#

"გარემოსდაცვითი შეფასების კოდექსში ცვლილებების შეტანის შესახებ” კანონპროექტის საჯარო განხილვა

გარემოს დაცვისა და სოფლის მეურნეობის სამინისტროში გარემოსდაცვითი შეფასების კოდექსში ცვლილებების შეტანის შესახებ” კანონპროექტის საჯარო განხილვა გაიმართა. მინისტრის მოადგილემ, ნინო თანდილაშვილმა შეხვედრის მონაწილეებს კოდექსში და მის თანმდევ საკანონმდებლო აქტებში შესატანი ცვლილებები გააცნო. დაგეგმილი ცვლილებები ითვალისწინებს სსიპ გარემოს ეროვნული სააგენტოსთვის გარემოსდაცვითი გადაწყვეტილების გამცემი ადმინისტრაციული ორგანოს უფლებამოსილების მინიჭებას, ასევე, გარემოსდაცვითი გადაწყვეტილების გაცემისათვის მოსაკრებლის ნაცვლად, მომსახურების საფასურის დადგენას. ცვლილებები განაპირობა გარემოს დაცვისა და სოფლის მეურნეობის სამინისტროში მიმდინარე რეორგანიზაციის პროცესმა, რომლის ფარგლებშიც, იგეგმება გარემოზე ზემოქმედების ნებართვების დეპარტამენტის სსიპ გარემოს ეროვნულ სააგენტოს სტრუქტურაში გადატანა, შესაბამისად, გარემოსდაცვითი გადაწყვეტილების გამცემი ადმინისტრაციული ორგანოს უფლებამოსილება სსიპ გარემოს ეროვნული სააგენტოს მიენიჭება. შეხვედრას სამინისტროს წარმომადგენლებთან ერთად, აღმასრულებელი ორგანოებისა და არასამთავრობო ორგანიზაციების წარმომადგენლები ესწრებოდნენ.
#

ტყის კოდექსის საჯარო განხილვა

სასტუმროში “Rooms Hotel Tbilisi” „ტყის კოდექსის“ საჯარო განხილვა გაიმართა. გარემოს დაცვისა და სოფლის მეურნეობის მინისტრმა ლევან დავითაშვილმა საერთაშორისო და არასამთავრობო ორგანიზაციების წარმომადგენლებს “ტყის კოდექსის“ კანონპროექტის სამუშაო ვერსია გააცნო. სამინისტრომ ახალი „ტყის კოდექსის“ კანონპროექტის შემუშავება 2014 წელს დაიწყო.კანონპროექტი შემუშავდა ევროკავშირის მიერ დაფინანსებული პროექტის - „სატყეო სექტორში კანონიერების დაცვისა და მმართველობის გაუმჯობესების პროგრამა ევროპის სამეზობლო და საპარტნიორო ინსტრუმენტით მოცული აღმოსავლეთის ქვეყნებისთვის - მეორე ფაზა (ENPI FLEG II)“, ფარგლებში, რომელიც განახორციელა მსოფლიო ბანკმა.შეხვედრას საერთაშორისო და არასამთავრობო ორგანიზაციების წარმომადგენლებთან ერთად, სხვა დაინტერესებული მხარეები ესწრებოდნენ. კანონპროექტის ძირითადი მიმართულებების განხილვის შემდეგ, მათ მიერ წარმოთქმული შენიშვნები და მოსაზრებები გათვალისწინებული იქნება „ტყის კოდექსის“ კანონპროექტის საბოლოო დოკუმენტში.კანონპროექტი „საქართველოს ეროვნული სატყეო კონცეფციიდან" გამომდინარე, ტყის მდგრადი მართვის პრინციპებს ემყარება. საქართველოს ტყეების მართვა ეკოლოგიური, სოციალური და ეკონომიკური პრინციპების გათვალისწინებით უნდა განხორციელდეს. ასევე, დგინდება ტყის ახალი განმარტება და კატეგორიზაციის სრულიად ახლებური წესი. თითოეული კატეგორიის ტყე გამოყოფილია მისი ფუნქციური დანიშნულებიდან გამომდინარე. კანონპროექტის ერთ-ერთ მთავარ სიახლეს წარმოადგენს საქართველოში ტყეზე საკუთრების ახალი ფორმების შემოღება.შეხვედრას აღმასრულებელი და საკანანმდებლო ორგანოსა და დიპლომატიური კორპუსის წარმომადგენლები ესწრებოდნენ.
#

