#

იტალიის მთავრობამ საქართველოს 2 მილიონი ევრო გამოუყო

 ატმოსფერული ჰაერის ხარისხზე დაკვირვების ახალი სადგურების შეძენისა და ქ. თბილისის ბუნებრივი საფრთხეების რისკების დეტალური შესწავლისათვის იტალიის მთავრობამ 2 მილიონი ევრო გამოყო. საქართველოს გარემოს დაცვისა და სოფლის მეურნეობის მინისტრის მოადგილე ნინო თანდილაშვილი სამინისტროს წარმომადგენლებთან ერთად, საქართველოში ვიზიტად მყოფ იტალიელ ექსპერტთა ჯგუფს შეხვდა. ვიზიტის მიზანია იტალიის რესპუბლიკის გარემოს, ხმელეთისა და ზღვის სამინისტროსა და  საქართველოს გარემოსა და ბუნებრივი რესურსების დაცვის სამინისტროს შორის  გაფორმებული მემორანდუმის ფარგლებში, ქართული მხრისთვის გარემოს დაცვის სფეროში ფინანსური დახმარება.  ურთიერთანამშრომლობის ფარგლებში დაგეგმილია ჰაერის ხარისხის მონიტორინგის ახალი სადგურების შეძენა და ატმოსფერული ჰაერის მოდელირებისა დაპროგნოზირების სისტემის დანერგვა იტალიის გამოცდილების გაზიარებით,  ასევე ქ. თბილისის ტერიტორიის ფარგლებში მდინარე მტკვრისა და მისი შენაკადების აუზებში ჰიდროლოგიური და გეოლოგიური კვლევების განხორციელება. აღსანიშნავია, რომ ჰაერის ხარისხის მონიტორინგის ქსელის გაფართოება კვლავ რჩება სამინისტროს ერთ-ერთ ძირითად პრიორიტეტად. მონიტორინგის გაძლიერების ფარგლებში იგეგმება 5 ახალი თანამედროვე, ევროპული სტანდარტებით აღჭურვილი ჰაერის მონიტორინგის სადგურის შეძენა და ინსტალირება, რაც ხელს შეუწყობს გარემოს ეროვნულ სააგენტოს მონიტორინგის ქსელის გაფართოებას, ხოლო მოდელირების საშუალებით შესაძლებელი იქნება სხვადასხვა არეალებში ჰაერის  ხარისხის მდგომარეობის შეფასება. ასევე მოხდება საველე კვლევების საფუძველზე მიღებული ინფორმაციის დამუშავება და საკვლევ ტერიტორიაზე არსებული ჰიდრომეტეოროლოგიური და გეოლოგიური საფრთხეების შეფასება.იტალიელი ექსპერტების ვიზიტი 12 აპრილამდე გაგრძელდება, ვიზიტის ფარგლებში დაგეგმილია უცხოელი ექსპერტებისა და გარემოს ეროვნული სააგენტოს სპეციალისტების ერთობლივი საველე გასვლები, ატმოსფერული ჰაერის მინიტორინგის ავტომატური საგურების დათვალიერება და სამუშაო პროცესის ადგილზე გაცნობა, ჰიდრომეტეოროლოგიური და გეოლოგიური საფრთხეების კუთხით უკიდურესად დაძაბული, მდ. ვერეს და ლეღვთახევის  ხეობების შეფასება.შეხვედრას გარემოს ეროვნული სააგენტოს, ქ. თბილისის მერიის და თბილისის სახელმწიფო უნივერსიტეტის წარმომადგენლები ესწრებოდნენ. 
#

