#

მიმდინარე წლის 1 აგვისტოდან 29 ნოემბრამდე პერიოდში, საქართველოდან 4.8 მლნ აშშ დოლარის ხურმისა და კარალიოკის ექსპორტი განხორციელდა

მიმდინარე წლის 1 აგვისტოდან 29 ნოემბრამდე პერიოდში, საქართველოდან  9 088 ტონა ხურმისა და კარალიოკის ექსპორტი განხორციელდა. ექსპორტის ღირებულებამ 4.8 მლნ აშშ დოლარი შეადგინა. აღნიშნულ პერიოდში განხორციელებული ხურმისა და კარალიოკის ექსპორტის მოცულობა 27%-ით, ხოლო ექსპორტის ღირებულება,  31%-ით აღემატება 2019 წლის ანალოგიური პერიოდის მაჩვენებლებს. ამავე პერიოდში, 3%-ით გაიზარდა ხურმისა და კარალიოკის საექსპორტო ფასი.მიმდინარე წელს წარმოებული ხურმისა და კარალიოკის ექსპორტი  განხორციელდა რუსეთის ფედერაციაში (4 004 ტონა), უკრაინასა (2 931 ტონა) და სომხეთში (2 009 ტონა), ასევე, ბელარუსში, ყატარში, მოლდოვაში, ჰონკონგში, ყაზახეთსა და უნგრეთში.
#

ლევან დავითაშვილი: „საქართველოს მთავრობამ მიიღო გადაწყვეტილება პირველი ხარისხის ხორბლის ფქვილის სუბსიდირების შესახებ. სრული პასუხისმგებლობით ვაცხადებ, პურზე ფასი არ გაიზრდება”

