ახალი ამბები
დავით სონღულაშვილი გურჯაანში ატმის მოსავლის დაბინავების პროცესს ადგილზე გაეცნო
გარემოს დაცვისა და სოფლის მეურნეობის მინისტრი დავით სონღულაშვილი ატმის მოსავლის დაბინავების სამუშაო პროცესს სოფელ ჩუმლაყში გაეცნო. მინისტრი ადგილობრივ ფერმერებს და სამაცივრე მეურნეობის წარმომადგენლებს შეხვდა.
შეხვედრა ფერმერ სოსო გიოშვილის სამაცივრე მეურნეობაში გაიმართა. სოსო გიოშვილმა სამაცივრე ინფრასტრუქტურის მოწყობის მიზნით პროექტით „შეღავათიანი აგროკრედიტი“ არაერთხელ ისარგებლა.
„ამ ეტაპზე, მოსავლის აღება აქტიურ ფაზაშია. პროდუქციის დაბინავება და რეალიზაცია შეფერხების გარეშე ხდება. 50-მდე სამაცივრე მეურნეობა გამართულად ფუნქციონირებს. ამ ინფრასტრუქტურის შექმნაში სახელმწიფო პროექტებმა გადამწყვეტი როლი ითამაშა. მხოლოდ კახეთში სახელმწიფოს თანადაფინანსებით 25 გადამმუშავებელი საწარმოა შექმნილი. გარდა ამისა, შესაბამისი უწყებების კოორდინაციით, ატმისა და ვაშლატამას ექსპორტის ხელშეწყობის მიზნით, საჭირო დოკუმენტაციის მომზადება და გაცემა „ერთი ფანჯრის“ პრინციპით ხორციელდება. პროცესში ჩართული არიან ფიტოსანიტარიული და საბაჟო სამსახურების წარმომადგენლები. აქვე მინდა აღვნიშნო, მოგეხსენებათ, სოფლის მეურნეობის პროდუქცია მალფუჭებადია. გადატანის დროს გზაში დაყოვნების გარეშე მოძრაობა მნიშვნელოვანია. საპატრულო პოლიციის ჩართულობით ეს საკითხიც მოგვარებულია და დატვირთული მანქანები ტერმინალამდე შეუფერხებლად გადაადგილდებიან“, - განაცხადა დავით სონღულაშვილმა.
შეხვედრაზე აღინიშნა, რომ, შემნახველი და გადამმუშავებელი ინფრასტრუქტურის განვითარების მიზნით, სახელმწიფო აქტიურად აგრძელებს სექტორის მხარდაჭერას. კახეთის რეგიონში ატმის მიღების პროცესში სახელმწიფო პროგრამების ხელშეწყობით შექმნილი 50 -ზე მეტი სამაცივრე მეურნეობაა ჩართული. რაც შეეხება გადამმუშავებელი ინფრასტრუქტურის მიმართულებით სახელმწიფო მხარდაჭერას, მხოლოდ „გადამმუშავებელი და შემნახველი საწარმოების თანადაფინანსების პროგრამის“ ფარგლებში, საქართველოს მასშტაბით, 111 გადამმუშავებელი საწარმოს შექმნა სოფლის განვითარების სააგენტოს მიერ 51 მლნ ლარზე მეტით არის თანადაფინანსებული, მათ შორის კახეთში - 25 საწარმო 11,6 მლნ ლარით.
მინისტრთან ერთად, გარემოს დაცვისა და სოფლის მეურნეობის მინისტრის მოადგილე კახა კაკაბაძე, სახელმწიფო რწმუნებული კახეთის მხარეში გიორგი ალადაშვილი, სურსათის ეროვნული სააგენტოს უფროსი ზურაბ ჩეკურაშვილი და ადგილობრივი თვითმმართველობის წარმომადგენლები იმყოფებოდნენ.