ლევან დავითაშვილი: "აზიური ფაროსანა არის ძალიან მნიშვნელოვანი გამოწვევა"

საქართველოს პარლამენტში, აგრარულ საკითხთა კომიტეტის სხდომაზე, გარემოს დაცვისა და სოფლის მეურნეობის მინისტრმა, ლევან დავითაშვილმა 2017 წელს გაწეული საქმიანობის შესახებ ანგარიში წარადგინა.ლევან დავითაშვილმა დეტალურად ისაუბრა აზიური ფაროსანას წინააღმდეგ გატარებული და 2018 წელს დაგეგმილი ღონისძიებების შესახებ. როგორც მინისტრმა აღნიშნა, 2017 წელს ფაროსანას წინააღმდეგ გატარებული მასშტაბური ღონისძიებების შედეგად მიღებული გამოცდილების საფუძველზე შემუშავებულია და დამტკიცებულია „აზიური ფაროსანას წინააღმდეგ ბრძოლის 2018 წლის სახელმწიფო პროგრამა“.პროგრამის მიზანია მავნებლის პოპულაციის შემცირება და კონტროლი, რათა მინიმუმამდე იქნას დაყვანილი სასოფლო-სამეურნეო, სატყეო კულტურების დაზიანება და ეკონომიკური ზარალი. პროგრამის ძირითადი პრინციპია სახელმწიფოსა და საზოგადოების ერთობლივი ჩართულობა.„აბსოლუტური პასუხისმგებლობით ვაფიქსირებ, რომ აზიური ფაროსანა არის ძალიან მნიშვნელოვანი გამოწვევა. ეს არის ძალიან დიდი საფრთხე ყველა იმ ქვეყანაში, რომელ ქვეყანებშიც ეს მავნებელი არსებობს. ვფიქრობ, სპეკულაცია იმაზე, ეს რა ტიპის მწერია, თუ რა ტიპის გამოწვევაა, აბსოლუტურად უსაფუძვლოა. ამ ტრიბუნიდან, ამ კომიტეტშიც და ნებისმიერ სხვა ფორმატშიც, ჩემს მიერ პირადად არაერთხელ იყო დაფიქსირებული, რა ტიპის გამოწვევა გვაქვს ჩვენ აზიური ფაროსანას სახით. გარემოს დაცვისა და სოფლის მეურნეობის სამინისტრომ, 2017 წელს ჩატარებული საკომუნიკაციო კამპანიის შედეგად, მოსახლეობას ინფორმაცია მიაწოდა ამ პრობლემის შესახებ და შეძლო, მოსახლეობას გაეთავისებინა და აქტუალურობა დაეფიქსირებინა. როდესაც ვთქვი, რომ ეს საკითხი არის პოლიტიზირებული-განვმარტავ, რა ვიგულისხმე; ხშირ შემთხვევაში კეთდება უპასუხისმგებლო განცხადებები, რომელიც უკავშირდება აზიურ ფაროსანასთან ბრძოლის ღონისძიებებს. ეს თემა არ უნდა იყოს პოპულიზმის საგანი. ჩვენ პოპულიზმით ვნერგავთ უიმედობას მოსახლეობაში. ვერავინ დამაჯერებს, რომ მმართველ გუნდზე მეტად გული შესტკივა რომელიმე პარლამენტარს თუ აქტივისტს ამ საკითხთან დაკავშირებით. სწორედ ამისთვის გაიზარდა სამინისტროს დაფინანსება, რათა ფიტოსანიტარიული სამსახურის შესაძლებლობები გაზრდილიყო, უკეთესი კომუნიკაცია მოვახდინოთ მოსახლეობასთან; სწორედ ამისთვის შეიქმნა სამთავრობო კომისია. მოსახლეობას, აბსოლუტურად ტექნიკურ საკითხში პოლიტიკოსების ინტენსიურ ჩართულობაზე უფრო მეტად აინტერესებს კომპეტენტური პასუხები მიიღოს სპეციალისტებისგან. აქ იყო განცხადებები, რომ უნდა შეიქმნას საგანგებო სიტუაციების შტაბი, რაც ნიშნავს, რომ მოსახლეობა შესაძლოა თავისი მოქმედებით ვერ მოერიოს ფაროსანას. საჭიროა პასუხისმგებლები ვიყოთ ჩვენს განცხადებებზე; ზედმეტი პოლიტიზება თემას ავნებს. ვსაუბრობ იმაზე, რომ ჩვენ თემის ასეთი ტიპის კომუნიკაციით ვნერგავთ მოსახლეობაში უიმედობას, რომ აზიური ფაროსანას არ ეშველება და ვერავინ მოერევა. პირიქით, ჩვენი კომუნიკაცია არის იმისკენ მიმართული, რომ მოსახლეობას გავუჩინოთ იმედი.8-9 მარტს, საქართველოში გაიმართება საეთაშორისო კონფერენცია, სადაც ჩამოდის ყველა წამყვანი სპეციალისტი აშშ-დან და ყველა მეზობელი ქვეყნის ფიტოსანიტარიული სამსახურის წარმომადგენლები სწორედ იმიტომ, რომ ერთობლივი ძალებით და რეგიონში კოორდინაციით, ვიყოთ ეფექტიანი ბრძოლის კუთხით. საქართველოს მეტი გამოცდილება აქვს ამ პრობლემასთან ბრძოლაში და ეს გამოცდილებაც იყოს გაზიარებული. რაც შეეხება 2017 წელს ჩვენ არ ვიქნებოდით იდეალური და, ალბათ, 2018 წლის ბოლოსაც აღმოჩნდება რაღაც საკითხები, რომელსაც 2019 წელს გავაუმჯობესებთ. ეს არის უნიკალური გამოცდილება, რომელიც მავნებელთან ბრძოლის კუთხით ჩვენ გვიგროვდება. ეს არის მსოფლიო პრაქტიკა, კონკრეტულ გეოგრაფიაში, კონკრეტულ არეალში ჩვენ უნდა დაგვიგროვდეს ჩვენი გამოცდილება და ეს უნდა იყოს მუდმივად გამოხატული ჩვენს ღონისძიებებში.ჩვენ არ შეგვიჩერებია მომზადება, მათ შორის, სამუშაობი ტექნიკის და პრეპარატების შეძენის კუთხით და, ასევე საინფორმაციო მასალების მომზადების და მიწოდების კუთხით, და ეს არ არის მხოლოდ ბროშურები რთულ ენაზე, ეს, ამავე დროს, არის შეხვედრები (4 ათასი შეხვედრა ჩატარდა გასულ წელს სოფლებში). მოსახლეობამ წელს მეტი იცის ვიდრე შარშან, უფრო მომზადებულია, ვიდრე შარშან; ერთობლივი ძალებით ვიქნებით უფრო ეფექტიანი. მთავარია, რომ მოსახლეობას ჰქონდეს რწმენა იმისა, რომ სწორად ჩატარებული ღონისძიებების შედეგად, ჩვენ მივიღებთ შედეგს. ჩვენ რეგიონული განვითარებისა და ინფრასტრუქტურის სამინისტროსთან გვაქვს, ფაქტობრივად, ყოველდღიური კომუნიკაცია როგორც ფაროსანასთან დაკავშირებულ საკითხებზე, ისე სხვა ბევრ საკითხზე. 
#