„საქართველოს მთავრობამ მიიღო გადაწყვეტილება პირველი ხარისხის ხორბლის ფქვილის სუბსიდირების შესახებ, რაც პურის გაძვირებას თავიდან აგვაცილებს”, - განაცხადა გარემოს დაცვისა და სოფლის მეურნეობის მინისტრმა, ლევან დავითაშვილმა უწყებათაშორისი საკოორდინაციო საბჭოს სხდომის დასრულების შემდეგ, მთავრობის ადმინისტრაციაში გამართულ ბრიფინგზე.   მინისტრის განმარტებით, პროგრამა მომავალი კვირიდან ამოქმედდება და 4 თვის განმავლობაში, 31 მარტამდე იმოქმედებს.  „ბოლო დღეების განმავლობაში, ძალიან ბევრი განცხადება მოვისმინეთ როგორც პურის მწარმოებელთა, ასევე პურის მწარმოებელთა კავშირის და ხორბლის მწარმოებელთა ასოციაციის მხრიდან. საუბარი იყო იმაზე, რომ არსებობს ობიექტური გარემოებები, რომლის შესაბამისად, ქვეყანაში ფქვილის ფასი მატულობს და, შესაბამისად, ეს შეიძლებოდა ასახულიყო პურის ფასზე. ორმა ასოციაციამ დღეს გააკეთა განცხადება, სადაც აღნიშნეს, რომ ხელისუფლებასთან აქვთ დიალოგი და რომ გარკვეული სუბსიდირების სქემა განიხილება. ჩვენ ამ ინფორმაციას ვადასტურებთ. არაერთხელ გვითქვამს, რომ პური არის განსაკუთრებული სტრატეგიული პროდუქტი. გვესმის, რომ მოსახლეობის სოციალური მდგომარეობა არის საკმაოდ რთული იმ ეკონომიკური  პრობლემებიდან გამომდინარე, რასაც კორონავირუსი იწვევს გლობალურად და, მათ შორის, საქართველოში. ჩვენ მუდმივად ვმუშაობდით, რეგულარულად ვხვდებოდით მწარმოებლებს. შედეგად, საქართველოს მთავრობამ მიიღო გადაწყვეტილება პირველი ხარისხის ხორბლის ფქვილის სუბსიდირების შესახებ. მინდა, სრული პასუხისმგებლობით განვაცხადო, რომ  პურზე ფასი არ გაიზრდება. პროგრამა იმოქმედებს 4 თვის განმავლობაში, 31 მარტამდე. დავაკვირდებით, როგორი იქნება საერთაშორისო ბაზრებზე არსებული ვითარება. ხორბალი არის განსაკუთრებული საერთაშორისო ვაჭრობის საგანი და მის ფასს ბევრი ფაქტორი განაპირობებს. შესაბამისად, იმის მიხედვით, როგორი იქნება გლობალური ფასები ხორბლის ფქვილზე, ამ პერიოდის გასვლის შემდეგ, ჩვენ მივიღებთ შემდგომ გადაწყვეტილებებს. ჩვენ შევაფასეთ მომდევნო 3-4-თვიანი პერიოდი და სახელმწიფომ მიიღო გადაწყვეტილება, რომ ასეთი ტიპის ინტერვენცია ამ მომენტისთვის იყო საჭირო“, - განაცხადა ლევან დავითაშვილმა. მინისტრის განმარტებით, ქვეყანაში არსებობდა ხორბლის საკმარისი მარაგები, დაახლოებით 100 ათას ტონაზე მეტი მთელი შემოდგომის განმავლობაში, რაც ფასის დაბალანსების საშუალებას იძლეოდა, თუმცა სექტემბრიდან ხორბალი შავი ზღვის აუზის ქვეყნებში საკმაოდ გაძვირდა - ზრდა, დაახლოებით, 200-დან 270 აშშ დოლარამდე იყო, რაც მნიშვნელოვან წინაპირობებს ქმნიდა ხორბლის ფქვილის ფასის გასაზრდელად და ეს ჯაჭვურად აისახებოდა ხორბლის ფქვილისგან დამზადებული პროდუქციის ფასზე.  „აქედან გამომდინარე, ჩვენ მაქსიმუმი გავაკეთეთ მწარმოებლებთან ერთად იმისთვის, რომ, მარაგები საკმარის ნიშნულზე გვქონოდა ქვეყანაში, არ ყოფილიყო წყვეტა ამ სტრატეგიულად მნიშვნელოვანი პროდუქტის მიწოდების კუთხით. საბოლოოდ, ამ გადაწყვეტილებით ვახდენთ ისეთი ტიპის სუბსიდირებას, რომელიც, ვფიქრობ, მისაღებია ორივე რგოლისთვის. იყო მუდმივი მუშაობა როგორც დიდ წისქვილებთან, რომლებიც არიან ხორბლის ფქვილის მწარმოებლები, ისე პურის მცხობელ კომპანიებთან, რადგან ეს არის მჭიდროდ დაკავშირებული მიწოდების და წარმოების ჯაჭვი და ორივე მხარე უნდა თანხმდებოდეს პირობებზე, რომელიც მოგვცემს საშუალებას, რომ მოსახლეობის მდგომარეობა არ დამძიმდეს“, - აღნიშნა ლევან დავითაშვილმა.  მინისტრის განმარტებით, 50-კილოგრამიანი პირველი ხარისხის ხორბლის ერთი ტომარა ფქვილის ფიქსირებული ფასი 53 ლარით განისაზღვრა და ეს არის პირობა წისქვილებისთვის. „ამ შემთხვევაში, სახელმწიფოს სუბსიდირება იქნება არაუმეტეს 10 ლარისა 50-კილოგრამიან ტომარაზე, რის შედეგადაც, პროგრამაში ჩართული წისქვილები შემოგვთავაზებენ სხვადასხვა ფასს, გარკვეული კონკურენციაც იქნება იმისთვის, რომ მაქსიმალურად ეფექტიანად გამოვიყენოთ სახელმწიფო რესურსი და ეს სუბსიდირება სახელმწიფოს დაუჯდეს უფრო ნაკლები თანხა, მაგრამ შედეგი მივიღოთ იგივე - არ გაიზარდოს არც ხორბლის ფქვილის და არც პურის ფასი.  ჩვენი მხრიდან ბიუჯეტი დაახლოებითი შეფასებულია - თვეში 2-2,5 მილიონი ლარი, რაც მთელი პროგრამის ბიუჯეტს 10 მილიონამდე ლარით განსაზღვრავს“, - განაცხადა მინისტრმა.
#

