ახალი ამბები
ევროკავშირთან დაახლოების პროცესში სოფლის მეურნეობისა და სოფლის განვითარების მიმართულებით რეფორმები და მიღწეული შედეგები განიხილეს სამხრეთ-აღმოსავლეთ ევროპის (SEE) ყოველწლიურ სამუშაო შეხვედრაზე
საქართველოს მიეცა უნიკალური შესაძლებლობა, ევროკავშირის წევრი ქვეყნების და კანდიდატი ქვეყნების სოფლის მეურნეობის მინისტრებთან ერთად, ევროკავშირთან დაახლოების პროცესში სოფლის მეურნეობისა და სოფლის განვითარების მიმართულებით განხორციელებული რეფორმები და მიღწეული შედეგები სამხრეთ-აღმოსავლეთ ევროპის (SEE) სოფლის მეურნეობის მინისტრების მე-17 ყოველწლიურ სამუშაო შეხვედრაზე განეხილა.
სამხრეთ-აღმოსავლეთ ევროპის (SEE) სოფლის მეურნეობის მინისტრების მე-17 ყოველწლიური სამუშაო შეხვედრა, მიმდინარე წლის 6-8 ნოემბერს, ბოსნია-ჰერცეგოვინის, ქალაქ იაჰორინაში, ჩატარდა, რომელშიც მონაწილეობა საქართველოს გარემოს დაცვისა და სოფლის მეურნეობის მინისტრის პირველმა მოადგილემ ნინო თანდილაშვილმა მიიღო.
მინისტერიალი ბოსნია-ჰერცეგოვინის საგარეო ვაჭრობისა და ეკონომიკური ურთიერთობათა სამინისტროსა და სამხრეთ-აღმოსავლეთ ევროპაში სოფლის განვითარების რეგიონული მუდმივმოქმედი სამუშაო ჯგუფის ეგიდით გაიმართა.
„ჩვენ ვაგრძელებთ წინსვლას ევროკავშირში გაწევრიანების გზაზე. ჩვენი მიღწევები, მათ შორის ევროკავშირთან ასოცირების შეთანხმება, თავისუფალი ვაჭრობის შეთანხმება ევროკავშირთან, უვიზო მიმოსვლის რეჟიმი და 2022 წლის ივნისში აღიარებული ევროპული პერსპექტივა ადასტურებს ჩვენს გეოპოლიტიკურ პრიორიტეტს, გავხდეთ ევროკავშირის წევრი სახელმწიფო. პროგრესი, რომელსაც ჩვენ მივაღწიეთ, განსაკუთრებით სოფლის მეურნეობისა და სოფლის განვითარების, გარემოს დაცვისა და კლიმატის ცვლილების სფეროებში, გამორჩეულია. ჩვენი მიღწეული შედეგები ნათლად გამოიკვეთა ევროკომისიის ანალიტიკურ ანგარიშში საქართველოს ევროკავშირის კანონმდებლობასთან შესაბამისობის შესახებ. აღსანიშნავია, რომ ჩვენ ვმუშაობთ ევროკავშირის სოფლის მეურნეობის საერთო პოლიტიკის (CAP) პრინციპებთან შესაბამისობისკენ. ჩვენ ოპტიმისტურად ვართ განწყობილი, რომ ევროკომისიის მიერ საქართველოს პროგრესის მოსალოდნელი შეფასება ამ წლის ბოლოს გზას გაუხსნის კანდიდატის სტატუსზე დადებითი გადაწყვეტილების მიღებას“, - აღნიშნა ნინო თანდილაშვილმა.
აღსანიშნავია, რომ 2015 წლიდან სურსათის უვნებლობის, ვეტერინარიის და მცენარეთა დაცვის მიმართულებით ასოცირების შეთანხმების შესაბამისად, საქართველოს კანონმდებლობა დაუახლოვდა ევროკავშირის 130-ზე მეტ სამართლებრივ აქტს. გაუმჯობესდა ევროკავშირის სტანდარტების შესაბამისად ადგილობრივად წარმოებული პროდუქციის ხარისხი, რამაც ხელი შეუწყო სასოფლო-სამეურნეო პროდუქციის ექსპორტს ევროკავშირის ქვეყნებში.