#

NAHP-ის სამეთვალყურეო ჯგუფის რიგით 30-ე შეხვედრა გაიმართა

გარემოს დაცვისა და სოფლის მეურნეობის სამინისტროში ცხოველთა ჯანმრთელობის ეროვნული პროგრამის (NAHP) სამეთვალყურეო ჯგუფის რიგით 30-ე შეხვედრა გაიმართა.შეხვედრას სოფლის მეურნეობის მინისტრის პირველი მოადგილე ნოდარ კერესელიძე ხელმძღვანელობდა.მისასალმებელ სიტყვაში მინისტრის პირველმა მოადგილემ ცხოველთა ჯანმრთელობის საკითხებზე სამეთვალყურეო ჯგუფის ფორმატში მუშაობის 10 წლიანი გამოცდილების შესახებ ისაუბრა და მიღწეული წარმატებებისთვის სამეთვალყურეო ჯგუფის წევრებს მადლობა გადაუხადა.„10 წლიანი მუშაობის განმავლობაში, სამეთვალყურეო ჯგუფის შემადგენლობაც გაიზარდა, დონორთა და კერძო სექტორის ჩართულობაც; კონსოლიდირებული მუშაობა, სახელმწიფოსა და კერძო სექტორის თანამშრომლობა უმნიშვნელოვანესია ცხოველთა ჯანდაცვის ეროვნული პროგრამის ფარგლებში დასახული მიზნების მისაღწევად“, - განაცხადა ნოდარ კერესელიძემ.როგორც მინისტრის პირველმა მოადგილემ შეხვედრაზე აღნიშნა, 2019 წელს გარემოს დაცვისა და სოფლის მეურნეობის სამინისტროს, ამერიკის შეერთებული შტატების სოფლის მეურნეობის დეპარტამენტის პროგრამის დასრულების შემდეგ, სამეთვალყურეო ჯგუფის მენეჯმენტის გადაბარება სრულად მოუწევს. „ცხოველთა ჯანმრთელობის საკითხი აქტუალობას დღესაც არ კარგავს, შესაბამისად, მინდა თითოეულ თქვენგანს ვთხოვო განსაკუთრებული მხარდაჭერა მოსალოდნელ გარდამავალ პერიოდში. ჩვენი მიზანია, წლების განმავლობაში მიღებული შედეგები განვამტკიცოთ და კიდევ უფრო განვავითაროთ“, - განაცხადა ნოდარ კერესელიძემ. შეხვედრაზე საუბარი შეეხო ცხოველთა დაავადებების ზედამხედველობისა და კონტროლის კუთხით განხორციელებულ ღონისძიებებს. სურსათის ეროვნული სააგენტოს, სამინისტროს ლაბორატორიის, დაავადებათა კონტროლისა და საზოგადოებრივი ჯანმრთელობის ეროვნული ცენტრის წარმომადგენლებმა მიმდინარე აქტივობების და სამომავლო გეგმების შესახებ ისაუბრეს. შეხვედრას კავკასიის ალიანსების პროგრამის და შიდა ქართლის ვეტერინართა რეგიონული ასოციაციის წარმომადგენლები ესწრებოდნენ.გარემოს დაცვისა და სოფლის მეურნეობის სამინისტროში გამართულ შეხვედრას აშშ-ის სოფლის მეურნეობის დეპარტამენტის (USDA), კოლორადოს სახელმწიფო უნივერსიტეტის (CSU), საქართველოს საზოგადოებრივ საქმეთა ინსტიტუტის (GIPA) სოფლის მეურნეობის განვითარების დეპარტამენტის, გაეროს სურსათის და სოფლის მეურნეობის ორგანიზაციის (FAO), საფრთხეების შემცირების სააგენტოს (DTRA), ავსტრიის განვითარების სააგენტოს (ADA), საქართველოში შვეიცარიის თანამშრომლობის ოფისის (SCO) წარმომადგენლები ესწრებოდნენ.
#

