ძებნა

ახალი ამბები

#

ბერნის კონვენციის მუდმივმოქმედი კომიტეტის 41-ე სხდომაზე, ბიუროს ვიცეთავმჯდომარედ კარლო ამირგულაშვილი აირჩიეს

მიმდინარე წლის 29 ნოემბრიდან 3 დეკემბრის ჩათვლით, საფრანგეთის ქალაქ სტრასბურგში, ევროპის საბჭოს ევროპის ველური ბუნებისა და ბუნებრივი ჰაბიტატების დაცვის შესახებ კონვენციის (ბერნის კონვენცია) მუდმივმოქმედი კომიტეტის 41-ე სხდომა გაიმართა.  სხდომის ფარგლებში, საქართველოს გარემოს დაცვისა და სოფლის მეურნეობის სამინისტროს ბიომრავალფეროვნებისა და სატყეო დეპარტამენტის უფროსი კარლო ამირგულაშვილი ბიუროს ვიცეთავმჯდომარედ ერთი წლის ვადით აირჩიეს.   აღნიშნულ პოზიციაზე საქართველოს წარმომადგენლის დანიშვნა ხელს შეუწყობს, ერთი მხრივ, ჩვენი ქვეყნის აქტიურ წარმოჩენას და პოზიციონირებას ევროპის საბჭოს სტრუქტურებში, ხოლო მეორე მხრივ, საქართველოში გარემოსდაცვითი პოლიტიკის ეფექტიანად განხორციელებას.  გარემოს დაცვის სფეროში ბერნის კონვენცია ერთ-ერთი უმნიშვნელოვანესია. კონვენციის დანერგვისა და საქართველო-ევროკავშირს შორის ასოცირების შეთანხმებით აღებული ვალდებულების შესრულებისათვის, საქართველოში ზურმუხტის ქსელი შეიქმნა და მისი განვითარება მიმდინარეობს. 2021 წლის მდგომარეობით, საქართველოში, ზურმუხტის ქსელი 66 ტერიტორიისგან შედგება და მისი ფართობი 1 307 501 ჰექტარს შეადგენს. ამ ეტაპზე, ზურმუხტის ქსელის ტერიტორიების მართვის გეგმების შემუშავება მიმდინარეობს.აღსანიშნავია, რომ გერმანიის მთავრობის დაფინანსებით, 2021 წლის 15-16 დეკემბერს, დაგეგმილია ბერნის კონვენციის ბილატერალური ბიოგეოგრაფიული სემინარი საქართველოსთვის, რომლის ფარგლებშიც, განახლდება კონვენციით დაცული სახეობებისა და ჰაბიტატების საკონსერვაციო სტატუსები საქართველოს თითოეული ბიოგეოგრაფიული რეგიონისთვის.
#

გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი ნორვეგიის ელჩის მოადგილეს მარკო სოლდიკის შეხვდა.

შეხვედრაზე, მხარეებმა პლასტმასის მოხმარებით გამოწვეული გარემოს დაბინძურების საკითხებთან დაკავშირებული გაეროს გარემოსდაცვითი ანსამბლეის რეზოლუცია (UNEA 5.2) განიხილეს.  რეზოლუციის მიზანი მთავრობათაშორისი მოლაპარაკებების კომიტეტის დაარსებაა (INC). კომიტეტი უფლებამოსილი იქნება, წარმართოს მოლაპარაკებები პლასტიკით დაბინძურებასთან დაკავშირებული იურიდიულად სავალდებულო ძალის მქონე გლობალური შეთანხმების თაობაზე. შედეგად, პლასტიკის ნარჩენებით გარემოს დაბინძურების შემცირება და პლასტიკთან მიმართებით ცირკულარული ეკონომიკის მიდგომების დამკვიდრება უნდა იქნას უზრუნველყოფილი.  შეხვედრაზე, მხარეები საქართველოს გარემოს დაცვისა და სოფლის მეურნეობის სამინისტროსა და ნორვეგიის კლიმატისა და გარემოს დაცვის სამინისტროს ექსპერტების სამუშაო შეხვედრის ჩანიშვნაზე შეთანხმდნენ, რათა დეტალურად განიხილონ გარემოსდაცვით ანსამბლეაზე (UNEA) წარსადგენი რეზოლუცია და განისაზღვროს საქართველოს, როგორც ჩართული მხარის, ზუსტი კონტრიბუცია.
#

ლევან დავითაშვილი უნგრეთის რესპუბლიკის ახლად დანიშნულ საგანგებო და სრულუფლებიან ელჩს საქართველოში, ანა მარია შიკოს შეხვდა

