ძებნა

ახალი ამბები

#

გარემოს დაცვისა და სოფლის მეურნეობის სამინისტროში სატყეო სექტორის განვითარებაზე იმსჯელეს

გარემოს დაცვისა და სოფლის მეურნეობის მინისტრის მოადგილეები იური ნოზაძე და ხატია წილოსანი მსოფლიო ბანკის მისიის წარმომადგენლებს შეხვდნენ.მისიას მსოფლიო ბანკის ევრაზიის რეგიონის გარემოს დაცვისა და ბუნებრივი რესურსების განყოფილების უფროსი ქსენია ლვოვსკი ხელმძღვანელობდა.შეხვედრაზე მხარეებმა საქართველოში სატყეო სექტორის განვითარების მხარდაჭერის შესაძლებლობები განიხილეს.იური ნოზაძემ მადლობა გადაუხადა მისიას წლების განმავლობაში გაწეული ფინანსური მხარდაჭერისთვის და სატყეო სექტორის განვითარების მიმართულებით  თანამშრომლობის სურვილი გამოთქვა.ხატია წილოსანის განცხადებით, ქვეყნისთვის ბიომრავალფეროვნების კონსერვაცია, აღდგენა და მდგრადი განვითარება  ქვეყნის ერთ-ერთ პრიორიტეტულ მიმართულებას წარმოადგენს და ყურადღება ტყის კოდექსის ფარგლებში სატყეო სექტორის განვითარების მნიშვნელობის საკითხებზე გაამახვილა. როგორც ქსენია ლვოვსკიმ აღნიშნა, საქართველოსთან თანამშრომლობა ყოველთვის სასიამოვნო და პროექტის მიზნების შესაბამისია, რაც რეგიონში განხორციელებული პროექტების შედეგებით დასტურდება.გარემოს დაცვისა და სოფლის მეურნეობის სამინისტროში გამართულ შეხვედრას შესაბამისი სამსახურის ხელმძღვანელი პირები ესწრებოდნენ.  
#

გარემოს დაცვისა და სოფლის მეურნეობის მინისტრმა, ლევან დავითაშვილმა საქართველოს თხილის მწარმოებელთა ასოციაციის (GHGA-ის) მე-3 კონფერენციაზე თხილის სექტორში არსებულ გამოწვევებზე და მათი გადაჭრის გზებზე ისაუბრა

