#

ლევან დავითაშვილმა ურუგვაის რესპუბლიკაში შეხვედრები გამართა

ორ ქვეყანას შორის არსებული ეკონომიკური, პოლიტიკური და კულტურული ურთიერთობების გაღრმავების საკითხები განიხილეს საქართველოს გარემოს დაცვისა და სოფლის მეურნეობის მინისტრმა ლევან დავითაშვილმა და ურუგვაის საგარეო საქმეთა მინისტრის მოვალეობის შემსრულებელმა არიელ ბერგამინოსმა. შეხვედრა ურუგვაის დედაქალაქ მონტევიდეოში გაიმართა. შეხვედრაზე მხარეებმა ხაზი გაუსვეს მთავრობებს შორის თანამშრომლობის გაღრმავების აუცილებლობას და კერძო სექტორისთვის ხელსაყრელი პირობების შექმნას, რაც ქვეყნებს საშუალებას მისცემს გაააქტიუროს სავაჭრო-ეკონომიკური ურთიერთობები და გაზარდოს ორ ქვეყანას შორის არსებული ტვირთბრუნვა. ,,თანამდეროვე მსოფლიოში არსებული გამოწვევების გათვალისწინებით უდიდესი მნიშვნელობა ენიჭება სანდოობას, გამჭვირვალე თანამშრომლობასა და ქვეყნებს შორის კეთილსაიმედო, პარტნიორულ ურთიერთობებს. ამის გათვალისწინებით საქართველო განსაკუთრებულ მნიშვნელობას ანიჭებს ქვეყნის ინტერესების დაცვას საერთაშორისო ასპარეზზე და მინდა მთავრობის სახელით მადლობა გადაგიხადოთ ჩვენი ქვეყნის ტერიტორიული მთლიანობის განუხრელად მხარდაჭერისთვის“, - განაცხადა ლევან დავითაშვილმა კოლეგასთან შეხვედრაზე. ,,ურუგვაი ყოველთვის მხარს დაუჭერს საქართველოს საერთაშორისო ასპარეზზე და ორ ქვეყანას შორის არსებული მსგავსებების გათვალისწინებით აქტიურად არის დაინტერესებული მხარეებს შორის სამართლებრივი ბაზის დახვეწით, რაც გულისხმობს ორმხრივ და მრავალმხრივ ფორმატებში შეთანხმებების, მემორანდუმების და კონკრეტული პროექტების შესახებ დოკუმენტების გაფორმებას“, - აღნიშნა არიელ ბერგამინოსმა.ურუგვაი დაინტერესებულია საქართველოსთან სოფლის მეურნეობის და გარემოს დაცვითი მიმართულებით კონკრეტული პროექტების განხორციელებით, კერძოდ მესაქონლეობის, აკვაკულტურის, ღვინის, ბიომრავალფეროვნებისა და დაცული ტერიტორიების კუთხით თანამშრომლობის გაღრმავებით. ,,ურუგვაისთვის კარგად არის ცნობილი ქართული მეღვინეობის მდიდარი ტრადიციების შესახებ და ჩვენთვის მნიშვნელოვანია ამ კუთხით თანამშრომლობა“, - განაცხადა საგარეო საქმეთა მინისტრის მოვალეობის შემსრულებელმა. ლევან დავითაშვილმა აღნიშნა, რომ საქართველო ღვინით ვაჭრობის მსოფლიო ჯგუფის წევრ ქვეყნებს შორის ერთადერთი ევროპული ქვეყანაა, რომელიც აქტიურად თანამშრომლობს რეგიონის ქვეყნებთან და ამას ადასტურებს ის ფაქტიც, რომ 2018 წლის ნოემბრის თვეში ურუგვაიში დაგეგმილ ღვინის მსოფლიო კონგრესზე საქართველოდან წარმოდგენილი იქნება როგორც სახელმწიფო სტრუქტურის, ისე კერძო სექტორის და სამეცნიერო-კვლევითი წრეების წარმომადგენლები. ლევან დავითაშვილმა მადლობა გადაუხადა კოლეგას გულთბილი მასპინძლობისთვის და ვიზიტის საინტერესო პროგრამის მომზადებისთვის და გამოთქვა მზადყოფნა ურუგვაის დელეგაციის საქართველოში მასპინძლობისთვის. 
#