გარემოს დაცვისა და სოფლის მეურნეობის მინისტრი ლევან დავითაშვილი უნგრეთის რესპუბლიკის ახლად დანიშნულ საგანგებო და სრულუფლებიან ელჩს საქართველოში, ანა მარია შიკოს შეხვდა.  ლევან დავითაშვილმა ელჩს საქართველოში დიპლომატიური მისიის დაწყება მიულოცა და მომავალ საქმიანობაში წარმატება უსურვა.გაცნობითი ხასიათის შეხვედრაზე, მხარეებმა ქვეყნებს შორის სამომავლო თანამშრომლობის საკითხები განიხილეს.  ლევან დავითაშვილმა ხაზი გაუსვა საქართველოსა და უნგრეთის რესპუბლიკას შორის არაერთი მიმართულებით პარტნიორული ურთიერთობების მნიშვნელობას.  ანა მარია შიკომ აღნიშნა, რომ აქტიურად იმუშავებს ქვეყნებს შორის თანამშრომლობის შემდგომ გაღრმავებაზე.  შეხვედრაზე საუბარი შეეხო უნგრეთში საქართველოს გარემოს დაცვისა და სოფლის მეურნეობის სამინისტროს დელეგაციის ვიზიტსაც, რომელიც მიმდინარე წლის დეკემბერშია დაგეგმილი.
#

28 ნოემბრის მონაცემებით საქართველოდან 66.8 მლნ აშშ დოლარის თხილის ექსპორტი განხორციელდა

იმდინარე წლის 1 აგვისტოდან 28 ნოემბრის ჩათვლით საქართველოდან 14.6 ათასი ტონა თხილის ექსპორტი განხორციელდა, რომლის ღირებულებამ 66.8 მლნ აშშ დოლარი შეადგინა.  ქართული თხილის ექსპორტი, ძირითადად, ევროკავშირის ბაზრებზე ხორციელდება - იტალიაში (5,957 ტონა), გერმანიაში (2,628 ტონა), ესპანეთში (424 ტონა), ჩეხეთში (423 ტონა), პოლონეთში (337 ტონა), ლიეტუვაში (284 ტონა), საფრანგეთში (239 ტონა), ბულგარეთში (132 ტონა), საბერძნეთში (71 ტონა), ლატვიაში (70 ტონა), ესტონეთში (60 ტონა), ბელგიაში (41 ტონა), უნგრეთში (22 ტონა), ხორვატიაში (20 ტონა). ქართული თხილი ექსპორტზე გადის: სომხეთში (930 ტონა), ჩინეთში (780 ტონა), უკრაინაში (256 ტონა), რუსეთში (337 ტონა), ალჟირში (241 ტონა), საუდის არაბეთში (208 ტონა), ბელარუსში (186 ტონა), ერაყში (168 ტონა), შვეიცარიაში (151 ტონა), მექსიკაში (120 ტონა), კანადაში (95 ტონა), აზერბაიჯანში (82 ტონა), არგენტინაში (77 ტონა), არაბთა გაერთიანებულ ემირატებში (61 ტონა), ყაზახეთში (45 ტონა), უზბეკეთში (44 ტონა), გაერთიანებულ სამეფოში (22 ტონა), თურქეთში (22), ყირგიზეთში (22 ტონა), ტუნისში (15 ტონა), იორდანიაში (14 ტონა).
#

28 ნოემბრის მონაცემებით საქართველოდან 8 376 ტონა მანდარინის ექსპორტი განხორციელდა

2021 წლის 1 სექტემბრიდან 28 ნოემბრამდე პერიოდში საქართველოდან 8 376 ტონა მანდარინის ექსპორტი განხორციელდა, რომლის ღირებულებამ 4.0 მლნ აშშ დოლარი შეადგინა.  აღნიშნულ პერიოდში განხორციელებული მანდარინის ექსპორტის მოცულობა 113%-ით, ხოლო ექსპორტის ღირებულება 109%-ით გაიზარდა 2020 წლის ანალოგიური პერიოდის მაჩვენებელთან შედარებით.  მიმდინარე წელს წარმოებული მანდარინის ექსპორტი განხორციელდა რუსეთში (5153 ტონა), სომხეთში (2221 ტონა), უკრაინაში (651 ტონა), მოლდოვაში (141 ტონა), ყაზახეთში (61 ტონა), ყირგიზეში (60 ტონა), სლოვენიასა (50 ტონა) და სხვა ქვეყნებში (39 ტონა).