#

ECOserve -ის კონკურსი გარემოსდაცვითი კამპანიის განხორციელებისთვის

გერმანიის საერთაშორისო თანამშრომლობის საზოგადოების (GIZ) პროექტი „ბუნებრივი რესურსების მართვა და ეკოსისტემური მომსახურებებით უზრუნველყოფა სოფლად მდგრადი განვითარებისთვის სამხრეთ კავკასიაში“ (ECOserve) აცხადებს კონკურსს არასამთავრობო ორგანიზაციებისთვის ტყის მდგრადი მართვის (SFM), მათ შორის ენერგოეფექტურობის/ალტერნატიული ენერგიის (EE/AE) შესახებ ცნობიერების ასამაღლებლად.  კამპანია გულისხმობს  ახალგაზრდების ცნობიერების ამაღლებისა და განათლებისთვის, მათ ჩართულობას სხვადასხვა აქტიობაში როგორც ეროვნულ დონეზე, ასევე, ადგილობრივად, ახმეტის მუნიციპალიტეტში.კონკურსის მიზანია  ახალგაზრდებისთვის (ასაკობრივი ჯგუფი: 14-29 წელი), გენდერული ასპექტის გათვალისწინებით, მოახდინოს ტყის მდგრად მართვასა და ენერგოეფექტურობა/ალტერნატიული ენერგიაზე ცნობიერების ასამაღლებელი ღონისძიებების იდენტიფიცირება და იმპლემენტაცია.საკონკურსო განაცხადში წარმოდგენილი უნდა იყოს ინოვაციური, კრეატიული იდეები, თუ როგორ უნდა მოხდეს ახალგაზრდების ინფორმირება და განათლება პრიორიტეტულ საკითხებზე: • ტყის ღირებულება (მათ შორის ეკოსისტემური სერვისები, კლიმატის ცვლილების შრბილება და ადაპტაცია)• ენერგოეფექტურობა (მათ შორის შეშის გამოყენება და თბოიზოლაცია)არასამთავრობო ორგანიზაციებმა  განაცხადები უნდა წარმოადგინონ ინგლისურ ენაზე და გააგზავნონ ელ.ფოსტაზე: ECOserve@giz.de წარდგენილი განაცხადი უნდა მოიცავდეს:• შესავალი/არასამთავრობო ორგანიზაციის აღწერა (ნახევარი გვერდი);• კანპანიის შინაარსი, მათ შორის ძირითადი გზავნილები  და საკომუნიკაციო საშუალებები (2 გვერდი);• დაგეგმილი აქტივობების განრიგი (1 გვერდი);• დეტალური ბიუჯეტი (1 გვერდი);• პასუხები კითხვებზე (შეკითხვები იხილეთ დანართში).არასამთავრობო ორგანიზაციებს მიეწოდებათ დოკუმენტები: გარემოსდაცვითი KAP კვლევა - ცოდნა, დამოკიდებულება და პრაქტიკა (KAP), რომელიც ეხება ბუნებრივი რესურსების მართვას და ეკოსისტემური მომსახურებების დაცვას  მდგრადი სოფლის განვითარებისათვის საქართველოში (1) და სატყეო სექტორის საკომუნიკაციო სტრატეგია და სამოქმედო გეგმა (2). აღნიშნული დოკუმენტები შეგიძლიათ გამოიყენოთ სახელმძღვანელოდ საპროექტო განაცხადების მომზადებისთვის. კონკურსში მონაწილეობა შეუძლია ნებისმიერ არასამთავრობო ორგანიზაციას,  გამოცდილების  მიუხედავად.პროექტის  ბიუჯეტი 100 000  ლარამდეა.პროექტის განხორციელების პერიოდი შეადგენს 10 კვირას (2021 წლის 6 სექტემბრიდან 15 ნოემბრამდე).კონკურსში მონაწილობის მსურველთა განაცხადების მიღების ბოლო ვადაა 2021 წლის  9 აგვისტო. საკონკურსო განაცხადებს შეაფასებს  ჟიური, რომელის შემადგენლობაში იქნებიან გერმანიის საერთაშორისო თანამშრომლობის საზოგადოების (GIZ), გარემოს დაცვისა და სოფლის მეურნეობის სამინისტროს (MEPA), სურსათის ეროვნული სააგენტოს (NFA), სოფლის განვითარების სააგენტოს (RDA) და გარემოსდაცვითი ინფორმაციისა და განათლების ცენტრის (EIEC) წარმომადგენლები.კონკურსის შედეგები ცნობილი გახდება  ა/წ 16 აგვისტოს. კონკურსის შესახებ დამატებითი ინფორმაციისთვის მიმართეთ მარიამ თათარაშვილს.ტელ.: 599 961 121;ელ.ფოსტა: mariam.tatarashvili@giz.de 
#

