#

ლევან დავითაშვილი ლუქსემბურგში კოლეგას შეხვდა

საქართველოს გარემოს დაცვისა და სოფლის მეურნეობის მინისტრი ლევან დავითაშვილი ლუქსემბურგის სოფლის მეურნეობის, მევენახეობის და მომხმარებელთა უფლებების დაცვის მინისტრს, ფერნარდ ეტგენს შეხვდა. ლუქსემბურგის სოფლის მეურნეობის, მევენახეობისა და მომხმარებელთა უფლებების დაცვის სამინსიტროში გამართულ შეხვედრაზე მხარეებმა ქვეყნებში მიმდინარე რეფორმები განიხილეს და მომავალი თანამშრომლობის სფეროები განსაზღვრეს. შეხვედრაზე ფერნარდ ეტგენმა ლუქსემბურგში მერძევეობის, მეცხოველეობისა და მევენახეობის სექტორში არსებულ მდგომარეობაზე ისაუბრა და მზადყოფნა გამოთქვა, ლუქსემბურგის მხარემ ქართველ ფერმერებს გამოცდილება გაუზიაროს. ლევან დავითაშვილმა დეტალურად ისაუბრა საქართველოში დარგის განვითრების მიზნით მიმდინარე და განხორციელებულ რეფორმებზე. მინისტრმა ყურადღება გაამახვილა სახელმწიფოს მხრიდან კერძო სექტორის ხელშემწყობ ღონისძიებებზე, მათ შორის, სასოფლო-სამეურნეო კოოპერატივების მხარდაჭერის მიმდინარე პროგრამებზე. მინისტრებმა მზადყოფნა გამოთქვეს, ხელი შეუწყონ ორი ქვეყნის კერძო სექტორის (ასოციაციები, კოოპერატივები) თანამშრომლობას და გამოცდილების გაზიარების პროცესს.„ლუქსემბურგი ევროკავშირის ერთ-ერთი დამფუძნებელი წევრია, ამიტომ ლუქსემბურგის მხრიდან პოლიტიკური მხარდაჭერა ჩვენი ქვეყნისთვის არის ძალიან მნიშვნელოვანი. ჩვენ ძალიან მჭიდრო თანამშრომლობა გვექნება სოფლის განვითარების პროგრამების, მათ შორის, გამოცდილების გაზიარების კუთხით და ვფიქრობ, რომ უახლოეს მომავალში მოეწყობა ქართველი ფერმერებისთვის სასწავლო ტური ლუქსემბურგში, რომლებიც მეცხოველეობის მიმართულებით მნიშვნელოვან ინფორმაციას მიიღებენ“,- განაცხადა ლევან დავითაშვილმა.ბრიუსელში ვიზიტის ფარგლებში გამართულ შეხვედრებს, საქართველოს გარემოს დაცვისა და სოფლის მეურნეობის მინისტრ ლევან დავითაშვილთან ერთად, ბელგიის სამეფოსა და ლუქსემბურგის დიდ საჰერცოგოში საქართველოს ელჩი და ევროკავშირთან საქართველოს მისიის ხელმძღვანელი ნატალი საბანაძე და გარემოს დაცვისა და სოფლის მეურნეობის მინისტრის პირველი მოადგილე ნოდარ კერესელიძე ესწრებოდნენ.
#

