#

ლატვიის მინისტრის ვიზიტი საქართველოში

გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი ლატვიის რესპუბლიკის გარემოს დაცვისა და რეგიონული განვითარების მინისტრს კასპარს გერჰარდს შეხვდა. ორმხრივი შეხვედრის ფარგლებში, მხარეებმა ქვეყნებს შორის გარემოს დაცვისა და ნარჩენების მართვის სფეროში თანამშრომლობასა და გამოცდილების გაზიარებაზე იმსჯელეს.დღესვე, სამინისტროში საქართველოს და ლატვიის რესპუბლიკას შორის, გარემოსდაცვითი თანამშრომლობის ფარგლებში ხელი მოეწერა ნარჩენების მართვის შესახებ დეკლარაციას, რომელიც ხელს შეუწყობს ქვეყნებს შორის დარგობრივი თანამშრომლობის გაღრმავებას. დეკლარაციას ხელი გარემოს დაცვისა და სოფლის მეურნეობის მინისტრის მოადგილემ სოლომონ პავლიაშვილმა და ლატვიის რესპუბლიკის გარემოს დაცვისა და რეგიონული განვითარების მინისტრმა კასპარს გერჰარდსმა მოაწერეს.„ჩვენ მტკიცედ ვუჭერთ საქართველოს მხარს ევროინტეგრაციის გზაზე. გარემოს დაცვის მნიშვნელოვანია როგორც საქართველოსთვის ასევე ლატვიისთვის და წლების განმავლობაში მიმდინარეობს თანამშრომლობა ორ უწეყბას შორის. დღევანდელი შეხვედრის მიზანი, სწორედ ნარჩენების მართვის მიმართულებით თანამშრომლობის გაძლიერებაა“ - განაცხადა კასპარს გერჰარდმა შეხვედრაზე.შეხვედრაზე საქართველოს მიერ ნარჩენების მართვის სფეროს განვითარებისა და ნარჩენების მართვის საკანონმდებლო ბაზის ევროკავშირის შესაბამის დირექტივებთან ჰარმონიზაციაზე იმსჯელეს. ასევე, განიხილეს ორ ქვეყანას შორის სამომავლო თანამშრომლობის პერსპექტივები, მათ შორის საჯარო და კერძო სექტორის შესაძლებლობების გაძლიერების საკითხები.საქართველო-ლატვიას შორის გარემოსდაცვითი კუთხით თანამშრომლობა 2008 წლიდან მიმდინარეობს, როდესაც გაფორმდა “საქართველოს გარემოსა და ბუნებრივი რესურსების დაცვის სამინისტროსა და ლატვიის რესპუბლიკის გარემოს დაცვის სამინისტროს შორის გარემოს დაცვის სფეროში თანამშრომლობის შესახებ შეთანხმება“.შეხვედრას ქ. თბილისის მერიის, შპს „მყარი ნარჩენების მართვის კომპანიის“; შპს „თბილსერვის ჯგუფის“ და ასევე, კერძო სექტორის წარმომადგენლები ესწრებოდნენ
#