ლევან დავითაშვილი: „წელს მარცვლეული კულტურების კარგი მოსავალია როგორც ხარისხობრივი, ისე რაოდენობრივი თვალსაზრისით“

შიდა ქართლის რეგიონში ხორბლის აღების პროცესი აქტიურ ფაზაშია.  გარემოს დაცვისა და სოფლის მეურნეობის მინისტრი ლევან დავითაშვილი, შიდა ქართლის სახელმწიფო რწმუნებულთან, ვალერიან მჭედლიძესთან ერთად, გორის მუნიციპალიტეტის სოფელ შინდისში, კომპანიის „სილქ უოთერ გრუპი“  ფართობზე ხორბლის აღების პროცესს - ალოობას დაესწრო. „ალოობა აქტიურ ფაზაშია.  მოსავლის აღება ერთდროულად იწყება კახეთისა და ქვემო ქართლის რეგიონებში, რაც გარკვეულ სირთულეს ქმნის მოსავლის აგროვადების დაცვით აღებისა და დაბინავების კუთხით; თუმცა, შეიძლება ითქვას, რომ პიკური პერიოდი უკვე გავლილია, ხოლო მოსავლის დიდი ნაწილი უკვე დაბინავებული. წელს მარცვლეული კულტურების კარგი მოსავალია როგორც ხარისხობრივი, ისე რაოდენობრივი  თვალსაზრისით, რაც ბევრ სისტემურ ცვლილებასა და გადაწყვეტილებას უკავშირდება. აღსანიშნავია ისიც, რომ ჩვენი ფერმერების ცოდნა და გამოცდილება გაიზარდა, ისინი იყენებენ თანამედროვე მიდგომებს, ფართობებზე ახორციელებენ თესლბრუნვას, ზრუნავენ ნიადაგის ნაყოფიერებაზე და პროდუქტიულობაზე. ჩვენ შეგვიძლია ვაწარმოოთ მაღალპროდუქტიული და ხარისხიანი მარცვლეული კულტურები, მათ შორის, ხორბალი და ქერი. შესაბამისად, აქტიურად გავაგრძელებთ მუშაობას მემარცვლეობის დარგის განვითარებისთვის, რაც ხარისხიან სათესლე მასალასა და მექანიზაციაზე ხელმისაწვდომობას, თესლის სერტიფიცირებას, ფერმერებისთვის ცოდნის, თანამედროვე ტექნოლოგიების და საუკეთესო პრაქტიკის გაზიარებას მოიცავს; ვიმუშავებთ ხარისხის კონტროლის მიმართულებითაც, რაც მნიშვნელოვანია ფერმერების ინტერესების დაცვისა და სამართლიანი კონკურენციისთვის“, - აღნიშნა ლევან დავითაშვილმა. კომპანიას „სილქ უოთერ გრუპი“ გორის მუნიციპალიტეტის სოფელ შინდისში 120 ჰა-ზე ქართული ჯიშის ,,ლომთაგორა“ ხორბალს, 50 ჰა-ზე  ქერს და 100 ჰა ფართობზე იონჯას აწარმოებს. ნიადაგის ნაყოფიერების ამაღლებისთვის, კომპანია თესლბრუნვას ახორციელებს დღისათვის, მარცვლოვანი კულტურების მოსავლის აღება აგროვადების დაცვით, შეუფერხებლად მიმდინარეობს.  ქვეყნის მასშტაბით, მობილიზებულია შპს „სოფლის მეურნეობის ლოჯისტიკის და სერვისების კომპანიის“ 95 ერთეული კომბაინი. აღნიშნული ტექნიკის საშუალებით, შიდა ქართლის, კახეთისა და ქვემო ქართლის რეგიონებში, ჯამში, 14 000 ჰა-მდე ფართობზე, მარცვლოვანი კულტურების მოსავალი უკვე აღებული და დაბინავებულია. სოფელ შინდისში ხორბლის აღების პროცესს გარემოს დაცვისა და სოფლის მეურნეობის მინისტრის პირველი მოადგილე, გიორგი ხანიშვილი და სოფლის განვითარების სააგენტოს დირექტორი ილია თამარაშვილი ესწრებოდნენ.
#