„თხილის დაცვის პროგრამაში“ ტრენერების მომზადება ერთ-ერთი პირველი კომპონენტია. ჩვენ გადავამზადებთ სპეციალისტებს, აქტიურ ფერმერებს, რომლებიც ექსპერტებისგან შეძენილ ცოდნას გაუზიარებენ ახლობლებს, მეზობლებს, თანასოფლელებს და, შესაბამისად, გაერთიანებული ძალისხმევით, ჩვენ მეტი ადამიანის მობილიზებას შევძლებთ. ბოლო რამდენიმე წლის განმავლობაში, აზიურმა ფაროსანამ და სხვადასხვა დაავადებამ დაგვაზარალა. ჩვენ არ გვაქვს ილუზია, რომ ყველა ადამიანს აქვს რესურსებზე წვდომა; ამიტომ, განვადების კომპონენტი იქნება ძალიან მნიშვნელოვანი. იმ შემთხვევაში, თუ ფერმერებს ექნებათ სურვილი, შეძლებენ წინასწარ აიღონ ის ქიმიკატები და მცენარეთა დაცვის საშუალებები, რომლებიც აუცილებლად გამოსაყენებელია.  ჩვენ ვსაუბრობდით, რომ დაზღვევის კომპონენტი გამოვიყენოთ და ამაზე დეტალური პრეზენტაცია გვექნება, თუ რა ტიპის დაცვის ღონისძიებას შესთავაზებს ფერმერებს სხვადასხვა სადაზღვეო კომპანია იმისათვის, რომ დამატებითი სტიმული და მოტივაცია იყოს მათი მხრიდან პროგრამაში ჩართვის კუთხით.  იცით, რომ ჩვენი მხრიდან თანადაფინანსების კომპონენტი იქნება, ანუ აქაც ჩვენ სადაზღვევო პრემიის დიდ ნაწილს ვაფინანსებთ.  თუ იქნება გარკვეული დამატებითი კომპონენტები, რომელზეც სადაზღვეო კომპანია მზად არის, რომ ფერმერს შესთავაზოს, ჩვენ გარდა იმ ოთხი რისკისა, რომელსაც სტანდარტულად აგროდაზღვევის პროგრამაში ვაფინანსებთ, მზად ვართ, რომ გადავხედოთ თანადაფინანსების კომპონენტებს და წარვდგეთ მთავრობასთან ინიციატივით, რომ დამატებით სადაზღვეო დახმარება შევთავაზოთ ფერმერებს.  ამის შემდეგ, ძალიან მნიშვნელოვანია, რომ მოსავლის სწორ დროს აღება მოხდეს. ასოციაციას აქვს პროგრამა, რომელიც ფერმერებს აძლევს ინფორმაციას, სად და როდის, როგორ უნდა მოხდეს გაშრობა, დასაწყობება. შემნახველი მეურნეობების განვითარება ასევე ჩვენი ერთობლივი პროგრამის ნაწილია, სადაც კომპანია „ფერერო“ ინტენსიურად არის ჩართული და მინდა მათ მადლობა გადავუხადო. ისინი, როგორც იცით, დამატებით, საგრანტო თანადაფინანსებით, ფერმერებს საშუალებას აძლევენ შემნახველი, საშრობი ცენტრები შეიქმნას. კომბინირებაში სახელმწიფო გრანტები, პლუს „ფერეროს“ დაფინანსება, ფერმერებს შესაძლებლობას აძლევს, რომ მათ თავიანთი შემნახველი მეურნეობები შექმნან.  პროგრამაში იქნებიან ჩართული მსხვილი კონსოლიდატორები და ექსპორტიორი კომპანიები, გადამმუშავებელი ინდუსტრია, ის ინდუსტრია, რომელიც, რეალურად, წამყვანია ამ დარგში, რომ მათ გარანტირებულად მაღალი ხარისხის მოსავალი საინტერესო ფასში შეიძინონ, რათა ფერმერის  გარჯასა და ძალისხმევას ფასი ჰქონდეს. სახელმწიფოს თანადაფინანსებით და მხარდაჭერის გარეშე ჩვენ არც ერთ კომპონენტს არ ვტოვებთ, ცოდნის გადაცემის გარდა ჩვენ კონკრეტული ფინანსური ინსტრუმენტები გვაქვს, მაგრამ გარკვეული მობილიზება ფერმერებმაც უნდა მოახერხონ, ეს შეიძლება აგროკრედიტის ან აგროლიზინგის სახით იყოს.  ჩვენ გვქონდა გარკვეული პრობლემები თხილის კულტურის სხვადასხვა ელემეტის დაფინანსებასთან დაკავშირებით. იცით, რომ პროგრამით „დანერგე მომავალი“  ახალი ბაღების  განაშენიანებას ვაფინანსებთ, მაგრამ ასევე გვაქვს მოდერნიზაციის პროგრამა, რომელიც ფერმერს აძლევს  ყველა ტექნიკური საშუალებას. მით უმეტეს, რომ დღეს ტექნიკის გარეშე წარმოუდგენელია რაიმე ტიპის კულტურის წარმოება.  2019 წელს ვიწყებთ ახალ პროგრამას, ძალიან მალე იქნება მთავრობის დადგენილება, რომლის  მეშვეობითაც ჩვენ ყველა ტიპის მექანიზაციაზე 50 % - იანი საგრანტო დაფინანსება გვექნება ყველა იმ ადამიანისათვის,  ვისაც სურს ტრაქტორის ან ნებისმიერი იმპლემენტის შეძენა. ეს კეთდება იმისთვის, რომ პლანტაციები იყოს მოდერნიზებული და შესაძლებელი გახდეს მაღალი პროდუქტიულობით წარმოება, როგორც თხილის ასევე სხვა კულტურების“, - განაცხადა ლევან დავითაშვილმა.
#

