#

ვაშინგტონში „ქართული ღვინის ფორუმი“ იმართება

აშშ-ს დედაქალაქ ვაშინგტონში „ქართული ღვინის პირველი ფორუმი“ იმართება, რომლის ორგანიზატორია საქართველო-აშშ-ს ბიზნეს საბჭო, მხარდამჭერები საქართველოს გარემოს დაცვისა და სოფლის მეურნეობის სამინისტროს ღვინის ეროვნული სააგენტო და საქართველოს საელჩო ამერიკის შეერთებულ შტატებში.ფორუმის სამდღიანი პროგრამა მოიცავს „საფერავის ფესტივალს“ და „ქართული ღვინის დეგუსტაციებს“. ფორუმის დასკვნითი ნაწილია სამეცნიერო კონფერენცია, რომელიც ეძღვნება ქართული ღვინის კულტურასა და თანამედროვეობას. წარმომადგენლობით სამეცნიერო კონფერენციაში, რომელიც აშშ-ს სტრატეგიისა და საერთაშორისო კვლევების ცენტრში (CSIS) გაიმართება, მონაწილეობას მეცნიერები და ღვინის პროფესიონალები მიიღებენ. ერთი წლის წინ, 2017 წლის 13 ნოემბერს, აშშ-ის მეცნიერებათა ეროვნული აკადემიის სამეცნიერო ჟურნალში (PNAS) გამოქვეყნდა სამეცნიერო სტატია „საქართველოს ადრეული ნეოლითური ღვინო სამხრეთ კავკასიიდან“ საქართველოს ტერიტორიაზე აღმოჩენილი არქეოლოგიური მასალის კვლევის შესახებ, რომელიც ადასტურებს, რომ საქართველოს ტერიტორიაზე ღვინოს 8 ათასი წლის წინ აყენებდნენ. კონფერენციის ძირითადი თემაც აღნიშნული სამეცნიერო დასკვნა იქნება.„საფერავის ფესტივალს“, რომელსაც აშშ-ში საქართველოს საელჩო მასპინძლობდა, 400-მდე სტუმარი დაესწრო - ღვინის პროფესიონალები სამეცნიერო წრეებიდან, ასევე ღვინის იმპორტიორები და სხვადასხვა რესტორნებისა და მაღაზიების ქსელების წარმომადგენლები. „საფერავის ფესტივალზე“ წარმოდგენილი იყო ქართული ღვინის კომპანიების წარმოებული 25 საფერავის ღვინო.ვაშინგტონში „ქართული ღვინის ფორუმს“ ესწრებიან საქართველოს გარემოს დაცვისა და სოფლის მეურნეობის მინისტრის პირველი მოადგილე ნოდარ კერესელიძე და ღვინის ეროვნული სააგენტოს თავმჯდომარე ლევან მეხუზლა. ნოდარ კერესელიძის შეფასებით, მსგავს ფორმატში ქართული ღვინის წარდგენა მიანიშნებს, რომ საქართველოს მეღვინეობასთან არამხოლოდ 8000-წლიანი ისტორია აკავშირებს, არამედ თანამედროვე, განვითარებული ღვინის ინდუსტრია და საუკეთესო ხარისხის მრავალფეროვანი ღვინოები.„ერთი წლის წინ, მსოფლიო სამეცნიერო საზოგადოებამ აღიარა, რომ მეღვინეობის უძველესი კვალი სწორედ საქართველოს ტერიტორიაზეა აღმოჩენილი, საიდანაც ის მთელ მსოფლიოში გავრცელდა. ქართული ღვინო დღეს განვითარებული და თანამედროვე ინდუსტრიაა. წლიდან წლამდე იზრდება როგორც ექსპორტირებული ღვინის რაოდენობა და საექსპორტო ქვეყნების გეოგრაფია, ასევე ქართული ღვინის ხარისხი. ამერიკის შეერთებული შტატები ქართული ღვინის სტრატეგიულ და მზარდ ბაზარს წარმოადგენს, სადაც მსგავსი ღონისძიებები კიდევ უფრო შეუწყობს ხელს ქართული ღვინის ცნობადობის გაზრდას ამ ქვეყანაში“, - აღნიშნა ნოდარ კერესელიძემ.საქართველოს საგანგებო და სრულუფლებიანმა ელჩმა აშშ-ში, დავით ბაქრაძემ აღნიშნა, რომ მსგავსი ღონისძიებები ამერიკის შეერთებულ შტატებში ქართული ღვინის პოპულარიზაციას უწყობს ხელს. ელჩის განცხადებით, სწორედ ქართული ღვინის მიმართ მზარდ ინტერესზე მიანიშნებს „ქართული ღვინის ფორუმის“ პირველი ღონისძიება „საფერავის ფესტივალი“, რომელსაც რამდენიმე ასეული ადამიანი დაესწრო, რომელთა უმრავლესობას სწორედ ღვინის პროფესიონალები წარმოადგენდნენ.
#

მინისტრი ევროკავშირის ელჩს საქართველოში, კარლ ჰარცელს შეხვდა.