ლევან დავითაშვილი ევროკომისარ ვიტენის ანდრიუკაიტისს შეხვდა

 ბრიუსელში ვიზიტის ფარგლებში, გარემოს დაცვისა და სოფლის მეურნეობის მინისტრი, ლევან დავითაშვილი ჯანმრთელობისა და სურსათის უვნებლობის საკითხებში ევროკომისარს, ვიტენის ანდრიუკაიტისს შეხვდა. შეხვედრაზე მხარეებმა ევროკავშირთან ასოცირების და ღრმა და ყოვლისმომცველი თავისუფალი სავაჭრო სივრცის შესახებ შეთანხმებებით ნაკისრი ვალდებულებების შესრულების და სამომავალო თანამშრომლობის საკითხები განიხილეს. ლევან დავითაშვილმა მადლობა გადაუხადა ევროკომისარს აქტიური თანამშრომლობისა და მხარდაჭერისთვის. მინისტრმა დეტალურად ისაუბრა საქართველოში სოფლის მეურნეობის დარგში განხორციელებულ და მიმდინარე რეფორმებზე. არსებულ გამოწვევებზე საუბრისას, ლევან დავითაშვილმა ყურადღება გავრცელებული ახალი მავნებლის აზიური ფაროსანას წინააღმდეგ ბრძოლის ღონისძიებებზე გაამახვილა. როგორც ევროკომისარმა განაცხადა, მნიშვნელოვანია სურსათის უვნებლობის, ვეტერინარიისა და ფიტოსანიტარიის სისტემის ტექნიკური, მატერიალური და ადამიანური რესურსის გაძლიერების მიმართულებით მუშაობა გაგრძელდეს.„მიმდინარე წლის თებერვალში, პრემიერ-მინისტრის ხელმძღვანელობით გამართული ასოცირების საბჭოს შეხვედრების შემდეგ გადაწყდა ევროკომისიის შესაბამისი სტრუქტურების ხელმძღვანელებთან შეხვედრა. მნიშვნელოვანია ის პროგრესი, რომელიც საქართველოს აქვს ევროპასთან საკანონმდებლო დაახლოების კუთხით და ასევე ძალიან მნიშვნელოვანია ევროპის მხარდაჭერის გაგრძელება საქართველოში ლაბორატორიული და სურსათის უვნებლობის კონტროლის თვალსაზრისით, რაც მოგვცემს საშუალებას, რომ საქართველომ თავისუფალი ვაჭრობის რეჟიმით ისარგებლოს“, - განაცხადა ლევან დავითაშვილმა. შეხვედრაზე დადებითად შეფასდა საქართველოს მიერ ნაკისრი ვალდებულებების შესრულების მიმდინარეობა. როგორც ევროკომისარმა აღნიშნა, ევროკავშირი საქართველოს კანონმდებლობის ევროკავშირის კანონმდებლობასთან დაახლოების პროცესში მხარდაჭერას აგრძელებს.ბრიუსელში გამართულ შეხვედრებს, საქართვლოს გარემოს დაცვისა და სოფლის მეურნეობის მინისტრ ლევან დავითაშვილთან ერთად, ბელგიის სამეფოსა და ლუქსემბურგის დიდ საჰერცოგოში საქართველოს ელჩი და ევროკავშირთან საქართველოს მისიის ხელმძღვანელი ნატალი საბანაძე და გარემოს დაცვისა და სოფლის მეურნეობის მინისტრის პირველი მოადგილე ნოდარ კერესელიძე ესწრებოდნენ. 
#

ლევან დავითაშვილი ძერჟი პლევას შეხვდა

ბრიუსელში ვიზიტის ფარგლებში, გარემოს დაცვისა და სოფლის მეურნეობის მინისტრი ლევან დავითაშვილი ევროკომისიის სოფლისა და სოფლის მეურნეობის გენერალურ დირექტორს, ძერჟი პლევას შეხვდა. შეხვედრაზე მინისტრმა დეტალურად ისაუბრა სოფლის მეურნეობისა და სოფლის განვითარების სტრატეგიების იმპლემენტაციის საკითხებსა და ENPARD-ის (ევროპის სამეზობლო პროგრამა სოფლის მეურნეობისა და სოფლად განვითარებისთვის) ვალდებულებების შესრულების მნიშვნელობაზე.„ჩვენთვის მნიშვნელოვანი საკითხია საქართველოში სოფლისგანვითარების მიმართულებით ევროკავშირის მხარდაჭერა. გვაქვს ახალი სტრატეგია; ევროკავშირიდან ვიღებთ დახმარებას ENPARD-ის ფარგლებში. ქვეყნისთვის უმნიშვნელოვანესია ევროკავშირის მხრიდან მხარდაჭერა და თანამშრომლობა მომავალშიც გაგრძელდეს“, - განაცხადა ლევან დავითაშვილმა.ევროკომისიის სოფლისა და სოფლის მეურნეობის გენერალურმა დირექტორმა სამომავლო თანამშრომლობისთვის მზადყოფნა გამოთქვა. საქართველოს გარემოს დაცვისა და სოფლის მეურნეობის მინისტრმა, ლევან დავითაშვილმა ძერჟი პლევა სოფლის განვითარების მიმართულებით განხორციელებული რეფორმების გასაცნობად საქართველოში მიიწვია.ბრიუსელში გამართულ შეხვედრებს საქართველოს გარემოს დაცვისა და სოფლის მეურნეობის მინისტრ ლევან დავითაშვილთან ერთად ბელგიის სამეფოსა და ლუქსემბურგის დიდ საჰერცოგოში საქართველოს ელჩი და ევროკავშირთან საქართველოს მისიის ხელმძღვანელი ნატალი საბანაძე და გარემოს დაცვისა და სოფლის მეურნეობის მინისტრის პირველი მოადგილე ნოდარ კერესელიძე ესწრებოდნენ.
#