ლევან დავითაშვილმა ზეთისხილის საერთაშორისო საბჭოს (IOC) სხდომაზე, საქართველოში, ზეთისხილის კულტურის წარმოებისა და ექსპორტის პოტენციალზე ისაუბრა

გარემოს დაცვისა და სოფლის მეურნეობის მინისტრმა ლევან დავითაშვილმა ზეთისხილის საერთაშორისო საბჭოს (IOC) ონლაინ  საერთაშორისო სემინარში  „ზეთისხილის ზეთის სამომავლო პერსპექტივები“ მიიღო მონაწილეობა. მინისტრმა, სიტყვით გამოსვლისას, საერთაშორისო საბჭოს წევრებს ზეთისხილის მსოფლიო დღე  მიულოცა.„საქართველო, 2019 წლიდან, ზეთისხილის საერთაშორისო საბჭოს ოჯახის წევრია, რაც დარგის განვითარების ხელშემწყობ უალტერნატივო პლატფორმას წარმოადგენს. რომ არა პანდემია, წელს თბილისი საბჭოს სხდომის მასპინძელი იქნებოდა. ვიმედოვნებ, მორიგი საბჭოს სხდომის მასპინძლობის შესაძლებლობა ჩვენი ქვეყნის დედაქალაქში მოგვეცემა“, - აღნიშნა ლევან დავითაშვილმა. მინისტრის განცხადებით, მთავრობის ერთ-ერთი პრიორიტეტი ეკონომიკური შესაძლებლობების გაძლიერებაა. ქვეყანაში ზეთისხილის პლანტაციების გაშენება ქვეყნის ეკონომიკურ წახალისებასა და ადგილობრივი მოსახლეობის დასაქმებაში მნიშვნელოვან როლს შეასრულებს.  ლევან დავითაშვილმა ვრცლად ისაუბრა საქართველოში ზეთისხილის კულტურის წარმოების და ექსპორტის პოტენციალზე და ყურადღება სახელმწიფოს მიერ შემუშავებული დარგის განვითარების ხელშემწყობი პროგრამებისა და ქვეყნაში არსებული ლიბერალური სავაჭრო რეჟიმის მნიშვნელობაზე გაამახვილა. როგორც მინისტრმა აღნიშნა, მომავალ წელს, 100 ჰა მიწის ფართობზე იგეგმება ახალი ნარგაობების გაშენება და ზეთისხილის საერთაშორისო საბჭოს მიერ საქართველოსთვის ტექნიკური დახმარების აღმოჩენის შემთხვევაში, ქვეყანაში ზეთისხილის წარმოება მნიშვნელოვნად გაიზრდება. სხდომის ფარგლებში, ლევან დავითაშვილმა ზეთისხილის და მისგან წარმოებული პროდუქციის სასარგებლო თვისებების გარდა, აღნიშნული კულტურის გარემოსდაცვითი თვალსაზრისით გამორჩეულ მახასიათებლებზე ისაუბრა და აღნიშნა, რომ ზეთისხილს დეგრადირებული ნიადაგის აღდგენის ხელშეწყობის და კლიმატზე მავნე ზეგავლენის შემცირების უნიკალური თვისება აქვს. საბჭოს სხდომაზე, პროდუქციის წარმოებაში პანდემიის გავლენები,  ხარისხის სტანდარტის მახასიათებლები, სარეალიზაციო ბაზრების დივერსიფიცირების, წარმოებაში ქალების ჩართულობის მნიშვნელობის საკითხები და სამომავლო გეგმები განიხილეს.საბჭოს სხდომას, ზეთისხილის საერთაშორისო საბჭოს თავმჯდომარე გიორგი სვანიძე ესწრებოდა.საქართველო ზეთისხილის საერთაშორისო საბჭოს წევრი 2019 წელს გახდა და, ამავე წელს, ჩვენი ქვეყანა ზეთისხილის საერთაშორისო საბჭოს 2020 წლის პრეზიდენტ ქვეყანად ოფიციალურად დასახელდა.ზეთისხილის საერთაშორისო საბჭო, რომელიც მსოფლიოს 40-ზე მეტ ქვეყანას აერთიანებს, 1959 წელს, მადრიდში დაარსდა. საბჭოს მიზანი ზეთისხილის პირველადი წარმოებისა და ექსპორტის მხარდაჭერაა.
#

