ძებნა

ახალი ამბები

#

ლევან დავითაშვილი: „მსოფლიოს წამყვანი ენტომოლოგები გვეუბნებიან, რომ საქართველო ფაროსანას პრობლემის მოგვარებას 2-3 წელიწადში მოახერხებს“

ფაროსანას წინააღმდეგ ბრძოლის ღონისძიებები საერთაშორისო ექსპერტების მიერ შეფასებულია, როგორც საუკეთესო. მსოფლიოს წამყვანი ენტომოლოგები გვეუბნებიან, რომ საქართველო ფაროსანას პრობლემის მოგვარებას 2-3 წელიწადში მოახერხებს. ეს არის საკმაოდ დიდი იმედის მომცემი. შემდეგ წლებშიც მოგვიწევს ღონისძიებების გაგრძელება და დაფინანსება.ფაროსანა სოფლის მეურნეობაში ერთ-ერთი მთავარი, მაგრამ მოკლევადიანი გამოწვევაა. ფაროსანა უკვე კონტროლშია მოქცეული. ეს არის პირდაპირ დაკავშირებული იმ ცოდნასთან და გამოცდილებასთან, რომელიც ჩვენ შარშან დაგვიგროვდა. წელს მნიშვნელოვნად გაუმჯობესებული იყო ჩვენი ღონისძიებები, მეტი თანხებით და რესურსით, ჩვენ მოვახდინეთ მავნებლის გეოგრაფიული ლოკალიზება.ინვაზიური მავნებლის წინააღმდეგ ბრძოლის ღონისძიებები არ გულისხმობს ინდივიდუალური ფერმერებისთვის ნაკვეთების დამუშავებას. ღონისძიებების მიზანია მავნებლის პოპულაციის ისეთ დონემდე შემცირება, რომ ადამიანმა, რომელიც მოინდომებს და გაითვალისწინებს ჩვენ რჩევებს, გარანტირებულად მიიღოს მოსავალი.
#

პროექტი-სამთო ტურიზმი და ორგანული სოფლის მეურნეობის განვითარება

მთის საერთაშორისო დღეს, საქართველოს ეთნოგრაფიულ მუზეუმში, ევროკავშირის, შვედეთისა და ავსტრიის წარმომადგენლებმა ხელი მოაწერეს ხელშეკრულებას ევროპული პროექტის “მწვანე ეკონომიკა: მდგრადი მთის ტურიზმი და ორგანული სოფლის მეურნეობა (GRETA)“ დასაწყებად, რომელიც საქართველოში სამთო ტურიზმისა და ორგანული სოფლის მეურნეობის განვითარებას ისახავს მიზნად. ერთობლივი პროექტი 4 წლიანია, 2019 წელს დაიწყება და ზემო სვანეთის, რაჭა - ლეჩხუმის, ქვემო სვანეთისა და იმერეთის განვითარებას შეუწყობს ხელს. სამთო ტურიზმის განვითარების ხელშეწყობის მიზნით პროექტი ითვალისწინებს ადგილობრივი მიმწოდებლებისთვის ტურისტული სერვისების მიწოდების ეროვნული ხარისხის სტანდარტებისა და კონტროლის სისტემის ჩამოყალიბებას. შემუშავებული სტანდარტების საფუძველზე სასტუმროებისა და სამთო/სამოგზაურო გიდების სერტიფიცირებას. ორგანული სოფლის მეურნეობის განვითარების ფარგლებში პროქტი ითვალისწინებს საქართველოს ორგანული სოფლის მეურნეობის კანონმდებლობის ჰარმონიზებას ევროკავშირის ორგანულ სოფლის მეურნეობის კანონმდებლობასთან, შიდა კონტროლის სისტემის ჩამოყალიბებას, ორგანული სოფლის მეურნეობით დაკავებული ან დაინტერესებული ფერმერული კოოპერატივების გაძლიერებას. შეთანხმება ხელს შეუწყობს ევროკავშირის და საქართველოს მჭიდრო თანამშრომლობას ისეთ სფეროებში, როგორიცაა ბიზნესისთვის სამართლებრივი გარემოს გაუმჯობესება, დამატებითი შემოსავლის შექმნის შესაძლებლობა და ინოვაციური ბიზნეს მოდელების შემუშავება. პროექტის შემუშავება მოხდა გარემოს დაცვისა და სოფლის მეურნეობის სამინისტროს, ეკონომიკის და მდგრადი განვითარების სამინისტროსა და საქართველოს ტურიზმის ეროვნულ ადმინისტრაციასთან მჭიდრო თანამშრომლობის ფარგლებში.
#