მეთხილე ფერმერებისთვის შესაწამლი აპარატების დარიგება იწყება

გარემოს დაცვისა და სოფლის მეურნეობის სამინისტრომ „თხილის გადარჩენის პროგრამის“ ფარგლებში, თხილის მწარმოებელთა ასოციაციას შესაწამლი აპარატები გადასცა. პირველ ეტაპზე  ასოციაციას 100 შესაწამლი აპარატი გადაეცა. პროგრამის ფარგლებში სულ 2000 აპარატის გადაცემაა დაგეგმილი.თხილის მწარმოებელთა ასოციაციამ, შესაწამლი აპარატების დარიგება, სამეგრელოში დღეიდან  დაიწყო  და გურიასა და იმერეთში გააგრძელებს.   შესაწამლი აპარატების გადაცემას ზუგდიდის მუნიციპალიტეტის სოფელ ნაცატუში გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი და სამეგრელო-ზემო სვანეთის სახელმწიფო რწმუნებული ალექსანდრე მოწერელია დაესწრნენ.  ფერმერებმა მიიღეს ინფორმაცია  აპარატის გამოყენებისა და თხილის შეწამვლის მეთოდების შესახებ. „შესაწამლი აპარატების გადაცემა მნიშვნელოვანია, რადგან ამით დავეხმარებით მეთხილეებს მოსავლიანობის გაზრდაში. თავის მხრივ, ფერმერთა დაინტერესებაც საკმაოდ მაღალია. გასულმა წელმა დადებითი შედეგი მოიტანა, წარმატებული იყო აზიურ ფაროსანასთან ბრძოლა, მაგრამ სამწუხაროდ, ფერმერთა ნაკლები ჩართულობის გამო ვერ მივიღეთ თხილის ის მოსავალი, როგორიც სასურველი იყო. ფერმერთა მოსავალი არის ძალზე აქტუალური და ვფიქრობ, მიმდინარე წელი იქნება გარდამტეხი წელი თხილის წარმოების თვალსაზრისით“, - განაცხადა გიორგი ხანიშვილმა. თხილის მოსავლის გადარჩენის კამპანია გადამწყვეტ ეტაპზე  გადადის და მიზნად ისახავს თხილში გავრცელებულ სოკოვან დაავადებებთან და მავნებლებთან ბრძოლას, ფერმერების ცნობიერების ამაღლებას, რაც ხელს შეუწყობს მაღალი ხარისხის მოსავლის მიღებას. „თხილის დაცვის პროგრამის“ ფარგლებში, სახელმწიფოს და ასოციაციის მონაწილეობით შემუშავებულია კომპლექსური ღონისძიებების გეგმა, რომელიც მეთხილე ფერმერებს საშუალებას მისცემს, მავნებლების და სოკოვანი დაავადებების წინააღმდეგ აგროსამუშაოები დროულად და ეფექტიანად ჩაატარონ, რათა თავიდან აიცილონ თხილის მოსავლის დაზიანება და ეკონომიკური ზარალი. თხილის მწარმოებელთა ასოციაცია ფერმერების უმსხვილესი გაერთიანებაა. ამჟამად „თხილის  გადარჩენის პროგრამაში“ უკვე 15 000-მდე ფერმერია ჩართული. ჯგუფებად დაყოფილ ფერმერებს ჰყავთ საკუთარი ლიდერები, რომლებიც პროცესს ზედამხედველობას გაუწევენ. გარდა აპარატებით უზრუნველყოფისა, თხილის მოსავლის გადარჩენის პროექტის ფარგლებში, ფერმერებს საშუალება აქვთ, შეღავათიანი პირობებით შეიძინონ სასუქი პრეპარატები და პესტიციდები. ასოციაციის აგრონომები ზედამხედველობას გაუწევენ აგროღონისძიებების ხარისხიანად ჩატარებას, რაც მაღალი ხარისხის თხილის მოსავლის მიღების წინაპირობაა.
#

საერთაშორისო კონფერენცია „სოფლის განვითარების პოლიტიკა 2020+ - ევროპული პრაქტიკის დანერგვა საქართველოში“ ფარგლებში, გარემოს დაცვისა და სოფლის მეურნეობის მინისტრმა ლევან დავითაშვილმა „სოფლის განვითარების 2017-2020 წლების სტრატეგია“ შესრულების ანგარიში წარმოადგინა