გარემოს დაცვისა და სოფლის მეურნეობის მინისტრი, ლევან დავითაშვილი ევროკავშირის ელჩს საქართველოში, კარლ ჰარცელს შეხვდა. ლევან დავითაშვილმა ევროკავშირთან სტრატეგიული პარტნიორობის მნიშვნელობაზე ისაუბრა და ყურადღება გაამახვილა ევროკავშირის მიერ საქართველოსთვის წლების მანძილზე გაწეულ დახმარებაზე, რომელსაც ევროკავშირი სხვადასხვა მიმართულების საბიუჯეტო პროგრამისა და ინსტრუმენტის საშუალებით ახორციელებს.შეხვედრაზე მინისტრმა ხაზი გაუსვა დარგში წარმატებით განხორციელებულ რეფორმებს და ელჩს ორი უწყების - გარემოსა და სოფლის მეურნეობის გაერთიანების შედეგად მიღწეული შედეგები გააცნო.შეხვედრაზე მხარეებმა სოფლის მეურნეობის და სოფლად შინამეურნეობების განვითარების, ფინანსებზე ხელმისაწვდომობის, ფერმერებისთვის მომსახურების გაუმჯობესების საკითხებზე ისაუბრეს და ამ კუთხით „ევროპის სამეზობლო პროგრამა სოფლის მეურნეობისა და სოფლის განვითარებისათვის საქართველოში" (ENPARD) მიმდინარეობა და მიღწეული შედეგები დადებითად შეაფასეს.ლევან დავითაშვილმა ხაზგასმით აღნიშნა, რომ „ევროპის სამეზობლო პროგრამა სოფლის მეურნეობისა და სოფლის განვითარებისათვის საქართველოში" არის ერთ-ერთი ყველაზე მნიშვნელოვანი დახმარება, რომელსაც საქართველო ევროკავშირისგან სოფლის მეურნეობისა და სოფლად განვითარებისთვის იღებს. მინისტრმა ევრო კავშირის წარმომადგენლობას წლების განმავლობაში გაწეული მხარდაჭერისთვის მადლობა გადაუხადა.ევროკავშირის ელჩმა საქართველოსთან მჭიდრო თანამშრომლობის სურვილი გამოთქვა.
#

ქ.შანხაი, China International Import Expo.

შანხაიში, გარემოს დაცვისა და სოფლის მეურნეობის მინისტრი ლევან დავითაშვილი საერთაშორისო იმპორტის გამოფენის გახსნის ცერემონიაში საქართველოს პრემიერ-მინისტრთან მამუკა ბახტაძესთან და საქართველოს სამთავრობო დელეგაციის სხვა წევრებთან ერთად მონაწილეობდა. ქართულ მხარეს ჩინეთის სახალხო რესპუბლიკაში პრეზიდენტმა სი ძინპინმა უმასპინძლა.მნიშვნელოვანია აღინიშნოს, რომ საქართველოს სამთავრობო დელეგაციის შანხაიში ვიზიტის ფარგლებში გამართულ შეხვედრებზე ხაზი გაესვა იმ ფაქტს, რომ საქართველო არის რეგიონში პირველი ქვეყანა, რომელსაც თავისუფალი ვაჭრობის შესახებ შეთანხმებები აქვს ჩინეთთან და რომ ჩინური კომპანიების ინტერესი საქართველოში ინვესტიციების განხორციელების კუთხით სტაბილურად მზარდია. საერთაშორისო იმპორტის გამოფენაში, რომელიც შანხაიში 10 ნოემბერს დასრულდება, 50-ზე მეტი ქართული კომპანია, მათ შორის ღვინისა და სხვა აგრო-სასურსათო პროდუქციის მწარმოებელი მონაწილეობს, რომლებიც დამთვალიერებელს საქართველოში არსებულ ბიზნესგარემოს და საექსპორტო პოტენციალს აცნობენ. 
#