პროექტი-„ტყის მდგრადი მართვა სოფლის განვითარებისათვის“

გარემოს დაცვისა და სოფლის მეურნეობის მინისტრის მოადგილემ, იური ნოზაძემ, სატყეო სექტორში არსებულ სახელმწიფო ხედვაზე და პროექტის „ტყის მდგრადი მართვა სოფლის განვითარებისათვის“ მნიშვნელობაზე ისაუბრა. „ტყის მდგრადი მართვა სოფლის განვითარებისათვის“ ერთ-ერთი უმნიშვნელოვანესი პროექტია, რომლის მიზანიც ტყის მდგრადი მართვის პრინციპების დანერგვით კლიმატის ცვლილების მიმართ გამძლე სოფლის განვითარების ხელშეწყობაა; ტყის მართვის გაუმჯობესებით, ასევე, მდგრადი ენერგეტიკული გადაწყვეტილებების მიღებით, განათლებისა და ცნობიერების ამაღლებით, სოფლად შემოსავლის წყაროების დივერსიფიკაცია და ეკოლოგიური რისკების შემცირება უნდა მოხდეს. პროექტს, გარემოს დაცვისა და სოფლის მეურნეობის სამინისტროსთან თანამშრომლობით, კავკასიის გარემოსდაცვითი არასამთავრობო ორგანიზაციების ქსელი CENN, ავსტრიის განვითარების სააგენტოს (ADC) ფინანსური მხარდაჭერით ახორციელებს. შეხვედრას ეკონომიკისა და მდგრადი განვითარების მინისტრის მოადგილე ნათია თურნავა, ავსტრიის ელჩი საქართველოში არად ბენკო; სამხრეთ კავკასიის ოფისის ხელმძღვანელი გერჰარდ შაუმბერგერი, ავსტრიის განვითარების სააგენტოს წარმომადგენლები და პარლამენტის გარემოს დაცვის კომიტეტის წევრები ესწრებოდნენ
#

2018 წლის ანგარიშის წარდგენა

საქართველოს გარემოს დაცვისა და სოფლის მეურნეობის მინისტრმა, ლევან დავითაშვილმა, მოადგილეებთან და სამინისტროს დეპარტამენტებისა და სამინისტროს სისტემაში შემავალი უწყებების ხელმძღვანელებთან ერთად, სოფლის მეურნეობის განვითარების სტრატეგიის სამოქმედო გეგმით და საქართველოს გარემოს დაცვის მოქმედებათა მესამე ეროვნული პროგრამით 2018 წელს გათვალისწინებული სამუშაოების შესრულების ანგარიში განიხილა. შეხვედრაზე მონაწილეებმა შესრულებული სამუშაოს მნიშვნელობაზე, არსებული ხარვეზების გამოსწორების ეფექტიან მექანიზმებზე და სამომავლო გეგმებზე იმსჯელეს. სამდღიანი სამუშაო შეხვედრა გაეროს სურსათისა და სოფლის მეურნეობის ორგანიზაციის (FAO) ფინანსური მხარდაჭერით გაიმართა.
#

ლევან დავითაშვილი როს ვილსონს შეხვდა.