ურთიერთგაგების მემორანდუმის გაფორმება

„საქართველოში ქიმიური ნივთიერებების მდგრადი მართვის შესაძლებლობების გაძლიერების“ პროექტის ფარგლებში, გარემოს დაცვისა და სოფლის მეურნეობის სამინისტროს და ჩეხეთის განვითარების სააგენტოს შორის ურთიერთგაგების მემორანდუმი გაფორმდა.მემორანდუმს ხელი გარემოს დაცვისა და სოფლის მეურნეობის მინისტრმა, ლევან დავითაშვილმა და ჩეხეთის რესპუბლიკის საგანგებო და სრულუფლებიანმა ელჩმა საქართველოში, ტომაშ პერნიცკიმ მოაწერეს. „პროექტის ფარგლებში, საქართველო ჩეხეთის განვითარების სააგენტოსაგან მნიშვნელოვან დახმარებას მიიღებს როგორც საქართველოში ქიმიური ნივთიერებების მართვის შესაძლებლობების განვითარების, ასევე, კანონმდებლობის შექმნის კუთხით, რაც ხელს შეუწყობს ქართული კანონმდებლობის ჰარმონიზაციას ევროკავშირის კანონმდებლობასთან. მნიშვნელოვანია, რომ ჩეხეთის რესპუბლიკა ასევე დაგვეხმარება მდგრადი განვითარების მიზნების შესრულების ნაწილშიც, რაც საქართველო-ევროკავშირის ასოცირების შეთანხმების ფარგლებში, ქვეყნის ვალდებულებას წარმოადგენს“,- განაცხადა ლევან დავითაშვილმა.„მოხარული ვარ, რომ მემორანდუმის ფარგლებში მოგვეცემა შესაძლებლობა საქართველოს გავუზიაროთ ჩვენი გამოცდილება ქიმიური ნივთიერებების მდგრადი მართვის მიმართულებით, რაც გარემოს დაცვისთვის უმნიშვნელოვანეს ფაქტორს წარმოადგენს. ასევე, მივესალმები ქიმიური ნივთიერებების მიმართულებით კანონმდებლობის შექმნის ინიციატივას და მასში ჩვენს ჩართულობას, რაც მხარდაჭერაა ქართული კანონმდებლობის ევროკავშირის კანონმდებლობასთან ჰარმონიზაციის პროცესში“, - განაცხადა ჩეხეთის რესპუბლიკის საგანგებო და სრულუფლებიანმა ელჩმა საქართველოში ტომაშ პერნიცკიმ.
#

თებერვლის თვეში ხე-ტყის უკანონო მოპოვებისა და ტრანსპორტირების 573 ფაქტი გამოვლინდა

გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტისა და ეროვნული სატყეო სააგენტოს თანამშრომლებმა, 2018 წლის 1 თებერვლიდან 28 თებერვლის ჩათვლით, ხე-ტყის უკანონო მოპოვებისა და ტრანსპორტირების 573 ფაქტი გამოავლინეს, მათ შორის 35 ფაქტი სისხლის სამართლის დანაშაულების ნიშნებს შეიცავს. ხე-ტყის უკანონო მოპოვებისა და ტრანსპორტირების ყველაზე მეტი - 206 ფაქტი გამოვლინდა კახეთის რეგიონული სამმართველოს სამოქმედო ტერიტორიაზე, აჭარის რეგიონული სამმართველოს მასშტაბით 21  ფაქტი დაფიქსირდა, იმერეთში - 45 ფაქტი, გურიაში -10, ხოლო რაჭა-ლეჩხუმი ქვემო სვანეთში - 26, სამეგრელო-ზემო სვანეთის რეგიონული სამმართველოს სამოქმედო ტერიტორიაზე - 61 ფაქტი, მცხეთა-მთიანეთიში- 22 ფაქტი, შიდა ქართლში - 42, ქვემო ქართლის მასშტაბით - 50 ფაქტი, ხოლო სამცხე-ჯავახეთის რეგიონული სამმართველოს სამოქმედო ტერიტორიაზე - 90 ფაქტი. ჯამში, ამოღებულია უკანონოდ მოპოვებული 1280 მ3-მდე ხე-ტყე. ამავე პერიოდში, სახერხი საამქროს რეგლამენტის დარღვევის 46 ფაქტი დაფიქსირდა. ამოღებულია და ფინანსთა სამინისტროს მომსახურების სააგენტოშია გადატანილი 26 ერთეული დაურეგისტრირებელი სახერხი დანადგარი. მასალები, შემდგომი რეაგირებისთვის, შესაბამის უწყებებშია გადაგზავნილი. 
#