ატომური ენერგიის საერთაშორისო სააგენტოს მისიის ვიზიტი საქართველოში

საქართველო ატომური ენერგიის საერთაშორისო სააგენტოს მისიას (integrated Regulatory Review Service (IRRS)) მასპინძლობს. ბირთვული და რადიაციული უსაფრთხოების სააგენტოში მისიის წარმომადგენლებს გარემოს დაცვისა და სოფლის მეურნეობის მინისტრის პირველი მოადგილე ნოდარ კერესელიძე შეხვდა. მისია მიზნად ისახავს საქართველოს ბირთვული და რადიაციული უსაფრთხოების მარეგულირებელი სისტემის შესწავლას და მისი საერთაშორისო სტანდარტებთან შესაბამისობის დადგენას.  მისია დაკომპლექტებულია სხვადასხვა ქვეყნის ექსპერტებით, რომლებიც ორი კვირის განმავლობაში გაეცნობიან სხვადასხვა უწყებების საქმიანობას რადიაციული უსაფრთხოების მიმართულებით, რის შემდეგაც მომზადდება დასკვნა შესაბამისი რეკომენდაციებით. აღსანიშნავია, რომ მისიის რეკომენდაციების შესრულება გადამოწმდება ატომური ენერგიის საერთაშორისო სააგენტოს ე.წ. “follow up” მისიის მიერ. „ატომური ენერგიის საერთაშორისო ორგანიზაციის ეგიდით ჩამოსულია მისია, რომელიც შეისწავლის ატომური და ბირთვული უსაფრთხოების სტრუქტურას და სისტემას საქართველოში. ჩვენი ქვეყნისთვის ძალიან მნიშვნელოვანია გამართული სისტემა, რომელიც პასუხობს საერთაშორისო მოთხოვნებს. ერთის მხრივ, საქართველოს დადებითი იმიჯისთვის, მეორეს მხრივ, კონკრეტული შედეგისთვის, რაც უკავშირდება ჩვენს ქვეყანაში ბირთვული და რადიაციული უსაფრთხოების უზრუნველყოფას“ - განაცხადა ნოდარ კერესელიძემ შეხვედრაზე. მისიის მოსამზადებელ პერიოდში ბირთვული და რადიაციული უსაფრთხოების სააგენტოს სპეციალისტებმა განახორციელეს ბირთვული და რადიაციული უსაფრთხოების ეროვნული მარეგულირებელი ინფრასტრუქტურის თვითშეფასება ატომური ენერგიის საერთაშორისო სააგენტოს მიერ უზრუნველყოფილი SARIS (Self-Assessment Tool) სისტემის მეშვეობით. თვითშეფასების ანალიზის შედეგად შემუშავდა სამოქმედო გეგმის პროექტი. შეხვედრას საგარეო საქმეთა სამინისტროს, შრომის, ჯანმრთელობისა და სოციალური დაცვის სამინისტროს და საგანგებო სიტუაციების მართვის სამსახურის წარმომადგენლები ესწრებოდნენ.
#

სატყეო საქმის სპეციალისტის სასწავლო პროგრამა

ახალციხის საზოგადოებრივ კოლეჯში “ოპიზარი” სატყეო საქმის სპეციალისტის სასწავლო პროგრამა დაინერგა. სატყეო სექტორის სპეციალისტებს გარემოს დაცვისა და სოფლის მეურნეობის სამინისტროს, ეროვნული სატყეო სააგენტოს უფროსის მოადგილე ნათია იორდანიშვილი შეხვდა. პროგრამა გერმანიისა და ავსტრიის მთავრობების მხარდაჭერით, 2017 წლიდან განათლების განვითარების ეროვნული ცენტრის ხელშეწყობით, პროფესიული განათლების განვითარების პროგრამის ფარგლებში განხორციელდა.კოლეჯი აღჭურვილია ყველა საჭირო ინვენტარით, რაც აუცილებელია სატყეო საქმის ეფექტური სწავლებისთვის. კოლეჯის მიმდებარე ტერიტორიაზე სიმბოლურად დარგვის აქციაც გაიმართა.ღონისძიებას გერმანიის საერთაშორისო თანამშრომლობის საზოგადოება “GIZ”-ს სატყეო ექსპერტი ერიხ მიისი და ბიომრავალფეროვნებისა და სატყეო პოლიტიკის დეპარტამენტის წარმომადგენლები ესწრებოდნენ. 
#

გარემოსა და ჯანმრთელობაზე ურთიერთკავშირის შესახებ იმსჯელეს

სასტუმრო „rooms hotel tbilisi”-ში მდგრადი განვითარების მიზნების 2030 წლის დღის წესრიგში გარემოსა და ჯანმრთელობას შორის ურთიერთკავშირის შესახებ იმსჯელეს. შეხვედრის მონაწილეებს გარემოს დაცვისა და სოფლის მეურნეობის მინისტრის მოადგილემ ნინო თანდილაშვილმა მიმართა.შეხვედრის მიზანია, გარემოსა და ჯანმრთელობას შორის არსებული კავშირების შესახებ ცნობიერების ამაღლება, მონაწილეებს შორის, რომლებიც სხვადასხვა სამთავრობო უწყებებს, საერთაშორისო და არასამთავრობო ორგანიზაციებს წარმოადგენენ, სტრატეგიული პარტნიორობის ხელშეწყობა. სემინარი მნიშვნელოვან როლს ითამაშებს გარემოსა და ჯანმრთელობის საკითხების ინტეგრირებაში, შესაბამის პროგრამებში და მდგრადი განვითარების მიზნების განხორციელებაში ეროვნულ დონეზე.მხარეებმა გარემოსა და ჯანმრთელობის შესახებ ქ. ოსტრავაში (ჩეხეთის რესპუბლიკა) გამართული ევროპის მეექვსე მინისტერიალისა და გაეროს გარემოსდაცვითი ასამბლეის მესამე სესიის (UNEA-3) შედეგებზეც იმსჯელეს. ასევე, გარემოსა და ჯანმრთელობის მიმართულებით ეროვნულ დონეზე არსებული პოლიტიკური, ინსტიტუციური, სამართლებრივი საფუძვლები, განხორციელებული და დაგეგმილი ქმედებები განიხილეს.შეხვედრა გარემოს დაცვისა და სოფლის მეურნეობის სამინისტროსთან თანამშრომლობით, გაეროს გარემოსდაცვითი პროგრამის (UNEP) და არასამთავრობო ორგანიზაცია - ქალები საერთო მომავლისთვის (Women Engage for Common Future (WECF)) ორგანიზებით გაიმართა.
#