შეხვედრა ურუგვაის რძის მწარმოებელთა კოოპერატივის პრეზიდენტთან

საქართველოს გარემოს დაცვისა და სოფლის მეურნეობის მინისტრი ლევან დავითაშვილი ქართულ დელეგაციასთან ერთად მონტევიდეოში ურუგვაის რძის მწარმოებელთა ეროვნული კოოპერატივის (CONAPROLE) პრეზიდენტს ალვარო ამბროსი მარტინეს შეხვდა. როგორც მარტინესმა შეხვედრაზე განაცხადა, კოოპერატივს, რომელსაც საქმიანობის 80 წლიანი ისტორია აქვს და პროდუქციის 80 პროცენტს საექსპორტოდ ამზადებს, ძირითადი მიზანი ხარისხიანი პროდუქციის წარმოებაა. ლევან დავითაშვილის განცხადებით საქართველოში კოოპერაციული მეურნეობას დიდი ხნის ისტორია არ აქვს, თუმცა კონკრეტული შედეგები სახეზეა; სასოფლო-სამეურნეო კოოპერაციის გასავითარებლად, საქართველოში, სხვადასხვა სახელმწიფო პროექტები წარმატებით ხორციელდება; როგორც ლევან დავითაშვილმა აღნიშნა, სოფლის მეურნეობის მიმართულებით მესაქონლეობა ურუგვაის რესპუბლიკის ძლიერი მხარეა და აღნიშნულ სექტორში თანამშრომლობის გაფართოვების მნიშვნელოვანია. საქართველოში ასევე მნიშვნელოვანი პროექტები იგეგმება ჯიშობრივი გაუმჯობესების, პროდუქტიულობის ამაღლებისა და ხარისხიანი პროდუქციის წარმოების მიმართულებით. ქვეყანის სტრატეგიული მდებარეობა, ვეტერინარული კეთილსაიმედოობის კუთხით არსებული მდგომარეობა, საძოვრები და ევროკავშირთან მიახლოების საკანონმდებლო პროგრამა, ეკოლოგიურად სუფთა პროდუქტის წარმოების შესაძლებლობას იძლევა და საქართველოს აძლევს საშუალებას განახორციელოს როგორც იმპორტი, ისე ექსპორტი და გახდეს რეგიონული ჰაბი, რაც პარტნიორ ქვეყნებს გაუადვილებს წვდომას მსოფლიოს უმსხვილეს ბაზრებზე. შეხვედრის დასასრულს მხარეებმა კიდევ ერთხელ დაადასტურეს თანამშრომლობის მზადყოფნა და განსაზღვრეს მიზანი, რომ პოლიტიკურ დონეზე მიღწეული შედეგების მერე, კერძო სექტორს ექნება შესაძლებლობა კონკრეტულ კომერციული თანამშრომლობის პირობებზე შეთანხმდნენ.შეხვედრას მინისტრთან ერთად ესწრებოდა საქართველოს საგანგებო და სრულუფლებიანი ელჩი არგენტინის რესპუბლიკაში, აკრედიტაციით ჩილეს რესპუბლიკაში, პარაგვაის რესპუბლიკაში, ურუგვაის აღმოსავლურ რესპუბლიკაში ირაკლი ყურაშვილი, ეკვადორის რესპუბლიკასა და ბოლივიის მრავალეროვნულ სახელმწიფოში და საქართველოს სურსათის ეროვნული სააგენტოს ხელმძღვანელი ზურაბ ჩეკურაშვილი ესწრებოდა.
#