ლევან დავითაშვილმა შანხაიში ქართული პავილიონი გახსნა

ჩინეთში, ქალაქ შანხაიში საერთაშორისო იმპორტის გამოფენის (China International Import Expo – CIIE) ფარგლებში, გარემოს დაცვისა და სოფლის მეურნეობის მინისტრმა, ლევან დავითაშვილმა კიდევ ერთი ქართული პავილიონი გახსნა. პავილიონი ქართულ მხარეს სამი წლით საქართველოს საგარეო ვაჭრობის ასოციაციასა (GFTA) და უმსხვილეს ჩინურ კომპანიას (Greenland Holding Group) შორის თანამშრომლობის ფარგლებში გადაეცა. პავილიონში წარმოდგენილია ქართული აგრო-სასურსათო პროდუქცია, რაც ჩინეთის უმსხვილეს ბაზარზე მათი ცნობადობის გაზრდას და, შესაბამისად, ექსპორტის პოტენციალის მაქსიმალურ გამოყენებას შეუწყობს ხელს. „შანხაიში, იმპორტის საერთაშორისო გამოფენაზე ჩინეთის ხელისუფლებამ აბსოლუტურად ახალი ეკონომიკური ურთიერთობის დასაწყისი გამოაცხადა. ჩინეთის ხელისუფლება გეგმავს მნიშვნელოვნად გაზარდოს ქვეყანაში იმპორტი, რაც ქმნის შესაძლებლობას, რომ საქართველომ, ისევე, როგორც სხვა ქვეყნებმა, საკუთარი საექსპორტო შესაძლებლობების მაქსიმალური რეალიზაცია მოახდინოს. ამ რეალობის გათვალისწინებით, კიდევ უფრო დიდ მნიშვნელობას იძენს კომპანიის Greenland Holding Group მიერ ინიცირებული პლატფორმა, რომელიც ათეულობით ქვეყანას საშუალებას აძლევს საკუთარი პროდუქცია გააცნოს დამთვალიერებელს. ჩვენს მიერ გახსნილი ქართული პავილიონი ჩვენი პროდუქციის ექსპორტის ზრდის მნიშვნელოვან წინაპირობას ქმნის“, - აღნიშნა ლევან დავითაშვილმა ქართული პავილიონის გახსნის ღონისძიებაზე.დუგლაძეების ღვინის კომპანიის გენერალური დირექტორის, ზაალ დუგლაძის განცხადებით, ჩინეთის სახალხო რესპუბლიკა ქართული ღვინისთვის ერთ-ერთი უმნიშვნელოვანესი ბაზარია და უკვე არსებობს ქართული პროდუქციის იმპორტის ზრდისთვის ძალიან დიდი გეგმების საფუძველი. 
#

მთავრობამ სპირტიანი სასმელების შესახებ ტექნიკური რეგლამენტი დაადგინა

საქართველოს მთავრობამ სპირტიანი სასმელების შესახებ ახალი ტექნიკური რეგლამენტი დაადგინა, რომელიც განსაზღვრავს მოთხოვნებს სპირტიანი სასმელების დასახელებების, აღწერის, წარდგენისა და ეტიკეტირების შესახებ და აწესრიგებს ბიზნესოპერატორის მიერ სპირტიანი სასმელების წარმოების, ბაზარზე განთავსებისა და წარდგენის პირობებს. ახალი რეგლამენტი არ ეხება საქართველოს კანონმდებლობით განსაზღვრული ყურძნისეული წარმოშობის სპირტიან სასმელებს. რეგლამენტით რეგულაციები წესდება სპირტიანი სასმელების იმ კატეგორიებზე, რომელიც მზადდება ხილის ჩენჩოსგან, კურკოვანი ან უკურკო ხილისგან, კენკროვნების ან ბოსტნეულის სპირტისგან, თაფლისა და სხვა ნედლეულისაგან. წარდგენილი პროექტით დადგენილი მოთხოვნები ყველა ბიზნესოპერატორზე ვრცელდება. ტექნიკური რეგლამენტი მიზნად ისახავს სპირტიანი სასმელების წარმოების, გადამუშავების, დისტრიბუციის ეტაპებზე რეგულირების ერთიანი პრინციპების განსაზღვრას და მომხმარებელთა უფლებების დაცვას.აიკრძალა სპირტიანი სასმელების ბაზარზე განთავსება ან რეალიზაცია ისეთ ჭურჭელში, რომელიც დახურულია ფოლგის ან ტყვიის კაფსულების შემცველი თავსახურით ან საცობით.განისაზღვრა დადგენილების ამოქმედების ვადა 2019 წლის პირველი აპრილიდან. ბიზნესოპერატორების ინტერესებიდან გამომდინარე, იმ სპირტიანი სასმელების განთავსება ბაზარზე, რომელიც არ შეესაბამება ამ დადგენილებით განსაზღვრულ მოთხოვნებს, დაშვებულია 2020 წლის პირველ იანვრამდე.
#