ლევან დავითაშვილმა აღნიშნა სტრატეგიაში განსაზღვრული სამი პრიორიტეტული მიმართულების -  სოფლად კონკურენტუნარიანობის ზრდის, სოციალური დონის ამაღლების და გარემოს დაცვისა და ბუნებრივი რესურსების მდგრადი განვითარების კომპონენტის შესახებ და საზოგადოებას თითოეული მიმართულებით განხორციელებული პროექტები გააცნო.მინისტრის განცხადებით, შედეგები სამივე მიმართულებით მნიშვნელოვანია, თუმცა, მეტი ფინანსური რესურსია საჭირო მეტად ეფექტიანი შედეგისთვის.მინისტრმა სტრატეგიის შესრულების ნაწილში, დონორი ორგანიზაციების და არასამთავრობო სექტორის მიერ ფინანსური დახმარების მნიშვნელობაზე ისაუბრა და მადლობა გადაუხადა მხარდაჭერისთვის. „ ახალგაზრდა მეწარმე ერთ-ერთი ასეთი დონორული დახმარების პროექტი იყო, რომელიც IFAD-ის მხარდაჭერით და დანიის მთავრობის ფინანსური დახმარებით  განხორციელდა. მნიშვნელოვანია, რომ საგრანტო დაფინანსებით,  სოფლად ეკონომიკური საქმიანობების წახალისების მიზნით   ჩვენ 114 ახალგაზრდა მეწარმე  დავაფინანსეთ. აქვე, მინდა მოგახსენოთ, რომ ახალგაზრდული პოლიტიკის ნაწილი ახალ სტრატეგიულ დოკუმენტში მნიშვნელოვნად იქნება წარმოდგენილი“ - განაცხადა ლევან დავითაშვილმა. მინისტრმა ანგარიშის წარდგენისას ყურადღება მრავალწლიანი კულტურების  გაშენების და სამელიორაციო პროექტების პრიორიტეტულობის საკითხზე გაამახვილა.„ ჩვენ დავიწყეთ  არსებული სარწყავი სისტემების რეაბილიტაცია, რაც ქვეყანაში 60-70-იანი წლების შემდეგ არ მომხდარა. შედეგად, მხოლოდ ბოლო ორი წლის განმავლობაში, დამატებით გასარწყავიანებული  6600 ჰექტარი მივიღეთ.  მოგეხსენებათ,  სულ ცოტა ხნის წინ პრემიერს ჰქონდა მნიშვნელოვანი ახალი პროექტი, წყალსაცავების აშენების მიმართულებით. ყოველ წელს სახელმწიფო მნიშვნელოვან რესურსებს ხარჯავს არსებული ინფრასტრუქტურის რეაბილიტაციის მოწყობის კუთხით.“- განაცხადა მინისტრმა.ლევან დავითაშვილმა შესაბამისი სახელმწიფო უწყებების ჩართულობით, აგროტურიზმის, ტურიზმის და კულტურული მემკვიდრეობის მიმართულებით არსებულ ხელისშემწყობ პროექტებზე ისაუბრა და ყურადღება სასტუმროების შექმნის და სამუზეუმო ინფრასტრუქტურის რეაბილიტაციაზე  მნიშვნელობაზე გაამახვილა.ანგარიშის წარმოდგენისას მინისტრი ასევე შეეხო ქართული ენის გადამზადების პროგრამას, რომლითაც 1150-მა ბენეფიციარმა ისარგებლა. რეგიონებში ინოვაციების განვითარების თემაზე საუბრისას, ლევან დავითაშვილმა ყურადღება ინოვაციების ორი ცენტრის  და  ინოვაციების ჰაბის დაფინანსების საკითხზე გაამახვილა.„განათლება ჩვენი ეკონომიკური განვითარების საფუძველი და ჩვენი მთავარი პრიორიტეტია. ახალი საკანონმდებლო ინიციატივით განათლებას ექნება ძალიან მნიშვნელოვანი დაფინანსება“ - განაცხადა ლევან დავითაშვილმა.ლევან დავითაშვილმა ვრცლად ისაუბრა გარემოს დაცვის პრიორიტეტულობის საკითხზე და ყურადღება ტყის მდგრადი მართვის კუთხით განხორციელებულ რეფორმაზე გაამახვილა.„ქვეყანაში ეკოსისტემის შენარჩუნება არის ძალიან მნიშვნელოვანი პრიორიტეტი, ბუნებრივი რესურსები, რომლებიც ქვეყანას გააჩნია, მდგრადი გამოყენების პირობებში შეიძლება ასრულებდეს მნიშვნელოვან როლს სიღარიბის დაძლევის კუთხით“ - განაცხადა მინისტრმა.საუბარი შეეხო ასევე დაცული ტერიტორიების მნიშვნელობის საკითხს, როგორც მინისტრმა განაცხადა, ქვეყნის  საერთო ფართობის დაახლოებით 10 % დაცული ტერიტორიაა. ლევან დავითაშვილის განცხადებით, არსებობს ამბიციური გეგმა ფართობის ზრდასთან დაკავშირებით, რაშიც ევროკავშირი და საერთაშორისო  თანამეგობრობა სრულ მხარდაჭერას გამოთქვამს. საერთაშორისო კონფერენცია „სოფლის განვითარების პოლიტიკა 2020+  ევროპული პრაქტიკის დანერგვა საქართველოში“ ევროკავშირის (EU) და გაეროს განვითარების პროგრამა (UNDP) მხარდაჭერით გაიმართა.
#