„ვფიქრობ, „თხილის დაცვის პროგრამაში“ წარმოდგენილია ყველა ის კომპონენტი, რომელიც საჭიროა იმისთვის, რომ ჩვენ მივიღოთ მაღალი ხარისხის მოსავალი - განაცხადა გარემოს დაცვისა და სოფლის მეურნეობის მინისტრმა, ლევან დავითაშვილმა საქართველოს თხილის მწარმოებელთა ასოციაციის (GHGA-ის) მე-3 კონფერენციაზე

„ეს არის თანამშრომლობა სახელმწიფოსა და კერძო სექტორს შორის. ჩვენ მრავალი ათასი ფერმერი უნდა ჩავრთოთ ამ პროგრამაში. საბოლოოდ, ეს მოგვცემს საშუალებას, რომ თხილი, რომელიც მნიშვნელოვანი საექსპორტო კულტურა იყო და შემოსავლის დიდი წყარო ამ რეგიონისთვის, დაიბრუნოს თავისი პოზიცია.  თხილი არის მსოფლიოში მზარდი მოთხოვნის კულტურა, საქართველოს, კლიმატური პირობებიდან გამომდინარე, გააჩნია ამ კულტურის წარმოების კარგი პოტენციალი. ჩვენ, დღეს, დაახლოებით 40,000 ჰა_ზე მეტი თხილის პლანტაცია გვაქვს. შესაბამისად, თუ გვექნება მაღალი პროდუქტიულობა, ისეთი, როგორიც თხილის მწარმოებელ სხვა ქვეყნებს გააჩნიათ, ეს იქნება შემოსავლის დიდი წყარო ქვეყნისათვის და რეგიონისთვის.  აქედან გამომდინარე, ჩვენ გვინდა გავზარდოთ პროდუქტიულობა და პლანტაციების ეფექტიანად გამოყენების შესაძლებლობა. ვფიქრობთ, რომ კიდევ უნდა წავახალისოთ თხილის და, ზოგადად, კაკლოვანი კულტურების წარმოება. ჩვენ მრავალწლიანი კულტურების გაშენების პროგრამაში ინტენსიურად ვუჭერთ მხარს კაკლოვანი კულტურების გაშენებას მთელი საქართველოს მასშტაბით. საბოლოოდ, საქართველო მსოფლიო ბაზარზე, კაკლოვანი კულტურების მიწოდების კუთხით, შეიძლება, მნიშვნელოვანი მოთამაშე გახდეს“, - განაცხადა გარემოს დაცვისა და სოფლის მეურნეობის მინისტრმა.
#

სახელმწიფო თხილის კულტურის დაცვის ღონისძიებებზე დარგის წარმომადგენლებთან ერთად მუშაობს