ფაროსანასთან ბრძოლის სამთავრობო კომისიის სხდომა

სამთავრობო კომისიის სხდომაზე „ქვეყანაში აზიური ფაროსანას წინააღმდეგ გასატარებელი ღონისძიებების შესახებ“ იმსჯელეს. კომისიამ, რომლის შემადგენლობაშიც სამინისტროების, აჭარისა და აფხაზეთის ავტონომიური რესპუბლიკების წარმომადგენლები, ასევე, საპარლამენტო კომიტეტების თავმჯდომარეები, მეცნიერებათა ეროვნული და სოფლის მეურნეობის მეცნიერებათა აკადემიების ხელმძღვანელები შედიან, ფაროსანასთან ბრძოლის 2018 წლის გეგმა დაამტკიცა. გარემოს დაცვისა და სოფლის მეურნეობის მინისტრმა, ლევან დავითაშვილმა კომისიის წევრებს სამინისტროს მიერ უკვე ჩატარებული ღონისძიებების შესახებ ინფორმაცია მიაწოდა და დღეს არსებული მდგომარეობა გააცნო. დავითაშვილმა აზიურ ფაროსანასთან ბრძოლაში სახელმწიფოს როლის მნიშვნელობასა და ბრძოლის ღონისძიებებში სახელმწიფო უწყებების კომპეტენციების ფარგლებში ჩართულობის აუცილებლობაზე ისაუბრა. „უკვე დაიგეგმა ღონისძიებები და სამთავრობო კომისიაში შემავალ უწყებებს შორის გადანაწილდა ფუნქციები. კომისია მთელი წლის განმავლობაში იმუშავებს და მონიტორინგს გაუწევს იმ სტრატეგიის შესრულების მიმდინარეობას, რომელიც 2018 წლისთვის აზიურ ფაროსანასთან ბრძოლის კუთხით არის დაგეგმილი“, - განაცხადა მინისტრმა.საქართველოს რეგიონული განვითარებისა და ინფრასტრუქტურის სამინისტრო ადგილობრივ თვითმმართველობებზე გაცემული დავალებების კოორდინაციას განახორციელებს და ქვეყნის მასშტაბით შესაბამისი ტექნიკისა და ადამიანური რესურსის მობილიზებას მოახდენს. საქართველოს შრომის, ჯანმრთელობისა და სოციალური დაცვის სამინისტრო უზრუნველყოფს მოსახლეობის ინფორმირებას, თუ როგორ უნდა ებრძოლონ ფაროსანას საცხოვრებელი სახლის პირობებში, ასევე, მოამზადებს შესაბამის საინფორმაციო ბუკლეტებს.განათლების სამინისტრო სამეცნიერო წრეებთან იმუშავებს, ფინანსთა სამინისტრო კი, საზღვრებზე ფიტოსანიტარულ რეჟიმს გააძლიერებს. რეგიონებში ადგილობრივ ხელისუფლებას მოხალისეების ჯგუფების შექმნის კოორდინაცია დაევალათ. ასევე, გარემოს დაცვისა და სოფლის მეურნეობის სამინისტროსთან ერთად სკვერების, ბაღების, სახელმწიფო შენობა-ნაგებობებისა და მიმდებარე ტერიტორიების შეწამვლის შესაბამისი გეგმისა და გრაფიკის შედგენა უნდა მოახდინონ. როგორც კომისიის სხდომაზე აღინიშნა, ყველა სამთავრობო უწყება საკუთარ ბალანსზე არსებული შენობა-ნაგებობების ქიმიური და მექანიკური ღონისძიებების ჩატარებას განახორციელებს.სამთავრობო კომისია 2018 წლის 30 იანვარს შეიქმნა. კომისიის წევრები სისტემატურად შეიკრიბებიან.
#