საერთაშორისო კონფერენცია „სოფლის განვითარების პოლიტიკა 2020+ ევროპული პრაქტიკის დანერგვა საქართველოში“ ფარგლებში, დისკუსია გაიმართა.

დისკუსიის მონაწილეები  გარემოს დაცვისა და სოფლის მეურნეობის მინისტრი - ლევან დავითაშვილი, რეგიონული განვითარებისა და ინფრასტრუქტურის მინისტრი მაია ცქიტიშვილი, ეკონომიკისა და მდგრადი განვითარების მინისტრი - გიორგი ქობულია, ავსტრიის მდგრადი განვითარებისა და ტურიზმის ფედერალური სამინისტროს გენერალური დირექტორის მოადგილე - მარკუს ჰოფნერი, უნგრეთის სოფლის მეურნეობის სამინისტროს ყოფილი მთავარი წარმომადგენელი ევროკავშირში გაწევრიანების საკითხებში ლასლო ვაჟდა და ეკონომიკური პოლიტიკის კვლევის ცენტრის აღმასრულებელი დირექტორი - ნინო ევგენიძე იყვნენ.განხილვის თემა სოფლის განვითარების 2020-2027 წლების ეროვნული სტრატეგიის შემუშავების მნიშვნელობის საკითხი იყო.„მოგეხსენებათ, სამინისტრო სოფლის განვითარების ახალ სტრატეგიაზე მუშაობს. ჩვენ დაგვიგროვდა მნიშვნელოვანი გამოცდილება და გვსურს ადეკვატური სოფლის განვითარების სტრატეგია შევთავაზოთ მთავრობას. იცით, რომ სტრატეგია კომპლექსური დოკუმენტია, სადაც აქცენტი ინფრასტრუქტურის განვითარებასთან ერთად, სოფლად ეკონომიკური შესაძლებლობების გაძლიერებაზე, მეწარმეობრივი საქმიანობის მხარდაჭერასა და ფერმერული მეურნეობების განვითარებაზე  გაკეთდება“ - განაცხადა ლევან დავითაშვილმალევან დავითაშვილის განცხადებით, სოფლის განვითარების ახალ სტრატეგიაში ყურადღება გარემოს დაცვისა და ახალგაზრდების ჩართულობის უზრუნველყოფის საკითხებზე გამახვილდება.როგორც რეგიონული განვითარებისა და ინფრასტრუქტურის მინისტრმა მაია ცქიტიშვილმა აღნიშნა, რეგიონების განვითარება ქვეყნის განვითარების ტოლფასია შესაბამისად, ახალი სტრატეგია და მისი შესრულება ქვეყნის განვითარების საქმეში მნიშვნელოვანი წინ გადადგმული ნაბიჯი იქნება. ეკონომიკისა და მდგრადი განვითარების მინისტრის გიორგი ქობულიას განცხადებით, სოფლად უკეთესი საცხოვრებელი პირობების შესაქმნელად აუცილებელია მოსახლეობის შემოსავლების ზრდა, რაც კომერციაზე ორიენტირებული სასოფლო-სამეურნეო პროდუქციის წარმოებით არის შესაძლებელი.  დისკუსიის ფარგლებში, ყურადღება სოფლის განვითარების კუთხით, ავსტრიის და უნგრეთის გამოცდილების გაზიარების მნიშვნელობაზე გამახვილდა.ღონისძიება ევროკავშირის (EU) და გაეროს განვითარების პროგრამა (UNDP) მხარდაჭერით გაიმართა.
#