გარემოსა დაცვისა და სოფლის მეურნეობის მინისტრი ლევან დავითაშვილი ამერიკის შეერთებული შტატების საგანგებო და სრულუფლებიან ელჩს საქართველოში როს ვილსონს, ორგანიზაციის „Land O’Lakes International Development’’ (Land O’Lakes) და აშშ-ის სოფლის მეურნეობის დეპარტამენტის (USDA) წარმომადგენლებს შეხვდა.შეხვედრაზე მხარეებმა საქართველოში მესაქონლეობის განვითარების ხელშეწყობის ახალი პროექტის „Food for Progress“ დაწყების საკითხებზე იმსჯელეს და პროექტის მნიშვნელობა შეაფასეს. აშშ-ის სოფლის მეურნეობის დეპარტამენტი (USDA) ახალ პროექტს საქართველოში ორგანიზაციის „Land O’Lakes International Development“ (Land O’Lakes) დახმარებით განახორციელებს. პროექტის ხანგრძლივობა 5 წელია, რომლის ბიუჯეტსაც 17 მლნ აშშ დოლარი შეადგენს.შეხვედრაზე მინისტრმა ისაუბრა აგრარულ დარგში მიღწეული წარმატებებისა და სამომავლო გეგმების შესახებ. ყურადღება მესაქონლეობის სექტორის განვითარების მნიშვნელობაზე გაამახვილა და ელჩს მადლობა გადაუხადა წლების განმავლობაში გაწეული მხარდაჭერისა და დახმარებისთვის.„დღეს მოხდა ახალი პროექტის „Food for Progress“ ინიცირება, რაც გულისხმობს საქართველოში სოფლის მეურნეობის სექტორის განვითარების ხელშეწყობას. აღნიშნული პროექტის განხორციელებაში ჩართული იქნებიან ორგანიზაცია „Land O’Lakes International Development’’ (Land O’Lakes), რომელიც ამერიკის შეერთებულ შტატებში მესაქონლეობის და მერძევეობის სექტორში წამყვან ორგანიზაციას წარმოადგენს, ასევე მიჩიგანის სახელმწიფო უნივერსიტეტი. ჩვენ მხარს ვუჭერთ საქართველოს განვითარებას“, - განაცხადა როს ვილსონმა.ახალი პროექტი ითვალისწინებს მესაქონლეობისა და მერძევეობის დარგის განვითარების მხარდაჭერას პროდუქტიულობის გაზრდის, ხარისხის გაუმჯობესებისა და ფერმის მართვის საუკეთესო პრაქტიკის დანერგვის, ასევე სასოფლო-სამეურნეო ექსტენციის მოდელების შემუშავების ხელშეწყობის გზით. მესაქონლეობის დარგში კონკურენტული უპირატესობის მიღწევისთვის, პროექტის ფარგლებში განხორციელდება ინოვაციების დანერგვის, მომსახურებაზე ორიენტირებული მარკეტინგის განვითარებისა და აღნიშნულ პროცესში საჯარო და კერძო სექტორის წარმომადგენლების უშუალო ჩართულობის მხარდაჭერა.პროექტის ბენეფიციარები იქნებიან საშუალო და მსხვილი ფერმერები და მეწარმეები მთელი ქვეყნის მასშტაბით.პროექტი განხორციელდება გარემოს დაცვისა და სოფლის მეურნეობის სამინისტროს, სურსათის ეროვნულ სააგენტოს, საქართველოს ინოვაციებისა და ტექნოლოგიების სააგენტოს, საქართველოს ფერმერთა ასოციაციის, აგრეთვე სხვადასხვა კერძო სექტორისა და არასამთავრობო ორგანიზაციების ჩართულობით.    
#