საქართველოს პრემიერ-მინისტრმა ორი ახალი ვიცე-პრემიერი დანიშნა

მინისტრთა კაბინეტში ვიცე-პრემიერის თანამდებობებს კულტურის, სპორტისა და ახალგაზრდობის მინისტრი თეა წულუკიანი და გარემოს დაცვისა და სოფლის მეურნეობის მინისტრი ლევან დავითაშვილი დაიკავებენ. ვიცე-პრემიერები ირაკლი ღარიბაშვილმა მთავრობის დღევანდელ სხდომაზე წარადგინა. მთავრობის შემადგენლობაში ჯამში სამი ვიცე-პრემიერია. აღნიშნული თანამდებობა ასევე უკავია საქართველოს საგარეო საქმეთა მინისტრ დავით ზალკალიანს.
#

ლევან დავითაშვილმა ქართული რძის დღისადმი მიძღვნილი ღონისძიება მისასალმებელი სიტყვით გახსნა

გარემოს დაცვისა და სოფლის მეურნეობის მინისტრმა, ლევან დავითაშვილმა ქართული რძის დღისადმი მიძღვნილი ღონისძიება მისასალმებელი სიტყვით გახსნა.მინისტრმა მადლობა გადაუხადა დონორ ორგანიზაციებს ქართული რძის ხარისხის ნიშნის - „ქართული რძე” შექმნის მხარდაჭერისთვის. ხარისხის ნიშანი მომხმარებელს საშუალებას აძლევს, მარტივად განასხვავოს, პროდუქცია ნედლი რძისგან არის დამზადებული თუ აღდგენილისგან. „რძის სექტორი დიდი როლს თამაშობს სოფლის მეურნეობის ეკონომიკაში. სამინისტროს მიერ შემუშავებულმა რძის ტექნიკურმა რეგლამენტმა რძის პროდუქტებისადმი საიმედოობის საკითხი აბსოლუტურად შეცვალა. რეგლამენტის დახმარებით, მნიშვნელოვანი პროგრესი გვაქვს უვნებელი პროდუქციის მიღების თვალსაზრისით. ქართული რძის დღისადმი მიძღვნილი ღონისძიების მონაწილე საშუალო და პატარა მწარმოებლებს აერთიანებთ ხარისხის სავაჭრო ნიშანი; ამ მეწარმეების უკან კი, ათასობოთ ფერმერია. შესაბამისად, მნიშვნელოვანია, მხარი დავუჭიროთ მეწარმეებს, გაერთიანებებს; მნიშვნელოვანია ხარისხის ნიშნების წახალისებაც, რაც სამინისტროს პოლიტიკის ნაწილს წარმოადგენს“,- განაცხადა ლევან დავითაშვილმა. „ღონისძიების ფარგლებში რამდენიმე ათეული წარმატებული რძის გადამმუშავებელი მეწარმის ხილვა უტყუარი დადასტურებაა დარგის განვითარების სწორი სახელმწიფო პოლიტიკის. ახლა მნიშვნელოვანია, როგორც  ნედლი რძისგან ნაწარმოები პროდუქციის ექსპორტის ზრდის ხელშეწყობა, ასევე, იმპორტჩანაცვლებაზე მუშაობა“, - განაცხადა საქართველოს პარლამენტის აგრარული კომიტეტის თავმჯდომარემ, ნინო წილოსანმა. ღონისძიებას საქართველოს პარლამენტის გარემოს დაცვისა და ბუნებრივი რესურსების კომიტეტის თავმჯდომარის პირველი მოადგილე ხატია წილოსანიც ესწრებოდა, რომელმაც ღონისძიების მონაწილეებს ქართული რძის დღე მიულოცა და  ხარისხის ნიშნის მნიშვნელობაზე გაამახვილა ყურადღება. ღონისძიება, რომელშიც 20-ზე მეტი რძის პროდუქციის მწარმოებელი კომპანია მონაწილეობდა, „საქართველოს ბიზნესინსტიტუტის“ ორგანიზებით გაიმართა.  აღსანიშნავია, რომ სწორედ „საქართველოს ბიზნესინსტიტუტია“ ქართული რძის ნიშნის გამოყენების უფლების მიმნიჭებელი ორგანიზაცია.  ქართული რძის პროდუქტების პოპულარიზაციის გარდა, ღონისძიების მიზანი HACCP-ის მფლობელი რძის პროდუქტების მწარმოებლებისა და რესტორნების, კაფეების, სასტუმროების და სავაჭრო ობიექტების წარმომადგენელთა შეხვედრის და თანამშრომლობის ხელშეწყობა იყო. 
#