თბილისში სოფლის განვითარების საერთაშორისო კონფერენცია გაიმართა

8 აპრილს, თბილისში, ქართველი და ევროკავშირის წევრი ქვეყნების წამყვანი ექსპერტებისა და სოფლის განვითარების პოლიტიკის შემქმნელთა მონაწილეობით საერთაშორისო კონფერენცია „სოფლის განვითარების პოლიტიკა 2020+ - ევროპული პრაქტიკის დანერგვა საქართველოში“ გაიმართა.  სოფლის განვითარების კონფერენციის ორგანიზატორი და მასპინძელი საქართველოს გარემოს დაცვისა და სოფლის მეურნეობის სამინისტროა. ღონისძიების მხარდამჭერია ევროკავშირი (EU) გაეროს განვითარების პროგრამასთან (UNDP) თანამშრომლობით. ღონისძიება  საქართველოს პრეზიდენტმა სალომე ზურაბიშვილმა გახსნა. მონაწილეებს სიტყვით მიმართა საქართველოს გარემოს დაცვისა და სოფლის მეურნეობის მინისტრმა, ლევან დავითაშვილმა.  „2016 წელს საქართველოს მთავრობამ სოფლის განვითარების პირველი ეროვნული სტრატეგია (2017-2020 წლები) შეიმუშავა და განხორციელება მიღებული გეგმის მიხედვით დაიწყო. დღეს ჩვენ ვმსჯელობთ ახალი სტრატეგიის დოკუმენტის შემუშავებაზე, რომელიც იქნება უფრო გრძელვადიანი და იმ გამოცდილებას ასახავს, რაც ამ წლებში დაგვიგროვდა. სოფლის განვითარების ახალი ხედვა ევროკავშირის საუკეთესო გამოცდილებასა და პრაქტიკას დაეყრდნობა. ჩვენი მიზანია, ეკონომიკური მდგომარეობა გაუმჯობესდეს თანაბრად ყველასთვის, განვითარება იყოს ინკლუზიური და მოიცავდეს სოფლად მცხოვრები მოსახლების ეკონომიკური მდგომარეობის გაუმჯობესებას. ჩვენ საკმაოდ დიდი ჩამორჩენა გვაქვს ქალაქსა და სოფლად მცხოვრები მოსახლების ცხოვრების დონეებს შორის, ჩვენ ამ განსხვავების აღმოფხვრაზე ვიმუშავებთ. მომავალი შვიდი წლის პრიორიტეტები ადგილობრივი მეწარმეობის ხელშეწყობას, დასაქმების გაზრდას და სოფლის განვითარებაში მოსახლეობის აქტიურ ჩართულობას ითვალისწინებს. სოფლის მეურნეობის პროდუქტების გადამუშავება, შენახვა, მარკეტინგი, მიწოდება, აგროტურიზმი, ბუნებრივი რესურსების მდგრადი გამოყენება და ა.შ. სტრატეგიის ძირითადი მიმართულებები იქნება“, - განაცხადა ლევან დავითაშვილმა. სოფლის განვითარების კონფერენცია ევროკავშირის გრძელვადიანი დახმარების ნაწილია, რომელიც ხელს უწყობს საქართველოში სოფლის განვითარების ეფექტიანი პოლიტიკის შექმნას  და სოფლად მცხოვრები მოსახლეობის ეკონომიკური შესაძლებლობების გაზრდას. სოფლის განვითარების პროგრამა ENPARD 2013 წლიდან ხორციელდება და მისი ბიუჯეტი 179.5 მილიონ ევროს შეადგენს. „საქართველოს შეუძლია წარმატებით ისარგებლოს სოფლის განვითარების ევროპული გამოცდილებით. ევროკავშირი ხელს უწყობს საქართველოს სოფლის ეკონომიკური, სოციალური და გარემოსდაცვითი გამოწვევების მოგვარებას და სოფლად მცხოვრები მოსახლეობის განვითარებას“, - აღნიშნა ევროკავშირის ელჩმა საქართველოში, კარლ ჰარცელმა,  „სოფლის განვითარება ასობით ათას ადამიანს, მათ შორის შორეული და ნაკლებგანვითარებული რეგიონების მაცხოვრებლებს, პრაქტიკულ ეკონომიკურ გადაწყვეტილებებს სთავაზობს. მოსახლეობის აქტიური მონაწილეობა სოფლის განვითარების უმნიშვნელოვანესი წინაპირობაა, რომელიც ხელს უწყობს მთავრობას პრიორიტეტების განსაზღვრაში, პოლიტიკის შემუშავებაში და მისი განხორციელების ქმედითი მექანიზმების შემოღებაში“,- განაცხადა გაეროს განვითარების პროგრამის (UNDP) ხელმძღვანელმა საქართველოში, ლუიზა ვინტონმა.  სოფლის განვითარების კონფერენციას ევროკავშირის ქვეყნების ოფიციალური პირები და ექსპერტები დაესწრნენ. მათ შორის, ავსტრიის მდგრადი განვითარებისა და ტურიზმის ფედერალური სამინისტროს გენერალური დირექტორის მოადგილე მარკუს ჰოფნერი  და უნგრეთის სოფლის მეურნეობის სამინისტროს ყოფილი მთავარი წარმომადგენელი ევროკავშირში გაწევრიანების საკითხებში ლასლო ვაჟდა. კონფერენციის ფარგლებში გაიმართა მსჯელობა, რომლიც პოლიტიკის შემუშავებისა და ინსტიტუციური მოწყობის საკითხებს შეეხო. კონფერენციის მონაწილეებმა განიხილეს საუკეთესო ევროპული პრაქტიკის საქართველოში გამოყენებისა და ქართული რეალობისათვის ადაპტირების მნიშვნელობა და გზები. 
#

