#

ცხოველთა ჯანმრთელობის ეროვნული პროგრამის მორიგი განხილვა

გარემოს დაცვისა და სოფლის მეურნეობის სამინისტროში ცხოველთა ჯანმრთელობის ეროვნული პროგრამის (NAHP) სამეთვალყურეო ჯგუფის რიგით 31-ე შეხვედრა გაიმართა.შეხვედრას სოფლის მეურნეობის მინისტრის პირველი მოადგილე ნოდარ კერესელიძე ხელმძღვანელობდა.შეხვედრაზე საუბარი შეეხო ვეტერინარული კერძო სექტორის, ვეტერინარული განათლების და ცხოველთა ჯანმრთელობის ეროვნული პროგრამის (OIE) ინსტრუმენტებით ვეტერინარული სერვისების საქმიანობის შეფასების საკითხებს; ცხოველთა დაავადებების ზედამხედველობისა და კონტროლის კუთხით განხორციელებულ ღონისძიებებს; ასევე, საქართველოში დაავადება თურქულის რისკებზე დაფუძნებულ სტრატეგიულ გეგმას.სურსათის ეროვნული სააგენტოს, სამინისტროს ლაბორატორიის, დაავადებათა კონტროლისა და საზოგადოებრივი ჯანმრთელობის ეროვნული ცენტრის წარმომადგენლებმა მიმდინარე აქტივობებისა და სამომავლო გეგმების შესახებ ისაუბრეს. „2019 წელს, გარემოს დაცვისა და სოფლის მეურნეობის სამინისტროს, ამერიკის შეერთებული შტატების სოფლის მეურნეობის დეპარტამენტის პროგრამის დასრულების შემდეგ, ცხოველთა ჯანმრთელობის ეროვნული პროგრამის (NAHP) სამეთვალყურეო ჯგუფი მენეჯმენტს სრულად გადაიბარებს. ვფიქრობ, შეძენილი გამოცდილების საფუძველზე, საქმიანობის ეფექტიანად გაგრძელებას შევძლებთ“. - აღნიშნა ნოდარ კერესელიძემ.გარემოს დაცვისა და სოფლის მეურნეობის სამინისტროში გამართულ შეხვედრას სოფლის მეურნეობის სურსათისა და სოფლის განვითარების დეპარტამენტის, სურსათის ეროვნული სააგენტოს, დაავადებათა კონტროლისა და საზოგადოებრივი ჯანმრთელობის ეროვნული ცენტრის, სოფლის მეურნეობის სამინისტროს ლაბორატორიის, ასევე, აშშ-ის სოფლის მეურნეობის დეპარტამენტის (USDA), საქართველოს საზოგადოებრივ საქმეთა ინსტიტუტის (GIPA), ევროკავშირის ( EU), გაეროს სურსათის და სოფლის მეურნეობის ორგანიზაციის (FAO), საფრთხეების შემცირების სააგენტოს (DTRA) წარმომადგენლები ესწრებოდნენ.
#

შეხვედრა უზბეკეთის რესპუბლიკის საგარეო ვაჭრობის მინისტრთან

გარემოს დაცვისა და სოფლის მეურნეობის მინისტრის პირველი მოადგილე ნოდარ კერესელიძე უზბეკეთის რესპუბლიკის საგარეო ვაჭრობის მინისტრს, ჯამშიდ ა. ხოდჟაევს შეხვდა.შეხვედრაზე მხარეებმა ქვეყნებს შორის სავაჭრო ურთიერთობის გაღრმავების შესაძლებლობები განიხილეს.საუბარი შეეხო სასოფლო-სამეურნეო ტექნიკის წარმოებისა და ვაზის ჯიშების გამოყვანაში სამეცნიერო-კვლევითი მიმართულებებით თანამშრომლობის საკითხებს.ნოდარ კერესელიძემ შეხვედრაზე ხაზგასმით აღნიშნა, რომ საქართველოსთვის ევროკავშირთან ღრმა და ყოვლისმომცველი თავისუფალი სავაჭრო სივრცის შესახებ ხელშეკრულების გაფორმების შემდეგ, კიდევ უფრო მნიშვნელოვანია მეგობარ ქვეყნებთან სოფლის მეურნეობის მიმართულებით აქტიური თანამშრომლობა, ერთობლივი პროექტების განხორციელება და გამოცდილების გაზიარება.გარემოს დაცვისა და სოფლის მეურნეობის მინისტრის პირველმა მოადგილემ სახელმწიფოს მხრიდან განხორციელებულ იმ პროექტებზე ისაუბრა, რომლებიც ქვეყანაში აგრარული დარგის სწრაფ და ეფექტიან განვითარებას, ადგილობრივი წარმოების ზრდას და აგრობიზნესის განვითარების სტიმულირებას ისახავს მიზნად. შეხვედრაზე უზბეკეთის რესპუბლიკის საგარეო ვაჭრობის მინისტრმა, ჯამშიდ ა. ხოდჟაევმა აღნიშნა, რომ საქართველოში აგრარულ დარგს განვითარების დიდი პოტენციალი აქვს და, შესაბამისად, თანამშრომლობა უზბეკეთის რესპუბლიკისთვის უაღრესად მნიშვნელოვანია. 
#