ლევან დავითაშვილმა 2017 წელს გაწეული საქმიანობის შესახებ ანგარიში წარადგინა

საქართველოს პარლამენტში, აგრარულ საკითხთა კომიტეტის სხდომაზე, გარემოს დაცვისა და სოფლის მეურნეობის მინისტრმა, ლევან დავითაშვილმა 2017 წელს გაწეული საქმიანობის შესახებ ანგარიში წარადგინა.გარემოს დაცვისა და სოფლის მეურნეობის მინისტრმა აგრობიზნესის სექტორში პროდუქციის გამოშვების მზარდ ტენდენციაზე ისაუბრა და აღნიშნა, რომ, 2012 წელთან შედარებით, როგორც პირველადი, ასევე გადამუშავების შედეგად მიღებული პროდუქციის გამოშვება 32%-ით არის გაზრდილი. 2017 წლის 9 თვეში, აგრობიზნესის მთლიანმა გამოშვებამ 6.7 მლრდ ლარი შეადგინა და წინა წლის ანალოგიური პერიოდის მაჩვენებელს 5%-ით აღემატება.ასევე მზარდია აგროსასურსათო სექტორში შექმნილი დამატებული ღირებულება. 2017 წლის 9 თვეში, სოფლის მეურნეობის სექტორში შექმნილი დამატებული ღირებულება, მიმდინარე ფასებში 2 მლრდ ლარს შეადგენს და წინა წლის ანალოგიური პერიოდის მაჩვენებელს 3%-ით აღემატება.2017 წლის 9 თვის წინასწარი მონაცემებით, სოფლის მეურნეობის სექტორში განხორციელებული პირდაპირი უცხოური ინვესტიციების რაოდენობამ 9.2 მლნ აშშ დოლარი შეადგინა, რაც 2016 წლის ჯამურ მაჩვენებელს 15%-ით აღემატება. 2017 წლის მონაცემებით, საქართველოდან ექსპორტირებულია 777 მლნ აშშ დოლარის ღირებულების აგროსასურსათო პროდუქცია, რაც 12%-ით აღემატება 2016 წლის და 52.2%-ით აღემატება 2012 წლის ანალოგიურ მონაცემებს.მინისტრმა დეტალურად ისაუბრა სასოფლო-სამეურნეო კოოპერაციის ხელშეწყობისთვის განხორციელებული პროგრამების, ასევე სარწყავი და სადრენაჟე სისტემების მოწესრიგების მიმართულებით განხორციელებული საქმიანობის, რთველი 2017 წლის, საქართველოს მევენახეობის უწყებრივი კადასტრის, ქართული ღვინის პოპულარიზაციის ღონისძიებების შესახებ. აღინიშნა, რომ 2017 წელს სურსათის უვნებლობის კუთხით განხორციელდა 24 024 სახელმწიფო კონტროლი; ცხოველთა ჯანმრთელობის უზრუნველყოფის მიზნით, ჩატარდა პროფილაქტიკური ვაქცინაცია სხვადასხვა დაავადებაზე; გატარდა მნიშვნელოვანი ღონისძიებები მცენარეთა დაცვისა და ფიტოსანიტარული კეთილსაიმედოობის მიმართულებებით.ლევან დავითაშვილმა, ანგარიშის წარდგენის დროს, ქვეყნის მასშტაბით სასოფლო-სამეურნეო შესაძლებლობების რეალიზაციისათვის სამეცნიერო-კვლევითი მიმართულებით განხორციელებული სამუშაოს და არსებული ლაბორატორიული პოტენციალის გამოყენების მნიშვნელობაზეც ისაუბრა და აღნიშნა, რომ ფერმერებისა და მიზნობრივი ჯგუფებისათვის მოქნილი სერვისის მიწოდება ხელს უწყობს ევროკავშირის ბაზარზე საქართველოში წარმოებული პროდუქციის დაშვებას.