრო გაღრმავდება“,- განაცხადა გიორგი ხანიშვილმა.„მინდა ყველას მოგილოცოთ, რადგან  ხელმოწერილი დოკუმენტი აღნიშნავს საქართველოს გარემოს დაცვისა და სოფლის მეურნეობის სამინისტროს მიერ სურსათის ეროვნულ სააგენტოსა და სოფლის მეურნეობის სახელმწიფო ლაბორატორიაში ბიოუსაფრთხოების განვითარების მიმართულებით ნაკისრი ვალდებულებების  პროგრესს. თანამშრომლობაში აღნიშნული მიღწევა ცხადყოფს საქართველოს, როგორც ჩვენთვის საიმედო პარტნიორის მნიშვნელობის საკითხს“, - განაცხადა მარგო შილდსმა.
#

დედოფლისწყაროს მუნიციპალიტეტში მესაქონლეობის ახალი ფერმა გაიხსნა

თანამედროვე სტანდარტებით აღჭურვილი ფერმერული მეურნეობის შესაქმნელად, ახალგაზრდა ფერმერმა,  ზურაბ მასურაშვილმა  2,5 მლნ  ლარი თანხის ინვესტიცია განახორციელა, აქედან 1,5 მლნ ლარი სახელმწიფოს მხარდაჭერა, შეღავათიანი აგროკრედიტია. ფერმაში,  ყოველდღიურად, 4 ტონა ნედლი რძე იწარმოება. პროდუქციის რეალიზაცია ადგილობრივ ბაზარზე ხდება; მეურნეობაში 10 ადგილობრივია  დასაქმებული.ახალი ფერმის გახსნას გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი, კახეთის მხარის სახელმწიფო რწმუნებული ირაკლი შიოშვილი, ფერმერთა ასოციაციის თავმჯდომარე ნინო ზამბახიძე, ადგილობრივი ხელისუფლებისა და გარემოს დაცვისა და სოფლის მეურნეობის სამინისტროს შესაბამისი სტრუქტურების წარმომადგენლები დაესწრნენ.„საქართველოში მეცხოველეობის დარგი წარმატებით ვითარდება, რაშიც მნიშვნელოვანია სახელმწიფოს და საერთაშორისო დონორი ორგანიზაციების წვლილი. დედოფლისწყაროში ამოქმედებული ახალი, თანამედროვე სტანდარტების ფერმა არის არა მარტო ამ ახალგაზრდა ფერმერის წარმატება, არამედ იმის ნათელი დადასტურება, რომ ქვეყანაში ფერმერული მეურნეობები და მესაქონლეობის დარგი ვითარდება. ასეთი წარმატებული ფერმა ასაქმებს ათეულობით ფერმერს და ქმნის წარმატების მოდელს“, - განაცხადა გიორგი ხანიშვილმა.
#

დასავლეთ საქართველოში, თხილის მოსავლის აღების პროცესი აქტიურ ფაზაში შედის. მეთხილე ფერმერები აღნიშნავენ, რომ წელს მოსავალი უხვი და ხარისხიანია.

მოსავლის აღების მიმდინარეობის საკითხები გარემოს დაცვისა და სოფლის მეურნეობის მინისტრის პირველმა მოადგილემ, გიორგი ხანიშვილმა და სურსათის ეროვნული სააგენტოს უფროსმა, ზურაბ ჩეკურაშვილმა წალენჯიხის მუნიციპალიტეტში, „თხილის გადარჩენის პროგრამაში“ ჩართულ აგროკონსულტანტებთან  გამართულ სამუშაო შეხვედრაზე განიხილეს. ყურადღება  თხილის სექტორში არსებულ გამოწვევებზეც გამახვილდა. „შეხვედრა  მნიშვნელოვანი იყო, რადგან, მიღწეულ შედეგებთან  ერთად, ვიმსჯელეთ ახალი ტექნოლოგიების დანერგვაზე, იმ გამოწვევებზე, რომელთა წინაშეც    ფერმერული მეურნეობები დგას. აღნიშნული საკითხების გადაწყვეტა  კომპლექსურ მიდგომას საჭიროებს და მომავალში ეს ყველაფერი  გარემოს დაცვისა და სოფლის მეურნეობის სამინისტროს ახალ პროგრამებში აისახება", - განაცხადა გიორგი ხანიშვილმა.თხილის მწარმოებელთა ასოციაციაში აცხადებენ, რომ მოსავალი ყოველწლიურად  უმჯობესდება, რაც სახელმწიფოს, კერძო სექტორსა და ფერმერებს შორის თანამშრომლობამ და დარგის განვითარების თანმიმდევრულმა პოლიტიკამ განაპირობა. მიღებული შედეგის შესანარჩუნებლად, მნიშვნელოვანია ფაროსანასთან ბრძოლის ღონისძიებების გაგრძელება და აგროსქემით  დადგენილი წამლობების ჩატარება. „თხილის გადარჩენის პროგრამა“, რომელიც  გარემოს დაცვისა და სოფლის მეურნეობის სამინისტრომ, 2019 წელს, თხილის მწარმოებელთა ასოციაციასთან ერთად შეიმუშავა, კომპლექსურ ღონისძიებებს ითვალისწინებს. აღნიშნული პროგრამის ფარგლებში, სახელმწიფომ ასოციაციას  შესაწამლი აპარატები გადასცა; გარდა ამისა,  მეთხილე ფერმერების  ცოდნის ამაღლების მიზნით, სპეციალისტების ჩართულობით,  მასშტაბური საკონსულტაციო სამუშაოები ჩატარდა. 
#