ლევან დავითაშვილი მსოფლიო ბანკის წარმომადგენელს შეხვდა

 ლევან დავითაშვილი მსოფლიო ბანკის წარმომადგენელს შეხვდასაქართველოს გარემოს დაცვისა და სოფლის მეურნეობის მინისტრი ლევან დავითაშვილი მსოფლიო ბანკის წარმომადგენელს ტყის რესურსების მდგრადი მართვის საკითხებში ტუკა კასტრენს შეხვდა.გარემოს დაცვისა და სოფლის მეურნეობის მინისტრმა ვრცლად ისაუბრა საქართველოში მიმდინარე სატყეო რეფორმის შესახებ და ყურადღება ტყის კოდექსის პროექტის, ტყის მდგრადი მართვის კრიტერიუმების და ინდიკატორების, ასევე, სატყეო განათლების სტრატეგიის მნიშვნელობაზე გაამახვილა.ლევან დავითაშვილმა 2017 წელს ბორჯომის ხეობაში გაჩენილი ხანძრის შედეგად მიღებული ზარალის შესახებაც ისაუბრა და ყურადღება ხანძარსაწინააღმდეგო პრევენციული ღონისძიებების განხორციელების მნიშვნელობაზე გაამახვილა. ტუკა კასტრენმა ლევან დავითაშვილს სატყეო სექტორში არსებული გამოწვევების დასაძლევად სრული მხარდაჭერა აღუთქვა.გარემოს დაცვისა და სოფლის მეურნეობის სამინისტროში გამართულ შეხვედრას მინისტრის მოადგილე სოლომონ პავლიაშვილი ესწრებოდა.  
#

მაია ცქიტიშვილი და ლევან დავითაშვილი ქვემო ქართლში იმყოფებოდნენ

რეგიონული განვითარებისა და ინფრასტრუქტურის მინისტრმა, მაია ცქიტიშვილმა და გარემოს დაცვისა და სოფლის მეურნეობის მინისტრმა, ლევან დავითაშვილმა, ადგილობრივი ხელისუფლების წარმომადგენლებთან ერთად, ქვემო ქართლისა და სამცხე-ჯავახეთის რეგიონში ის ტერიტორიები დაათვალიერეს, სადაც დაცულ ტერიტორიებზე მათ შორის, ინფრასტრუქტურული პროექტების განხორციელება იგეგმება. ადგილობრივ ხელისუფლებასთან ერთად მთავრობის წევრებმა კონკრეტულ გეგმებზე იმსჯელეს.წალკის მუნიციპალიტეტში მინისტრებმა დაშბაშის კანიონი მოინახულეს. კანიონი ბუნების ძეგლს წარმოადგენს. კანიონის ტერიტორიაზე არსებული ჩანჩქერები, განსხვავებულ მიკროლანდშაფტს ქმნის დამახასიათებელი მიკროკლიმატით, თავისებური ფაუნით. კანიონი უახლოეს მომავალში უამრავი ვიზიტორისთვის საინტერესო ობიექტი იქნება. რეგიონში ვიზიტის ფარგლებში, ნინოწმინდის მუნიციპალიტეტში მინისტრებმა ჯავახეთის დაცული ტერიტორიების ვიზიტორთა მომსახურების ცენტრიც მოინახულეს. მაია ცქიტიშვილმა და ლევან დავითაშვილმა, ადგილობრივებთან ერთად, ფარავნისა და საღამოს ტბისთვის დამახასიათებელი იხტიოფაუნის სახეობების აღდგენის და სპორტულ-სამოყვარულო მეთევზეობისა და ტურიზმის განვითარების შესაძლებლობები განიხილეს.ლევან დავითაშვილის განცხადებით, რამდენიმე მნიშვნელოვანი პროექტის განხორციელება იგეგმება, რაც არსებულ დაცულ ტერიტორიებზე ინფრასტრუქტურის მოწყობას უკავშირდება. „ინფრასტრუქტურის მოწყობით, ჩვენ შევძლებთ დამატებითი შემოსავლები გავუჩინოთ ადგილობრივ მოსახლეობას. ვიზიტორებისთვის და ტურისტებისთვის დაცული ტერიტორიები გავხადოთ უფრო მიმზიდველი და საინტერესო. გარემოს დაცვისა და სოფლის მეურნეობის დაცვის მინისტრთან ერთად დავათვალიერეთ სხვადასხვა ობიექტი. უწყებების თანამშრომლობით შევძლებთ, ხელი შევუწყოთ რეგიონულ განვითარებას, შევქმნათ შემოსავლის მიღების ახალი წყაროები“, - აღნიშნა მაია ცქიტიშვილმა. „მნიშვნელოვანია საღამოს ტბის და ფარავნის ტბის პოტენციალის შესწავლა და განხილვა, თუ რამდენად შესაძლებელია ისინი ჯავახეთის დაცულ ტერიტორიებს დაემატოს. ეს იქნება ერთ-ერთი მიმართულება სოფლის განვითარების კუთხით, მეორე მხრივ, პროექტები, რომელიც მეცხოველეობის განვითარებას, მევენახეობას და იმ მიმართულებებს უკავშირდება, რომლის პოტენციალიც კონკრეტულ რეგიონში არსებობს“, - აღნიშნა ლევან დავითაშვილმა.მთავრობის წევრებმა, ფოკის დედათა მონასტერს, აღნიშნული კლიმატის გათვალისწინებით, ყინვაგამძლე სახეობის ნერგები, კერძოდ, არყის ხე, ევროპული ნაძვი და ჩრდილოური ფიჭვი გადასცეს. 
#

