ახალი ამბები
დავით სონღულაშვილი ბელარუსის რესპუბლიკის ელჩს შეხვდა
გარემოს დაცვისა და სოფლის მეურნეობის მინისტრი დავით სონღულაშვილი ბელარუსის რესპუბლიკის საგანგებო და სრულუფლებიან ელჩს საქართველოში, ნიკოლაი როგაშჩუკს შეხვდა. შეხვედრაზე მხარეებმა სოფლის მეურნეობის პროდუქტებით ვაჭრობის ბრუნვის ზრდისა და გარემოს დაცვის მიმართულებით თანამშრომლობის გაღრმავების საკითხები განიხილეს.„ჩვენს ქვეყნებს შორის ყოველთვის არსებობდა მჭიდრო ეკონომიკური თანამშრომლობა, თუმცა კვლავ რჩება მნიშვნელოვანი პოტენციალი სავაჭრო ბრუნვის ზრდის მიმართულებით. არსებული ტენდენცია დადებითია - ორმხრივი ვაჭრობა წლიდან წლამდე იზრდება. შეგვიძლია მნიშვნელოვნად გავზარდოთ ექსპორტი ვაშლის, ციტრუსის, ხურმის, ასევე უალკოჰოლო და ალკოჰოლიანი სასმელების მიმართულებით,“ - აღნიშნა დავით სონღულაშვილმა.
შეხვედრაზე განსაკუთრებული ყურადღება დაეთმო დაცული ტერიტორიებისა და ეროვნული პარკების თანამშრომლობის შესაძლებლობების გაძლიერებას, ასევე გადაშენების პირას მყოფი ცხოველებისა და ფრინველების დაცვის მიმართულებით ერთობლივი პროექტების განხორციელებას.
„ჩვენ ყოველთვის მზად ვართ თანამშრომლობის გასაღრმავებლად, როგორც გარემოს დაცვის, ისე სოფლის მეურნეობის მიმართულებით. ბოლო წლებში ბელარუსული პროდუქციის ექსპორტი საქართველოში სტაბილურად იზრდება, რაც ჩვენს პარტნიორობას კიდევ უფრო ამყარებს. ამ დროისთვის ქვეყანაში უკვე ფუნქციონირებს 32 ბელარუსული მაღაზია, რაც ნათლად ასახავს ორმხრივი სავაჭრო ურთიერთობების განვითარების ტენდენციას,“ - აღნიშნა ნიკოლაი როგაშჩუკმა.
სამინისტროში გამართულ შეხვედრას გარემოს დაცვისა და სოფლის მეურნეობის მინისტრის მოადგილე კახა კაკაბაძე ესწრებოდა.