სახელმწიფო ხელშეწყობით, შიდა ქართლის რეგიონში ახალი სამაცივრე მეურნეობა შეიქმნა

გორის მუნიციპალიტეტის სოფელ კვარხითში, ახლადგახსნილი სამაცივრე მეურნეობა გარემოს დაცვისა და სოფლის მეურნეობის მინისტრმა, ლევან დავითაშვილმა დაათვალიერა.  „ჩვენი პოლიტიკა არა ფრაგმენტული, არამედ თანმიმდევრული და სისტემურია. ამის მაჩვენებელია ის, რომ პროგრამის „დანერგე მომავალი“ დაწყებიდან მესამე წელს, უკვე შემნახველი და სამაცივრე მეურნეობების თანადაფინანსება დავიწყეთ. ამ წლების განმავლობაში, რამდენი მეურნეობა შეიქმნა თანადაფინანსებით, ხოლო 2021 წელს, უფრო მეტი განაცხადი და დაინტერესება მივიღეთ. ეს იქნება მზარდი პროგრესი, რადგან  თანამედროვე, ინტენსიური ბაღები, რომელიც ჩვენ გავაშენეთ, დაახლოებით 14-15 ათასი ჰექტარია და საჭიროებს ადეკვატურ შემნახველ-გადამმუშავებელ ინფრასტრუქტურას. ეს ნიშნავს, რომ „ტირიფონის ხილის“ მსგავსი თანამედროვე სამაცივრე მეურნეობა  გვჭირდება ასეულობით. ხელისუფლების ათწლიანი გეგმაც ზუსტად ამას ითვალისწინებს, რომ თანმიმდევრულად, მიწოდების ჯაჭვში სახელმწიფოს მხრიდან თანადაფინანსებული იყოს ყველა საჭირო კომპონენტი, რათა ქართული პროდუქცია იყოს მაღალი ხარისხის და კონკურენტუნარიანი“, - განაცხადა ლევან დავითაშვილმა.  კომპანიის ,,ტირიფონის ხილი“ თანამედროვე სტანდარტებით აღჭურვილი სამაცივრე მეურნეობა სახელმწიფოს ფინანსური მხარდაჭერით  შეიქმნა.  საწარმო  აღჭურვილია იტალიური და გერმანული წარმოების სამაცივრე დანადგარებით. საწარმოში 1,000 ტონა ხილის შენახვაა შესაძლებელი. სამაცივრე მეურნეობას გადამმუშავებელი და შემნახველი საწარმოების თანადაფინანსების პროექტის ფარგლებში მიღებული აქვს 600,000 ლარის გრანტი, ხოლო შეღავათიანი აგროკრედიტი  1,5 მლნ ლარს შეადგენს. ტექნიკური დახმარების პროგრამით, სამაცივრე მეურნეობაში სურსათის უვნებლობის მართვის სისტემების ISO 22 000  დანერგვა მიმდინარეობს. სოფლის განვითარების სააგენტოს საგრანტო პროგრამის ფარგლებში, მთელი ქვეყნის მასშტაბით, მხარდაჭერილია 50-მდე სამაცივრე და შემნახველი მეურნეობა; დაფინანსება,   ჯამურად, 23.8 მლნ ლარს აღემატება.
#

საქართველოს მთავრობამ ექსტენსიური აკვაკულტურის ნებართვის გაცემის წესისა და პირობების შესახებ დადგენილება დაამტკიცა