სამცხე-ჯავახეთში მინისტრებმა ტერასული ვენახები მოინახულეს

რეგიონული განვითარებისა და ინფრასტრუქტურის მინისტრი, მაია ცქიტიშვილი და გარემოს დაცვისა და სოფლის მეურნეობის მინისტრი, ლევან დავითაშვილი, ადგილობრივი ხელისუფლების წარმომადგენლებთან ერთად, ასპინძის მუნიციპალიტეტში, სოფელ ჭაჭკარში იმყოფებოდნენ, რომელსაც 2016 წელს საქართველოს მთავრობის დადგენილების თანახმად ეროვნული მნიშვნელობის კულტურის უძრავი ძეგლის სტატუსი მიენიჭა. ჭაჭკარიდან ვარძიის სამეურნეო მარაგის შევსება ხდებოდა - კლდეში ნაკვეთ საწნახელებში კი დიდი რაოდენობის ღვინო იწურებოდა. სოფელში, გარდა დაზიანებული ტერასებისა და 50–მდე კლდეში ნაკვეთი საწნახელისა, შემორჩენილია ოთხსაუკუნოვანი ვაზიც. როგორც რეგიონული განვითარებისა და ინფრასტრუქტურის მინისტრმა, მაია ცქიტიშვილმა აღნიშნა, მნიშვნელოვანია, რომ ჭაჭკარში მესხური ჯიშის ვენახის აღდგენა დაიწყება. რეგიონში ვიზიტის ფარგლებში, მინისტრებმა ასპინძის მუნიციპალიტეტში აღდგენილ ტერასებზე ახლად გაშენებული ვენახები მოინახულეს. ვენახები საერთაშორისო საქველმოქმედო ფონდ „ქართუს“ ფინანსური მხარდაჭერით, სოფლის მეურნეობის სამეცნიერო-კვლევითი ცენტრის ჯიღაურას ბაზაზე დაცული ჯიშებით „თიბისი“ ჯგუფმა აღადგინა. ტერასებზე გაშენებული ვენახი რეგიონისთვის დამახასიათებელ მიკროგარემოს ქმნის. სოფელ ზიკილიაში, მაია ცქიტიშვილმა და ლევან დავითაშვილმა ყურძნის ჯიშების კოლექციონერის, ემზარ გაჩეჩილაძის მიერ ახლად გაშენებული ვენახები დაათვალიერეს, სადაც სანერგე მეურნეობაც არის მოწყობილი, რაც იშვიათი მესხური ჯიშების გავრცელების საშუალებას იძლევა. ემზარ გაჩეჩილაძე გაშენებული მესხური ჯიშის ყურძნისგან - მესხური მწვანე, სამარიებო, ასპინძური შავი და საფარულა ღვინოს ამზადებს და ადგილობრივ ბაზარზე უკეთებს რეალიზებას.მაია ცქიტიშვილის განცხადებით, ყურადღება გამახვილდა იმ პროექტებზე, რომელიც არსებული შესაძლებლობების ბოლომდე ათვისებასა და ისტორიული ადგილების გაცოცხლებას შეუწყობს ხელს. მისივე თქმით, მსგავსი აქტივობა აუცილებელია ვიზიტორების დაინტერესების, ადგილობრივების დასაქმებისა და რეგიონების ეკონომიკური წინსვლისთვის.
#

