ახალი ამბები
დავით სონღულაშვილი ესპანური გასტრონომიული კომპანიის Vocento Gastronomía წარმომადგენლებს შეხვდა
გარემოს დაცვისა და სოფლის მეურნეობის მინისტრი დავით სონღულაშვილი ესპანური გასტრონომიული კომპანიის Vocento Gastronomía-ს გენერალურ დირექტორ ბენჯამინ ლანას და მარკეტინგისა და ბიზნესის განვითარების დირექტორ ლუის მარტის შეხვდა.
შეხვედრას საქართველოს ტურიზმის ეროვნული ადმინისტრაციის ხელმძღვანელი მაია ომიაძე ესწრებოდა.
დავით სონღულაშვილმა ისაუბრა გასტრონომიული სექტორის განვითარების ხელშეწყობის მნიშვნელობაზე, რაც პირდაპირ კავშირშია ქართული პროდუქტების პოპულარიზაციასთან და წარმოების სტიმულირებასთან, ასევე, აგროსექტორის და, რაც მთავარია, ღვინის სექტორის განვითარებასთან.
მინისტრის განცხადებით, კახეთში, გურჯაანის მუნიციპალიტეტში, ბასკეთის კულინარიული ცენტრის ხელშეწყობით, იგეგმება გასტრონომიული აკადემიის გახსნა, სადაც კომპანიის Vocento Gastronomía გამოცდილების გაზიარება და მხარდაჭერა განსაკუთრებით მნიშვნელოვანი იქნება.
როგორც შეხვედრაზე ტურიზმის ეროვნული ადმინისტრაციის ხელმძღვანელმა, მაია ომიაძემ განაცხადა, აქტიურად მიმდინარეობს აღნიშნული მიმართულებით სტრატეგიულ დოკუმენტზე მუშაობა, რაც მნიშვნელოვნად დაეხმარება ქვეყანაში გასტრონომიული ტურიზმის განვითარებას.
საუბარი ასევე შეეხო თანამშრომლობას საერთაშირისო გასტრონომიულ ღონისძიებებში მონაწილეობის მიმართულებით.
„საქართველოს გასტრონომიული სექტორის განვითარების მნიშვნელოვანი პოტენციალი აქვს. ქართულ გასტრონომიას აქვს თავისი განსაკუთრებული მახასიათებლები, რაც მსოფლიოს სხვა ქვეყნებში არ მეორდება“, - განაცხადა ბენჯამინ ლანამ.
აღსანიშნავია, რომ ბენჯამინ ლანა ერთ-ერთი ყველაზე გავლენიანი პროფესიონალია თანამედროვე ესპანურ გასტრონომიაში; მისი კომპანია - Vocento Gastronomía ორგანიზებას უწევს ისეთ მასშტაბურ საერთაშორისო გასტრონომიულ ღონისძიებებს, როგორიცაა Madrid Fusión, San Sebastián Gastronomika, Encuentro de los Mares, Worldcanic.
შეხვედრას ესწრებოდა ესპანეთში მდებარე ქართული რესტორნის „ნუნუკა“ დამფუძნებელი, ნინო კილტავა.