ახალი ამბები
დავით სონღულაშვილმა ნატახტარში სურსათის ეროვნული სააგენტოს ახალი შენობა გახსნა
გარემოს დაცვისა და სოფლის მეურნეობის მინისტრმა დავით სონღულაშვილმა ნატახტარში სურსათის ეროვნული სააგენტოს მცხეთა-მთიანეთის რეგიონული დეპარტამენტის ახალი შენობა დაათვალიერა და თანამშრომლებს შეხვდა.მინისტრმა სააგენტოს ინსტიტუციური შესაძლებლობების გაძლიერების მნიშვნელობაზე გაამახვილა ყურადღება.
„დღეიდან, სურსათის ეროვნულ სააგენტოს მცხეთა-მთიანეთში საკუთარი ოფისი ექნება, სადაც ყველა პირობაა შექმნილი იმისათვის, რომ თანამშრომლებს ჰქონდეთ შესაბამისი სამუშაო პირობები, ხოლო რეგიონის მოსახლეობას შესაძლებლობა, მიიღოს მაღალი ხარისხის მომსახურება და ისარგებლოს სახელმწიფო პროგრამებით“,-აღნიშნა დავით სონღულაშვილმა.
სურსათის ეროვნული სააგენტო ყველა მუნიციპალიტეტში უწყვეტად ახორციელებს სურსათის უვნებლობის სახელმწიფო კონტროლს. განსაკუთრებული ყურადღება ეთმობა საზოგადოებრივი კვების ობიექტების, საბავშვო ბაღებისა და სკოლების კვების ბლოკების, სასაკლაოების და ხორცის სარეალიზაციო მაღაზიების შემოწმებას. მესაქონლეობის განვითარების ხელშეწყობის მიზნით, მნიშვნელოვანია ის ვეტერინარული მანიპულაციები, რომლებსაც სააგენტოს ვეტერინარები ყოველდღიურ რეჟიმში ახორციელებენ, მათ შორის, ცხოველების უფასო ვაქცინაციას შემდეგ დაავადებებზე: ცოფი, ჯილეხი, თურქული, ბრუცელოზი; აქტიურად მიმდინარეობს მცენარეთა მავნებლების საწინააღმდეგო ღონისძიებებიც.
გარემოს დაცვისა და სოფლის მეურნეობის მინისტრთან ერთად, მინისტრის მოადგილე კახა კაკაბაძე, სახელმწიფო რწმუნებული მცხეთა-მთიანეთის მხარეში ალექსანდრე ზაგაშვილი, სურსათის ეროვნული სააგენტოს ხელმძღვანელი პირები და ადგილობრივი თვითმმართველობის წარმომადგენლები იმყოფებოდნენ.