დაცული ტერიტორიები 1 100 000 ევროს ოდენობის გრანტს მიიღებს

გარემოს დაცვისა და სოფლის მეურნეობის სამინისტროში სამმხრივი საგრანტო ხელშეკრულება გაფორმდა, რომლის ფარგლებშიც, საქართველოს 8 დაცული ტერიტორია კავკასიის ბუნების ფონდიდან (CNF) 1 100 000 ევროს ოდენობის გრანტს მიიღებს. ხელშეკრულებას ხელი გარემოს დაცვისა და სოფლის მეურნეობის მინისტრის მოადგილე გიორგი ხანიშვილმა, დაცული ტერიტორიების სააგენტოს თავმჯდომარის მოვალეობის შემსრულებელმა ვალერიან მჭედლიძემ და კავკასიის ბუნების ფონდის აღმასრულებელმა დირექტორმა ჯორჯ ჯაკომინიმ მოაწერეს. საგრანტო ხელშეკრულების ფარგლებში, დაცული ტერიტორიების ადმინისტრაციების თანამშრომლების კვალიფიკაციის ამაღლების მიზნით დაგეგმილია ტრენინგების ჩატარება; განახლდება ავტოპარკი, რაც ხელს შეუწყობს რეინჯერთა საქმიანობის უკეთ განხორციელებას და უზრუნველყოფს სამართალდარღვევათა უფრო ეფექტიან გამოვლენას. ხელმოწერის ღონისძიებაზე, გარემოს დაცვისა და სოფლის მეურნეობის მინისტრის მოადგილემ, გიორგი ხანიშვილმა საერთაშორისო დონორ ორგანიზაციებთან თანამშრომლობის და მათი მხრიდან სხვადასხვა მიმართულების მხარდაჭერის მნიშვნელობაზე ისაუბრა.კავკასიის ბუნების ფონდის აღმასრულებელმა დირექტორმა, ჯორჯ ჯაკომინიმ კავკასიის ბუნების ფონდის მიერ ეროვნული პარკებისა და დაცული ტერიტორიებისთვის გამოყოფილი გრანტის ფარგლებში ბუნების კონსერვაციაზე მზრუნველი ადამიანების ფინანსური მხარდაჭერის მნიშვნელობას გაუსვა ხაზი. 
#

300 არაგველის სახელობის სკვერში გამწვანების აქცია გაიმართა

გარემოს დაცვისა და სოფლის მეურნების სამინისტროს ინიციატივით, დედამიწის დღესთან დაკავშირებით, 300 არაგველის სახელობის სკვერში გამწვანების აქცია გაიმართა. აქციაში მონაწილეობა მინისტრის მოადგილე ნინო თანდილაშვილმა მეტყევეებთან ერთად მიიღო. აქციის ფარგლებში, სკვერში ურბანული გამწვანების სტანდარტის მიხედვით, ნეკერჩხალისა და მუხის სახეობის ნერგები დაირგო. ნარგავების მოვლა-პატრონობას დედაქალაქის მერიის გარემოს დაცვის საქალაქო სამსახური უზრუნველყოფს. დედამიწის დღე 1970 წლიდან აღინიშნება. ეს დღე ამერიკელმა სენატორმა გეოლორდ ნელსონმა მას შედეგ დაარსა, რაც სანტა ბარბარას საბადოდან ნავთობი დაიღვარა, რის შედეგადაც ოკეანე დაბინძურდა და წყლის ბინადრები დაიხოცნენ. ნელსონის მოწოდებით, 20 მილიონი ამერიკელი გამოვიდა დედამიწის დასაცავად. დედამიწის დღე მსოფლიოში ერთ-ერთი ყველაზე მასშტაბური გარემოსდაცვითი ღონისძიებაა, რომელშიც ყოველ წელს მსოფლიოს 175 ქვეყნის 17 000-მდე ორგანიზაცია და მილიონობით მოხალისე მონაწილეობს. საქართველოში დედამიწის დღე პირველად 1990 წელს აღინიშნა და მას შემდეგ ყოველწლიურად ამ ღონისძიებას უერთდება მრავალი ორგანიზაცია და მოხალისე, რომლებიც ახორციელებენ სხვადასხვა ტიპის გარემოსდაცვით საქმიანობას მთელი ქვეყნის მასშტაბით.
#