ლევან დავითაშვილი აზიურ ფაროსანასთან ბრძოლის ღონისძიებების მიმდინარეობას გაეცნო

გარემოს დაცვისა და სოფლის მეურნეობის მინისტრი ლევან დავითაშვილი აბაშაში, აზიური ფაროსანას წინააღმდეგ ბრძოლის მართვის ცენტრის თანამშრომლებს შეხვდა და მიმდინარე  სამუშაოების ანგარიში მოისმინა. შეხვედრას პარლამენტის აგრარულ საკითხთა კომიტეტის თავმჯდომარე ოთარ დანელია, აჭარის სოფლის მეურნეობის მინისტრი ტიტე აროშიძე, სამეგრელო-ზემო სვანეთის გუბერნატორი ალექსანდრე მოწერელია, ზუგდიდის მაჟორიტარი დეპუტატი ედიშერ თოლორაია და ადგილობრივი ხელისუფლების წარმომადგენლები  ესწრებოდნენ.გამართულ შეხვედრაზე ლევან დავითაშვილმა ხაზგასმით აღნიშნა, რომ მავნებელთან ბრძოლის პროცესში სახელმწიფო  წელსაც მასშტაბურ ღონისძიებებს განახორციელებს, გაგრძელდება აქტიური კომუნიკაცია მოსახლეობასთან. „წლევანდელი წელი მავნებელთან ბრძოლის მიმართულებით გარდამტეხი უნდა იყოს. შარშან გვქონდა ძალიან მნიშვნელოვანი პროგრესი. წელს ჩვენი შესაძლებლობები მნიშვნელოვნად გაიზარდა. შარშან გვქონდა 150-მდე ერთეული ტექნიკა; წელს დონორების დახმარებით, მათი რაოდენობა 250-ია. აღსანიშნავია, რომ ბოლო წლებში საკმარისი გამოცდილებაც დაგვიგროვდა“, - განაცხადა ლევან დავითაშვილმა. როგორც მინისტრმა აღნიშნა, გასულ წელს  განსაკუთრებული გამოწვევა თხილის კულტურის გადარჩენა იყო. ფაროსანას გარდა აღნიშნულ კულტურაში სხვა კომპლექსური ღონისძიებებიც არის ჩასატარებელი. „იმისთვის, რომ ჩვენ თხილის ხარისხიანი მოსავალი მივიღოთ, თხილის მწარმოებელთა ასოციაციასთან ერთად, ინტეგრირებული ბრძოლის ღონისძიებების გეგმა გვაქვს. მეთხილე ფერმერებს დავეხმარებით, როგორც შეწამვლის აპარატებით, ისე სხვა მიმართულებებით“, - განაცხადა ლევან დავითაშვილმა.წლევანდელ წელს მავნებელთან ბრძოლის კუთხით გარდამტეხს უწოდებს პარლამენტის აგრარული კომიტეტის თავმჯდომარე ოთარ დანელიაც.