მინისტრმა ყურადღება სასოფლო-სამეურნეო ექსტენციის სტრატეგიაზე გაამახვილა. შეაჯერა და გააანალიზა რა სხვადასხვა მოსაზრებები, შენიშვნები, წინადადებები და რეკომენდაციები, საქართველოს გარემოს დაცვისა და სოფლის მეურნეობის სამინისტრომ, გაეროს სურსათისა და სოფლის მეურნეობის ორგანიზაციის (FAO) მხარდაჭერით, საბოლოოდ შეიმუშავა და წარმოადგინა სასოფლო-სამეურნეო ექსტენციის სტრატეგიის დოკუმენტი. ქვეყნის სახელმწიფო სასოფლო-სამეურნეო ექსტენციის უმთავრესი გამოწვევა საქართველოს სოფლის მეურნეობის კონკურენტუნარიანობის ამაღლებაა ფერმერთათვის ახალი ტექნოლოგიების გაცნობისა და ცოდნის გადაცემის გზით.ანგარიშის წარდგენის დროს, მინისტრმა სოფლის მეურნეობის პროექტების მართვის სააგენტოს მიერ განხორციელებული პროექტების - შეღავათიანი აგროკრედიტის პროექტი, პროექტი „დანერგე მომავალი“, აგროდაზღვევის პროექტი, სოფლის მეურნეობის პროდუქციის გადამამუშავებელი და შემნახველი საწარმოთა თანადაფინანსების პროექტი, ჩაის პლანტაციების რეაბილიტაციის პროგრამა, აგროწარმოების ხელშეწყობის პროგრამა - შედეგებზე ისაუბრა.როგორც ლევან დავითაშვილმა აღნიშნა, ჯამურად, 2018 წლის 01 თებერვლის მონაცემებით, ქვეყნის მაშტაბით 166 ახალი საწარმო გაიხსნა და 845 საწარმო გაფართოვდა.აღინიშნა, რომ ევროკავშირთან ღრმა და ყოვლისმომცველი თავისუფალი სავაჭრო სივრცის შესახებ DCFTA შეთანხმების IV თავის (სანიტარული და ფიტოსანიტარული ზომები) თანახმად, საქართველომ აიღო ვალდებულება ქვეყნის კანონმდებლობა დაუახლოვოს ევროკავშირის კანონმდებლობას სურსათის/ცხოველის საკვების უვნებლობის, ვეტერინარიისა და მცენარეთა დაცვის სფეროებში. საკანონმდებლო დაახლოების ვადები დადგენილია DCFTA შეთანხმების XI B დანართით. 2017 წელს დაახლოებულ იქნა 17 სამართლებრივი აქტი.აგრარულ საკითხა კომიტეტის სხდომაზე, ლევან დავითაშვილმა დეტალურად ისაუბრა აზიური ფაროსანას წინააღმდეგ გატარებული და 2018 წელს დაგეგმილი ღონისძიებების შესახებ. როგორც მინისტრმა აღნიშნა, 2017 წელს ფაროსანას წინააღმდეგ გატარებული მასშტაბური ღონისძიებების შედეგად მიღებული გამოცდილების საფუძველზე შემუშავებულია და დამტკიცებულია „აზიური ფაროსანას წინააღმდეგ ბრძოლის 2018 წლის სახელმწიფო პროგრამა“.პროგრამის მიზანია მავნებლის პოპულაციის შემცირება და კონტროლი, რათა მინიმუმამდე იქნას დაყვანილი სასოფლო-სამეურნეო, სატყეო კულტურების დაზიანება და ეკონომიკური ზარალი. პროგრამის ძირითადი პრინციპია სახელმწიფოსა და საზოგადოების ერთობლივი ჩართულობა.
#