დაცული ტერიტორიების UNESCO-ს უბნად გამოცხადება

კოლხური ტყეები და ჭარბტენიანი ტერიტორიები UNESCO მსოფლიო ბუნებრივი მემკვიდრეობის უბნად გამოცხადდება. დაცული ტერიტორიების სააგენტო ბუნების დაცვის მსოფლიო ფონდთან (WWF) ერთად მუშაობს, რომ საქართველოში UNESCO მსოფლიო ბუნებრივი მემკვიდრეობის უბნად პირველად მაჭახელას, მტირალასა და კოლხეთის ეროვნული პარკები ასევე, კინტრიშისა და ქობულეთის დაცული ტერიტორიები გამოცხადდეს.პროექტს გარემოს დაცვისა და სოფლის მეურნეობის სამინისტრო, დაცული ტერიტორიების სააგენტო და ბუნების დაცვის მსოფლიო ფონდის (WWF) კავკასიის წარმომადგენლობა, 2017 წლიდან ახორციელებენ. პროექტი გერმანიის გარემოს დაცვისა და ბირთვული უსაფრთხოების ფედერალური სამინისტროსა და WWF-ის თანადაფინანსებით მიმდინარეობს.პროექტის მნიშვნელობაზე დაინტერესებულ მხარეებთან დაცული ტერიტორიების სააგენტოს თავმჯდომარემ დავით მარკოზაშვილმა ისაუბრა. შეხვერდა „წინასწარი შეფასება კოლხეთი ტყეებისა და ჭარბტენიანი ტერიტორიების იუნესკოს მსოფლიო ბუნებრივი მემკვიდრეობის უბნად გამოცხადების მიზნით“ ფარგლებში გაიმართა, რომელსაც დამოუკიდებელი ექსპერტები, ადგილობრივი თვითმმართველობის და არასამთავრობო ორგანიზაციის წარმომადგენლები ესწრებოდნენ.
#

„მწარმოებლის გაფართოებული ვალდებულების“ პრინციპის დანერგვა

სასტუმრო „Holiday Inn”-ში მწარმოებლის გაფართოებული ვალდებულების პრინციპის დანერგვის შესახებ იმსჯელეს. გარემოს დაცვისა და სოფლის მეურნეობის მინისტრის მოადგილემ სოლომონ პავლიაშვილმა შეხვედრის მონაწილეებს ნარჩენი ელექტრო და ელექტრონული მოწყობილობების მართვის არსებულ პრაქტიკაზე, მწარმოებლის გაფართოებული ვალდებულების კანონმდებლობაზე, დაფინანსების მექანიზმებზე, სქემებსა და მონიტორინგის უზრუნველყოფის სისტემაზე ესაუბრა. შეხვედრის მონაწილეებს ასევე, პარლამენტის გარემოს დაცვისა და ბუნებრივი რესურსების კომიტეტის თავმჯდომარემ კახაბერ კუჭავამ მიმართა. ნარჩენების მართვის კოდექსი 2014 წელს იქნა მიღებული და ახალ ვალდებულებებს აკისრებს როგორც საჯარო, ასევე, კერძო სექტორის წარმომადგენლებს. ერთ-ერთი ასეთი მოთხოვნაა „მწარმოებლის გაფართოებული ვალდებულების“ პრინციპის დანერგვა საქართველოში. კოდექსის თანახმად, ისეთი პროდუქტის უშუალო მწარმოებლები და ბაზარზე განმათავსებლები, რომლებიც შემდგომ სპეციფიკური ნარჩენი ხდება, 2019 წლის დეკემბრიდან ვალდებულნი არიან, უზრუნველყონ პროდუქტისგან წარმოქმნილი სპეციფიკური ნარჩენის გარემოზე უარყოფითი გავლენის შემცირება და ასეთი ნარჩენების აღდგენა/განთავსება. პრინციპი სრულიად ახალია საქართველოსთვის. მისი დანერგვა მოითხოვს არა მარტო შესაბამისი საკანონმდებლო ბაზის შემუშავებას, არამედ ცნობიერების ამაღლებას და შესაძლებლობების გაძლიერებას სახელწიფო სტრუქტურებსა და კერძო სექტორში. პროექტი ინიცირებულია გარემოს დაცვისა და სოფლის მეურნეობის სამინისტროს მიერ და ხორციელდება გაეროს განვითარების პროგრამის (UNDP), შვედეთის მთავრობისა და ორგანიზაცია „Georgia’s Environmental Outlook” – GEO-ს ხელშეწყობით. შეხვედრას საქართველოს მთავრობის, ადგილობრივი თვითმმართველობების, ბიზნესკომპანიების, ასოციაციებისა და სავაჭრო პალატების, ასევე არასამთავრობო ორგანიზაციებისა და შესაბამისი პროექტების 70-ზე მეტი წარმომადგენელი ესწრებოდა.