„წლევანდელი წელი ნამდვილად იქნება გარდამტეხი, რადგან აზიური ფაროსანას წინააღმდეგ ბრძოლამ მიიღო უპრეცედენტო მასშტაბი. ეს გამოიხატება როგორც სპეციალისტების, ისე ტექნიკის მობილიზებაში. თხილის ხელშეწყობის ნაწილში აქტიური ღონისძიებები ხორციელდება ყველა მუნიციპალიტეტში, მაგრამ ეს ჩვენ არ გვაძლევს მოდუნების საშუალებას. თავისთავად ცხადია, ეს პროცესები უნდა გავაგრძელოთ,“ - განაცხადა ოთარ დანელიამ.მიმდინარე წელს მავნებელთან ბრძოლის საწინააღმდეგო ღონისძიებებისთვის 250 ერთეული ტექნიკაა მობილიზებული. ამ ეტაპზე სურსათის ეროვნული სააგენტოს მცენარეთა დაცვის სპეციალისტები  მავნებლის იდენტიფიცირების მიზნით მონიტორინგს ახორციელებენ. შეწამვლითი სამუშაოები, მონიტორინგის შედეგების მიხედვით დაიგეგმება. 
#

ლევან დავითაშვილი ლატვიის ელჩს ინგრიდა ლევრენცეს შეხვდა

გარემოს დაცვისა და სოფლის მეურნეობის მინისტრი ლევან დავითაშვილი საქართველოში ლატვიის რესპუბლიკის საგანგებო და სრულუფლებიან ელჩს ინგრიდა ლევრენცეს შეხვდა.შეხვედრაზე მხარეებმა დაადასტურეს ორ ქვეყანას შორის მრავალწლიანი მეგობრული და პარტნიორული ურთიერთობების არსებობა და სამომავლო თანამშრომლობის გაღრმავების, ასევე, სხვადასხვა მიმართულებით გამოცდილების გაზიარების მნიშვნელობაზე იმსჯელეს. ელჩმა აღნიშნა, რომ ქართული რძის პროდუქტი მაღალი ხარისხით გამოირჩევა და მასზე მოთხოვნა დიდია. ორ ქვეყანას შორის სავაჭრო - ეკონომიკური ურთიერთობების კუთხით, მხარეებმა განიხილეს ის სფეროები, სადაც თანამშრომლობის პერსპექტივები არსებობს. განსაკუთრებით აღინიშნა რძის ნაწარმის, ღვინის, ბოსტნეულისა და მინერალური წყლების ექსპორტის გაზრდის შესაძლებლობა ბალტიისპირეთის ქვეყნებში.ლევან დავითაშვილმა ყურადღება გარემოსდაცვითი კუთხით კანონმდებლობის შემუშავების მიმდინარეობის საკითხზე გაამახვილა და აღნიშნა, რომ ამ მიმართულებით ლატვიის გამოცდილებისა გაზიარება მნიშვნელოვანია.შეხვედრაზე აღინიშნა, იმ პროექტების მნიშვნელობის შესახებაც, რომელსაც საქართველოს გარემოს დაცვისა და სოფლის მეურნეობის სამინისტრო მეწარმეებისა და ფერმერების მხარდაჭერისთვის ახორციელებს.