საქართველოდან ექსპორტირებულია 7 824 ტონა ხურმა და კარალიოკი, რომლის ღირებულებამ 4.2 მლნ აშშ დოლარი შეადგინა

საქართველოდან  ვაშლის, თხილისა და მანდარის პარალელურად, ხურმისა და კარალიოკის ექსპორტიც აქტიურად ხორციელდება. 2020 წლის 1 აგვისტოდან 23 ნოემბრამდე პერიოდში, ექსპორტზე გავიდა 7 824 ტონა ხურმა და კარალიოკი, რომლის ღირებულებამ 4.2 მლნ აშშ დოლარი შეადგინა. აღნიშნულ პერიოდში განხორციელებული ხურმისა და კარალიოკის ექსპორტის მოცულობა 14%-ით, ხოლო ექსპორტის ღირებულება 18%-ით აღემატება 2019 წლის ანალოგიური პერიოდის მაჩვენებლებს. ამავე პერიოდში, 4%-ით გაიზარდა ხურმისა და კარალიოკის საექსპორტო ფასი. მიმდინარე წელს წარმოებული ხურმისა და კარალიოკის ექსპორტი განხორციელდა რუსეთის ფედერაციაში (3 377 ტონა), უკრაინასა (2 832 ტონა) და სომხეთში (1 475 ტონა), ასევე ბელარუსში, ყატარში, მოლდოვაში, ჰონკონგში, ყაზახეთსა და უნგრეთში.
#