ლევან დავითაშვილი იაპონიის ელჩს შეხვდა

გარემოს დაცვისა და სოფლის მეურნეობის მინისტრი ლევან დავითაშვილი იაპონიის საგანგებო და სრულუფლებიან ელჩს საქართველოში ტადაჰარუ უეჰარას შეხვდა.მინისტრმა ელჩთან იაპონიაში, საგამოფენო ცენტრში „Warehouse TERRADA“ ექსპოზიციის „საქართველო – ღვინის სამშობლო“ გამართვის ღონისძიებასთან დაკავშირებული საკითხები განიხილა.ლევან დავითაშვილმა ისაუბრა საფრანგეთში, ქალაქ ბორდოში, ღვინის მსოფლიო ცივილიზაციის ცენტრში Cité des Civilisations Du Vin გამართულ გამოფენაზე „საქართველო – მეღვინეობის აკვანი“.შეხვედრაზე საუბარი იაპონია-საქართველოს შორის სავაჭრო-ეკონომიკური ურთიერთობების განვითარებისა და ღვინის ექსპორტის ზრდის მნიშვნელობის საკითხებსაც შეეხო.მინისტრის განცხადებით, ქართული გამოფენის დათვალიერების შესაძლებლობა საქართველოს მიმართ იაპონელი ხალხის ინტერესს კიდევ უფრო გაზრდის, რაც ქვეყნებს შორის არაერთი მიმართულებით თანამშრომლობის ხელშემწყობი ფაქტორია.„ექსპოზია „საქართველო ღვინის სამშობლო“-ს იაპონიაში გამართვა, შესანიშნავი იდეაა. ჩვენ ვაფასებთ თქვენს უძველეს კულტურას. ღვინო უმნიშვნელოვანესი ნაწილია თქვენი კულტურის და მოხარული ვარ, რომ იაპონიაში თქვენი მასპინძლობის შესაძლებლობა გვექნება. ღონისძიება ხელს შეუწყობს იაპონიაში საქართველოს ცნობადობის გაზრდას ბიზნესის კეთების სიმარტივის თვალსაზრისით, რაც ორივე ქვეყნისთვის საინტერესო და ძალიან მნიშვნელოვანია. ჩვენ გავაკეთებთ შესაძლებლობის მაქსიმუმს, რომ ღონისძიება სათანადოდ წარიმართოს “, – განაცხადა ტადაჰარუ უეჰარამ.გარემოს დაცვისა და სოფლის მეურნეობის სამინისტროში გამართულ შეხვედრას ღვინის ეროვნული სააგენტოს ხელმძღვანელი პირები და ასოციაციის „ქართული ღვინო” აღმასრულებელი დირექტორი თინა კეზელი ესწრებოდნენ.
#

შავი ზღვის საერთაშორისო დღისადმი მიძღვნილი ღონისძიება სტამბოლში

ქალაქ სტამბოლში შავი ზღვის დაბინძურებისგან დაცვის კონვენციის კომისიის ორგანიზებით შავი ზღვის საერთაშორისო დღისადმი მიძღვნილი საზეიმო ღონისძიება გაიმართა, რომელშიც მონაწილეობა მიიღეს შავი ზღვის აუზის ქვეყნების წარმომადგენლებმა.საქართველოს მხრიდან აღნიშნულ ღონისძიებაში მონაწილეობა მიიღო და დაჯილდოვდა ნინო თხილავა, გარემოსა და კლიმატის ცვლილების დეპარტამენტის უფროსი, წლების მანძილზე შავი ზღვის კომისიის ფარგლებში განხორციელებული საქმიანობის გამო. მას ჯილდო გადასცა შავი ზღვის კომისიის აღმასრულებელმა დირექტორმა პროფესორმა ჰალილ იბრაჰიმ სურმა.