შეხვედრა ბირთული და უსაფრთხების მიმართულებებზე

გარემოს დაცვისა და სოფლის მეურნეობის მინისტრი ლევან დავითაშვილი ამერიკის შეერთებული შტატების ბირთვული მარეგულირებელი კომისიის რეგიონალურ ადმინისტრატორს კეტრინ ჰანის და საერთაშორისო ატომური ენერგიის უსაფრთხოების სააგენტოს (IAEA) დირექტორს პიტერ ჯონსტონს შეხვდა.შეხვედრის მიზანს ამერიკელი კოლეგების მიერ საქართველოში რადიაციული უსაფრთხოების მარეგულირებელი ინფრასტრუქტურის შესწავლის საფუძველზე შემუშავებული რეკომენდაციების გაზიარება წარმოადგენდა.როგორც ლევან დავითაშვილმა განაცხადა, გარემოს დაცვისა და სოფლის მეურნეობის სამინისტროს სსიპ ბირთვული და რადიაციული უსაფრთხოების სააგენტოს აქვს სრული მხარდაჭერა და ამერიკულ მხარესთან ნაყოფიერი თანამშრომლობის სურვილი გამოთქვა.„ჩვენ რამდენიმე დღის წინ დავასრულეთ ოფიციალური ვიზიტი ამერიკის შეერთებულ შტატებში. გვქონდა ძალიან საინტერესო შეხვედრები. ამერიკა ჩვენთვის სტრატეგიული პარტნიორია. დიდი მადლობა მინდა გადაგიხადოთ მხარდაჭერისთვის და აღვნიშნო, რომ თქვენი რეკომენდაციები ჩვენთვის ძალიან მნიშვნელოვანია. ჩვენ, რა თქმა უნდა, გავითვალისწინებთ თქვენს რჩევებს, მითითებებს და ვფიქრობ ერთობლივი მუშაობით, მივაღწევთ საქართველოში ბირთული და რადიაციული უსაფრთხოების მიმართულებით მნიშვნელოვან შედეგებს“- განაცხადა ლევან დავითაშვილმა.კეტრინ ჰანიმ, ამერიკის შეერთებული შტატების ბირთვული მარეგულირებელი კომისიის სახელით, მინისტრს მხარდაჭერა აღუთქვა და გამოთქვა სურვილი შემდგომ თანამშრომლობასთან დაკავშირებით.გარემოს დაცვისა და სოფლის მეურნეობის სამინისტროში გამართულ შეხვედრას მინისტრის პირველი მოადგილე ნოდარ კერესელიძე და სსიპ ბირთვული და რადიაციული უსაფრთხოების სააგენტოს ხელმძღვანელი ვასილ გედევანიშვილი ესწრებოდნენ.
#

ბიომრავალფეროვნების ფინანსირების ინიციატივა

სასტუმროში “Rooms Hotel Tbilisi” პროექტზე - „ბიომრავალფეროვნებასთან დაკავშირებული ფინანსური საჭიროებების შეფასებასა (FNA) და ბიომრავალფეროვნების ფინანსურ გეგმებზე (BFP) იმსჯელეს. გარემოს დაცვისა და სოფლის მეურნეობის მინისტრის მოადგილემ სოლომონ პავლიაშვილმა შეხვედრის მონაწილეებს, ბიომრავალფეროვნების შენარჩუნებისათვის ფინანსური რესურსების მობილიზებისა და ამ ფინანსების გონივრულად ხარჯვის ეფექტური მექანიზმები გააცნო. შეხვედრა ბიომრავალფეროვნების ფინანსირების ინიციატივის (BIOFIN) ფარგლებში გაიმართა, რაც ბიომრავალფეროვნების დაფინანსებასთან დაკავშირებულ გლობალურ თანამშრომლობას ითვალისწინებს. ბიომრავალფეროვნებასთან დაკავშირებული საქმიანობების დაფინანსება საკმაოდ პრობლემატური საკითხია, სწორედ ამიტომ ფინანსური საჭიროებების შეფასების (FNA) მიზანია მოახდინოს ქვეყნის ბიომრავალფეროვნების სტრატეგიისა და სამოქმედო გეგმის განსახორციელებლად აუცილებელი რესურსების რაციონალურად დაანგარიშება.  ბიომრავალფეროვნების ფინანსური გეგმის (BFP) მიზანია შეიმუშაოს ეროვნული საგზაო რუკა სხვადასხვა წყაროებიდან ბიომრავალფეროვნების დაფინანსების გასაუმჯობესებლად, მათ შორის დამატებითი რესურსების მოძიების, დანახარჯების ეფექტიანობის გაზრდის და სამომავლო დანახარჯების თავიდან აცილების გზით. ასევე, მნიშვნელოვანია დაინტერესებული მხარეების პროცესში მონაწილეობა, რათა უზრუნველყოფილი იქნას სამომავლოდ დაგეგმილი ქმედებების წარმატებით განხორციელება. შეხვედრას, რომელიც გარემოს დაცვისა და სოფლის მეურნეობის სამინისტროსა და გაეროს განვითარების პროგრამის (UNDP) ორგანიზებით განხორციელდა, სამინისტროს შესაბამისი სტრუქტურების, ბიომრავალფეროვნების საკითხებზე მომუშავე არასამთავრობო და საერთაშორისო ორგანიზაციების წარმომადგენლები ესწრებოდნენ.
#