„თბილისის ჩაის ფესტივალი"

ჩაისა და თაფლის საერთაშორისო ფესტივალი, მთაწმინდის პარკში, გარემოს დაცვისა და სოფლის მეურნეობის მინისტრის მოადგილემ გიორგი ხანიშვილმა გახსნა. „თბილისის ჩაის ფესტივალი“ სამინისტროს, საქართველოს ჩაის მწარმოებელთა ასოციაციისა და მთაწმინდის პარკის მიერ არის ორგანიზებული.ფესტივალის მთავარი ამოცანაა მეჩაიეობის სფეროში ეკონომიკური ზრდის წახალისება, ერთობლივი ეკონომიკური რეგიონული პროექტების განხორციელება, ადგილობრივი საშუალო და მცირე მწარმოებლების მხარდაჭერა, ასევე საზოგადოებაში მომხმარებელთა შორის ნატურალური ჩაის პოპულარიზაცია და შიდა ბაზრის ათვისება.„დღევანდელ ფესტივალზე წარმოდგენილია ჩაის და თაფლის სეგმენტი, მონაწილეობას იღებენ ჩაის იმპორტიორებიც. ფესტივალი აჩვენებს თუ როგორი პროგრესია ყოველ წლიურად ამ სფეროში, ჩნდებიან ახალი კომპანიები და ვითარდებიან უკვე არსებულები. ასეთი ღონისძიებები ხელს უწყობს, როგორც ტრადიციების შენარჩუნებას და განვითარებას, ასევე რეგიონში ამ დარგის აღორძინებას,“ – განაცხადა გიორგი ხანიშვილმა.ჩაის მწარმოებელთა ასოციაციის პრეზიდენტმა თენგიზ სვანიძემ ფესტივალის მნიშვნელობაზე ისაუბრა და აღნიშნა, რომ 2005 წლიდან ის ყოველ წლიურად მეტ მონაწილეს აერთიანებს და დარგის პოპულარიზაციას ახდენს. ფესტივალში 10–მდე ქართული კომპანია და ასევე, უცხოელი მწარმოებლებიც იღებდნენ მონაწილეობას. ფესტივალზე წარმოდგენილი იყო ჩაისა და თაფლის უნიკალური სახეები.„თბილისის ჩაის ფესტივალში“ მონაწილეობა მიიღეს პარლამენტისა და მთავრობის წევრებმა, ასევე საქართველოში აკრედიტირებულმა საელჩოების წარმომადგენლებმა.
#