ესპანეთში მდგრადი ნადირობის მსოფლიო ფორუმი გაიმართა

გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი და ბიომრავალფეროვნებისა და სატყეო პოლიტიკის დეპარტამენტის უფროსი კარლო ამირგულაშვილი ქ. მადრიდში ველური ბუნებისა და ნადირობის საერთაშორისო საბჭოს გენერალური ასამბლეის 65-ე სესიას დაესწრნენ.ღონისძიებები ორგანიზებული იყო ველური ბუნებისა და ნადირობის საერთაშორისო საბჭოს და ესპანეთის სოფლის მეურნეობის, თევზჭერის, სურსათისა და გარემოს დაცვის სამინისტროს მიერ. აღსანიშნავია, რომ საქართველო ნადირობის საერთაშორისო საბჭოს წევრია 2017 წლიდან და პირველად მონაწილეობდა მდგრადი ნადირობის საერთაშორისო ფორუმში. გენერალურ ასამბლეას ესწრებოდნენ პრინცი ხუან (იოანე) ბაგრატიონი და დიპლომატიური კორპუსი. საქართველოს სახელით დელეგატებს სიტყვით მიმართა მინისტრის მოადგილემ - სოლომონ პავლიაშვილმა. ასამბლეის ფარგლებში გაიმართა მდგრადი ნადირობის მსოფლიო ფორუმი, სადაც განხილულ იქნა 2018 წლის სატროფეო ნადირობის კალენდარი, სანადირო ფრინველთა სახეობების, ველურ ცხოველთა დაავადებების, აფრიკული ღორის ცხელების, მგლის პოპულაციის რეგულირების და სხვა ნადირობასთან დაკავშირებული საკითხები. 
#

საინფორმაციო–საკონსულტაციო სამსახურის 5 წლის იუბილე აღინიშნა

გარემოს დაცვისა და სოფლის მეურნეობის სამინისტროს საინფორმაციო–საკონსულტაციო სამსახურის 5 წლის ანგარიშის პრეზენტაციას მინისტრი ლევან დავითაშვილი დაესწრო. საინფორმაციო-საკონსულტაციო სამსახური რეგიონებში აგრარული სექტორის განვითარების ხელშეწყობას ახდენს და სახელმწიფოსა და ფერმერს შორის არსებული შუა რგოლია.ღონისძიებაზე მინისტრმა სიტყვით გამოსვლისას საინფორმაციო–საკონსულტაციო სამსახურის თანამშრომლების საქმიანობის მნიშვნელობაზე ისაუბრა და აღნიშნა, რომ მათი საქმიანობა რეგიონებში, აგრარული სექტორის განვითარების ხელშემწყობია. „სწორედ თქვენი მუშაობით სამინისტრომ ბოლო წლებში შეძლო რთულ ამოცანებთან და გამოწვევებთან გამკალვება, რისთვისაც მადლობას გიხდით, თუმცა, წინ ახალი გამოწვევები გვაქვს. ჩვენ, ევროკავშირის მხარდაჭერით ექსტენციის ახალი სტრატეგია მივიღეთ. მისი დიდი ნაწილი სწორედ საინფორმაციო–საკონსულტაციო სამსახურის გაძლიერებასა და ახალ ეტაპზე გადასვლას ისახავს მიზნად. თქვენ, რეგიონებში ფერმერებს უწევთ დახმარებას და კონსულტაციას, რათა მათი საქმიანობა იყოს მეტად ეფექტიანი. ასევე, ეხმარებით სამინისტროს დაგეგმილი პროექტების შესახებ ფერმერი დროულად იყოს ინფორმირებული, რაც აგრარული სექტორის განვითარებისათვის მეტად მნიშვნელოვანია“, – განაცხადა ლევან დავითაშვილმა.საინფორმაციო–საკონსულტაციო სამსახურის ქსელი 2013 წელს ჩამოყალიბდა. მასში 9 რეგიონალური სამმართველო და 45 საინფორმაციო–საკონსულტაციო სამსახური შედის, რომლის თანმშრომლები ყოველწლიურად, მთელი ქვეყნის მასშტაბით, ათასობით ფერმერს კონსულტაციას უწევენ და მათ სახელმწიფოს მიერ შემუშავებული პროექტების შესახებ აწვდიან ინფორმაციას.ღონისძიებას ყველა რეგიონის საინფორმაციო–საკონსულტაციო სამსახურისა და რეგიონალური სამმართველოს თანამშრომელი ესწრებოდა, რომელთაც წარმატებული საქმიანობისათვის სიგელებიც გადაეცათ.5 წლის ანგარიშის პრეზენტაციას დაესწრნენ გარემოს დაცვისა და სოფლის მეურნეობის მინისტრის მოადგილეები, სოფლის მეურნეობის ყოფილი მინისტრები და საერთაშორისო ორგანიზაციების წარმომადგენლები.