ბიოსფერული რეგიონის ჩამოყალიბების პერსპექტივა საქართველოში

გარემოს დაცვისა და სოფლის მეურნეობის სამინისტროში პროექტზე - „ბიოსფერული რეზერვატები, როგორც კლიმატის ცვლილების შერბილების და ადაპტაციის ხელშემწყობი რეგიონული მოდელები - საქართველოში მათი შექმნის პოტენციალის და შესაძლებლობების კვლევა’’ იმსჯელეს.პროექტი საქართველოში 2015 წლიდან მიმდინარეობს და მიზნად ისახავს ეროვნულ და ადგილობრივ დონეზე ბიოსფერული რეგიონის შექმნის შესაძლებლობების გაძლიერებას. მისი მოსამზადებელი ეტაპი დასკვნით ფაზაში იმყოფება, რაც ითვალისწინებს ბიოსფერული რეგიონის დასაარსებლად და მართვის კუთხით საბოლოო გადაწყვეტილებების მიღებას. ასევე, მნიშვნელოვანია, რომ გადაწყვეტილებები მიღებული იქნება დაინტერესებულ და გადაწყვეტილების მიმღებ მხარეთა საერთო თანამშრომლობით, სადაც მონაწილეობას მიიღებენ, როგორც სახელმწიფო სტრუქტურების წარმომადგენლები, ასევე არასამთავრობო და სამოქალაქო საზოგადოება.შეხვედრაზე, პროექტის მიმდინარეობისას მიღებული შედეგები ასევე, მისი შემდგომი განხორციელების სცენარი განიხილეს, რაც კახეთის ბიოსფერული რეგიონის დაარსების და მართვისთვის აუცილებელი საბოლოო გადაწყვეტილებების მიღებას, ზონირებას, მართვას, დაფინანსებას და სხვა მნიშვნელოვან საკითხებს ითვალისწინებს.შეხვედრას, რეგიონალური განვითარებისა და ინფრასტრუქტურის სამინისტროს, ახმეტის მუნიციპალიტეტის, თელავის და დედოფლისწყაროს ადგილობრივი თვითმმართველობის, გერმანიის საერთაშორისო თანამშრომლობის საზოგადოებისა (GIZ), კავკასიის რეგიონალური გარემოსდაცვითი ცენტრის (RECC) და სახეობათა კონსერვაციის სამეცნიერო-კვლევითი ცენტრის „ნაკრესი“ წარმომადგენლები ესწრებოდნენ.
#

შეხვედრა იტალიის რესპუბლიკის საგანგებო და სრულუფლებიან ელჩთან

გარემოს დაცვისა და სოფლის მეურნეობის მინისტრის მოადგილე ნინო თანდილაშვილი იტალიის რესპუბლიკის საგანგებო და სრულუფლებიან ელჩს საქართველოში ანტონიო ენრიკო ბარტოლის შეხვდა.შეხვედრაზე მხარეებმა ქვეყნებს შორის გარემოსდაცვითი კუთხით სამომავლო თანამშრომლობის საკითხები განიხილეს.შეხვედრაზე საუბარი შეეხო გარემოს დაცვის, წყლისა და ნარჩენების მართვის მენეჯმენტის საკითხებს.როგორც ნინო თანდილაშვილმა აღნიშნა გარემოსდაცვითი მიმართულება ქვეყნისთვის პრიორიტეტულია და ყურადღება ევროკავშირთან გაფორმებული ასოცირების ხელშეკრულებით გათვალისწინებულ ვალდებულებებზე გაამახვილა.იტალიის რესპუბლიკის ელჩმა დაადასტურა იტალიის მხარდაჭერა საქართველოს ევროპული მისწრაფებების მიმართ და სამომავლო თანამშრომლობის სურვილი გამოთქვა.