ENPARD - სამეთვალყურეო საბჭოს და მუდმივმოქმედი კომიტეტის შეხვედრა

გარემოს დაცვისა და სოფლის მეურნეობის მინისტრის პირველი მოადგილე ნოდარ კერესელიძე ევროპის სამეზობლო პროგრამის სოფლის მეურნეობისა და სოფლის განვითარებისათვის (ENPARD) სამეთვალყურეო საბჭოს და მუდმივმოქმედი კომიტეტის მორიგ შეხვედრას დაესწრო. მინისტრის პირველმა მოადგილემ შეხვედრის მონაწილეებს სოფლის მეურნეობის განვითარების სტრატეგიის, ასევე, სოფლად განვითარების სტრატეგიის და შესაბამისი სამოქმედო გეგმების შესრულების შესახებ მიაწოდა ინფორმაცია. ნოდარ კერესელიძემ სამინისტროს სისტემაში შემავალი უწყებების - სასოფლო-სამეურნეო კოოპერატივების განვითარების სააგენტოს და სოფლის მეურნეობის პროექტების მართვის სააგენტოს გაერთიანების და ექსტენციის სისტემის მოდიფიკაციის შესახებ ისაუბრა. ყურადღება გამახვილდა მერძევეობის და მეღვინეობის სექტორში კოოპერაციული მეურნეობების განვითარების საკითხებსა და სასოფლო-სამეურნეო პროდუქტების ექსპორტის შესაძლებლობებზე. ENPARD მუდმივმოქმედი კომიტეტის შეხვედრის ფარგლებში, საუბარი შეეხო ადგილობრივი განვითარების ჯგუფების (LAG) მიღწევებს და გამოწვევებს. აღინიშნა, რომ წლის ბოლომდე, საქართველოს მასშტაბით, დაგეგმილია რამდენიმე ახალი ადგილობრივი განვითარების ჯგუფის (LAG) შექმნა. შეხვედრა გარემოს დაცვისა და სოფლის მეურნეობის სამინისტროს და გაეროს სურსათისა და სოფლის მეურნეობის ორგანიზაციის (FAO) ორგანიზებით გაიმართა. შეხვედრას ევროკავშირის საქართველოს წარმომადგენლობის ატაშე სოფლის მეურნეობის და სურსათის უსაფრთხოების დარგში კრისტინა კასელა, ასევე, გაეროს სურსათის და სოფლის მეურნეობის ორგანიზაციის (FAO) და გაეროს განვითარების პროგრამის (UNDP) წარმომადგენლები ესწრებოდნენ. აღსანიშნავია, რომ ევროკავშირი მხარს უჭერს სოფლის მეურნეობასა და სოფლის განვითარებას საქართველოში ENPARD-ის პროგრამის დახმარებით. პროგრამა ხორციელდება 2013 წლიდან და მისი მთლიანი ბიუჯეტი 179.5 მილიონ ევროს (2013-2022) შეადგენს. ENPARD-ის ძირითადი მიზანი საქართველოში სოფლად სიღარიბის დაძლევაა
#

შეხვედრა რადიოაქტიური ნარჩენების მართვაზე

გარემოს დაცვისა და სოფლის მეურნეობის მინისტრის პირველმა მოადგილემ, ნოდარ კერესელიძემ სამუშაო შეხვედრა „რადიაციული ნარჩენების და ბირთვული საწვავის უსაფრთხო მართვის შესახებ“ მისასალმებელი სიტყვით გახსნა. მინისტრის პირველმა მოადგილემ ვრცლად ისაუბრა ქვეყნისთვის რადიოაქტიური ნარჩენების მართვის კუთხით თანამედროვე პრაქტიკის გაზიარების აუცილებლობაზე. შეხვედრა ატომური ენერგიის საერთაშორისო სააგენტოს (IAEA) და გარემოს დაცვისა და სოფლის მეურნეობის სამინისტროს სსიპ ბირთვული და რადიაციული სააგენტოს მიერ იყო ორგანიზებული და მასში მონაწილეობას საერთაშორისო ექსპერტები იღებდნენ.