გარემოს დაცვისა და სოფლის მეურნეობის მინისტრი ლევან დავითაშვილი,  ზუგდიდში, საქართველოს თხილის მწარმოებელთა ასოციაციის (GHGA-ის) მე-3  კონფერენციას დაესწრო. კონფერენციაზე  თხილის სექტორში  არსებულ გამოწვევებსა  და მათი გადაჭრის გზებზე იმსჯელეს.  მინისტრმა  ხაზი გაუსვა მეთხილეობის დარგის განვითარების მნიშვნელობას, დეტალურად ისაუბრა   სახელმწიფოს ხედვასა და    თხილის კულტურის  დაცვის მიზნით დაგეგმილ  ხელშემწყობ ღონისძიებებზე.  „მნიშვნელოვანია, რომ ერთობლივი ძალებით გავუმკლავდეთ არსებულ გამოწვევას. თხილის მწარმოებელ ასოციაციაში შარშან რამდენიმე ასეულ ფერმერთან ერთად გამოვცადეთ პროგრამა, რომელმაც ძალიან კარგი შედეგები მოგვცა. ჩვენ უნდა გავზარდოთ ფერმერთა ჩართულობა. წელს 15 ათასამდე ფერმერის ჩართვასა და მობილიზებას ვცდილობთ თხილის გადარჩენის პროგრამაში. საამისოდ მნიშვნელოვანი საბიუჯეტო სახსრებიც არის გამოყოფილი. პროგრამის არსი მდგომარეობს იმაში, რომ ფერმერებმა ყველა აგროღონისძიება ჩაატარონ იმ რჩევების შესაბამისად, რომლებსაც სამინისტრო და თხილის მწარმოებელთა ასოციაცია ერთობლივად მოამზადებენ. ამ პროცესის ხელშეწყობის მიზნით, სახელმწიფო შეისყიდის და ასოციაციას გადასცემს  2000 ერთეულ მაღალი ეფექტიანობის შესაწამლ აპარატს  და უსაფრთხოების საშუალებებს“, - განაცხადა ლევან დავითაშვილმა.კონფერენციას დაესწრო და მონაწილეებს სიტყვით მიმართა აშშ-ის საერთაშორისო განვითარების სააგენტოს (USAID)  მისიის ხელმძღვანელმა პიტერ ა. ვიბლერმა.გარემოს დაცვისა და სოფლის მეურნეობის სამინისტრო, „თხილის დაცვის პროგრამაზე“  დარგის წარმომადგენლებთან და  საქართველოს თხილის მწარმოებელთა ასოციაციასთან ერთად, რომელიც  8000-მდე წევრს აერთიანებს,   წლის დასაწყისიდან  მუშაობს. პროგრამის ფარგლებში სახელმწიფოს და ასოციაციის მონაწილეობით, შემუშავებულია კომპლექსური ღონისძიებების გეგმა, რომელიც    მეთხილე ფერმერებს საშუალებას მისცემს თხილის დაცვის  და მაღალი ხარისხის მოსავლის მიღების მიზნით, მავნებებლების და სოკოვანი დაავადებების წინააღმდეგ დროულად და ეფექტიანად ჩაატარონ აგროსამუშაოები, რათა თავიდან აიცილონ  თხილის მოსავლის დაზიანება და ეკონომიკური ზარალი. თავის მხრივ, მეთხილეთა ასოციაცია, ასოციაციის წევრებს სთავაზობს  შეღავათებს   მომსახურებაზე:   ნიადაგის გამოკვლევა, თხილის მოვლა-მოყვანისთვის აუცილებელი ტექნიკის გამოყენება, მოსავლის შრობა, სასუქებისა და  პესტიციდების შესაძენად აგროკრედიტებზე ხელმისაწვდომობა.  კონფერენციას ესწრებოდა  პრემიერ-მინისტრის მრჩეველი რეგიონული განვითარების საკითხებში სოზარ სუბარი, რომელმაც  აღნიშნა რომ მეთხილეობის დარგში არსებული პრობლემური საკითხების გადაჭრისთვის, მნიშვნელოვანია ადგილობრივი თვითმმართველობების ჩართულობა.სახელმწიფო რწმუნებულმა სამეგრელო-ზემო სვანეთის მხარეში ალექსანდრე მოწერელიამ ვრცლად ისაუბრა რეგიონში თხილის სექტორში  არსებულ ვითარებაზე და დაგეგმილ ღონისძიებებზე.კონფერენციის მუშაობაში  400-მდე ფერმერი, მსხვილი მწარმოებლები,  ექსპორტიორები, აჭარის ავტონომიური რესპუბლიკის სოფლის მეურნეობის მინისტრი, რეგიონების სახელმწიფო რწმუნებულები, არასამთავრობო, საერთაშორისო და დონორი  ორგანიზაციების წარმომადგენლები მონაწილეობდნენ. 
#

2019 წლის 13 თებერვლიდან, სამუხის ველზე, გადამფრენ ფრინველებზე ნადირობა აკრძალულია