ლევან დავითაშვილი ურუგვაიში გარემოს დაცვის მინისტრს შეხვდა

ურუგვაის რესპუბლიკის დედაქალაქ მონტევიდეოში, ოფიციალური ვიზიტის ფარგლებში საქართველოს გარემოს დაცვისა და სოფლის მეურნეობის მინისტრი ლევან დავითაშვილი ურუგვაის ტერიტორიული დაგეგმარების და გარემოს დაცვის მინისტრს ენეიდა დე ლეონს შეხვდა. ურუგვაელ კოლეგასთან შეხვედრაზე ლევან დავითაშვილმა ყურადღება გაამახვილა საქართველოში გარემოს დაცვის მიმართულებით არსებული პოლიტიკასა და დანერგილ პრაქტიკაზე. შეხვედრისას, ლევან დავითაშვილმა კოლეგას გააცნო სამთავრობო რეფორმის ფარგლებში ორი უწყების - გარემოს და სოფლის მეურნეობის გაერთიანების ფარგლებში დადებითი შედეგები და სამომავლო გეგმები. ურუგვაის მხარემ ხაზგასმით აღნიშნა, რომ მათთვის კარგად არის ცნობილი საქართველოს ბიომრავალფეროვნების, ეკოსისტემების, დაცული ტერიტორიებისა და გარემოსდაცვითი პოლიტიკის ძირითადი მიმართულებები. მხარეებმა მზადყოფნა გამოთქვეს, გაუზიარონ ერთმანეთს დაცული ტერიტორიების მართვის საუკეთესო პრაქტიკის გამოცდილება. ურუგვაის მხარემ ქართულ მხარეს თხოვნით მიმართა, რომ ბიომრავალფეროვნების ინვენტარიზაციის ქართული მოდელის და დაჭაობებული ტერიტორიების მართვის კუთხით გამოცდილება გაუზიარონ. როგორც ენეიდა დე ლეონემ აღნიშნა, ურუგვაიში არის კერძო დაცული ტერიტორიები, რაც ერთგვარ პრობლემებს ქმნის ბიომრავალფეროვნების შენარჩუნებისა და რეკრეაციის კუთხით. როგორც ლევან დავითაშვილმა შეხვედრაზე აღნიშნა, ქართული მხარე მზად არის ურუგვაის დელეგაციას გაუზიაროს დაცული ტერიტორიების მართვის კუთხით არსებული გამოცდილება. „საქართველოს ტერიტორიიდან 10%-ი დაცულ ტერიტორიებს უკავია და ჩვენ განსაკუთრებულ მნიშვნელობას ვანიჭებთ ვენის კონვენციით ნაკისრ ვალდებულებების შესრულებას, რაც გულისხმობს ბიომრავალფეროვნების კონსერვაციისა და რეკრეაციის პრინციპების დაცვით ეკონომიკურ სარგებელის მიღებას და დაცული ტერიტორიების პოტენციალის გაუმჯობესებას. ტურიზმი მზარდი მიმართულებაა საქართველოში და ჩვენთვის მნიშვნელოვანია, ხელი შევუწყოთ ქვეყანაში ბიომრავალფეროვნების, ეკოსისტემების დაცვას და ამავდროულად მოსახლეობის კეთილდღეობის ზრდას“-განაცხადა ლევან დავითაშვილმა.ტერიტორიული დაგეგმარების და გარემოს დაცვის სამინისტროში გამართულ შეხვედრას მინისტრთან ერთად ესწრებოდნენ საქართველოს საგანგებო და სრულუფლებიანი ელჩი არგენტინის რესპუბლიკაში, აკრედიტაციით ჩილეს რესპუბლიკაში, პარაგვაის რესპუბლიკაში, ურუგვაის აღმოსავლურ რესპუბლიკაში, ეკვადორის რესპუბლიკასა და ბოლივიის მრავალეროვნულ სახელმწიფოში და საქართველოს სურსათის ეროვნული სააგენტოს ხელმძღვანელი ზურაბ ჩეკურაშვილი ესწრებოდა.
#