გარემოს დაცვისა და სოფლის მეურნეობის მინისტრის მოადგილე ნინო თანდილაშვილი გაზეთის The Financial ორგანიზებით გამართულ „მწვანე ბიზნესფორუმს” დაესწრო

სიტყვით გამოსვლისას, მინისტრის მოადგილემ ყურადღება გარემოსდაცვითი პასუხისმგებლობის ფარგლებში სამინისტროს მიერ განხორციელებულ პროექტებზე, სეპარირებული შეგროვების სისტემის აუცილებლობაზე და ნარჩენების გადამუშავების პერსპექტივებზე გაამახვილა. „სამინისტროსთვის პრიორიტეტულია მწვანე ბიზნესინიციატივებზე საუბარი და მეტი კომუნიკაცია; ნებისმიერი ახალი ვალდებულების და სტანდარტის შემოღება კერძო სექტორისგან ინვესტირებას საჭიროებს. ამ მიმართულებით, სამინისტროს აქვს გეგმები, რომელიც მათ საქმიანობას წაახალისებს. მსგავსი ფორუმები, სახელმწიფო უწყებებისა და ბიზნესსექტორის მონაწილეობით, მნიშვნელოვანია გაგრძელდეს, რათა მოხდეს მეტი გარემოსდაცვითი ინიციატივის იდენტიფიცირება და სახელმწიფოს მხრიდან მხარდაჭერა“, - განაცხადა ნინო თანდილაშვილმა. ფორუმის მონაწილეებმა მწვანე ეკონომიკისა და მწვანე ბიზნესის განვითარებაზე, მცირე და საშუალო საწარმოების ხელშეწყობაზე ისაუბრეს.  ფორუმზე მომხსენებლები იყვნენ პარლამენტის გარემოსდაცვითი კომიტეტის თავჯდომარე მაია ბითაძე, კომპანიის „არემჯი“ დირექტორის მოადგილე გარემოსდაცვით საკითხებში, სანდრო დევიძე, და „ტოიოტა კავკასიის“ გარემოს დაცვის მენეჯერი, სალომე მშვილდაძე. 
#

დღეის მდგომარეობით, საქართველოდან განხორციელებული ატმისა და ვაშლატამას ექსპორტის ღირებულება 23.4 მლნ აშშ დოლარს შეადგენს

მიმდინარე წლის 1 მაისიდან 9 აგვისტოს ჩათვლით პერიოდში, საქართველოდან 25.9 ათასი ტონა ატმისა და ვაშლატამას ექსპორტი განხორციელდა. გასული წლის ანალოგიურ პერიოდთან შედარებით, ატმისა და ვაშლატამას ექსპორტის მოცულობა 7.6 ათასი ტონით (41%), ხოლო ღირებულება - 7.9 მლნ აშშ დოლარით (51%) გაიზარდა.ექსპორტი განხორციელდა რუსეთში (16,915), სომხეთში (7,688 ტონა), აზერბაიჯანში (269 ტონა), უკრაინაში (671 ტონა), ბელარუსში (119 ტონა), ყაზახეთში (95 ტონა), მოლდოვასა (116 ტონა) და სლოვენიაში (59 ტონა).
#

ლევან დავითაშვილი: „2021 წლის რთველის წარმატებით და ორგანიზებულად ჩასატარებლად, სახელმწიფოს მიერ მობილიზებულია ყველა საჭირო რესურსი”

გარემოს დაცვისა და სოფლის მეურნეობის მინისტრმა, ლევან დავითაშვილმა რთველის საორგანიზაციო საკითხები ღვინის ეროვნული სააგენტოსა და სოფლის განვითარების სააგენტოს ხელმძღვანელებთან გამართულ შეხვედრაზე განიხილა. „ჩვენ გავიღებთ მაქსიმალურ ძალისხმევას, რომ რთველი ჩატარდეს წარმატებულად, ყველა მევენახე ფერმერმა შეძლოს მოსავლის დაბინავება, ხოლო საწარმოებმა ყურძნის მიღება-გადამუშავება. უკვე გადაიდგა კონკრეტული ნაბიჯები - საქართველოს მთავრობამ მიიღო სუბსიდირების გადაწვეტილება, რათა პანდემიის გამოწვევები დაბალანსდეს და შექმნილი ვითარება უარყოფითად არ აისახოს როგორც ფერმერებზე, ისე ღვინის მწარმოებლებზე; ჩვენ უნდა შევინარჩუნოთ დარგის სტაბილური განვითარების დინამიკა“, - აღნიშნა ლევან დავითაშვილმა.  საქართველოს მთავრობის გადაწყვეტილებით, სახელმწიფო სუბსიდიას მიიღებს ის კომპანია, რომელიც 2021 წლის რთველის განმავლობაში შეიძენს და გადაამუშავებს კახეთის რეგიონში მოწეულ არანაკლებ 100 ტონა „რქაწითელის“ ან „კახური მწვანის“ ჯიშის ყურძენს და შესყიდული 1 კგ ყურძნის სანაცვლოდ, მევენახეს გადაუხდის არანაკლებ 0,90 ლარს.  კომპანიებზე გასაცემი სუბსიდია, 1 კგ ყურძნზე, 0,35 ლარს შეადგენს. შეხვედრაზე აღინიშნა, რომ რთველი 2021-ის ორგანიზებულად ჩატარების მიზნით, გასული წლების ანალოგიურად, 24 საათიანი რეჟიმით იმუშავებს რთველის საკოორდინაციო შტაბი, რომელიც განთავსდება ქალაქ თელავში. ამ ეტაპზე, უკვე მიმდინარეობს შტაბის ტექნიკური გამართვის სამუშაოები. 2021 წელს საქართველოში ყურძნის საპროგნოზო მოსავალი რეკორდულ, 300 ათასამდე ტონას აღწევს.