დავით სონღულაშვილი გურიის სატყეო სამსახურის თანამშრომლებს შეხვდა და სამუშაო პირობებს ადგილზე გაეცნო

გარემოს დაცვისა და სოფლის მეურნეობის მინისტრი დავით სონღულაშვილი, გურიის  რეგიონში  სახელმწიფო რწმუნებულთან, გიორგი ღურჯუმელიძესთან ერთად,  გურიის სატყეო სამსახურის ოფისში  თანამშრომლებს შეხვდა და  სამუშაო პირობებს ადგილზე გაეცნო. 

გურიის სატყეო სამსახურში დასაქმებულია 80 თანამშრომელი, მათ შორის  5 მეტყევე და 39 ტყის მცველია.  რეაბილიტირებული ოფისი გურიის რეგიონის 184 სოფლის მოსახლეობას ემსახურება. ადგილობრივი მოსახლეობა განახლებულ სივრცეში სარგებლობს ეროვნული სატყეო სააგენტოს  სერვისებით. სააგენტოს სხვა პრიორიტეტულ მიმართულებებთან ერთად, მრავალმიზნობრივი ტყითსარგებლობის დამკვიდრება, გარემოსდაცვითი პოლიტიკის შემადგენელი ნაწილია, რაც მოიცავს კერძო სექტორის ხელშეწყობას, ტყის არამერქნული რესურსებით სარგებლობისა და ეკოტურიზმის განვითარების მიმართულებებით. ეს ყველაფერი კი, ხელს შეუწყობს რეგიონში დამატებითი სამუშაო ადგილების შექმნას და შემოსავლების მიღების შესაძლებლობების ზრდას.

აღსანიშნავია, რომ  გურიაში ტყის აღდგენის ღონისძიებები 700 ჰექტრამდე ფართობზე მიმდინარეობს. რაც შეეხება ინვენტარიზაციას, რეგიონში ტყის ინვენტარიზაცია 2017-2025 წლებში განხორციელდა და 74 600 ჰექტრისთვის  სრულადაა განახლებული ინფორმაცია ტყეების რაოდენობრივი და ხარისხობრივი მაჩვენებლების შესახებ. მომზადებულია ტყის მართვის გეგმები მომავალი 10 წლიანი პერიოდისთვის, რაც სატყეო-სამეურნეო ღონისძიებების ეფექტიანად წარმართვის საფუძველია. 

მინისტრთან ერთად მინისტრის მოადგილეები კახა კაკაბაძე, ზურაბ ეზუგბაია და ადგილობრივი თვითმმართველობების წარმომადგენლები იმყოფებოდნენ.