სოფლის მეურნეობის 55-ე საერთაშორისო გამოფენა გაიხსნა

ქ. პარიზში სოფლის მეურნეობის 55-ე საერთაშორისო გამოფენა გაიხსნა და მინისტრთა შეხვედრა გაიმართა, რომელსაც გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი დაესწრო. შეხვედრას საფრანგეთის სოფლის მეურნეობის სამინისტროს მიწვევით 40-მდე ქვეყნის მინისტრები ესწრებოდნენ და მისი ძირითადი მიზანი იყო სოფლის მეურნეობის სფეროში არსებული საუკეთესო პრაქტიკის, ფერმერთა მხარდაჭერის და სურსათის უსაფრთხოების საკითხების განხილვა. სოლომონ პავლიაშვილმა მონაწილეებს საქართველოში ამ მიმართულებით არსებული მდგომარეობა გააცნო და საფრანგეთის მთავრობას მადლობა გადაუხადა პროექტების განხორციელებაში მხარდაჭერისთვის. ასევე, ისაუბრა ექსტენციის პროგრამის მიმდინარეობაზე, სოფლის მეურნეობის სექტორში არსებულ ახალ გამოწვევებზე და ხაზი გაუსვა გასულ წელს ბორდოში ჩატარებულ გამოფენას, სადაც საქართველო აღიარებულ იქნა, როგორც "ღვინის აკვანი". პარიზის სოფლის მეურნეობის 55-ე საერთაშორისო გამოფენის თემაა "სოფლის მეურნეობა: ერთობლივი ქმედებები“, რომელშიც მსოფლიოს სოფლის მეურნეობის და სურსათის ინდუსტრიაში მოღვაწე სახელმწიფო და კერძო სექტორის წარმომადგენლები მონაწილეობენ. მინისტრის მოადგილესთან ერთად გამოფენას საქართველოს ელჩი საფრანგეთში ეკატერინე სირაძე - დელონე და საგანგებო და სრულუფლებიანი დესპანი გოჩა ჯავახიშვილი ესწრებოდნენ. გამოფენას ყოველწლიურად ნახევარ მილიონზე მეტი ვიზიტორი სტუმრობს. 
#