ჩატარებული ყოველთვიური მონიტორინგის შედეგების მიხედვით, ჯეირანის აღდგენის პროექტის განხორციელებას სერიოზულ საფრთხეს უქმნის სამუხის ველზე გადამფრენ ფრინველებზე ნადირობა. სროლის ხმა აფრთხობს ქურციკებს, რაც მათი ქცევის შეცვლას იწვევს - გაშლილი ტერიტორიებიდან ინაცვლებს ტყე-ბუჩქნარიან ადგილებზე თავშესაფრის მოძიების და დამალვის მიზნით. შესაბამისად, ადვილი მოსანადირებელი ხდება მგლებისთვის.  აღნიშნულის გათვალისწინებით, გარემოს დაცვისა და სოფლის მეურნეობის სამინისტრომ, დარგის სპეციალისტებისა და ექსპერტების მოსაზრებებზე დაყრდნობით, მიიღო გადაწყვეტილება სამუხის ველზე გადამფრენ ფრინველებზე ნადირობის დროებით აკრძალვის შესახებ. სამინისტროს გადაწყვეტილებით, სამუხის ველზე გადამფრენ ფრინველებზე ნადირობა 2019 წლის 13 თებერვლიდან აკრძალულია.   საქართველოს გარემოს დაცვისა და სოფლის მეურნეობის სამინისტრო მნიშვნელოვან ღონისძიებებს ატარებს გადაშენებული ან გადაშენების საფრთხის წინაშე მყოფი ცხოველთა სახეობების აღდგენისა და დაცვისა მიზნით. ამგვარ სახეობათა შორისაა ჯეირანიც (ქურციკი), რომლის აღდგენის ღონისძიებები ვაშლოვანის დაცული ტერიტორიების მიმდებარე სამუხის ველზე ხორციელდება.   2013 წლიდან, ბუნების დაცვის მსოფლიო ფონდის (WWF) კავკასიის  წარმომადგენლობის ინიციატივით, გარემოს დაცვისა და სოფლის მეურნეობის სამინისტროსა და სსიპ დაცული ტერიტორიების სააგენტოს აქტიური ჩართულობით, ასევე, აზერბაიჯანის ეკოლოგიისა და ბუნებრივი რესურსების სამინისტროსთან მჭიდრო თანამშრომლობითა და გერმანიის მთავრობის ხელშეწყობით, მიმდინარეობს ქურციკის აღდგენის პროექტი.  დღეისათვის, ჯეირნის 70-ზე მეტი ინდივიდი შემოყვანილია აზერბაიჯანიდან და გაშვებულია საქართველოში, ამ ცხოველის ისტორიული გავრცელების არეალში, ვაშლოვანის დაცული ტერიტორიების მიმდებარე სამუხის ველზე. აღსანიშნავია ის გარემოება, რომ შემოყვანილმა ჯეირნებმა საბინადრო გარემოდ სწორედ სამუხის ველი და არა მოსაზღვრედ მდებარე ვაშლოვანის დაცული ტერიტორია აირჩიეს, რითაც დასტურდება სამუხის ველის განსაკუთრებული მნიშვნელობა ამ სახეობის აღდგენისათვის. 2018 წელს, საქართველოში ქურციკების უკვე მესამე თაობა დაიბადა.
#

