ახალი ამბები
დავით სონღულაშვილი ახალციხეში კომპანიის „მესხეთის მეფრინველეობა“ საქმიანობას გაეცნო
გარემოს დაცვისა და სოფლის მეურნეობის მინისტრი დავით სონღულაშვილი ახალციხის მუნიციპალიტეტის სოფელ კლდეში, კომპანიის „მესხეთის მეფრინველეობა“ საქმიანობას გაეცნო.
შპს „მესხეთის მეფრინველეობა“ სოფლის განვითარების სააგენტოს ბენეფიციარია. კომპანია სარგებლობს „შეღავათიანი აგროკრედიტის“ პროექტით, აგროსესხის ოდენობა დაახლოებით 500,000 ლარია. მეფრინველეობის ფერმაში 50,000 ფრთა ქათამი ჰყავთ; დღიურად 40,000 კვერცხი იწარმოება. პროდუქციის რეალიზაცია ადგილობრივ ბაზარზე ხორციელდება. ფერმაში 30 ადგილობრივია დასაქმებული.
„შეღავათიანი აგროკრედიტის“ პროექტის ფარგლებში, მეფრინველეობის ფერმების მოწყობისა და განვითარების მიზნობრიობით, საქართველოს მასშტაბით, ბანკების მიერ გაცემულია 278,1 მლნ ლარზე მეტი ღირებულების 2,779 სესხი, სოფლის განვითარების სააგენტოს თანადაფინანსება 67,2 მლნ ლარს აღემატება, მათ შორის, სამცხე-ჯავახეთის რეგიონში ბანკების მიერ გაცემულია 8,8 მლნ ლარის ღირებულების 133 სესხი, სოფლის განვითარების სააგენტოს თანადაფინანსება 1,8 მლნ ლარს აღემატება.
კომპანია „მესხეთის მეფრინველეობაში“ მინისტრთან ერთად იმყოფებოდენენ მინისტრის მოადგილე კახა კაკაბაძე, სახელმწიფო რწმუნებული სამცხე-ჯავახეთის რეგიონში ზაალ გელაშვილი, ახალციხის მუნიციპალიტეტის საკრებულოს თავმჯდომარე დავით ლომიძე და სოფლის განვითარების სააგენტოს დირექტორის მოვალეობის შემსრულებელი გიორგი ავალიანი.