გიორგი ხანიშვილი ახალი სადოქტორო პროგრამის პრეზენტაციას დაესწრო

გარემოს დაცვისა და სოფლის მეურნეობის მინისტრის მოადგილე გიორგი ხანიშვილი საქართველოს აგრარულ უნივერსიტეტში ახალი სადოქტორო პროგრამის „მდგრადი სოფლის მეურნეობა და სასურსათო სისტემები“ (SAFS) პრეზენტაციას დაესწრო. მისასალმებელ სიტყვაში მინისტრის მოადგილემ აგრარულ დარგში კვალიფიციური კადრების საჭიროების შესახებ ისაუბრა და ყურადღება სადოქტორო პროგრამის მნიშვნელობაზე გაამახვილა. აღსანიშნავია, რომ პირველ სტრუქტურულ საერთაშორისო სადოქტორო პროგრამას „მდგრადი სოფლის მეურნეობა და სასურსათო სისტემები (SAFS)“ საქართველოს აგრარული უნივერსიტეტი კასელის უნივერსიტეტთან (გერმანია) ერთად, ფოლკსვაგენის (VW) და შოთა რუსთაველის ეროვნული სამეცნიერო ფონდის ფინანსური მხარდაჭერით იწყებს. სადოქტორო პროგრამის ფარგლებში, კვლევები განხორციელდება ოთხი თემატური მიმართულებით 1. მდგრადი სოფლის მეურნეობა და სურსათის ტექნოლოგიური ინოვაციები; 2. კლიმატის ცვლილებების გავლენა აგრო-სატყეო სისტემებზე; 3. ბიომრავალფეროვნება, ბუნების კონსერვაცია და ბუნებრივი რესურსების მართვა; 4. სურსათის წარმოების რეალური ფასი და სასოფლო-ურბანული კავშირები აგრო-სასურსათო სისტემებთან. პროექტის ძირითადი მიზანია აგრარული მეცნიერებების მიმართულებით დარგთაშორის ინტერდისციპლინარული კვლევების გაძლიერება, ასევე, ახალგაზრდა მკვლევარებისთვის უახლეს მიღწევებზე დამყარებული ცოდნის მიღების, არსებული ცოდნის გაფართოების, ახალი იდეების ან პროცესების განვითარების, ინოვაციური კვლევის დაგეგმვისა და განხორციელების ხელშეწყობა. #სოფლისმეურნეობა2018
#

საქართველოში ზეთისხილის გაშენების შესაძლებლობის განხილვა

გარემოს დაცვისა და სოფლის მეურნეობის მინისტრის მოადგილე იური ნოზაძე კომპანია „ჯეოლაივის“ დამფუძნებლებს გიორგი სვანიძეს, აჰმედ ქაჰრამანსა და ალი სამი ოზელს შეხვდა.„ჯეოლაივი“ ქართული ზეთისხილის პირველი გადამმუშავებელი საწარმოა, რომელიც ჰოლანდიურ–თურქული ინვესტიციითა და „სოფლის მეურნეობის პროდუქციის გადამმუშავებელი საწარმოების თანადაფინანსების“ პროექტით, სიღნაღის რაიონ სოფელ საქობოში აშენდა.გამართულ შეხვედრაზე მინისტრის მოადგილემ მადლობა გადაუხადა ინვესტორებს თანამშრომლობისთვის და აღნიშნა, რომ ქართული ზეთისხილის პირველი გადამმუშავებელი საწარმო უმაღლესი ხარისხის, კონკურენტუნარიან პროდუქციას აწარმოებს, რომელიც პოპულარობით სარგებლობს როგორც ადგილობრივ, ასევე უცხოურ ბაზრებზე.შეხვედრის მონაწილეებმა სოფლის მეურნეობის პროექტების მართვის სააგენტოს პროექტის „დანერგე მომავალი“ ფარგლებში ზეთისხილის კულტურის საქართველოს სხვა რეგიონებში გაშენების შესაძლებლობაც განიხილეს.საუბარი ასევე შეეხო ისეთი რენტაბელური და პერსპექტიული კულტურის გაშენებას, როგორიცაა ბუნებრივი დაბალკალორიული დამატკბობელი, სტევია. თურქმა სტუმრებმა ყურადღება სტევიას კულტივირებისთვის საქართველოში არსებულ ხელშემწყობ კლიმატურ პირობებზე გაამახვილეს.შეხვედრის დასრულების შემდეგ, „ჯეოლაივის“ წარმომადგენლებმა, გარემოს დაცვისა და სოფლის მეურნეობის სამინისტროს დეკორატიული ზეთისხილის ხე გადასცეს საჩუქრად.
#