მინისტრის ვიზიტი ამერიკის შეერთებულ შტატებში

საქართველოს გარემოს დაცვისა და სოფლის მეურნეობის მინისტრმა, ლევან დავითაშვილმა ამერიკის შეერთებულ შტატებში ვიზიტის ფარგლებში, შეხვედრა გამართა ამერიკის საერთაშორისო განვითარების სააგენტოს (USAID) წარმომდგენელთან, მარგო ელისთან, სადაც სოფლის მეურნეობის დარგში ახალი პროექტის დიზაინზე იმსჯელეს. პროექტი ტექნიკურ დახმარებასა და საგრანტო მიმართულებებს მოიცავს. შეხვედრა გაიმართა ამერიკის შეერთებული შტატების შინაგან საქმეთა დეპარტამენტის ტექნიკური დახმარების პროგრამის ხელმძღვანელთან, ბარბარა პიტკინთან. მხარეებმა დაცული ტერიტორიების სააგენტოს მხარდაჭერის პროექტის მომდევნო ფაზის განხორციელებაზე იმსჯელეს. საქართველოს საპატიო კონსულთან, დევიდ შიმპთან შეხვედრაზე საუბარი შეეხო სატყეო სექტორში აკადემიური და სამეცნიერო წრეების ჩართულობის მნიშვნელობას და ახალი პროექტის განხორციელებას. მინისტრის განცხადებით, საქართველოს გარემოს დაცვისა და სოფლის მეურნეობის სამინისტროს პრიორიტეტი სატყეო სექტორში არსებული მდგომარეობის მნიშვნელოვნად გაუმჯობესებაა, რაც ტყის კოდექსის დამტკიცებას და იმპლემენტაციას გულისხმობს. ამასთანავე, მსოფლიო ბანკში და საერთაშორისო სავალუტო ფონდში დასაქმებული წარმატებული ქართველების ინიციატივით, ლევან დავითაშვილი მსოფლიო ბანკის ოფისში მიიწვიეს, სადაც მინისტრმა დეტალურად ისაუბრა სამინისტროს პრიორიტეტებზე, სამომავლო გეგმებსა და კითხვა-პასუხის რეჟიმში, დამსწრე საზოგადოებას ეკონომიკური მდგომარეობის გაუმჯობესებაზე და მდგრადი განვითარების პრინციპებით მოსახლეობის კეთილდღეობის და ცხოვრების დონის გაუმჯობესებაზე საქართველოს მთავრობის ხედვა გააცნო. ვიზიტის ფარგლებში, ლევან დავითაშვილი ამერიკა - საქართველოს ბიზნესსაბჭოს და ამერიკა - აზერბაიჯანის სავაჭრო პალატის ორგანიზებით გამართულ მიღებაზე სიტყვით გამოვიდა, სადაც ქვეყნებს შორის სავაჭრო ურთიერთობების გაუმჯობესების მნიშვნელობაზე გაამახვილა ყურადღება. ვაშინგტონში გამართულ შეხვედრებში, ლევან დავითაშვილთან ერთად, მონაწილეობდნენ საქართველოს საგანგებო და სრულუფლებიანი ელჩი ამერიკის შეერთებულ შტატებში დავით ბაქრაძე, დესპანი გიორგი ციკოლია და საქართველოს გარემოს დაცვისა და სოფლის მეურნეობის მინისტრის პირველი მოადგილე ნოდარ კერესელიძე. საქართველოს დელეგაციის ვიზიტი ვაშინგტონში 24 თებერვალს დასრულდება. 
#

როტერდამის კონვენციის საკონსულტაციო შეხვედრა

გარემოსდაცვითი ინფორმაციისა და განათლების ცენტრში როტერდამის კონვენციის სუბრეგიონალური საკონსულტაციო შეხვედრა გაიმართა. შეხვედრის მონაწილეებს გარემოს დაცვისა და სოფლის მეურნეობის მინისტრის მოადგილემ ნინო თანდილაშვილმა კონვენციის - „ცალკეული საშიში ქიმიური ნივთიერებებით და პესტიციდებით საერთაშორისო ვაჭრობის სფეროში წინასწარ დასაბუთებული თანხმობის პროცედურის შესახებ“ ესაუბრა.როტერდამის კონვენცია საბოლოო სარეგლამენტაციო დადგენილების შეფასების ინსტრუმენტისა და სხვა მიდგომების ხელშეწყობას გულისხმობს, რაც თავის ემსახურება კონვენციის ეროვნული პასუხისმგებელი პირების მიერ ძალისხმევის და შესაძლებლობების გაძლიერებას საშიშ ქიმიურ ნივთიერებებთან დაკავშირებით, მეცნიერულად დასაბუთებული საბოლოო სარეგლამენტაციო დადგენილებების მიღების კუთხით.შეხვედრას სუბრეგიონის წევრი ქვეყნების: სერბეთის, სომხეთის, ბულგარეთის, რუსეთისა და მსოფლიო ჯანდაცვის ორგანიზაციის (WHO) წარმომადგენლები ესწრებოდნენ.