დადგენილება გარემოს დაცვისა და სოფლის მეურნეობის სამინისტროს ინიციატივით მომზადდა და მიზნად ისახავს ექსტენსიური აკვაკულტურის ნებართვის გაცემის პირობებისა და პროცედურების დეტალურ სამართლებრივ რეგლამენტაციას.„დღეს მთავრობის სხდომაზე მივიღეთ 2 მნიშნელოვანი რეგულაცია, რომელიც აკვაკულტურის განვითარებას შეუწყობს ხელს - ეს არის ექსტენციური აკვაკულტურის ნებართვის გაცემის წესი და, ზოგადად, ტექნიკური რეგლამენტი. რაც საშუალებას მისცემს ინვესტორებს და არსებულ მეურნეობებს, რომ მდგრად პირობებში წარმართონ ამ მიმართულების განვითარება. ჩვენ სამოქმედო გეგმაში აღნიშნული იყო, რომ მდგრადი აკვაკულტურის წარმოების პირობებში, ქვეყანა, 10 წლიან პერსპექტივაში, მინიმუმ გაასამმაგებს და 20 000 ტონაზე მეტი აკვაკულტურის პროდუქტის წარმოებას შეძლებს. ეს არის დეტალური შეფასება, რომელიც გვაქვს წყალსატევებში, ისე მარიკულტურის ობიექტების სწორად მოწყობის პირობებში“, - განაცხადა ლევან დავითაშვილმა.ექსტენსიური აკვაკულტურა არის ბუნებრივი წყალსატევის (ტბა, მდინარე, წყალჭაობიანი ადგილი და სხვა) ან ხელოვნური წყალსატევის (წყალსაცავი, ზოგიერთი არხი და სხვა წყალსატევი, გარდა აკვაკულტურის კონსტრუქციისა) ხელოვნურად გამრავლებული ქვირითით, ლარვით, ლიფსიტითა და ახალმოზარდეულით ბუნებრივი საკვები ბაზის ხარჯზე დათევზიანება, ამ წყალსატევში არსებული ბუნებრივი თევზის რესურსის აღწარმოების ხელშეწყობა და შემდგომ მისი ზრდის შედეგად თევზჭერა.ექსტენსიური აკვაკულტურის ნებართვის გაცემის წესისა და პირობების შესახებ დადგენილება ითვალისწინებს ექსტენსიური აკვაკულტურის ნებართვის გაცემის პროცესში უფლებამოსილი ადმინისტრაციული ორგანოების მონაწილეობის წესის განსაზღვრას, ასევე სანებართვო პირობებს. ექსტენსიური აკვაკულტურის ნებართვა გაიცემა არაუმეტეს 20 წლის ვადით. ექსტენსიური აკვაკულტურის ნებართვის გაცემა თავისუფლდება სანებართვო მოსაკრებლის გადახდისაგან „სალიცენზიო და სანებართვო მოსაკრებლების შესახებ“ საქართველოს კანონის შესაბამისად. აღნიშნულ ნებართვას, აკვაკულტურის უწყებათაშორისი საბჭოს რეკომენდაციის საფუძველზე, გარემოს ეროვნული სააგენტო გასცემს.დადგენილიების დამტკიცების შედეგად დადგინდება ექსტენსიური აკვაკულტურის ნებართვის გაცემის წესი, რაც შესაბამისად, ხელს შეუწყობს აკვაკულტურის სფეროს შემდგომ განვითარებას. 
#

საქართველოს მთავრობამ „აკვაკულტურის ტექნიკური რეგლამენტის“ დამტკიცების შესახებ“ დადგენილება მიიღო

„აკვაკულტურის ტექნიკური რეგლამენტი“ შემუშავებულია „აკვაკულტურის შესახებ“ საქართველოს კანონის საფუძველზე და მიზნად ისახავს ხელი შეუწყოს აკვაკულტურის განხორციელების პროცესში ბიომრავალფეროვნების შენარჩუნებას, გარემოს დაცვას, ბუნებრივი რესურსების ეფექტიან გამოყენებას, მომხმარებელთა ინტერესების დაცვას, ქვეყნის სასურსათო უსაფრთხოების ხელშეწყობას და ასევე, იმ პირების დაცვას რომელიც, ამ ტექნიკური რეგლამენტის და საქართველოს კანონმდებლობით განსაზღვრული მოთხოვნების შესაბამისად, ეწევიან აკვაკულტურის საქმიანობას.   ტექნიკური რეგლამენტი განსაზღვრავს აკვაკულტურის ტიპებს და აკვაკულტურის სუბიექტის ვალდებულებებს. აკვაკულტურის სუბიექტი ვალდებულია დარეგისტრირდეს ეკონომიკურ საქმიანობათა რეესტრში როგორც ბიზნესოპერატორი. ტექნიკური რეგლამენტით განისაზღვრება მნიშვნელოვანი საკითხები, რომელიც აუცილებელია მდგრადი აკვაკულტურის საქმიანობისათვის.          გარდა ამისა, ტექნიკური რეგლამენტი ადგენს ეკოლოგიური მონიტორინგის განხორციელების წესს, რომლის მიზანია:  აკვაკულტურის სუბიექტის საქმიანობის გარემოზე ზეგავლენის შეფასება,  რისკების შეფასება და შესაბამისი დასკვნისა და რეკომენდაციების შემუშავება; და  წყლის ეკოსისტემების დაცვა. ტექნიკური რეგლამენტის პროექტი გარემოს დაცვისა და სოფლის მეურნეობის სამინისტროს სისტემაში შემავალი  სსიპ გარემოს ეროვნული სააგენტოს მიერ არის მომზადებული.