22 აპრილს დედამიწის დღე აღინიშნება

ყოველი წლის 22 აპრილს, მსოფლიოს 175 ქვეყანაში დედამიწის საერთაშორისო დღეს აღნიშნავენ. საქართველო ამ ქვეყნების სიას 1990 წლიდან შეუერთდა. გარემოს დაცვისა და სოფლის მეურნეობის მინისტრის პირველმა მოადგილემ, ნოდარ კერესელიძემ, პარტნიორ ორგანიზაციებთან და დიპლომატიური კორპუსის წარმომადგენლებთან ერთად, საზოგადოებას მასშტაბური გარემოსდაცვითი კამპანიების შესახებ ინფორმაცია გააცნო. დედამიწის საერთაშორისო დღის წლევანდელი გზავნილია მსოფლიოს მობილიზება პლასტიკის ნარჩენების შესამცირებლად. დედამიწის დღე ამერიკელმა სენატორმა გეოლორდ ნელსონმა მას შედეგ დაარსა, რაც სანტა ბარბარას საბადოდან ნავთობი დაიღვარა, რის შედეგადაც ოკეანე დაბინძურდა და წყლის ბინადრები დაიხოცნენ. „ძალიან მნიშვნელოვანია, რომ უახლოეს მომავალში, სახელმწიფოს მიერ შემუშავებული რეგულაციების ამოქმედებით, მინიმუმადე იქნება დაყვანილი პლასტიკის პარკების მოხმარება და, შესაბამისად, ამ ტიპის ნარჩენებით გარემოს დაბინძურება. სამინისტროს მიერ შემუშავებულია მთავრობის დადგენილების პროექტი „პლასტიკის და ბიოდეგრადირებადი პარკების რეგულირების წესი". აღნიშნულის საჭიროება გამოწვეულია იმ გარემოებით, რომ ბოლო წლებში მთელ მსოფლიოში და, მათ შორის, საქართველოში გაზრდილია პლასტიკის პარკების მოხმარება, რაც მნიშვნელოვან პრობლემას უქმნის გარემოს. შემუშავებული ტექნიკური რეგლამენტი ადგენს საქართველოს ტერიტორიაზე პლასტიკის და ოქსო-დეგრადირებადი პლასტიკის პარკების, ასევე ბიოდეგრადირებადი და კომპოსტირებადი პარკების წარმოებასთან, რეალიზაციასთან და იმპორტთან დაკავშირებულ ძირითად მოთხოვნებს“, - განაცხადა ნოდარ კერესელიძემ. აღსანიშნავია, რომ საზოგადოებამ იცოდეს და, შესაბამისად, აქტიურად ჩაერთოს იმ მასშტაბურ გარემოსდაცვით კამპანიებში, რომლებიც დედამიწის დღესთან დაკავშირებით, მთელი ქვეყნის მასშტაბით არის დაგეგმილი. საქართველოში, ამ დღეს, ოფიციალურად აიღებს სტარტს მასშტაბური გარემოსდაცვითი კამპანია „გარემოს გულისთვის”. კამპანია მიზნად ისახავს სამთავრობო სექტორის, კერძო კომპანიების, არასამთავრობო ორგანიზაციებისა და ადგილობრივი მოსახლეობის ჩართვას საქართველოში სუფთა და მწვანე გარემოს შენარჩუნების ღონისძიებებში. კომპანიებს, ორგანიზაციებს და ყველა დაინტერესებულ პირს შეუძლიათ აირჩიონ ადგილი - გზის განაპირა უბანი, პარკი, სალაშქრო ბილიკი, ქუჩა - და სამი წლის განმავლობაში მის მოვლა-პატრონობაზე აიღონ პასუხისმგებლობა. კამპანიას უკვე შემოუერთდა კერძო, საჯარო და არასამთავრობო სექტორის 15-მდე წარმომადგენელი. „დედამიწის დღის“ აღსანიშნავად, პროექტის „დავასუფთაოთ საქართველო - დავასუფთაოთ მსოფლიო“ ფარგლებში, საქართველოში, წელს უკვე მესამედ გამოცხადდა კონკურსი „სუფთა რეგიონი“. კონკურსის ფარგლებში, ყველა მუნიციპალიტეტში დაასუფთავებენ დანაგვიანებულ ადგილებს. გამოვლინდება ყველაზე სუფთა რეგიონი, სუფთა მუნიციპალიტეტი, სუფთა ქალაქი/დაბა, სუფთა სოფელი/თემი და ლამაზი ეზო. „მადლობა მინდა გადავუხადო საერთაშორისო და პარტნიორ ორგანიზაციებს ჩვენთან აქტიური თანამშრომლობისთვის და უმნიშვნელოვანესი ღონისძიებების განხორციელების პროცესში თანადგომისთვის“, - აღნიშნა ნოდარ კერესელიძემ. დღევანდელ ღონისძიებას ესწრებოდნენ შვედეთის სამეფოს ელჩი მარტინა ქვიქი, USAID-ის ეკონომიკური განვითარების ოფისის დირექტორი ვერონიკა ლი, შვედეთის განვითარების სააგენტოს ხელმძღვანელი საქართველოში მოლი ლეინი, საქართველოს მწვანეთა მოძრაობა/დედამიწის მეგობრები-საქართველო ხელმძღვანელი ნინო ჩხობაძე, კავკასიის გარემოსდაცვითი არასამთავრობო ორგანიზაციების ქსელი (CENN) აღმასრულებელი დირექტორი ნანა ჯანაშია, საქართველოს ბუნების მკვლევართა კავშირი „ორქისი“ და „ეკოლოგიური ცნობიერების ამაღლება და ნარჩენების მართვა“.