საქართველოდან 57.2 მლნ აშშ დოლარის თხილია ექსპორტირებული

2020 წლის 1 აგვისტოდან 23 ნოემბრამდე პერიოდში განხორციელდა 10 848 ტონა თხილის ექსპორტი, რომლის ღირებულებამ 57.2 მლნ აშშ დოლარი შეადგინა. აღნიშნულ პერიოდში განხორციელებული თხილის ექსპორტის მოცულობა 2 993 ტონით (38%) აღემატება 2019 წლის ანალოგიურ პერიოდში განხორციელებული ექსპორტის მოცულობის მაჩვენებელს, ხოლო ექსპორტის ღირებულება 18.4 მლნ აშშ დოლარით (48%)  გაიზარდა. ამავე პერიოდში, თხილის საექსპორტო ფასი 7%-ით გაიზარდა. ქართული თხილის ექსპორტი, ძირითადად, ევროკავშირის ბაზრებზე ხორციელდება, კერძოდ, გერმანიაში (3 131 ტონა), იტალიაში (2 124 ტონა), ჩეხეთში (594 ტონა), პოლონეთში (320 ტონა), ლიეტუვაში (311 ტონა), ბულგარეთში (300 ტონა), ესპანეთში (330 ტონა), საფრანგეთში (218 ტონა), საბერძნეთში (97 ტონა), ესტონეთში (88 ტონა), ლატვიაში (84 ტონა), ლუქსემბურგი (60 ტონა), სლოვაკეთში (64 ტონა), ავსტრიასა (22 ტონა) და ხორვატიაში (10 ტონა).ქართული თხილი ექსპორტზე გადის ასევე ისეთ ქვეყნებში, როგორებიცაა რუსეთი (540 ტონა), თურქეთი (530), სომხეთი (527 ტონა), ბელარუსი (284 ტონა), ბრაზილია (186 ტონა), უკრაინა (176 ტონა), ალჟირი (173 ტონა), კანადა (136 ტონა), საუდის არაბეთი (95 ტონა), მექსიკა (67 ტონა), სირია (50 ტონა), შვეიცარია (47 ტონა), იორდანია (38 ტონა), ერაყი (24 ტონა), დიდი ბრიტანეთი (22 ტონა), აშშ (19 ტონა) და სხვა. აღსანიშნავია, რომ 2016 წლიდან, აზიური ფაროსანას და სოკოვანი დაავადებების გავრცელების შედეგად, თხილის წარმოება (შესაბამისად ექსპორტი) მცირდებოდა და 2018 წელს მინიმალურ ნიშნულს, 17 ათას ტონას მიაღწია. 2020 წელს მიღებული მაღალი ხარისხის თხილის მოსავალი სახელმწიფო სტრატეგიის საფუძველზე, შესაბამისი სამსახურებისა და ფერმერების მიერ ფაროსანას წინააღმდეგ გატარებული მასშტაბური ღონისძიებების შედეგია.
#

23 ნოემბრის მონაცემებით საქართველოდან 1 928 ტონა მანდარინია ექსპორტირებული

2020 წლის 1 აგვისტოდან 23 ნოემბრამდე პერიოდში განხორციელდა 1 928 ტონა მანდარინის ექსპორტი, რომლის ღირებულებამ 941 ათასი აშშ დოლარი შეადგინა. მიმდინარე წელს წარმოებული მანდარინის ექსპორტი ძირითადად განხორციელდა სომხეთში (883 ტონა) და რუსეთის ფედერაციაში (899 ტონა). აღნიშნული ქვეყნების გარდა, ექსპორტი განხორციელდა აგრეთვე უკრაინაში, მოლდოვასა და ყაზახეთში.მოსავლის აღება-დაბინავების ორგანიზებულად განხორციელების მიზნით, მუშაობს შესაბამისი შტაბი. არასტანდარტული მანდარინის ჩაბარება, გადამუშავება, ნაკადების კონტროლი და აღრიცხვა ელექტრონული პროგრამის მეშვეობით ხდება. სტანდარტულ მანდარინს 30-მდე საწარმო ჩაიბარებს. რაც შეეხება არასტანდარტულ ნაყოფს ქობულეთის საკონსერვო ქარხანა მიიღებს.
#

საქართველოდან 2.2 მლნ აშშ დოლარის ვაშლია ექსპორტირებული

2020 წლის 1 აგვისტოდან 23 ნოემბრამდე პერიოდში განხორციელდა 5 045 ტონა ვაშლის ექსპორტი, რომლის ღირებულებამ 2.2 მლნ აშშ დოლარი შეადგინა. აღნიშნულ პერიოდში განხორციელებული ვაშლის ექსპორტის მოცულობა 12-ჯერ აღემატება 2019 წლის ანალოგიურ პერიოდში განხორციელებული ექსპორტის მოცულობის მაჩვენებელს, ხოლო ექსპორტის ღირებულება 1.9 მლნ აშშ დოლარით გაიზარდა.მიმდინარე წელს წარმოებული ვაშლის ექსპორტი ძირითადად განხორციელდა რუსეთის ფედერაციაში, კერძოდ 4 884 ტონა.  რუსეთის ფედერაციის გარდა, ექსპორტი განხორციელდა აგრეთვე ყაზახეთში, სომხეთში, სინგაპურსა და ჰონკონგში.