ლევან დავითაშვილი იზმირში გამართულ მინისტერიალს დაესწრო

თურქეთის რესპუბლიკის ქალაქ იზმირში, 2019 წლის 7-10 თებერვალს, სოფლის მეურნეობის მინისტრების სამიტი და აგროგამოფენა გაიმართა. მინისტერიალის თემას „სოფლის მეურნეობის მომავალი" წარმოადგენდა. მინისტერიალს მსოფლიოს 14 ქვეყნის სოფლის მეურნეობის სამინისტროს უმაღლესი თანამდებობის პირები ესწრებოდნენ.  მინისტერიალის ფარგლებში, გარემოს დაცვის და სოფლის მეურნეობის მინისტრმა, ლევან დავითაშვილმა სიტყვით მიმართა სამიტის მონაწილეებს და  დარგში არსებულ საჭიროებებზე ისაუბრა. მან ხაზი გაუსვა თანამდეროვე ტექნოლოგიების აქტიური გამოყენების აუცილებლობას, ახალგაზრდების ჩართულობას, კონკურენტუნარიანობის ამაღლებას და პროდუქტიულობის გაზრდას. მინისტრმა ყურადღება საქართველოში სოფლის მეურნეობის დარგში მიმდინარე და დაგეგმილ ძირითად პროგრამებსა და პროექტებზე გაამახვილა. „თანამედროვე მსოფლიოს წინაშე სულ უფრო მზარდია მოთხოვნა ხარისხიანი, უვნებელი და ჯანსაღი სურსათის მიწოდებაზე. ამ მიზნის მისაღწევად, ერთი ქვეყნის ძალისხმევა საკმარისი არ არის; აუცილებელია, მდგრადი განვითარების პრინციპების და გაეროს მდგრადი განვითარების მიზნების შესაბამისად, სახელმწიფოებმა გააერთიანონ ძალისხმევა უკეთესი შედეგების მისაღწევად“, - განაცხადა გარემოს დაცვისა და სოფლის მეურნეობის მინისტრმა. ლევან დავითაშვილმა ხაზგასმით აღნიშნა, რომ საქართველოს პრემიერ-მინისტრის მიერ პრიორიტეტად არის გამოცხადებული მწვანე ეკონომიკის განვითარება, რაც ხელს შეუწყობს გარემოს დაცვის პრინციპების დაცვით, სოფლის მეურნეობის დარგის მდგრად განვითარებას. ვიზიტის ფარგლებში,  ორმხრივი შეხვედრა გაიმართა თურქეთის სოფლის მეურნეობის და ტყის მინისტრთან, დოქ. ბექირ ფაქდემირლისთან. შეხვედრაზე მხარეებმა ქვეყნებს შორის სოფლის მეურნეობის დარგში არსებული თანამშრომლობის ძირითადი მიმართულებები განიხილეს და შეთანხმდნენ, ერთობლივი ძალისხმევით ხელი შეუწყონ სავაჭრო ურთიერთობების გაუმჯობესებას, სოფლის მეურნეობის დარგში გამოცდილების გაზიარებას, სპეციალისტების გაცვლას და სამეცნიერო-კვლევითი მიზნებისთვის ერთობლივი პროექტების განხორციელებას. საქართველოს გარემოს დაცვისა და სოფლის მეურნეობის მინისტრთან, ლევან დავითაშვილთან ერთად, გამართულ შეხვედრას ესწრებოდნენ საქართველოს საგანგებო და სრულუფლებიანი ელჩი თურქეთის რესპუბლიკაში გიორგი ჯანჯღავა, გარემოს დაცვისა და სოფლის მეურნეობის მინისტრის მოადგილე ხატია წილოსანი და სურსათის ეროვნული სააგენტოს უფროსი ზურაბ ჩეკურაშვილი.
#

გარემოს დაცვისა და სოფლის მეურნეობის მინისტრი ლევან დავითაშვილი იტალიის რესპუბლიკის საგანგებო და სრულუფლებიან ელჩს საქართველოში ანტონიო ბარტოლის შეხვდა

შეხვედრაზე მხარეებმა იტალიაში სოფლის მეურნეობის განვითარების საერთაშორისო ფონდის (IFAD) მმართველი საბჭოს შეხვედრის მნიშვნელობისა და ქართული დელეგაციის მონაწილეობის საკითხი განიხილეს.როგორც შეხვედრაზე აღინიშნა, იტალიის რესპუბლიკაში, გარემოს დაცვისა და სოფლის მეურნეობის მინისტრის ვიზიტის ფარგლებში, დაგეგემილია ორმხრივი შეხვედრები, სადაც ყურადღება ქვეყნებს შორის თანამშრომლობის გაღრმავების საკითხებზე გამახვილდება. ანტონიო ბარტოლიმ ხაზი გაუსვა საქართველო-იტალიას შორის სოფლის მეურნეობისა და გარემოს დაცვის სფეროში პოზიტიური თანამშრომლობის მნიშვნელობის საკითხს. ლევან დავითაშვილმა იტალიის ელჩს მადლობა გადაუხადა მხარდაჭერისა და წარმატებული თანამშრომლობისთვის. გარემოს დაცვისა და სოფლის მეურნეობის სამინისტროში გამართულ შეხვედრას მინისტრის მოადგილე ხატია წილოსანი ესწრებოდა.