სოფლის განვითარების სტრატეგიის 6 თვის ანგარიშის განხილვა

საქართველოს სოფლის განვითარების უწყებათაშორისი საკოორდინაციო საბჭოს სხდომაზე საქართველოს სოფლის განვითარების სტრატეგიისა (2017-2020 წლები) და სამოქმედო გეგმის (2018-2020 წლები) 2018 წლის 6 თვის ანგარიში განიხილეს. სხდომაზე სიტყვით გამოსვლისას, გარემოს დაცვისა და სოფლის მეურნეობის მინისტრის პირველმა მოადგილემ, ნოდარ კერესელიძემ სოფლის განვითარების მნიშვნელობაზე ისაუბრა და ევროკავშირს და სხვა დონორ ორგანიზაციებს ფინანსური მხარდაჭერისთვის მადლობა გადაუხადა.როგორც მინისტრის პირველმა მოადგილემ აღნიშნა, 2020 წლამდე გაწერილი სამოქმედო გეგმის ეფექტიანი შესრულებისთვის, უწყებებს შორის მჭიდრო თანამშრომლობა მნიშვნელოვანი ფაქტორია. სხდომაზე უწყებათაშორისო საკოორდინაციო საბჭოს წევრებმა საკუთარი უწყებების მიერ სამოქმედო გეგმის შესრულების ანგარიში წარმოადგინეს. განხილულ იქნა ადგილობრივი განვითარების ჯგუფებთან შეხვედრების შედეგად მიღებული რეკომენდაციებიც.აღსანიშნავია, რომ სოფლის განვითარების უწყებათაშორისი საკოორდინაციო საბჭოს შემადგენლობაში, გარემოს დაცვისა და სოფლის მეურნეობის სამინისტროსთან ერთად, წარმოდგენილი არიან: ეკონომიკის და მდგრადი განვითარების სამინისტრო, რეგიონული განვითარების და ინფრასტრუქტურის სამინისტრო, იუსტიციის სამინისტრო, განათლების, მეცნიერების, კულტურის და სპორტის სამინისტრო და ოკუპირებულ ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო.
#

ციტრუსის მოსავლის დაზღვევის ბოლო ვადა 5 ნოემბრამდე განისაზღვრა

გარემოს დაცვისა და სოფლის მეურნეობის სამინისტრო, აგროდაზღვევის პროექტის ფარგლებში, ფერმერებს საშუალებას აძლევს ციტრუსი საშემოდგომო ყინვის რისკისგანაც დააზღვიონ. სადაზღვევო პოლისის თანამონაწილეობა სახელმწიფოს მხრიდან 70%-ს შეადგენს.  პროექტში ჩართვის შემთხვევაში, ციტრუსის ბაღების მქონე  ფერმერებისთვის სადაზღვევო პოლისი დაფარავს შემდეგ სადაზღვევო  რისკებს: სეტყვა, წყალდიდობა, ქარიშხალი და საშემოდგომო ყინვა.ფერმერების ინტერსების გათვალისწინებით, ციტრუსის დაზღვევას სახელმწიფო პროექტში ჩართული კერძო სადაზღვევო კომპანიები მიმდინარე წლის 5 ნოემბრამდე მოახდენენ.აგროდაზღვევის პროექტში მონაწილეობა შეუძლია მიიღოს ფიზიკურ ან იურიდიულ პირს, რომელსაც საკუთრებაში, სარგებლობაში ან ფაქტობრივ მფლობელობაში გააჩნია არაუმეტეს  5 ჰა ფართობის ჩათვლით სასოფლო-სამეურნეო დანიშნულების მიწის ნაკვეთი. მნიშვნელოვანია აღინიშნოს, რომ პროექტში შესული ცვლილებების თანახმად, სახელმწიფო აგროდაზღვევით სარგებლობა შეუძლია მხოლოდ იმ ფერმერს, რომელსაც მიწის ნაკვეთი დარეგისტრირებული აქვს.2018 წლის სექტემბრის მონაცემებით, საქართველოს მასშტაბით, აგროდაზღვევის პროექტის ფარგლებში, გაცემულია  12,170 პოლისი; პროექტში ჩართულია  7,460 ბენეფიციარი; სახელმწიფოს მხრიდან სადაზღვევო პრემიის სუბსიდიის თანხამ  4,395,237 ლარი შეადგინა. დაზღვეულია  11,432 ჰა ფართობი მიწის ნაკვეთი, ხოლო მოსავლის ღირებულება, ჯამში,  84,929,988 ლარია.